تازيون خبرون

Daily Archives: January 25, 2016

شاهه رخ خان جا گانا هوندي مونکي ڪنهن به نفسياتي ماهر جي ضرورت ناهي: عاليا ڀٽ

ممبئي (شوبز نيوز) بالي ووڊ جي نوجوان اداڪارا عاليا ڀٽ چيو آهي ته شاهه رخ خان تي فلمايل ڪلام هوندي کيس ڪنهن به نفسياتي ماهر جي ضرورت ناهي، ڀارتي ميڊيا مطابق هڪ انٽرويو ۾ عاليا ڀٽ چيو ته هوءَ ڪنگ خان جي تمام گهڻي چاهيندڙ آهي ۽ سندس گانا کيس نفسياتي مسئلن کان محفوظ رکندا آهن، هن چيو ته جيستائين شاهه رخ خان جا گانا موجود آهن، کيس ذهني دٻاءَ دوران ڪنهن به نفسياتي ماهر جي ضرورت ناهي، هن انڪشاف ڪيو ته هوءَ شاهه رخ خان جي ايتري ته چاهيندڙ آهي جو جڏهن سندس فلم “ ڪڇ ڪڇ هوتا هي“ رليز ٿي ته هن پنهنجو هيئر اسٽائل ڪاجل جهڙو ڪرائي ڇڏيو هو، واضح هجي ته عاليا ڀٽ ۽ شاهه رخ خان هڪ فلم ۾ گڏ ڪم ڪري رهيا آهن، جنهن جي شوٽنگ به شروع ٿي چڪي آهي.

 

پريانڪا چوپڙا اداڪاري ۽ ڳائڻ ۾ ڪاميابيون سهيڙڻ کانپوءِ پروڊيوسر بڻجي وئي

ممبئي (شوبز نيوز) بالي ووڊ جي بهترين اداڪارا پريانڪا چوپڙا اداڪاري ۽ ڳائڻ جي ميدان ۾ ڪاميابيون سهيڙڻ کانپوءِ هاڻ پروڊيوسر به بڻجي وئي آهي، پريانڪا جو ڳاڻيٽو بالي ووڊ جي انهن اداڪارائن ۾ ٿئي ٿو ، جن نه رڳو بلاڪ بسٽر فلمون ڏنيون آهن پر ٽي وي پروگرم جي ميزباني ۽ ڳائڻ ۾ به ڪاميابيون ماڻيون آهن، ميڊيا رپورٽن مطابق پريانڪا چوپڙا هڪ آمريڪي ٽي وي سيريز جيان “ اٽس مائي سٽي” جي نالي سان سيريز پروڊيوس ڪري رهي آهي، جيڪا ممبئي ۾ رهندڙ انهن چئن ڇوڪرين جي حقيقي زندگي تي ٻڌل آهي، جيڪي ڪامياب زندگي گهارڻ لاءِ مختلف مسئلن کي منهن ڏين ٿيون ، 11 قسطن تي ٻڌل اها سيريز هفتيوار نشر ڪئي ويندي.

 

