تازيون خبرون

Daily Archives: January 13, 2016

پاڪستان سعودي عرب جي 34 ملڪن جي فوجي اتحاد ۾ شامل ٿيڻ لاءِ فوج نه موڪليندو: سرتاج عزيز

اسلام آباد (بيورو) پاڪستان فوج سعودي عرب موڪلڻ جي ترديد ڪئي آهي. قومي اسيمبليءَ جي پرڏيهي معاملن بابت اسٽينڊنگ ڪميٽيءَ کي بند ڪمري ۾ بريفنگ ڏيندي وزيراعظم جي صلاحڪار سرتاج عزيز چيو ته پاڪستان سعودي عرب زميني فوج نه موڪلي رهيو آهي. هن چيو ته ڪنهن به ملڪ ۾ فوج موڪلڻ پاڪستان جي پاليسي ناهي. سندس چوڻ هو ته گڏيل قومن کانسواءِ ڪنهن به اتحاد ۾ فوج نه موڪلي ويندي. سرتاج عزيز جو چوڻ هو ته وچ اوڀر جي ڇڪتاڻ تي پاڪستان جي پاليسي اڻڌري آهي. هن چيو ته سعودي عرب ۽ ايران ۾ ڇڪتاڻ جي خاتمي لاءِ هو ڪردار ادا ڪري رهيا آهن. سندس چوڻ هو ته ٻنهي ملڪن ۾ تڪرار گهٽائڻ بابت او آءِ سي جو اجلاس 16 جنوري جده ۾ ٿيندو. سرتاج عزيز چيو ته سعودي عرب سان دهشتگرديءَ جي خاتمي لاءِ ڳجهي ڄاڻ جي مٽاسٽا ڪئي ويندي. هن چيو ته پاڪستان شام تڪرار تي پرامن ڳالهين ذريعي حل جو حامي آهي. قومي اسيمبليءَ جي پرڏيهي معاملن بابت اسٽينڊنگ ڪميٽيءَ جي چيئرمين اويس لغاري ميڊيا کي بريفنگ ڏيندي ٻڌايو ته سرتاج عزيز کين ٻڌايو آهي ته پاڪستان رڳو امن مشن لاءِ ئي فوج موڪليندو. هن چيو ته پاڪستان کي ڇڪتاڻ جي خاتمي لاءِ اهم ڪردار ادا ڪرڻ گهرجي.

 

وفاق جو اينٽي ڪرپٽن تي اعتماد ناهي، ڪرپشن نالي سنڌ تي حملو ڪيو پيو وڃي: وڏو وزير

ملير (ڊ ر) سنڌ جي وڏي وزير سيد قائم علي شاهه چيو آهي ته پهريون ججن جا فيصلا ڳالهائيندا هئا پر هاڻي پاڻ به ڳالهائي رهيا آهن. ڪراچي ۾ آخري دهشتگرد جي خاتمي تائين آپريشن جاري رهندو. ملير بار ايسوسيئيشن جي تقريب کي خطاب ڪندي وڏي وزير سيد قائم علي شاهه چيو ته هو عدليه کي مضبوط ڏسڻ چاهين ٿا پر ڪنهن سان ناانصافي نه ٿيڻ گهرجي. هن چيو ته امن امان سندن ۽ وفاقي سرڪار جي پهرين ذميواري آهي. سندس چوڻ هو ته ڪرپشن جي نالي تي سنڌ مٿان حملو ڪيو پيو وڃي، ڪجهه ماڻهو چور دروازي کان اقتدار حاصل ڪرڻ چاهين ٿا. وڏي وزير چيو ته وفاق پهريون سهڪار ڪندو هو، هاڻي خبر ناهي ته ڪري رهيو آهي يا نه؟ هن چيو ته سنڌ ۾ ايتري ڪرپشن ناهي رڳو تاثر ڏنو پيو وڃي، وفاق کي اينٽي ڪرپشن کاتي تي اعتماد ئي ناهي. سندس چوڻ هو ته نيب پلي بارگين ذريعي ملندڙ رقم سنڌ سرڪار حوالي ڪري، اها رقم خبر ناهي ته وڃي ڪيڏانهن ٿي؟ وڏي وزير سيد قائم علي شاهه چيو ته ٿرپرڪار ۾ پاڻي جي کوٽ ختم ڪرڻ لاءِ منصوبا لڳايا ويا آهن، رستي ۾ مرندڙ ٻارڙن جي ذميواري به مٿن لڳائي پئي وڃي. هن چيو ته سياست ۾ لاها چاڙها ايندا رهندا آهن، سندن جدوجهد عوامي حڪمراني لاءِ آهي. سندس چوڻ هو ته رينجرز ۽ پوليس ڪراچي جي شهرين ۾ تحفظ جو احساس پيدا ڪيو آهي. وڏي وزير جو چوڻ هو ته مٺي سول اسپتال جي صورتحال حيدر آباد کان بهتر آهي، ڀلي جائزو وٺي ڏٺو وڃي. سيد قائم علي شاهه چيو ته نالين مٿان حددخليون ختم ڪرڻ تي اعتراض ڪيا پيا وڃن.

