تازيون خبرون

Daily Archives: January 5, 2016

مون انوراگ ڪيشپ کي اداڪار بڻجڻ لاءِ قائل ڪرڻ جي ڪوشش ڪئي: سوناڪشي سنها

ممبئي (شوبز نيوز) بالي ووڊ اداڪاره سوناڪشي سنها چيو آهي ته هن هدايتڪار انوراگ ڪيشپ کي اداڪار بڻجڻ لاءِ قائل ڪرڻ جي ڪوشش ڪئي آهي. ڀارتي سڌ سماءَ وارن ذريعن موجب اداڪاره سوناڪشي سنها جيڪا فلم ”اڪيرا“ ۾ هدايتڪار انوراگ ڪيشپ سان ڪم ڪري رهي آهي چيو آهي ته هن سٺي اداڪاري ڪئي آهي ۽ هو ڪردار جي حوالي سان مناسب آهي. اداڪاره چيو ته هن انوراگ کي مڪمل طور اداڪار بڻجڻ جي صلاح ڏني آهي. هن چيو ته هن اندر اداڪاري جي صلاحيت موجود آهي ۽ هو سٺو اداڪار ثابت ٿي سگهي ٿو. واضح رهي هدايتڪار انوراگ ڪيشپ پنهنجي پهرين فلم ”اڪيرا“ ۾ ناڪاري ڪردار ادا ڪري رهيو آهي.

 

سکڻ ۽ نوان تجربا حاصل ڪرڻ لاءِ فلمن ۾ ڪم ڪندي آهيان: ديويا دتا

ممبئي (شوبز نيوز) بالي ووڊ اداڪاره ديويا دتا چيو آهي ته هو فلمن ۾ ڪم لاڳاپا وڌائڻ لاءِ نه پر سکڻ لاءِ ڪندي آهي. ڀارتي سڌ سماءَ وارن ذريعن موجب اداڪاره چيو ته فلمن ۾ دوستن سان گڏ ڪم ڪرڻ ۾ مزو ايندو آهي پر هو فلمن ۾ ڪم سکڻ ۽ نوان تجربا حاصل ڪرڻ لاءِ ڪندي آهي. هن چيو ته هو انهن اداڪارائن مان ناهي جيڪي رڳو لاڳاپا وڌائڻ لاءِ ڪم ڪنديون آهن. اداڪاره چيو ته هن دور ۾ هر شئي ڪمرشل ٿي وئي آهي. واضح رهي ته سندس نئين ايندڙ فلم ”چاڪ اينڊ ڊسٽر“ آهي.

 

نيوزيلينڊ سريلنڪا کي پنجين ۽ آخري ون ڊي انٽرنيشنل ميچ ۾ 36 رنسن تان هارائي سيريز 1-3 تان کٽي ورتي

مائونٽ ميسوگيوني (اسپورٽس نيوز) نيوزيلينڊ مارٽن گپٽل جي شاندار سينچري ۽ ميٽ هينري جي شاندار بالنگ جي بدولت سريلنڪا کي پنجين ۽ آخري ون ڊي انٽرنيشنل ميچ ۾ 36 رنسن تان هارائي ڪري پنجن ميچن جي سيريز 1-3 تان کٽي ورتي. مارٽن گپتل شاندار بيتنگ جو مظاهرو ڪندي 102 رنسون، ڪين وليمسن ۽ روز ٽيلر ترتيبوار 61-61 رنسن تان نمايان رهيا. ميٽ هنري ميچ ۾ شاندار بالنگ ڪندي پنج آئيلينڊرز کي پويلين جو رستو ڏيکاريو ۽ ميچ جو بهترين رانديگر قرار ڏنو ويو.