پاڪستان جي بيٽنگ پٽڙي تان لٿل، نيوزيلينڊ پهرين ون ڊي 70 رنسن تان کٽي ورتي

ويلنگٽن (اسپورٽس نيوز) نيوزيلينڊ پهرين ون ڊي ميچ ۾ پاڪستان کي 70 رنسن تان مات ڏئي ڇڏي، ويلنگٽن جي ميدان تي کيڏيل ميچ ۾ نيوزيلينڊ پهرين بيٽنگ ڪندي مقرر 50 اوورن ۾ 8 وڪيٽن جي نقصان تي 280 رنسون ٺاهيون، جواب ۾ پاڪستاني ٽيم 46 اوورن ۾ 210 رنسن تي ڍير ٿي وئي، نيوزيلينڊ جي شروعات جيتوڻيڪ سٺي نه ٿي ۽ 99 رنسن جي گڏيل اسڪور تي 6 رانديگر پويلين موٽي چڪا هئا پر پاڪستاني بالنگ ان کانپوءِ پٽڙي تان لهي وئي، جنهن جو ڪيويز ڀرپور فائدو ورتو، نڪسل زبردست بيٽنگ ڪئي ۽ پاڪستاني بالرن کي ڏينهن جا تارا ڏيکاري ففٽي هڻي ويو، هن 7 چوڪن جي مدد سان 82 رنسون ٺاهيون، جڏهن ته سينٽنر ۽ هينري دونهيندار بيٽنگ ڪندي 48 -48 اسڪور ڪري ٽيم جي مضبوط ڪري ڇڏي، ان کانسواءِ ملينگهن 31 رنسون ٺاهي رٽائر ٿيو، پاڪستان طرفان محمد عامر ۽ انور علي 3-3 ۽ محمد عرفان 2 وڪيٽون ورتيون، اهڙي ريت پاڪستان کي فتح لاءِ 282 رنسن جو ٽارگيٽ مليو،پاڪستان جي شروعات به سٺي نه ٿي ۽ ٻئي اوپنر اظهر علي ۽ احمد شهزاد 37 جي گڏيل اسڪور تي آئوٽ ٿي ويا، جنهن کانپوءِ پاڪستان جي بيٽنگ پٽڙي تي نه چڙهي سگهي ۽ رڳو بابر اعظم سٺي ڪارڪردگي ڏيکاري،  هن 62 رنسون اسڪور ڪيون، جڏهن ته محمد حفيظ 46 بالن تي 42 رنسون ٺاهي آئوٽ ٿيو، عماد وسيم هڪ، سرفراز احمد 30 ۽ انور علي 16 رنسون ٺاهيون، قومي ٽيم 46 اوورن ۾ 210 رنسن تي همت هاري ويٺي، اهڙي ريت نيوزيلينڊ 70 رنسن تان ڪاميابي ماڻي، ڪيويز طرفان ٽرينٽ بولٽ 4 ۽ ايلٽ 3 شڪار ڪيا، نڪلس کي مين آف دي ميچ قرار ڏنو ويو.

 

نيوزيلينڊ جي دوري دوران قومي ٽيم جي ڪارڪردگيءَ تي پريشان ناهيون:شهريار خان

لاهور (اسپورٽس نيوز)پاڪستان ڪرڪيٽ بورڊ جي چيئرمين شهريار خان جو چوڻ آهي ته نيوزيلينڊ دوري دوران قومي ٽيم جي ڪارڪردگيءَ بابت ڪا به ڳڻتي ناهي.ڀارت جي ٽيم آسٽريليا ۾ هارائي وئي آهي،ٽي ٽوئنٽي ورلڊ ڪپ ۾ شاهد آفريدي ئي ڪپتان مقرر هوندو.ميڊيا سان ڳالهائيندي شهريار خان وڌيڪ چيو ته هارائڻ ۽ کٽڻ راند جو حصو آهي،نيوزيلينڊ جي مشڪل ڪنڊيشنز ۾ هارائڻ تي پريشان ناهيون.سندس چوڻ هو ته ٽي ٽوئنٽي وڏو ايونٽ آهي ۽ ان ۾ گهڻي تبديلي نه ٿيندي، جڏهن ته ڪپتان شاهد آفريدي ئي رهندو.

 

اڙي تلور تنهنجو ڇا ٿو وڃي…؟: وسعت الله خان

ايئن گهٽ ئي ٿيندو آهي جو سپريم ڪورٽ پنهنجي چيف جسٽس جي سربراهيءَ ۾ جڙيل ڪنهن اڳوڻي بينچ جي ڪنهن متفقه فيصلي کي رد ڪري ڇڏي. وري اهو سوال به ذهن ۾ اٿي ٿو ته هڪ ئي معاملي تي اُهو فيصلو درست هو يا هي فيصلو درست آهي. جسٽس منير جي نظريه ضرورت کي جاڳائڻ جي فيصلي ۽ افتخار محمد چوڌريءَ جي نطريه ضرورت کي دفن ڪري ڇڏڻ واري فيصلي تائين انصاف جا قانوني ڪتاب اهڙن ڪيئي نظرين سان ڀريل آهن، جن ۾ هڪ ئي عدالت پنهنجا ئي فيصلا لکيا، مٽايا ۽ سٽايا.

