تازيون خبرون

Daily Archives: January 20, 2016

باچا خان يونيورسٽي ۾ وهايل رت جو حساب ڪير ڏيندو؟…: مظهر خاصخيلي:

ملڪ اندر وڌندڙ دهشتگردي خلاف جيئن ئي مسلم ليگ ن جي حڪومت وجود ۾ آئي آهي ان جي اچڻ سان ئي وفاقي حڪومت ۽ عسڪري قيادت گڏيل طور اهو اعلان ڪيو هو ته ملڪ اندر وڌندڙ دهشتگردي خلاف سڄي ملڪ ۾ نيشنل ايڪشن پلان تحت ضرب عضب جهڙا آپريشن ڪيا ويندا پر ڏک ۽ افسوس جهڙي ڳالهه اها آهي ته جهڙي نموني سان اهي ڳالهيون ميڊيا تي اچي بانور ڪرايون ويون جيڪي گهڻي ڀاڱي پاڪستان جي گهرو وزير چوڌري نثار جي واتان فخر واري انداز سان ٻڌڻ لاءِ ملنديون هيون ته هن ملڪ مان دهشتگردن جو مڪمل خاتمو ڪري ڇڏيو آهي ۽ هاڻي سڄي ملڪ اندر ڪٿي به دهشتگرد ڪارروايون ڪرڻ جي سگهه نه ٿا رکن. اها ڳالهه صرف ڳالهه ئي رهجي وئي ڇو ته خيبرپختون خواهه صوبي ۾ هڪ ٻئي پويان ٿيل زوردار ٻه ڌماڪا موجوده حڪمران ڌرين جي اکين مٿان چڙهيل پٽي کولڻ لاءِ ڇا ڪافي ناهن ڇو ته جنهن انداز سان 19 جنوري تي پشاور ويجهو خيبر ايجنسي جي سرحد علائقي ۾ خاصدار فورس جي چيڪ پوسٽ ويجهو آپگهاتي ڌماڪي ۾ 11 کان وڌيڪ جانيون هلاڪ ٿي ويون جڏهن ته 39 ڄڻا زخمي ٿي پيا جنهن ۾ ڪيترن ئي ماڻهن جي حالت انتهائي سنگين ٻڌائي وڃي ٿي اڃا انهن فوت ٿي ويلن جي لاشن کي انهن جي پيارن مٽيءَ ماءَ حوالي نه ڪيو آهي ته ٻيهر 20 جنوري جي صبح تي پشاور شهر اندر ملڪ جي مشهور يونيورسٽي باچا خان اندر دهشتگردن داخل ٿي جيڪا ڪارروائي ڪئي آهي جنهن سبب 30 کان مٿي انساني جانيون موت جو شڪار ٿي ويون آهن جنهن ۾ پڙهندڙ شاگرد ۽ تعليم ڏيندڙ پروفيسر استاد ۽ يونيورسٽي جو انتظامي عملو شامل آهي جڏهن ته ڪيتري تعداد ۾ زخمي ٿيا آهن جن کي پشاور شهر جي سرڪاري اسپتالن ۽ خانگي اسپتالن ۾ داخل ڪيو ويو آهي.

هڪ طرف اسان جي موجوده وفاقي حڪومت امن امان جي حوالي سان انتهائي بهترين پريس ڪانفرنسون ڪري دعوائون ڪري ٿي ته ٻئي طرف وري خيبر پختون خواهه صوبي اندر هڪٻئي پويان ٿيل آپگهاتي ڌماڪن ۽ حملن کان پوءِ ڇا اسان جي موجوده گهرو وزير سميت وفاقي حڪومت جي پت وائکي نه ٿي وئي آهي جو هڪ ٻئي پويان لاڳيتو خيبر پختون خواهه ۾ ٿيل واقعن کان پوءِ اڃا به جيڪڏهن وفاقي ۽ صوبائي حڪومتن پنهنجن اکين تي چڙهيل پٽيون نه کوليون ته نه ڄاڻ اڃائي الائي ڪيترا معصوم ۽ بيقصور شهري مذهب جي نالي تي دهشتگردي ڪندڙ انهن قاتلن جي دهشت جي علامت بڻجندا رهندا. ڇا هيءَ سوچڻ ۽ سمجهڻ جهڙي ڳالهه ناهي ته جنهن ملڪ جو وزيراعظم ۽ آرمي چيف ٻئي سعودي عرب ۽ ايران ۾ ٿيل ڇڪتاڻ کان پوءِ انهن ۾ صلح ڪرائڻ لاءِ انهن ملڪن ڏانهن دورن تي ويل هجن ۽ انهن جي پنهنجي ملڪ اندر دهشتگردي جا خطرناڪ واقعا ڪري انهن ڏانهن آخر اهي ڌريون ڪهڙو پيغام موڪلڻ چاهين ٿيون ڇا موجوده حالتن ۾ جيڪي هٿ سان طالبانن جي نالي ۾ دهشتگرد پيدا ڪرايا ويا آهن انهن کي اسان جا رياستي ادارا ڇا هن وقت تائين روڪڻ ۾ ناڪام ٿي ويا آهن يا ٻئي طرف اهي ئي ساڳيا طالبان جن جي لاءِ آمريڪا جي صدر بارڪ اوباما جو چوڻ آهي ته روس کي ٽوڙڻ لاءِ آمريڪا ۽ پاڪستان گڏجي طالبانن کي پيدا ڪيو ان جي ڳالهه موجب ۽ اڳوڻي پاڪستان جي پهرين عورت وزيراعظم شهيد بينظير ڀٽو جي چوڻ موجب ته پاڪستان جنهن طالبانن کي آمريڪا جي چوڻ تي پيدا ڪرايو آهي اهي اڳتي هلي پاڪستان جي اهڙو ڳچي ۾ پوندا جو انهن مان جان ڇڏائڻ مشڪل بڻجي ويندو انهيءَ شهيد بينظير جي ڪيل ڳالهه جي تصديق آمريڪا جي موجوده صدر بارڪ اوباما ڪري ڇڏي آهي ۽ لڳي ائين ٿو ته هن وقت ملڪ اندر طالبان ڌريون دهشتگردي جون ڪارروايون ڪري رهيون آهن

