تازيون خبرون

Daily Archives: January 7, 2016

فريحا پرويز ۽ نعمان جاويد شادي جي ٻنڌڻ ۾ ٻڌجي ويا

لاهور (شوبز نيوز) ڳائڻي فريحا پرويز ۽ نعمان جاويد ڊگهي دوستي کانپوءِ شادي ڪري ڇڏي آهي. ٻنهي جي نڪاح جي تقريب گذريل ڏينهن سادگي سان ٿي،جنهن ۾ سندس ويجها دوست،مٽ مائٽ شامل ٿيا.مقامي اخبار(خبرين) مطابق فريحا پرويز ۽ نعمان جاويد جي وچ ۾ ڪيتري ئي وقت کان گهري دوستي هئي۽ ان جي ڪري ئي سندس حوالي سان شادي جا چوٻول هلي رهيا هئا پر ٻنهي هميشا ان ڳالهه کان انڪار ڪيو ۽ چيو ته اسان ٻئي رڳو سٺا دوست آهيون.پر هن تقريب کانپوءِ اها ڳالهه اڳيان اچي وئي آهي ته هاڻي هو ٻئي هڪٻئي جا جيون ساٿي بڻجي چڪا آهن،جنهن جي وڏي تقريب جو اعلان هو تمام جلد ڪندا.

 

سائنس فڪشن فلم“اسٽاروارز، دي فورس اويڪنز” آمريڪا جي ڪامياب ترين فلم بڻجي وئي

نيويارڪ (شوبز نيوز) هالي ووڊ سائنس فڪشن فلم“اسٽاروارز، دي فورس اويڪنز” اتر آمريڪا ۾ هن وقت تائين ڪامياب ترين فلم بڻجي وئي آهي. ڄاڻايل فلم ڪمائي جي لحاظ کان نه رڳو “اوتار” جو رڪارڊ ڀڳو آهي پر برطانيا جي 2015ع جي سڀ کان مشهور فلم جو درجو به ماڻڻ ۾ ڪامياب وئي آهي.آمريڪا جي ڊزني اسٽوڊيو جو چوڻ آهي ته ڪمائي جي لحاظ کان 75 ڪروڙ 5 لک ڊالر جو ڪاروبار ڪندي فلم “اوتار” کي پوئتي ڌڪي ڇڏيو آهي.ياد هجي ته گذريل مهيني “اسٽاروارز، دي فورس اويڪنز” عالمي باڪس آفيس تي گهٽ وقت ۾ هڪ ارب ڊالر ڪمائيندڙ فلم بڻجي وئي هئي.

 

آسٽريليا ۽ ويسٽ انڊيز وچ ۾ سڊني ۾ جاري سڊني ٽيسٽ بنا نتيجي ختم

سڊني (اسپورٽس نيوز) آسٽريليا ۽ ويسٽ انڊيز وچ ۾ سڊني ۾ جاري سيريز جي ٽئين ۽ آخري ٽيسٽ بنا نتيجي ختم ٿي وئي.آسٽريليا جي ڊيوڊ وارنر کي ميچ ۾ ناقابل شڪست سينچري اسڪور ڪرڻ تي ميچ جو بهترين رانديگر قرار ڏنو ويو جڏهن ته ايڊم ووجز سيريز جو بهترين رانديگر قرار ڏنو ويو. آسٽريليا ٽن ميچن جي سيريز 0-2 تان پنهنجي نالي ڪئي. لڳاتار برسات سبب ميچ بي نتيجي رهي. ميچ جي ٻئين ڏينهن رڳو 11.2 اوورز جي راند ئي ممڪن ٿي سگهي ۽ اهڙ ي طرح لڳاتار برسات جو سلسلو نه رڪجڻ سبب ٽئين ۽ چوٿين ڏينهن ڪو بال نه هلي سگهيو. ويسٽ انڊيز ٽيم پنهنجي اننگز ۾ 330 رنسون ٺاهي پويلين موٽي آئي جواب ۾ آسٽريليائي ٽيم ڊيوڊ وارنر جي ناقابل شڪست سينچري عيوض 2 وڪيٽن جي نقصان تي 176 رنسون ٺاهيون.

