تازيون خبرون

Daily Archives: February 4, 2016

پي آءِ اي ملازمن جو قتل: واقعي جي جاچ لاءِ عدالتي ڪميشن جوڙڻ جو ٺهراءُ منظور

ڪراچي (اسٽاف رپورٽر) سنڌ اسيمبلي پي آءِ اي جي ٽن ملازمن جي قتل ۽ صحافين تي تشدد واري واقعي جي جاچ لاءِ جوڊيشل ڪميشن جوڙڻ بابت گڏيل ٺهراءُ منظور ڪري ورتو. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو. پيپلز پارٽي جا ميمبر پي آءِ اي ملازمن تي تشدد واري واقعي خلاف ٻانهن تي ڪاريون پٽيون ٻـَڌي اجلاس ۾ شريڪ ٿيا. اجلاس دوران سينيئر صوبائي وزير نثار کهڙي، پي آءِ اي ملازمن ۽ ميڊيا جي نمائندن تي تشدد واري واقعي جي جاچ لاءِ عدالتي ڪميشن جوڙڻ بابت ٺهراءُ پيش ڪيو. حڪومت طرفان ٺهراءُ پيش ڪرڻ تي ايم ڪيو ايم ميمبرن اعتراض ڪندي احتجاج ڪيو. ان دوران اپوزيشن ليڊر خواجا اظهارالحسن ۽ صوبائي وزير نثار کهڙي وچ ۾ سخت جملن جي ڏي وٺ پڻ ٿي جنهن سبب ايوان ۾ گوڙ پيدا ٿي ويو ۽ اپوزيشن ميمبر اٿي بيهي رهيا. ان موقعي تي اسپيڪر آغا سراج دراني اپوزيشن ميمبرن کي پنهنجين سيٽن تي ويهڻ جي هدايت ڪئي. خواجا اظهار الحسن چيو ته حڪومت پاران ٺهراءَ جي ڪاپي فراهم نه ڪئي وئي،قرارداد پيش ڪرڻ کان اڳ سڀني کي ڪاپي ڏيڻ گهرجي. خواجا اظهار الحسن چيو ته حڪومت پنهنجي مرضي جا بل ۽ ٺهراءَ اسيمبلي ۾ آڻڻ چاهي ٿي. اپوزيشن ليڊر چيو ته کيس ٺهراءَ جي ڪاپي ملي ئي ناهي، پوءِ اعتراض ڪهڙي ڳالهه جو هـُجي؟سڀني کي گڏ وٺي هلڻ گهـُرجي. خواجا اظهار الحسن چيو ته گذريل ڏينهن متحده ميمبر ڪامران اختر پي آءِ اي جي ملازمن تي تشدد خلاف ٺهراءُ جمع ڪرايو هو. ان موقعي تي ڊپٽي اسپيڪر شهلا رضا چيو ته ڪامران اختر جو جمع ڪرايل ٺهراءُ رڳو صحافين تي تشدد جو هو. خواجا اظهار الحسن چيو ته ٺهراءَ ۾ زخمي ٿيل صحافين جا نالا به شامل ڪيا وڃن. صوبائي وزير نثار کهڙي چيو ته ٺهراءَ ۾ صحافين جا نالا آڻڻ ضروري ناهن، بحث ۾ انهن جا نالا وٺي سگهجن ٿا. هن چيو ته هن پي آءِ اي واقعي جي جاچ لاءِ ڪميشن جوڙڻ جي درخواست ڪئي آهي، ٺهراءَ ۾ اهڙي ڪا به ڳالهه ناهي جنهن تي اعتراض ڪيو وڃي. هن چيو ته سندن ٺهراءَ ۾ ترميم نه ڪئي وڃي، جنهن کي ٺهراءُ آڻڻو آهي اهو پنهنجي ڌار قرارداد آڻي. بعد ۾ پيپلز پارٽي، ايم ڪيو ايم، تحريڪ انصاف، نون ليگ ۽ فنڪشنل ليگ ميمبرن پي آءِ اي ملازمن ۽ صحافين تي تشدد بابت گڏيل ٺهراءُ آندو. گڏيل ٺهراءَ ۾ مطالبو ڪيو ويو ته پي آءِ اي جي ٽن ملازمن جي قتل ۽ صحافين تي تشدد