تازيون خبرون

Daily Archives: February 2, 2016

ملڪ ۾ دهشتگردي کي هٿي ڏيندڙن جو رستو روڪيو ويندو: نواز شريف

اسلام آباد(بيورو) وزيراعظم نوازشريف چيو آهي ته ملڪ مان دهشگردي جومڪمل خاطمو ۽ انتهاپسنديءَ خلاف قومي عزم مضبوط آهي.وزيراعظم نوازشريف جي صدارت هيٺ اعليٰ سطحيٰ اجلاس ٿيو،جنهن ۾ وفاقي گهرو وزير چوڌري  نثار علي خان،آرمي چيف جنرل راحيل شريف،آئي ايس آئي سربراهه ميجر جنرل رضوان اختر ۽ وزيراعظم جي قومي معاملن بابت صلاحڪار ناصر جنجوعه شامل هو.اجلاس  ۾ دهشتگردن خلاف آپريشن ضرب عضب ۽ نيشنل ايڪشن پلان سوڌو ملڪ ۾ امن امان جي صورتحال جو تفصيلي جائزو ورتو ويو.ان موقعي تي وفاقي گهرو وزير چرسدا سانحي تي بريفنگ ڏني ۽ اجلاس ۾ شامل ٿيندڙن کي افغانستان جي زمين استعمال ٿيڻ جون شاهديون به ڏنيون.ان کانسواءِ آرمي چيف جنرل راحيل  شريف ضرب عضب جي حوالي سان به بريفنگ ڏني.جڏهن ته وزيراعظم نوازشريف جو چوڻ هو ته دهشتگردن خلاف قانون لاڳو ڪندڙ ادارن جون بيشمار قربانيون تعريف جي لائق آهن.

 

وزيراعظم کي گهرايوسين ته واپس نه ويندو، اڊِيالا جيل ۾ گهڻي گنجائش آهي: سپريم ڪورٽ

اسلام آباد(بيورو)  سپريم ڪورٽ چيو آهي ته جيڪڏهن وزيراعظم کي گهرايوسين ته واپس نه ويندو، اڊِيالا جيل ۾ گهڻي گنجائش آهي،سپريم ڪورٽ اهڙا ريمارڪس ڪسٽم آفيسر جي درخواست تي عدالتي توهين جي ڪيس جي ٻڌڻي دوران اسٽبلشمينٽ سيڪريٽري جي پيش نه ٿيڻ تي ڪاوڙ ڏيکاريندي ڏنا.21 هين گريڊ جي ڪسٽم آفيسرعمر فاروقي عدالتي حڪم کانپوءِ به کيس سهولتون ۽ رعايتون نه ڏيڻ تي سپريم ڪورٽ سان رابطو ڪيو هو، سندس درخواست جي ٻڌڻي جسٽس شيخ عظمت سعيد جي اڳواڻي ۾ سپريم ڪورٽ جي ٻه رڪني بينچ ڪئي، پٽيشنر جي وڪيل جو موقف هو ته اسٽبلشمينٽ ڊويزن سمري وزيراعظم کي اماڻي هئي، ٻڌڻي دوران اسٽبلشمينٽ ڊويزن جي سيڪريٽري جي پيش نه ٿيڻ تي عدالت سخت ڪاوڙ ڏيکاري، جسٽس شيخ عظمت سعيد ريمارڪس ڏيندي چيو ته 8 مهينن کان عدالت سان کيڏيو پيو وڃي، اهڙي ڳالهه آهي ته وزيراعظم کي گهرائي ٿا وٺون، وزيراعظم آيو ته واپس پنهنجي آفيس نه ويندو، اڊيالا جيل ۾ گهڻي گنجائش آهي. ان موقعي تي اٽارني جنرل چيو ته عدالتي حڪمن تي عمل ڪنداسين ۽ عدالتي حڪم مطابق نئون نوٽيفڪيشن جاري ڪيو ويندو، اٽارني جنرل جو موقف ٻڌڻ کانپوءِ سپريم ڪورٽ ڪسٽم آفيسر عمر فاروقي جي ترقي جو نوٽيفڪيشن جاري ڪرڻ جو حڪم ڏيندي ڪيس جي ٻڌڻي 48 ڪلاڪن تائين روڪي ڇڏي.