محمد عامر کي نيوزيلينڊ جي ويزا ملي وئي،5 سالن کانپوءِ قومي ٽيم سان گڏ ايڪشن ۾ نظر ايندو

لاهور(اسپورٽس نيوز) اسپاٽ فڪسنگ جي الزام ۾ پابندي ۽ قيد ڪاٽڻ کانپوءِ ڪرڪيٽ جي ميدان ۾ واپس آيل نوجوان فاسٽ بالر محمد عامر کي نيوزيلينڊ جي ويزا ملي وئي آهي ۽ هو 5 سالن کانپوءِ ايڪشن ۾ نظر ايندو، نيوزيلينڊ جي اميگريشن اختيارن ٻڌايو ته پاڪستان جي نوجوان فاسٽ بالر محمد عامر کي ويزا جاري ڪئي وئي آهي ۽ هاڻ هو پاڪستاني ٽيم سان گڏ نيوزيلينڊ جي دوري تي اچي سگهي ٿو، سندن چوڻ هو ته محمد عامر پنهنجي سزا ڪاٽي چڪو آهي ۽ نيوزيلينڊ ڪرڪيٽ بورڊ به سندس حمايت ڪئي آهي، تنهن ڪري انهن سڀني معاملن کي نظر ۾ رکندي کيس ويزا جاري ڪئي وئي آهي، واضح هجي ته پاڪستان ڪرڪيٽ بورڊ جي سليڪٽرن 23 ورهين جي محمد عامر کي ويزا ملڻ جي شرط تي نيوزيلينڊ خلاف ٽن ون ڊي ۽ ٽن ٽي ٽوئنٽي ميچن واري سيريز لاءِ قومي ٽيم ۾ شامل ڪيو هو،پاڪستاني ڪرڪيٽ ٽيم جو نيوزيلينڊ جو رٿيل دورو 15 جنوري کان شروع ٿيندو، محمد عامر تي 2010ع ۾ انگلينڊ خلاف لارڊز ٽيسٽ ۾ اسپاٽ فڪسنگ جو ڏوهه ثابت ٿيو، جنهن کانپوءِ مٿس ڪرڪيٽ کيڏڻ تي 5 سال پابندي مڙهي جيل اماڻيو ويو هو.

دهشتگرد تنظيمن سان ڪا به رعايت نه ڪئي ويندي: راحيل شريف

راولپنڊي (اين اين آءِ) پاڪ فوج جي سربراهه جنرل راحيل شريف دهشتگردي تنظيمن سان ڪا به رعايت نه ڪرڻ جو عزم ورجائيندي جٽادار امن ۽ سيڪيورٽي جي حصول تائين ڪارروائيون جاري رکڻ جي هدايت ڪئي آهي ۽ آپريشن ضرب عضب جي اڳڀرائي ۽ فوج جي پيشوراڻي تيارين تي مڪمل اطمينان جو اظهار ڪيو آهي. آءِ ايس پي آر مطابق چيف آف آرمي اسٽاف جنرل راحيل شريف جي صدارت ۾ ڪور ڪمانڊر ڪانفرنس اربع تي جنرل هيڊ ڪوارٽرز ۾ منعقد ٿي، پيشوراڻي جي دلچسپي وارن معاملن کانسواءِ ڪانفرنس ۾ شامل ٿيندڙن ملڪ جي اندروني ۽ بيروني سيڪيورٽي صورتحال اڀرندڙ جيو اسٽريٽجڪ ماحول ۽ ان جا پاڪستان جي تعلق جي حوالي سان تفصيلي خيالن جي ڏي وٺ ڪئي. ڪانفرنس ۾ شامل ماڻهن کي موجوده ۽ اڀرندڙ خطرن ۽ سيڪيورٽي ۽ ايجنسين پاران سڄي ملڪ ۾ دهشتگردن ۽ ان جي حامين جي مڪينزم کي ٽوڙڻ لاءِ جاري آپريشن بابت تفصيلي بريفنگ ڏني وئي. پاڪ فوج ڪانفرنس کي خطاب ڪندي آپريشن ضرب عضب جي اڳڀرائي ۽ فوج جي پيشاورڻين تيارين تي مڪمل اعتماد جو اظهار ڪيو. آرمي چيف آپريشن ۾ شامل آفيسرن ۽ جوانن کي سندن ڪاميابي تي خراج عقيدت پيش ڪيو.

