تازيون خبرون

Daily Archives: January 24, 2016

جيڪولين فرنينڊس جا انسٽاگرام تي چاهيندڙ 40 لکن کان وڌي ويا

ممبئي (شوبز نيوز)بالي ووڊ اداڪاره جيڪولين فرنينڊس جي سماجي رابطن واري ويب سائيٽ انسٽاگرام تي چاهيندڙن جو انگ 40 لک ٿي ويو. ڀارتي سڌ سماءَ وارن ذريعن مطابق 30 سالن جي جيڪولين ان ڳالهه جو انڪشاف انسٽاگرام تي ڪيو. اداڪاره پنهنجي چاهيندڙن جو ٿورو مڃيندي چيو ته هو ايئن ئي پنهنجي محبت جو سلسلو جاري رکن. جيڪولين ان موقعي تي پنهنجي گاني چٽيان ڪلائيان جي وڊيو پڻ ونڊِ، واضح هجي ته جيڪولين فرنينڊس جي نئين فلم ”هائوس فل ٿري“ آهي جيڪا 3 جون تي رليز ٿيندي.

 

سلمان خان جي واکاڻ ڪترينه ڪيف کي ڳاڙهو ڪري ڇڏيو

ممبئیي (شوبز نيوز)حسن جي واکاڻ ڪنهن کي سُٺي نه لڳندي.،؟ ۽ جيڪڏهن ڪو اهڙو ماڻهو تعريف ڪري جو بلڪل ويجهو هجي ته ڇا ڳالهه آ ۽ ائين ئي ٿيو ڪترينا ڪيف سان،جڏهن سلمان خان هڪ محفل ۾ سندس حسن جي واکاڻ ڪئي،جنهن تي ڪترينا ڪيف شرم وچان ڳاڙهي ٿي وئي.بالي ووڊ دبنگ خان ۽ ڪترينا ڪيف وچ ۾ وڏي محبت ۽ پوءِ جدائي ٿي،انهن ٻنهي جي محبت مان هر ڪوئي واقف آهي،پر ٻنهي ڪڏهن به عوام اڳيان اهڙي ڳالهه بيان ناهي ڪئي.سلمان خان ڪترينا ڪيف کي چيو ته پنهنجي زندگيءَ ۾ ڪيترينا جهڙي بهادر عورت ناهي ڏٺي،ڀارت ۾ مون سوڌو سڀئي ڪترينا جا ديوانا آهن.اهڙي واکاڻ تي ڪترينا جو منهن ڳاڙهو ٿي ويو ۽ گهڻي دير تائين خاموش ويٺي رهي.

 

ڪرپشن ۽ منشيات جي وبا ۾ جڪڙيل سنڌ :اصغر ملاح (دادو)

عوام کي چوندي ڏٺو ويو آهي ته دنيا جي ملڪن ۾ سياست ۽ حڪومت ملڪ جي ترقي عوام جي خوشحالي ۽ ڀلائي بهتري لاءُ ڪئي ويندي آهي اسان جي ملڪ ۾ سياست ملڪ جي ترقي قوم جي خدمت بجاءَ اڪثر حصول اقتدار رهي آهي اسان جي ملڪ ۾ ڪي اقتدار حاصل ڪرڻ لاءِ ته ڪي وري پيسن ڪمائڻ لاءِ پريشان آهن جنهن ملڪ ۾ پئسو ڪمائڻ زندگي جو مقصد بڻجي وڃي ته پوءَ عوام کي حق ڪٿا ملندا. ملڪ جي تاريخ کي ڏسجي ٿو ته بهتر حڪمراني عوام لاءِ هڪ خواب بڻيل رهيو آهي. هڪ اهڙو خواب جيڪو ملڪ جي قيام کان وٺي هڪ وقت تائين پنهنجي ساڀيان ماڻي نه سگهيو آهي. حقيقت ۾ حڪمراني جو مقصد ئي هر وقت جي حڪمرانن کي پنهنجي عوام آڏو جوابده هجڻ آهي جنهن عوام جي ووٽن سان اقتدار ۾ اچن ٿا اسان جي ملڪ ۾ هن وقت تائين جيڪو به طرز حڪمراني رهيو آهي ان ۾ عوام گهٽ ڏٺو آهي.ته وقت جا حڪمران پاڻ کي عوام آڏو جوابده سجهن. هن تيز ترقي واري سائينسي دور ۾ دنيا ۾ حيرتناڪ تبديليون اچي چڪيون آهن پر افسوس ته اسان جي سنڌ جو هي خطو نه بدليون آهي نه ئي عوام جي حالت بدلي آهي اڄ به سنڌ جو عوام ترقي ۽ خوشحالي واري دڳ کان گهڻو پري آهي سرڪاري مختلف   ادارن ۾ سرڪاري فنڊن جي ڀينگ ٿي وئي آهي سنڌ جي مختلف علائقن ۾ جتي اڄ به بنيادي انساني سهولتون ميسر نه آهن سنڌ جا شهرا کنڊر بنجي چڪا آهن. اڪثر روڊ، رستا ۽ شاهراهون ٽٽل ڦٽل ۽ تباهه لڳا پيا آهن ميونسپل ۽ ٽائون ڪاميٽين ۾ صفائي سٿرائي لاءَ ايندڙ بجيٽ بنا ڊپ ڊاءَ جي ڪوڙي ڪاغذي ڪاروائي ۾ هڙپ ڪئي وڃي ٿي. سنڌ جون سرڪاري اسپتالون تباهه برباد ٿي ڪٻاڙ خاني ۾ تبديل ٿي ويون آهن ڪا به اسپتال اسپتال نه ٿي لڳي ڪو به سرڪاري اسڪول معياري يا مثالي نه آهي.

