تازيون خبرون

Daily Archives: January 30, 2016

سياسي جهيڙن کي قومي ايڪشن پلان تي عملدرآمد ۾ رنڊڪ بڻجڻ نه ڏنو ويندو: وزيراعظم

اسلام آباد (بيورو) سياسي جهيڙن کي قومي ايڪشن پلان تي عملدرآمد ۾ رنڊڪ بڻجڻ نه ڏنو ويندو، دهشتگردي خلاف جنگ پوري عزم سان جاري رکي ويندي ۽ ڪا به ڪوتاهي برداشت نه ڪئي ويندي: وزيراعظم نواز شريف جي صدارت هيٺ اعليٰ سطحي اجلاس ۾ فيصلا، نواز شريف تعليمي ادارن جي سڪيورٽي لاءِ وفاق ۽ صوبن کي گڏجي پاليسي جوڙڻ جي هدايت ڪندي چيو آهي ته دهشتگردن کي معصوم ٻارڙن جي زندگين سان کيڏڻ جي اجازت نه ڏني ويندي.اجلاس ملڪي صورتحال سميت ٻين معاملن تي غور ڪيو ويو.  اجلاس ۾ وفاقي گهرو وزير چوڌري نثار، اسحاق ڊار، پرويز رشيد، احسن اقبال ۽ ٻيا شريڪ ٿيا. ذريعن موجب اعليٰ سطحي اجلاس دوران اختيارين وزيراعظم کي چارسدا سانحي جي شروعاتي جاچ رپورٽ پيش ڪئي. ذريعن جو چوڻ آهي ته اجلاس ۾ دهشتگردي خلاف هلندڙ ڪارروايون جو جائزو ورتو ويو، ان کانسواءِ آرمي چيف جي ملازمت ۽ رينجرز اختيارن ۾ واڌ واري معاملي تي به ڳالهيون ڪيون ويون. ذريعن موجب وزيراعظم جي صدارت هيٺ اعليٰ سطحي اجلاس دوران گهرو وزير چوڌري نثار ۽ خورشيد شاهه وچ ۾ ڇڪتاڻ گهٽائڻ جي حوالي سان به غور ويچار ڪيو ويو. اجلاس کان اڳ گهرو وزير چوڌري نثار وزيراعظم سان ملاقات به ڪئي. ذريعن موجب چوڌري نثار سنڌ سرڪار سان اختلافن بابت وزيراعظم کي پنهنجي موقف کان آگاهي ڏني.

 