 

پي اي سي جو اجلاس، سنڌ جي تعليم کاتي ۾ 39 ڪروڙ رپيا ڪرپشن جو انڪشاف

ڪراچي (اين اين آءِ) سنڌ جي تعليم کاتي ۾ 39 ڪروڙ رپيا ڪرپشن جو انڪشاف ڪيو ويو آهي. ڪئناڊا پاران ٽيچرز ٽريننگ لاءِ ڏنل گرانٽ مان به 15 ڪروڙ رپين کان وڌيڪ رقم ضابطي جي خلاف استعمال ڪرڻ جي نشاندهي ڪئي وئي آهي. اربع ڏينهن پبلڪ اڪائونٽيس ڪميٽي سنڌ جو اجلاس چيئرمين سليم رضا جلباڻي جي صدارت هيٺ ٿيو اجلاس ۾ نثار کهڙو، پبلڪ اڪائونٽس ڪميٽي جا ميمبر، ڊي جي آڊٽ، سيڪريٽري تعليم ۽ ٻين عملدارن شرڪت ڪئي. اجلاس ۾ تعليم کاتي جي ڪارڪردگي ۽ ڪرپشن جي معاملي تي حڪمران جماعت پيپلز پارٽي ۽ مسلم ليگ (ن) جي ايم پي اي ميمبر پبلڪ اڪائونٽس ڪميٽي سورٺ ٿيٻو وچ ۾ منهن ماري ٿي اجلاس ۾ پبلڪ اڪائونٽس ڪميٽي ۾ آڊٽ رپورٽ جي روشني ۾ مالي سال 08 – 09 جو جائزو ورتو ويو اجلاس ۾ ڊي جي آڊٽ پاران تعليم کاتي ۾ ٽيچرز ٽريننگ جي مد ۾ ملندڙ امدادي رقم ۾ بي ضابگي جي نشاندهي ڪئي وئي. هن ٻڌايو ته هن پروجيڪٽ ۾ 15 ڪروڙ 13 لک کان وڌيڪ رقم خلاف ضابطه استعمال ٿي آهي ٽيچرز جي ٽريننگ 2007 ۾ ڪرائي وئي پر هن ٽريننگ لاءِ ڪتاب ۽ ٻئي مٽيريل جي ڇپائي 2008 ۾ ٿي، جنهن لاءِ ٻه ڪروڙ 7 لک جي رقم استعمال ڪئي وئي جڏهن ته ٽيچرز کي اسڪالرشپ جي مد ۾ هڪ ڪروڙ 39 لک جي رقم ڏني وئي جنهن جو ڪو به رڪارڊ نه آهي ۽ اها رقم ڪراس چيڪ جي ذريعي ناهي ڪئي وئي. ان سان ان رقم جي خرد برد ٿيڻ جا ثبوت ملن ٿا. هن چيو ته پابندي دوران تعليم کاتي عالمي ادارن پاران ڏنل گرانٽ مان گاڏيون به خريد ڪيون جنهن لاءِ 8 ڪروڙ جي رقم ادا ڪئي وئي پر گاڏيون صرف 2 ڪروڙ جون خريد ڪيون ويون ۽ باقي رقم جو ڪو به حساب ناهي ڏنو ويو