پاڪستان انهي غريب عوام ٺاهيو آهي جنهن جي پگهر جي پورهئي جي رقم ٽيڪس تي اڄ به هلي ٿو ان عوام کان وفاقي ۽ صوبائي سرڪار جي ماتحت مختلف سرڪاري کاتن ۾ عوام کان جائز مسئلن کي حل ڪرڻ لاءَ صحيح جي رقم وصول ڪئي وڃي ٿي، مقرر ٿيل ڪامورن کي اها ڳالهه سمجهڻ گهرجي ته سندن صحيح سان عوام جا سوين مسئلا حل ٿين ٿا پر ادارن جا انچارج اڪائونٽنٽ عملو صحيح جي رقم عوام کان وصول ڪري سندن جائز مسئلا حل ڪن ٿااسان جنهن معاشري ۾ رهون ٿا اتي اسان سان گڏ هڪ لعنت رشوت به رهي ٿي ملڪ جي ڪنهن به سرڪاري اداري ۾ ڪنهن به ڪم سان وڃبو ته ان رشوت کي به ساڻ وٺي وڃبو جيڪر رشوت ساڻ نه هلي ته جائز ڪم به نه ٿيندو. جيڪا سڀني کي خبر آهي .رشوت لفظ شايد ڪنهن وقت ۾ خراب سمجهيو ويندو هو. اڄڪلهه ماڻهو ان کي پنهنجي اصل نالي سان سڏڻ جي بدارن ٻين مختلف نالن سان سڏين ٿا. ڪي ماڻهو ان کي بخشش ونڊ ڪميشن ۽ ٻين ڪيترن ئي نالن سان سڏين ٿا. اسان جي ملڪ ۾ اڪثر ڏٺو ويو آهي ته وفاقي صوبائي سرڪار جي ماتحت مختلف سرڪاري کاتن جا ڪامورن ڪلارڪن کي پنهنجي پگهارن کان وڌيڪ رشوت وٺڻ ۾ دلچسپي هوندي آهي پئسو اها شي آهي جنهن سان انسان پنهنجي زندگي جون بنيادي گهرجون جهڙوڪ کاڌ، خوراڪ، ڪپڙو، گهر، دوائون ۽ ٻيون ضرورت جون شيون حاصل ڪري سگهندو آهي پراڻي دور ۾ نه ٽي وي نه وي سي آر نه ڪيبل نه ڪار نه موبائيل فونو هيون هاڻي انهن شين جي ايجاد ٿيڻ سان ماڻهن جي خرچن ۾ تيزي سان اضافو ٿيو آهي،

بنيادي گهرجون پوريون ٿيڻ کان سواءِ ڪوبه انسان سڪون سان نه ٿو رهي سگهي جيڪڏهن ڪنهن انسان وٽ ايترو پئسو نه آهي جو پنهنجون ضرورتون پوريون ڪري سگهي ته پوءِ اهو غلط طريقا استعمال ڪري پئسو حاصل ڪرڻ جي ڪوشش ڪندو آهي اهو ئي سبب آهي .سرڪاري ادارن ۾ رشوت عام ٿي وئي آهي. ڪو به ادارو پنهنجو ڪم صحيح نموني ڪرڻ لاءِ تيار نه آهي. اسلام مطالق رشوت ڏيندڙ ۽ وٺندڙ ٻئي جهنمي آهن. پر اسان مسلمان ٿي ڪري دوزخ ۽ جنت جي وجود کان سڌي يا اڻ سڌي طرح انڪاري بڻجي ويا آهيون عوام وقت به وقت احتجاج ڪري دانهيو آهي ته هتي سدائين اهو رواج رهيو آهي سفارش عيوض ڪامورن کي مقرر ڪيو ويندو آهي جن اڄ ڏينهن تائين عوام کي عوام نه سمجهيو آهي سدائين پنهنجن ذاتي مفادن کي ترجيح ڏني آهي ڪهڙي کاتي جي ڳالهه ڪري ڪهڙي کاتي جي ڳالهه ڪجي انڌيهر لڳو پيو آهي ٽريزري آفيس ، نيشنل بينڪ، پراونشل روڊس، ايجوڪيشن ورڪس، پبلڪ هيلٿ، بلڊنگس،ميونسپل آفيس، روينيو آفيس، حسڪو آبپاشي صيحت تعليم ۽ زڪوات آفيس سميت ٻين سرڪاري کاتن ۾ رشوت ۽ ڪرپشن انتها تي پهچي وئي آهي مقرر ٿيل ڪامورا جيڪو عوام سان ورتاءُ ڪن ٿا اها ڳالهه ڪنهن کان ڳجهي نه آهي عوام جو ڪوبه جائز ڪم ڪرڻ لاءِ تيار نه آهن عوام کي چوندي ڏٺو ويو آهي ته پرويز مشرف جي دور جي پڄاڻي کانپوءِ 2008ع کان 2016ع تائين جيڪا صورتحال سامهون آئي آهي، ان ۾ ٿلهي ليکي ڪو وڏو فرق واضح نظر نٿو اچي پاڪستان ۾ رشوت مالي بدعنواني ۽ بدانتظامي ڪا نئين ڳالهه ناهي اسان جي ملڪ ۾ بدعنواني ۽ بدانتظامي رشوت کي روڪڻ لاءَ هر حڪومت پنهنجي وس آهر ڪوشش ڪرڻ جي دعوي! ته   هر دور ۾ ڪندي رهي آهي. پر   اڌ صدي گذرڻ باوجود .وريو ڪجهه به نه آهي اسان وٽ هر سطح تي آڊٽ جو شعبو قائم آهي جيڪو آڊيٽر جنرل آف پاڪستان کان ويندي صوبائي آڊيٽر آءَ جي صورت ۾ موجود آهي انهن ادارن جون آڊٽ رپورٽون ايتريون ته ڇرڪائيندڙ هونديون آهن جو جيڪڏهن انهن جي آڌار تي ڪاروائي ٿئي ته ملڪ مان ڪرپشن ختم ٿي وڃي آڊيٽر جنرل پاران ملڪ جي وفاقي صوبائي کاتن جي ماتحت ادارن کي ۾ ٿيندڙ ڪرپيشن جي خاتمي ۽ لٽيل رقم جي واپسي لا هر وقت جي سرڪار ۽ حڪمرانن کي سفارش ڪئي ويندي آهي پر افسوس اهڙين سفارشن رپوٽن تي عمل ڪرڻ بجاءِ نظر انداز ڪيو ويندو رهيو آهي ته ڪرپشن زور وٺندي هڪڙي پاسي صورتحال اها آهي جو سنڌ ۾ بيروزگارن جو انگ ڏينهون ڏينهن وڌي رهيو آهي.

