تازيون خبرون

Daily Archives: January 27, 2016

ٿينڪ يو راحيل شريف:وسعت الله خان

هونئن ته جنرل راحيل شريف پاڪستاني فوج جو 15 هون سربراهه آهي، پر ان حوالي سان هو چوٿون جنرل هوندو، جيڪو ٽن سالن جو مقرر مدو پورو ٿيڻ تي ريٽائر ٿي ويندو، ( ان کان اڳ ڊگلس گريسي، ٽڪا خان، اسلم بيگ ۽ جنرل وحيد ڪاڪڙ جا مثال موجود آهن)

جيترن به جنرلن مارشل لائون لڳايون، تن سڀني پنهنجن عهدن ۾ به پاڻ ئي واڌ ڪري ڇڏي، مورڳو چيف آف آرمي اسٽاف جنرل ضياءُ الحق کي ته صدر ضياءُ الحق ٽي ڀيرا توسيع ڏئي رڪارڊ قائم ڪيو، جنرل محمد موسيٰ ۽ جنرل اشفاق پرويز ڪياني ٻه اهڙا مثال آهن، جن کي  وقت جي سرڪار خوشيءَ سان واڌ ڏني.

ٻن جنرلن جنرل فرينڪ ميسروي ۽ جنرل گل حسن کي مدو پورو ٿين کان اڳ ئي جبري ريٽائر ڪيو ويو هڪ جنرل آصف نواز جو پنهنجي عهدي تي رهندي موت ٿيو ۽ جنرل جهانگير ڪرامت کي مدت پوري ٿيڻ کان اڳ ئي استعيفيٰ ڏيڻي پئي، باقي دنيا ۾ هٿياربند فوج جي سربراهن جي مقرري واڌ ۽ ريٽائرمينٽ وقت جي سرڪار جو ناقابل تقسيم اختيار سمجهيو ويندو آهي.

پر پاڪستان جي ڳالهه الڳ آهي، ڳالهه الڳ هئڻ به گهرجي، ڇو جو ان  وقت ته هن ملڪ تي فوج سڌي ريت ۽ باقي وقت اڻسڌي طرح حڪمراني ڪئي آهي، صدر مملڪت ۽ وزيراعظم جا عهدا ظاهري طور آئيني حوالي سان ڪيترا به باوقار ئي ڇو نه هجن پر پاڪستان ۾ سڀ کان وڌيڪ طاقتور عهدو زميني فوج جي سربراهه جو ئي سمجهيو وڃي ٿو.

سو ايندڙ چيف آف آرمي اسٽاف جي ٽن سالن لاءِ مقرري يا موجوده جي ريٽائرمينٽ بابت سُرٻاٽن جو سلسلو ٻئي سال ۾ ئي شروع ٿي ويندو آهي، جيڪڏهن سياسي حڪومت هجي ته افواهن جي بازار اڃا به گرم ٿي وڃي ٿي.

پاڪستان جون گهٽ وڌ سڀئي سياسي حڪومتون کير جون ڇاڻيل آهن، تنهن ڪري نئين فوجي سربراهه جي ڳولا بلڪل ان نظر سان ڪئي ويندي آهي، جيئن ڇوڪري يا ڇوڪريءَ لاءِ سُڱُ ڳولڻ وقت مڪمل جاچ جوچ ڪئي ويندي آهي، ڪردار ڪهڙو اٿس، خيال ڪهڙا اٿس، ڪهڙن ماڻهن ۾ اٿڻ ويهڻ اٿس، خانداني پسمنظر ڪهڙو اٿس، مٿي ڦريو ته ناهي، تعبيدار ته آهي، مسڪينڙو هجي ته اڃا به ڀلو.

من پسنديءَ جي چڪر ۾ سينيارٽيءَ جو اصول ڪٿي وڃائجي ويندو آهي ۽ پسند جو چيف مقرر ٿيڻ کانپوءِ به نظرون چوڦير گهمنديون رهنديون آهن ته ڇا ڪري رهيو آهي، ڪنهن سان ملي رهيو آهي، ڪيڏانهن اچي وڃي ٿو چُپ چُپ ڇو ٿو رهي وغيره وغيره.

موجوده چيف راحيل شريف بابت ته اهي شرط پهرين سال ئي لڳڻ شروع ٿي ويا هئا ته کيس واڌ ملندي يا نه سبب شايد هي هو ته آپريشن ضرب عضب شروع ٿيڻ جي ڪجهه مهينن کانپوءِ پرستارن پنهنجي پنهنجي انداز ۾ گرمجوشيءَ سان پنهنجي راءِ جو اظهار ڪرڻ شروع ڪري ڏنو هو، پونئر نروار ٿيڻ لڳا، سائين بورڊن تي مُڪَ واريون تصويرون ڇپجڻ لڳيون، ننڍين توڙي مڪاني چونڊن ۾ به ڪيئي اميدوارن پنهنجي پوسٽرن تي ” راحيل شريف کان منظور ٿيل “ ڇپرائڻ جي ڪوشش ڪئي.

۽ وري گذريل سال سيپٽمبر ۾ ٻه ڀيرا توسيع وٺندڙ ۽ اڄڪلهه واندو ويٺل ريٽائرڊ پرويز مشرف مطالبو ڪري ڇڏيو ته راحيل شريف کي واڌ ملڻ گهرجي، ڇو جو هن وقت جيڪي ڪجهه ٿي رهيو آهي تنهن ۾ تسلسل ضروري آهي ۽ هن وقت قيادت کي تبديل ڪيو ويو ته سڀ چڱو ڪم ضايع ٿي ويندو، منهنجو اهو مطلب ناهي ته فوج ۾ قيادت جو فقدان آهي پر ماڻهو ماڻهوءَ ۾ فرق ٿيندو آهي.