 

اسلام آباد بليو ۽ اسلام آباد وائيٽس جي وومينز بيس بال ٽيمن وچ ۾ ميچ 8 جنوري تي کيڏي ويندي

اسلام آباد (اسپورٽس نيوز) اسلام آباد بيس بال ايسوسيئيشن جي انتظام هيٺ عورتن جي نمائشي بيس بال ميچ اسلام آباد بليو ۽ اسلام آباد وائٽس جي ٽيمن وچ ۾ 8 جنوري تي پاڪستان اسپورٽس ڪامپليڪس گرائونڊ تي کيڏي ويندي. اسلام آباد بيس بال ايسوسئيشن جي صدر طاهر محمود ٻڌايو ته ميچ جا انتظام مڪمل ڪيا پيا وڃن ۽ ميچ جو خاص مهمان اسلام آباد بيس بال ايسوسيئيشن جو سيڪريٽري محمد رمضان قصوري هوندو.

 

2018ع تائين بجلي جي لوڊشيڊنگ ختم نه ٿي سگندي: وفاقي حڪومت جو اعتراف

اسلام آباد(بيورو) پاڻي ۽ بجلي جي وفاقي وزير خواجا آصف چيو آهي ته حڪومت 2018ع تائين بجلي جي لوڊشيڊنگ تي ڪنٽرول نه ڪري سگهندي،موجودا حڪومت بجلي جي بلن ۾ مختلف قسمن جا 6 ٽيڪس لڳائي ڇڏيا آهن.سندس وڌيڪ چوڻ هو ته شهرن ۾ 6 ڪلاڪ،ٻهراڙي جي علائقن ۾ 8 ڪلاڪ جڏهن ته صنعتي علائقن ۾ ڪا به لوڊشيڊنگ نه پئي ٿئي.سندس چوڻ هو ته خودمختيار ڪمپنيون به 100 سيڪڙو بجلي پيدا نه ٿيون ڪري ڏين .پوري ملڪ جي بجلي لوڊشيڊنگ جو تفصيل ڏيندي خواجا آصف چيو ته شهري علائقن ۾ 6 ڪلاڪ ۽ ٻهراڙي وارن علائقن ۾ 8 ڪلاڪ لوڊشيڊنگ ٿي رهي آهي،جڏهن ته ڪاروباري علائقن ۾ لوڊشيڊنگ روڪي وئي آهي.بجلي جي کوٽ کي مڃيدي وفاقي وزير چيو ته حڪومت 2018 ع تائين بجلي کوٽ پوري نه ڪري سگهندي،ڇاڪاڻ ته ڪو به بجلي گهر 100 سيڪڙو بجلي پيدا نه ٿوڪري.

 