پڙهيل لکيل نوجوان ڊگرين جا سٿا ساڻ ڪري آفيسن ۽ چونڊيل نمائيندن جي اوطاقن جا ڌڪا کائڻ تي   مجبور آهن جيڪر نوڪريون ملن ٿيون ته مخصوس عهديدارن يا مخصوس طبقي جي ماڻهن کي ملن ٿيون غريب هاري مزدور جو نوجوان پٽ ننڍي هوندي کان ڌڪا کائي گريجوئيشن پاس ته ڪن ٿا اهي بيروزگار نوجوان اڪثر نوڪرين کان محروم بڻيل رهيا آهن بي پهچ بي بيروزگار نوجوان لاءَ سدائين فارملٽي پوري ڪرڻ لاءَ نوڪرين جو ايڊو ٽائيز ڪري انهن کي امتحانن ۾ ويهاري پرپٺ پنهنجن ماڻهن جون لسٽون تيار ڪيون وڃن ٿيون جيڪا سڀني کي خبر آهي جيڪر ڪنهن وڏيري ايم اين اي ايم پي اي جي سندس وٽ سفارش آهي ته نوڪري ملي ٿي نه ته نوڪري لاءَ به لکين رپيا گهرجن جيڪا غريب جي وس جي ڳالهه نه آهي ڪي نوجوان وري. پئسن عيوض نوڪرين سان فيضياب ٿي رهيا آهن پئسا ته اميرن ڪبيرن جو اولاد وٽ جام آهن باقي هاري ۽ مزدور جو اولاد جيڪو راتيون جاڳي پيٽ بکيو ڪري تعليم حاصل ڪري ٿو جيڪي ميرٽ تي اچن ٿا ميرٽ نه هئڻ سبب کيس پنهنجو جائز حق به نه ٿو ملي بيروزگاري کان تنگ ٿيندڙ نوجوان وري ذهني سڪون حاصل ڪرڻ لاءِ منشيات جو سهارو وٺن ٿا جنهن کانپوءِ اهي عادي موالي بڻجي وڃن ٿا اهڙيون ڪيتريون ئي نشيدار شيون استعمال ڪندا رهيا آهن جيڪي انساني صحت کي تمام گهڻو نقصان رسائين ٿيون انساني جانين کي نقصان رسائيندڙ شيون شراب، ڪچو شراب، گٽڪا، 2100 سوپاريون ۽ ٻين نشي آور شين واپرائڻ سان نوجوانن کي وقتي طور ته لطف محسوس ڪرائين ٿيون. منشيات واپرائيندڙ نوجوان پنهنجي موج مستين آڏو مجبور ٿي وڃن ٿا پوءِ در در ڀٽڪندا رهن ٿا جيڪي ڪنهن منزل جي ماڻڻ جي قابل نه رهيندا آهن اڪثر ڏٺو ويو آهي ته بيروزگار نوجوان نسل منشيات جي ور چڙهي صرف پنهنجي نشي جون گهرجون پوريون ڪرڻ ۾ مصروف ٿي ويندو آهي ته گهر جو خرچ هلڻ مشڪل ٿي ويندو آهي منشيات زهريلو شراب جي گهڻي واپرائڻ سبب اڪثر بيروگار نوجوان موت جو شڪار ٿي زندگي جي جنگ هارائي چڪا آهن نشي واري ڪاروبار کي روڪڻ لاءِ ايڪسائيز کاتو اينٽي نارڪوٽيڪس کاتو ۽ ان کانسواءِ نشي جي سوداگرن کي سزا ڏيڻ لاءِ اينٽي نارڪوٽيجس ڪورٽون پڻ موجود آهن جڏهن ته هر شهر ۾ موجود پوليس ٿاڻا ۽ پوليس چيڪ پوسٽون قائم ڪيل آهن جيڪي پڻ منشيات جي ڏوهارين کي سوگهر ڪري کين عدالتن آڏو پيش ڪن ٿيون. منشيات کي روڪڻ لاءِ جيتوڻڪ حڪومتي سطح تي ڪيترائي ادارا موجود آهن ليڪن جيترا وڌيڪ ادارا جوڙيا وڃن ٿا منشيات جو ڪاروهنوار اوترو ئي چوٽ چڙهندو وڃي ٿو.

