تازيون خبرون

Daily Archives: January 23, 2016

وڏي وزير ٻهراڙين ۾ بجلي جي منصوبن لاءِ 3 ارب رپين جي منظوري ڏئي ڇڏي

ڪراچي (اين اين آءِ) سنڌ جي وڏي وزير سيد قائم علي شاهه ٻهراڙين ۾ بجليءَ جي منصوبن لاءِ 3 ارب رپين جي منظوري ڏئي ڇڏي آهي، جنهن سان سنڌ صوبي جي ٻهراڙي ۾ بجلي جي فراهمي جا منصوبا مڪمل ڪيا ويندا. اڄ وزيراعليٰ هائوس ۾ انهيءَ سلسلي ۾ هڪ اعليٰ سطحي اجلاس جي صدارت ڪئي. ان موقعي تي سنڌ جي وڏي وزير چيو ته منصوبي تي هر سال هڪ ارب رپيا خرچ ٿيندا. هن چيو ته هي منصوبو ٽن سالن ۾ مڪمل ڪيو ويندو. هن چيو ته ڪراچي جي 50 ڳوٺن کي هلندڙ سال بجلي فراهم ڪرڻ لاءِ 60 ڪروڙ رپيا ڌار فراهم ڪيا ويا آهن. وڏي وزير چيو ته سنڌ انرجي ڊپارٽمينٽ 2000 ننڍن وڏن ڳوٺن تائين بجلي پهچائيندو. وڏي وزير سيد قائم علي شاهه سيڪريٽري انرجي آغا واصف کي منصوبن جي نگراني ڪرڻ جي هدايت ڪندي وڌيڪ چيو ته موجوده حڪومت عوام کي بنيادي سهولتون ڏيڻ جو پڪو پهه ڪيو آهي ۽ ان وقت جڏهن ته ملڪ توانائي واري بحران مان گذري رهيو آهي پر موجوده سنڌ سرڪار توانائي جي شعبي کي خاص ترجيح ڏيندي ڏيهي ۽ پرڏيهي سيڙپڪارن جي به رڳو همت افزائي ڪري رهيا آهيون بلڪه انهن کي خاص ترغيبات به ڏيئي رهيا آهيون ته جيئن توانائي واري بحران تي ضابطو آندو وڃي. سنڌ جي وڏي وزير چيو ته سنڌ صوبي جي ٻهراڙي خاص طور تي پٺتي پيل علائقن ۾ بجليءَ جي فراهمي ترجيحي بنيادن تي ڪئي وڃي ته جيئن پوئتي پيل علائقن جي ماڻهن کي به صوبي جي ٻين علائقن وانگر بهتر سهولتون مهيا ڪري سگهجن. وڏي وزير ان موقعي تي سمورن لاڳاپيل آفيسرن کي هدايت ڪئي ته هو صوبي جي ٻهراڙين کي بجلي جي فراهمي وارن منصوبن کي وقت اندر مڪمل ڪرڻ کي يقيني بڻائن انهيءَ حوالي سان دير برداشت نه ڪئي ويندي.

 