90 واري سياست کي ورجائڻ نواز شريف جي وڏي غلطي هوندي: بلاول ڀٽو

ڪراچي( اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري، پنجاب انتظاميا طرفان ڏکڻ پنجاب ۾ پيپلزپارٽي جو مينديٽ چوري ڪرڻ لاءِ جاري هٿ چُراند جي مذمت ڪندي خبردار ڪيو آهي ته جيڪڏهن ڏکڻ پنجاب ۾ پارٽي جو مينڊيٽ تسليم نه ڪيو ويو ته پوءِ پارٽي وٽ سمورا آپشن کُليل هوندا،  بلاول ڀٽو زرداري اهڙو اظهار پيپلزپارٽي ڏکڻ پنجاب جي صدر مخدوم احمد محمود سان فون تي ڳالهائيندي ڪيو، مخدوم احمد محمود چيئرمين کي فون ڪندي ڏکڻ پنجاب ۾ پيپلزپارٽي جي ڪائونسلرن ۽ اڳواڻن خلاف انتقامي ڪاررواين بابت شڪايت ڪئي، مخدوم احمد محمود ٻڌايو ته پنجاب حڪومت، انتظاميا ۽ پوليس پارٽي جي چونڊيل مقامي نمائندن خلاف انتقامي ڪارراين جي مهم شروع ڪري ڇڏي آهي، هن وڌيڪ چيو ته پنجاب جا حڪمران اسان جي چيئرمينن ۽ ڪائونسلرن کي پارٽي تان استعيفائون ڏيڻ لاءِ دٻاءَ وجهي رهيا آهن، بلاول ڀٽو زرداري پنجاب ۾ ۽ خاص طور تي  ڏکڻ پنجاب ۾ پارٽي جي چونڊيل چيئرمينن ۽ ڪائونسلرن خلاف انتقامي ڪاررواين جو سختي سان نوٽس وٺندي پارٽي اڳواڻن ۽ ڪارڪنن تي زور ڀريو آهي ته اُهي نواز ليگ جي انهن هٿڪنڊن خلاف رُڪ جي ديوار بنجي بيهي رهن، بلاول ڀٽو زرداري چيو ته نواز ليگ طرفان پارٽي جي اڳواڻن ۽جيالن خلاف انهي قسم جون انتقامي ڪارروايون نئين ڳالهه ناهن، پارٽي ماضي ۾ به انتهائي ظالمانا صورتحال کي به منهن ڏنو آهي ۽ هميشه متحد ۽ بي ڊپو ٿي اهڙين ڪوششن کي ناڪام بڻايو آهي، پيپلزپارٽي جي چيئرمين وزيراعظم نواز شريف کي مخاطب ٿيندي چيو ته 90 واري سياست کي ورجائڻ توهان جي وڏي غلطي هوندي، هن خبردار ڪيو ته هو اهڙين ظالماڻين ڪاررواين کي بند ڪري ٻي صورت ۾ سندس مينڊيٽ به سواليه بنجي ويندو. هوڏانهن  پاڪستان پيپلزپارٽي جي چيئرمين بلاول ڀٽو زرداري سنڌ جي وڏي وزير کي چيو آهي ته پوري صوبي ۾ ۽ خاص طور تي ٿر، ڪاڇو ۽ ڪوهستان جهڙن پٺتي پيل علائقن ۾ عورتن ۽ ٻارن ۾ خوراڪ جي کوٽ جي مسئلي کي ختم ڪرڻ لاءِ ” نيوٽريشن مهم“ شروع ڪئي وڃي، بلاول ڀٽوزرداري اهڙو اظهار اڄ بلاول هائوس ۾ سنڌ جي وڏي وزير سيد قائم علي شاه سان ملاقات دوران ڪيو، وڏي وزيرچيئرمين بلاول ڀٽو زرداري کي سنڌ ۾ امن امان جي صورتحال ۽ صوبي ۾ جاري ۽ مڪمل ٿيل ترقياتي ڪمن بابت بريفنگ ڏني، بلاول ڀٽو زرداري ٻيهر چيو ته جيتروجلد ٿي سگهي ته صوبي جي سمورن کاتن کي اي-گورننس ڏانهن منتقل ڪيو وڃي، هن چيو ته تعليم ۽ صحت جي شعبن جي بهتر ڪارڪردگي کي وڌيڪ مستحڪم ۽ وسيع ڪيو وڃي.

 

خورشيد شاهه پنهنجي ڀاءُ کي انجنيئرنگ ڪائونسل جو چيئرمين ڀرتي ڪرايو، عدالت گهرائي ته ثبوت ڏيندس: راڻا تنوير

اسلام آباد (بيورو) دفاعي پيداور جي وفاقي وزير راڻا تنوير الزام لڳايو آهي ته پيپلز پارٽي جي اڳواڻ خورشيد شاهه پنهنجارابطا  ۽ واسطا استعمال ڪري پنهنجي ڀاءُ کي انجنئيرنگ ڪائونسل جو چئيرمين ڀرتي ڪرايو هو،هن دعويٰ ڪئي ته خورشيد شاهه پنهنجي ڀاءُ جي نوڪري واري مدي ۾ واڌ لاءِ مون  کي درخواست به ڪئي.اسلام آباد ۾ ميڊيا سان ڳالهائيندي راڻا تنوير چيو ته نوڪري واري مدي ۾ واڌ جي سفارش اثرائتي نه ٿي ته خورشيد شاهه پنهنجي ڀاءُ کي منهنجي آفيس وٺي آيو ۽ منٿون ڪندو رهيو.سندس چوڻ هو ته جڏهن مون خورشيد شاهه جي ڀاءُ جي نوڪري جي مدي ۾ واڌ  کان معذرت ڪئي ته منهنجي خلاف دانهن گهڻو پري تائين وئي.سندس چوڻ هو ته خورشيد شاهه اسيمبلي وڃي يا عدالت،سندس ڪردار تي پهرين شاهدي مان ڏيندس،جيڪڏهن عدالت گهرايو ته ثبوت کڻي ويندس.واضع هجي ته ڪالهه چوڌري نثار جي پريس ڪانفرنس تي ردِ عمل ڏيندي خورشيد شاهه چيو هو ته هن حڪومت سان پنهنجي ڪٽنب،ڀائرن يا دوستن لاءِ ڪا به سفارش ناهي ڪئي ۽ جيڪڏهن ڪو اهو ثابت ڪري وٺي ته هو سياست ڇڏي ڏيندو.