 

پنجاب ۾ عوام جا مسئلا حل ٿين ها ته مڪاني چونڊن ۾ شڪست نه ملي ها: بلاول ڀٽو

لاهور (بيورو) لاهور ۾ پ پ چيئرمين بلاول ڀٽو زرداري جي صدارت ۾ پارٽي اڳواڻن جو اجلاس. پ پ چيئرمين بلاول ڀٽو زرداري پنجاب ۾ مڪاني چونڊن دوران ناڪامي تي اڳواڻن مٿان ڪاوڙ جو اظهار ڪندي ڪارڪردگي رپورٽ طلب ڪري ورتي. اجلاس ۾ پ پ اڳواڻ قمرالزمان ڪائره، راجا رياض، فردوس عاشق اعواڻ ۽ ٻين اڳواڻن شرڪت ڪئي. اجلاس کي خطاب ڪندي پ پ چيئرمين بلاول ڀٽو زرداري چيو ته پنجاب ۾ پ پ اڳواڻن عوام جا مسئلا حل ڪن ها ته مڪاني چونڊن ۾ شڪست نه ملي ها. ان موقعي تي پ پ چيئرمين، پنجاب جي سمورن پارٽي اڳواڻن کي رپورٽ گهري ورتي. اجلاس بعد ميڊيا سان ڳالهائيندي قمرالزمان ڪائره چيو آهي ته پ پ هميشه جمهوري ۽ پارلياماني نظام کي بچائڻ جي ڪوشش ڪئي آهي. هن چيو ته مڪاني چونڊن جا نتيجا ڪنهن پارٽي جي مقبوليت جي ضمانت ناهي. سندس چوڻ هو ته بلاول ڀٽو زرداري پارٽي اڳواڻن کان ڪارڪردگي جي رپورٽ گهري آهي، پارٽي اندر تنظيمي معاملن ۾ تبديلي ٿيندي رهندي آهي. قمرالزمان ڪائره چيو آهي ته پنجاب ۾ پ پ جي ڪارڪردگي تي غور ڪرڻ جي ضرورت ناهي.

 

خاص مڪاني سيٽن تي چونڊن جي رستي ۾ رنڊڪ ختم، گورنر سنڌ ترميمي آرڊيننس تي صحيح ڪري ڇڏي

ڪراچي (اسٽاف رپورٽر) سنڌ ۾ خاص مڪاني سيٽن تي چونڊن جي رستي ۾ رنڊڪ ختم ٿي وئي،سنڌ جي گورنر ڊاڪٽر عشرت العباد ترميمي آرڊيننس تي صحيح ڪري ڇڏي،مڪاني کاتن ۾ عورتن لاءِ 33 سيڪڙو سيٽون هونديون.حڪومت مزدورن،نوجوانن ۽ اقليتن لاءِ به 5 ،5 سيڪڙو سيٽن جو نوٽيفڪيشن جاري ڪري ڇڏيو آهي.

 

عراق: بغداد ۾ فائرنگ ۽ آپگهاتي حملا، 30 ماڻهو مارجي ويا

بغداد (م.ڊ) عراق جي گادي واري هنڌ بغداد ۾ فائرنگ ۽ آپگهاتي حملن جي مختلف واقعن ۾ 30 کان وڌيڪ ماڻهو مارجي ويا ۽ ڪيترائي زخمي ٿي پيا،جڏهن ته ويڙهاڪ تنظيم داعش حملن جي ذميواري قبولي ورتي آهي.پرڏيهي خابرو اداري مطابق اتر اوڀر بغداد جي علائقي مقدايا ۾ بارود سان ڀريل ڪار کڻي آپگهاتي دهشتگرد هڪ هوٽل ۾ داخل ٿيا،جڏهن ته هڪ دهشتگرد هوٽل جي اندر داخل ٿيندي ئي،فائر کولي ڇڏيا،جڏهن ته ڪار ۾ موجود آپگهاتي حملو ڪندڙ ڪار کي ڌماڪي سان اڏائي ڇڏيو،هوٽل اندر موجود ماڻهو مارجي ويا ۽ ڪيترائي زخمي ٿيا.