ان سلسلي جي تازي ڪڙي عزت ماب چيف جسٽس انور ظهير جماليءَ جي اڳواڻيءَ ۾ سپريم ڪورٽ جي پنج رڪني بينچ جو تلور جي شڪار جي بحاليءَ بابت اهو فيصلو آهي، جنهن ۾ اڳوڻي برادر جج جواد ايس خواجا جي ٽه رڪني بينچ جو (19 آگسٽ 2015) فيصلو تبديل ڪندي چيو ويو ته عدالت جو ڪم قانونسازي نه پر لاڳو قانون جي تشريح ڪرڻ آهي.

مون جهڙن قانون کان اڻ واقف لکارين لاءِ مشڪل هي آهي ته نه مان اڳوڻي چيف جسٽس جي فيصلي جون فني رمزون سمجهي سگهان ٿو ۽ نه ئي موجوده چيف جسٽس جي فيصلي جو ٽيڪنيڪي تجزيو ڪري سگهان ٿو. ڪا تجزياتي ڳڙٻر ٿي وڃي ته توهين عدالت الڳ.

پوءِ به اوهان پڇندئو ته تلور جي شڪار تي مڪمل پابنديءَ واري اڳين فيصلي يا ان تان پابندي هٽائڻ يا نه هتائڻ وارو اختيار صوبن کي موٽائي ڏيڻ واري هاڻوڪي فيصلي مان مونکي ڪهڙو سٺو لڳو؟ ته مان بنا هٻڪ جي چوندس ته تازو فيصلو. هي فيصلو ڪنهن آئڊيلزم جي بنياد تي ناهي پر ان ۾ ٺوس زميني ۽ قانوني حقيقتن کي بنياد بڻايو ويو آهي.

تلور ته ايندو ويندو رهندو پر رياستي مفاد پنهنجي جاءِ تي قائم رهندو. هونئن به تلور جي بقا جو سوال صوبائي خودمختياري ۽ قومي پرڏيهي پاليسيءَ جي مقصدن يا هدفن تان ڇا وڌيڪ اهم آهي. رياستي مفاد تي ته انسان قربان ٿي وڃي ٿو تلور ڇا ٿو ڏئي؟

مورڳو هيئن چوڻ وڌيڪ بهتر ٿيندو ته ڏوهه ئي تلور جو آهي. نه اُهي باقاعدگيءَ سان پاڪستان اچن، نه انهن جي پٺيان عرب شهزادا اچن نه پرڏيهي کاتي کي پرمٽون جاري ڪرڻيون پون، نه ئي ڪو مقامي ماڻهو تلور جي شڪار جي نالي ۾ قتل عام جي پابنديءَ جي درخواست داخل ڪري، نه ڪنهن اعليٰ عدالتي بينچ کي ان جي شڪار تي مڪمل پابندي هڻڻي پئي نه ئي وري ٻي ساڳي قسم جي عدالت کي اهو فيصلو مٽائڻو پئي.

مان آخر تلور جو حمايت ڇو ڪريان؟ هڪ ته غير قانوني طور پاڪستان جي حدن ۾ داخل ٿئي ٿو مٿان وري اها توقع به رکي ٿو ته اسان ان جي مهماني به ڪيون، اکين ۾ ويهاريونس؟ ڇا اهو مونتي پئسا نڇاور ڪري ٿو، تيل اوڌر تي ڏئي ٿو؟ ٺيڪا ورهائي ٿو؟ خير سگالي ڏئي ٿو؟ ڇا ان جي هٿ ۾ بندوق آهي جو سلام ڪيانس؟

تلور کي شڪر ادا ڪرڻ گهرجي ته اهو اتحاد بين المسلمين جو سفير آهي. ان جو وجود اسلامي ڪانفرنس واري تنظيم اُمت جي تصور ۽ اسلامي اخوت کان به ڳرو آهي ان کي ته خوشيءَ ۾ ئي نه ڍاپڻ گهرجي ته امت جي چونڊ ماڻهن کي ئي ان جي شڪار، پڪڙڻ ۽ اسمگلنگ جي اجازت آهي. جيڪڏهن اها شيءِ عام ٿي وڃي ته بچي ويل 92 هزار به نه بچن.

