تازيون خبرون

Daily Archives: January 21, 2016

چارسده ۾ باچا خان يونيورسٽي تي دهشتگردن جو حملو، فائرنگ، ڌماڪا، پروفيسر، شاگردن ۽ سيڪيورٽي گارڊن سميت 25 ڄڻا شهيد، ڪيترائي زخمي

چارسده (اين اين آءِ) چارسده ۾ باچاخان يونيورسٽي ۾ دهشتگردن جي حملي جي نتيجي ۾ پروفيسر شاگرد سيڪيورٽي گارڊن سميت 25 ڄڻا شهيد ۽ ڪيترائي زخمي ٿي پيا سيڪيورٽي فورسز جي جوابي ڪارروائي ۾ چار دهشتگرد مارجي ويا آپريشن دوران فضائي نگراني ٿيندي رهي پاڪ فوج جي جوانن 100 کان وڌيڪ شاگردن کي حفاظت سان ٻاهر ڪڍي يونيورسٽي جو ڪنٽرول سنڀالي ورتو زخمين ۾ گهڻن جي حالت ڳڻتي جوڳي آهي جنهن سبب فوتين جي انگ وڌي سگهي ٿو چارسده ۽ پشاور جي علائقي ۾ ايمرجنسي لاڳو ڪئي وييئي جڏهن ته صدر ممنون حسين وزيراعظم نوازشريف حملي جي مذمت ڪندي چيو ته بيگناهه شاگرد ۽ شهرين کي قتل ڪندڙن جو ڪوئي مذهب نه آهي ملڪ مان دهشتگردي جي پاڙ پٽڻ جو پڪو پهه ڪري ڇڏيو آهي اربع تي چارسده جي باچاخان يونيورسٽي ۾ قوم پرست اڳواڻ باچا خان جي ورسي جي موقعي تي مشاعري جو اهتمام ڪيو ويو هو جنهن ۾ شاگرد استاد ۽ وڏي انگ ۾ عملو موجود هو ته صبح جو 9 لکي 15 منٽن تي اوچتو فائرنگ شروع ٿي ويئي ۽ ڌماڪن جا آواز ٻڌا ويا جنهن پوءِ پوليس جي ڳري نفري پهچي ويئي ۽ دهشتگردن جو مقابلو شروع ڪري ڇڏيو جڏهن ته اطلاع ملڻ تي پاڪ فوج جا ڪمانڊوز پهچي يونيورسٽي ۾ لڪل دهشتگردن جو مقابلو ڪيو دهشتگردن جي فائرنگ ۽ ڌماڪن سان پروفيسر حامد سميت 25 ڄڻا شهيد ٿيا شهيدن ۾ شاگرد استاد ۽ سيڪيورٽي گارڊ به شامل آهن شهيدن جا لاش ڊي ايڇ ڪيو اسپتال چارسده منتقل ڪيا ويا آهن زخمين کي ڊسٽرڪٽ هيڊڪوارٽر اسپتال چارسده آندو ويو جتي ايمرجنسي لاڳو ڪئي ويئي آهي سخت زخمين کي پشاور جي ليڊي ريڊنگ اسپتال منتقل ڪيو ويو اسپتال جي ذريعن موجب زخمين ۾ گهڻي ڀاڱي شاگرد آهن چارسده يونيورسٽي جي هڪ ملازم ٻڌايو ته دهشتگرد يونيورسٽي جي پوئين حصي مان اندر داخل ٿيا پوليس موجب دهشتگردن جو انگ 6 کان 8 هو اکين ڏٺل شاهد مطابق فائرنگ جي واقعي کان پوءِ ڀاڄ پئجي ويئي ۽ شاگرد پنهنجن ڪلاسن، شاگردياڻيون هوسٽل ۾ ڦاسي پيون جڏهن ته پاڪ فوج جي جوانن ڪيترن ئي شاگردن ۽ استادن کي يونيورسٽي مان حفاظت سان ڪڍي ورتو آءِ ايس پي آر مطابق فائرنگ جي ڏي وٺ ۾ 4 دهشتگرد مارجي ويا مارجي ويل دهشتگرد هاسٽل جي اندران فائرنگ ڪري رهيا هئا آپريشن دوران يونيورسٽي جي فضائي نگراني به ٿيندي رهي باچا خان يونيورسٽي جي وائيس چانسلر ڊاڪٽر فصل الرحيم ٻڌايو ته 3000 جي لڳ ڀڳ شاگرد ۽ 600 مهمان يونيورسٽي ۾ موجود هئا فائرنگ ٻاهران ٿيندي رهي جنهن جي ڪري شاگردن کي ڪجهه نظر نه پئي آيو ٿي سگهي ٿو ته هٿياربند ڪوهيڙي جو فائدو وٺندي اندر داخل ٿيا هجن هن ٻڌايو ته يونيورسٽي ۾ ٻه بوائز ۽ هڪ گرلز هاسٽل آهي يونيورسٽي اندر موجود اسٽاف سان رابطو رهيو هڪ ٻئي اکين ڏٺل شاهد ٻڌايو ته دهشتگردن جو پهريان