اهي ٻن حصن ۾ هن وقت ورهايل آهن جن ۾ هڪ ڌر پٺاڻ طالبانن جي آهي ته ٻي وري پنجابي طالبانن جي آهي انهن ٻنهي طالبانن مٿان شفقت جو هٿ وري به آمريڪا ۽ پاڪستان جو رکيل آهي. پوءِ آخر هن ملڪ اندر ٿيندڙ رتوڇاڻ ۽ پنهنجي شهرين جي بيگناهه وهندڙ رت کي اهي سگهاريون ڌريون آخر ڇو نه روڪرائي سگهيون آهن هي به هڪ اهڙو سوال آهي جنهن جو جواب ڳولڻ لاءِ اسان سمورن کي پيرا کڻڻ گهرجن ۽ خاص ڪري ان ڳالهه تي به ڌيان ڏيڻ گهرجي ته ڪجهه وقت پهريان جڏهن هندوستان جي پٺاڻ ڪوٽ وٽ جيڪو ڌماڪو ٿيو هو ان ڌماڪي جا پيرا هندوستان جي ايجنسين ۽ حڪمرانن پاڪستان ڏانهن کڻي حملو ڪندڙ ملا مسعود اظهر مٿان نه رڳي الزام هنيو پر پاڪستاني حڪمران جماعت مسلم ليگ ن کي ان ڳالهه تي مجبور ڪيو ته نه چاهيندي به هنن جيش محمد جي اڳواڻ جيڪا تنظيم سپاهه صحابه تي پابندي مڙهڻ کان پوءِ نئين نالي سان جوڙي ان جي اڳواڻي مسعود اظهر کان ڪرائي وئي جنهن جي باري ۾ اهو به چيو وڃي ٿو ته پنجاب جو موجوده قانون وارو وزير راڻا ثناءُ الله پڻ اڻ اعلانيل انهيءَ تنظيم سان واسطو رکندڙ آهي ۽ 20 کان 30 جي لڳ ڀڳ مسلم ليگ ن جا ايم اين اي ۽ 50 جي لڳ ڀڳ ايم پي ايز پڻ اهڙا آهن جن جا نالا به انهيءَ جيش محمد جو اڳواڻ ميان مسعود اظهر جا ڏنل آهن ته پوءِ ان جي طاقت جو اوهان پڙهندڙ پاڻ اندازو لڳائي سگهو ٿا ڇو ته جڏهن هاڻي ڪجهه ڏينهن پهريان نيشنل ايڪشن پلان تحت ملڪ جي موجوده  وزيراعظم ميان نوازشريف سميت سندس وفاقي ڪابينا پنجاب اندر موجود دهشتگردن ۽ غير رجسٽرڊ ٿيل هزارن جي تعداد ۾ جڙيل مدرسن خلاف جيڪو اعلان ڪيو هو ان جي باري ۾ به ڪجهه سوچڻ گهرجي ته ڇا ان ڪيل اعلان کي هن وقت تائين ڪيترائي ڏينهن گذري ويا آهن ته پوءِ ان ساڳي دهشتگرد قرار ڏنل تنظيم جيش محمد خلاف ڇو نه پنجاب اندر ڪارروائي ڪئي وئي آهي اهو به هڪ اهڙو سوال آهي جنهن جو جواب به موجوده مسلم ليگ ن جي قيادت کي ڏيڻ گهرجي ڇو ته هن وقت جنهن انداز سان پشاور ۾ هڪ ٻئي پويان ڌماڪا ڪارايا ويا آهن ۽ ٻيهر رت جي راند رچائي وئي آهي ان جي پيرن جا نشان به ٿي سگهي ٿو انهي ساڳي تنظيم ڏانهن وڃن ٿا ان جي جاچ ته موجوده وفاقي حڪومت کي ڪرائڻ گهرجي جيڪا خاص ڪري رڳي اعلانن ڪرڻ ۾ پوري آهي ۽ ملڪ اندر خاص ڪري دهشتگردي جون ڪارروايون ڪندڙ انهن طالبانن خلاف ڪو به جوڳو قدم نه ٿو کنيو وڃي