هن ( راحيل شريف ) جي وڃڻ سان نه رڳو ڪَئي ڪمائي چَٽُُ ٿي ويندي پر ٻيهر ڌانڌلي ٿيندي، ٻيهر نيب پٺتي هٽي ويندي ۽ فوجي عدالتون به ويڙهيون وينديون وغيره وغيره.

ڪو مشرف صاحب کان پڇي ته آرمي هڪ پيشور ادارو آهي يا ڪنهن فرد واحد جو نالو ؟ ۽ جن ٻه ٻه، ٽي ٽي ڀيرا توسيع ورتي تن ڪهڙو سياچن ڇڏائي ورتو،

جنرل راحيل شريف سان اڄ ڪالهه آءِ ايس پي آر جو ٽوئيٽر ۾ اڄ هي بيان منسوب ڪيو ويو آهي ته پاڪ فوج هڪ عظيم ادارو آهي، مان ترميم تي يقين نه ٿو رکان، مقرر وقت تي ريٽائر ٿي ويندس.

هن مختصر بيان جي جامعيت تي نه رڳو پرويز مشرف کي ڌيان ڏيڻ گهرجي، پر سياستدانن کي به غور ڪرڻ گهرجي ته جنرل راحيل شريف فرد جي ڀيٽ ۾ اداري جي اهميت تي ڇا چيو آهي.

ميجر محمد شريف جي فرزند ۽ ميجر شبير شريف ( نشان حيدر ) جي ڀاءُ کان اها ئي اميد هئي، اميد آهي جنرل صاحب ايندڙ ڏهن مهينن دوران به موسمي قصيدي خوانن جي دٻاءَ جو مقابلو به ايئن ئي کليل نموني ۽ ثابت قدميءَ سان ڪندو.

 

سنڌ کان انٽرويو: قمر ڀٽي ايڊووڪيٽ

سنڌ ڪنهن به تعارف جي محتاج نه آهي، دنيا ۾ سندس نالو مهان ۽ مشهور آهي، سنڌ بابت وڏا ڳالهه ڪندا آهن ۽ ڪتابن ۾ پڙهيو اٿم ته ڪو زمانو هو جو سنڌ پنهنجي مَٽ پاڻ هئي. هن جي هنر، واپار، حسن ۽ جواني جي هاڪ ملڪان ملڪ مشهور هئي. هن جي اکين ۾ ڏسبو هو ته محسوس ٿيندو هو ته ڄڻ ڪٽورن نيڻن ۾ محبت خلوص، جرئت ۽ بيباڪي جا ڏيئا پيا ٿا ٻرن، جن مان خود اعتمادي جا ڪرڻا ڦٽي نڪتا هجن، انهن ڪرڻن جي روشني ۾ هن جو اولاد هڪ لازوال ۽ لاثاني قوم بڻجڻ لاءِ ڪي ڪٺن فاصلا طئي ڪري رهيو هجي، اهي به ڏينهن هئا، جڏهن هن جي سڏ ۽ هَڪل تي سندس اولاد لبيڪ چئي سرن سان ڪفن ٻڌي مٿس ساهه صدقو ڪندا هئا. سندس پوتر حدن ۾ ڪنهن به اوپري ماڻهو کي پير رکڻ نه ڏيندا هئا. هن جي هنر ۽ واپار جي دنيا ۾ ڌاڪ ڄميل هئي. هن جا باغ باغيچا، ٻنيون ٻارا، جائيداد، مال ملڪيتون، هن جو محل نما گهر تمام سهڻو، ڪشادو ۽ سنگاريل هوندو هو، جنهن جي خودمختياري اڀ سان ٽڪرائبي هئي، سندس جوڀن ۽ جواني جا ڏينهن هئا، نڪ ۾ سوني نٿ، بولو ۽ بيسر ڪنن ۾ واليون نسبيون ۽ ايرنگ، ڳچي ۾ دُهري ۽ هٿن پيرن جي آڱرين ۾ هيرن جون منڊيون ڇا پيل هيون، مطلب ته سون سان ائين ججهيل هئي، جيئن آسمان ستارن سان يا انب جو وڻ (پڪل انب ٽپڪن سان).

هن جا باغ هن جون زمينون، هن جا پٽ، هن جون ڌيئون مهڪنديون ۽ ٻهڪنديون هيون. سڀ ڪو سکيو ستابو سائو ۽ سرهو هوندو هو. دنيا هن جو نالو وٺي هن جا مثال ڏيندي هئي. هن جي اکين ۾ ڳوڙهن بجاءِ جيت جي مرڪ هوندي هئي. هي خودمختيار هئي، پنهنجي ترقي ۽ اولاد جي تربيت تي بي انتها خرچ ڪندي رهندي هئي.

هن جي اوج ۽ عروج کي ٻاهرين حاسدن نه سٺو، هن جي مال ۽ ملڪيت کي لٽڻ لاءِ سندس گهر کي ڪيترائي ڀيرا کاٽ ۽ ڌاڙا هنيا ويا، اهي ڏينهن ڏٺا ڌاڙو هڻندڙ ڦورو ڪڏهن ٿي ڦٻيا ته ڪڏهن تباهه ٿي ويا. ڪڏهن سون ۽ چاندي ديڳن جون ديڳون ڦري ويا ته ڪڏهن ڍؤ تي موچڙا کائي پنهنجي موت پاڻ مري ويا.