جڏهن ته 67 لک رپيا فرنيچر جي مد ۾ خرچ ڪيا ويا جنهن لاءِ رولز مطابق اوپن ٽينڊرز نه ڪيا ويا جملي طور تي هڪ سال دوران آڊٽ کانپوءِ 39 ڪروڙ 96 لک رپيا خرد برد ٿيڻ جي نشاندهي ٿي آهي. ان موقعي تي سيڪريٽري تعليم فضل الله پيچوهو اعتراف ڪيو ته ٽيچرز ٽريننگ لاءِ پروجيڪٽ ۾ ڪرپشن ڪئي وئي پر ان وقت هو سيڪريٽري تعليم نه هو. هن ٻڌايو ته ٽيچرز جي ٽريننگ لاءِ هڪ ارب 46 ڪروڙ جي امدادي رقم حاصل ڪئي پر اهي منصوبا وقت تي مڪمل نه ٿي سگهيا. جنهن سان 69 ڪروڙ رپيا حڪومت کي واپس ڪيا ويا. سيڪريٽري تعليم فضل الله پيچوهو ٻڌايو ته هي پراجيڪٽ هن جي تعليم کاتي جي چارج وٺڻ کان اڳ جا آهن جيڪي ان جي دوري ۾ ڪم ٿي رهيو آهي هو ان جو ذميوار آهي. هڪ هڪ پائي جو حساب ڏيڻ لاءِ تيار آهيان جيڪي ماڻهو مون کان اڳ ڪم ڪري رهيا هئا انهن کي گهرائي حساب ڪتاب ورتو وڃي ۽ انهن ڪيسن جي وزيراعليٰ سنڌ جي انسپيڪشن ٽيم جاچ ڪري رهي آهي. پبلڪ اڪائونٽس ڪميٽي چيئرمين وزيراعليٰ انسپيڪشن ٽيم کي ٻن هفتن ۾ بريفنگ لاءِ طلب ڪري ورتو آهي. اجلاس جي دوران مسلم ليگ (ن) جي ايم پي اي ۽ پبلڪ اڪائونٽس ڪميٽي جي ميمبر سورٺ ٿيٻو چيو ته سيڪريٽري تعليم بااثر شخص آهي ان لاءِ اجلاس ۾ ايڏي وڏي ڪرپشن تي خاموشي اختيار ڪئي پئي وڃي جنهن تي پيپلز پارٽي سان تعلق رکندڙ ايم پي اي سيد سردار احمد شاهه ۽ ٻين وچ ۾ سخت جملن جي ڏي وٺ به ٿي. اجلاس کانپوءِ ميڊيا سان ڳالهائيندي سيڪريٽري تعليم چيو ته قمبرشهدادڪوٽ ۾ استادن جون جعلي مقرريون ٿيڻ جو اسڪينڊل آڏو اچڻ کانپوءِ سڄي سنڌ جي استادن کي ڏنل پروموشن جي جاچ جو حڪم ڏئي ڇڏيو آهي هن چيو ته منهنجي دور ۾ ڪو به غلط ڪم ٿيڻ نه ڏينداسين.

