تازيون خبرون

Daily Archives: January 18, 2016

گهڻيون ئي اداڪارائون منهنجي اسٽائلش هجڻ تي ساڙ ڪنديون آهن: سونم ڪپور

ممبئي (شوبز نيوز) بالي ووڊ جي اداڪاره سونم ڪپور چيو آهي ته اداڪارائون منهنجي فيشن ٽرينڊ قائم ڪرڻ تي حسد ۾ اچي وائڙيون ٿي وينديون آهن، ڇو ته مون کي اسٽائلش اداڪاره چيو ويندو آهي. هڪ ڀارتي فلم اخبار جي سالياني ورق جي لانچ جي موقعي تي انٽرويو ۾ سونم چيو ته هڪ ڀيري هڪ وڏي اداڪاره جنهن جو نالو نه وٺنديس، باقاعده مون کي شڪايت ڪئي ته منهنجي اسٽائلش هجڻ سبب کيس پنهنجو پاڻ کي اسٽائلش بڻائڻ لاءِ هڪ اسٽائلسٽ کي وڌيڪ پيسا ڏيڻا پيا. جڏهن ته مان ان لاءِ ڪنهن اسٽائلسٽ کان ڪڏهن به مدد ناهي ورتي. سونم ڪپور ٻڌايو ته مان پنهنجي اسٽائل جي پاڻ چونڊ ڪندي آهيان يا پوءِ منهنجي ڀيڻ منهنجي مدد ڪندي آهي.

 

هدايتڪاري جو تجربو به ڪامياب رهيو: نور

لاهور (شوبز نيوز) پاڪستاني فلم اسٽار نور جو اداڪاري سان گڏوگڏ ڊائريڪشن جو تجربو پڻ ڪامياب رهيو۽ هوءَ ٻيهر به ڊائريڪشن جو ارادو رکي ٿي. نور هدايتڪاره طور پنهنجي نئين فلم ”عشق پازيٽو“ مڪمل ڪري ورتي اهي. هن چيو ته هوءَ وڌيڪ فلمون ڊائريڪٽ ڪرڻ جي خواهشمند آهي. نور چيو ته انسان جي اندر جيڪو به ٽيلنٽ هجي، ان کي موقعو ملڻ تي ان جو اظهار ڪرڻ گهرجي. سندس چوڻ هو ته مان فلم جي دنيا ۾ گهڻو ڪجهه ڪرڻ جو ارادو رکان ٿي. نور جون هلندڙ سال اداڪاره طور ”خدائي ذوالجلال“ جڏهن ته اداڪاره ۽ هدايتڪاره طور ”عشق پازيٽو“ نالي فلمون رليز ٿينديون.

 

ڪرس گيل ڪرڪيٽ جي تاريخ ۾ تيز ترين ففٽي ٺاهي ورتي

ميلبورين (اسپورٽس نيوز) ويسٽ انڊيز بيٽسمين ڪرس گيل تيز ترين ففٽي ٺاهي ورتي.تفصيل مطابق ڪرس بگ بيش ليگ ۾ ميلبرن ريني گيڊز پاران کيڏندي 12 بالن تي 50 اسڪور ڪيو.ايڊي ليڊ سٽرائيڪر خلاف کيڏندي ميچ جي چوٿين اور۾ اهڙو اعزاز پنهنجي نالي ڪيو.ڪرس گيل لاڳيتو 4 ڇڪا ۽ 6 ڇوڪا هڻي ففٽي پوري ڪئي.ياد رهي ته يوراج سنگهه 2007ع ۾ انگلينڊ خلاف ٽي ٽوئنٽي ورلڊ ڪپ ۾ 12 بالن تي تيز ترين اڌ سنچري ٺاهي هئي.

 

هڪ ميچ هارائڻ جي لاءِ 2 لک ڊالرن جي پيش ڪش ڪئي وئي:ٽينس اسٽار نواڪووچ

ميلبورين (اسپورٽس نيوز) اسپاٽ فڪسنگ جا معاملا ڪرڪيٽ کانپوءِ ٽينس تائين به پهچي ويا،سريبا سان تعلق رکندڙ عالمي نمبر ون نواڪووچ انڪشاف ڪيو آهي ته کيس هڪ ميچ هارائڻ جي لاءِ 2 لک ڊالرن جي پيش ڪش ڪئي وئي.پرڏيهي ميڊيا رپورٽ مطابق ٽيسن جي عالمي نمر ون نواڪووچ جو چوڻ آهي ته ڪيريئر جي شروعات ۾ پيٽرس برگ ۾ کيڏي ويندڙ هڪ ميچ دوران کيس به هڪ ميچ هارائڻ جي بدلي 2 لک ڊالرن جي پيش ڪش ڪئي وئي ۽ اهڙي پيش ڪش کي رد ڪري ڇڏيو.جوڪووچ جو چوڻ آهي ته 2007ع ۾ پيٽرس برگ ۾ ميچ دوران پهريون رائونڊ ۾ بُڪي وارن گڏ کيڏندڙ رانديگرن جي مدد سان مونکي ميچ فڪس جو چيو.سندس وڌيڪ چوڻ هو ته اوپري ماڻهون جي ايتري وڏي آفر مونکي پريشان ڪري ڇڏيو هو، جڏهن ته مان اهڙين سرگرمين ۾ ملوث ٿيڻ نه پئي چاهيو.جڏهن ڪجهه ماڻهن اهڙي پيش ڪش کي مون لاءِ هڪ بهترين موقعو چيو، پر مان رد ڪري ڇڏيو.10 ڀيرا گرينڊ سليم چيئمپن رهندڙ ٽينس اسٽار جو چوڻ آهي ته رانديگرن تي شرطون رکندڙ ڪيتريون ئي ڪمپنيون پنهنجي ويب سائيٽ تي مختلف نالن سان، رانديگرن جي تصويرن سان لڳائي رکيون آهن.