هن جا لاکيڻا لال ۽ قنڌار پٽ سندس نگهبان ٿي سؤنچو سڃاڻي پري کان ئي غيرن جي گفتار کي سمجهي پرکي ۽ پروڙي پنهنجي ماءُ جي ملڪيت ۽ عزت بچائڻ لاءِ دشمنن ۽ ڌاڙيلن کي ڊوڙائي ڀونءِ مان ماري ڀڄائي ڪڍندا هئا.

هن جي گهر کي ڏکڻ، اتر ۽ اولهه کان ڌاڙا ۽ کاٽ هنيا ويا آهن، ويچاري مظلوم کي ڦري فقير ڪري وڃن وري محنت ۽ مشقت ڪري ملڪيت گڏ ڪري پيرن تي بيهڻ هارڪي ٿئي ۽ ساک بحال ڪري وٺي ئي مس ته وري ڪو شاهينگ ۽ شودو کيس ڦرڻ لاءِ سانباها ڪري اچي مٿس ڪڙڪي، چون ٿا ته هن کي جيڪي ڌاڙا ۽ کاٽ لڳا آهن، اهي صرف هن جي آسودگي، شاهوڪاري ۽ سادگي جي سبب ڪري هنيا ويا آهن، سندس مال ۽ ملڪيت سدائين ڌاڙيلن کي لٽڻ ۽ ڦرڻ لاءِ پي هِرڪيا ۽ لالچايو آهي، پر شريف هجڻ جي سزا اهڙي طرح ملڻ به هڪ عجيب ڳالهه آهي. هن جي امن پسندي جي واکاڻ ڪرڻ جوڳي آهي ته هن ڪڏهن به ڪنهن تي هلي وڃي ڪو حملو نه ڪيو آهي، نه ئي ڪنهن کي آزاريو آهي، پر هن تي ڪيترن ئي ڪاٽڪن هلائون ڪري کيس ڦرڻ ايندا رهيا آهن، گهڻو ڪري مهمان نوازي صاف گوئي ۽ امن پسندي هن جي ڪنگال پڻي جو ڪارڻ بڻي آهي. سندس ملڪيت کي ڦٻائڻ لاءِ دشمن ڪونه ڪو بهانو بڻائي اچي کيس ڦريندو رهيو آهي. هن جي ڌراوت کي مال غنيمت سمجهي سدائين ڦريندا لٽيندا رهيا آهن. هن جا پٽ واهه جو وڙهيا آهن، لٽيرن سان وڙهندي هن جي لڄ بچائيندا رهيا، مرندي گهڙي تائين سندس مٿي تان اجرڪ لاهڻ ۽ مٿو اگهاڙو ڪرڻ نه ڏنو اٿن، مٿس پنهنجو ريٽو رت ڏئي ڪونڌر ڪسبا ڪٽبا رهيا آهن. سنڌ جنهن مٽيءَ مان جڙي آهي سا پيار ۽ پاٻوهه جي خمير مان ڳوهيل آهي. وٽس امن ۽ انسانيت جو پيغام آهي، هن سدائين سچائي جو پرچار ڪيو آهي. سرفروشي جي تلقين ڪئي اٿس، مذهبي تفرقي بازي کان پري رهڻ جي هدايت ڪندي رهي آهي. هن وٽ عالمي امن، رواداري، خوشحالي، محبت ۽ ڀائيچاري جو پيالو آهي، اهو جيڪو به پيئندو سو تعصب، بغض ۽ احساس برتري جي موذي مرض کان نجات حاصل ڪندو، جو انساني امن لاءِ وڏي وٿ ۽ وکر آهي. سنڌ! پريم، سڪ، محبت ۽ سچائي جو مجسمو آهي. هن جي تهذيب (موهن جو دڙو) ۽ لازوال تاريخ کي ڏسي دنيا کيس انسانيت جو علمبردار قرار ڏئي ڇڏيو آهي.

اڄ ان سنڌ جون اکيون غم ۽ ڳوڙهن سان ڀريل، دل حسرت سان ڀرپور، پيشاني تي غربت ۽ غلامي جي ذلت جو داغ، سينڌ ۾ سينڌور بجاءِ دز ۽ مٽي پيل، هٿن ۾ ڪڙيون، پيرن ۾ ٻيڙيون، ڳچيءَ ۾ صليب نما ڳورو ڳٽ سر ننڍڙ ۽ ڪنڌ ڀڃندڙ، ماندي ملول، جسي ۾ زنجير، سند سند سنگهرن ۾ سوگهو، غيرن جي گهيري ۾ جسم تي چچڙ ۽ ڄؤرون چهٽيل جيڪي آهستي آهستي رت چوسينديون ۽ پيئنديون رهن ٿيون. ايڏن عذابن ۾ پاڻ کي اڪيلو بي يارو مددگار سمجهي رهي آهي. سامهون دشمن ڀالا، سنگينون ۽ ڪلاشن ڪوفون ۽ جي ٿريون تاڻيون بيٺا اٿس، کيس آدم خورن وانگر گهوري رهيا آهن. ڪر موڙڻ ۽ آرس ڀڃڻ به نٿا ڏين، سونهن اُجڙيل، وار اڻڀا ڇُڙيل، سندس جسم کي ولائتي ڳجهون ڳاڙهن واڇن واريون لامارا ڏئي پٽي رهيون آهن. نيڻ نماڻا ڪري، نير وهائي ڏسي رهي آهي، مدد لاءِ واجهائي رهي آهي، پنهنجي اولاد کي سڏي رهي آهي، واڪا ڪري پڪاري رهي آهي. سندس سڀ زيور لٿل صفا ٻُسي، هڏائون، پڃرو ٿيل، پر همت ۽ جرئت سان هماليه وانگر اڏول، اڄ دنيا آڏو دانهن بڻيل آهي. اهڙين چوڪسين ۽ پهرن دوران موقعو مليو ته ساڻس انٽرويو ڪيم، جيڪو سندس اولاد ۽ خيرخواهه پڙهندڙن آڏو حاضر آهي.