هاڻي ته اهو خوف به وڪوڙي ويو آهي ته پيار امن ڀائيچاري واري ڌرتي سنڌ جنهن ۾ مذهبي انتهاپسندي ۽ دهشتگرد ڪارروايون ٻڌڻ لاءِ به نه ملنديون هيون اتي پڻ ڪجهه وقت دوران شڪارپور، جيڪب آباد سميت ڪراچيءَ ۽ سنڌ جي ٻين شهرن ۾ پڻ اهڙا ڌماڪا ڪرايا ويا جنهن سان نه ڄاڻ ڪيترا ماڻهو بي قصور شهيد ٿي چڪا آهن ۽ هاڻي به شڪ پوي ٿو ته ٻيهر وري ڪٿي اهڙيون ڪارروايون سنڌ ۾ به نه ڪرايون وڃن ان لاءِ اسان جي سنڌ حڪومت کي به پنهنجون اکيون پٽڻ گهرجن ۽ خاص ڪري سنڌ ۾ هزارن جي تعداد ۾ ٿيل غير رجسٽرڊ مدرسن خلاف سخت ڪارروايون ڪري انهن خلاف قدم کڻڻ گهرجي ۽ سنڌ جي خاص ڪري لاڙ واري پٽي ٺٽو بدين اندر ٺهندڙ انهن سوين مدرسن کي بند ڪرائڻ گهرجي جن کي صرف ٺاهيو ان لاءِ وڃي ٿو ته جيئن ايندڙ وقت ۾ سنڌ ڌرتي جي امن ڀائيچاري کي ختم ڪرائي سگهجي موجوده سنڌ حڪومت جيڪڏهن چاهي ٿي ته هو پنهنجي ان شهيد قائد ۽ اڳوڻي وزيراعظم محترمه بينظير ڀٽو جي نقش قدم تي هلي ٿي ته پوءِ اسان جي موجوده حڪومت کي سڀ کان گهڻيون ڪارروايون اهڙن مدرسن خلاف ڪرڻ گهرجن جيڪي ظاهر ۾ ڏسڻ لاءِ نه ٿيون ملن ڇو ته اڄ به سڄي سنڌ ۾ هزارن جي تعداد ۾ اهڙا غير رجسٽرڊ مدرسا قائم آهن جتي نه ڄاڻ الائي ڪٿان ڪٿان جا ماڻهو اچي مذهبي تعليم جي نالي تي دهشتگردي جي تربيت ڏئي رهيا آهن. ڏک ۽ تڪليف جي اها ڳالهه به آهي ته گهڻي ڀاڱي ان ساڳي تنظيم سان واڳيل ماڻهو سنڌ جي ننڍن وڏن شهرن ۾ موجوده آرمي چيف راحيل شريف جا بينر هڻائي ان جي هيٺان پنهنجيون تصويرون لڳائين ٿا پر انهن کي هن وقت تائين ڪجهه نه ٿو ڪيو وڃي ۽ نه ئي انهن کي اهڙو عمل ورجائڻ کان روڪيو وڃي ٿو ڇا هي ڳالهه سنڌ جو لکيل پڙهيل ۽ باشعور ماڻهو نه ٿو سمجهي جيڪي پنهنجي اکين سان اهي تصويرون ڏسن ٿا ۽ اهي ئي ساڳا ماڻهو انهيءَ تنظيم سان واڳيل جن مٿان بار بار دهشتگردي جا الزام مڙهيا وڃن ٿا پوءِ انهن خلاف آخر ڪارروايون ڪير ڪندو ان جي ڪري اسان جي سنڌ حڪومت کي پنهنجون اکيون پٽڻ گهرجن ائين نه ٿئي ته سنڌ جي امن پيار واري ڌرتيءَ تي ٻيهر وري رت وهائڻ جي جيڪا سازش ڪئي وڃي ٿي ان کي اهي دهشتگرد پنهنجون ڪارروايون ڪري رت ۾ ريٽو نه ڪري ڇڏين. ڇو ته جهڙي ريت خيبرپختون خواهه جي موجوده صوبائي حڪومت جيڪا پي ٽي آءِ جي جڙيل آهي ان جو سربراهه ميان عمران خان جنهن انداز سان اڳ چئي رهيو هو ته خيبر پختون خواهه مان دهشتگردي ختم ڪرائي آهي هاڻي ان کي به پنهنجون اکيون کولڻ گهرجن ۽ هڪٻئي پٺيان ٿيل ڌماڪن ۾ جيڪي ماڻهو شهيد ٿيا آهن انهن جي قاتلن کي وائکو ڪرڻ گهرجي ۽ خاص ڪري اصل قاتلن جا پيرا کڻڻ گهرجن ڇو ته جيڪي خودڪش حملو ڪري پاڻ کي اڏائي ڇڏيندا آهن انهن جي پويان اصل ٻيا هٿ لڪيل هوندا آهن ۽ خاص ڪري جيڪي اهڙا منصوبا جوڙيندا آهن انهن دهشتگردن جي نيٽ ورڪ تائين اسان جي ملڪ جي ڳجهن ادارن کي گهڻي ڀاڱي اڳواٽ ئي ڄاڻ هوندي آهي ته پوءِ آخر هي روز روز خودڪش حملا ڪري مسڪين شهرين جو پاڻي وانگر رت وهائيندڙ چند آڱرين تي ڳڻڻ جيترا دهشتگرد گرفتار ڇو نه ٿي رهيا آهن ۽ موجوده وفاقي حڪومت جو گهرو وزير چوڌري نثار ڪالهه 19 جنوري کان وٺي 20 جنوري تائين ميڊيا آڏو نه آيو آهي ۽ نه ئي سندس ڪو بيان جاري ٿيو آهي ڏک ته اهو به آهي ته قومي اسيمبلي جهڙي مقدس ايوان ۾ چوڌري نثار تقرير ڪندي چيو هو ته اسلام آباد جي لال مسجد واري مولانا عبدالعزيز مٿان ڪا به ايف آءِ آر داخل ٿيل ناهي ان کي ڇا جي لاءِ گرفتار ڪيو وڃي پوءِ انهيءَ قومي اسيمبلي اندر ايم ڪيو ايم جو ايم اين اي انهيءَ مولانا عزيز مٿان داخل ٻه ايف آءِ آرون ڪٿان کڻي آيو.