يونيورسٽي گارڊن سان مقابلو ٿيو جنهن ۾ ٽي گارڊ زخمي ٿيا بعد ۾ پوليس ۽ فوج پهتي دهشتگرد يونيورسٽي ۾ داخل ٿي مختلف پاسن ۾ پکڙجي ويا. ٻئي پاسي ڊي آءِ جي آپريشنز چارسده سعيد وزير چيو ته دهشتگردن سان فائرنگ جي ڏي وٺ ۾ 3 اهلڪار زخمي ٿيا آهن تحريڪ انصاف جي اڳواڻ شوڪت يوسفزئي ٻڌايو ته کيس ڏنل اڻتصديق ٿيل اطلاعن مطابق شهيدن جو انگ 25 جي لڳ ڀڳ آهي جن ۾ يونيورسٽي جي شعبي ڪئمسٽري جو پروفيسر حامد حسين شامل آهي واقعي ۾ 50 کان وڌيڪ ماڻهو زخمي به ٿيا آهن. هوڏانهن صدر ممنون حسين وزيراعظم محمد نوازشريف ڌماڪي جي مذمت ڪندي حملي ۾ ٿيل جاني نقصان تي ڏک ۽ افسوس جو اظهار ڪيو آهي هڪ بيان ۾ صدر واقعي جي مذمت ڪندي چيو ته دشمن اهڙي طرح جون بزدلاڻيون ڪارروايون ڪري دهشتگردي خلاف اسان جي عزم کي ڪمزور نٿو ڪري سگهي پاڪستان مان دهشتگردي جي مڪمل خاتمي تائين آپريشن ضرب عضب قائم رهندي ۽ حڪومت دهستگردي جي ڪنهن بزدلاڻي ڪارروائي کان ڪنهن به صورت نه ڊڄندي، هوڏانهن چيئرمين سينيٽ ميان رضا رباني ڊپٽي چيئرمين مولانا عبدالغفور حيدري اسپيڪر قومي اسيمبلي سردار اياز. سردار محمد يعقوب چوڌري عبدالمجيد پرويز خٽڪ ميان شهبازشريف نواب ثناءُالله زهري ڊاڪٽر عشرت العباد سردار مهتاب خان عباسي حافظ حفيظ الرحمان چوڌري نثار علي خان پرويز رشيد زاهد هامد عبدالقادر بلوچ اڪرم خان دراني عابد شيرعلي بلاول ڀٽو زرداري آصف زرداري سيد خورشيد شاهه فاروق ستار حيدر عباس رضوي مولانا فضل الرحمان اسفنديارولي شيخ رشيد احمد طاهرالقادري ۽ ٻين سياسي ۽ مذهبي اڳواڻن حملي جي سخت لفظن ۾ مذمت ڪئي آهي. ٻئي طرف ڪي پي ڪي حڪومت باچا خان يونيورسٽي تي حملي جي سخت مذمت ڪندي 3 ڏينهن سوڳ جو اعلان ڪيو آهي، ان دوران سرڪاري آفيسن تي قومي جهنڊو جهڪيل رهندو، ان سلسلي ۾ شهيدن جي بلند درجن لاءِ قرآن خواني ڪئي ويندي، زخمين جي جلد صحتيابي ۽ ملڪ ۾ امن جي بحالي لاءِ به خاص دعائون گهريون وينديون. سنڌ حڪومت چارسدا سانحي تي ٽي ڏينهن سوڳ جو اعلان ڪيو آهي.تفصيل مطابق سنڌ جي وڏي وزير سيد قائم علي شاهه باچا خان يونيورسٽي ۾ دهشتگردن جي حملي جي مذمت ڪندي ٽي ڏينهن سوڳ جو اعلان ڪيو آهي ۽ سنڌ ۾ سڀني سرڪاري عمارتن تي جهنڊا جهڪيل رهندا.پاڪستان پيپلز پارٽي جي چئيرمين بلاول ڀٽو زرداري چيو آهي ته پيپلز پارٽي جا ميمبر پوري ملڪ ۾ آفيسن ۾ قرآن خانيون ڪرائين. هوڏانهن پابندي پيل تحريڪ طالبان پاڪستان جي هڪ ڪمانڊر ۽ پشاور جي آرمي پبلڪ اسڪول تي حملي جي ماسٽر مائينڊ عمر منصور اڻڄاتل هنڌ تان فون تي باچاخان يوينورسٽي تي حملي جي ذميواري قبول ڪئي آهي جڏهن ته تحريڪ طالبان پاڪستان جي مرڪزي قيادت هڪ اِي ميل جي ذريعي باچاخان يوينورسٽي تي حملي جي مذمت ڪندي ان کان لاتعلقي جو اظهار ڪيو. تحريڪ طالبان پاڪستان جي ترجمان محمد خراساني مطابق طالبان شوريٰ تحريڪ طالبان پاڪستان جو نالو استعمال ڪندڙن جي خلاف ڪارروائي ڪندي.