 

ڪراچي آپريشن هر رنڊڪ ختم ڪري اثرائتي انداز ۾ اڳتي وڌائينداسين: چوڌري نثار

اسلام آباد (بيورو) وفاقي گهرو وزير چوڌري نثار علي خان جو چوڻ آهي ته ڪراچي آپريشن کي پوري پاڪستان جي عوام جي حمايت مليل آهي،ان جي واٽ ۾ ايندڙ هر رنڊڪ ختم ڪنداسين.تفصيل مطابق وفاقي گهرو وزير چوڌري نثار علي خان ڊي يج رينجرز سنڌ کي فون ڪيو،جنهن دوران ڪراچي آپريشن کي وڌيڪ اثرائتو بڻائڻ تي صلاحون ڪيون ويون.ذريعن مطابق چوڌري نثار پوليس ۽ رينجرز جي ڪارڪردگي تي اطمينان جو اظهار ڪيو ۽ چيو ته ايندڙ ڏينهن ۾ ڪراچي آپريشن کي وڌيڪ اثرائتي ۽ بهتر انداز ۾ اڳتي وڌايو ويندو. سندس چوڻ هو ته ڪراچي آپريشن کي رڳو ڪراچي ئي نه پر پوري پاڪستان جي عوام جي حمايت مليل آهي،ان آپريشن جي واٽ ۾ ايندڙ هر رنڊڪ کي ختم ڪري اڃان اڳتي وڌايو ويندو.

 

ڪور ڪمانڊر ڪراچي جي گورنر ۽ سنڌ جي وڏي وزير سان ڌار ڌار ملاقات، امن امان جي صورتحال تي ڳالهيون

ڪراچي (اسٽاف رپورٽر) ڪور ڪمانڊر ڪراچي ليفٽيننٽ جنرل نويد مختار، گورنر ڊاڪٽر عشرت العباد ۽ وڏي وزير سيد قائم علي شاهه سان ڌار ڌار  ملاقات ڪري ٽارگيٽيڊ آپريشن سميت مختلف معاملن تي خيالن جي ڏي وٺ ڪئي آهي، سي ايم هائوس جي ترجمان جو چوڻ آهي ته وڏي وزير ۽ ڪور ڪمانڊر وچ ۾ ٿيل ملاقات دوران 10 نيون دهشتگردي ٽوڙ عدالتون قائم ڪرڻ ۽ برانڊ بينڊ انٽرنيٽ سسٽم کي بايوميٽرڪ ڪرڻ وارن فيصلن جي واکاڻ ڪئي وئي. سـِي ايم هائوس ڪراچي ۾ ڪور ڪمانڊر ڪراچي ليفٽيننٽ جنرل نويد مختار وڏي وزير سيد قائم علي شاهه سان ملاقات ڪئي. ملاقات دوران اپيڪس ڪميٽي جي فيصلن تي عملدرآمد، امن امان جي صورتحال ۽ ڪراچي ۾ جاري ٽارگيٽيڊ آپريشن سميت مختلف معاملن تي خيالن جي ڏي وٺ ڪئي وئي. سي ايم هائوس جي ترجمان موجب، ملاقات دوران اپيڪس ڪميٽي جي اجلاسن ۾ ٿيل فيصلن تي عملدرآمد ڪندي 10 نيون دهشتگردي ٽوڙ عدالتون قائم ڪرڻ ۽ برانڊ بينڊ انٽرنيٽ سسٽم کي بايوميٽرڪ ڪرڻ وارن فيصلن جي واکاڻ ڪئي وئي. ذريعن موجب، ملاقات دوران رينجرز جي ڪارڪردگي کي ساراهيو ويو ۽ ان عزم کي ورجايو ويو ته ڪراچي ۾ ڏوهارين خلاف آپريشن جاري رکيو ويندو. وڏي وزير سان ملاقات بعد ڪور ڪمانڊر گورنر سنڌ ڊاڪٽر عشرت العباد سان ملاقات ڪئي، جنهن دوران قومي ايڪشن پلان ۽ امن امان جي صورتحال تي ويچاريو ويو.