بس هي تلور وارو معاملو به ڪجهه سال باقي آهي. سازندن کي سامان کڻڻ ڏي پوءِ اسين ڪٿي، تون ڪٿي ۽ هو ڪٿي. غلام عباس جي سنگت ڪنهن ٻئي هندو جي ٿاڪُ ڪندي، تلور نه سهي تلوار ئي سگهي.

 

۽ جڏهن معصوم نياڻيون وڪامجڻ لڳن….!: حاجي گل حسن آريسر

اسان هينئر ڪٿي بيٺا آهيون؟ ڇا ڪري رهيا آهيون؟ ڇا پنهنجي ماضي کي ڏٺو ته ڇا مان ڇا آهيون؟ ڇا اسان دؤر جديد جون تفاضائون پوريون ڪري رهيا آهيون؟ ڇا اسان ايماني ۽ اصولي دولت وڃائي چڪا آهيون؟ ڪا به ڳالهه نه باقي رهي آهي، خوف خدا دلين مان نڪري ويو آهي، مال حرام جي حصول لاٰءِ ڏينهن رات لڳا پيا آهيون، ايندڙ حشر جيڪو عذاب الاهي جي صورت ۾ نازل ٿيڻ وارو آهي، ان کي وساري ويٺا آهيون، ڪنهن به طرح سندس مفاد حاصل ٿيڻ کانپوءِ ڀلي اصول پرستي ۽ ضمير جو سودو ڪرڻو ڇو نه پوي، مفاد حاصل ڪرڻ هن مخلوق جو گهڻي ڀاڱي شيوو ٿي ويو آهي ۽ وري سياسي اقتداري ڌر وارا ڪمزور يا موڪلائي ويندا آهن ته پوءِ اهي بي ضمير جيوڙا دير نه ڪندا ۽ ڪي به خطرناڪ ڏوهه ڪرڻا پيا، پوءِ ڀلي قتل ڇو نه هجن، سياسي ڀوتارن جي  سپورٽ هجي، ان ۾ دير نه ٿيندي، پوءِ اڳتي هلي انهن غريبن  جا ناحق خون به سياسي ڀوتارن ۽ دولت جي چمڪار تي مقتولن جي لالچي عزيزن هٿان ٺاهه جي صورتن ۾ ٻڏي وڃن  ٿا ۽ ڏوهاري ڇٽي وڃن ٿا، اهڙين حالتن ۾غريبن جي قتلن ۾ مقتولن جي عزيزن ۽ رشتدارن هٿان مقتولن جا لاش روڊن ته رکي ڌرڻا هڻي ميڊيا تي آڻي ملهه وڌائڻ لاءِ جوابدارن جي گرفتاري جا مطالبا ڪرڻ بعد ايف  آءِ  آر ۾ نامزد جوابدار  گرفتار ٿيڻ بعد ڏوهي ڌر ۽ مقتولن واري ويڪائو مال، ٽولي وچ ۾ دولت جي انبار تي خونن جي سودي بازي ٺاهه جي صورت ۾ ٿي وڃي ٿي ۽  ڏوهي آزاد ٿيو وڃن، غريب جو خون ٻڏيو وڃي.