منشيات خلاف روزانو احتجاجي مظاهرا ۽ ڌرڻا لڳندا رهن ٿا پر سنڌ سرڪار لاڳاپيل انتظاميا جي اهڙي لاپرواهي خلاف ڪير به قدم کڻڻ لاءِ تيار ناهي منشيات ڪير به روڪڻ لاءِ تيار ڪونهي،پوليس جي سرپرستي کانسواءِ منشيات جو ڪڌو ڪم نه ٿو هلي سگهي ۽ جڏهن وڏو وزير پاڻ ئي اعتراف ڪري ٿو ته پوليس کاتي ۾ ڪاريورن رڍون موجود آهن جيڪي ڏوهارين کي هٿي ڏين ٿيون ته آخر انهن ڪارين رڍن خلاف قدم ڪير کڻندو آهي جڏهن قانون جو موجود هجڻ باوجود ان تي عمل درآمد نه ٿئي ته وڌيڪ براين جا بنياد پوندا رهندا ملڪ جو عوام چاهي ٿو ته ملڪ مان دهشتگردي بيروزگاري مهانگائي منشيات رشوت ختم ٿئي جيڪا ختم ٿيڻ ته پري جي ڳالهه اهي پر ڏينهون ڏينهن اضافو ٿيندي نظر اچي رهيو آهي

 

 

 

وچ اڀر ۾ “ حڪومت بدلايو راند ” جا نتيجا: شفيق شاڪر

“عراقي عوام کي آزداي ڏيارڻ” جي آمريڪي ۽ سندس اتحادين جي نام نهاد فوجي آپريشن کي تيرهن سال گذرڻ کان پوء گڏيل قومن طرفان هڪ نئين رپورٽ جاري ڪئي ويئي آهي جنهن ۾ ان عظيم تشدد ۽ دهشتگرديء واريء صورتحال جو ذڪر ڪيو ويو آهي جنهن مان عراق جا شهري اڃا تائين گذري رهيا آهن.رپورٽ مطابق صرف جنوري 2014ع کان آڪٽوبر 2015ع تائين عراق ۾ 18802 شهري ماريا ويا،36245 شهري زخمي ٿيا جڏهن ته 32 لک عراقي شهري تشدد واري صورتحال سبب بي گھر ٿيا.اقوام متحده جي انساني حقن بابت ڪمشنر جو خيال آهي ته اهي انگ اکر اڃا به وڌي سگھن ٿا.اولھ جي ميڊيا ۾ لکندڙ صحافي نيل ڪلارڪ جي چوڻ مطابق عراق ۾ جاري تشدد ۽ دهشتگرديء جي ڪاروائين جا سڌا سنوان ذميدار اڳوڻو آمريڪي صدر بش ۽ برطانوي صدر ٽوني بليئر آهن جن 2003ع ۾ عراق ۾ غيرقانوني مداخلت ڪري اهڙي فضا قائم ڪئي جو اڄ تائين اتي بي گناھ ماڻهو مري رهيا آهن.عراق جي جاري ان خونريزي جو 2003ع جي آمريڪي ۽ برطانوي جارحيت سان سڌو سنئون واسطو آهي اها ڳالھ اولھ ۾ ڪو مڃڻ لاء تيار ئي ناهي. حقيقت اها آهي ته عراق 2003غ کان پهرين لکن جي تعداد ۾ ڪڏهن به ماڻهو مرندي نه ڏٺا هئا.اهو سڀ ڪجھ بعد ۾ ٿيو.ان جو مطلب اهو ٿيو ته 2003ع کانپوء ضرور اهڙو ڪجھ ٿيو جنهن جي نتيجي ۾ عراق ۾ تشدد ايترو وڌي ويو.