 

صدر ڪارو ناڻو اڇو ڪرڻ بابت انڪم ٽيڪس ترميمي بل 2016ع تي صحيح ڪري ڇڏي

اسلام آباد(بيورو)  صدر ممنون حسين انڪم ٽيڪس ترميمي بل 2016ع تي صحيح ڪري ڇڏي آهي،صدر جي اهڙي منظوري کانپوءِ اهو بل قانوني ايڪٽ بڻجي ويو، جيڪو ترت سڄي ملڪ ۾ لاڳو ٿيندو، ڪارو ناڻو اڇو ڪرڻ واري ان انڪم ٽيڪس ترميمي بل جو فائدو رڳو واپاري برادري کي پهچندو، بل مطابق 5 ڪروڙ رپين تائين ٽرن اوور تي 2016ع ۾ ٻڙيِ ڏهائي 2 سيڪڙو ٽيڪس ڏيڻي پوندي، اهڙي ريت 5 کان 25 ڪروڙ تائين هڪ لک ۽ ان کان وڌيڪ رقم تي ٻڙي ڏهائي 15 سيڪڙو ٽيڪس ڀرڻي پوندي، جڏهن ته 25 ڪروڙ کان وڌيڪ ٽرن اوور تي 4 لک رپين کانسواءِ واڌو رقم تي ٻڙي ڏهائي هڪ سيڪڙو ٽيڪس ڏيڻي پوندي، ايڪٽ مطابق 2017ع ۽ 2018ع ۾ گذرندڙ سال کان 25 سيڪڙو وڌيڪ ٽيڪس ڏيڻي پوندي.

 

بدين ۾ ڪچو شراب پيئڻ سبب 4 ڄڻا فوت، هڪ جي حالت نازڪ

بدين(ڊ.ر) بدين ضلعي جي شهر کورواھ  جي ڳوٺ محمد نندو ۾ ڪچوشراب پيئڻ سبب چار ڄڻا فوت هڪ ڄڻي جي حالت نازڪ هجڻ ڪري کيس حيدرآباد علاج لاءِ روانو ڪيوويو،خبرموجب کورواھ جي ڳوٺ محمدنندو ۾ شادي جي تقريب ۾ ڪچو شراب پيئڻ سبب هندوخاندان سان تعلق رکندڙ 3 ڄڻا ويسي باجاڻو رامون باجاڻو درمشي ۽  ڪارو ڪولهي سول اسپتال ۾ فوت ٿي ويا جڏهن ته هڪ ڄڻي مالهوجي حالت نازڪ هجڻ ڪري کيس حيدرآباد علاج لاءِ روانو ڪيوويو آهي، ڳوٺ جي چڱي مُڙس بچل نندو ٻڌايو ته باجاڻا اسان جي ڳوٺ جا رهواسي ۽ هاري آهن، گذريل رات هنن جي شادي هئي جتي وڏي مقدار ۾ شراب پيتائون، جنهن سبب فوت ٿيا آهن، ٻئي طرف معلوم ٿيو آهي ته شادي واري تقريب ۾ 30 کان وڌيڪ ماڻهن ڪچو شراب پيتو جنهن مان ڪجھ انهي وقت ئي بيهوش ٿي ويا جن کي کورواھ جي اسپتال مان علاج ڪرائي فارغ ڪيوويو، ٻين جي حالت نازڪ هئڻ ڪري سول اسپتال بدين ۾ آندو ويو، جتي چار ڄڻا فوت ٿي ويا، فوتين جي خبر پوڻ تي وارثن ۾ رڙيون پئجي ويون، کور واھ واري واقعي جو ايس ايس پي قيوم پتافي سخت نوٽيس وٺي ايس ايڇ او کور واھ محمد بخش چانڊيوکي معطل ڪري لائين حاضر ڪري ڇڏيو آهي.

