تازيون خبرون

Daily Archives: January 16, 2016

سمورين سياسي پارٽين پاڪ-چين اقتصادي راهداري منصوبي جي حمايت ڪري ڇڏي

اسلام آباد(اي پي پي)پاڪ – چين اقتصادي راهداري تي وزير اعظم جي صدارت هيٺ ٿيل مشاورتي اجلاس ۾ شرڪت ڪندڙن اجلاس کي سٺو سنئوڻ قرار ڏيندي چيو آهي ته سياسي قيادت بصيرت جو مظاهرو ڪري قومي مفاد ۾ فيصلا ڪيا آهن جنهن جا ان تي سٺا اثر پوندا ، وزير اعظم جي قيادت ۾ اعليٰ سطحي ڪميٽي سمورن سياسي جماعتن جا خدشا دور ڪندي. اقتصادي راهداري رٿا ايندڙ 100 سالنجو روڊ ميپ آهي سمورين سياسي پارٽين پاڪستان چين اقتصادي راهداري منصوبي جي حمايت ڪندي ان منصوبي کي پاڪستان کي معاشي سرگرمين جو مرڪز بڻائيندڙ رٿا قرار ڏئي ڇڏيو آهي. پاڪستان چين اقتصادي راهداري منصوبي بابت آل پارٽيز ڪانفرنس ۾ شرڪت بعد پي ٽي وي سان ڳالهائيندي مختلف سياسي پارٽين جي اڳواڻن ان ڳالهه تي اتفاق ڪيو ته چين پاڪستان اقتصادي راهداري منصوبي جي اولهندي روٽ تي ڪم مڪمل ڪرڻ لاءِ تيز رفتاري سان ڪم جاري رکيو وڃي. مسلم ليگ(ق) جي سينيٽر مشاهد حسين سيد چيو ته گلگت بلتستان سميت سمورن صوبن جي وڏن وزيرن تي ٻڌل گڏيل ڪميٽي قائم ڪئي وئي آهي، جنهن جو سربراهه وزيراعظم نواز شريف هوندو. ڪميٽي جو هر ٽن مهينن ۾ اجلاس ٿيندو جنهن ۾ چين پاڪستان اقتصادي راهداري منصوبي تي ٿيندڙ ڪم جي رفتار جو جائزو ورتو ويندو ۽ سمورن صوبن کان ايندڙ تجويزن تي پڻ غور ويچار ڪيو ويندو. هن چيو ته اولهندي روٽ تي وفاقي ۽ صوبائي حڪومتون انڊسٽريل پارڪن، آپٽڪ فائبر ڪورسز ۽ ٻين سماجي ۽ معاشي ترقي جي قدمن تي ٻڌل رٿائن گڏيل سهڪار سان شروع ڪنديون. هن چيو ته گوادر بابت خدشن کي پڻ ختم ڪيو ويندو. هن زور ڀريندي چيوته چين پاڪستان اقتصادي راهداري منصوبو پاڪستان خاص طور تي بلوچستان جي ترقيءَ لاءِ سنگ ميل ثابت ٿيندو. پارليامينٽ جي ڪشمير ڪميٽي جي چيئرمين مولانا فضل الرحمان چيو ته انهيءَ منصوبي جي سلسلي ۾ ترقياتي رٿائن جن ۾ ريلوي لائين وڇائڻ ۽ گيس جي فراهمي ٿيڻ سان صنعتي ۽ واپاري مرڪز قائم ٿيندا جنهن جي نتيجي ۾ ڪيترا ئي موقعا ميسر ٿيندا. وڏن وزيرن تي ٻڌل ڪميٽي جنهن جو هر 3 مهينن ۾ اجلاس ٿيندو ۽ ان ۾ صوبن کان ايندڙ تجويزن تي غور ويچار ٿيندو ۽ اهڙي ريت منصوبو اڳتي وڌندو رهندو. هن چيو ته سمورين پارٽين ملڪ جي روشن اقتصادي مستقبل لاءِ ٺوس قدم کڻڻ تي اتفاق ڪيو آهي. جماعت اسلامي پاڪستان جي امير سراج الحق چيو ته ايٽمي تجربن بعد چين پاڪستان اقتصادي راهداري منصوبو قوم جي وڏي ۾ وڏي ڪاميابي آهي. اهو منصوبو پاڪستان کي خطي اندر اقتصادي لحاظ کان سپر پاور بڻائڻ ۾ مددگار ثابت ٿيندو. هن تجويز پيش ڪئي ته مالاڪنڊ ڊويزن ۽ مردان کي پڻ ان ترقياتي عمل ۾ شامل هجڻ گهرجي. هن تجويز پيش ڪئي ته ان روٽ کي تاجڪستان تائين وڌائڻ گهرجي. هن وڌيڪ چيو ته اپر دير ۽ چترال جي علائقن ۾ 40 هزار ميگاواٽ بجلي پيدا ڪرڻ جي صلاحيت آهي تنهن ڪري انهن علائقن کي پڻ ان منصوبي جو حصو بڻايو وڃي. هن چيو ته وزيراعظم محمد نواز شريف سمورين سياسي پارٽين کي خاطري ڪرائي آهي ته اسان کي هڪ گڏيل قوت ٿي اڳتي وڌڻ گهرجي.