 

غربت جو لفظ ڪڏهن مٽجندو…?: اصغر ملاح (دادو)

سنڌ ڌرتي جي تاريخ هزارين سال پراڻي آهي صوفين جي ڌرتي جنهن ۾ڪيتران ئي مهان هستين جنم ورتو آهي سنڌ بزرگن اوليائن ۽ امن پسند انسانن جو ديس آهي پيرن فقيرن اوليائن جي نگري جي ننڍن وڏن شهرن ڳوٺن ۾ الله پاڪ جي ولين، برزگن شاهه عبداللطيف رحمت الله عليہ سچل سرمست رحمت الله عليہ قلندر لعل شهباز رحمت الله عليہ ۽ ٻين بزرگن جا روضا موجود آهن جيڪي بزرگ انسان ذات جي ڀلائي خدمت جو سبق ڏيندا رهيا آهن تاريخ ٻڌائي ٿي ته اها سنڌ جي خوشحالي ۽ ساوڪ ئي هئي جيڪا دنيا جي غاصبن جو سنڌ مٿان چڙهائي ڪرڻ جو سبب بڻي پنج هزار سال اڳ سنڌ جهڙي ترقي جو مکيه سبب گهريلو صنعت هئي سنڌ جي ريشمي ڪپڙن جو نعم البدل دنيا ۾ ڪو نه هوسنڌي ماڻهن وٽ تعليم تجارت صنعت ۽ هنر هيو سنڌ جي تباهي تي دنيا وارا حيران آهن پر اڄ اها سنڌ ئي آهي جتي غربت ۽ بيروزگاري وڌي وئي آهي تيزيءَ سان غربت جي شرح ۾ اضافو ٿي رهيو  آهي هر سال سنڌ ۾ آبادي ۾ وڌيڪ اضافو ٿي رهيو آهي آبادي ۾اضافو بيروزگاري، تعليم صحت صفائي، جي مسئلن کي جنم ڏيندو آهي وقت جا حڪمران ان ڳالهه کان چڱي ريت واقف آهن ملڪ جي 45 سيڪڙو عوام جي آبادي بنيادي سهولتن ۽ 45 سيڪڙو آبادي پيڻ جي صاف پاڻي کان محروم آهي سنڌ جي مختلف علائقن جي عوام جون زندگيون اڄ به صديون پٺتي نظر اچن ٿيون بيروزگاري اڄ جي  نوجوان کي  پريشان  ڪري ڇڏيو آهي وڌندڙ  بک بدحالي  بيروزگاري جي ڪري  سنڌ ۾ خودڪوشين  جي واقعن  ۾ وڌا اچي وئي آهي ٺٽي جو رهواسي  پورهيت اصغر گندرو بيروزگاري کان مايوس ٿي پاڻ کي باهه ڏئي ساڙي ڇڏيو،نوجوان کي  نازڪ حالت ۾ سول اسپتال مڪلي آندو  ويو  جتي سهولتن  جي  اڻاٺ ۽ برنس  وارڊ نه هجڻ  ڪري  کيس ڪراچي منتقل  ڪرڻ  جو  مشورو  ڏنو ويو جنهن  بعد  نوجوان  کي ڪراچي  اسپتال  منتقل ڪيو ويو  آهي. جتي  سندس  حالت  خطري هيٺ ٻڌائي  پئي  وڃي ڊاڪٽرن  موجب نوجوان  جو 90  سيڪڙو  جسم  سڙي  ويو  آهي سندس حالت ڳڻتي جوڳي آهي.