مثال طور عمرڪوٽ جي ديهه ٺانٺرائي واري قتلن جي واقعي جو آهي، هتي ته صغير نياڻين جو لکين رپين ۾ وڪرو ٿئي ٿو، پوءِ شادي بعد لکين رپين ۾ خريد ڪيل اهي نياڻيون ڏورانهين علائقن ۾ ڏنل هونديون آهن، جن جو جيڪو حشر ٿئي ٿو سو ڪنهن کان به ڳجهو نه آهي، ڪجهه علائقن ۾ ته انهن کي عذابن بعد مختلف الزام لڳائي ماريو ڇڏين ٿا. تازو مثال عمرڪوٽ ۾ 10 سالن جي مينا جو آهي، ساڻس شادي ڪندڙ گهوٽ ڄڃ سميت اڃا جيل ياترا ۾ آهي، چوڻ جو مقصد ته اهڙا ڏوهاري ماڻهو دولت ۽ سياسي اثر جي زور تي قانون جي گرفت کان بچي وڃن ٿا، پوءِ اهڙي قسم جا ڏوهه هنن لاءِ تماشو بڻيل هوندا آهن، مقصد ته اهڙي قسم جي ڏهارين ۾ نه خوف خدا هوندو آهي ۽ نه ئي دين ڌرم هوندو آهي، ڏوهه هنن جي دنيا آهي، سياسي سپورٽ لازمي آهي، جيڪي ڏهارين جي به مفاد پرست سياستدان مدد ڪندا آهن، پوءِ اهڙا ڏوهاري سياستدانن جي ونگار به وهندا آهن ۽ پوءِ اهڙي ڏوهاري ۽ مفاد پرست ڀوتار انهن اقتداري سياستدانن جو سورج غروب ٿيندو ڏسندا آهن ته سندن مفادن خاطر ٺڪ ٻئي سياسي ٺڪاڻي تي پهچي ويندا آهن، ڪنهن سان سچا نه هوندا آهن. “ لوٽا ٺاهه لوٽا ٺاهه” لڳو پيو هوندو آهي.

ڪو وقت هو جو ان وقت جي عمرڪوٽ جي ايس ڊي ايم ڪامران لاشاري جي رهائش گاهه جي بورچي خاني ۾ چوڪيدار جي عدم موجودگي ۾ گڏهن بورچي خاني ۾ داخل ٿي نقصان ڪيو ۽ ڀڃ ڊاهه ڪئي، جڏهن ڪامران صاحب کي اها نقصان جي خبر پئي ته هن هڪدم پوليس کي حڪم ڪيو ته انهن گڏهن ڏوهه ڪيو آهي، هنن کي گرفتار ڪري حراست ۾ ورتو وڃي، پوليس عمرڪوٽ شهر جي سمورن گڏهن کي پڪڙي ڏوهي هئڻ سبب ڍڪ ۾ بند ڪري ڇڏيو ۽ قانون جي پورائي ڪئي، هي اهو آفيسر هو، جيڪو سکر ۾ ڊپٽي ڪمشنر هئڻ وقت حڪمران جي حڪم تي سندس نگراني ۾ پوليس پارٽي جي قيادت ڪندي عمرڪوٽ لڳ هاڻوڪي راڻا همير سنگهه کي ڪنهن ڏکائيندڙ الزام ۾ گرفتار ڪري ورتو هو، حالانڪه عمرڪوٽ اسلام ڪوٽ، مٺي ۽ ٻيا هندو اڪثريت وارن شهرن ۾ “گئو ماتا” جو احترام لازم هوندو آهي، اڄ به انهن شهرن ۾ ڳئون ولرن جي صورت ۾ ڏينهن هجي يا رات هجي، شهرن ۾ آزاد گهمنديون رهن ٿيون، دڪاندارن ۽ ريڙهي وارن جو سامان کائينديون رهنديون آهن، ڪنهن ڌنار جي ضرورت نه هوندي آهي، هنن کي روڪڻ وارو ڪير به ڪونه هوندو آهي پر ڏسو اهڙن شهرن جي مقدس هنڌن تان اهڙا بي ايمان انسان به ڪونه مڙندا آهن، تازو چور اسلام ڪوٽ ڀر سان سنت نيڻو رام جي آشرم مان لکين رپين جو مال چوري ڪري ويا ۽ تازي خبر موجب مٺي جي عمر فاروق مسجد مان ڪي  چور سامان چوري ڪري ويا ۽ پوليس چورن کي پڪڙڻ ۾ ناڪام وئي، مسجد جي پيش امام سميت مٺي جي شهرين احتجاجي مظاهرو ڪيو، اهڙا بي ايمان ماڻهو مسجد الحرام ۽ ڪعبت الله مان به نٿا مڙي سگهن، پر ايستائين جو نمازين جون جتيون به کنيو وڃن، عمري ۽ حج وغيره جي موقعن تي اهڙا بدنام چور ڪعبت الله شريف مان به حاجي سڳورن جا جوتا چوري ڪيو کنيو وڃن ٿا، انهن ويچارن حاجين کي روزانو نوان جوتا خريد ڪرڻا پون ٿا. اهڙا بي ايمان چور ۽ لٽيرا هتي به موجود آهن، اهڙا بزدل لٽيرا ڦورو جن ۾ خدا جو خوف نه آهي پر آرمي ۽ رينجرز جي آپريشن بعد هاڻي ڪيڏانهن ويا جيڪي روز اهڙيون ڦرن ۽ ڌاڙن جون وارداتون ڪندا هئا، تڏهن ته ان چوڻ ۾ صداقت آهي “مار کان ڀوت به ڀڃي وڃن ٿا” هاڻي انهن جي سرپرستي واريون سياسي ڌريون ۽ انهن جا لٽيرا صرف ڏنڊي جي خوف کان خاموش آهن، جن خلق خدا جو جيئڻ جنجال ڪري ڇڏيو هو.