سوال: ڪڏهن ته توهان جي حسن ۽ جوڀن جي دنيا ۾ هاڪ هوندي هئي ۽ آزاد هوندا هئو ۽ هاڻ قيد آهيو، ان جا ڪهڙا سبب ٿي سگهن ٿا؟

سنڌ: اها حقيقت آهي ته جڏهن منهنجو عروج هو، تڏهن دنيا جا ماڻهو سيڙجي مون کي ڏسڻ ايندا هئا، پر جڏهن مون کي گهر ويٺي قيد ڪيو ويو ۽ زنجيرن ۾ جڪڙيو ويو آهي، تڏهن کان مون کي شرف انساني کان به محروم ڪيو ويو آهي. هي نٿا ڏسو (مٿي کي هيٺ ڪندي سينڌ ڏيکاريندي) منهنجي سينڌ ۾ سينڌور بجاءِ ڌارين جي ڪاهي آيل ڪٽڪن ۽ لوڌ جي آيلن جي ڌوڙ پيل آهي. وقت جي وهڪرن جيڪا دز منهنجي سرير تي ڇڏي ۽ ملي آهي سا به اڃا تائين ڪنهن نه ڌوتي آهي. منهنجي پيشاني تي غربت ۽ غلامي جي لذت جو داغ، منهنجي بدصورتي ۾ اضافو ڪري رهيو آهي. هينئر آئون ڌارين جي مڪمل قبضي ۾ آهيان، اوهان کي سمجهڻ گهرجي ته جڏهن ڪو مسلسل قيد ڪاٽيندو آهي ۽ زنجيرن ۾ جڪڙيو ويندو آهي، سور ۽ سختيون برداشت ڪندو آهي ته ان جو لاثاني حسن ۽ سونهن اجڙي ويندي آهي.

جڏهن ڪنهن به انسان، وطن يا ڌرتي تي غلامي جون زنجيرون پونديون آهن، هو قيد ۽ قبضي ۾ ڪئي ويندي آهي ته ان جو حسن جٽاءُ نه ڪندو آهي ۽ اهو فنا ٿي ويندو آهي، ڇو ته غلامي ۾ رهڻ موت کان بدترين ذلت آهي، جيڪڏهن اهو انسان يا ساڻيهه قيد مان آجو ٿيو. جسم تان لوهه لٿس ته ان جو حسن ۽ سونهن وري نکرڻ شروع ٿيندي. منهنجي شاعر منهنجي زباني چيو آهي ته:

محلين ماندي مارئي، ڏٺم منهن ملور،

اڻڀا سڻڀا نه ڪري، سونهن وڃايس سور،

آيس آفت اوچتي، لٿس ڪوڏ ڪپور،

چت جنين جا چور، مَکي مرڪ نه ڪنديون. (شاهه)

سوال: توهان مهمان نوازي ۾ مشهور آهيو، خبر پئي آهي ته اوهان کي مهمانن ڏاڍا نقصان پهچايا آهن، ان ڪري هاڻي اوهان مهمان نوازي کان بس ڪرڻ جو فيصلو ڪيو آهي، ڇا اها حقيقت آهي؟

سنڌ: سڀني کي خبر آهي ته دنيا ۾ منهنجو واحد گهر آهي، جتي بنا گهرڻ جي مفت ۾ ماني ۽ بنا پئسي رهائش ملندي آهي. مهمان نوازي ۾ واقعي ئي مشهور هئس. کارائڻ، پيارڻ ۽ ترسائڻ ۾ منهنجي پري پري تائين ڳالهه ويٺل آهي، ايتري قدر جو مهمانن جي وهٽن (اٺن ۽ گهوڙن) کي به مصري جو پاڻي پياريو ويندو هو. منهنجي هٿ ۾ اهڙي ڪا شيري آهي ۽ منهنجو پاڻي اهڙو ڪو مٺو آهي جو جيڪو به هتان جو پاڻي پيئندو ۽ ماني کائيندو، اهو وڃڻ جي وائي وساري ڇڏيندو آهي.

آئون ڏاڍي ڏنگيل ۽ تمام گهڻي تپايل آهيان. هينئر تائين ڪيترا مهمان کارايا اٿم، ڪئين آيا ڪئين ويا، ڪي ته ڌرڻو هڻي ويهي رهيا، ڪن کي ماني کارايم ۽ ٽڪايم، صبح ٿي ساريان ته مهمان ٿانون سوڌو غائب، بسترو به چورايو کنيو هليا ويا. مون کي وڏو تجربو آهي، ڪئين ڀيرا اهڙا بهروپي مهمان، ڪڏهن واپار جي بهاني ڌارين جا گماشتا ٿي، هتي اوطاقن ۾ رهي، رستا راهون ۽ لنگهه تاڙي ۽ ڏسي، هتي جي ماڻهن جي ماحول ۽ مزاج کي اک مان ڪڍي جاسوسي ڪري پنهنجي آقائن کي خط لکي، حملا ڪرائي، ڌاڙا هڻائي منهنجو جهڳو جهڻ ڪندا رهيا.