ذهني  دٻاءِ جو  شڪار ٿيڻ بعد  اچر واري رات  ديرسان  پنهنجي گهر  ۾ پاڻ مٿان  ڊيزل هاري اوچتو باهه ڏئي خودڪشي ڪرڻ جي ڪوشش ڪئي سندس  ٻڍڙي ماءَ پنهنجي پچڙي  کي بچائيندي  ٻئي  هٿ  ۽  ٻانهن سڙي زخمي  ٿيڻ ڪري  گهر  ۾  بستري  پيل  آهي سنڌ اندر ڪنهن پورهيت پاران بيروزگاري ۽ غربت سبب پاڻ ساڙڻ وارو هي ڪو پهريون واقعو نه آهي، هر نئين ڏينهن ڪنهن نه ڪنهن شهر مان غربت ۽ بيروزگاري سبب مايوس ٿيل ڪو نه ڪو ماڻهو پنهنجي زندگي جو ڏيئو اجهائي ٿو. اها صورتحال سنڌ ۾ بدترين غربت، بيروزگاري ۽ حڪمرانن جي بي حسي جو ثبوت آهي پورهيت اصغر گندرو  پاڻ ساڙڻ وارو انتهائي قدم کڻي حڪمرانن جي  عوام سان لاتعلقي، ڪرپشن، پنهنجا نوازي ۽ انصاف نه ملڻ خلاف احتجاج رڪارڊ ڪرايو آهي محب  علي گندرو ٻڌايو  ته  اصغر  درزڪو  ڪم  ڪندو  هو  پر  گذريل ٻن مهينن کان  بيروزگار  ويٺل هو  ۽ سخت  ذهني  دٻاءَ  جو  شڪار  هو  هن  چيو  ته   اسان نوڪري  لاءَ صحت  ۽  تعليم کاتي ۾ درخواستون  ڏنيون  پر  ڪٿي به  اسان  کي  پٽيوالي  به نه  ملي پورهيت  اصغر گندرو جو اهو انتهائي قدم صحيح هو يا غلط ان بحث ۾ پوڻ بدران اصل سوچڻ جي ڳالهه اها آهي ته آخر اهي سبب ڪهڙا آهن، جن جي ڪري هن ملڪ جا ماڻهو خاص طور سنڌ جا ماڻهو ايتري مايوسي جي انتها تي پهچي پنهنجي حياتي جو ڏيئو پاڻ وسائي رهيا آهن.

ڪجهه مهينا اڳ ڪيڊياري جو هڪ نوجوان جيڪو نوڪري وٺڻ لاءِ اسلام آباد پهتو پر جڏهن هن سان ڪير ملڻ لاءِ به تيار نه ٿيو، اعليٰ حڪومتي عهديدارن ۽ اسيمبلي ميمبرن طرفان هن جي درخواست وٺڻ ته پري رهيو پر جڏهن هو انهن سان ملي ئي نه سگهيو ۽ لڳاتار اسيمبلي توڙي آفيسن جا چڪر ڪاٽيندو رهيو ته اُن وقت هُن انتهائي قدم کڻندي پاڻ ساڙي ڇڏيو هو. ان کان ڪجهه مهينا اڳ نوابشاهه ۾ پڻ هڪ ڳوٺاڻي پاڻ کي باهه ڏني هئي، جنهن جو چوڻ هو ته هڪ بااثر سندس گهر تي قبضو ڪيو آهي. بدين جي هڪ پورهيت  عبدالرزاق غربت، پگهارون بند هجڻ ۽ بيروزگاري کان مايوس ٿي پاڻ کي باهه ڏئي ساڙي ڇڏيوهو اهڙن واقعين  سبب سنڌ جو هر حساس ۽ باشعور ماڻهو ڏکايل آهي هن وقت پورهيت اصغر گندرو جي حالت انتهائي خراب آهي ۽ سڀ کان پهرين اوليت هن جي زندگي بچائڻ لاءِ هجڻ گهرجي. زندگي جيڪا رب سائين جي هٿ ۾ آهي پر هيلا وسيلا هلائڻ هر ڪنهن جو حق آهي سماج اندر اهڙا لاڙا ۽ صورتحال تڏهن ٿي پيدا ٿئي.  جڏهن ماڻهن کي ڪٿان به انصاف نٿو ملي ۽ ماڻهن جي مسئلن جو ڪو حل نه ٿو نڪري جنهن ڪري متاثر ماڻهو انتهائي مايوس ٿي پاڻ کي مارڻ جهڙو انتهائي قدم کڻڻ تي مجبور ٿي پون ٿا. پنهنجي ملڪ جي شهرين کي روزگار، تحفظ، امن ۽ بنيادي سهولتون ڏيڻ حڪمرانن جي ذميواري آهي، اهو هر شهريءَ جو حق آهي ته هن کي روزگار، تعليم ۽ صحت جون سهولتون ڏنيون وڃن پر جڏهن اُهي سهولتون هڪ خواب بڻجي وڃن، هڪ اهڙو خواب، جيڪو آسمان جي ستارن کي به پري نظر ايندو هجي،