ڪي اليڪٽرڪ ۽ حيسڪو سنڌ سرڪار جي ڪنٽرول ۾ ناهن: مراد علي شاهه

ڪراچي (اسٽاف رپورٽر) سنڌ اسيمبليءَ، باچا خان يونيورسٽي تي حملي خلاف مذمتي ٺهراءُ اتفاق راءِ سان منظور ڪري ورتو، ايوان ۾ ٿر اندر پاڻي جي کوٽ بابت حڪومتي ۽ اپوزيشن ميمبرن ۾ سخت جملن جي ڏي وٺ ٿي، جڏهن ته سينيئر صوبائي وزير نثار احمد کهڙي سيگريٽ ڇڪِڻ تي ايوان کان معافي پڻ ورتي. اسپيڪر آغا سراج دراني جي صدارت هيٺ سنڌ اسيمبلي جو اجلاس ٿيو، جنهن ۾ چارسدا حملي ۽ ٿر صورتحال سميت مختلف معاملن تي بحث ٿيو. اجلاس دوران باچا خان يونيورسٽي تي دهشتگردن جي حملي ۾ شهيد ٿيلن جي مغفرت ۽ زخمين جي صحتيابي لاءِ دعا گهري وئي. ايوان ۾ باچا خان يونيورسٽي تي حملي خلاف مذمتي ٺهراءُ پيش ڪيو ويو، جيڪو ايوان اتفاق راءِ سان منظور ڪيو. اجلاس دوران ٿر ۾ پاڻي جي کوٽ وارو معاملو اڀاريو ويو، جنهن تي حڪومتي ۽ مخالف ڌر جي ميمبرن ۾ سخت جملن جي ڏي وٺ پڻ ٿي. ف ليگ ايم پي اي مهتاب اڪبر راشدي اجلاس دوران ڳالهائيندي چيو ته روزانو اخبارن ۾ اچي پيو ته ٿر ۾ لڳايل آر او پلانٽس ڪم نه پيا ڪن. صوبائي وزير مراد علي شاهه جواب ڏيندَي چيو ته سنڌ ۾ سڀ کان وڌيڪ آر او پلانٽس ٿر ۾ آهن، جيڪي سمورا هلندڙ آهن، آر او پلانٽس جي بند هجڻ واريون خبرون بي بنياد آهن. ان موقعي تي متحده ايم پي اي هير سوهو ڳالهائيندي چيو ته ٻڌايو وڃي ته ايترن آر او پلانٽس باوجود ٿر ۾ پاڻي جي کوٽ ڇو آهي؟ هير سوهو کي جواب ڏيندَي مراد علي شاهه چيو ته آر او پلانٽس بجلي تي هلندا آهن، پاڻي جي کوٽ جو ڪارڻ لوڊشيڊنگ ٿي سگهي ٿو. پي ٽي آءِ ايم پي اي خرم شير الزمان چيو ته حڪومت اڻ اعلانيل لوڊشيڊنگ، ڪي- اليڪٽرڪ ۽ حيسڪو تي ڪنٽرول لاءِ ڪو منصوبو جوڙيو آهي؟ صوبائي وزير مراد علي شاهه جواب ڏيندَي چيو ته ڄاڻايل ادارا سنڌ سرڪار جي ڪنٽرول ۾ ناهن، جنهن تي پي ٽي آءِ ميمبر حفيظ الدين چيو ته اهو معاملو سپريم ڪورٽ ۾ هلندڙ آهي، سنڌ حڪومت کي اک پٽڻ گهرجي. ٻئي طرف تعليم واري سينيئر صوبائي وزير نثار احمد کهڙي ايوان ۾ سگريٽ ڇڪڻ تان معافي وٺي ڇڏي. نثار کهڙَي چيو ته هو ايوان جو تمام گهڻو احترام ڪري ٿو، هن غلطي سبب سگريٽ ڇڪيو، جنهن لاءِ هو سڄي ايوان کان معذرت ڪري ٿو. اسپيڪر آغا سراج درانيءَ، نثار کهڙي کي چيو ته هـُن به سگريٽ ڇڪڻ ڇڏي ڏنا آهن اوهان به ڇڏي ڏيو، جنهن تي صوبائي وزير چيو ته هو به سگريٽ ڇڏڻ جي ڪوشش ڪندو. مختلف معاملن تي بحث جاري هو ته اسپيڪر آغا سراج دراني اجلاس سومر تائين ملتوي ڪري ڇڏيو .

 

سپريم ڪورٽ ناياب پکي تلور جي شڪار تي لاڳو پابندي ختم ڪري ڇڏي

اسلام آباد (بيورو) سپريم ڪورٽ، ناياب پکي تلور جي شڪار تي لاڳو پابندي ختم ڪندي 3 رڪني بينچ جي فيصلي کي ڪالعدم قرار ڏئي ڇڏيو آهي. چيف جسٽس انور ظهير جمالي جي سربراهي ۾ 5 رڪني لارجر بينچ جو 8 جنوري تي محفوظ ڪيل فيصلو ٻڌايو ويو، جڏهن ته چيف جسٽس اڄو بينچ ۾موجود نه هو. جسٽس ثاقب نثار تلور جي شڪار تي پابندي واري فيصلي تي وفاق ۽ صوبن جي نظرثاني وارين درخواستن تي محفوظ ڪيل فيصلو پڙهي ٻڌايو، جنهن ۾ جسٽس قاضي فائز عيسيٰٰ جا اختلافي نوٽ به شامل آهن. عدالتي فيصلي ۾ چيو ويو آهي ته تلور جي شڪار تي پابندي بابت 3 رڪني بينچ جي 19 آگسٽ واري فيصلي کي ڪالعدم قرار ڏنو ويو آهي.