 

جيڪڏهن فاٽا ۾ روزگار جا نوان موقعا پيدا ڪيا وڃن ته طالبان جو مسئلو ختم ٿي ويندو: رضا رباني

اسلام آباد (بيورو) سينيٽ جي سموري ايوان تي ٻڌل ڪميٽي کي آگاهي ڏني وئي آهي ته جيڪڏهن فاٽا ۾ روزگار جا نوان موقعا پيدا ڪيا وڃن ته طالبان جو مسئلو ختم ٿي ويندو. سينيٽ چيئرمين رضا رباني جي صدارت هيٺ سموري ايوان تي ٻڌل ڪميٽي جو اجلاس ٿيو، جنهن ۾ فاٽا جي سڌارن بابت جوڙيل ڪميٽي جي ميمبر جسٽس رٽائرڊ ميان اجمل بريفنگ ڏني. اجلاس کي آگاهي ڏني وئي ته حڪومت فاٽا جي قانون ايف سي آر جو نالو تبديل ڪري فاٽا ريگيوليشن تجويز ڪيو هو ۽ اها به تجويز ڏني هئي ته فاٽا ۾ گهر نه ڪرايا وڃن. ڪميٽي کي ٻڌايو ويو ته 2005ع ۾ ايف سي آر قانون ۾ ترميم لاءِ سفارشون پيش ڪيون ويون، ۽ تجويز ڏني وئي هئي ته عورتن، ٻارڙن ۽ بزرگن کي گرفتار نه ڪيو وڃي. جسٽس رٽائرڊ ميان اجمل چيو ته فاٽا ۾ روزگار جا وڏا مسئلا آهن، جيڪڏهن اتي روزگار جا موقعا پيدا ڪيا وڃن، ته طالبان جو مسئلو ختم ٿي ويندو.

 

ڪرپشن رڳو سنڌ نه پر ٻين صوبن ۾ به ٿي رهي آهي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته ڪرپشن رڳو سنڌ نه پر ٻين صوبن ۾ به ٿي رهي آهي، پر ڪاررواين جا تير رڳو سنڌ ۾ هلايا پيا وڃن. پشاور ۾ پريس ڪانفرنس ڪندي خورشيد شاههچيو ته نواز ليگ پارليامينٽ کي اهميت نه پئي ڏي، پ پ پنهنجي دور ۾ وفاق کي مضبوط ڪيو، پر موجوده سرڪار فيڊريشن کي ڪمزور ڪري رهي آهي. هن چيو ته ڪرپشن جو راڳ الاپي سنڌ تي تيرا هلايا پيا وڃن، حڪومت ٻڌائي ته ڇيا ٻيا صوبا ڪرپشن کان پاڪ آهن؟. خورشيد شاهه چيو ته هـــــو ملڪ مان ڪرپشن ۽ بدعنوانين جو خاتمو چاهين ٿا، جڏهن ته ملڪ کي ڪرپشن جي ناسور جي خاتمي لاءِ سڀني کي گڏجي ڪردار ادا ڪرڻو پوندو. هڪ سوال جي جواب ۾ اپوزيشن ليڊر چيو ته پاڪ-چين اقتصادي راهداري منصوبي تي اپوزيشن جا خدشا ختم ٿيڻ گهرجن، لڳي رهيو آهي ته حڪومت اولهه روٽ مڪمل ڪرڻ چاهي ٿي. خورشيد شاهه وڌيڪ چيو ته نواز ليگ سرڪار رڳو اعلانن جو لولي پاپ ڏئي رهي آهي، پنجاب ۾ اورينج ٽرين منصوبي تي 60 ارب خرچ ڪيا ويا، پر عوام کي فائدو نه ٿيو.

 

اليڪشن ڪميشن جي چتاءُ کان پوءِ سنڌ حڪومت جو مخصوص سيٽن بابت نوٽيفڪيشن جاري، اليڪشن ڪميشن کي موصول