اوهان کي واضح طور ٻڌايان ٿي ته اهي احسان وساريندڙ ۽ بي نمڪا آهن، انهن کي ٽڪائڻ مان تمام گهڻو نقصان پيو، جيڪو برداشت ڪرڻ مشڪل آهي، اهڙا ڪيئي واقعا ۽ ويل مون سان ٿي گذريا آهن، اهي کائيندا پيئندا به منهنجو ته گرندا به مون تي آهن.

ڪتا قريبن جا، دعويٰ رکي نه ڌڙ،

جني سيکارئي وڙ، ڏند به ڏيکارين تن کي. (شاهه)

ايترن تجربن کانپوءِ جڏهن 65 سال اڳ مون وٽ ڪي ماڻهو مهمان طور موڪليا پئي ويا ته مون انهن کي پاڻ وٽ ترسائڻ کان نه صرف انڪار ڪيو پر پنهنجي اولاد کي به جهلي ڇڏيو ته انهن کي ڪنهن به صورت ۾ برداشت نه ڪجو، اهي اچي نه رڳو اسان سڀني جي نڙي تي نُنهن ۽ پيٽ تي لت ڏيندا، پر هتي جي ماحول ۽ معاشري کي گندو ۽ خراب به ڪندا. اسان جي ثقافت تي اثر پوندو، پر ان وقت پٽن ٽرڪائي ڇڏيو، منهنجو ٻڌو اڻ ٻڌو ڪري ڇڏيائون ۽ چيائون ته، ”امان! توکي ڪهڙي خبر؟ تنهنجو اندازو غلط آهي، تون ڀليل آهين، اسان جا هم مذهب ۽ ڪلمي گو ڀائر آهن.“

منهنجن ڪن ڀورڙن ۽ عقل جي دشمن پٽن ٻين جي هُشي ۽ اشاري تي انهن آيلن اوپرن جا شاندار استقبال ڪري، کين اسٽيشنن تان گاڏين ۾ وٺي مٿن عطر، انبير ۽ گلابن جي ورکا ڪري، اچي جاين ۾ ويهاريو نه صرف انهن کي پنهنجي زوري لڏايل ڀائرن ۽ ڀينرن جي زمينن، باغن، ڪارخانن ۽ مال ملڪيت جو مالڪ بڻايائون، پر نادان پٽن ۽ وقت جي حڪمرانن، انهن کي ٿانيڪو ڪري اندر آڻي ويهاريو.مهمان به پرائي ٺهيل ٺُڪيل اڏاوتن ۽ اوتارن ۾ وڇايل هنڌن وارين کٽن تي بي فڪر ٿي بالم ٿي ويهي رهيا، ري سڏيا مهمان ڳچي ۾ پئجي ويا. مون گهڻو ئي اولاد کي سمجهايو ته، ”ابا سياڻا ٿيو، مذهبي جنون ۽ خفت ۾ اچي پنهنجي گهر جي ڦوڳڙي نه ڦرايو، انهن جي اچڻ ڪري اسان جو ڪلچر تباهه ٿي ويندو، اسان جي ذري پرزي کي اڏوهي جيان نه پر مڪڙن وانگر کائي چٽ ڪري ڇڏيندا. منهنجي ثقافت هن خطي ۾ تهذيبن کي پنهنجي ڪرڻن ۽ ترورن سان روشني بخشيندي رهي آهي، ان کي هي ٽشنگ اونداهو ڪري ڇڏيندا، آئون امن ۽ استحڪام جي خواهان رهي آهيان، جڏهن ته ٻاهران آيلن جو مقصد ۽ متو، نفاق، نفرت ۽ برائي تي مبني رهيو آهي.

 