 

پاڪستان پيپلزپارٽي شريف ڀائرن کي عوام سان دوکي جي اجازت نه ڏيندي: بلاول ڀٽو

ڪراچي(اسٽاف رپورٽر)پاڪستان پيپلزپارٽي جي چيئرمين بلاول ڀٽو زرداري، لاهور ۾ تڪراري اورينج ميٽرو لائين منصوبي جي متاثرن سان يڪجهتي جو اظهار ڪيو آهي جن جا اباڻا اجها، ڪاروبار ۽  دڪان انتظاميا ڊاهي پٽ ڪري ڇڏيا آهن، گڏيل قومي جي انساني حقن واري ڪائونسل جي ماهرن اڳ ئي انهي منصوبي جي مخالفت ڪري ڇڏي آهي، بلاول ڀٽو زرداري چيو ته نواز ليگ پنجاب جي حڪمرانن کي شاهاڻي سهوليت طور رستو مهيا ڪرڻ لاءِ غريبن جا گهر، ڪاروبار ۽ دڪان بي رحماڻي نموني ڊاهي پٽ ڪيا آهن ۽ گڏوگڏ شهر جي قديمي آثارن کي به ڊاهي پٽ ڪيو پيو وڃي، مٿان وري احتجاج ڪندڙن کي تشدد ذريعي هيسايو پيو وڃي، بلاول ڀٽو زرداري پارٽي ڪارڪنن ۽ جيالن کي اورينج لائين منصوبي جي متاثرن جا اباڻا اجها، ڪاروبار ۽ دڪان بچائڻ لاءِ ٻيهر ساڻن گڏ بيهڻ جي هدايت ڪندي چيو آهي ته پيپلزپارٽي جا اڳواڻ ۽ ڪارڪن اڳ ئي نواز شريف ۽ سندس خاندان جي گهر ڊاهيندڙجٿي طرفان ٿيندڙ غير انساني ڪاررواين خلاف اورينج ميٽرو لائين منصوبي جي متاثرن سان احتجاج ۾ شامل رهيا آهن، پيپلزپارٽي جي چيئرمين پارٽي ڪارڪنن تي زور ڀريو آهي ته لاهور شهر جي هزارين شهرين جي روزگار ۽ قديمي آثارن جي تحفظ جي لاءِ اورينج ميٽرو لائين منصوبي جي متاثرن جي جدوجهد ۾ ساٿ ڏين، جن کي ” شريف بلڊوزر“ ڊاهي پٽ ڪري رهيا آهن ٻئي طرف پيپلزپارٽي جي چيئرمين بلاول ڀٽو زرداري نواز ليگ حڪومت جي انهي قدم جي سخت مذمت ڪئي آهي جنهن ۾ عالمي مارڪيٽ ۾ تيل جون قيمتون گهٽجڻ جو فائدو سڌي ريت واهپيدارن کي ڏيڻ بدران نواز حڪومت پاڻ ڳڙڪائي وئي آهي، هن چيو ته عالمي مارڪيٽ ۾ تيل جي قيمتن ۾ وڏي لاٿ کانپوءِ پاڪستان ۾ ان جي قيمت 45 رپيا في لٽر کان وڌيڪ نه هجڻ گهرجي. پيپلزپارٽي جي چيئرمين نوزليگ حڪومت جي تازو تيل جي اگهن ۾ ڪيل لاٿ کي رد ڪندي پارٽي جي چونڊيل نمائندن کي چيو آهي ته اهي  اورينج لائين منصوبي جي متاثرن جي تحفظ ۽ عوام کي عالمي مارڪيٽ تحت تيل جي اگهن جو ملندڙ فائدو ڏيارڻ لاءِ تيل قيمتن ۽ اورينج ميٽرو منصوبي جا معاملا پنهنجي پنهنجي ايوانن ۾ اٿارين، بلاول ڀٽو زرداري چيو ته پاڪستان پيپلزپارٽي شريف ڀائرن کي عوام سان دوکي جي اجازت نه ڏيندي ۽ واهپيدارن جي حقن جو هر صورت ۾ تحفظ ڪيو ويندو ڇاڪاڻ ته پارٽي عام ۽ پيڙهيل ماڻهن جي حقن جي تحفظ لاءِ ئي ٺهي آهي ۽ سندن حقن ۽ مقصدن جي لاءِ جدوجهد بنا ڪنهن بيهڻ جي هميشه جاري رهندي.