ڪراچي (اين اين آءِ) اليڪشن ڪميشن آف پاڪستان جي چتاءَءُ کانپوءِ سنڌ حڪومت مخصوص سيٽن بابت نوٽيفڪيشن جاري ڪري ڇڏيو آهي جيڪو اليڪشن ڪميشن کي ملي ويو آهي سنڌ جي بلديات کاتي جو جاري ڪيل نوٽيفڪيشن مطابق سڄي سنڌ ۾ عورتن اقليت نوجوان ۽ مزدور هاري جي مخصوص سيٽن تي 9215 ماڻهو منتخب ٿيندا مخصوص سيٽن جي چونڊ ميٽروپوليٽن ۽ ميونسپل ڪارپوريشن ۾ ٿيندي يونين ڪميٽي يا يونين ڪائونسل ۾ ٻه عورتون ۽ هڪ هڪ اقليت مزدور نوجوان ڪائونسلر هوندا ميٽرو پوليٽن ۽ ميونسپل ڪارپوريشن ميونسپل ۽ ٽائون ڪميٽي، ڊسٽرڪٽ ڪائونسل ۾ عورتن جو انگ 33 سيڪڙو هوندو ميٽروپوليٽن ۽ ميونسپل ڪارپوريشن، ميونسپل ۽ ٽائون ڪميٽي، ڊسٽرڪٽ ڪائونسل اقليت مزدور هاري، نوجوان جو انگ 5 سيڪڙو هوندو مخصوص سيٽن تي چونڊن جو شيڊول جمعي تي جاري ٿيندو.

 

ڪرپشن جو الزام لڳائيندڙ ثابت ڪن ڪارروائي ڪنداسين، پول کولڻ تي اسان آياسين ته ڳالهه وڌي ويندي : ڄام خان شورو

ڪراچي (اين اين آءِ) سنڌ جي بلديات وزير ڄام خان شورو چيو آهي ته شهر ۾ جاري صفائي مهم تي ڪنهن قسم جو ڪوئي خاص فنڊ جاري نه ڪيو ويو آهي ڪرپشن جو الزام لڳائيندڙ ثابت ڪن اسان ڪارروائي ڪنداسين پول کولڻ تي اسان آياسين ته ڳالهه وڌي ويندي ڪراچي ۾ سيوريج جي لائينن ۾ ٻوريون ۽ ٻيو سامان وجهي هڪ سازش ڪري هن مهم ۽ سيوريج جي نظام کي تباهه ڪيو پيو وڃي جنهن جي جاچ جو حڪم ڏيئي ڇڏيو آهي گذريل ڏينهن پاڻي جي فاٽل لائين ڪانٽريڪٽر جي غلطي هئي جنهن جي خلاف ڪارروائي جون هدايتون ڏيئي ڇڏيون آهن چونڊيل بلدياتي نمائنده پهريان حلف کڻن ان کان پوءِ اختيارن جي ڳالهه ڪن اسان انهن کي سمورا اختيار قانون مطابق ڏيڻ لاءِ تيار آهيون شهر ۾ سالون سال کان ڊمپر گنڌ جي ڊيرن کي صاف ڪرڻ لاءِ سموري ضلعي انتظاميه کي هدايتون ڏنيون ويون آهن ۽ خود سب معاملن جي مانيٽرنگ ڪري رهيو آهيان ۽ ملندڙ شڪايتن تي پاڻ وڃي حقيقون معلوم ڪري رهيو آهيان اهڙن خيالن جو اظهار هن ڊسٽرڪٽ ڪورنگي ۾ شاهه فيصل ڪالوني ۾ قائم ناصر شهيد پارڪ ۾ وڻ پوکي تحت ٻوٽو لڳائڻ ۽ اتي صفائي جي انتظامن جو جائزو وٺن ۽ ان کان پوءِ شاهه فيصل ڪالوني ۾ ريلوي لائين جي ڀرپاسي سالون سال گنڌ کي کڻڻ جي ڪمن جو جائزو وٺڻ جي موقعي تي موجود ميڊيا سان ڳالهائيندي ڪيو ان موقعي تي ايدمنسٽريٽر اورنگي غلام رسول ڊپٽي ڊائريڪٽر اسلم خان اياز محمد خان ۽ ٻيا به ان سان گڏ موجود هئا ان موقعي تي صوبائي وزير کي مهم دوران ڊسٽرڪٽ ڪورنگي ۾ لانڍي شاهه فيصل ڪالوني ۽ ڪورنگي جي سمورين يونين ڪائونسلز ۾ ٿيندڙ صفائي جي ڪمن ۽ جاري ڪمن تي ايڊمنسٽريٽر ڪورنگي غلام رسول تفصيلي بريفنگ ڏني ان موقعي تي ميڊيا جي سوالن جا جواب ڏيندي صوبائي وزير ڄام خان شورو چيو ته گذريل ڏينهن سنڌ اسيمبلي ۾ اپوزيشن ليڊر پاران هن مهم تي ڪروڙين رپيا خرچ ٿيڻ جي ڳالهه ۾ ڪائي صداقت نه آهي هن چيو ته هن مهم لاءِ ڪو خاص فنڊ به جاري نه ڪيو ويو آهي ۽ هي پوري مهم تمام ڊي ايم سيز پنهنجن وسيلن تحت هلائي رهي آهي هن چيو ته جيڪڏهن اپوزيشن ليڊر کي ڪٿي ڪرپشن نظر اچي رهي آهي ته هو ثابت ڪري اسان ڪرپشن ۾ ملوث آفيسرن جي خلاف ڪارروائي ڪنداسين هن چيو ته اپوزيشن ليڊر پاران پول کولڻ جون ڌمڪيون خود سندس لاءِ مسئلا پيدا ڪري سگهن ٿيون ۽ جيڪڏهن اسان پول کولڻ سروع ڪري ڇڏيو ته پوءِ ڳالهه وڌي ويندي هڪ ٻئي سوال جي جواب ۾ ڄام خان شورو چيو ته اجھ صبح ايم اي جناح روڊ تي سيوريج جي لائينن مان ٻوريون ۽ ڪجهه اهڙو مواد نڪتو آهي جنهن ۾ اها ڳالهه ثابت ٿئي ٿي ته ڪنهن منظم سازش تحت شهر ۾ سيوريج جي نظام کي تباهه ڪيو پيو وڃي هن چيو ته ان سلسلي ۾ ايم ڊي واٽر بورڊ ۽ ٻين عملدارن کي ان جي جاچ لاءِ حڪم ڏيئي ڇڏيا آهن هن چيو ته هڪ سازش تحت اسان جي صفائي مهم کي ناڪام بنائڻ لاءِ ڪم ڪيو پيو وڃي پر اسان ڪراچي جي عوام سان ڪيل واعدا پورا ڪنداسين ۽ اهڙين سمورين سازشن کي نه صرف بي نقاب ڪري ناڪام بڻائينداسين پر وڌيڪ تيزي سان هن مهم کي ڪامياب ڪرائينداسين.