سنڌ حڪومت جو صوبي مان زڪوات وصولي پاڻ ڪرڻ جو فيصلو

ڪراچي (اسٽاف رپورٽر) سنڌ سرڪار صوبي ۾ زڪوات جي وصولي پاڻ ڪرڻ جو فيصلو ڪري ڇڏيو جنهن لاءِ وفاق کي خط موڪليو ويندو ۽ انهيءَ حوالي سان اسٽيٽ بينڪ آف پاڪستان کي به خط لکيو ويندو. اهو فيصلو وزير اعليٰ هائوس ۾ سنڌ جي وڏي سيد قائم علي شاهه جي صدارت ۾ منعقد اجلاس ۾ ڪيو ويو. اجلاس ۾ ناڻي وارو صوبائي وزير سيد مراد علي شاهه، زڪوات وارو صلاحڪار دوست محمد راهمون، چيئرمين زڪوات ڪائونسل سنڌ جسٽس (ر) زاهد قربان علوي، چيف سيڪريٽري سنڌ صديق ميمڻ، وڏي وزير جو پرنسپل سيڪريٽري علم الدين بلو، ناڻي وارو سيڪريٽري سهيل راجپوت، سيڪريٽري زڪوات رياض ميمڻ، سيڪريٽري انٽر پراوينشل ڪوآرڊيننيشن قاضي شاهد پرويز ۽ ٻين شرڪت ڪئي. چيف سيڪريٽري سنڌ صديق ميمڻ چيو ته 18هين آئيني ترميم کان پوءِ سنڌ حڪومت 2011ع ۾ زڪوات ۽ عشر ايڪٽ پاس ڪيو هو، جنهن تحت سنڌ حڪومت زڪوات ڪائونسل جو قيام ڪيو ۽ اهو ئي قانون صوبائي حڪومت کي زڪوات جي وصوليءَ ۽ ورهائڻ جا اختيارت ڏئي پيو. بين الصوبائي رابطي واري کاتي جي سيڪريٽري قاضي شاهد پرويز چيو آهي ته آئيني ۽ قانوني لحاظ کان زڪوات جي وصولي واري معاملي تي سنڌ حڪومت جي پوزيشن بلڪل واضع آهي. هن چيو ته گڏيل مفادن واري ڪونسل ڪميٽي پنهنجي اجلاس جي دوران فيصلو ڪيو هو ته زڪوات وصولي ۽ ورهائڻ وارو طريقيڪار 2015ع تائين جاري رکيو ويندو. سنڌ جي وڏي وزير سيد قائم علي شاهه فيصلو ڪيو آهي ته سنڌ حڪومت نئين سال 2016ع کان صوبي ۾ زڪوات جي وصولي پاڻ ڪندي ۽ انهيءَ حوالي سان وفاقي حڪومت کي آگاهه ڪيو ويندو. هن چيف سيڪريٽري سنڌ کي هدايت ڪئي ته هو وفاقي حڪومت کي ان سلسلي ۾ خط لکي ۽ بين الصوبائي رابطي واري سيڪريٽري کي به ان حوالي سان اطلاع ڏئي ته سنڌ حڪومت نئين سال کان زڪوات جي وصولي پاڻ ڪرڻ جو اصولي فيصلو ڪري ڇڏيو آهي. سنڌ جي وڏي وزير سيد قائم علي شاهه چيف سيڪريٽري سنڌ کي هدايت ڪئي ته اسٽيٽ بينڪ کي پڻ خط لکي آگاهه ڪري ته هاڻ زڪوات جي وصولي سنڌ سرڪار ڪندي. ۽ انهيءَ حوالي سان هدايت ڪئي ته اسٽيٽ بينڪ جي ڊپٽي گورنر سان ملاقات ڪري ۽ زڪوات جي وصولي جي مڪمل مڪينزم ۽ سنڌ حڪومت جي اڪائونٽ ۾ جمع ڪرڻ جا معاملا طئي ڪيا وڃن. واضع رهي ته ان وقت وفاقي حڪومت سنڌ جي زڪوات وصولي جي ڪل رقم مان صرف 23.7 سيڪڙو سنڌ کي ڏئي رهي آهي. سنڌ جي وڏي وزير سيد قائم علي شاهه سيڪريٽري زڪوات ۽ زڪوات ڪونسل جي اختيارين کي بينڪ ڪٽوتي کان سواءِ زڪوات وصولي جا ٻيا ذريعا ڳولهڻ جي هدايت ڪئي. هن چيف سيڪريٽري سنڌ تي زور ڀريو ته زڪوات ڪونسل جي تشڪيل نئين سر ڪئي وڃي ۽ ان ۾ چيمبر آف ڪامرس اينڊ انڊسٽري جا نمائندا ۽ ٻيا معتبر شخص شامل ڪيا وڃن.

 

وزيراعظم نوازشريف سريلنڪا جي ٽن ڏينهن جي سرڪاري دوري تي ڪولمبو پهتو، شاندار استقبال