“جوهن پلگر” جنهن آمريڪي جارحيت کان چند سال پهرين عراق جو دورو ڪيو هو،اهو لکي ٿو ته هن عراق جو ڊگھو سفر ڪيو پر اتي خوف نالي ڪابه شيء نه هئي.عراقي امن واري ماحول ۾ پنهن جي تهذيب تي فخر ڪندا هئا.پر بش ۽ بليئر عراق کي اهڙي باھ لڳائي ڇڏي جيڪا وسامڻ جو نالو نٿي وٺي.سمورو عراق جهادين ۽ دهشتگردن جي ڄار ۾ ڦاسي چڪو آهي.اهو رڳو عراق سان ناهي ٿيو پر لبيا جيڪو ڇھ سال اڳ آفريڪا جي سڌريل ۽ خوشحال ملڪن مان هو.تعليم ۽ صحت جون سهوليتون جتي سڀني شهرين لاء مفت هيون،ايستائين جو شهرين کي بجلي به مفت ڏني ويندي هئي، هر ٻار ڄڻيندڙ عورت کي ان وقت جي حڪومت طرفان 5000ڊالرن جو تحفو ڏنو ويندو هو. سياحت جي ميدان ۾ لبيا سياحن جي لاء هڪ محفوظ ملڪ سمجھيو ويندو هو.پر لبيا تي قذافي حڪومت کي ختم ڪرڻ لاء نيٽو جي طرفان ڪيل بمباريء کان پوء لبيا جي امن ۽ خوشحاليء وارا ڏينهن ختم ٿي ويا.ان وقت صدر قذافيء جي ان بيان ته حڪومت جي خلاف بغاوت ڪندڙن جو تعلق القائده سان آهي واري تنبيھ کي به هڪ چريي ماڻهوء جي سوچ چئي مغربي ملڪن طرفان نظرانداز ڪندي قذافيء جي حڪومت کي ختم ڪرڻ جي پاليسي جاري رکي ويئي. پر چريو قذافي نه هو،هو سچ چئي رهيو هو پر هي جيڪي علائقي ۾ حڪومتون بدلائڻ جي راند ۾ ايترا ته چريا بڻجي چڪا هئا جن کي قذافي القائده ۽ ٻين دهشتگرد گروپن کان وڌيڪ خطرناڪ نظر آيو ٿي!عراق کان پوء لبيا به اهڙو ملڪ آهي جتي حڪومت جي تبديليء واري راند کان پوء دهشتگردي ۽ تشدد جي اهڙي لهر پيدا ٿي جيڪا پوري زور شور سان اڄ به جاري آهي.هن مهيني جي شروع ۾ ضليتن جي پوليس سينٽر تي  بم حملي جي نتيجي ۾60 ماڻهو مري ويا ۽ اٽڪل 200 زخمي ٿيا.گذريل نومبر ۾ يونيسيف طرفان تشدد جي ڪاروائين جي نتيجي ۾ لبيائي ٻارن تي پيل خطرناڪ اثرن تي سخت ڳڻتي ڏيکاريندي چيو ويو هو ته صرف بينغازيء۾ 2،70،000 ٻار اهڙا آهن جن کي ڪنهن نه ڪنهن طرح امدادي سرگرمين جي ضرورت آهي.فارين اينڊ ڪامن ويلٿ آفيس (FCO)هاڻي برطانوي شهرين کي لبيا جي سفر کان روڪي رهي آهي جيڪو ملڪ اڄ کان ڇھ سال پهرين خود برطانيه جي سياحن لاء دنيا جي ڇهن وڏن بهترين جاين مان شمار ڪيو ويندو هو. ايف سي او جي چوڻ مطابق  “پوري ملڪ ( لبيا) جي صورتحال خراب آهي. حالتون غيريقينيء واريون آهن.مختلف حصن ۾ مسلسل ويڙھ هلي رهي آهي۽ ملڪ جي ڪيترن ئي حصن تي دهشتگرد ڌڙن جو ڪنٽرول آهي. رطانوي شهرين کي دهشتگرديء جو خطرو آهي.پوري لبيا ۾ مسلسل جھيڙا ٿي رهيا آهن جن ۾ ماڻهن کي ماريو ۽ اغوا ڪيو وڃي ٿو”

لبيا کي “آزاد” ڪرائڻ جو ڪيڏو نه زبردست ڪارنامو بليئر ۽ وليم هيگ سرانجام ڏنو جو اڄ سندس ئي ملڪ جا شهري لبيا ۾ محفوظ ناهن!

آمريڪا ۽ سندس اتحادين جي“ حڪومت بدلايو راند ” کان پهرين شام به گھمڻ،رهڻ ۽ ڪم ڪار ڪرڻ لاء محفوظ ملڪ هو.ميري ويڪ فيلڊ،دي اسپيڪٽيٽر ميگزين جي نائب ايڊيٽر جنهن 2006ع ۾ شام جو دورو ڪيو اها لکي ٿي ته صدر اسد جي بعث پارٽي صدام جي پارٽيء کان گھڻو مختلف آهي،انهيء انٽرنيٽ ۽ موبائيل فون جي سهوليت تان پابندي هٽائي ڇڏي آهي ۽ عام طور تي شامي شهري آزاد نظر اچن ٿا.پر اڄ ڪلھ مغربي سياحن جي لاء شام جو سفر ناممڪن آهي،اهو ملڪ جنهن ۾ اڳ ڏينهن توڙي رات جو بنان ڊپ ڊاء جي آزاديء سان گھمي سگھبو هو. دنيا پناهگيرن جي جنهن عالمي بحران کي هن وقت منهن ڏيئي رهي آهي اهو به انهن ملڪن ۾ حڪومت بدلايو راند جو ئي نتيجو آهي.

 

 

 

 

آئي سي سي ون ڊي رينڪنگ جاري،آسٽريليا پهرين نمبر،قومي ٽيم جي 8 پوزيشن

دبئي (اسپورٽس نيوز) ڀارت خلاف سيريز 4 هڪ تان ڪاميابي کانپوءِ ون ڊي فارميٽ ۾ ڪينگروز جي بادشاهي مضبوط.تفصيل مطابق ڪرڪيٽ جي عالمي اداري آئي سي سي پاران ون ڊي رينڪنگ جاري ڪئي وئي.ڀارت کان 1-4 تان سيريز کٽيندڙ آسٽريليا جي پهرين پوزيشن وڌيڪ مضبوط ٿي وئي آهي.جڏهن ته ڀارت ون ڊي رينڪنگ ۾ ٻئين نمبر تي،ڏکڻ آفريڪا ٽين نمبر،جڏهن ته نيوزيلينڊ چوٿين نمبر تي آهي.هڪ ڏينهن واري ميچ ۾ سريلنڪا جو 5 نمبر،انگليند 6 بنگلاديش 7 ۽ پاڪستاني ٽيم 8 نمبر تي اچي پهتي.ويسٽ انڊيز 9 ۽ افغانستان جي ٽيم ڏهين نمبر تي پهچڻ ۾ ڪامياب پڻ ٿي.