 

بابري مسجد شهيد ڪري مسلمانن جي اعتماد کي دوکو ڏنو ويو: پرناب مکرجي

نئين دهلي (م.ڊ) ڀارتي صدر پرناب مکرجي جو چوڻ آهي ته بابري مسجد شهيد ڪري مسلمانن جي اعتماد کي دوکو ڏنو ويو،جنهن جي ڪري سڀني ڀارتي شهرين جا منهن شرم وچان هيٺ جهڪي وڃڻ گهرجن.سندس چوڻ هو ته 1984 ع دوران  ايوڌيا ۾ رام جنم ڀومسي مندر کولڻ وارو به فيصلو غلط هيو.بابري مسجد جي شهادت ۽ رام مندر جي معاملي تي ڀارتي صدر پرناب مکرجي به موقف کڻي سامهون اچي ويو.پنهنجي نئين ڪتاب “دي ٽربولينٽ ايئرز” ۾ هُن لکيو آهي ته بابري مسجد شهيد ڪري مسلمانن جي احساسن کي جروع ڪيو آهي،جنهن تي سڄي ڀارت جي ماڻهن جو ڪنڌ شرم وچان هيٺ جهڪي وڃڻ گهرجي، سندس چوڻ هو ته بابري مسجد جي شهادت وزيراعظم رهندڙ نرسمها رائوءُ جي سڀ کان وڏي نڪامي هئي، نرسمها رائو کي بابري مسجد جي شهادت روڪڻ لاءِ ملڪ جي سڀني پارٽين جي اڳواڻن سان ڳالهيون ڪرڻ گهربيون هيون.

 

وزيراعظم ٻڌائي ته هـُن پيپلزپارٽي کي ڳٺ جوڙ جي ڪيتري قيمت ادا ڪئي؟:عمران خان

اسلام آباد (مانيٽرنگ ڊيسڪ) تحريڪ انصاف جي سربراهه عمران خان چيو آهي ته آخرڪار حڪمران جماعت نواز ليگ ۽ پيپلزپارٽي جي ڳٺ جوڙ جي سچائي سامهون اچي وئي آهي، وزيراعظم نواز شريف ٻڌائي ته هـُن پيپلزپارٽي کي ڳٺ جوڙ جي ڪيتري قيمت ادا ڪئي آهي.؟ سماجي رابطن واري ويب سائيٽ تي ٽوئيٽ ۾ عمران خان چيو ته هـُن هميشه اها ئي ڳالهه ڪئي هئي ته نواز ليگ ۽ پيپلزپارٽي ۾ ڳٺ جوڙ آهي پر ان تي تنقيد ڪئي وئي. عمران خان چيو ته چوڌري نثار پنهنجي پريس ڪانفرنس ۾ تصديق ڪئي ته نواز ليگ ۽ پيپلزپارٽي ۾ ڳٺ جوڙ آهي. پي ٽي آءِ سربراهه وڌيڪ چيو ته ايتري سالن تائين اپوزيشن ۽ حڪومت ۾ ڳٺ جوڙ رهي، وزيراعظم نواز شريف ٻڌائي ته ان ڳٺ جوڙ جي ڪيتري قيمت ادا ڪئي آهي.؟ واضح رهي ته وفاقي گهرو وزير چوڌري نثار، ڪالهه پريس ڪانفرنس دوران چيو هو ته پيپلزپارٽي ۽ ن ليگ جي حڪومت ۾ ڳٺ جوڙ آهي، خورشيد شاهه حڪومت کان وڏا فائدا ورتا آهن.