اسلام آباد/ڪولمبو (اين اين آءِ) وزيراعظم نوازشريف سومر تي سريلنڪا جي ٽن ڏينهن جي سرڪاري دوري تي ڪولمبو پهتو جتي ان جو شاندار استقبال ڪيو ويو پنهنجي دوري ۾ هو پاڪستان ۽ سريلنڪا وچ ۾ مختلف شعبن ۾ تعاون جي ڪيترن ئي ٺاهڻ تي صحيحون ڪيون وينديون سريلنڪا جي وزيراعظم رانيل شريان مڪرمه سنگي پنهنجي پرڏيهي وزير سان گڏ پاڪستاني هم منصب جي هوائي تي استقبال ڪيو وزيراعظم سريلنڪا جي صدر ۽ ٻي قيادت سان گڏيل دلچسپي جي معاملن تي ۽ علائقائي ۽ عالمي صورتحال تي خيالن جي ڏي وٺ ڪندو بيگم ڪلثوم نواز، خرم دستگيرخان رانا تنوير حسين طارق فاطمي ۽ قومي سلامتي جو مشير ليفٽيننٽ جنرل رٽائرڊ ناصر خان جنجوڳا به وزيراعظم سان گڏ آهي. وزيراعظم پنهنجي دوري سريلڪا جي وزيرن ۽ پارليمينٽ جي ميمبرن جي هڪ اجلاس کي پڻ خطاب ڪندو. جنهن ۾ هو پاڪستاني حڪومت جي ترجيحن ۽ علائقائي ۽ عالمي معاملن تي کيس پاڪستان جي پاليسين سان آگاهه ڪندو وزيراعظم سريلنڪا جي لڪشمن جو درگاهه مر انسٽيٽيوٽ آف انٽرنيشنل رليشنز اينڊ اسٽريٽجڪ اسٽيڊيز جي دعوت تي اتي هڪ ليڪچر به ڏيندو.

 

 

قانون جي ڀڃڪڙي ڪرڻ وارن ۽ آمريتي دور کي ڀليڪار ڪندڙن جو به احتساب ٿيڻ گهرجي:آصف زرداري

اسلام آباد (اين اين آءِ) پاڪستان پيپلزپارٽي جي ڪو چيئرمين ۽ اڳوڻي صدر آصف زرداري چيو ته من پسند احتساب مقدس ڳئون جو نظريو، ٻٽو معيار ۽ سياسي جوڙ توڙ لاءِ ڪرپشن جو نالو استعمال ڪرڻ به بدترين قسم جي ڪرپشن آهي مزاحمت ڪئي ويندي پي سي او تحت حلف کڻي آئين کان فري وڃن ڊڪٽيٽرن پاران ملڪ تي قبضي جي توثيق ڪرڻ ۽ نان اسٽيٽ ايڪٽرز جي ذريعي ملڪي سلامتي کي داءُ تي لڳائڻ جو به احتساب ٿيڻ گهرجي. ذوالفقار علي ڀٽو شهيد جي 88هين سالگرهه جي موقعي تي آصف زرداري پنهنجي پيغام ۾ چيو ته اهو عزم ورجايو ٿا ته ڪنهن فرد يا اداري کي زبردستي اقتدار تي قبضو ڪرڻ نه ڏينداسين ڇو ته هي اقتدار صرف عوام جو حق آهي مذهب جي نالي تي اسان انتهاپسندن کي اقتدار تي قبضو ڪرڻ نه ڏينداسين عدليه کي اهو اختيار آهي ته پارليمينٽ پاران جوڙيل قانونن جي آئين جي پسمنظرن ۾ نظرثاني ڪري سگهي پر عدليه ڪائي قانون سازي نٿي ڪري سگهي ۽ نه ئي ان جي مجاس آهي پنهنجي پيغام ۾ پاڪستاني عوام خاص ڪري پاڪستاني نوجوانن کي اپيل ڪئي ته هو پاڪستان جي پهرين چونڊيل وزيراعظم ذوالفقار علي ڀٽو جي سياسي فلسفي جو مطالعو ڪري ۽ ان فلسفي جي مدد سان ملڪ کي پيش ايندڙ سماجي اقتصادي ۽ سياسي چئلينجز تي ڪنٽرول ڪرڻ جو رستو ڳولهي شهيد ڀٽو جو نظريو هو ته اقتدار جو سرچشمو عوام آهي اڄوڪي ڏينهن اسان پنهنجي عزم جو ورجاءُ ڪيون ٿا ته ڪنهن فرد يا اداري کي زبردستي اقتدار تي قابض ٿيڻ نه ڏينداسين ڇو ته هي اقتدار صرف عوام جو حق آهي اڳوني صدر جي ترجمان سينيٽر فرحت الله بابر اڳُڻي صدر جو حوالو ڏيندي چيو ته آصف علي زرداري پنهنجي پيغام وڌيڪ چيو ته مذهب جي نالي تي اسان انتهاپسندن کي اقتدار تي قابض نه ٿيڻ ڏينداسين شهيد ڀٽو ملڪ کي متفق آئين ڏنو جنهن ۾ چيو ويو آهي ته صرف ۽ صرف پارليمينٽ کي اختيار آهي ته عوام لاءِ آئين ۾ ترميمو ڪري سگهي ۽ قانونسازي به ڪري سگهي عدليه کي اهو به اختيار آهي ته پارليمينٽ پاران جوڙيل قانونن جي آئين جي پسمنظر ۾ نطرثاني ڪري پر عدليه ڪائي قانونسازي نٿو ڪري سگهي ۽ نه ئي ان جي مجاز آهي قانونن تي انتظاميه تي بغير ڪنهن جي دخل اندازي جي عمل ڪرڻ گهرجي اڳوڻي صدر آصف علي زردار يچيو ته پاڪستان پيپلزپارٽي ان ڳالهه تي يقين رکي ٿي ته ڪرپشن جا اجايو الزام مڙهيا پيا وڃن.