 

ٽي ٽوئنٽي سيريز ۾ بدترين مات کانپوءِ اڳوڻن رانديگرن جي ٽيم انتظاميا تي ڇتي تنقيد 

لاهور (اسپورٽس نيوز) ٽي ٽوئنٽي سيريز ۾ بدترين مات کانپوءِ اڳوڻن رانديگرن ۽ ڪپتانن پاران ٽي ٽوئنٽي ڪپتان،بورڊ انتظاميا ۽ ٽيم مينجيمنٽ تي تنقيد جا تير وسائي ڏنا.رپورٽ مطابق رميز راجا جو چوڻ آهي ته شروعات ۾ جيڪڏهن 3،4 وڪيٽون ڪري وڃن ته پوءِ ميچ جو ماحول ئي مٽجي ٿو وڃي.جڏهن ته جاويد ميانداد جو چوڻ آهي ته ويلنگٽن ۾ ٽين ٽي ٽوئنٽي ميچ ۾ پاڪستان وڏين غلدطين سبب ميچ هارائي،ڪا به حڪمت عملي ۽ ٽيم ورڪ نظر نه پئي آيو،سڀئي جلدي ڪندا رهيا.سندس چوڻ هو ته شاهد آفريدي کي مٿئين نمبر تي اچڻو هو،جڏهن ڪپتان ڪريز تي آيو ته ميچ هٿن مان نڪري وئي هئي.عامر سهيل چيو ته پلاننگ بهتر نه هجڻ سبب ٽيم تباهي کانسواءِ ڪجهه به نه ڪندي.سندس چوڻ آهي ته سدائين ڪيويز خلاف پاڪستان کي فيورٽ قرار ڏنو آهي، پر پاڪستاني شاهينن جا پر خبر ناهي الهائي ڪير ٿو ڪٽي وڃي.

 

ضلعو سانگهڙ فتح ٿي ويو

سانگهڙ تعلقي جي 16 يونين ڪائونسل تي غير سرڪاري ۽ غير حتمي نتيجن موجب پ پ  اڪثريت ۾ ڪامياب ، 10 يونين ڪائونسلن ٻوٻي، ڪوٽ نواب، ڪونڌو، کڏواري، گجري، صدرٽ، دڙو بازار، بهرم بري ، ساڌڻو، سيٺار تي پيپلز پارٽي جي اميدوارن ڪاميابي حاصل ڪئي جڏهن ته 6 يونين ڪائونسلن جنهن ۾ مياڻ ، ڪلر ، چوٽياريون ، پير ڪيهور ، شاهه سڪندر آباد ۽ جانب ڍورو تي فنڪشنل ليگ جا اميدوار ڪامياب ٿيا آهن ٻئي طرف تعلقي ٽنڊو آدم جي 8 يوسيز مان 5 تي ٿيندڙ اليڪشن ۾ 5 ئي يوسيز پ پ ٻهاري وئي، غير سرڪاري ۽ غير حتمي نتيجن موجب يوسي مير حسن مري تي چيئرمين ۽ وائيس چيئرمين لاءِ پ پ اميدوارن عقيل مري ۽ مختيار جمالي 4254 ووٽ کڻي ڪاميابي ماڻي، سندس مخالف ف ليگ اميدوارن انور هڱورو ۽ علي جان هڱورو رڳو 37 ووٽ کنيا، ضلعي ڪائونسلر لاءِ پ پ اميدوار سڪندر مري 4245 ووٽ کڻي ڪامياب ٿيو، سندس مخالف اميدوار ف ليگ جي نادر هڱورو رڳو 40 ووٽ کنيا، يوسي طيب ٿهيم ۾ چيئرمين ۽ وائيس چيئرمين لاءِ پ پ اميدوار اورنگزيب ٿهيم ۽ دلبر خان سريوال 3534 ووٽ کڻي ڪاميابي ماڻي ۽ سندس مخالف ف ليگ اميدوارن قادر بخش ۽ منور علي 553 ووٽ کنيا، ضلعي ڪائونسل لاءِ پ پ اميدوار پير ڏنل شاهه 3565 ووٽ کڻي ڪاميابي ماڻي، سندس مخالف ف ليگ اميدوار الهه بچايو شاهه 405 ووٽ کنيا، يوسي ماڻڪ ٿهيم تي پ پ اميدوار چيئرمين ۽ وائيس چيئرمين لاءِ عبدالعزيز ٿهيم ۽ امير علي خاصخيلي 4353 ووٽ کڻي ڪاميابي ماڻي جڏهن ته سندس مخالف ف ليگ اميدوار مصري خاصخيلي ۽ باغ علي چنڙ 465 ووٽ کنيا، ضلعي ڪائونسل لاءِ پ پ اميدوار علي نواز خاصخيلي 4365 ۽ سندس مخالف ف ليگ اميدوار علي اڪبر چنڙ 495 ووٽ کڻي سگهيو، يوسي پير فقير شورو ۾ ضلعي ڪائونسل جي واحد سيٽ تي پ پ جو حاجي مختيار شوري 4347 ووٽ کڻي ڪامياب ٿيو، جڏهن ته سندس مخالف اميدوار ايس يو پي جي منظور ٿهيم رڳو 14 ووٽ کنيا، جڏهن ته يوسي ڪنب ڏاڙهو ۾ صرف جنرل ڪائونسلرن جي 3 سيٽن تي 3 ئي پ پ اميدوار ڌڻي پرتو ڀاڻو، مبارڪ ڀٽي ۽ عامر راجپوت ڪامياب ٿيا، واضح رهي ته 3 يوسيز تي پ پ جا اميدوار اڳ ئي بنا مقابلي ڪامياب ٿي چڪا آهن، باقي تعلقي ٽنڊو آدم جي 2 يوسيز ۽ ميونسپل ڪميٽي جي 23 وارڊن تي حد بندين جي تڪرار سبب اليڪشن ملتوي ٿيل آهي، جيڪا بعد ۾ ٿيندي، هوڏانهن کپري جي 15 يوسيز مان 10 يوسين تي پ پ کي سرسي ملي آهي، پيپلز پارٽي يوسي سمن آباد، راڻڪ ڏهر، هٿونگو، لوڻ کاڻ، حافظ راڄڙ، کاهي، روڻجھو، حمزو درس، ڀوپي ۽ ڀٽ ڀائٽي (بنا مقابلي) تي ڪاميابي ماڻي آهي، ف ليگ کي يوسي بلال، يوسي ڪامل هنڱورو، يوسي قاضي فيض محمد، کوڙي ۽ بانڪو تي ڪاميابي ملي آهي، تعلقي سنجھوري جي يوسيز ۾ پڻ پ پ کي سرسي ملي آهي، يونين ڪائونسل پريتم آباد ۾ پ پ ڪلين سوئپ ڪيو آهي، جڏهن ته ڄام نواز علي تعلقي ۾ يونين ڪائونسل 84 جمڙائو تان پاڪستان مسلم ليگ ف کي ڪاميابي ملي آهي،