 

چارسده حملي جي به جاچ ٿيڻ گهرجي، قومي ايڪشن پلان تي اڄ تائين عمل ناهي ٿيو: سراج الحق

اسلام آباد (بيورو) جماعت اسلامي جي امير سراج الحق چيو آهي ته چارسده حملي جي به جاچ ٿيڻ گهرجي، 48 ڪلاڪ گذرڻ کان پوءِ به حڪومت عوام جي سامهون حقيقتون ناهن رکيون، قومي ايڪشن پلان تي اڄ تائين عمل ناهي ٿيو، اهڙن خيالن جو اظهار هن پارليامنٽ هائوس ٻاهران ميڊيا سان ڳالهائيندي ڪيو، سراج الحق چيو ته بلوچستان جي ماڻهن تي اڄ به ظلم ٿي رهيو آهي، هن چيو ته چارسده يونيورسٽي تي حملي جي به جاچ ٿيڻ گهرجي، 48 ڪلاڪ گذري ويا آهن پر حڪومت اڃا تائين عوام جي سامهون حقيقتون پيش ناهن ڪيون، جماعت اسلامي جي امير وڌيڪ چيو ته قومي ايڪشن پلان تي اڄ تائين عملدرآمد ئي ناهي ٿيو.

 

ايڪشن پلان کي قومي پلان بڻائڻ گهرجي: خواجه اظهارالحسن

ڪراچي (اسٽاف رپورٽر) سنڌ اسيمبليءَ ۾ مخالف ڌر جي اڳواڻ خواجه اظهارالحسن چيو آهي ته ايڪشن پلان کي قومي پلان بڻائڻ گهرجي. سنڌ اسميبلي جي اجلاس کان پوءِ ميڊيا سان ڳالهائيندي خواجه اظهار الحسن چيو ته قومي ايڪشن پلان پوري ملڪ تي لاڳو ڪيو وڃي. هن چيو ته ڪارروايون قومن خلاف نه پر ڏوهارين خلاف ٿيڻ گهرجن. خواجه اظهارالحسن چيو ته ايم ڪيو ايم تي نه پر دهشتگردي تي ڌيان ڏنو وڃي. متحده اڳواڻ چيو ته 90 ڏينهن جي حراست رڳو ڪراچي ۾ ڇو ٿي رهي آهي، ٻئي هنڌ ائين ڇو نه پيو ٿئي؟

 