 

سياسي ۽ عسڪري قيادت پاران دهشتگردن خلاف بنا فرق آپريشن جاري رکڻ تي اتفاق

پشاور/اسلام آباد (م.ڊ/بيورو) وزيراعظم نواز شريف ۽ آرمي چيف جنرل راحيل شريف دهشتگردن خلاف بنا فرق آپريشن جاري رکڻ تي اتفاق ڪيو آهي. جڏهن ته سڀاڻي سڄي ملڪ ۾ سوڳ جو اعلان ڪيو ويو آهي. وزيراعظم نواز شريف سوئٽزر لينڊ مان آرمي چيف جنرل راحيل شريف سان فون تي رابطو ڪري چارسده حملي کانپوءِ پيدا ٿيل صورتحال تي ڳالهه ٻولهه ڪئي. فون تي رابطي دوران وزيراعظم ۽ آرمي چيف اتفاق ڪيو ته دهشتگردن خلاف بنا فرق آپريشن جاري رکيو ويندو. هنن چيو ته دهشتگرديءَ جي واقعي قوم جي عزم کي ڪمزور نه ٿا ڪري سگهن. وزيراعظم نواز شريف چارسده حملي کانپوءِ وقت تي ڪارروائي ڪرڻ تي سيڪيورٽي اهلڪارن جي واکاڻ ڪئي. ٻئي طرف وزيراعظم نواز شريف باچا خان يونيورسٽي تي حملي ۾ ملوث دهشتگردن جي سرپرستن ۽ مالي مدد ڪندڙن جو پتو لڳائڻ جي هدايت ڪندي چيو آهي ته قوم جو قربانيون رائيگان نه وينديون، دهشتگردن کي انجام تائين پهچايو ويندو. وزيراعظم نواز شريف سيڪيورٽي ادارن کي چارسده سانحي ۾ ملوث دهشتگردن جي سرپرستن ۽ مالي مددگارن جو پتو لڳائڻ جون هدايتون ڪيون آهن. هڪ بيان ۾ وزيراعظم نواز شريف جو چوڻ آهي ته معصوم ماڻهن تي حملا ڪندڙ دهشتگردن جو ڪوبه مذهب ناهي. هن چيو ته هنن دهشتگردن کي ملڪ مان ختم ڪرڻ جو پڪو پهه ڪري ڇڏيو آهي. وزيراعظم نواز شريف سڪيورٽي فورسز کي هدايت ڪئي ته باچا خان يونيورسٽي تي حملو ڪندڙ دهشتگردن کي فوري طور ختم ڪيو وڃي. هن چيو ته دهشتگرديءَ خلاف جنگ ۾ پنهنجي هم وطنن جون قربانيون ضايع ٿيڻ نه ڏنيون وينديون، ملڪ مان دهشتگرديءَ جي پاڙ پٽي ويندي. سندس چوڻ آهي ته دهشتگرديءَ خلاف جنگ ۾ قوم حڪومت سان گڏ آهي. وزيراعظم نواز شريف جو چوڻ آهي ته سوڳ دوران قومي جهنڊو جهڪيل رکيو ويندو. ٻئي طرف آئي ايس پي آر پاران جاري ڪيل بيان ۾ چيو ويو آهي ته باچا خان يونيورسٽي تي حملي آورن بابت بريڪ ٿرو ٿي ويو آهي، خبر پئجي وئي آهي ته دهشتگردن کي ڪنهن موڪليو هو. هوڏانهن چيف آف آرمي اسٽاف جنرل راحيل شريف اربع ڏينهن باچا خان يونيورسٽي جو دورو ڪيو ۽ آپريشن ۾ حصووٺندڙ قانون لاڳو ڪندڙ ادارن ۽ فوجين سان ملاقات ڪئي. پاڪ فوج جي سڌ سماءَ واري کاتي آءِ ايس پي آر جي ڊائريڪٽر جنرل ليفٽيننٽ جنرل عاصم سليم باجوه جي هڪ ٽوئيٽ پيغام مطابق آرمي چيف حملي ۾ انساني جانين جي ضايع ٿيڻ تي ڏک جو اظهار ڪيو ۽ سيڪيورٽي فورسز جي بر وقت ڪارروائي تي انهن جي واکاڻ ڪئي. آرمي چيف چارسده اسپتال جو به دورو ڪيو ۽ سمورن زخمين جي خيريت معلوم ڪئي.جرل راحيل شريف چيو ته اسان ان حملي ۾ شهيد ٿيلن جي ڪٽنبن جي ڏک ۾ برابر جا شريڪ آهيون.