 

باچا خان يونيورسٽي سانحو: گرفتار سهولتڪار ظاهر، حملو ڪندڙن افغانستان ۾ سکيا حاصل ڪئي: باوجوه

پشاور (م.ڊ) پاڪ فوج جي سربراهه جنرل راحيل شريف پشاور ۾ ڪور هيڊڪوارٽر جو دورو ڪيو، جتي هن سيڪيورٽي معاملن جو جائزو وٺڻ لاءِ سڏايل خاص اجلاس جي صدارت پڻ ڪئي، آئي ايس پي آر مطابق ڪور ڪيڊڪوارٽر پشاور ۾ امن امان جي صورتحال جو جائزو وٺڻ لاءِ آرمي چيف جنرل راحيل شريف جي صدارت هيٺ اعليٰ سطح جو اجلاس ٿيو، جنهن ۾ پشاور جيو ڪور ڪمانڊر، ڊي جي آئي ايس پي آر، ڊي جي ايم آئي ۽  ڊي جي ملٽري آپريشنز سوڌو ٻيا اهم عملدار شامل ٿيا،ان موقعي تي خيبرپختونخوا ۾ انٽيليجنس بنيادن تي آپريشن تي غور ڪيو ويو، جڏهن ته فاٽا ۽ ڪي پي ڪي ۾ جاري آپريشن جو جائزو پڻ ورتو ويو،آئي ايس پي آر مطابق اجلاس ۾ پاڪ – افغان بارڊر مينيجمينٽ ۽ چارسده حملي جي جاچ جي حوالي سان اڳڀرائي جو پڻ جائزو وٺي اهم فييصلا ڪيا ويا. ٻئي پاسي چارسده يونيورسٽي سانحي ۾ اهم اڳڀرائي ٿي آهي، پاڪ فوج حملي جي گرفتار سهولتڪارن کي ميڊيا آڏو پيش ڪري ڇڏيو، پاڪ فوج جي ترجمان عاصم سليم باجوه چيو آهي ته حملو ڪندڙن افغانستان ۾ سکيا حاصل ڪئي، حملو ڪندڙ دهشتگرد افغانستان کان طور خم جي رستي مان داخل ٿي مردان پهتا.پشاور ۾ چارسده سانحي بابت بريفنگ ڏيندي ڊي جي آءِ ايس پي آر ليفٽيننٽ جنرل عاصم سليم باجوه چيو ته چارسده سانحي جي دهشتگردن کي افغانستان جي هڪ علائقي مان ڪنٽرول ڪيو ويو، يونيورسٽي تي حملي دوران دهشتگردن کي 10 فون ڪالون افغانستان جي نمبر تان آيون.ليفٽيننٽ جنرل عاصم سيلم باجوه چيو ته افغانستان مان عمر نالي ڪنٽرولر هڪ صحافي کي فون ڪري حملي جي ذميواري قبول ڪئي.آءِ ايس پي آر جي ڊي جي چيو ته يونيورسٽي جي حملي ۾ 4 دهشتگرد ۽ 4 سهولت ڪار ملوث هئا، جن مان 4 دهشتگردن کي ڪارروائي دوران ماريو ويو.عاصم سيلم باجوه چيو ته دهشتگردن افغانستان ۾ سکيا حاصل ڪئي، دهشتگرد افغانستان کان طور خم جي رستي کان عام شهرين جيان داخل ٿيا، دهشتگردن کي سهولت ڪارن مسافر گاڏي ۾ مردان پهچايو، سهولت ڪارن دهشتگردن کي مردان ۾ ٻن گهرن ۾ پناهه ڏني، دهشتگردن کي رڪشا ۾ يونيورسٽي تائين پهچايو ويو.ليفٽيننٽ جنرل عاصم سليم باجوه چيو ته حملي ۾ سهولتڪارن کي استعمال ڪيو ويو، حملي ۾ سهولت ڪار جو ڪردار ادا ڪندڙ 5 دهشتگردن کي گرفتار ڪيو ويو، هڪ سهولت ڪار، ان جي گهر واري ۽ ڀاڻيجي جي اڃا تلاش جاري آهي.عاصم سليم باجوه چيو ته سهولت ڪار رياض، نور الله ۽ عادل کي گرفتار ڪيو ويو آهي، جڏهن ته رياض جي پٽ ضياءِ الله ۽ ابراهيم کي حراست ۾ ورتو ويو آهي، هڪ سهولت ڪار، ان جي زال ۽ ڀاڻيجي فرار آهن.ڊي جي آءِ ايس پي آر چيو ته سهولتڪار عادل ۽ رياض دهشتگردن کي باڊر تي وصول ڪيو، جتان دهشتگردن کي مردان آندو ويو، سهولت ڪار عادل ڪجهه ڏينهن يونيورسٽي ۾ مزوري ڪئي ۽ يونيورسٽي جو نقشو ٺاهي دهشتگردن کي بريف ڪيو، نور الله دهشتگردن کي رڪشا ۾ وٺي يونيورسٽي پهتو. هن چيو ته دهشتگردن لاءِ دره آدم خيل مان هٿيار ورتا ويا، سهولتڪار جي گهر واري ۽ ڀاڻيجي کي هٿيار وٺڻ ۽ تلاشي کان بچڻ جي لاءِ استعمال ڪيو ويو. عاصم سليم باجوه چيو ته حملو چار دهشتگردن امير رحمان، عمر محسود، علي محمد ۽ عابد ڪيو، جن کي ماريو ويو آهي، جن مان امير رحمان جي سڃاڻپ ٿي وئي آهي، باقي ٽن دهشتگردن جي سڃاڻپ ناهي ٿي.ڊي جي آءِ ايس پي آر چيو ته ڪوبه دهشتگرد حملو سهولت ڪارن کانسواءِ نٿو ٿي سگهي، سهولت ڪارن جي سڃاڻپ تمام ضروري آهي، پنهنجي آس پاس جي ماڻهن تي ڪڙي نظر رکي وڃي.عاصم سليم باجوه چيو ته چارسده حملي جو افغانستان تي الزام ناهي مڙهيو، حملو افغانستان حڪومت نه پر حملي کي افغانستان مان ڪنٽرول ڪيو ويو.هن چيو ته دهشتگرد خوف پيدا ڪرڻ چاهين ٿا، دهشتگردي رڳو پاڪستان جو نه پر عالمي مسئلو آهي، دهشتگردن خلاف آپريشن جاري رهندو ۽ دهشتگردن کي ختم ڪيو ويندو، رياست جي رٽ هر صورت ۾ قائم ڪئي ويندي.