واري واقعي جي شفاف جاچ لاءِ جوڊيشل ڪميشن جوڙي وڃي. پ پ ميمبر امداد پتافي چيو ته ڪالهه وارو ڏينهن ملڪي تاريخ جون ڪارو ڏهاڙو هو، حڪمران ضياءَ الحق جي پيداوار آهن ۽ سندس روح کي خوش ڪرڻ لاءِ اهڙو عمل ڪيو آهي. پ پ جي سڪندر شوري چيو ته حڪمران ملڪ کي به خانگائڻ لاءِ تيار ٿي ويا آهن، عوام کان احتجاج جو حق کسيو پيو وڃي. نون ليگ ميمبر سورٺ ٿيٻو چيو ته پي آءِ اي واقعي تي سڄي قوم کي ڏک آهي، پر سنڌ اسيمبلي ۾ ٿر جي معاملي تي ٺهراءُ ڇو نه ٿو آندو وڃي، ڇا اهي اسان جا ٻچا ناهن؟ هن چيو ته اڄ جيڪي واڳون وارا ڳوڙها ڳاڙهي رهيا آهن انهن کان پڇيو وڃي ته ادارن ۾ ڪرپشن جون پاڙون ڪنهن مضبوط ڪيون؟ ڊپٽي اسپيڪر شهلا رضا چيو ته حڪمران پي آءِ اي جي ڪـَڍ لڳل آهي، انهن ٻاهران اهي جهاز گهـُرايا جيڪي ٻين ملڪن پاڻ وٽ هلائڻ کان انڪار ڪري ڇڏيو هو. شهلا رضا چيو ته پي آءِ اي حڪمرانن جي ماءُ جو زيور ناهي، جو جڏهن چاهين وڪرو ڪن، هاڻي 12 مئي وارو دور گــُذري ويو. فنڪشنل ليگ ميمبر مهتاب اڪبر راشدي چيو ته گولي ڪٿان هلي اهو وڏو سوال آهي، اهي ڪير آهن جيڪي ميڙ ۾ اچي گوليون هلائي وڃن ٿا؟ هن چيو ته سياسي بنيادن تي ماڻهن کي ادارن ۾ ڀرتي ڪيو وڃي ٿو، هر اچڻ واري حڪومت نون ماڻهن کي ڀرتي ڪري ادارن ۾ بحران پيدا ڪندي آهي. پي ٽي آءِ ميمبر حفيظ الدين چيو ته پي آءِ اي ملازمن تي فائرنگ جي جاچ لاءِ جي آءِ ٽي جوڙي وڃي ۽ واقعي تي حڪمرانن کان بنا دير حساب ورتو وڃي. اپوزيشن ليڊر خواجا اظهار الحسن چيو ته صوبائي ۽ وفاقي حڪومتون هڪٻئي تي الزام هڻي رهيون آهن، ٻئي حڪومتون عوام کي اهميت نه پيون ڏين. هن چيو ته احتجاج سڄي ملڪ ۾ ٿيو پر گوليون ڪراچي ۾ هلايون ويون. صوبائي وزير نثار کهڙي چيو ته پي آءِ اي ملازمن سان وفاقي حڪومت جو رويو غير جمهوري آهي. هن چيو ته پي آءِ اي کي خانگائڻ نه ڏنو ويندو، ادارا خانگائڻ سان ڪڏهن به فائدو نه ٿيو آهي. فنڪشنل ليگ ميمبر ڄام مدد علي چيو ته سنڌ ۾ احتجاجن تي حملن جي روايت پئجي وئي آهي، پي آءِ اي ۾ سياسي ڀرتيون ڪيون ويون هيون. ڄام مدد علي چيو ته ڪراچي آپريشن جو ڪپتان پي آءِ اي ملازمن تي گوليون هلائڻ واري واقعي جو ذميوار آهي. فنڪشنل ليگ جي ئي ميمبر شهريار مهر چيو ته پي آءِ اي خساري ۾ ناهي پر اتي آفيسرن کي پگهارون ۽ مراعتون وڌيڪ ڏنيون وڃن ٿيون. بحث کانپوءِ ايوان گڏيل ٺهراءَ اتفاق راءِ سان منظور ڪري ورتو جڏهن ته اسپيڪر اجلاس سڀاڻي تائين ملتوي ڪري ڇڏيو.