 

باچا خان يونيورسٽي تي حملو پاڪستان تي حملي برابر آهي: پرويز رشيد

اسلام آباد (اين اين آءِ) سڌسماءَ جي وفاقي وزير پرويز رشيد چيو آهي ته باچاخان يونيورسٽي تي دهشتگردن جو حملو پاڪستان تي حملي جي برابر آهي يونيورسٽي تي حملو پاڪستان تي حملو آهي هڪ بيان ۾ هن چيو ته دهشتگردي خلاف وفاق صوبائي حڪومت سان رابطي ۾ آهي ان کان پوءِ قومي اسيمبلي ۾ بريفنگ ڏيندي پرويز رشيد ٻڌايو ته سيڪيورٽي اهلڪارن پنهنجي پرواهه نه ڪندي دهشتگردن کي روڪڻ جي ڪوشش ڪئي ڪٿي ڪوتاهي ناهي ٿي هي پاڪستان تي حملو آهي ايوان کي سمورو تفصيل ڏينداسين پرويز رشيد چيو ته وفاقي حڪومت صوبائي حڪومت سان رابطي ۾ آهي دهشتگردي خلاف جنگ ۾ هڪٻئي سان تعاون جاري آهي. پرويز رشيد چيو ته يونيورسٽي جا 3000 شاگرد مصيبت ۾ ڦاٿل آهن اسان کي انهن سان ٻڌي جو اظهار ڪرڻ گهرجي پارليمينٽ هائوس سيڪيورٽي جا فول پروف انتظام ڪيا وڃن ۽ هن معاملي تي بحث ڪرايو وڃي پرويز رشيد چيو ته وفاقي حڪومت صوبائي حڪومت سان مڪمل رابطي ۾ آهي ثبوت گڏ ٿي رهيا آهن واقعي جي تفصيل سان ايوان کي آگاهه ڪيو ويندو.

 

دهشتگردن جون بزدلاڻيون ڪارروايون حوصلا ڪمزور نٿيون ڪري سگهن: وڏو وزير

ڪراچي (اين اين آءِ) سنڌ جي وڏي وزير سيد قائم علي شاهه چارسده جي باچا خان يونيورٽي ۾ دهشتگردن جي ڪيل حملي جي شديد لفظن ۾ مذمت ڪندي ان کي دهشتگردن جي بزدلاڻي ڪارروائي قرار ڏنو آهي. هن چارسده يونيورسٽي سانحي جي سلسلي ۾ سنڌ صوبي ۾ ٽن ڏينهن جي سوڳ جو اعلان ڪيو آهي ۽ ٽنهي ڏهاڙن تي قومي جهنڊو سرنگون رهندو ۽ اسڪولن ۾ ٽئي ڏينهن اسيمبلي دوران شهيدن لاءِ ايصال ثواب لاءِ دعا گهري ويندي. هن چيو ته دهشتگرن جي ناپاڪ ارادا ڪڏهن به ڪامياب نه ٿيندا ۽ هو اسان جي تعليمي ادارن تي حملا ڪري اسان کي مرغوب ڪرڻ چاهن ٿا پر اسان جي قوم جو مثال اتحاد انهن جي سمورن سازشن کي ناڪام ڪري ڇڏيندا. سنڌ جي وڏي وزير چيو ته نيشنل ايڪشن پلان جي حوالي سان سڄي ملڪ ۾ دهشتگردن خلاف وڌيڪ سخت قدم کڻڻ جي ضرورت آهي ته جيئن ملڪ مان دهشتگردن جو مڪمل طور تي صفايو ڪري سگهجي.

 

هڪ دفعو ٻيهر پنهنجي پاليسي جو جائزو وٺڻ لاءِ پارليمينٽ جو گڏيل اجلاس طلب ڪيو وڃي: قومي اسيمبلي ميمبر