هن ڳالهه لکڻ جو مقصد اصل هي آهي ته جنهن ملڪ جو گهرو وزير اهڙي غلط ڳالهه ڪري ان ملڪ اندر آخر دهشتگردن جي پاڙ ڪير پٽيندو ڇا جتي وفاقي حڪومت جا وزير دهشتگردي ۾ ملوث ماڻهن جي مدد ڪندا هجن اتي انهن دهشتگردن کي ڪا سزا ملي سگهي ٿي. اسان کي اسلام جهڙو بهترين مذهب مليو آهي جنهن ۾ انسانيت جو درس مليل آهي هتي ته مسلمان مسلمان جو پاڻيءَ وانگر رت وهائي خبر ناهي ته ڪهڙي مذهب جي ڳالهه ڪري ٿو. آخر اهو ڏينهن ڪڏهن ايندو جڏهن اسان اسلام جي اصل نقش قدم تي هلنداسين ۽ هڪٻئي ۾ ڀائيچارو، محبت پيار امن قائم ڪنداسين شل اهڙو ڏينهن هن ملڪ اندر اچي جو ماڻهو ماڻهوءَ کي مارڻ بجاءِ مان ڏيڻ سکي نه ته هاڻي ته اسڪولن ۽ يونيورسٽين ۾ جيڪي خودڪش بمبار داخل ٿي حملا ڪري رهيا آهن ان مان ته اهڙو خوف ٿو لڳي ڪٿي اسان جي سڄي نوجوان نسل کي پنهنجي هٿ جا پاليل ختم نه ڪري ڇڏين.

 

مظهر خاصخيلي  03003779059

 

 

