تازيون خبرون

Daily Archives: January 26, 2016

فورس جوڙڻ لاءَ فوري قدم کڻڻ جي هدايت، ڀرتي قانون موجب ڪئي وڃي: وڏو وزير

ڪراچي (اين اين آءِ) سنڌ جي وڏو وزير سيد قائم علي شاهه پاڪ چين اقتصادي راهداري رٿا ۽ چيني انجنيئرز جي حفاظت لاءِ صوبي ۾ خصوصي فورس قائم ڪرڻ جي منظوري ڏيئي ڇڏي آهي هن فورس ۾ 2000 رٽائرڊ فوجي اهلڪارن کي ڀرتي ڪيو ويندو وڏي وزير آءِ جي سنڌ کي هدايت ڪئي ته ان فورس جوڙڻ لاءِ فوري قدم کنيا وڃن ۽ اهلڪارن جي ڀرتي قانون مطابق جلد کان جلد مڪمل ڪئي وڃي ذريعن موجب هن فورس قائم ڪرڻ جي منظوري لاءِ سنڌ جي گهرو کاتي سنڌ جي وڏي وزير کي اماڻي هئي جيڪا سنڌ جي وڏي وزير منظور ڪئي آهي.

 

سنڌ سرڪار پراسيڪيوشن ترميمي بل بابت سپريم ڪورٽ ۾ داخل ڪرائڻ لاءِ جواب تيار ڪري ورتو

ڪراچي (اسٽاف رپورٽر) پراسيڪيوشن ترميمي بل بابت اجايا ابهام پيدا ڪيا پيا وڃن، ڪنهن به ڏوهاري کي تحفظ نه ملندو: سنڌ سرڪار پراسيڪيوشن ترممي بل بابت سپريم ڪورٽ ۾ داخل ڪرائڻ لاءِ جواب تيار ڪري ورتو آهي. سنڌ  سرڪار سنڌ اسيمبلي مان پاس ڪرايل پراسيڪيوشن ترميمي بل بابت جواب تيار ڪري ورتو  آهي، جيڪو سپريم ڪورٽ ۾ جمع ڪرايو ويندو. سنڌ سرڪار جواب ۾ چيو آهي ته سنڌ اسيمبلي قانونساز ادارو آهي، ان کي ذميوارين جي ادائيگي کان نه ٿو روڪي سگهجي. سنڌ سرڪار موجب، بل آئين ۽ قانون موجب آهي، ان حوالي سان سپريم ڪورٽ ۽ هاءِ ڪورٽ جا فيصلا به موجود آهن، جڏهن ته ٻين صوبن ۾ ساڳيو ئي قانون آهي. سنڌ حڪومت جواب ۾ چيو آهي ته پراسيڪيوشن ترميمي بل غلط ڳالهيون ڪيون پيون وڃن، سنڌ اسيمبلي ڪنهن به قسم جي قانونسازي جي منظوري جو اختيار رکي ٿي. واضح رهي ته سنڌ اسيمبلي پراسيڪيوشن ترميمي بل جي منظوري ڏني هئي، جنهن کي سپريم ڪور ٽ ۾ چيلينج ڪيو ويو.

 

اسپيڪر اياز صادق اسلامي ملڪن جي پارلياماني يونين جو وائيس چيئرمين چونڊجي ويو

اسلام آباد (بيورو) قومي اسيمبلي جي اسپيڪر سردار اياز صادق کي گڏيل راءِ سان اسلامي ملڪن جي پارلياماني يونين جي 11 هين جنرل اسيمبلي جو وائيس چيئرمين چونڊيو ويو آهي. بغداد مان مليل اطلاع مطابق سندس اها چونڊ عراق جي گادي واري شهر بغداد ۾ رٿيل اسلامي ملڪن جي پارلياماني يونين جي 11 هين جنرل اسيمبلي جي افتتاحي اجلاس ۾ ڪئي وئي، جنهن جو افتتاح عراق جي صدر فائود مسومند ۽ وزيراعظم حيدر جواد خادم العابدي گڏيل طور تي ڪيو. قومي اسيمبلي جي اسپيڪر سردار اياز صادق جو وائيس چيئرمين شپ جي نالو پيش ڪندي ايران جي اسپيڪر ڊاڪٽر علي لاريجاني پاڪستان جي دهشتگردي خلاف ڪوششن ۽ مسلم دنيا ۾ اتحاد ۽ مفاهمت کي فروغ ڏيڻ لاءِ پاڪستاني قيادت جي ڪردار کي زبردست خراج تحسين پيش ڪيو، وائيس چيئرمين شپ جي لاءِ سردار اياز صادق جي نالي جي 32 ملڪن مان آيل اسپيڪرن ۽ وفدن جي سربراهن متفقه طور تي تائيد ڪئي. ڪانفرنس دوران قومي اسيمبلي جي اسپيڪر بغداد ۾ ايران، ڪويت ۽ صوماليا جي پارليامينٽ جي پنهنجي هم منصبن سميت مصر، ڪرد جي آزاد خطي، فلسطين ۽ افغانستان جي پارلياماني وفدن سان ملاقاتون ڪيون. ڪويت جي اسپيڪر مرزوق الغانم سان ملاقات دوران قومي اسيمبلي جي اسپيڪر سردار اياز صادق سڄي مسلم دنيا ۾ اتحاد ۽ مفاهمت کي فروغ ڏيڻ جي ضرورت تي زور ڏنو، ٻنهي اڳواڻن وچ اوڀر جي صورتحال تي خيالن جي ڏي وٺ ڪئي، ۽ ڪويت جي اسپيڪر سعودي عرب ۽ ايران جي وچ ۾ مفاهمت جي لاءِ پاڪستان جي وزيراعظم جي ڪوششن کي ساراهيو، ايران جي اسپيڪر علي لاريجاني به اسپيڪر سردار اياز صادق سان پنهنجي ملاقات ۾ پاڪستان جي مفاهمتي ڪوششن کي ساراهيو ۽ مسلم ملڪن جي وچ ۾ تعاون کي فروغ ڏيڻ جي ضرورت تي به زور ڏنو، سردار اياز صادق ايران جي اسپيڪر کي ايران تي لڳل پابندين جي خاتمي تي مبارڪباد ڏيندي ان اميد جو اظهار ڪيو ته پابندين جي خاتمي سان خطي ۾ ترقي جي هڪ نئين دور جو آغاز ٿيندو، صوماليا جي پنهنجي هم منصب محمد شيخ عثمان جواهري سان ملاقات ۾ اسپيڪر سردار اياز صادق صوماليا جي پارليامينٽ جي لاءِ پاڪستان جي پارليامينٽ پاران ٽريننگ ۽ ليجسليٽيو ڊرافٽنگ جي شعبن ۾ هر ممڪن تعاون جو يقين ڏياريو، صوماليا جي اسپيڪر پاڪستان جي پارليامينٽ پاران ڪيل قانونسازي ۾ گهري دلچسپي جو اظهار ڪندي صوماليا جي پارليامينٽ جي استحڪام جي لاءِ تعاون جي آڇ تي قومي اسيمبلي جي اسپيڪر جو ٿورو ادا ڪيو.