مٺي، اسلام ڪوٽ، ڪلوئي، ڇاڇري ۽ عمرڪوٽ ۾ وڌيڪ 7 ٻارڙا فوت

ٿرپارڪر(نمائندو) ٿر ۾ معصوم ٻارڙن تان موت جو راڪاس نه ٽريو، مٺي، اسلام ڪوٽ، ڪلوئي ۽ ڇاڇري ۾ وڌيڪ 5 ٻارڙا فوت ٿي ويا آهن، هلندڙ ميهني فوت ٿي ويل ٻارڙن جو انگ وڌي 86 ٿي ويو آهي. سول اسپتال مٺي ۾ ٽن ڏينهن جي نينگري ڪويتا فوت ٿي وئي. نينگري جي وارثن احتجاج ڪندي الزام هنيو ته ايمرجنسي وارڊ ۾ ڊاڪٽر موجود نه هجڻ سبب معصوم نينگري تڙپي تڙپي فوت ٿي وئي آهي. اسلام ڪوٽ ويجهو ڳوٺ ڀُونگِيو ۾ ڳوٺاڻي ڀوري ڀيل جو ٻن ڏينهن جو ٻارڙو فوت ٿي ويو، مٺي جي سول اسپتال ۾ ڳوٺ گُوڌِيار واسي ڳوٺاڻي الهڏنو سومرو جي تازو ڄاول ٻار به دم ڌڻي حوالي ڪيو.. ڪلوئي ۾ خوراڪ جي کوٽ جو شڪار 6ورهين جو نينگر ذيشان فوت ٿي ويو، ڇاڇري ۾ به 10 مهينن جو نينگر جاويد سميجو زندگي جي جنگ هارائي ويو. وڌيڪ 5 معصوم ٻارڙن جي فوت ٿيڻ کانپوءِ هلندڙ مهيني فوت ٿي ويل ٻارڙن جو انگ وڌي 86 ٿي ويو آهي.. مختصر عرصي ۾ 86 ٻارڙن جي فوت ٿيڻ باوجود صحت کاتي طرفان متاثر علائقن ۾ صحت جو سهولتون فراهم ڪرڻ لاءِ جوڳا قدم ناهن کنيا.. مٺي سول اسپتال توڙي ٿر جي خانگي اسپتالن ۾ سوين ٻارڙا داخل آهن، سهولتون جي کوٽ سبب معصوم ٻارڙن جو حياتيون داءُ تي لڳي ويون آهن.عمرڪوٽ ۾ معصوم ٻارڙن جي فوت ٿيڻ جو سلسلو جاري آهي، خوراڪ جي کوٽ ۽ بيمارين ۾ مبتلا وڌيڪ ٻه ٻارڙا فوت ٿي ويا آهن، جنهن کانپوءِ فوتي ٻارڙن جو انگ وڌي 34 ٿي ويو آهي. عمرڪوٽ سول اسپتال ۾ ڳوٺاڻي ڀاڳچند اوڏ جو اڍائي ورهين جو پٽ روي شنڪر ۽ 10 ڏينهن جي نينگري جنت ڀيل فوت ٿي وئي، جنهن کانپوءِ هلندڙ ميهني فوت ٿي ويل ٻارڙن جو انگ 34 ٿي ويو آهي.. خوراڪ جي کوٽ ۽ بيمارين سبب متاثر يونين ڪائونسل ڪپلور، کوکرا پار، ڳوٺ ماروهر، ڪيرلو، جهمراڙي ۽ ڳوٺ ڊاڀي ۾ سهولتن جي کوٽ برقرار آهي، جنهن سبب سوين ٻارڙا زندگي ۽ موت جي ڪشمڪش ۾ آهن.

 

فلم انڊسٽري جي تباهي جا اسان پاڻ آهيون ۽ بحالي لاءِ به اسان کي ئي ڪجهه ڪرڻو پوندو: ميرا

لاهور (شوبز نيوز) ناليواري اداڪاره ميرا چيو آهي ته پاڪستان فلم انڊسٽري جي تباهي جو ذميوار ڪو ٻيو نه پر اسان پاڻ آهيون ۽ ان جي بحالي لاءِ به اسان کي ئي ڪجهه ڪرڻو پوندو، ڀارتي فلمن جي پاڪستان ۾ نمائش سان به اسان جي انڊسٽري کي نقصان ٿي رهيو آهي، پنهنجي هڪ انٽرويو دوران ميرا چيو ته فلم انڊسٽري جي مضبوطي لاءِ بهتر معيار به ضروري آهي، هن چيو ته جيڪڏهن اسان پنهنجي علطين کي تسليم ڪندي هاڻي به پاڻ کي ٺيڪ ڪريون ۽ سڄو ڌيان فلم انڊسٽري تي ڏيون ته ان ڳالهه ۾ به ڪو شڪ ناهي ته اسان انڊسٽري جي حالتن کي بهتر بڻائي سگهون ٿا.

 