آسمان جي ستارن تائين پهچڻ شايد ممڪن هجي پر روزگار سٺي تعليم ۽ صحت جون سهولتون حاصل ڪرڻ شايد اُن کان به ڏکيو ٿي پوي  ته دلبرداشته ٿي وڃن ٿا جو پاڻ ساڙڻ جهڙو انتهائي قدم کڻن ٿا عوام احتجاج  ڪري دانهيو آهي ته هن وقت تائين جيترا به سرڪاري نوڪرين جا آرڊر نڪتا آهن انهن مان غريب تعليم يافته نوجوانن کي ڪيترو حصو مليو آهي ان جي ڄاڻ سڀني کي آهي چونڊيل نمائنده پنهنجا نواز پاليسي تحت پنهنجن تڪن ۾ من پسند ماڻهن جا جائز مسئلا بنا دير حل ڪن ٿا جيڪي چاپلوسي ۾ ماڻهو ماهر آهن اهي اڳئي آهن هڪ گهر ۾ پنج ڄڻا  سرڪاري نوڪرين جا مالڪ بڻيل آهن باقي بي پهچ عوام سالن کان نظر انداز ٿيل آهن غريب نوجوان سرڪاري نوڪرين کان محروم رهجي ويا آهن عوام دانهيو آهي اسان جڏهن تڪ جي ايم اين اي وٽ وڃون ٿا ته چون ٿا اسان وٽ وڏيرن کي وٺي اچو ته اسان جڏهن وڏيرن وٽ وڃون ٿا ۽ چوي ٿو ايم پي اي  وٽ وڃون ايم پي اي وٽ وڃون ٿا ته چوي ٿو ته ايم اين اي وٽ وڃون آخر اسان غريبن کي ٻڌايو ته اسان ڪنهن وٽ وڃون ڪنهن در دانهيون روزگار لاء جيڪڏهن ڪنهن وڏيري يا ايم پي يا ايم اين اي جي سفارش آهي ته بيروزگارن کي روزگار ملي ٿو جن غربت جي باوجود پنهنجي اولاد کي پڙهايوانهن جا نوجوان بي روزگار ويٺا آهن ۽ هنن جون عمر به وڏي ٿيندي ٿي وڃي خبر نه آهي ته عوام جو آواز سندن ڪنن تائين ڇونه ٿو پهچي اُن وقت ماڻهن جي قوت برداشت جواب ڏئي وڃي ٿي، اُهي حڪمران طبقن مان ايترا ته دلبرداشته ٿي وڃن ٿا جو پاڻ ساڙڻ جهڙو انتهائي قدم کڻن ٿا بيروزگاري سبب گلاب جي گل جيان ٽرندڙ نوجوان پنهنجي عمر جي ڪنهن حصي تائين پهچڻ کان اڳ ئي پنهنجي جسم مٿان تيل هاري يا ڳچي ۾ ڦندو وجهي پنهنجو انت آنڻي ڇڏي ٿو ۽ پوين کي آزمائشن ۾ وجهي هليو وڃي ٿوبيروزگار نوجوان  جي  درد  سمجهڻ وارو ڪو ليڊر ناهي. جيڪو سندن دردن  کي سمجهي کين پنهنجي  منزلن  طرف  روانو ڪري جيڪڏهن عوامي ۽ جمهوري حڪومت ۾ به عوام جا مسئلا حل  نه ٿين  ۽ ساڳيا هُجن  ته پوءَ جمهوري حڪومت چورائڻ  سان  ڇا  وقت  جي حڪومت  جون  سڀ  ذميواريون  پوريون ٿي وينديون

جيئن انصاف  لاءَ چيو ويندو آهي  ته عام  ماڻهو  کي نظر اچي  اهڙي ريت  لازمي آهي ته جمهوريت  به عوام  کي نظر اچي باقي عوام جي  هٿ ۾ ڇا آهي ڌرڻا هڻڻ ڳالهائڻ  لکڻ کان علاوه عوام ڇا ٿو  ڪري  سگهي. عوام کي چوندي  ڏٺو ويو آهي ته دنيا ۾ جنهن به سرڪار ڪڌا ڪم ڪيا آهن عوام کان جئيڻ جو حق کسي ماني جي ڳڀي لاءِ مجبور ڪرڻ جهڙا عمل ڪيا آهن ۽ حڪمران پنهنجي  ملڪ جي حفاظت ۾ ناڪام ويا آهن  انهن کي تاريخ  چڱي نالي سان ياد نه رکندي آهي جڏهن ته ملڪ ۽ عوام لاءِ چڱا عمل ڪندڙ سرڪار يا شخصيتن يا ڌرين جن  پنهنجي ملڪ جي خدمت  ۽ عوام جي ڀلائي بهتري  عوام جي حقن  جي حفاظت ڪندڙن جا  وڏا وڏا مجسما دنيا جي مختلف ملڪن ۾ لڳايا ويندا رهيا آهن  ۽ کين تاريخ  چڱي نالي سان ياد رکندي آهي سنڌ جا لکين بيروزگار ۽ ڪروڙين غربت سٽيل ماڻهو اميد ڪن ٿا ته حڪمران سندن مسئلن جو نوٽيس وٺندا  ۽ کين بهتر تعليم، روزگار ۽ بنيادي سهولتن سميت انصاف جي فوري فراهمي لاءِ اثرائتا عملي قدم کڻندا.  ضرورت ان ڳالهه جي آهي ته آئنده اهڙي ڪنهن به واقعي کي روڪڻ لاءِ پورهيتن ۽ محنت ڪش طبقن کي پنهنجا حق ڏنا وڃن ته جيئن وري ڪو ٻيو اهڙو واقعو پيش نه اچي.