 

افغانستان ۾ ملا فضل الله گهر تي حملي ۾ مارجي ويو: پرڏيهي ميڊيا

دبئي(م.ڊ) هڪ خليجي اخبار جو چوڻ آهي ته افغانستان جي صوبي ننگر هار ۾ پابندي پيل تحريڪ طالبان پاڪستان جو سربراهه ملا فضل الله جي گهر تي حملو ٿيو آهي جنهن دوران ملا فضل الله مارجي ويو آهي، تنهن هوندي به آزاد ذريعن ان جي تصديق ناهي ڪئي، گلف نيوز موجب ننگر هار ۾ ملا فضل الله جي گهر تي حملو ڪيو جنهن ۾ هو مارجي ويو آهي، گلف نيوز موجب ننگر هار ۾ هي ڪارروائي پاڪ فوج ۽ افغانستان ۾ موجود آمريڪي فورسز جي گڏيل طور تي ڪارروائي هئي.

 

سپريم ڪورٽ پ پ ايم اين اي اعجاز جکراڻي جي نااهلي لاءِ داخل درخواست رد ڪري ڇڏي

اسلام آباد (بيورو) سپريم ڪورٽ پاڪستان پيپلز پارٽي جي ايم اين اي اعجاز جکراني جي نااهلي لاءِ داخل درخواست رد ڪري ڇڏي، اين اي 208 تان چونڊيل ايم اين اي اعجاز جکراني جي نااهلي لاءِ سندس مخالف اميدوار مسلم ليگ (ن) جي الاهي بخش سومري سپريم ڪورٽ ۾ درخواست داخل ڪئي هئي،عدالت اڄ ٻڌڻي ڪندي اها درخواست رد ڪري ڇڏي، سپريم ڪورٽ پنهنجي فيصلي ۾ چيو آهي ته تصديق ٿيل ووٽ نقلي ناهن، جڏهن ته ڌانڌلي جو الزام مڙهيندڙ جي اها ذميواري آهي ته هو ثبوت به پيش ڪري، ان حوالي سان سپريم ڪورٽ پهرين ئي اهو معاملو طئه ڪري چڪي آهي، جسٽس ثاقب نثار ٻڌڻي دوران ريمارڪس ڏيندي چيو ته ٽربيونل ۾ چونڊ اپيل داخل ڪرڻ کانپوءِ ترميم نه ٿي ڪري سگهجي، هن چيو ته سپريم ڪورٽ ايندڙ چونڊن لاءِ گهڻيون شيون طئي ڪري ڇڏيون آهن ۽ عدالت پنهنجي فيصلي تي نظرثاني ڪرڻ لاءِ به تيار ناهي.

 

ڊي جي رينجرز پاران پرڏيهي واپارين کي ڪراچي ۾ سيڙپڪاري ڪرڻ جي دعوت، امن بحال ٿي ويو آهي: بلال اڪبر

ڪراچي (اسٽاف رپورٽر) ڊي جي رينجرز ميجر جنرل بلال اڪبر چيو آهي ته رينجرز ۽ پوليس جي ڪوششن سان ڪراچي ۾ امن بحال ٿيو. رينجرز هيڊ ڪوراٽر ۾ واپارين جي وفد ڊي جي رينجرز سان ملاقات ڪري ڏوهارين خلاف رينجرز جي ڪاررواين جي واکاڻ ڪئي. ان موقعي تي ڳالهائيندي ڊي جي رينجرز چيو ته ڪراچي ۾ ڀتي خوري ۽ ٽارگيٽ ڪلنگ جي وارداتن ۾ خاطر خواهه گهٽتائي آئي آهي. سندس چوڻ هو ته امن امان جي صورتحال ۾ بهتري اچڻ سبب پرڏيهي سيڙپڪار بغير خوف جي شهر جو رخ ڪن. ڊي جي رينجرز ميجر جنرل بلال اڪبر جو چوڻ هو ته واپاري برادري ڀروسو ڪن ته شهر مان ڏوهن جو مڪمل خاتمو ڪيو ويندو، هو اسٽريٽ ڪرائيم جي خاتمي لاءِ منصوبو جوڙي رهيا آهن.