تازيون خبرون

Daily Archives: January 27, 2016

سنڌ اسيمبلي ۾ ميئر کي اختيار ڏيڻ بابت ايم ڪيو ايم جو بل رد، ايوان ۾ گوڙ، اسپيڪر ڊائس سامهون پهچي نعرا ۽ واڪ آئوٽ

ڪراچي (اسٽاف رپورٽر) سنڌ اسيمبلي ۾ ميئر کي اختيار ڏيڻ بابت ايم ڪيو ايم جو بل رد ٿي ويو، جنهن تي متحده ميمبرن سخت احتجاج ڪندي گوڙ ڪيو ۽ ايوان مان واڪ آئوٽ ڪري ويا، سنڌ اسيمبلي جو اجلاس ڊپٽي اسپيڪر شهلا رضا جي صدارت هيٺ شروع ٿيو ته ڪراچي ۾ ميئر کي اختيار ڏيڻ بابت ايم ڪيو ايم جو بل رد ڪيو ويو، شهلا رضا پاران بل رد ڪرڻ جو اعلان ڪرڻ تي ايم ڪيو ايم جا ميمبر مڇرجي پيا ۽ ايوان ۾ سخت گوڙ ڪندي نعرا هڻندا اسپيڪر جي ڊائس سامهون پهچي ويا، جتي پڻ زوردار نعريبازي ڪندا رهيا، ان دوران ايوان مڇي مارڪيٽ جو ڏيک ڏئي رهيو هو، ڊپٽي اسپيڪر ايم ڪيو ايم جي ميمبرن کي احتجاج ختم ڪرڻ ۽ پنهنجي سيٽن تي وڃڻ جي هدايت ڪئي پر انهن سندس هڪ به نه ٻڌي ۽ نعرا هڻندا ايوان مان واڪ آئوٽ ڪري ٻاهر هليا ويا، ايم ڪيو ايم جي ميمبر خالد احمد خان جو چوڻ هو ته ڪراچي واٽر بورڊ جو چيئرمين ميئر هوندو هو پر اهو اختيار به هاڻ هڪ وزير کي ڏنو ويو آهي،جيڪا ناانصافي آهي، ان موقعي تي سينيئر صوبائي وزير نثار کهڙي جو چوڻ هو ته اجائي اشو ٺاهيو پيو وڃي، مڪاني چونڊن  ۾ جنهن به کٽيو ۽ جنهن هارايو، اسان انهن سڀني جو مينڊيٽ مڃيو، مڪاني چونڊون ٿي ويون آهن ۽ اختيار به قانون مطابق ملي ويندا.

 

سپريم ڪورٽ اين اي 125 تي ووٽن جي نادرا کان تصديق ڪرائڻ جو حڪم ڏئي ڇڏيو

اسلام آباد (بيورو) سپريم ڪورٽ لاهور جي قومي اسيمبلي واري تڪ اين اي 125 تي ووٽن جي نادرا کان تصديق ڪرائڻ جو حڪم ڏنو آهي، سپريم ڪورٽ ۾ اين اي 125 تي ڌانڌلي ڪيس جي ٻڌڻي چيف جسٽس انور ظهير جمالي جي اڳواڻي ۾ سپريم ڪورٽ جي ٽي رڪني بينچ ڪئي، ان موقعي تي عدالت اليڪشن ڪميشن کي اين اي 125 جي سڀني 265 پولنگ اسٽيشنن جي ڪائونٽت فائلن ۽ آڱوٺن جي نشانن جي نادرا کان تصديق ڪرائڻ جو حڪم ڏنو، سپريم ڪورٽ نادرا کي ووٽ  جي تصديق ڪري ٽن مهينن اندر رپورٽ پيش ڪرڻ جي پڻ هدايت ڪئي،عدالت جو چوڻ هو ته ووٽن جي تصديق واري عمل تي ايندڙ سڄو خرچ تحريڪ انصاف جو اميدوار حامد خان ڀريندو، اهڙو حڪم جاري ڪرڻ کانپوءِ سپريم ڪورٽ ڪيس جي ٻڌڻي اڻڄاتل مدي تائين روڪي ڇڏي، واضح هجي ته اين اي 125 تان مسلم ليگ (ن) سان لاڳاپيل وفاقي وزير خواجا سعد رفيق ڪامياب ٿيو هو، جنهن جي ڪاميابي کي سندس مخالف تحريڪ انصاف جي اميدوار حامد خان اليڪشن ٽربيونل ۾ چيلينج ڪيو، مئي 2015ع ۾ اليڪشن ٽربيونل فيصلو ٻڌائيندي ان تڪ ۾ ٻيهر چونڊن جو حڪم  ڏنو، جنهن خلاف سعد رفيق سپريم ڪورٽ سان رابطو ڪيو ۽ اڄ سپريم ڪورٽ ان درخواست تي فيصلو جاري ڪندي نادرا کي ووٽن جي تصديق جو ححڪم ڏنو آهي.

 

مٺي ۽ ڇاڇري اسپتالن ۾ نينگري سميت 4 ٻارڙا فوت، انگ وڌي 117 ٿي ويو

ٿرپارڪر(رپورٽر) مٺي ۽ ڇاڇري جي اسپتالن ۾ هڪ نينگري سميت 4 ٻارڙا فوت ٿيڻ بعد 26 ڏينهن دوران حياتيون وڃائيندڙ ٻارڙن جو انگ 117 ٿي ويو ، ٿرپارڪر ۾ ڏڪار، صحت جي سهولتن جي اڻهوند ۽ بيمارين سبب ٻارڙن جي فوت ٿيڻ جو سلسلو جاري آهي، مٺي ۽ ڇاڇري جي اسپتالن ۾ هڪ نينگري سميت 4 ٻارڙا فوت ٿيڻ بعد 26 ڏينهن دوران حياتيون وڃائيندڙ ٻارڙن جو انگ 117 ٿي ويو آهي. مٺي سول اسپتال ۾ ڳوٺ ڍيڳاريو واسي ٽن ورهين جو ٻارڙو عبدالرزاق پٽ عبدالجبار فوت ٿي ويو، جڏهن ته ڇاڇري جي تعلقي اسپتال ۾ 10 ورهين جي سليمت رند حياتي وڃائي ويٺي. ٿرپارڪر ۾ 26 ڏينهن دوران ڏڪار، طبي سهولتن جي اڻهوند ۽ بيمارين وگهي حياتيون وڃائيندڙ ٻارڙن جو انگ وڌي 117 ٿي ويو آهي. سنڌ حڪومت پاران ٿرپارڪر کي ڏڪار سٽيل ضلعو قرار نه ڏنو ويو آهي ۽ نه ئي اعلانيل امدادي ڪڻڪ جي فراهمي شروع ڪئي وئي آهي.