وري دهشتگرد نڪري پيا…

گذريل اڱاري ڏينهن پشاور ڪار خانون مارڪيٽ ويجهو جمرود روڊ تي خيبر ايجنسي جي علائقي وزير ڍنڍ ۾ خاصه دار فورس جي گاڏي ويجهو آپگهاتي بم حملي جي نتيجي ۾ 11 ڄڻا مارجي ويا ۽ ڪيترائي زخمي ٿي پيا ۽ ڪالهه وري چارسده ۾ باچا خان يونيورسٽي ۾ دهشتگردن جي حملي ۾ گهٽ ۾ گهٽ 23 ماڻهو شهيد ٿي ويا آهن جڏهن ته ڪيترائي ڳڻتي جوڳي حالت ۾ مختلف اسپتالن ۾ داخل آهن، اڱاري ڏينهن ٿيل خودڪش حملي بابت خيبر ايجنسي جي اسسٽنٽ پوليٽيڪل تحصيلدار عصمت الله موجب ڌماڪو آپگهاتي هو جنهن ۾ خاصه دار فورس جي اسسٽنٽ لائين مين آفيسر نواب شاهه جي گاڏي کي نشانو بڻايو ويو. ڌماڪي ۾ ٽرائبل يونين آف جرنلسٽس جو صدر محبوب شاهه پڻ مارجي ويو آهي. بم ڊسپوزل يونٽ موجب ڌماڪو آپگهاتي هو، جنهن ۾ 10 کان 14 ڪلوگرام ڌماڪيدار مادو استعمال ڪيو ويو هو. واقعي واري هنڌ تان حملو ڪندڙ جو مٿو ۽ ٽنگون مليون آهن جڏهن ته ڌماڪي جي حوالي سان وڌيڪ شاهديون گڏ ڪيون پيون وڃن. ڌماڪي کان پوءِ سيڪيورٽي فورسز علائقي تي ڪڙو چاڙهي سرچ آپريشن شروع ڪري ڇڏيو آهي جڏهن ته جمرود ۽ پشاور جي سمورن اسپتالن ايمرجنسي لڳائي وئي آهي. زخمين کي جمرود ۽ حيات آباد ميڊيڪل ڪمپليڪس پشاور منتقل ڪيو ويو آهي. جتي ڪيترن ئي زخمين جي حالت ڳڻتي جوڳي ٻڌائي پئي وڃي جنهن سبب مارجي ويل ماڻهن جي انگ ۾ اضافي جو خدشو پڻ ظاهر ڪيو ويو آهي. ڌماڪي ۾ ڪيترن ئي گاڏين موٽر سائيڪلن ۽ دڪانن کي نقصان پهتو آهي.

باچا خان يونيورسٽي ۾ ٿيل حملي ۾ استادن، شاگردن سميت ماڻهو شهيد ڪيا ويا آهن، حڪمرانن جي اک کلڻ جو قت خبر ناهي ڪڏهن ايندو دهشتگردن اڳ عوامي هنڌن کي نشانو بڻائيندا هئا پر هاڻي انهن جو هٿ تعليمي ادارن تائين به پهتل آهن، ان ڪري حڪومت کي هر روز آپريشن کي تيز ڪرڻ جي فيصلي بجاءِ هڪ دفعو آخري تيز آپريشن ڪري هن لعنت مان عوام جي جان کي آجو ڪرائڻ گهرجي جيڪا وقت جي اهم ضرورت آهي.

 

سعودي عرب تڪرار،ايران فوڪل پرسن مقرر ڪرڻ تي راضي، سعودي عرب کي به درخواست ڪئي ويندي: نوازشريف

تهران (م.ڊ) وزيراعظم نوازشريف ۽ ايراني صدر حسن روحاني جي ملاقات ۾ ايران،سعودي عرب ڇڪتاڻ ختم ڪرائڻ لاءِ ايران پنهنجو فوڪل پرسن مقرر ڪرڻ تي راضي ٿي ويو آهي.ان سلسلي ۾ سعودي عرب کي به پنهنجو فوڪل پرسن مقرر ڪرڻ جي درخواست ڪئي ويندي،جڏهن ته پاڪستان به پنهنجو فوڪل پرسن مقرر ڪندو.وزيراعظم نوازشريف تهران ۾ ميڊيا سان ڳالهائيندي چيو ته ايران تڪرار حل ڪرڻ لاءِ فوڪل پرسن مقرر ڪرڻ تي اتفاق ڪيو آهي.سندس چوڻ هو ته سعودي عرب کي به چيو ويندو ته هو پنهنجو فوڪل پرسن مقرر ڪري.سعودي عرب ۽ ايران تڪرار ختم ڪرائڻ لاءِ پاڪستاني ڪوششون ساراهه جوڳيون آهن.نوازشريف جو چوڻ هو ته اسان ڪنهن جي به چوڻ تي امن مشن شروع ناهي ڪيو اهو اسان جو پنهنجو فيصلو آهي.نوازشريف وڌيڪ چيو ته پاڪستان ٻن اسلامي ملڪن ۾ ٺاهه لاءِ پنهنجو فرض نڀائي رهيو آهي.ٻنهي ملڪن ۾ تڪرار جو پرامن حل اسلامي ۽ مقدس فرض آهي.ٽياکڙي ڪردار نڀائن اسن لاءِ فخر جوڳو آهي.مان ٻنهي ملڪن جي دورن مان گهڻو مطمئن آهيان. ميڊيا سان ڳالهائڻ کان اڳ  وزيراعظم نوازشريف ۽ آرمي چيف جنرل راحيل شريف سعودي عرب کان ايران پهچي ويا،جتي هنن جو ايراني قيادت سان ملاقاتن وارو سلسلو هلي رهيو آهي.ذريعن مطابق وزيراعظم نوازشريف ۽ آرمي چيف جنرل راحيل شريف تهران ائيرپورٽ پهتا ته سندن ڀرپور آجيان ڪئي وئي،جنهن کانپوءِ وزيراعظم نوازشريف ۽ آرمي چيف جنرل راحيل شريف ايراني صدر حسن روحاني سان ملاقات لاءِ قصر صدارت پهتا،جتي ٻنهي اڳواڻن جي وچ ۾ ملاقات هلي رهي آهي.ملاقات ۾ آرمي چيف جنرل راحيل شريف،وزيراعظم نوازشريف جي خاص صلاحڪار طارق فاطمي ۽ ٻيون اختياريون به شامل آهن.