ڪراچي يونيورسٽي ۾ داخلا پاليسي جو ٺهراءُ

گذريل ڏينهن سنڌ اسيمبلي ۾ ڪراچي يونيورسٽي جي داخلا پاليسي خلاف ٺهراءُ اتفاق راءِ سان منظور ڪيو ويو، ٺهراءُ جو متن هو ته ڪراچي يونيورسٽي جي داخلا پاليسي ۾ ڪراچي، سنڌ ۽ پاڪستان جو ڪرائيٽيريا ختم ڪئي وڃي۽ ميرٽ جي بنياد تي داخلا ڏني وڃي، سنڌ اسيمبلي جو اجلاس اسپيڪر آغا سراج خان دراني جي صدارت ۾ ٿيو، اجلاس ۾ پ پ ايم پي اي خيرالنساءُ مغل، سيد سردار علي شاهه ۽ فنڪشل ليگ ميمبر نصرت سحر عباسي خانگي ٺهراءُ پيش ڪيو جنهن کي ايوان ايم ڪيو ايم جي غير موجودگي ۾ اڪثريت راءِ سان منظور ڪري ورتو، ٺهراءُ جي روشني ۾ پ پ ميمبر خيرالنساءُ مغل چيو ته ڪراچي يونيورسٽي پاران داخلا پاليسي به سنڌ جي ورهاست واري سوچ تي ٻڌل آهي جنهن کي هر گز قبول نه ڪنداسين، وي سي اهڙي داخلا پاليسي نافذ ڪري پنهنجي نا اهلي جو ثبو ت ڏنو آهي ۽ اهڙي پاليسي کي ڪو به سنڌ جو ماڻهو قبول نه ڪندو ، ڪراچي يونيورسٽي جي اهڙي عمل سان اهڙو تاثر ڏنو ويو آهي ته ڄڻ ڪراچي سنڌ صوبي جو حصو ئي ناهي، اهڙي عمل سان مايوسي ٿي آهي. ڪراچي يونيورسٽي ۾ صرف ڪراچي جي ڪوٽا رکي سنڌ جي ٻين ضلعن کي نظر انداز ڪيو ويو آهي جيڪو سراسر ظلم آهي، پي اي سي جي اجلاس ۾ وي سي پاليسي بابت چيو هو ته ڪراچي يونيورسٽي ۾ 40 سيڪڙو ڪوٽا سنڌ جي ٻين ضلعن لاءِ رکي وئي آهي هاڻي خبر پئي ته پاليسي تبديل ڪئي وئي هن چيو ته ڪراچي يونيورسٽي جي ظالماڻه داخلا پاليسي وارو ڪارو قانون اڳوڻي وڏي وزير ارباب غلام رحيم جي دور ۾ ٺاهيو ويو، ارباب غلام رحيم هيو ته سنڌ جو وڏو وزير، پر هلندو هو ٻين جي اشارن تي هيو، اسان کي ٻڌايو وڃي ته ڪراچي سنڌ جو حصو آهي يا نه؟ ۽ ٿر، ڪنڌڪوٽ، سکر، لاڙڪاڻو، دادو ۽ ٻين ضلعن جي نوجوانن جي لاءِ ڪراچي يونيورسٽي نوگو ايريا ڇو بڻائي وئي آهي.

ف ليگ جي ميمبر مهتاب اڪبر راشدي چيو آهي ته ڪراچي يونيورسٽي جي داخلا پاليسي ۾ گلگت بلستان جي شاگردن کي داخلا جو حق حاصل آهي ته پوءِ صوبي جي ٻين ضلعن جا نوجوان ڪاڏي وڃن، هن يونيورسٽي جو وي سي ملڪ جي آئين ۽ قانون کان مٿاهون آهي، وڏو وزير ۽ تعليم وارو وزير فوري ڪارروائي ڪري، ڪراچي يونيورسٽي جي داخلا پاليسي ڪنهن جي شرارت آهي ۽ اسان کي سنڌ حڪومت جواب ڏي ته هن ايوان ۾ مهاجر صوبي جي ڳالهه ڪئي وئي ۽ اڄ هڪ دفعو وري مهاجر آفيسرن جي بدلين جو مسئلو اٿاريو ويو پر حڪومت ڪا خاطر خواهه جواب نه ڏئي سگهي. پبلڪ اڪائونٽ ڪميٽي ۾ ڪراچي يونيورسٽي جو وي سي اچي ڪوڙ ڳالهائي ٿو وڃي ته ان کي طلب ڪري پڇيو وڃي ته ان اهڙو ڪوڙ ايوان جي قائم ٿيل ڪميٽي ۾ ڇو ڳالهايو، ان خلاف ڪارروائي عمل ۾ آندي وڃي، ڪراچي يونيورسٽي جي داخلا پاليسي تي اسين سخت لفظن ۾ مذمت ڪيون ٿا ۽ سنڌسرڪار کان مطالبو ڪيون ٿا ته  اهڙي داخلا پاليسي کي فوري طور تي رد ڪري يونيورسٽي انتظاميا خلاف سخت ڪارروائي ڪئي وڃي.

پ پ ايم پي اي سيد سردار علي شاهه چيو ته ڪراچي يونيورسٽي جي داخلا پاليسي ڪراچي جي لاءِ  الڳ ۽ سنڌ ٻهراڙي جي لاءِ  الڳ رکي وئي آهي. يونيورسٽي ۾ اڳ 4 سئو سيٽون ڪراچي جي ٻاهرين شاگردن لاءِ مقرر ڪيون ويون هيون ان ڪوٽا کي گهٽائي 40 تائين آندو ويو ۽ هاڻي اڃان به گهٽايون ويون آهن جيڪو عمل پڻ ملڪ جي قانون ۽ آئين جي خلاف ورزي آهي ۽ اهڙو عمل معافي جوڳو ناهي.

 

عمران خان پرڏيهه وڃي حڪومت ڪيرائڻ لاءِ پئسا ورتا: پرويز رشيد

اسلام آباد (بيورو) اطلاعات واري وفاقي وزير سينيٽر پرويز رشيد جو چوڻ آهي ته تحريڪ انصاف چيئرمين عمران خان ڪوڙ ڳالهائڻ تي قوم کان معافي وٺي.سندس چوڻ هو ته عمران خان هنڊي ذريعي ٻاهريان پيئسا گهرائي قومي غداري وارو ڪم ڪيو آهي،اليڪشن ڪميشن عمران خان کي ٻاهريان ملندڙ فنڊن جي جاچ ڪري ۽ جلدي اهم فيصلو ٻڌائي.سينيٽر پرويز رشيد جو چوڻ آهي ته عمران خان هنڊي ذريعي پرڏيهه مان فنڊ گهرائي رهيو آهي،ٻاهريان مليل چندو واپس ڪري ۽ قوم کان معافي گهري.پرويز رشيد جو چوڻ آهي ته پهرين فيبروري  کان مسلم ليگ (ن) جا اڳواڻ عمران خان خلاف اليڪشن ڪميشن ويندا ۽ ٻاهرين ملڪن مان کيس ملندڙ فنڊن بابت درخواست به داخل ڪرائينداسين.