 

حڪومت نيشنل ايڪشن پلان تي عمل ڪرائڻ ۾ ناڪام ٿي وئي آهي: سراج الحق

حيدرآباد (بيورو) جماعت اسلامي جي امير مولانا سراج الحق چيو آهي ته حڪومت نيشنل ايڪشن پلان تي عمل ڪرائڻ ۾ ناڪام ٿي وئي آهي، ملڪ ۾ وائيٽ ڪالر ماڻهو پنهنجي قلم ۽ عهدن جي آڌار تي ڪرپشن ڪري رهيا آهن. حيدرآباد بار ايسوسئيشن کي خطاب ڪندي مولانا سراج الحق جو چوڻ هو ته سنڌ سرڪار اهڙو قانون جوڙيو آهي جيڪو ٻين صوبن ۾ به لاڳو ٿيو ته وڪيل ۽ معزز ماڻهو اندر ۽ چور ٻاهر هوندا. سراج الحق مارچ ۾ ڪرپشن خلاف ۽ اليڪشن ريمارم لاءِ جهدو جهد ڪرڻ جو اعلان ڪندي چيو ته ملڪ ۾ اهڙو نظام برداشت نه ڪيو ويندو، جيڪو غريب لاءِ الڳ ۽ امير لاءِ الڳ هجي. هن چيو حڪومت نيشنل ايڪشن پلان تي عمل ڪرائڻ ۾ ناڪام ٿي وئي آهي، ملڪ ۾ وائيٽ ڪالر ماڻهو پنهنجي قلم ۽ عهدن جي آڌار تي ڪرپشن ڪري رهيا آهن.  سراج الحق چيو ته ملڪ ۾ هٿيار بند ۽ معاشي ۽ سياسي دهشتگردي ٿي رهي آهي، جنهن کي ختم ڪرڻ لاءِ پوري قوم کي ڪردار ادا ڪرڻو پوندو. سراج الحق جو چوڻ هو ته سنڌ ۾ پيپلزپارٽي ۽ متحده جي جهيڙي سبب ڪراچي ۽ حيدرآباد کي نقصان نه ٿيڻ گهرجي، بلدياتي نظام کي وڌ کان وڌ اختيار ملڻ گهرجن. مولانا سراج الحق وڌيڪ چيو ته چاهيون ٿا ته وفاق ۽ صوبا پنهنجو وقت پورو ڪن ته جئين سندن ڪارڪردگي تي عوام انهن جو احتساب ڪري سگهي.

 

سنڌ اسيمبلي جو اسپيڪر چيمبر ۾ اڪيلي ملڻ جي ڳالهه ٿو ڪري ته وري ڪڏهن مڇي ۽ جهينگن جي نينڍ ٿو ڏئي: نصرت سحر عباسي

ڪراچي (اسٽاف رپورٽر) فنڪشنل ليگ جي اڳواڻ نصرت سحر عباسي الزام هنيو آهي ته سنڌ اسيمبلي جي اسپيڪر جو رويو سنجيدا ناهي،چيمبر ۾ اڪيلو گهرائي ٿو. ذريعن مطابق فنڪشنل ليگ جي اڳواڻ نصرت سحرعباسي جو چوڻ آهي ته سنڌ اسيمبلي جو اسپيڪر آغا سراج دراني چيمبر ۾ اڪيلوملڻ جي ڳالهه ڪري ٿو ته ڪڏهن وري مڇي ۽ جهينگا کارائڻ جي نينڍ ڏئي ٿو.سندس چوڻ هو ته پيپلز پارٽي زرداري ليگ بڻجي چڪي آهي،ان ڪري اسپيڪرجو عورتن سان اهو رويو آهي.جيڪڏهن بينظير ڀٽو جئيري هجي ها ته اسپيڪر صاحب ڪڏهن به اهڙي ڳالهه ڪرڻ جي همٿ نه ڪري ها.واضع هجي ته ڪجهه ڏينهن اڳ آغا سراج دراني نصرت سحر عباسي جي چوڻ تي سنڌ اسيمبلي هاسٽلز ۾ بيوٽي پارلر ٺاهڻ جي ڳالهه  به ڪري چڪو آهي.