 

ڪراچي ۾ ٽارگيٽڊ آپريشن سبب رينجرز کي خاص اختيار ڏنا ويا آهن: مولا بخش چانڊيو

ڪراچي (اسٽاف رپورٽر) اطلاعات بابت وڏي وزير جي صلاحڪار مولا بخش چانڊيو چيو آهي ته ڪراچي ۾ ٽارگيٽڊ آپريشن سبب رينجرز کي خاص اختيار ڏنا ويا آهن، سڪيورٽي ادارن سنڌ ۾ ڏوهن تي ضابطو  آندو آهي. ڪراچي مان جاري ڪيل بيان ۾ مولا بخش چانڊيو چيو ته ڪراچي ۾ ٽارگيٽڊ آپريشن سبب رينجرز کي خاص اختيار ڏنا ويا آهن. هن چيو ته رينجرز آرٽيڪل 174 تحت سنڌ جي مختلف ضلعن ۾ پوليس جي مدد لاءِ موجود آهي، سڪيورٽي ادارا امن جي بحالي لاءِ بهتر ڪارڪردگي جو مظاهرو ڪري رهيا آهن. مولا بخش چانڊيو وڌيڪ چيو ته رينجرز کي ڪراچي آپريشن سبب خاص اختيار ڏنا ويا آهن، جڏهن ته ٻين ضلعن لاءِ خاص اختيار ناهن گهريا ويا.

 

رينجرز جو صوبائي گهرو کاتي کي خط،عزير بلوچ کان جاچ لاءِ جي آئي ٽي ٺاهڻ جي گهر

ڪراچي(اسٽاف رپورٽر) رينجرز پاران لياري گينگ وار جي سربراهه عزير جان بلوچ کان جاچ لاءِ(جي آئي ٽي)ٺاهڻ جي درخواست صوبائي گهرو وزير ڏانهن موڪلي ڇڏي.ميڊيا رپورٽ مطابق  لياري گينگ وار جي مُک ڪردرا سردار عزير جان بلوچ کان جاچ لاءِ رينجرز گهرو کاتي کي خط لکي چيو آهي ته عزير بلوچ کان وڌيڪ جاچ ڪرڻ لاءِ گڏيل جاچ ٽيم(جي آئي ٽي) ٺاهي ويندي،جنهن جو سربراهه ايس ايس پي سطح جو هجڻ گهرجي.خط ۾ اهو به لکيو ويو ته عدالت عزير بلوچ کان جاچ لاءِ جي آئي ٽي ٺاهڻ جو حڪم ڏنو هو.

 

عمران خان اورينج ٽرين رٿا خلاف احتجاج ۾ شامل ٿيڻ جو اعلان ڪري ڇڏيو

لاهور (م.ڊ)  پاڪستان تحريڪ انصاف جي چيئرمين عمران خان چيو آهي ته اورينج ٽرين ڪميشن کائڻ جي رٿا آهي، حڪومت هڪ وزير جو گهر بچائڻ لاءِ روٽ مٽايو ۽ ڪچي آبادي جي رهواسين کي متاثر ڪيو، سماجي رابطن جي ويب سائٽ تي جاري ڪيل پنهننجي نياپي ۾ عمران خان اورينج ٽرين رٿا خلاف احتجاج جو اعلان ڪندي چيو ته هو ايندڙ هفتي لاهور ۾ ٿيندڙ احتجاج ۾ شرڪت ڪندو، سندس چوڻ هو ته رٿا سبب متاثر ٿيندڙ ڪچي آبادي جي رهواسين سان گڏجي احتجاج ڪيو ويندو، عمران خان چيو ته پنجاب حڪومت غريب ماڻهن سان زيادتيون ۽ ظلم ڪري رهي آهي.