اسلام آباد (اين اين آءِ) قومي اسيمبلي ميمبرن باچاخان يونيورسٽي تي دهشتگردن جي وحشياڻي حملي جي سخت لفظن ۾ مذمت ڪندي تجويز پيش ڪئي ته اسان کي هڪ دفعو ٻيهر پنهنجي پاليسي جو جائزو وٺڻ گهرجي نيشنل ايڪشن پلان جو جائزو وٺڻ لاءِ پارليمينٽ جو گڏيل اجلاس طلب ڪيو وڃي گهرو وزير نيشنل ايڪشن پلان تي اسان کي اعتماد ۾ وٺي اسان کي ماضي جون غلطيون وساري پارليمينٽ کي طاقت جو سرچشمو بنائڻو پوندو هٿي خالي معصوم بارڙن کي نشانو بڻائيندڙن انسان نه آهن جڏهن ته خواجه آصف چيو ته خطي جي سمورن ملڪن ۾ بدامني آهي جيستائين خطي جا ملڪ هڪٻئي جي ملڪ ۾ مداخلت بند نه ڪندا ان وقت تائين امن قائم نه ٿيندو حملي ۾ 20 شاگرد ۽ استاد شهيد ٿيا 4 دهشتگرد مارجي ويا افغانستان ۽ طالبان وچ ۾ ڳالهين جي شروعات جلد چاهيون ٿا سياستدانن ۽ مذهبي اڳواڻن کي پنهنجن مفادن کان مٿانهون ٿي ملڪ ۾ قيام امن جي هڪ نقاطي ايجنڊا تي ڪم ڪرڻو پوندو سعودي عرب ۽ ايران ۾ لاڳاپا بهتر ٿين ٿا ته ڪريدٽ پاڪستان کي ملندو ۽ اسان جو تشخص بهتر ٿيندو اربع تي قومي اسيمبلي ۾ باچاخان يونيورسٽي تي دهشتگردي جي واقعي تي ڳالهائيندي خواجه محمد اصف چارسده سانحي کي افسوسناڪ ڪوٺيندي چيو ته ان تي جيترو به ڏک جو اظهار ڪيو وڃي ته بهتر آهي ميمبرن پنهنجون تجويزون ۽ دهشتگردي جي تاريخي منظر جو جيڪو اظهار ڪيو آهي ان کان ڪوئي اعتراض نٿو ڪري سگهي هن ٻڌايو ته ڪور ڪمانڊر جنرل هدايت ان آپريشن جي نگراني ڪري رهيو آهي 20 شاگرد ۽ استاد شهيد ٿيا 20 زخمي ٿيا آهن 4 دهشتگرد مارجي ويا آهن. ان کان اڳ بحث ۾ حصو وٺندي اعجاز الحق چيو ته سڄي دنيا دهشتگردي خلاف اسان جي ڪارروائين کي تسليم ڪري ٿي پاڪستان دهشتگردي جي خلاف فرنٽ لائين رياست تي آهي اسان کي هڪ دفعو بيهر پنهنجي پاليسي جو جائزو وٺڻ گهرجي اعجازالحق چيو ته چارسده يونيورسٽي جو واقعو افسوسناڪ آهي آپريشن ضرب عضب ۾ پاڪ فوج قربانيون ڏنيون آهن پاڪ فوج جا 5 هزار کان وڌيڪ آفيسر ۽ جوان شهيد ٿيا آهن پوءِ به اسان تي دهشتگردي جو الزام آهي جيتوڻيڪ سڄي دنيا دهشتگردي جي خلاف اسان جي ڪارروائين کي تسليم ڪري ٿي پاڪستان دهشتگردي خلاف فرنٽ لائين رياست تي آهي محمود خان اچڪزئي چيو ته اسان واقعن جي پويان پويان وڃي رهيا اهيونا سان کي اصل صورتحال جو نوٽيس وٺڻ گهرجي ملڪ سڀ کان مقدس ۽ اهم هوندو آهي اسان تي الزام آهي ته سوويت فوجين جي افغانستان مان نڪرڻ کان پوءِ اسان هي ڪارروائي بند ڇو نه ڪئي اسان کي ماضي جون غلطيون وساري پارليمينٽ کي طاقت جو سرچشمو بنائڻو پوندو پارليمينٽ جو گڏيل اجلاس طلب ڪري پاليسي ٺاهڻ گهرجي اڳوڻي وزيراعظم مير ظفرالله خان جمالي چيو ته پهريان اسان کي پنهنجي ملڪ ۾ امن بحال ڪرڻو پوندو ان کان پوءِ اسان جي عزت ٿيندي اسان جي ملڪ ۾ پهريان به ڀارتي ۽ افغانستان مان مداخلت ٿيندي رهي آهي جڏهن ته هاڻي ظاهر ظهور مداخلت ٿي رهي آهي ظفرالله خان جمالي چيو ته نئين صدي ۾ نئون نسل اچي ويو آهي پر ان کي پارليمينٽ جي طاقت جو اندازو نه آهي هن چيو ته حمود الرحمان ڪميسن جي رپورٽ اڃا تائين آڏو ناهي آندي ويئي هن چيو ته اسان مان جيڪو به ڪنهن به جماعت سان تعلق رکندڙ آهي اسان سڀني کي گڏجي هن ملڪ کي بچائڻو پوندو ۽ پنهنجي ترجيحن جو نيئن سر تعين ڪرڻو پوندو وفاقي وزير پرويز رشيد چيو آهي ته وزيراعظم صورتهال کان چڱي طرح آگاهي حاصل ڪري رهيو آهي اسان کي فوري طور تي چارسده وڃڻ جو وزيراعظم حڪم ڏنو آهي هن چيو ته اسان کي هي تاثر نه ڏيڻ گهرجي ته دهشتگرد معمول جي زندگي مفلوج بنائڻ ڪامياب ٿيا آهن ٻي صورت ۾ هو پاڻ کي ڪامياب سمجهندا اسان کي معمول جو ڪم جاري رکڻ گهرجي ٽرينون هلنديون رهن ۽ جهاز اڏامندا رهن پارليمينٽ کي به ڪم جاري رکڻ گهرجي صاحبزاده طارق الله چيو ته نيشنل ايڪشن پلان جو جائزو وٺڻ لاءِ پارليمينٽ جو گڏيل اجلاس طلب ڪيو وڃي هن چيو ته سڀني ساٿين جي خواهش آهي ته اجلاس جي ڪارروائي متعين ڪئي وڃي ملڪ جي جنهن حصي ۾ دهشتگردي جو واقعو ٿئي ٿو اسان جو معمول بڻجي ويو آهي ته اسان صرف دعا ڪيون ٿا اسان جو صوبو هن باهه ۾ ٻري رهيو آهي نيشنل ايڪشن پلان جو جائزو وٺڻ لاءِ پارليمينٽ جو گڏيل اجلاس طلب ڪيو وڃي. عوامي مسلم ليگ جو سربراهه شيخ رشيد احمد چيو ته دشمن جي ايجنسي پاڪستان ۾ ڪارروائيون ڪري رهي آهي ڀارتي بچاءُ واري وزير اسان کي ڌمڪي ڏني آهي اسان کي پنهنجي حڪمت عملي تي نئين سر غور ڪرڻ گهرجي شيخ رشيد احمد چيو ته هي هڪ اهڙو معاملو آهي جنهن تي پوري قوم متحد آهي هي اڻ اعلانيل جنگ آهي جنهن ۾ا سان کي ڪٺو ٿيڻ جي ضرورت آهي هن چيو ته چارسده يونيورسٽي ۾ 3 هزار شاگرد تعليم پرائين ٿا ۽ 600 شاعر اچي رهيا هئا پر سيڪيورٽي جا ڪي خاص انتظام نه هئا هن چيو ته آمريڪي صدر بارڪ اوبامه جيڪو ڪجهه چيو ان تي ڪاوڙ ڪرڻ جي ضرورت نه آهي هي هڪ ڪڙي حقيقت آهي.