Email: mallah asghar @ yahoo . com

 

 

ماکي کان به مٺڙو سن وارو سائين: جاني مورائي

انھن انسانن جا نالا قومن جي تاريخ ۾ وڏي عزت ۽ احترام سان لکيا ويندا آھن جن جي سوچ ۽ عمل جو واسطو مادر وطن ۽ عالم انسان ذات جي بقا ۽ ڀلائي لاءِ ھوندو آھي اھڙا ماڻھو ئي تاريخ ۾ امر ٿيندا آھن سنڌ جي تاريخ جا ورق جا ورائيندي اسان کي ڪيترن ئي ھستين جي سٿ ۾ ھڪ نالو مٿانھون نظر ايندو اھو انسان جيڪو ھميشه ھن ڌرتي جو درد اندر ۾ سمائي ڌارين سان وڙھندو رھيو ۽ پنھنجي سڄي زندگي ۾ ڪنھن به جابر اڳيان آڻ نه مڃي اھو اڏول انسان جنھن جي ڏنل فڪر نظري کي اڄ دنيا جا ڪيترا ئي ڏاھا ماڻھو تسليم ڪري چڪا آھن اھو ھن ديس جو مھان رھبر محترم سائين جي ايم سيد ھو سائين جي ايم سيد 17 جنوري 1904 بمطابق 28 شوال سن 1321ع 11.30 منٽ بجي آچر جي رات پنھنجي اباڻي ڳوٺ سن ضلعو دادو ۾ جنم ورتو سيد جي خاندان بابت چيو وڃي ٿو ته امير تيمور لنگ جڏھن ھنڌستان تي ڪاھ ڪئي ته ان جي فوج ۾ سيد امير علي شاھ نالي ھڪ سپاھي شامل ھو جنھن جو ھڪ فرزند سيد حيدر شاھ ھالن جي شھر ۾ اچي رھائيش پزير ٿيو ان کان پوءِ سندس خاندان ھالن مان لڏي وڃي مٽيارين ۾ ويٺا انھي ساڳي خاندان مان 1530ع ۾ سيد حيدر شاھ سنائي 1220ع شاھ عبدالڪريم 1752ع ۾ شاھ عبدالطيف ڀٽائي ۽ ٻيا ڪيترا ئي نالي وارا بزرگ پيدا ٿيا ان خاندان مان ھڪ فرزند سيد ميان شاھ مٽياري ۾ لڏي سن شھر ۾ اچي رھيو جتي سائين جي ايم سيد جي 14ھين پشت ۾ سنڌ جي ھڪ محب وطن سپاھي مخدوم بلاول جو دوست حيدر شاھ سنائي جو مزار آھي سائين جي ايم سيد اڃان ٻالڪ پڻ ۾ ھئا ته سندن والد صاحب کي شھيد ڪيو ويو وري سال کان پوءِ سندن وڏي ڀاءِ احمد شاھ به وفات ڪئي ان کان پوءِ تقريبن 3 سالن جي ننڍڙي عمر ۾ گھر جو سڄو بار ھن اڪيلي معصوم تي پيو سائين ابتدائي تعليم سنڌي 5 درجا ماستر ڌرم داس ماستر ريوا چند ۽ ماستر وسڻ مل وٽ پڙھا عربي ۽ فارسي تعليم مولوي محمد ھاشم سنائي مولوي محمد صالح سيال ۽ مولوي اللھ بخش دادو واري وٽ حاصل ڪيائين انگريزي تعليم مولوي ڊاڪٽر حامد علي ھالاڻي واري وٽ حاصل ڪيائين سيد اڃان 14 سالن جو ھو ته قوم ۽ ڌرتي جي عشق جي شروعات ٿي 19 فيبروي 1919 تي حڪيم معين دين کنياري واري جي دوستي ۾ اچي پاڻ لاڪاڻو خلافت ڪانفرنس ۾ شامل ٿيو ان کان پوءِ سيد پنھنجي ڳوٺ سن ۾ ھڪ وڏي خلافت ڪانفرنس ڪوٺائي جنھن ۾ حڪيم فتح محمد سيواھاڻي، عبدالمجيد سنڌي ڊاڪٽر شيخ نور محمد ، شيخ عبدالعزيز ، مولوي محمد سليمان ۽ ٻيا سنڌ جا جليل القدر اڳواڻ شامل ٿيا سائين جي ايم سيد مختلف وقتن ۽ مختلف پليٽ فارم تان قوم ۽ ڌرتي جي حقن لاءِ جدوجھد ڪندو رھيو سائين جي ايم سيد کاندي جا ڪپڙا وڏي شوق سان پائيندو ھو ان ڪري سن ۾ کاندي جي ٺاھڻ جو ڪارخانو کوليائين سنڌ ۾ شراب تي پابندي وجھڻ لاءِ ڪانگريسي ليڊرن سان گڏجي جدوجھد ڪندو رھيو 1938ع ۾ پاڻ پھريون ڀيرو سنڌ اسيمبلي جو ميمبر چونڊيو ويو پاڻ قلندر لعل شھباز جي گادي نشين ميان ولي محمد شاھ کي شڪست ڏنائين 1940ع ۾ وزير تعليم ٿيو سنڌ اسميبلي ۾ وڏي جدوجھد سان پاڪستان جو ٺھراءِ پاس ڪرائيان ان ٺھراھ ۾ سنڌ ۽ ٻين پاڪستان ۾ شامل ٿيندڙ قومن کي آزاد ۽ خود مختيار رياستن قائم ڪرڻ جو واعدو ڪيو ھو پاڻ سنڌ يونيورسٽي قائم ڪرڻ لاءِ ڪاميٽي مقرر ڪيائين سڄي ۾ سنڌ ۾ تعليم جو قانون لاڳو ڪيائين سائين 1941ع ۾ آل انڊيا مسلم ليگ جو مرڪزي ڪائونسل جو ميمبر ٿيو 1943 ع ۾ کيس مسلم ليگ سنڌ جو صدر چونڊيو ويو 1946ع ۾ جناح ۽ مسلم ليگ جي قومن سان ڪيل واعدن واري ٺاھ 1940ع تان ڦري وڃڻ جي ڪري مسلم ليگ کان الڳ ٿيو ان کان پوءِ مسلسل سائين جي ايم سيد کي مختلف ھنڌن ۽ مختلف وقتن تي گرفتار ۽ آزاد ڪيو ويو اھڙي طرح سائين پھرئين 1948ع ۾ ڪراچي جي مسئلي تي 1954ع ۾ ون يونٽ جي مخالف جي ڪري ايوب شاھ مارشلا جي لڳ ڀڳ جي سموري دور ۾ ڀٽي حڪومت جي سڄي دور جنرل ضياءِ توڙي بينظير جي حڪومت جي ٻنھي دورن ۾ ۽ نواز شريف جي حڪومت جي دور ۾ مسلسل 33 سال قيد ۽ نظر بند رھيو تان جو وفات ڪيائين سائين جي ايم سيد مسلم ليگ ڪانگريس خاڪ سار تحريڪ نيشنل عوامي پارٽي پيپلز پارٽي خلافت تحريڪ ھاري پارٽي اين ٽي ون يونٽ اتحاد پارٽي سنڌ متحده محاذ بزم صوفياءِ سنڌ سنڌ قومي اتحاد ۽ جيئي سنڌ تحريڪ جي پليٽ فارمن تان پنھنجي سياسي سماجي علمي ۽ ادبي سرگرمين کي جاري رکيو پاڻ سنڌي انگريزي فارسي عربي زبانن تي دسترس رکندو ھو سندس ذاتي لائيبري ۾ ناياب ڪتابن جو ھڪ وڏو زخيرو اڄ به موجود آھي سائين جا سياست سماجيات ادب تاريخ ڪلچر ۽ سنڌ جي آزادي تي اٽڪل 60 کن ڪتاب لکيل آھن اھو ماکي کان مٺو عظيم رھبر 25 اپريل 1995ع جي صبح جو سوير وڏي عصر محل جناح اسپتال ڪراچي زير علاج ھوندي پنھنجي حقيقي مالڪ سان مليو ھو ھن سڄي قوم لاءِ ھڪ خوبصورت ۽ حسين خواب ڇڏي ويو آھي شل سندس خواب شخصي سياست کان نڪري ڪا حقيقي ساڀيان ماڻي