 

مخالف ڌر ٿر صورتحال جو ذميوار سنڌ حڪومت کي قرار ڏئي ڇڏيو

ڪراچي (اسٽاف رپورٽر) سنڌ اسيمبلي ۾ ٿر ۾ ٻارڙا فوت ٿيڻ واري معاملي تي بحث دوران مخالف ڌر جي ميمبرن سنڌ حڪومت تي ڇتي تنقيد ڪندي ان کي صورتحال جو ذميوار قرار ڏئي ڇڏيو، فنڪشنل ليگ ايم پي اي امتياز شيخ چيو آهي ته ٿر واري صورتحال تي جيڪڏهن صحت وارو وزير ضابطو نٿو آڻي سگهي ته عالمي ادارن کان مدد ورتي وڃي، صوبائي وزير سڪندر منڌرو جو چوڻ آهي ته ٿر جي صورتحال کي وڌائي ڪري پيش ڪيو پيو وڃي. اسپيڪر آغا سراج دراني جي صدارت هيٺ سنڌ اسيمبلي جي اجلاس ۾ ميمبر ٿر جي صورتحال ۽ اسڪولن جي سيڪيورٽي سميت مختلف معاملن تي بحث ڪيو ويو. ٿر واري صورتحال تي بحث دوران مخالف ڌر جي ميمبرن سنڌ حڪومت تي ڇتي تنقيد ڪندي ان کي صورتحال جو ذميوار قرار ڏئي ڇڏيو. فنڪشنل ليگ جي امتياز شيخ چيو ته ٿر واري صورتحال تي جيڪڏهن صحت وارو وزير ضابطو نٿو آڻي سگهي ته عالمي ادارن کان مدد ورتي وڃي. امتياز شيخ جو چوڻ هو ته ٿر واري معاملي تي حڪومت ۽ مخالف ڌر جي گڏيل ڪميٽي جوڙي وڃي. ايم ڪيو ايم جي ايم پي اي رئوف صديقي چيو ته هُو ٿر جي صورتحال جو ذميوار ڪنهن هڪ وزير نه پر سڄي سنڌ حڪومت کي ذميوار سمجهن ٿا.. رئوف صديقي جو چوڻ هو ته گذريل سال ٿر ۾ 7 سئو ٻارڙا فوت ٿيا، هلندڙ سال هڪ سئو کان وڌيڪ ٻارڙا فوت ٿي چڪا آهن، پر حڪومت جي سنجيدگي نظر نٿي اچي. پي ٽي آءِ جي خرم شيرالزمان چيو ته ٿر ۾ ٻارڙن جي فوت ٿيڻ تي بهانا نه هلندا، ٻارڙن جي فوت ٿيڻ جا سبب ڪهڙا به هجن پر ذميوار حڪومت ئي آهي. ايم ڪيو ايم ميمبر پونجومل ڀيل چيو ته وڏي وزير مارئي جي ديس ۾ رهندڙ عورتن جو مذاق اڏايو آهي، قائم علي شاهه عورتن بابت ڏنل پنهنجو بيان واپس وٺي. فنڪشنل ليگ ايم پي اي سعيد خان نظاماڻي چيو ته اڇڙي ٿر ۾ به ڏڪار واري صورتحال آهي، ڏڪار جي صورتحال کي منهن ڏيڻ لاءِ اثرائتا قدم کڻڻا پوندا. پ پ جي شهلا رضا جو چوڻ هو ته مخالف ڌر رڳو تنقيد ڪرڻ بدران حڪومت جي ڪارڪردگي تي به نظر وجهي، ٿر ۾ صحت سميت سموريون سهولتون ڏنيون پيون وڃن. صوبائي وزير سڪندر منڌري چيو ته ٿر جي صورتحال کي وڌائي ڪري پيش ڪيو پيو وڃي…. مخالف ڌر جي اڳواڻ خواجا اظهار الحسن صوبي ۾ اسڪولن جي سيڪيورٽي وارو معاملو ايوان ۾ اٿاريندي چيو ته سنڌ حڪومت تعليمي ادارن جي سيڪيورٽي لاءِ سنجيده ناهي، ٻارڙن جي زندگين ۽ ملڪيتن جو تحفظ حڪومت جي ذميواري آهي. خواجا اظهار الحسن چيو ته اسڪولن کي بند ڪرڻ نه پر انهن جو تحفظ ڪرڻ مسئلي جو حل آهي. تعليم واري وزير نثار کهڙو چيو ته سڄي ملڪ ۾ تعليمي ادارن کي خطرو آهي، سرڪاري اسڪولن جي چارديواري جي مرمت ڪرڻ جي ڪوششن ڪئي پئي وڃي.