 

وري ڊو مور….

آمريڪا پاڪستان کان هڪ ڀيرو ٻيهر ڊو مور جو مطالبو ڪندي چيو آهي ته پاڪستان دهشتگردن جي نيٽ ورڪ جو خاتمو ڪرڻ ۾ سنجيدگي ڏيکاري ۽ وڌيڪ اثرائتا قدم کڻي، آمريڪي صدر باراڪ اوباما چيو آهي ته پاڪستان آرمي پبلڪ اسڪول پشاور تي حملي کانپوءِ ايڪشن ته کنيو آهي، پر اڃا به دهشتگردي ٿي رهي آهي، جيڪا ظاهر ڪري ٿي ته پاڪستان کي پنهنجي سرزمين تي دهشتگردن جي خاتمي لاءِ وڌيڪ موثر قدم کڻڻ جي ضرورت آهي،پاڪستان کي دهشتگردن جي نيٽ ورڪ جي خاتمي لاءِ وڌيڪ اثرائتا قدم کڻڻا پوندا، ڀارتي خابرو اداري پي ٽي آءِ کي انٽرويو ڏيندي صدر اوباما چيو ته پاڪستان جي شرپسندن خلاف ڪارروائي درست پاليسي آهي، پر پاڪستان کي اڃا وڌيڪ قدم کڻڻ گهرجن، هن چيو ته آرمي پبلڪ اسڪول تي حملي کانپوءِ پاڪستان ڪيترن مخصوص گروپن خلاف ايڪشن کنيو، پر پوءِ به مسلسل دهشتگردي ٿي رهي آهي، باچا خان يونيورسٽي تي حملو ظاهر ڪري ٿو ته پاڪستان کي دهشتگردن جي نيٽ ورڪ خلاف موثر ڪارروائي ڪرڻ جي ضرورت آهي، پاڪستان وٽ موقعو آهي ته هو پنهنجي سرزمين تان دهشتگردن جي نيٽ ورڪ جي خاتمي لاءِ پنهنجي سنجيدگي ثابت ڪري. صدر اوباما چيو ته پاڪستان پنهنجي سرزمين تي سرگرم دهشتگرد گروپن خلاف وڌيڪ اثرائتي ڪارروائي ڪري سگهي ٿو ۽ ان کي ائين ڪرڻ گهرجي، وزيراعظم نوازشريف کي به ان ڳالهه جو ادراڪ آهي ته پاڪستان ۾ عدم استحڪام پوري خطي لاءِ خطرو آهي، دهشتگردن خلاف بنا فرق جي ڪارروائي ڪرڻ جي پاليسي درست آهي، پاڪستان وٽ موقعو آهي ته هو دهشتگردن جي نيٽ ورڪ جي خاتمي ۾ پنهنجي سنجيدگي ڏيکاري، صدر اوباما پٺاڻ ڪوٽ ائيربيس تي دهشتگردي جي حملي کي بنا جواز دهشتگردي جو هڪ ٻيو مثال قرار ڏنو ۽ ان حملي کانپوءِ پاڪستاني هم منصب سان رابطو ڪرڻ تي وزيراعظم نريندر مودي کي ساراهيو، ڀارت جي ٻن طرفن لاڳاپن جو ذڪر ڪندي هن چيو ته نريندر مودي مضبوط ڀائيواري جي خواهش جو اظهار ڪري چڪو آهي، ۽ اسان دوستي ۽ ويجها لاڳاپا قائم ڪيا آهن، تنهن هوندي به ڀارت ۽ آمريڪا وچ ۾ لاڳاپن کي وڌيڪ مستحڪم بڻائڻ جي گنجائش موجود آهي. جڏهن کان مون آمريڪي صدارت سنڀالي، ڀارت سان تعاون کي مستحڪم بڻائڻ تي ڪم ڪيو ۽ مونکي يقين آهي ته ٻنهي ملڪن وچ ۾ شرڪت داري هن صدي جي اهم شرڪت دارين مان هڪ ٿي سگهي ٿي، ڇو ته آمريڪا ۽ ڀارت جو گڏيل اقتدار، مضبوط جمهوريت ۽ مستحڪم معيشيت کين فطري اتحادي بڻائي ٿي.