 

 

ايران تي سالن کان لاڳو اقتصادي پابندين جو خاتمو…..

آمريڪا، گڏيل قومن ۽ يورپي يونين ايران تي سالن کان لاڳو ڪيل اقتصادي پابنديون ختم ڪري ڇڏيون، آمريڪي صدر باراڪ اوباما پاران ايگزيڪٽو آرڊر جاري ڪيو ويو آهي، . عالمي ائٽمي توانائي ايجنسي موجب ايران ائٽمي معاهدي تحت ائٽمي سرگرميون ختم ڪري ڇڏيون آهن، جنهن بعد ايران تي لاڳو اقتصادي پابنديون ختم ڪيون ويون آهن. عالمي ائٽمي توانائي ايجنسي پنهنجي رپورٽ گورننگ بورڊ ۽ سلامتي ڪائونسل ڏانهن اماڻي ڇڏي آهي، جنهن ۾ ٻڌايو ويو آهي ته ايران معاهدي جي پاسداري ڪري رهيو آهي، جنهن بعد ايران مٿان لاڳو پابنديون ختم ڪرڻ جو اعلان ڪيو ويو آهي. يورپي يونين ۽ آمريڪي پرڏيهي وزير جان ڪيري به ايران مٿان اقتصادي پابنديون ختم ڪرڻ جي تصديق ڪندي چيو آهي ته هاڻي ايران لاءِ عالمي واپار جا دروازا کلي ويا آهن. ايران جي پرڏيهي وزير جواد ظريف ويانا ۾ پريس ڪانفرنس ڪندي فيصلي جي آجيان ڪئي ۽ چيو ته هـُو دنيا تي ثابت ڪندا ته مسئلا پابندين، دٻاءَ ۽ ڌمڪين سان نه پر احترام ۽ ڳالهين ذريعي حل ٿيندا آهن.پابنديون ختم ٿيڻ بعد ايران هڪ خوشگوار ماحول ۾ سڄي دنيا سان اقتصادي سهڪار ۽ اربين ڊالرز جي ماليت جي منجمند اثاثا حاصل ڪرڻ سان گڏ عالمي منڊي ۾ تيل به وڪرو ڪري سگهندو.