 

پي آئي اي ملازمن جي قتل تي ماڊل ٽائون سانحي جيان ڍَڪُ نه رکڻ ڏينداسين: آصف زرداري

ڪراچي(اسٽاف رپورٽر) اڳوڻي صدر ۽ پاڪستان پيپلز پارٽي پارليامينٽيرينز جي صدر آصف علي زرداري پي آئي اي جي ملازمن جي ظالماڻا قتل تي ڏک جو اظهار ڪندي واقعي تي سخت لفظن ۾ مذمت ڪندي مطالبو ڪيو ته اهي ماڻهو جيڪي ان جا ذميوار آهن ترت ئي انهن جي مک تان پڙدو هٽايو وڃي ۽ انهن کي قانون جي ڪٽهڙي ۾ آڻي سخت سزا ڏني وڃي.آيف زرداري جو چوڻ هو ته پي آئي اي جي انهن ملازمن جي خلاف طاقت جو استعمال ڏوهه وارو عمل آهي،جيڪي پنهنجي قانوني حق لاءِ احتجاج ڪري رهيا هئا،ڇو ته سندس روزگار خطري ۾ آهي.ان واقعي تي تمام گهڻو ڏک پهتو آهي ۽ ذميوارن کي ترت سزا ڏني وڃي.اڳوڻي صدر جي ترجمان فرحت الله بابر چيو ته اڳوڻي صدر اها ڳالهه به چئي هئي ته عوام ڪنهن به ريت  لاهور ماڊل ٽائون واقعي جيان هن واقعي تي پڙدو وجهڻ جي ڪنهن کي به اجازت نه ڏيندو ۽ پيپلز پارٽي به ان قتل تي ڍڪ وجهڻ جي اجازت نه ڏيندي.ان واقعي حڪومت جي صورتحال کان طاقت ذريعي منهن ڏيڻ جي ڪوشش کي بينقاب ڪيو آهي ۽ حڪومت پي آئي اي جو معاملو حل ڪرڻ ۾ ناڪام ٿي چڪي آهي.سندس چوڻ هو ته وفاقي وزيرن جي نجڪاري بابت ٻٽي سياست ان ڳالهه مان به ثابت ٿي چڪي آهي ته لازمي سروس قلم لاڳو ڪري هو ڪارڪنن کي دٻائڻ چاهين ٿا.

 

پي آئي اي ۽ واپڊا جي مزدورن تي ظلم نه ڪيو وڃي، مزدور ۽ هاري هڪ ٿي ويا ته وزيراعظم جو خير ناهي: خورشيد شاهه

راولپنڊي (م.ڊ) قومي اسيمبلي ۾ مخالف ڌر جي اڳواڻ خورشيد شاهه چيو آهي ته پي آئي اي ۽ واپڊا جي مزدورن تي ظلم نه ڪيو وڃي،جيڪڏهن مزدور ۽ هاري هڪ ٿي ويا ته وزيراعظم جو خير ناهي. پيپلز پارٽي جا اڳواڻ خورشيد شاهه ۽ قمر الزمان قائرا راولپنڊي ۾ احتجاج ڪندڙ پي آئي اي ملازمن جي ڌرڻي ۾ پهتا ۽ انهن سان ٻڌي جو اظهار ڪيو.ان موقعي تي ڳالهائيندي خورشيد شاهه چيو ته وزيراعظم نوازشريف هڪ مهينو اڳ قومي ادارن جي  جي نجڪاري نه ڪرڻ جو چيو هو۽ ادارن جي نجڪاري نه  ڪرڻ به مسلم ليگ ن جي منشور جو حصو آهي،پاڪستان جي مزدور کي مزدور نه سمجهيو وڃي ۽ جيڪڏهن سرڪاري ملازم ۽ هاري هڪ ٿي  ويا ته وزيراعظم جو خير ناهي.سندس چوڻ هو ته وزيراغظم جمهوريت جا عذاب ڀوڳيا ۽ پنهنجي حڪومت به وڃائي پر هن انهن مان ڇا سکيو، گذريل ڏينهن هن پي آئي اي ملازمن لاءِ جيڪو ڪجهه چيو اها ڳالهه ضياالحق يا پرويز مشرف ڪري ها ته گهڻو عجيب نه لڳي ها ،پر توهان چيو هو ته مان آخري ماڻهو هوندس جيڪو نجڪاري جي ڳالهه ڪندس. مخالف ڌر جي اڳواڻ خورشيد شاهه چيو ته تاريخ ٻڌائي ٿي ته ايوب خان کان وڌيڪ سگهارو ڪو به جرنل نه هو ۽ هن جيڪڏهن  هڪ بي ڏوهي شاگرد کي قتل ڪرايو ته مزدور هڪ ٿي ويا ۽ کيس اقتدار تان هٿ ڌوئڻا پيا،مزدورن کي بي روزگار نه ڪيو وڃي،مزدور توهان جو اقتدار نه پر پنهنجو حق گهري رهيا آهن.خورشيد شاهه سنڌ حڪومت کي درخواست ڪئي ته ڪراچي ائرپورٽ واقعي تي جڊيشل ڪميشن جوڙي وڃي.