 

دهشتگردن خلاف ڪارروائي افغانسان جي زميواري آهي: نواز شريف

لنڊن (اين اين آءِ) وزيراعظم نواز شريف چيو آهيت ه پٺاڻ ڪوٽ واقعي تي ڀارت پاران مليل ڄاڻ تي جاچ ڪري رهيا آهيون پٺاڻ ڪوٽ حملي ۾ جاچ اڳيان وڌندي ته حقيقتون سامهون آڻينداسين. پاڪستاني ٽيم به جلد پٺاڻ ڪوٽ جو دورو ڪندي دهشتگردي جي پاڙ پٽڻ لاءِ پاڪستان ڀارت سان رابطي ۾ رهندو. سعودي عرب ۽ ايران جي معاملي تي ڪنهن ٽياڪڙي لاءِ نه چيو هو خواهش آهي ته سعودي عرب ۽ ايران جا معاملا ٺيڪ ٿي وڃن. نيشنل ايڪشن پلان ۽ آپريشن ضرب عضب گڏيل صلاح مشوري سان شروع ڪيا نيشنل ايڪشن پلان تي تيزي سان عمل ٿي رهيو آهي افغان امن عمل جي حمايت ڪيون ٿا. افغانستان ۾ امن جو رستو ڳالهه ٻولهه آهي افغانستان ۾ استحڪام ايندو ته خطي ۾ استحڪام ايندو داعش جهڙي نئين ۽ وڌيڪ خطرناڪ دهشتگرد گروپن جي خطرن جي پس منظر ۾ دهشتگردي خلاف اسان جو عزم تمام وڌيڪ پختو هئڻ گهرجي. پاڙيسرين سان پرامن لاڳاپن لاءِ ڪوششون جاري رکڻ پاڪستان جي پرڏيهي پاليسي جو بنيادي جز آهي اسان ان ڳالهه تي يقين رکون ٿا ته ترقي لاءِ امن ضروري آهي ۽ جٽادار امن لاءِ ترقي اهم آهي. انهن اصولن کي نظر ۾ رکندي پاڪستان پنهنجن سمورن پاڙيسرين ۽ خطي جي ملڪن سان لاڳاپن کي مضبوط ڪرڻ، علائقائي لاڳاپا ۽ تعاون وڌائڻ لاءِ پنهنجي عزم تي قائم آهي. هو گذريل ڏينهن ميڊيا سان ڳالهائيندي سعودي عرب ۽ ايران جي مامري تيڪ نهن ٽياڪڙي لاءِ ناهي چيو اسان پاڻ ان جي شروعات ڪئي ڇو ته اهڙن تڪرارن سان خطي ۾ عدم استحڪام پيدا ٿئي ٿو جنهن جو اثر سڄي خطي جي ملڪن تي پوي ٿو. هن چيو ته اسان جي خواهش آهي ته سعودي عرب ۽ ايران جا معاملا ٺيڪ ٿي وڃن ٻنهي ملڪن وچ ۾ لاڳاپا پهريان جي سطح تي بحال ٿي وڃن. وزيراعظم چيو ته نيشنل ايڪشن پلان ۽ آپريشن ضرب عضب مشاورت سان شروع ڪيا.