 

آصف زرداري ريفرنس ڪيس: سمورو رڪارڊ اڄ هر حال ۾ پيش ڪرڻ جو حڪم

راولپنڊي (م.ڊ) اڳوڻي صدر ۽ پيپلز پارٽي جي شريڪ چيئرمين آصف علي زرداري خلاف غيرقانوني ملڪيت ٺاهڻ واري ريفرنس ۾ عدالتي رڪارڊ مان 300 صفحا گم ٿي ويا، جنهن تي جج سخت ڪاوڙ ڏيکاري آهي، اڳوڻي صدر آصف زرداري خلاف غيرقانوني ملڪيت ٺاهڻ واري ڪيس جي ٻڌڻي راولپنڊي جي عدالت نمبر هڪ جي جج خالد رانجها جي اڳواڻي ۾ ٿي، ان موقعي تي هڪ عورت شاهد به موجود هئي پر ٻڌڻي دوران جڏهن عدالتي رڪارڊ ڏٺو ويو ته ان مان 300 صفحا گم هئا، جنهن تي جج خالد رانجها سخت ڪاوڙ جو اظهار ڪيو ۽ حڪم ڏنو ته سڄو گم ٿيل رڪارڊ منظرعام تي آندو وڃي، اهڙي حڪم کانپوءِ عدالتي عملي رڪارڊ جي ٻن ڪلاڪن تائين ڇنڊڇاڻ ڪئي ۽ عدالت ۾ ڪاغذڻ جا ڍڳ لڳائي ڇڏيا، عدالتي عملي جي چستي کانپوءِ به گم ٿيل صفحا نه ملڻ تي جج خالد رانجها ڪيس جي ٻڌڻي سڀاڻي تائين روڪيندي حڪم ڏنو ته گم ٿيل رڪارڊ هر حال ۾ اڄ تائين عدالت جي سامهون پيش ڪيو وڃي، ٻي صورت ۾ عدالتي عملي خلاف سخت ڪارروائي ڪئي ويندي،عدالت عورت شاهد کي به سڀاڻي تائين جا سمن جاري ڪندي بيان قلمبند ڪرائڻ لاءِ گهرائي ورتو، ٻئي پاسي آصف زرداري جي وڪيل فاروق ايڇ نائڪ عدالتي اڱڻ ٻاهران ميڊيا سان ڳالهائيندي چيو ته سندس اصيل خلاف ڪيس 2001ع ۾ داخل ٿيو ۽ تڏهوڪي جاچ آفيسر اهو رڪارڊ جوڙيو هو، هن چيو ته ڪيس جو سڄو رڪارڊ عدالت وٽ هو، جيڪو عدالت ۾ ئي جمع ڪرايو ويو هو.

 

وزيراعظم سريلنڪا جو دورو مڪمل ڪرڻ کانپوءِ وطن واپس پهچي ويو

اسلام آباد (بيورو)وزيراعظم نواز شريف سريلنڪا جو ٽن ڏينهن جو سرڪاري دورو مڪمل ڪرڻ کانپوءِ اڄ اربع ڏينهن وطن واپس پهچي ويو. ان کان اڳ وزيراعظم ڪولمبو کان واپس روانو ٿيو ته سريلنڪا جي وزيراعظم رانيل وڪرما سنگهي بندرا نائيڪي انٽرنيشنل ايئرپورٽ ڪولمبو تي کيس شاندار انداز ۾ رخصت ڪيو ۽ سريلنڪن فوج جي دستي وزيراعظم کي سلامي پيش ڪئي. سريلنڪا ۾ پاڪستان جو هاءِ ڪمشنر ميجر جنرل (ر) سيد شڪيل حسين ۽ سريلنڪن حڪومت جا اعليٰ عهديدار به ان موقعي تي موجود هئا. ان کان اڳ ڪالهه اربع ڏينهن وزيراعظم سريلنڪا جي خوبصورت ۽ ٻئي وڏي شهر ڪينڊي ۾ تاريخي جاين جو دور ڪيو. هن ٻڌ بابت مقدس شين واري مندر جو دورو ڪيو ۽ جناح هال ۾ علائقي جي مسلمان اڳواڻن سان ملاقات پڻ ڪئي. وزيراعظم نباتاتي باغ ۾ ٻوٽو پڻ هنيو. پنهنجي دوري دوران وزيراعظم گڏيل دلچسپي جي معاملن تي سريلنڪا جي قيادت سان ملاقات ڪئي. سريلنڪن صدر ميٿري پالاسري سينا سان گڏ وزيراعظم واپار، مالياتي انٽيليجنس جي ڏي وٺ، سائنس ۽ ٽيڪنالاجي ۽ صحت جي شعبن ۾ 8 معاهدن تي صحيحن واري  تقريب ۾ پڻ شرڪت ڪئي. هن سريلنڪا جي پارليامينٽرين، وزيرن ۽ سفارتڪارن کي پاڪ سريلنڪا لاڳاپن جي حوالي سان خصوصي ليڪچر پڻ ڏنو. دوري دوران وزيراعظم پاڪستاني مصنوعات جي نمائش جو افتتاح پڻ ڪيو. هن سريلنڪا جي ڪاروباري اڳواڻن سان ملاقات ڪئي ۽ کيس پاڪستان ۾ مختلف شعبن ۾ سيڙپڪاري جي دعوت پڻ ڏني. دوري جي دوران وزيراعظم جي وفد ۾ بيگم ڪلثوم نواز، واپار وارو وفاقي وزير خرم دستگير، دفاعي پيداوار وارو وفاقي وزير رانا تنوير حسين، وزيراعظم جو پرڏيهي معاملن وارو خصوصي معاون طارق فاطمي ۽ قومي سلامتي جو صلاحڪار ليفٽيننٽ جنرل (ر) ناصر خان جنجوعه پڻ شامل هئا.