 

خيبر ايجنسي ۾ آپگهاتي بم ڌماڪو، 11 ڄڻا مارجي ويا، ڪيترائي زخمي

پشاور (اي پي پي) پشاور ڪار خانون مارڪيٽ ويجهو جمرود روڊ تي خيبر ايجنسي جي علائقي وزير ڍنڍ ۾ خاصه دار فورس جي گاڏي ويجهو آپگهاتي بم حملي جي نتيجي ۾ 11 ڄڻا مارجي ويا ۽ ڪيترائي زخمي ٿي پيا. خيبر ايجنسي جي اسسٽنٽ پوليٽيڪل تحصيلدار عصمت الله موجب ڌماڪو آپگهاتي هو جنهن ۾ خاصه دار فورس جي اسسٽنٽ لائين مين آفيسر نواب شاهه جي گاڏي کي نشانو بڻايو ويو. ڌماڪي ۾ ٽرائبل يونين آف جرنلسٽس جو صدر محبوب شاهه پڻ مارجي ويو آهي. بم ڊسپوزل يونٽ موجب ڌماڪو آپگهاتي هو، جنهن ۾ 10 کان 14 ڪلوگرام ڌماڪيدار مادو استعمال ڪيو ويو هو. واقعي واري هنڌ تان حملو ڪندڙ جو مٿو ۽ ٽنگون مليون آهن جڏهن ته ڌماڪي جي حوالي سان وڌيڪ شاهديون گڏ ڪيون پيون وڃن. ڌماڪي کان پوءِ سيڪيورٽي فورسز علائقي تي ڪڙو چاڙهي سرچ آپريشن شروع ڪري ڇڏيو آهي جڏهن ته جمرود ۽ پشاور جي سمورن اسپتالن ايمرجنسي لڳائي وئي آهي. زخمين کي جمرود ۽ حيات آباد ميڊيڪل ڪمپليڪس پشاور منتقل ڪيو ويو آهي. جتي ڪيترن ئي زخمين جي حالت ڳڻتي جوڳي ٻڌائي پئي وڃي جنهن سبب مارجي ويل ماڻهن جي انگ ۾ اضافي جو خدشو پڻ ظاهر ڪيو ويو آهي. ڌماڪي ۾ ڪيترن ئي گاڏين موٽر سائيڪلن ۽ دڪانن کي نقصان پهتو آهي.

 

سنڌ صوبي ۾ 53 مدرسن پاران شاگردن کي فوجي تربيت ڏيڻ جو انڪشاف

ڪراچي (اسٽاف رپورٽر) پوري سنڌ ۾ 53 اهڙا مدرسا موجو آهن،جيڪي شاگردن کي فوجي تربيت ڏئي رهيا آهن.وزيراعليٰ هائوس ڪراچي ۾ سنڌ جي وڏي وزير سيد قائم علي شاهه جي اڳواڻي ۾ صوبائي ايپيڪس ڪميٽي جو اجلاس ٿيو.اجلاس ۾ سنڌ جو گورنر ڊاڪٽر عشرت العباد،ڪور ڪمانڊر ڪراچي ليفٽيننٽ جنرل نويد مختيار،صوبائي گهرو وزير سهيل سيال،ناڻي وارو وزير مراد علي شاهه،آئي جي سنڌ غلام حيدر جمالي ۽ ٻيون اعليٰ اختياريون شامل هيون.اجلاس دوران صوبي ۾ نيشنل ايڪشن پلان تي عمل،ڪراچي آپريشن ۽ ڏوهارين جي خلاف عدالت ۾ ٻڌڻي هيٺ هلندڙ ڪيسن ۾ پراسيڪيوشن جي ڪارڪردگي کي بهتر ڪرڻ لاءِ کنيل قدمن تي تفصيلي خيالن جي ڏي وٺ ٿي.ڪميٽي کي وضاحت ڏيندي آئي جي سنڌ ٻڌايو ته هڪ مهيني جي دوران شهر جي مختلف علائقن ۾ ڪارروائين دوران 9هزار 562 پستول،996 شاٽ گن،391 ڪلاشنڪوف،20 ايل ايم جي ۽ 11 ايس ايم هٿ ڪيا ويا آهن. ان موقعي تي صوبي ۾ مدرسن جي حوالي سان رپورٽ به پيش ڪئي وئي،جنهن ۾ انڪشاف ڪيو ويو ته سنڌ ۾ 6711 مدرسن جي رجسٽريشن پوري ڪئي وئي آهي،جڏهن ته 937 مدرسا اڃان تائين رجسٽريشن ناهن ڪيا ويا ۽ 35 مدرسا شاگردن ي فوجي تربيت ڏيڻ ۾ ملوث آهن.رپورٽن مطابق اعليٰ سياسي ۽ فوجي قيادت پاران صوبي ۾ پابندي مڙهيل تنظيمن جي خلاف آپريشن کي وڌيڪ تيز ڪرڻ جو فيصلو ڪيو ويو.

 

آرمي چيف جي ايراني بچاءَ واري وزير سان ملاقات، دهشتگردي دنيا لاءِ خطرو آهي: راحيل شريف

راولپنڊي/ تهران (م.ڊ) پاڪستان جي آرمي چيف جنرل راحيل شريف ايران جي بچاءَ واري وزير حسين دهگان سان ملاقات ڪئي،جنهن دوران خطي جي صورتحال،علائقائي سلامتي جي معاملن تي خيالن جي ڏي وٺ ڪئي وئي،جڏهن ته سعودي بچاءَ واري زوير جيان آيران جي بچاءَ واري وزير آرمي چيف ۽ پاڪستاني عوام جا ٿورا مڃيا.پاڪ فوج جي عام رابطن واري شعبي آئي ايس پي آر مطابق ايراني بچاءَ واري وزير سان ملاقات ۾ آرمي چيف جو چوڻ هو ته دهشتگردي دنيا لاءِ خطرو آهي، پاڪستاني عوام پنهنجي ايراني ڀائرن سان گهڻو چاهه رکي ٿو،پاڪستان ايران کي ويجهو پاڙيوارو ملڪ سمجهي ٿو،آئي ايس پي آر مطابق ايراني بچاءَ واري وزير علائقائي سلامتي جي مضبوطي جي ڪوششن تي آرمي چيف جنرل راحيل شريف ۽ پاڪستاني عوام جا ٿورا مڃيا.

 

واپارين سان پراڻو رشتو آهي،هڙتالن تي به حڪومت دانهن ناهي ڪئي: پرويز رشيد

اسلام آباد (بيورو) وفاقي سڌ سماءَ واري وزير پرويزرشيد چيو آهي ته واپاري برادري سان منهنجو پراڻو رشتو آهي،ان ڪري ڪاروباري ماڻهن جي هڙتالن تي حڪومت  دانهن ناهي ڪئي.سندس چوڻ هو ته ٽيڪس ڏيڻ سان واپارين کي نقصان ناهي ٿيندو پر قوم کي فائدو ٿيندو آهي،ٽيڪس نه ڏيندڙن جي خلاف دنيا ۾ رهڻ ڏکيو ٿي ويندو آهي.اسلام آباد ۾ هڪ تقريب سان خطاب ڪندي پرويز رشيد چيو ته ٽيڪس نظام واپارين جي سهولت لاءِ آهي ۽ ٽيڪس نيٽ وڌڻ سان پاڪستان کي فائدو ٿيندو.هن چيو ته ڪجهه ذميواريون اسان پوريون ڪري رهيا آهيون،ڪجهه واپارين کي پوريون ڪرڻيون آهن.

 

10فوجي عدالتون ڪجهه هفتن ۾ ڪم  شروع ڪنديون، سي پيڪ لاءِ 2 هزار اهلڪارن جي فورس تيار ڪئي ويندي: مولابخش چانڊيو

ڪراچي (اسٽاف رپورٽر) سنڌ ايپيڪس ڪميٽي جي اجلاس جي حوالي سان وضاحت ڏيندي صوبائي سڌ سماءُ واري صلاحڪار مولابخش چانڊيو چيو ته ايپيڪس ڪميٽي جي اجلاس ۾  ڪيترن ئي ڳالهين جو جائزو ورتو ويو،اجلاس سٺي ماحول ۾ ٿيو،سنڌ جا ويري اڄ مايوس ٿيا آهن،سندس چوڻ هو ته 10 فوجي عدالتون ڪجهه ئي هفتن ۾ ڪم ڪرڻ شروع ڪنديون.سي پيڪ لاءِ 2 هزار اهلڪارن جي فورس تيار ڪئي ويندي،ڪيس فوجي عدالتن ۾ موڪليا ويا آهن،جڏهن ته ٽن ڪيسن تي ڪم پورو ڪيو ويو آهي،ڪراچي ۾ ڏوهن جي شرح ۾ گهڻي حد تائين گهٽتائي آئي آهي،شاهدن جي تحفظ لاءِ سيف هائوس بڻايا ويندا،روڳو ڏوهه ئي نه پر پٺڀرائي ڪندڙن کي به نه ڇڏيو ويندو.