 

سنڌ اسيمبلي ۾ عدالت مان ڪو به ڪيس ختم ڪرائڻ جو بل منظور

ڪراچي (اسٽاف رپورٽر) سنڌ اسيمبليءَ دهشتگردي جي خاتمي وارين عدالتن سميت عام عدالتن ۾ ٻڌڻي هيٺ ڪيس ختم ڪرڻ جو قانون اڪثريت راءِ سان منظور ڪري ورتو آهي. مخالف ڌر ان کي ڪارو قانون قرار ڏيندي احتجاج ڪيو. جمعي جي ڏينهن ڊپٽي اسپيڪر شهلا رضا جي صدارت ۾ ٿيل سنڌ اسيمبلي جي اجلاس ۾ پارلياماني معاملن واري وزير نثار احمد کهڙو ڪرمنل پراسيڪيوشن سروس ترميمي بل 2015 پيش ڪيو، جنهن کي ايوان مخالف ڌر جي هل هنگامي جي باوجود اڪثريت راءِ سان منظور ڪري ورتو. منظور ڪيل بل ۾ پراسيڪيوٽرز جي مقرري ۽ ان جي ڪارڪردگي کي اثرائتو بنائڻ جي لاءِ ترميم ڪئي وئي آهي. حڪومت کي دهشتگردي جي خاتمي واري عدالت عام عدالتن ۾ ڪنهن به ڏوهه جي هلندڙ ڪيس کي عدالتي فيصلي کان اڳ ۾ ڪنهن به مرحلي تي واپس وٺڻ جو اختيار هوندو پر ان لاءِ حڪومت پراسيڪيوٽر جنرل يا ڪنهن به پراسيڪيوٽر جي ذريعي عدالتن کي تحريري سببن سان گڏ ڪيس روڪڻ جي درخواست ڪندي پوءِ به عدالتن جي اجازت کان سواءِ ڪنهن به جوابدار کي آزاد نٿو ڪري سگهجي. سنڌ اسيمبلي ۾ مخالف ڌر، سنڌ ڪرمنل پراسيڪيوشن ترميمي بل کي مڪمل طور رد ڪندي چيو آهي ته بل ذريعي حڪومت پنهنجي ڪرپٽ وزيرن ۽ پنهنجن ماڻهن کي بچائڻ چاهي ٿي. سنڌ اسيمبلي جي اجلاس کانپوءِ ميڊيا سان ڳالهائيندي اپوزيشن ليڊر خواجا اظهار الحسن، نصرت سحر عباسي ۽ خرم شير زمان چيو ته حڪومت پنهنجي ڪرتوتن کي لِڪائڻ، ڪرپٽ ۽ روپوش وزيرن کي بچائڻ لاءِ ايوان اندر بل آندو. مخالف ڌر جي اڳواڻن الزام لڳايو ته ڊاڪٽر عاصم،ملڪ مان ڀڄي ويل وزيرن ۽ ڪرپٽ ڪامورن کي بچائڻ چاهي ٿي پر هـُو انهيءَ بل تي عمل ٿيڻ نه ڏيندا. هنن چيو ته ڪاري قانون خلاف هـُو هر فورم تي احتجاج ڪندا. اڳواڻن چيو ته بل ذريعي حڪومت عدالتن کي پنهنجي اشارن تي هلائڻ چاهي ٿي. سنڌ جي وڏي وزير سيد قائم علي شاهه چيو آهي ته 494 قانون هيٺ سنڌ حڪومت وٽ اختيار آهن ته هو ڪيس داخل به ڪري سگهي ٿي ۽ ختم به ڪري سگهي ٿي.18 ترميم کانپوءِ صوبا خودمختيار بڻايا ويا هئا پر وفاقي حڪومت اختيار صوبن کي نه پئي ڏئي. جيڪب آباد ۾ ايم اين اي اعجاز جکراڻي جي گهر تي ميڊيا سان ڳالهائيندي سنڌ جي وڏي وزير جو چوڻ هو ته ڪرمنل پراسيڪيوشن بل وقت جي گهرج هئي،جنهن جي ڪري ان کي پاس ڪيو ويو.بل جي پاس ٿيڻ سان ڏوهاري ماڻهن کي فائدو نه ٿيندو.سندس چوڻ هو ته ايف آئي اي ۽ نيب لاڳيتو سنڌ ۾ ڪارروايون ڪري رهيون آهن جيڪي آئين جي خلاف آهن.ان کان اڳ وڏي وزير آمريڪي سفير ڊيوڊ هيل سان گڏ انسٽيٽيوٽ آف ميڊيڪل سائنسز ۽ ڊسٽرڪٽ بار ايسوسئيشن جي نئين عمارت جو افتتاح به ڪيو.