 

آئين کي ڪوئي ڊڪٽيٽر ختم نه ڪري سگهيو: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته آئين کي ڪوئي ڊڪٽيٽر ختم نه ڪري سگهيو پر اسان اڄ پاڻ آئين کان مٿانهون ٿي سوچينداسين ته پوءِ اسان کي ڪنهن دشمن جي ضرورت نه آهي حڪومت پارليمينٽ کي ڪائي اهميت نٿي ڏي جيڪڏهن هر ڪم عدليه جي حڪم تي ڪرڻو آهي ته پوءِ هن اداري جو ڪوئي فائدو نه آهي گڏيل مفادن واري ڪائونسل جو اجلاس ڇو نه سڏايو پيو وڃي پي پي اختيار پارليمينٽ کي منتقل ڪيا آهن ميمو اسڪينڊل پارليمينٽ کي ڪمزور ڪرڻ لاءِ آندو ويو هو ان وقت جو چيف جسٽس پيغام اماڻيندو هو ته هي ڪم مان اوهان کي ڪري ڏيان ٿو اڄ اهو ميمو اسڪينڊل ڪيڏانهن ويو ان جو رائيٽر ڪير هو ان وقت ته سمورا وزير هتي اچي ويهندا هئا جڏهن ته حڪومتي ميمبر اويس احمد خان لغاري چيو ته پرڏيهي صلاحڪار واضح ڪيو ته اسان ٻنهي ملڪن ۾ ڇڪتاڻ گهٽائڻ ۾ ڪردار ادا ڪنداسين اپوزيشن ان ڳالهه کي ڇو نظرانداز ڪري رهي آهي ظاهر آهي ته اسان غير جانبدار رهي ئي ڇڪتاڻ گهٽائي سگهون ٿا ان صورتحال تي ان ڪئميرا بريفنگ هئڻ گهرجي اسان ٻنهي ملڪن مان ڪنهن سان لاڳاپا خراب ڪرڻ نٿا چاهيون اربع تي قومي اسيمبلي جي اجلاس ۾ سيد خورشيد احمد شاهه پوائنٽ آف آرڊر تي ڳالهائيندي چيو ته صوبن ۽ وفاق اندر اعتماد جي کوٽ ۽ غلط فهمي وڌي رهي آهي جنهن ۾ خيبرپختونخواهه ۽ سنڌ سرفهرست آهن وفاقي حڪومت گڏيل مفادن واري ڪائونسل کي مسلسل ننظرانداز ڪري رهي آهي هي نطراندازي آئين جي نظراندازي آهي جيڪا خطرناڪ ڳالهه آهي 9 مهينن ۾ صوبا بار بار سي سي آءِ جو اجلاس نه هئڻ جي نشاندهي ڪري رهيا آهن ادارا مضبوط ٿيندا ته ملڪ مضبوط ٿيندو حڪومت پارليمينٽ طرف ڌيان نه پئي ڏي وزيراعظم جي حاضري تمام گهٽ آهي صرف ڪجهه وزير باقاعدگي سان ايوان ۾ اچن ٿا پ پ شروعاتي اڍائي سالن ۾ 57 بل منظور ڪيا جڏهن ته هن حڪومت 37 قانون منظور ڪيا آهن جڏهن ته هر ڪم عدالت جي حڪم تي ڪرڻو آهي ته هو هن اداري جو ڪوئي فائدو نه آهي پ پ پ اختيار پارليمينٽ کي منتقل ڪيا آهن. اويس لغاري چيو ته شيعا عالم جي ڦاهي کان پوءِ مذهبي ڏڦيڙ سينٽرل اوڀر ۾ وڌڻ جو خدشو آهي چين يو ڪي آمريڪا جرمني ۽ روس جي به صورتحال تي نظر رکيل آهي ڪي ايس اي ۽ ايران يمن ۽ شام تڪرار جو به حصو آهن شام ۾ به هن وقت تائين اڍائي لک ماڻهو پنهنجون حياتيون وڃائي ڇڪا اهن پرڏيهي صلاحڪار واضح ڪيو ته اسان ٻنهي ملڪن ۾ تڪرار گهٽائڻ ۾ ڪردار ادا ڪنداسين اپوزيشن ان ڳالهه کي ڇو نظرانداز ڪري رهي آهي. پي ٽي آءِ جي قومي اسيمبلي ميمبر شفقت محمود چيو ته پرڏيهي وزارت ۾ پهريان ئي تمام گهڻي ڀيڙهه آهي الله ڪري ڪٿي جڳهه اويس لغاري کي به ملي وڃي پٺان ڪوٽ حملي سان اسان جا ڀارت سان لاڳاپن ۾ اثر پوندا ڪالهه ڀارتي وزراعظم محمد نوازشريف سان ڳالهايو ۽ چيو پيو وڃي ته هن ڪجهه ثبوت ڏنا ان صورتحال تي ايوان کي اعتماد ۾ ورتو وڃي ۽ ڪهڙا ثبوت ڏنا ويا. ڇا هاڻي فارن سيڪريٽريز جي ملاقات شيڊول تحت ٿيندي صدر مملڪت جي خطاب ۾ بحث ۾ حصو وٺندي شفقت محمود چيو ته حڪومت جي گورننس تي ڪائي توجهه نه آهي آبادي تيزي سان وڌي رهي آهي پاڻي جي کوٽ ٿي رهي آهي هي اسيمبلي صرف ڏيکاءُ آهي اصل شئي گورننس آهي پر گورننس جي خراب حالت آهي.