 

پي آئي اي ملازمن تي گوليون هلائڻ سازش هئي: وزيراعظم کي رپورٽ پيش

اسلام آباد (بيورو) پي آئي اي ملازمن جي احتجاج ۾ ڪنهن به سطح تي مظاهرو ڪندڙن تي گولي هلائڻ جو حڪم نه ڏنو ويو هو.واقعي بابتوزيراعظم کي پيش ڪيل رپورٽ ۾ چيو ويو آهي ته پي آئي اي جي بهتري لاءِ ڪوششون خراب ڪرڻ جي سازش ٿي.تفصيل مطابق وزيراعظم نوازشريف کي ڪراچي ۾ ٿيندڙ واقعي جي رپورٽ پيش ڪئي وئي.رپورٽ ۾ ٻڌايو ويو ته ڪنهن به سطح تي مظاهرو ڪندڙن تي گولي هلائڻ جو حڪم نه ڏنو ويو هو،اها پي آئي اي جي بهتري لاءِ ڪيل ڪوششن کي خراب ڪرڻ جي سازش هئي.رپورٽ ۾ وزيراعظم کي صلاح ڏني وئي آهي ته حڪومت هاڻي نجڪاري جي معاملي تي پوئتي نه هٽي.هي حالتون جاري رهيون ته پي آئي اي کي ڪجهه ڏينهن لاءِ بند ڪرڻ سان به ڪو فرق نه پوندو،جڏهن ته سروس ايڪٽ لاڳو ٿيڻ کانپوءِ پي آئي اي ۾ ڪنهن ايڪشن ڪميٽي يا يونين جي ضرورت ناهي.پي آئي اي چيئرمين ناصر جعفر جي استعيفيٰ جي حوالي سان به آخري فيصلو وزيراعظم ترت ڪندو. اهو فيصلو به ڪيو ويو آهي ته حڪومت پي آئي اي جو نجڪاري بابت بل سينيٽ مان پاس نه ٿيڻ جي صورت ۾ گڏيل اجلاس ۾ منظور ڪرائيندي.ٻئي پاسي پي آئي اي جي مظاهرو ڪندڙن کي منهن ڏيڻ لاءِ سيڪيورٽي پلان به مٽايو ويو آهي.

 

عزير بلوچ جا “را” سان رابطا،ايم پي اي ثانيا ناز جي گهر تي ڇاپو

ڪراچي(اسٽاف رپورٽر) رينجرز لياري گينگ وار جي ،مک اڳواڻ عزير بلوچ جي جي آئي ٽي لاءِ سنڌ جي  گهرو کاتي کي خط لکيو آهي،جاچ اداري جي  ذريعن جو چوڻ آهي ته عزير بلوچ پاڙيواري ملڪ جي ڳجهي ايجنسي “را” سان رابطن جو ڏوهه قبوليو آهي.هن ٻڌايو ته هوڪراچي کان ڀڄڻ کانپوءِ ان ئي ايجنسي جي مدد سان پهرين ايران،پوءِ مسقط ۽ دبئي پهتو هو،جتي پيپلز پارٽي جي اهم اڳواڻن به ساڻس رابطا ڪيا هئا.ذريعن جو چوڻ آهي ته عزير بلوچ جي ليبر کاتي،پوليس ۽ فشريز ۾ ڀرتيون ڪرائڻ ۽ فشريز جي گرفتار چيئرمين سلطان قمر صديقي کان هٿيارن جي ڏي وٺ جو به انڪشاف ڪيو.عزير بلوچ اهو به مڃيو ته هن ڌار ٿيندڙ ڪاوڙيل بلوچ اڳواڻ ڊاڪٽر الله نذر کي لياري ۾ پناهه ڏياري هئي.هوڏانهن لياري کان سنڌ اسيمبلي جي مميبر ثانيا ناز جي گهر قانون لاڳو ڪندڙ ادارن ڇاپو هڻي اهم دستاويز ۽ پاسپورٽس هٿ ڪيا آهن.ذريعن مطابق قانون لاڳو ڪندڙ ادارن سنڌ اسيمبلي جي ميمبر ثانيا ناز کان اڌ ڪلاڪ پڇاڳا ڪئي ۽ عزير بلوچ بابت سوال به ڪيا.