 

ڪراچي اسپتال منتقل ڪيل 6 ورهين جي ٻارڙي سميت مٺي ۽ ڏيپلي ۾ وڌيڪ 3 ٻارڙا فوت، انگ وڌي 66 ٿي ويو ٿر ۾ علاج جي ڪا به کوٽ ناهي، ٻارڙا بک وگهي نه پيا مرن: وڏو وزير

مٺي/جيڪب آباد (نمائدن وٽان) سنڌ حڪومت ٿرپارڪر جي اسپتالن ۽ دوائن جي خريداري لاءِ 3 ڪروڙ 57 لک 58 هزار رپين جا اضافي فنڊ جاري ڪري ڇڏيا، وڏي وزير سيد قائم علي شاهه چيو آهي ته ٿر ۾ صدين کان ڏڪار ٿيندو پيو هاڻي ووايلا ڇو پئي ڪئي وڃي، مڪاني چونڊن ۾ عوام پاران رد ڪيل 14 – 15سياستدان پ پ خلاف اتحاد ٺاهي سنڌ سرڪار کي ڪمزرو ڪرڻ چاهين ٿا کين هميشه جيان هن ڀيري به ناڪامي نصيب ٿيندي……آمريڪي سفير ڊيوڊ هل سان گڏ جيڪب آباد انسٽيٽيوٽ آف ميڊيڪل سائنسز اسپتال جو افتتاح ڪرڻ واري تقريب کي خطاب ڪندي ۽ ميڊيا سان ڳالهائيندي وڏي وزير سيد قائم علي شاهه چيو ته ڪراچي ۾ ماڻهو ترقياتي ڪمن سميت ٻين سهولتن بدران رڳو امن جي جي گهر ڪندا هئا آرمي چيف ، رينجرس ۽ پوليس جي سهڪار سان امن قائم ڪرايو آهي جنهن جو ڪريڊٽ سنڌ سرڪار ڏانهن وڃي ٿو..وڏي وزير چيو ته ڪراچي سميت پوري سنڌ ۾ دهشتگردي جي واقعن ۾ ٻاهران ماڻهو ملوث آهن جيڪي ٻين صوبن کان هتي اچن ٿا انهن کي روڪڻ لاءِ عوام سيڪوريٽي ادارن سان سهڪار ڪري.ٿر جي صورتحال بابت پڇيل سوال جي جواب ۾ وڏي زير سيد قائم علي شاهه چيو ته ٿر ۾ صدين کان ڏڪار جي صورتحال ٿيندي آهي پر ان وقت ميڊيا ڇو خاموش هئي جڏهن وڏو وزير ٿر جو رهواسي هو هاڻي 8 سالن کان سنڌ سرڪار خلاف ووايلا ڪئي پئي وڃي ٿر ۾ ريڪارڊ ترقياتي ڪم ڪرايا آهن جلد اتي بجلي پيدا ٿيڻ جا پراجيڪٽ پڻ ڪم شروع ڪندا. تقريب کي خطاب ڪندي آمريڪي سفير ڊيوڊ هيل چيو ته جمس اسپتال مان سنڌ ۽ بلوچستان جي 10 لک مريضن کي صحت جون جديد سهولتون ملنديون، جيڪب آباد ۾ مٺي پاڻي ۽ ڊرينج جي پراجيڪٽ تي پڻ آمريڪي سهڪار سان ڪم هلي رهيو آهي. تقريب کي ايم اين اي اعجاز جکراڻي، صوبائي وزير ڄام مهتاب ڏهر، سيڪريٽري هيلٿ سعيد احمد ۽ ٻين پڻ خطاب ڪيو. ٻئي طرف ٿر ۾ غذائيت جي کوٽ ۽ مختلف بيمارين وگهي ٻارڙن جي فوت ٿيڻ جو سلسلو جاري آهي، مٺي ۽ ڏيپلي ۾ وڌيڪ 3 ٻارڙا فوت ٿيڻ کانپوءِ فوتي ٻارڙن جو انگ وڌي 66 ٿي ويو آهي. مٺي سول اسپتال ۾ ڳوٺ هٽڙي واسي گيان ميگهوار جو هڪ ڏينهن جو ٻارڙو، ڏيپلي شهر ۾ پورهيت ابراهيم خاصخلي جي تازي ڄاول ٻارڙي ۽ ڏيپلي جي ڳوٺ ڍاڪو فقير  مان ڪراچي اسپتال منتقل ڪيل 6 ورهين جي ٻارڙي فوت ٿيڻ کانپوءِ  ٿر ۾ 15 ڏينهن دوران فوتي ٻارڙن جو انگ وڌي 66 ٿي ويو آهي. مٺي، اسلام ڪوٽ، ننگر پارڪر، ڏيپلو، ڇاڇرو جي سوين ڳوٺن ۾ ڏڪار واري صورتحال هئڻ ڪري ماروئڙا بکون ڪاٽڻ تي مجبور آهن. غذايت جي کوٽ ۽ مختلف بيمارين سبب سوين ٻارڙا مٺي، اسلام ڪوٽ، ننگر پارڪر، ڏيپلو، ڇاڇرو ۽ ٻين اسپتالن ۾ علاج هيٺ آهن.

 

نيشنل ايڪشن پلان هيٺ 332 دهشتگردن کي ڦاهي ۽ 2159 کي ماريو ويو: چوڌري نثار

اسلام آباد (بيورو) نيشنل ايڪشن پلان جي مقصدن حاصل ڪرڻ بابت وفاقي گهرو وزير چوڌري نثار علي خان پاران قومي اسيمبلي ۾ لکت ۾ جواب جمع ڪرايو ويو،جنهن جي مطابق نيشنل ايڪشن پلان هيٺ 332 دهشگردن کي ڦاهي ٽنگيو ويو آهي.ذريعن مطابق وفاقي گهرو وزير چوڌري نثار پاران نيشنل ايڪشن پلان جي مقصدن حاصل ڪرن بابت قومي اسيمبلي ۾ لکت ۾ جواب جمع ڪرايو ويو،جنهن ۾ ٻڌايو ويو ته نيشنل ايڪشن پلان هيٺ پوري مل ۾ 2159 دهجشتگرد ماريا ويا ۽ 1724 گرفتار ڪيا ويا،جڏهن ته 332 دهشتگردن کي ڦاهي چاڙهيو ويو. خاص عدالتن کي دهشتگردي جا 148 ڪيس موڪليا ويا،پابندي مڙهيل تنظيمن کي روڪڻ لاءِ فورٿ شيڊيول هيٺ 2052 ماڻهن جي چرپر محدود ڪئي وئي،جڏهن ته سنڌ،پنجاب،خيبرپختونخوا ۾ 182 شڪي مدرسا بند ڪيا ويا ۽ دهشتگردن جا 933 يو آر ايلز ۽ 10 ويب سائيٽس بند ڪيون ويون پر گلگت بلتستان،فاٽا،آزاد ڪشمير ۽ بلوچستان ۾ 3 سالن دوران 979 دهشتگرد ماريا ويا.گهرو وزير جي لکت واري جواب مطابق گذريل سال اسلام آباد ۾ 5779 هوٽلن جي چڪاس ڪئي وئي،جتي غير معياري شين جي وڪري تي 48 هوٽلن جو چالان ڪاٽيو ويو ۽ 105 کي سيل ڪيو ويو،جڏهن ته 4325 ڪلوگرام گوشت،64 لک کان وڌيڪ ڏنڊ به رکيا.چڙ ڏياريندڙ تقريرن جي الزام ۾ 2337 ڪيس داخل ڪيا ويا ۽ 2195 ماڻهن کي گرفتار ڪيو ويو.لائوڊ اسپيڪر جي غلط استعمال تي 9340 ماڻهو گرفتار ٿيا.