 

آئين ٽوڙيندڙن جو احستاب نه ٿيڻ سبب ملڪ بحرانن جو شڪار آهي: وڏو وزير

ڪراچي (اسٽاف رپورٽر) قائم علي شاهه چيو آهي ته آئين ٽوڙيندڙ جو احتساب ناهي ٿيو، جنهن سبب ملڪ بحرانن جو شڪار رهيو. ڪراچي ۾ سنڌ هاءِ ڪورٽ بار کي خطاب ڪندي وڏي وزير سيد قائم علي شاهه چيو ته ڊڪٽيٽرن هميشه آئين ٽوڙيو پر کائن پڇاڻو نه ٿي سگهيو. هن چيو ته هو 2008 ۾اقتدار ۾ آياته خزانو خالي هو، ان باوجود عوام جي خدمت ڪئي. سندس چوڻ هو ته مقامي حڪومت جي آزاداڻي چونڊ ۾ هميشه پ پ ڪامياب ٿي آهي، سنڌ جي عوام جو پيپلز پارٽي تي اعتماد آهي. وڏي وزير جو چوڻ هو ته سنڌ سرڪار اهليت جي بنياد تي 2 لک نوجوانن کي نوڪريون ڏنيون آهن، استاد 40 هزار پگهار کڻي رهيا آهن. ٻئي طرف ڪراچي (اسٽاف رپورٽر) سنڌ اسيبملي اسپيڪر آغا سراج دراني جي وڏي وزير سيد قائم علي شاهه سان ملاقات ڪئي آهي. وڏي وزير سيد قائم علي شاهه سنڌ اسيمبليءَ ويجهو سرڪاري ڪواٽرن جي متاثرن کي مختلف علائقن ۾ سرڪاري رهائش ڏيڻ جون هداتيون جاري ڪري ڇڏيون آهن. سنڌ اسيبمليءَ جي اسپيڪر آغا سراج دراني، وڏي وزير سيد قائم علي شاهه سان ملاقات ڪري سنڌ اسيمبليءَ جي سرڪاري ڪواٽرن جي متاثرن بابت ڳالهه ٻولهه ڪئي. ان موقعي تي وڏي وزير سيد قائم علي شاهه چيو ته حڪومت ڪنهن کي به بي گهر نه ڪندي. وڏي وزير چيف سيڪريٽري ۽ سيڪريٽري سروسز سان به فون تي رابطو ڪري متاثرن خالي فليٽن ۾ منتقل ڪرڻ جي هدايت ڪئي. وڏي وزير سان ملاقات کانپوءِ ميڊيا سان ڳالهائيندي آغا سراج دراني چيو ته متاثرن کي جلد سرڪاري ڪواٽر ڏنا ويندا. هن چيو ته متاثرن لاءِ صدر، لائينز ايريا ۽ قائد آباد ۾ سرڪاري ڪواٽرن جو بندوبند ڪيو ويو آهي. سندس چوڻ هو ته متاثرن جو معاملو وڏو نه آهي، رڳو اٺن خاندانن کي گهر ڏيڻا آهن. آغا سراج دراني چيو ته وڏي وزير سيد قائم علي شاهه متاثرن جي ڀرپور مدد جي خاطري ڪرائي آهي.

 

مخالف ڌرچارسده سانحي تي عدالتي جاچ جو مطالبو ڪري ڇڏيو

اسلام آباد (بيورو) خورشيد شاهه چيو آهي ته آرمي چيف پاران ملازمت ۾ واڌ نه وٺڻ جو اعلان سٺي روايت آهي. قومي اسيمبلي ۾ مخالف ڌر جي اڳواڻ خورشيد شاهه چيو آهي ته آرمي پبلڪ اسڪول ۽ چارسده واقعن جي جاچ لاءِ عدالتي ڪميشن ٺاهڻ جو مطالبو ڪندي چيو آهي ته آرمي چيف جنرل راحيل شريف جي بيان سان قوم ۾ خوش ۽ فوج جو وقار بلند ٿيو آهي. اسلام آباد ۾ ميڊيا سان ڳالهائيندي خورشيد شاهه چيو ته آرمي چيف پاران ملازمت ۾ واڌ نه وٺڻ جو اعلان سٺي روايت آهي، سندس بيان ساراهه جوڳو آهي. هن چيو ته آرمي چيف جي ڳالهين مان اڳ ئي محسوس ٿيندو هو ته راحيل شريف حقيقي سپاهي آهي. سندس چوڻ هو ته آرمي چيف جو فيصلو فخر جوڳو آهي، چارسده سانحي تي ڀارتي وزيراعظم جي مذمت اچي وئي پر چوڌري نثار جو بيان ناهي آيو. مخالف ڌر جي اڳواڻ جو چوڻ هو ته باچا خان يونيورسٽي وينا ملڪ به وئي پر وزيراعظم ناهي پهتو. سندس چوڻ هو ته قومي ايڪشن پلان تي عملو نه پيو ٿئي، ٻڌايو وڃي ته عمل ڪرائڻ جو ذميوار ڪير آهي. خورشيد شاهه چيو ته نيڪٽا جو هر ٽئين مهيني اجلاس سڏائڻ گهرجي،ٽن هزار ڪيسن مان رڳ 60 ڪيس فوجي عدالتن ڏانهن اماڻيا ويا آهن، ٻين ڪيسن جو فيصلو ڪير ڪندو.