 

لاوارٽ پارٽين جا اتحاد پ پ کي لوڏي نه ٿا سگهن، ناڪامي سندن مقدر آهي: چانڊيو

ڪراچي (اسٽاف رپورٽر) سنڌ جي وڏي وزير جي اطلاعات کاتي بابت صلاحڪار مولابخش چانڊيو پاران غير سرڪاري نتيجن موجب سانگهڙ جي بلدياتي چونڊن پ پ پ جي نمائندن کي وڏي اڪثريت سان ڪاميابي تي مبارڪون ڏنيون آهن. هن چيو ته سانگهڙ جو عوام پ پ پ جي اميدوارن کي کٽائي پارٽي قيادت، پاليسين ۽ سنڌ حڪومت تي ڀرپور اعتماد جو اظهار ڪيو آهي. اهڙن خيالن جو اظهار هن پنهنجي جاري ڪيل بيان ۾ ڪيو. هن چيو ته مخالفن جا سڀ حربا ناڪام ٿي ويا. صوبائي صلاحڪار چيو ته عوام پاران مسترد ڪيل ۽ لاوارث پارٽيون پ پ پ خلاف جيترا به اتحاد ٺاهن انهن جي مقدر ۾ ناڪامي لکيل آهي، ڇوته پ پ پ ئي واحد سياسي جماعت آهي جنهن جي قيادت کان وٺي ڪارڪنن تائين تاريخ لازوال قربانين سان ڀريل آهي. هن چيو ته عوام جي حقن لاءِ جدوجهد، جمهوري ادارن کي مستحڪم بڻائڻ ۽ آمرن جو مقابلو صرف پ پ پ ڪيو آهي. آمريت جي سائي ۾ پلجندڙ جيترا چاهن الائنس ٺاهن پر عوام ڪڏهن به انهن جي سپورٽ نه ڪندو. هن چيو ته سانگهڙ ۾ سالن کان کٽيندڙن عوام لاءِ ڪجهه به ناهي ڪيو ۽ هاڻي پ پ پ جا  عوامي نمائندا مثالي ترقياتي ڪم ڪندا. اطلاعات واري صوبائي صلاحڪار  پولنگ دوران امن وامان جي صورتحال کي برقرار رکڻ تي رينجرز ۽ پوليس جي ڪارڪردگي جي تعريف ڪئي. هن وڌيڪ چيوته نوان چونڊيل پ پ پ جا اميدوار عوام جا مسئلا حل ڪندا.

 

وفاق پاران رينجرز کي ڏنل اختيارن جو مدو ختم ٿيڻ ۾ صرف ٻه هفتا رهجي ويا ، سنڌ سرڪار اڃان تائين نوٽيفڪيشن جاري نه ڪيو

ڪراچي (اين اين آءِ) وفاق جا رينجرز کي ڏنل خصوصي اختيارن جو مدو ختم ٿيڻ ۾ صرف ٻه هفتا رهجي ويا آهن ذريعن مطابق وفاق پاران رينجرز کي اختيار ملي چڪا آهن پر سنڌ حڪومت اڃا تائين نوٽيفڪيشن جاري ناهي ڪيو جيتوڻيڪ رينجرز جا خصوصي اختيار مدو ختم ٿيڻ ۾ صرف ٻه هفتا وڃي بچيا آهن. ذريعن مطابق صوبائي حڪومت جي هٺ ڌرمي سبب خدشو آهي ته رينجرز اختيارن جو تڪرار شدت اختيار ڪري ويندو. ٻئي پاسي سنڌ حڪومت رينجرز پاران گرفتار جوابدارن جي 19 کان وڌيڪ جوائنٽ انٽروگيشن ٽيمون جوڙڻ ۾ به سستي جو مظاهرو ڪري رهي آهي سنڌ جي گهرو وزارت ٻه هفتا اڳ سمري گهرو وزير سهيل انور سيال کي اماڻي هئي، جيڪا سنڌ جي وڏي وزير کي اماڻڻي هئي سمري جي منظوري اڃا تائين نه ٿي سگهي آهي.