 

سينيٽ ۾ پرڏيهين (ترميمي) بل 2015 ۽ نيشنل ڊيٽا بيس اينڊ رجسٽريشن اٿارٽي (ترميمي) بل 2015 منظور

اسلام آباد (بيورو) سينيٽ پرڏيهين (ترميمي) بل 2015 ۽ نيشنل ڊيٽا بيس اينڊ رجسٽريشن اٿارٽي (ترميمي) بل 2015 جي يڪراءِ سان منظوري ڏيئي ڇڏي آهي جڏهن ته پاڪستان بيت المال (ترميمي) بل 2016 قائمه ڪميٽي کي اماڻيو ويو جمعي تي اجلاس دوران پارليماني معاملن جي مملڪتي وزير ٻئي بل منظوري لاءِ ايوان ۾ پيش ڪيا چيئرمين ايوان مان ٻنهي بلن تي الڳ الڳ شق وار منظوري ورتي سينيٽ يڪراءِ سان ٻنهي بلن جي منظوري ڏيئي ڇڏي اجلاس دوران پاڪستان بيت المال (ترميمي) بل 2016 قائمه ڪميٽي کي اماڻيو ويو مملڪتي وزير شيخ آفتاب احمد تحريڪ پيش ڪئي ته پاڪستان بيت المال ايڪٽ 1991 ۾ وڌيڪ (ترميمي) جو بل پاڪستان بيت المال (ترميمي) بل 2016 قومي اسيمبلي جي منظور ڪيل صورت ۾ غور هيٺ آندو وڃي جنهن جي ايوان منظوري ڏيئي ڇڏي جنهن کان پوءِ هن هي بل ايوان ۾ پيش ڪيو چيئرمين بل لاڳاپيل ڪميٽي کي اماڻي ڇڏيو.

 

سنڌ حڪومت ميڊيا جي آزادي ۾ يقين رکي ٿي: مولابخش چانڊيو

ڪراچي (اسٽاف رپورٽر): وزير اعليٰ سنڌ جي اطلاعات بابت صلاحڪار مولا بخش چانديو ان عزم جو اظهار ڪيو آهي ته وڊيو جنرلٽس جي مسئلن کي ترجيحي بنيادن تي حل ڪنداسين ۽ ان مقصد لاءِ اطلاعات کاتي ۾ هڪ پريس سينٽر قائم ڪيو پيو وڃي. اهڙن خيالن جو اظهار هن سنڌ اسيمبلي سيشن جي دوران وڊيو جنرلٽس سان ملاقات جي دوران ڪيو. هن چيو ته رپورٽن جا مسئلا ته حل ٿي ويندا آهن پر ڪيمرا جي پٺيان ۽ فيلڊ ۾ ڪم ڪندڙ صحافتي معاون عملي جا مسئلا حل ناهين ٿيندا ان ڪري اسان انهن  جي مسئلان جي حل لاءِ موثر اُپاءَ وٺنداسين. اطلاعات بابت صلاحڪار چيو ته صحافين ۽ صحافتي ادارن ۾ ڪم ڪندڙ ٻئي عملي لاءِ مهنجي آفيس جا در هميشه کليل رهندا ته جيئن صحافين ۽ صحافتي عملي کي درپيش مسئلن جي خاتمي لاءِ اُپاءَ ورتا وڃن. مولا بخش چانڊيو چيو ته پاڪستان پيپلز پارٽي ميڊيا سان لاڳاپيل ماڻهن جي ڀلائي لاءِ ڪم ڪري رهي آهي ۽ منهنجي پارٽي جي قيادت پاران به مون کي ميڊيا ورڪرز لاءِ بهتر طريقي سان ڪم ڪرڻ جو ٽاسڪ ڏنو ويو آهي. صلاحڪار چيو ته هو جلد ئي وڊيو جنرلٽس جي اعزاز ۾ ماجھاندو ڏيندو ۽ انهن سان ملاقات ڪري انهن جا مسئلا حل ڪيا ويندا. هن چيو ته سنڌ حڪومت ميڊيا ۽ ميڊيا جي آزادي تي يقين رکي ٿي ۽ وزير اعليٰ  سنڌ ميڊيا سان لاڳاپيل ماڻهن جي مسئلن جي حل ۾ خاص دلچسپي رکي ٿي.