 

ڪرپشن ڪيس: ڊاڪٽر عاصم جي گهرڀاتين کي به جاچ ۾ شامل ڪرڻ جو فيصلو

ڪراچي (اسٽاف رپورٽر) نيب  اربين رپين جي ڪرپشن ۽ زمينن تي قبضي جي خلاف گرفتار ڏوهاري ڊاڪٽر عاصم حسين جي گهرڀاتين کي به جاچ ۽ پڇاڳا ۾ شامل ڪرڻ جو فيصلو ڪيو آهي.تفصيل مطابق نيب پاران ڏوهاري ڊاڪٽر عاصم حسين جي خلاف گهيرو وڌيڪ سوڙهو ڪيو پيو وڃي.ڪرپشن ۽ دوکي جي الزام ۾ نيب ڏوهاري عاصم حسين جي گهرڀاتين کي به جاچ ۾ شامل ڪرڻ جو فيصلو ڪيو آهي.نيب ذريعن مطابق ضياالدين ٽرسٽ جي ٽرسٽيز ۾ شامل ڪو چيئرمين ۽ ڊاڪٽر عاصم جي ماءُ، ڌيءُ ۽ پٽ کانسواءِ،سندس ڀيڻ ۽ ناٺين کان به پڇا ڳاڇا ڪئي ويندي.ضياالدين اسپتال جي انتظاميا ۾ شامل ڊاڪٽر عارف حسين،ڊاڪٽرشائق،ڊاڪٽر ڪاشف ۽ صفدر کان به پڇا ڳاڇا ٿيندي.ڊاڪٽر عاصم ۽ ضياالدين اسپتال جي ٽرسٽيز ۾ شامل ميمبرن تي الزام آهي ته هنن خيراتي اسپتال کي ڪمرشل بنيادن تي هلايو ۽ غير قانوني طور تي ملڪيت ٺاهي.ڊاڪٽر عاصم حسين جي گهرڀاتين کان مني لانڊرنگ ۽ خيراتي اسپتال جي نالي تي سرڪاري اراضي تي قبضي جي جاچ به ڪئي ويندي.

 

پي آئي اي ملازمن جا شڪ ختم ڪرڻ بدارن انهن تي تشدد ڪرڻ، ظلم جي حد آهي: عمران خان

پشاور (م.ڊ) چئيرمين تحريڪ انصاف جو چوڻ آهي ته حڪمران ڊڪٽيٽرشپ جي ڪک مان ڄاول آهن،کين جمهوريت جي سمجهه ناهي،اهڙن خيالن جو اظهار پشاور ۾ ميڊيا جي نمائندن سان ڪندي ڪيو،سندس چوڻ هو ته ڪراچي ۾ پي آئي اي ملازمن تي گولي هلائڻ ظلم جي حد آهي،مشرف ۽ ضياءَ واري حڪومت جي دور ۾ به ايترو ظلم نه هو،جيتو اڄ ٿي رهيو آهي ۽ ملڪ ۾ جيتري بيروزگاري اڄ آهي،اوتري پهرين ڪڏهن نه هئي،هاڻوڪا حڪمران ڊڪٽيٽرشپ جي ڪک مان ڄاول آهن.عمران خان جو چوڻ هو ته احتجاج ڪندڙ پي آئي اي جي ملازمن کي شڪ آهي ته هو بيروزگار ٿي ويندا،شڪ ختم ڪرڻ بدران مظاهرو ڪندڙن کي طاقت جي ذريعي دٻايو پيو وڃي.6 فيبروري تي ڪراچي ۽ اسلام آباد جي احتجاج ۾ مان پاڻ شامل ٿيندس.تحريڪ انصاف جي چئيرمين جو چوڻ هو ته پساور جي ليڊي ريڊنگ اسپتال جي نجڪاري نه پيا ڪن پر ان جي نظام ۾ ڦير گهير پيا ڪن ته جئين عوام کي گهڻي کان گهڻو فائدو پهچي سگهي ۽ ليڊي ريڊنگ اسپتال ۾ نجي اسپتالن جهڙيون سهولتون ڏينداسين.سندس چوڻ هو ته گذريل 10 سالن ۾ خيبرپختونخوا خاص طور تي پشاور دهشتگردي کان متاثر ٿيو آهي پر اڄ خيبرپختونخوا ۾ تبديلي اچي چڪي آهي،ماڻهو پساور ڇڏي اسلام آباد ۽ ٻين شهرن ڏانهن هليا ويا آهن پر جيڪي پشاور ڇڏي ويا انهن کي واپس آڻينداسين،عوام کي تفريح ڏيڻ لاءِ ڪم ڪري رهيا آهيون،تفريح لاءِ پشاور ۾ سينيما هائوس ٺاهينداسين.