 

ڇانگا مانگا: مسافر وين ڍنڍ ۾ ڪري پئي، 13 ڄڻا اجل جو شڪار، ڪيترائي زخمي

ڇانگامانگا (م.ڊ) مسافر وين ڍنڍ ۾ ڪرڻ جي نتيجي ۾ 13 ڄڻا ٿڏي تي ئي اجل جو شڪار ٿي ويا.ريسڪيو 1122 جي حوالي سان ٻڌايو ويو ته مسافر وين رائي ونڊ کان پتوڪي وڃي رهي هئي،وين ۾ 20 کان وڌيڪ مسافر سوار هئا. ذريعن مطابق شروعاتي طور تي 13 ڄڻن جي فوت ٿيڻ جي ڄاڻ آهي،جڏهن ته اتي امدادي ڪارروايون هلي رهيون آهن.مسافر وين آدن جي ويجهو پل سي بي ايس لنڪ ۾ وڃي ڪري.

 

عالمي اڳواڻ پاڪستان جي اقتصادي ترقي کي ساراهي رهيا آهن: نوازشريف

ڊيوس (اين اين آءِ) وزيراعظم محمد نوازشريف چيو آهي ته عالمي اڳواڻ پاڪستان جي اقتصادي ترقي جي واکاڻ ڪري رهيا آهن حڪومت قائداعظم جي ويزن مطابق ملڪ کي ترقي يافته بنائڻ جي پاليسي تي عمل پيرا آهي هن مقصد لاءِ عورتن کي زندگي جي سمورن شعبن ۾ اڳيان آندو پيو وڃي يوٿ لون اسڪيم ۾ اڌ قرض عورتن کي ڏنو ويو آهي ڇنڇر تي هتي جنيوا وڃڻ کان اڳ ميڊيا سان ڳالهائيندي نوازشريف چيو ته عالمي اقتصادي فورم جي موقعي تي سياسي ۽ تاجر اڳواڻن کي پاڪستان ۾ ڪامياب اقتصادي ترقي بابت آگاهه ڪرڻ جو موقعو مليو آهي نوازشريف چيو ته اقتصادي شعبي ۾ اڳڀرائي سبب عالمي اڳواڻ پاڪستان بابت سٺي راءِ رکن ٿا هن چيو ته عالمي اقتصادي فورم ۾ موجودگي سان کيس عالمي سياسي ۽ تاجر اڳواڻن سان ملاقاتون ۽ کين پاڪستان ۾ ڪامياب اقتصادي ترقي بابت آگاهه ڪرڻ جو موقعو مليو آهي هڪ سوال تي نوازشريف چيو ته ان جي حڪومت قائداعظم محمد علي جناح جي تصور مطابق ترقي ۽ اڳتي وڌڻ جي ايجنڊا تي عمل پيرا آهن ۽ ان سلسلي ۾ عورتن جي حوصله افزائي ڪئي پئي وڃي ته جيئن اهي ملڪ جي ترقي ۾ فعال ڪردار ادا ڪن.