 

”اساما بن لادن جيئرو آهي“ ايڊورڊ سنوڊن نئين دعويٰ ڪري دنيا ۾  ٿرٿلو مچائي ڇڏيو

ماسڪو(م.ڊ) گذريل ڳچ عرصي کان ڇرڪائيندڙ انڪشاف ڪري سڄي دنيا ۾ ٿرٿلو مچائيندڙ آمريڪي سي آئي اي جي اڳوڻي اهلڪار ايڊورڊ سنوڊن هاڻ هڪ نئون انڪشاف ڪري سڄي دنيا ۾ وري ٿرٿلو مچائي ڇڏيو آهي، هن دعويٰ ڪئي آهي ته القاعده سربراهه اساما بن لادن جيئرو آهي، روسي اخبار کي انٽرويو ڏيندي ايڊورڊ سنوڊن چيو ته اساما بن لادن مئو ناهي پر جيئرو آهي ۽ هن هڪ وقت هو سي آئي اي جو پگهاردار آهي، کيس هر مهيني هڪ لک ڊالر کان وڌيڪ پگهار ڏني پئي وڃي. هن ٻڌايو ته هو اهو ته نه ٿو ٻڌائي سگهي ته اساما هن وقت ڪٿي آهي پر 2013ع ۾ هو اقيانونس سمنڊ جي بهاماز ٻيٽ تي هڪ گهر ۾ پنهنجي 5 گهروارين ۽ ڪيترن ئي ٻارن سان گڏ ترسيل هو. سنوڊن جو چوڻ هو ته سي آئي اي طرفان پاڪستان جي شهر ايبٽ آباد ۾ اساما بن لادن کي مارڻ جو ڊرامو ڪيو ويو، اصل ۾ کيس اتان پنهنجي گهرڀاتين سوڌو بهاماز ٻيٽ تي نيو ويو ۽ ان حوالي سان وٽس پڪا ثبوت موجود آهن، ان معاملي تي هو ڪتاب به لکندو، اڳوڻي سي آئي اي اهلڪار چيو ته هر ماڻهو کي بس اها ئي خبر آهي ته اساما بن لادن کي ماريو ويو هو پر ان کي ڪنهن به نه ڏٺو، اهڙي ماڻهو جي ڏاڙهي ڪوڙائي ۽ ڪپڙا مٽائي لڪائڻ سولو هوندو آهي.

 

ٿرپارڪر ۽ عمر ڪوٽ ۾ وڌيڪ 5 ٻارڙا فوت، انگ وڌي 175 ٿي ويو

مٺي (نمائندو) ٿرپارڪر ضلعي ۾ بـُک ۽ بيمارين وگهي معصوم ٻارڙن جي مـَرڻ جو سلسلو رُڪجي نه سگهيو، مٺي ۽ عمرڪوٽ ۾ اڄ و‎ڌيڪ 5 ٻار حياتيون وڃائي ويٺا،جنهن بعد فوتي ٻارن جو انگ وڌي 175 ٿي ويو. سنڌ حڪومت جي وڏين وڏين دعوائن باوجود ٿر ۾ بـُک ۽ بيمارين وگهي معصوم ٻارڙن جي مرڻ جو سلسلو جاري آهي. مٺي سول اسپتال ۾ داخل 18 ڏينهن جو برڪت پٽ شاهنواز ۽ ڏيڍ سال جي خديجه ڌيءَ عبدالغني نوهڙي فوت ٿي وئي. اڄ وڌيڪ ٻن ٻارڙن جي فوت ٿيڻ بعد ٿرپاڪر ضلعي اندر حياتيون وڃائيندڙ ٻارن جو انگ وڌي 133 ٿي ويو. ڏيپلي، ننگر پارڪر، اسلام ڪوٽ، ڇاڇري ۽ ٻين شهرن جي اسپتالن ۾ خوراڪ جي کوٽ ۽ مختلف بيمارين مبتلا ڪيترائي ٻارڙا داخل آهن. ٻئي پاسي عمرڪوٽ سول اسپتال ۾ پنج ورهين جو محمد عمر پٽ محمد صالح، ٻن مهينن جو آصف ۽ چئن ڏينهن جو ڪيو ڀيل فوت ٿي ويا. عمرڪوٽ ضلعي اندر حياتيون وڃائيندڙ ٻارن جو انگ وڌي 42 ٿي ويو، جڏهن ته نمونيا ۽ ڊائريا وگهي ڪيترائي ٻارڙا داخل آهن.