 

ڀارتي قيادت پٺاڻ ڪوٽ ايئر بيس تي حملي جي حوالي سان پاڪستان تي ڪو الزام ناهي هنيو: خواجه آصف

اسلام آباد(اي پي پي) دفاع واري وفاقي وزير خواجه محمد آصف چيو آهي ته ڀارتي قيادت پٺاڻ ڪوٽ ايئر بيس تي دهشتگرد حملي جي حوالي سان پاڪستان تي ڪو الزام نه هنيو آهي. اربع ڏينهن هتي نيوز چئنل سان ڳالهائيندي هن چيو ته ڪجهه عنصر دهشتگردي جي اهڙن واقعن ذريعي ٻنهي پاڙيسري ملڪن وچ ۾ ڳالهين جو عمل خراب ڪرڻ چاهين ٿا. هن چيو ته وزيراعظم محمد نواز شريف افسوسناڪ واقعي تي ڀارتي وزيراعظم کي فون ڪيو جنهن ان ڳالهه تي اتفاق ڪيو ته دهشتگردن لاءِ نهايت مناسب جواب ٻنهي پاڙيسري ملڪن وچ ۾ خوشگوار ناتا آهن. هن چيو ته ٻنهي ملڪن جي اڳواڻن پٺاڻ ڪوٽ حملي جي حوالي سان ڪو تڪراري بيان نه ڏنو آهي. هڪ سوال تي هن چيو ته پاڪستان پاڻ دهشتگردي جو شڪار آهي ۽ ان لعنت خلاف ڪامياب جنگ وڙهي رهيو آهي.