 

بارکان ۾ ايف سي جو آپريشن،پابندي مڙهيل تنظيم جي ڪمانڊر سوڌو 4 دهشتگرد مارجي ويا، 3 گرفتار

ڪوئيٽا (م.ڊ) فرنٽيئر ڪور بلوچستان جي بارکان جي علائقي ۾ ڪاروائي ڪئي، فائرنگ جي ڏي وٺ ۾ پابندي مڙهيل تنظيم جي ڪمانڊر سوڌو 4 دهشتگرد مارجي ويا، جڏهن ته 4 دهشتگردن کي گرفتار ڪيو ويو. ايف سي جي ترجمان مطابق فرنٽيئر ڪور بلوچستان جي علائقي بارکان ۾ ڳجهي ڄاڻ ملڻ تي ڪارروائي ڪئي، ڪارروائي دوران فائرنگ جي ڏي وٺ شروع ٿي، جنهن جي نتيجي ۾ پابندي مڙهيل تنظيم جي اڳواڻ صحبت خان سوڌو 4 دهشتگرد مارجي ويا، جڏهن ته 3 کي گرفتار ڪيو ويو. گرفتار دهشتگردن کي اڻ ڄاتل هنڌ تي جاچ لاءِ نيو ويو، جڏهن ته علائقي جي ناڪا بندي ڪري وڌيڪ سرڇ آپريشن شروع ڪيو ويو آهي.

 

تعليمي اداري تي حملو نهايت افسوسناڪ آهي، عمران خان

اسلام آباد (اين اين آءِ) پاڪستان تحريڪ انصاف جي چيئرمين عمران خان چارسده جي باچاخان يونيورسٽي تي حملي جي سخت مذمت ڪندي چيو ته تعليمي اداري تي حملو نهايت افسوسناڪ آهي قانون لاڳو ڪندڙ ادارن تي مڪمل اعتماد اهي دسمن جو ڄمي مقابلو ڪنداسين ميڊيا سان ڳالهائيندي عمران خان چيو ته هن ڏکئي گهڙي ۾ شاگردن ۽ والدين سان گڏ آهيون ۽ دهشتگردن جي حملي ۾ زخمي ٿيندڙن کي بهترين طبي سهولتون فراهم ڪرڻ جي هدايت ڪري ڇڏي آهي عمران خان چيو ته پرويز خٽڪ پرڏيهي دوري تي اسڪاٽ ليند ويل آهي جڏهن ته کيس فوري طور تي واپس گهرايو ويو اهي هن چيو ته آرمي پبلڪ اسڪول کان پوءِ سڄي قوم هونئن به متحد هئي مان ڏسندس ته اسان جون ڪهڙيون غلطيون آهن اهي ڪيئن ٺيڪ ڪري سگهجن ٿيون.