 

نظرثاني درخواستن ۾ وڪيل مٽائڻ جي اجازت ۽ ٻڌڻي ۾ اجائي دير ڪرڻ نه ڏني ويندي: سپريم ڪورٽ

اسلام آباد (بيورو) سپريم ڪورٽ چيو آهي ته نظرثاني جي درخواستن ۾ وڪيل مٽائڻ جي اجازت نه ڏينداسين ۽ نه ئي درخواستن جي ٻڌڻي ۾ غير ضروري دير ٿيڻ ڏني ويندي، وڪيل تياري ڪري اچن ۽ دليل ڏين، اها هدايت 3 رڪني بئنچ جي اڳواڻ جسٽس ميان ثاقب نثار مسمات رضيه بي بي جي نظر ثاني ڪيس جي ٻڌڻي دوران جاري ڪئي ، عدالت وڪيل مٽائڻ جي اپيل رد ڪندي چيو ته درخواست هونءِ به 66 ڏينهن کان پوءِ داخل ڪئي وئي آهي ۽ وري وڪيل مٽائڻ جي اجازت گهري پئي وڃي، ان لاءِ نه وڪيل تبديل ڪرڻ جي اجازت ڏئي سگهجي ٿي ۽ نه ئي وڌيڪ عرصي تائين درخواست ٻڌي سگهجي ٿي،اهڙا ريمارڪس ڏيڻ کانپوءِ عدالت درخواست رد ڪري ڇڏي.

 

جلدي ڇو؟ وقت اچڻ تي سڀني کي اختيا ملي ويندا: مولابخش چانڊيو

ڪراچي(اسٽاف رپورٽر) نجي ٽي وي سان ڳالهائيندي اطلاعات کاتي جي صوبائي صلاحڪار مولابخش چانڊيو چيو آهي ته پ پ ڳالهين ذريعي معاملا حل ڪرڻ تي يقين رکون ٿا، ايم ڪيو ايم ڪي ڇا جي جلدي آهي، وقت اچڻ تي ميئر ۽ ٻين بلدياتي نمائندن کي اختيار ملي ويندا.

 

جنرل راحيل شريف جي ملازمت واري مدي ۾ واڌ لاءِ ڪو به فائيل وزيراعظم هائوس کي ناهي موڪليو ويو: خواجه آصف

اسلام آباد (بيورو) خواجه آصف چيو ته جنرل راحيل شريف جي ملازمت واري مدي ۾ واڌ لاءِ ڪو به فائيل وزيراعظم هائوس کي ناهي موڪليو ويوبچاءُ واري وزير خواجه آصف چيو آهي ته چيف آف آرمي اسٽاف جنرل راحيل شريف جي ملازمت واري مدي ۾ واڌ جو معاملو، حڪومت ۾ ڪنهن به سطح تي غور هيٺ نه هو.سندس چوڻ هو ته جنرل راحيل شريف جي مدي ۾ واڌ جي معاملي کي ڪجهه مفاد پرستن بحث هيٺ آندو.هڪ سوال جي جواب ۾ بچاءُ واري وزير چيو ته هو اي پي ايس ۽ چارسده واقعي جي جاچ لاءِ ڪميشن جوڙڻ واري سيد خورشيد شاهه جي مطالبي جي ّحمايت ڪري ٿو.هن چيو ته حڪومت سمورا معاملا سرچاءُ ذريعي ۽ مشوري سان حل ڪرڻ تي يقين رکي ٿي.

 

اليڪشن کٽڻ باوجود عدالت جا چڪر ڪاٽيندا رهنداسين، پـِي ٽـِي آءِ جتي به هارائيندي آهي کيس اتي ڌانڌلي نظر ايندي آهي: سعد رفيق

اسلام آباد (بيورو) اليڪشن کٽڻ باوجود عدالت جا چڪر ڪاٽيندا رهنداسين، پـِي ٽـِي آءِ جتي به هارائيندي آهي، عمران خان کي اتي ڌانڌلي نظر ايندي آهي. ريلوي واري وفاقي وزير خواجا سعد رفيق چيو آهي ته عدالتي فيصلن جو احترام آهي پر اندازو نه هو ته اليڪشن کٽڻ باوجود عدالت جا چڪر ڪاٽيندا رهنداسين، پـِي ٽـِي آءِ جتي به هارائيندي آهي، عمران خان کي اتي ڌانڌلي نظر ايندي آهي.  سپريم ڪورٽ ٻاهران ميڊيا سان ڳالهائيندي خواجه سعد رفيق چيو ته پـِي ٽـِي آءِ جي حامد خان هن ڪيس ۾ ڪيترائي ڀيرا التويٰ ورتي، جنهن سبب عدالتي فيصلي ۾ دير ٿي. هن چيو ته عدالت جي فيصلن جو احترام آهي، هـُو ووٽن جي تصديق سان گڏ ٻيهر ڳڻپ لاءِ به تيار آهن پر کين اها ڄاڻ نه هئي ته ڪاميابي باوجود عدالت جا چڪر ڪٽينداسين رهنداسين. خواجه سعد رفيق چيو ته تحريڪ انصاف جتي ڪامياب ٿيندي آهي، اتي عمران خان کي ڪا به ڌانڌلي نظر ناهي ايندي پر  جتي کين شڪست ملندي آهي، اتي  ڌانڌلي جو شور ڪيو ويندو آهي..