سماجي رابطن واري ويب سائيٽ تي عاليه ڀٽ جا 70 لک پوئلڳ ٿي ويا

ممبئي (شوبز نيوز) بالي ووڊ جي نوجوان اداڪارا عاليا ڀٽ جي سماجي رابطن جي ويب سائيٽ ٽوئٽر تي پوئلڳن جو انگ وڌي 70 لک ٿي ويو آهي، جنهن تي هوءَ تمام گهڻي خوش آهي، پنهنجي هڪ ٽوئٽ ۾ عاليا ڀٽ چيو ته ايڏي وڏي انگ ۾ پوئلڳن مان مٿس هاڻ اهو دٻاءُ اڃا وڌي ويو آهي ته کيس وڌيڪ محنت ڪرڻي آهي، هن پنهنجي نياپي ۾ پنهنجي چاهيندڙن جا ٿورا مڃيا ۽ چيو ته 70 لک پيار ڪندڙن جي مهرباني، توهان سڀني لاءِ منهنجو وڏو ڀاڪر آهي، هن چيو ته مان هاڻ اڃا وڌيڪ محنت ڪنديس ۽ پنهنجي چاهيندڙن جو ڳاٽ فخر وچان اوچو ڪنديس، عاليا ڀٽ فلمي ڪيريئر جي شروعات اسٽوڊنٽ آف دي ايئر کان ڪئي هئي، جنهن کانپوءِ هوءِ همپٽي شرما ڪي دلهنيان، ٽو اسٽيٽس ۽ هائي وي جهڙين فلمن ۾ ڪم ڪري چڪي آهي،جڏهن ته اڄڪله هوءَ شاهه رخ خان سان ايندڙ فلم جي شوٽنگ ۾ رڌل آهي.

 

پاڪستاني بيٽنگ واريءَ جي ڀت،ڪيويز آخري ٽي ٽوئنٽي کٽي سيريز به پنهنجي نالي ڪري ورتي

ويلنگٽن (اسپورٽس نيوز) پاڪستان ۽ نيوزيلينڊ وچ ۾ سيريز جي آخري ميچ ۾ قومي ٽيم کي بدترين مات،پوري ٽيم 101 رنسن تي ڍير ٿي وئي.تفصيل مطابق پاڪستان ۽ نيوزيلينڊ وچ ۾ سيريز جي آخري ميچ ۾ قومي ٽيم جي بيٽنگ لائين واريءَ جي ڀت جيان ثابت ٿي ۽ پوري ٽيم 101 رنسن تي ڍير ٿي وئي،جڏهن ته پاڪستان جا 9 رانديگر ڊبل فگر ۾ ئي نه پهچي سگهيا،سرفراز احمد 41 ۽ شعيب ملڪ 14 رنسون ٺاهڻ ۾ ڪامياب رهيا.پاڪستان پاران شاهد آفريدي 8، احمد شهزاد 8 محمد حفيظ 2، عمر اڪمل 5 شعيب ملڪ 4 رنسون ٺاهي ڪيوي بالرن اڳيان بيوس نظر آيا.ميزبان ٽيم پاران ايليٽ ۽ ملين 3.3 رانديگرن کي آئوٽ ڪري قومي ٽيم جي بيٽنگ لائين تباهه ڪري ڇڏي.اهڙي طرح نيوزيلينڊ ٽيم ميچ سان گڏ سيريز به پنهنجي نالي ڪري ورتي ۽ عالمي رينڪنگ ۾ پهرين پوزيشن ماڻڻ جي ويجهو به پهچي وئي.

 

شاهد آفريدي نيوزيلينڊ خلاف ٽي ٽوئنٽي سيريز ۾ خراب ڪارڪردگي ڏيکارڻ جو اعتراف ڪري ورتو

ويلنگٽن (اسپورٽس نيوز) قومي ٽي ٽونٽي ٽيم جي ڪپتان شاهد آفريدي نيوزيلينڊ خلاف ٽن ميچن جي سيريز ۾ خراب ڪارڪردگي ڏيکارڻ جو اعتراف ڪري ورتو،اڄ آخري ميچ کان پوءِ ڳالهائيندي شاهد آفريدي جوچوڻ هو ته ٽيم کي ملندڙ ٽارگيٽ ڪافي وڏو هو، جنهن جو رانديگرن دٻاءُ ورتو، جيڪڏهن پهرين 6 اوورن ۾ 5 رانديگرآئوٽ ٿي ويندا ته پوءِ ڪاميابي جي ڪهڙي اميد ڪري سگهجي ٿي،هن چيو ته ٽي ٽونٽي ورلڊ ڪپ هاڻي ويجهو اچي ويو آهي، اسان کي پوري تياري سان ايونٽ لاءِ وڃڻو پوندو، شاهد شفريدي چيو ته اسان جي بالنگ ته ٺيڪ وڃي رهي آهي پر بيٽنگ ۾ اسان کي مسئلن سان منهن ڏيڻو پئجي رهيو آهي.