 

پوري قوم کي شرمين عبيد جهڙي بهادر ۽ ذهين فلمساز تي فخر آهي: بلاول ڀٽو زرداري

ڪراچي (اي پي پي) پاڪستان پيپلزپارٽي جي چيئرمين بلاول ڀٽو زرداري، پاڪستاني فلمساز شرمين عبيد چنائي جي پاڪستان ۾ ڪارو ڪاري جي حوالي سان ٺهيل فلم عالمي ايوارڊ لاءِ نامزد ٿيڻ تي کيس مبارڪباد ڏني آهي. بلاول ڀٽو زرداري چيو ته پوري قوم کي شرمين عبيد جهڙي بهادر ۽ ذهين فلمساز تي فخر آهي، جنهن جي اڳ ئي هڪ فلم آسڪر ايوارڊ ماڻي چڪي آهي، جيڪا پاڪسستان ۾ تيزاب هاري زخمي ڪيل عورتن جي زندگيءَ تي ٺهيل هئي. هن چيو ته اهو قومي اعزاز ملڻ تي اسان کي گهرجي ته نام نهاد ڪارو ڪاري جي ڪاررواين خلاف هر سطح تي ويڙهه ڪريون. بلاول ڀٽو زرداري وفاقي حڪومت تي پڻ زور ڀريو آهي ته ڪاروڪاري جي خلاف قانونسازي جي معاملي کي سنجيدگي سان ورتو وڃي. سينيٽ ۾ پيپلزپارٽي جي سينيٽرن طرفان ڪاروڪاري جي واقعن خلاف قانونسازي جي حوالي سان ڪيل ڪوششن جي واکاڻ ڪندي پيپلزپارٽي جي چيئرمين حڪومت کي ياد ڏياريو ته فيبروري 2015ع ۾ پيپلزپارٽي جي سينيٽر ڪاروڪاري جي ڏوهن خلاف بل پيش ڪيو هو، جيڪو سينيٽ مان يڪراءِ منظور ٿيڻ بعد ان کي پيپلزپارٽي طرفان قومي اسيمبلي ڏانهن موڪليو ويو هو پر بدقسمتي سان ڪيترائي ڀيرا ياد ڏيارڻ باوجود حڪومت انهي اهم قانونسازي کي نظرانداز ڪري ڇڏيو ۽ ان کي اسٽينڊنگ ڪاميٽي ۾ به پيش نه ڪيو آهي، ان مان حڪومت جي انهيءَ معاملي ۾ بي ڌياني ظاهر ٿئي ٿي. بلاول ڀٽو زرداري حڪومت تي زور ڀريو ته ڪاروڪاري جهڙن واقعن خلاف قانونسازي جو معاملو جلد ئي گڏيل پارليامينٽ جي اجلاس ۾ آڻڻ کي يقيني بڻايو وڃي، جنهن کي هاڻي اهو بل پڻ موڪليو ويو آهي.