 

شورڪوٽ۾ شگر مل جو بوائلر ڌماڪي سان ڦاٽي پيو، 8 مزدور اجل جو شڪار

جهنگ (اي پي پي) پنجاب جي شورڪوٽ شهر ۾ ڪينٽومينٽ روڊ تي واقع شگر مل ۾ بوائلر ڦاٽڻ سبب 8 مزدور اجل جو شڪار ۽ 20 زخمي ٿي پيا. ريسڪيو ٽيمن موجب بوائلر ۾ ڌماڪو ان وقت ٿيو جڏهن مزدور ان کي صاف ڪري هلائڻ ۾ مصروف هئا. ڌماڪي ۾ 8 مزدورن جي مارجي وڃڻ جي تصديق ٿي وئي آهي. جڏهن ته سڙي زخمي ٿيل 20 مزدورن کي طبي امداد لاءِ اسپتال منتقل ڪيو ويو آهي. اسپتال ذريعن موجب زخمين ۾ وڌيڪ مزدور ڳڻتي جوڳي حالت ۾ آهن جن جو 70 سيڪڙو جسم سڙي ويو آهي.پنجاب جي وڏي وزير ميان محمد شهباز شريف شورڪوٽ ۾ شگر فيڪٽري ۾ بوائلر ڦاٽڻ واري واقعي تي افسوس جو اظهار ڪندي فوت ٿي ويل مزدورن جي ڏکويل ڪٽنبن سان تعزيت ڪئي آهي. جاري بيان ۾ وڏي وزير بوائلر ڦاٽڻ واري واقعي تي افسوس جو اظهار ڪندي ڌماڪي ۾ فوت ۽ زخم ٿي ويل مزدورن جي ڪٽنبن سان همدردي جو اظهار ڪيو. جڏهن ته وڏي وزير لاڳاپيل عملدارن کي ڌماڪي بابت وڌيڪ جاچ ڪرڻ جي هدايت ڪئي آهي.

سنڌ اسيمبليءَ ۾ لوڪل گورنمينٽ ايڪٽ 2013ع ۾ ترميم جو بل منظور، مخالف ڌر جو احتجاج 

ڪراچي (اسٽاف رپورٽر) سنڌ اسيمبليءَ ۾ لوڪل گورنمينٽ ايڪٽ 2013ع ۾ ترميم جو بل منظور ڪيو ويو آهي. جڏهن ته مخالف ڌر طرفان هنگامو ڪري ايجنڊا جون ڪاپيون ڦاڙيون ويون، جڏهن ته اسپيڪر اجلاس جمعي تائين ملتوي ڪري ڇڏيو. سنڌ اسيمبليءَ جو اجلاس اسپيڪر آغا سراج دراني جي صدارت هيٺ ٿيو. سنڌ اسيمبليءَ جي اجلاس دوران وي آءِ پي پروٽوڪول ڪلچر خلاف ٺهراءُ منظوري ڪيو ويو. ٺهراءَ جي متن ۾ چيو ويو ته وي آءِ پي ڪلچر معاشري جي بدقسمتي آهي، جنهن کي ختم ڪيو وڃي. اجلاس ۾ سينئر صوبائي وزير نثار احمد کهڙي طرفان لوڪل گورنمينٽ ايڪٽ 2013ع ۾ ترميم جو بل پيش ڪرڻ جي ڪوشش ڪئي وئي. نثار کهڙي جي بل پيش ڪرڻ دوران مخالف ڌر جي ميمبرن هنگامو ڪيو ۽ ايجنڊا جون ڪاپيون پڻ ڦاڙي ڇڏيون. مخالف ڌر جي گوڙ سبب ايوان مڇي مارڪيٽ ۾ تبديل ٿي ويو، جڏهن ته حڪومت هنگامي باوجود لوڪل گورنمينٽ ايڪٽ 2013ع ۾ ترميم جو بل اڪثريت راءِ سان منظور ڪرائي ورتو. بل جي متن تحت ميئر، ڊپٽي ميئر، چيئرمين، وائس چيئرمين ۽ مخصوص سيٽن تي چونڊ هٿ مٿي کڻي ڪرائي ويندي. آغا سراج دراني مخالف ڌر جي ميمبرن تي تنقيد ڪندي چيو ته کين ايوان ۾ دوا کائي اچڻ گهرجي. هن صحت واري وزير کي مشورو ڏنو ته هو مخالف ڌر جي ميمبرن لاءِ ڪا دوا تجويز ڪري. ايوان ۾ گوڙ کانپوءِ اسپيڪر آغا سراج دراني ڪارروائي جمعي تائين ملتوي ڪري ڇڏي.