 

بينظير ڀٽو قتل ڪيس: مارڪ سيگل پنهنجي بيان تي جرح مڪمل ڪري ورتي

راولپنڊي(بيورو) شهيد بينظير ڀٽو قتل ڪيس ۾ آمريڪي صحافي مارڪ سيگل پنهنجي بيان تي جرح مڪمل ڪري ورتو، مارڪ سيگل چيو آهي ته پرويز مشرف جو فون ٻڌڻ بعد بينظير ڀٽو جو منهن ڳاڙهو ۽ جسم ڏڪي رهيو هو، مشرف بينظير ڀٽو جي سلامتي ان جي تعاون سان مشروط ڪئي.شهيد بينظير ڀٽو قتل ڪيس جي ٻڌڻي دوران آمريڪي صحافي مارڪ سيگل جو وڊيو لنڪ ذريعي ڏنل بيان تي پرويز مشرف جي وڪيل فروغ نسيم جرح ڪئي.آمريڪي صحافي مارڪ سيگل واشنگٽن ۾ قائم پاڪستان جي سفارتخاني مان وڊيو لنڪ ذريعي موجود هو، آمريڪي صحافي سان گڏ پيپلز پارٽي جو اڳواڻ فاروق ايڇ نائيڪ به موجود هو. جرح دوران پرويز مشرف جي وڪيل فروغ نسيم سوال ڪيو ته ڇا بينظير ڀٽو کي ڌمڪي آمريڪا جي سر زمين تي ڏني وئي، جنهن تي مارڪ سيگل چيو ته جي ها آمريڪي سر زمين تي ڏني وئي، جنهن وقت پرويز مشرف جي بينظير ڀٽو کي ڌمڪي واري ڪال آئي ته هو ان وقت بينظير ڀٽو سان گڏ هو. فروغ نسيم چيو ته ڇا بينظير ڀتو جي ڌمڪي بابت ڪنهن آمريڪي اختيارين کي اطلاع ڏني هئي، جنهن تي مارڪ سيگل چيو ته آمريڪا ۾ هن ڪنهن کي به ڌمڪي جي اطلاع نه ڏني.آمريڪي صحافي جرح دوران چيو ته بينظير ڀٽو کي جڏهن پرويز مشرف فون تي ڌمڪي ڏني ته هو سخت پريشان هئي، پرويز مشرف جو فون ٻڌڻ بعد بينظير ڀٽو جو منهن ڳاڙهو ۽ جسم ڏڪي رهيو هو، پرويز مشرف بينظير ڀٽو جي سلامتي ان جي تعاون سان مشروط ڪئي.مارڪ سيگل چيو ته هن ايف آءِ اي کي بيان رڪارڊ ڪرائڻ لاءِ ڪڏهن به انڪار ناهي ڪيو، هو بينظير ڀٽو لاءِ آمريڪا ۾ بنا ڪنهن پئسي جي لابنگ ڪندو هو، هن آصف زرداري لاءِ ڪڏهن به لابيسٽ طور

 

پاڪستان دهشتگردي جي پاڙ پٽڻ لاءِ پنهنجون ڪوششون جاري رکندو: پرڏيهي صلاحڪار سرتاج عزيز

اسلام آباد(اي پي پي) پرڏيهي صلاحڪار سرتاج عزيز چيو آهي ته پاڪستان دهشتگردي جي پاڙ پٽڻ لاءِ پنهنجون ڪوششون جاري رکندو. پاڪستان دهشتگردي کي شڪست ڏني آهي ۽ گذريل سال دوران دهشتگرد حملن ۾ نمايان گهٽتائي آئي آهي. امن امان جي صورتحال ۾ بهتري سان ملڪي اقتصادي ۽ سياسي صورتحال ۾ هاڪاري تبديليون ٿيون آهن. اربع تي غير ملڪي ميڊيا سان ڳالهائيندي هن چيو ته پاڪستان دهشتگردي کي پاڙان پٽڻ جو عزم ڪيو آهي ۽ دهشتگردن ۽ شدت پسندي جي خاتمي تائين اسان جون ڪوششون جاري رهنديون. هڪ سوال جي جواب ۾ هن چيو ته آپريشن ضرب عضب ۽ نيشنل ايڪشن پلان جي نتيجي ۾ ملڪي اقٿصادي ۽ سياسي صورتحال ۾ بهتري آئي آهي.