 

معاشي لنگهه رٿا تي وزيراعظم پاڻمرادو ايوان ۾ وضاحت ڏئي: رضا رباني

اسلام آباد (بيورو) سينيٽ پاڪ-چين معاشي لنگهه رٿا تي وزيراعظم نوازشريف کان وضاحت گهري آهي. سينيٽ جي چئيرمين رضارباني جو چوڻ آهي ته پارليامينٽ سپريم ادارو آهي،وزيراعظم ايوان ۾ اچي وضاحت ڏئي. سينيٽ جو اجلاس رضارباني جي صدارت هيٺ شروع ٿيو.اجلاس ۾ معاشي لنگهه رٿا بابت بحث دوران رضارباني جو چوڻ هو ته جيڪڏهن خيبرپختونخوا جي وڏي وزير جا معاشي لنگهه رٿا تي شڪ آهن ته گڏيل مفادن واري ڪائونسل ۾ انهن جو جائزو ورتو وڃي.سندس چوڻ هو ته ان حوالي سان وزيراعظم کي پاڻمرادو وضاحت ڏيڻ گهرجي.

 

سنڌ حڪومت ڪراچي کان ڪشمور تائين گٽرن ۾ ڦاسي پئي آهي: خواجه اظهار

ڪراچي (اسٽاف رپورٽر) سنڌ اسيمبلي ۾ مخالف ڌر جي اڳواڻ خواجه اظهار چيو آهي ته سنڌ حڪومت ڪراچي کان ڪشمور تائين گٽرن ۾ ڦاسي پئي آهي ۽ اتفاقي طور ڪراچي ۾ 2 سيڪڙو سيٽون حاصل ڪندڙ پي ٽي آءِ گٽر سياست ۾سنڌ سرڪار جو ساٿ ڏئي رهي آهي. سنڌ اسيمبلي جي اجلاس کان اڳ ميڊيا سان ڳالهائيندي خواجه اظهار چيو ته سنڌ سرڪار کي ڪراچي جي مسئلن تي سياست نه ڪرڻ گهرجي ۽ سنڌ حڪومت ڪراچي کان ڪشمور تائين گٽرن ۾ ڦاسي پئي آهي. هن چيو ته اتفاقي طور ڪراچي ۾ 2 سيڪڙو سيٽون حاصل ڪندڙ پي ٽي آءِ گٽر سياست ۾سنڌ سرڪار جو ساٿ ڏئي رهي آهي.

 

تحريڪ انصاف کي جمهوريت لاءِ مثال بڻائڻ چاهيان ٿو،انٽرا پارٽي چونڊون 25 اپريل تائين پوريون ٿي وينديون: عمران خان

اسلام آباد (بيورو) پاڪستان تحريڪ انصاف جي چيئرمين عمران خان چيو آهي ته تحريڪ انصاف جون سڀئي تنظيمون ختم ٿي چڪيون آهن ۽ هاڻي سڌو سنئون چونڊون ٿينديون جيڪي 25 اپريل کان اڳ پوريون ٿي وينديون.تفصيل مطابق پريس ڪانفرنس ڪندي عمران خان چيو ته ماڻهن جو خيال هو ته  تحريڪ انصاف انٽرا پارٽي چونڊون وساري ويهندي پر انٽرا پارٽي چونڊون ڪرائڻ آئيني ذميواري آهي،جنهن کي پورو ڪرڻ لاءِ مڪمل عبوري نظر رکندڙ موجود هوندا،جڏهن ته اليڪشن ڪميشن ۽ ٻيا ادارا اسان جي مدد ڪن. سندس چوڻ هو ته تحريڪ انصاف ۾ پنهنجا دوست آڻي پئي سگهيس پر نه آندا ڇو ته تحريڪ انصاف کي هڪ ادارو ۽ جمهوريت لاءِ مثال بڻائڻ چاهيان ٿو.هن چيو ته ميرٽ نه هجڻ سان اسان ٻين معاشرن کان پوئتي رهجي ويا آهيون،بهتر پاڪستان بڻائڻ جي شروعات پنهنجي پارٽي سان ڪرڻي پوندي،جمهوريت نه هجڻ سبب پيپلز پارٽي سنڌ تائين محدود ٿي وئي آهي، ڇو ته ان جي اڳواڻ جو فيصلو ڪاغذ جي هڪ  ٽڪڙي تي ٿي ويندو آهي.عمران خان چيو ته جسٽس(ر) وجيهه الدين جي موقف کي مڃيندي غلطيون مڃيون آهن.