ٻئي طرف ايران آمريڪا ۽ ايران جي ٻٽي شهريت رکندڙ چئن قيدين کي آزاد ڪرڻ جو اعلان ڪيو آهي، جڏهن ته انهن قيدين جي سڃاڻپ ظاهر نه ڪئي وئي آهي پر اطلاع آهن ته انهن ۾ واشنگٽن پوسٽ جو صحافي جيسن رضايان به شامل آهي. ياد رهي ته گذريل سال جولاءِ ۾ عالمي طاقتن ۽ ايران وچ ۾ تاريخي ايٽمي ٺاهه ٿيو هو، جڏهن ته آمريڪي ڪانگريس ۽ اسرائيل پاران ٺاهه تي ڇتي تنقيد ڪئي وئي هئي. ايراني حڪومت جي ذريعن جو چوڻ آهي ته ايران تان اڃا واپاري پابنديون باقاعده طور تي نه هٽايون ويون آهن، تنهن هوندي به آمريڪا جي ٻن وڏين ملٽي نيشنل ڪمپنين جا نمائنده ايران پهچي رهيا آهن، ڇوته پابنديون ختم ٿيڻ بعد ايران عالمي مارڪيٽ ۾ پنهنجو تيل برآمد ڪندو، تهران جو چوڻ آهي ته ايران ڪجهه هفتن ۾ 5 لک بيرل ٽن تيل روزانو برآمد ڪري سگهي ٿو. ايران تان عالمي پابنديون ختم ٿيڻ بعد ايران جا روڪيل 100 ارب ڊالر کيس واپس جاري ڪيا ويندا، جنهن سان ايران ۾ وڌيڪ خوشحالي ۽ ترقي ايندي، ايران عالمي مارڪيٽ ۾ پنهنجو تيل به وڪرو ڪري سگهندو، جنهن سان قيمتن تي گهٽتائي جو به امڪان وڌندو. عالمي ائٽمي توانائي ايجنسي ان جي تصديق ڪندي چيو آهي ته ايران عالمي طاقتن سان ڪيل ائٽمي معاهدي جي پاسداري ڪئي آهي، آءِ اي اي اي جي سربراهه يوڪيا امانو ويانا ۾ صحافين سان ڳالهائيندي ٻڌايو ته ايران پنهنجي واعدي موجب ائٽمي پروگرام کي محدود رکيو آهي، اهڙي رپورٽ اچڻ بعد آمريڪي صدر ايران تان پابندي هٽائڻ جو ايگزيڪٽو آرڊر جاري ڪيو.

 

سعودي عملدارن سان ملاقاتن جا تفصيل به پارليامينٽ کي ڏنا وڃن: مولابخش چانڊيو

ڪراچي (اسٽاف رپورٽر)سنڌ جي وڏي وزير جي اطلاعات کاتي بابت  صلاحڪار مولابخش چانڊيو پراسيڪيوشن بل جي حوالي سان تنقيد تي پنهنجو ردعمل ظاهر ڪندي چيو ته پراسيڪيوشن بل سان متعلق غلط تاثر پيدا ڪري اجايو واويلا ڪئي پئي وڃي، جڏهن ته بل جو مقصد پراسيڪيوشن جي عمل کي مضبوط ڪرڻ ۽ پراسيڪيوٽر کي بااختيار بڻائڻ آهي. اهڙن خيالن جو اظهار هن اڄ پنهنجي جاري ڪيل بيان ۾ ڪيو.اطلاعات واري صوبائي صلاحڪار چيو ته پراسيڪيوشن بل ۾ ڪو به اهڙو نقطو شامل ناهي جنهن ۾ عدليه جي اختيارن ۾ مداخلت ڪئي وئي هجي، ڇو ته ڪنهن به مقدمي ۾ حتمي فيصلي جو اختيار عدليه کي ئي حاصل هوندو. هن چيو ته ايپڪس ڪميٽي جي اجلاسن ۾ لاڳاپيل بار پراسيڪيوشن کي مضبوط ڪرڻ تي زور ڀريو ويو آهي ۽ هي بل ان جي هڪ ڪڙي آهي. پراسيڪيوشن بل ايپڪس ڪميٽي جي فيصلن ۽ تجويزن کي مدنظر رکندي پاس ڪيو ويو آهي. هن چيو ته پراسيڪيوشن بل قانون کاتي ۽ پراسيڪيوشن کاتي وچ ۾ تعاون کي وڌيڪ مستحڪم ڪندو. هن وڌيڪ چيو ته عوام کي سستي انصاف جي فراهمي لاءِ پاڪستان پيپلز پارٽي عدليه جي آزادي ۽ استحڪام تي مڪمل يقين رکي ٿي. ملڪ ۾ آئيني جمهوري ادارن جي مضبوطي کي ترقي وٺرائڻ لاءِ پاڪستان پيپلز پارٽي جون قربانيون ۽ جدوجهد ڪنهن کان به لڪيل نه آهي. مولابخش چانڊيو چيو ته وزيراعظم نواز شريف پنهنجي دوري سعودي عرب ۽ ايران کان اڳ پارليامينٽ کي اعتماد ۾ وٺڻ گهرجي ها، ڇو ته قومي سلامتي جا معاملا اڪيلو طئي ڪرڻ ملڪ ۽ جمهوريت لاءِ نقصانڪار ٿي سگهن ٿا.چيو ته پوري قوم جون نظرون ايران ۽ سعودي عرب تعلقات کي ڏسي رهيون آهن، ان لاءِ اقتصادي ۽ قومي مفاد جي معاملن تي قوم کي اعتماد ۾ وٺڻ انتهائي ضروري عمل آهي. هن وڌيڪ چيو ته سعودي عهديدارن سان ملاقاتن جي تفصيل به پارليامينٽ کي ڏيڻ گهرجي ۽ قومي سلامتي جي معاملن تي قوم کي اعتماد ۾ وٺڻ سٺي روايت هوندي.