 

مورو لڳ ڦورن جي فائرنگ ۾ زخمي ٿيل نوجوان ڪراچي ۾ فوت، وارثن پاران لاش رکي ڌرڻو، ٽائرن کي باهيون

مورو(رپورٽر) مورو ڀرسان ڳوٺ گولو پوٺو ۾ ھٿيار بندن ڦورن جي فائرنگ ۾ زخمي ٿيل نوجوان محمد خان ابڙو زخمن جا سور نه سھندي ڪراچي جي ھڪ نجي اسپتال ۾ وفات ڪري ويو نوجوان جي وفات جي خبر ٻڌندي ابڙا برداري سميت آس پاس جي ڳوٺاڻن مورو شھر جي شھرين ۾ گم ۽ غصي جي لھر ڇائنجي وئي جنھن کان پوءِ ابڙا برداري جي سوين ماڻھن مقتول جي پيءُ وڏيرو علي محمد ابڙو ۽ آس پاس جي ڳوٺاڻن مورو شھر جي سياسي سماجي علمي ادبي ۽ قومپرست پارٽين جي ڪارڪنن اڳواڻن وڏي تعداد ۾ شرڪت ڪري مورو باءِ پاس تي ٽائر ساڙي احتجاجي ڌرڻو ھڻي ويھي رھيا جنھن سبب ٻنھي طرفن کان ٽريفڪ معطل رھي ان موقعي تي سنڌ اسيمبلي جي ميمبر رئيس مسرور احمد جتوئي ، پ پ تعلقه صدر سڪندر خان ڪورائي ،ڪامران بھڻ، سردار شبير احمد ابڙو ڊاڪٽر مظھر ڪلھوڙو سميت ٻين سياسي سماجي شخصيتن ھمدردي طور شرڪت ڪئي ان موقعي تي سنڌ اسيمبلي جي ميمبر مسرور خان جتوئي ميڊيا سان ڳالھائيندي چيو ته ضلعي نوشھروفيروز جو امن امان مڪمل طور تي تباھ ٿي چڪو آھي ۽ انتظاميه عوام جو تحفظ ڪرڻ ۾ مڪمل طور ناڪام ٿي چڪي آھي ٻئي طرف صحافين سان ڳالھائيندي مقتول جي پيءُ واقعي ۾ زخمي ٿيندڙ وڏيرو علي محمد ابڙو چيو ته اسان سان وڏو ناحق ۽ ظلم ٿيو آھي ٻه ڏينھن پھريان منھنجي گھر ۾ ڪجھ ھٿيار بند گھڙي اسان تي حملو ڪيو حملي دوران انھن ڪونداڪ ھڻي مون کي زخمي ڪري وڌو مون کي زخمي ڏسي منھنجي پٽ محمد خان ابڙو ھٿيار بندن سان مذاحمت ڪئي جنھن دوران ھٿيار بندن منھنجي پٽ کي سڌا بسٽ ھڻي شديد زخمي ڪري وڌو جنھن ڪري ڪراچي جي نجي اسپتال ۾ ايمرجنسي وارڊ ۾ داخل ڪيو ويو ھو ۽ اڄ منھنجو پٽ فوت ٿي چڪو آھي ھن چيو ته ھتان جي پوليس اسان سان ڪو به انصاف نه ڪري رھي آھي منھنجي گھر ۾ داخل ٿيندڙ ڦورن خلاف پوليس ڪو به ڪيس نه وٺي رھي آھي ۽ پوليس ڦورن جي ڌر بڻيل آھي ان موقعي تي  ٻين پڻ بيگناھ قتل ٿيندڙ محمد خان ابڙو جي قتل جي سخت لفظن ۾ مذمت ڪئي ۽ قاتلن جي گرفتاري جي گھر ڪندي چيو ته حڪمران جماعت جا ڪجھ ماڻھو ڦورن جي سرپرستي ڪري رھيا آھن جنھن ڪري مذڪوره خاندان سان انصاف ۾ دير ٿي رھي آھي متاثرين ٿيندڙن سان جيستائين انصاف نه ٿيندو تيستائين اسان متاثرين ٿيندڙ خاندان سان گھر مرحلي ۾ گڏ آھيون  جسقم اڳواڻ آصف راھوجو،امين ڪلھوڙو،ايس يو پي اڳواڻ راجا ڪورائي،پ پ اڳواڻ عطا محمد ابڙو،شھيد ڀٽو اڳواڻ اصغر عالماڻي ۽ ٻيا پڻ ڌرڻي ۾ شريڪ ھئا  ڌرڻي دوران ڪمشنر بينظير آباد ڊاڪٽر وسيم احمد ، اسسٽنٽ ڪمشنر مورو ابرار احمد جعفر ، ڊي ايس پي مورو يار محمد رند ۽ ٻين عملدارن پھچي مقتول جي وارثن سان ملاڪات ڪري کين انصاف جو يقين ڏياريو ۽ جوابدارن کي گرفتار ڪري ڪيفر ڪردار تائين پھچائڻ جو احد ڪيو جنھن بعد مقتول جي وارثن ڌرڻو ختم ڪيو ۽ لاش کڻائي اباڻي ڳوٺ روانا ٿيا جتي مقتول نوجوان کي سندس اباڻي قبرستان ۾ مٽي ماءُ حوالي ڪيو ويو