 

مڪاني ادارن جي نمائندن کي بااختيار بڻائڻ لاءِ ايم ڪيو ايم جو ڪراچي ۾ اليڪشن ڪميشن جي آفيس آڏو احتجاج

ڪراچي (اسٽاف رپورٽر) مڪاني ادارن جي نمائندن کي بااختيار بڻائڻ لاءِ  ايم ڪيو ايم جي ڪارڪنن ڪراچي ۾اليڪشن ڪميشن جي آفيس آڏو احتجاج ڪيو آهي، ڪراچي لاءِ نامزد ميئر وسيم اختر چيو آهي ته آصف زرداري مڪاني ادارن ۾ رڪاوٽون نه وجھي ٻي صورت ۾ کيس دبئي ۾ مستقل رهائش اختيار ڪرڻي پوندي. ايم ڪيو ايم جي ڪارڪنن صوبائي اليڪشن

آفيس آڏو وسيم اختر، خواجه اظهار ۽ ٻين جي اڳواڻي ۾ احتجاجي مظاهرو ڪيو. احتجاجي مظاهري کي خطاب ڪندي وسيم اختر چيو ته ڪي ايم سي جا آفيسر سنڌ حڪومت جا حڪم نه مڃن ۽ ايڊمنسٽريٽر ڪرپشن لاءِ ٺيڪا ڏئي رهيا آهن. وسيم اختر  چيف جسٽس ۽ آرمي چيف کان چونڊيل نمائندن کي اختيار ڏيارڻ جو مطالبو ڪندي چيو ته آصف زرداري رڪاوٽون نه وجهي ۽ ڪراچي جي مينڊيٽ کي تسليم ڪري ٻي صورت ۾ کيس دبئي ۾ مستقل رهائش اختيار ڪرڻي پوندي. وسيم اختر چيو ته چونڊيل نمائندن کي حلف کڻائڻ تائين ايڊمنسٽريٽرز جي اختيارن کي معطل ڪيو وڃي. خواجه اظهار چيو ته ڪرپشن لاءِ ٺيڪا ڏيڻ جو سلسلو روڪيو وڃي نه ته راهه ۾ رڪاوٽ بڻجنداسين. هن چيو ته سپريم ڪورٽ مڪاني چونڊون ڪرايون اها چونڊيل نمائندن کي اختيار ڏياري ۽ جيڪڏهن چونڊيل نمائندن کي اختيار نه مليا ته سنڌ اسيمبلي جو اجلاس به هلڻ نه ڏينداسين.