 

ملير ۾ لڱ ڪانڊاريندڙ روڊ حادثا،2 عورتن سميت 7 ڄڻا اجل جو شڪار، 3 زخمي

ملير (ڊ.ر) ملير ۾ لڱ ڪانڊاريندڙ ٻن روڊ حادثن ۾ 7 ڄڻا فوت 3 ڄڻا زخمي، -خبر موجب ملير ۾ لڱ ڪانڊاريندڙ ٻن روڊ حادثن ۾ 7 ڄڻا فوت ۽ 3 ڄڻا زخمي ٿي پيا ، ملير جي علائقي ملير ڊسٽرڪٽ جيل سامهون قومي شاهراھ تي ٽينڪر جي ٽڪر ۾ شاھ لطيف ٽائون واسي 3 موٽر سائيڪل سُوار نوجوان اشتياق،قاسم ۽ عابد ٿڏي تي ئي چيڀاٽجي فوت ٿي ويا علائقي واسين ٽينڪر ڊرائيور محمد خان کي پڪڙي سخت تشدد ڪرڻ بعد ٽينڪر سميت شاھ لطيف پوليس جي حوالي ڪري ڇڏيو ٻئي پاسي گلشن حديد لڳ لنڪ روڊ تي ٽينڪر جي ٽڪر ۾ هڪ ئي گهر جي ٻن عورتن سميت 4 ڄڻا فوت ٿي ويا ،رات 7 وڳي ڌاري ڪورنگي جا رهواسي لنڪ روڊ ڀرسان درگاھ سمندري بابا تي چئن رڪشن تي هڪ ئي خاندان سان تعلق رکندڙ 15 گهر ڀاتي حاضري ڀرڻ کان پوءِ لنڪ روڊ تان جيئن ئي پنهنجي گهرن ڪورنگي طرف وڃي رهيا هئا ته نامعلوم ٽينڪر هڪ رڪشي جي مٿان چڙهي ويو جنهن سبب رڪشي ۾ ويٺل هڪ گهر جي ٻن عورتن رائو بي بي،مهناز خاتون، محمد سليمان ۽ محمد تاج ٿڏي تي ئي چيڀاٽجي فوت ٿي ويا جڏهن ته رڪشي ۾ سُوار محمد نواز سميت 3 ڄڻا سخت زخمي ٿي پيا روڊ حادثي واري هنڌ ايمبولينس ۽ رينجرس پهچي زخمين جي مدد ڪئي ۽ فوت ٿي ويل کي اسپتال پهچايو اسٽيل ٽائون ٿاڻي جي پوليس ٻن ڪلاڪن تائين نه پهچي سگهي ملير ۾ ٻن الڳ الڳ روڊ حادثن ۾ فوت ٿي ويل جي گهرن ۾ روڄ راڙو مچي ويو  لنڪ روڊ رڪشي کي ٽڪر هڻندڙ نامعلوم ٽينڪر هٿ نه اچي سگهيو آهي جڏهن ته شاھ لطيف  ۽ اسٽيل ٽائون پوليس الڳ الڳ روڊ حادثن جا ڪيس داخل ڪري ڇڏيا آهن.

 

فرينڊلي اپوزيشن هجڻ جو طعنو ڏنو پيو وڃي پر اسان کي جمهوريت پياري آهي: خورشيد شاهه

لاڙڪاڻو (بيورو) قومي اسيمبلي ۾ مخالف ڌر جي اڳواڻ خورشيد شاهه چيو آهي ته اڄ اسان کي فرينڊلي اپوزيشن هجڻ جو طعنو ڏنو پيو وڃي پر اسان کي جمهوريت پياري آهي،جڏهن ته ملڪ ۾ وڏي عرصي تائين ڊڪٽيٽرشپ رهي ته اهڙيون حالتون پيدا ٿينديون رهنديون.ذريعن مطابق ناليواري صحافي سهيل وڙائچ جي ڪتاب “قاتل ڪون”جي سنڌي ترجمي واري مهورت جي تقريب  ۾ خطاب ڪندي سندس چوڻ هو ته محترما بينظير ڀٽو ڪڏهن به جمهوريت جو ساٿ نه ڇڏيو،سندس جمهوريت لاءِ ڏنل قرباني عوام لاءِ وڏو نياپو آهي.خورشيد شاهه چيو ته حڪمرانن کي حاڪميت بچائڻ جو سوچيندو آهي،جڏهن ته اڳواڻ قوم ۽ مستقبل لاءِ سوچيندوآهي،انهن مان ئي اسان کي ڳولڻو آهي ته بينظير جا قتل ڪير آهن؟سندس چوڻ هو ته سهيل وڙائچ جو ڪتاب اهم دستاويز آهي،جنهن ۾ گهڻو ڪجهه موجود آهي.