 

ذوالفقار علي ڀٽو جي 88 هين سالگره اڄ جوش ۽ جذبي سان ملهائي ويندي

ڪراچي (اين اين آءِ) پاڪستان پيپلز پارٽي جي باني قائد ذوالفقار علي ڀٽو جي 88 هين سالگره اڄ اڱاري پنج جنوري تي عقيدت احترام ۽ جوش جذبي سان ملهائي ويندي ڪراچي جي ڇهن ضلعن ۾ سالگره جون تقريبون ڪوٺايون وينديون جتي شهيد ڀٽو جي سالگره جو ڪيڪ به ڪاٽيو ويندو قرآن خواني به ٿيندي ۽ پيپلز پارٽي جا اڳواڻ شهيد ڀٽو کي ان جي ملڪ ۽ اسلامي دنيا لاءِ ڪيل خدمتن تي خراج عقيدت پيش ڪندا. پيپلز پارٽي ڪراچي ڊويزن جي پڌرنامي مطابق ملير جي علائققي گلشن حديد ۾ سالگره جي تقريب ضلعي آفيس ۾ منعقد ٿيندي ڊسٽرڪٽ ڪورنگي ۾ ماڊل ڪالوني ۾ قائم ضلعي آفيس ۾ منجهند ٽي وڳي، ڊسٽرڪٽ سائوٿ ۾ ضلعي آفيس موسيٰ لين ۾ چار وڳي سالگره جي تقريب جو اهتمام ڪيو ويندو. اهڙي طرح ڊسٽرڪٽ ويسٽ ۾ حبيب بئنڪ سائٽ ايريا ۾ ڊسٽرڪٽ آفيس ۾ ٽي وڳي، ڊسٽرڪٽ ايسٽ ۾ سالگره جي تقريب 3 وڳي کان منجهند پيپلز سيڪريٽريٽ ۾ منعقد ٿيندي جڏهن ته ڊسٽرڪٽ سينٽرل ۾ سالگره جي مرڪزي تقريب هيدري ڀٽو چوڪ نارٿ ناظم آباد ۾ ٽي وڳي منعقد ٿيندي پيپلز لائيرز فورم ڪراچي ڊويزن جي اهتمام هيٺ ڀٽو شهيد جي 88 سالگره جو پروگرام ڪراچي بار ايسوسيئيشن جي شهيد پنجاب هال ۾ صبح يارهين وڳي منعقد ٿيندو جتي وڪيلن جو وڏو انگ شرڪت ڪندو.

 

ناڻي وزير سان ورلڊ بئنڪ جي ايگزيڪيوٽو ڊائريڪٽر جي ملاقات، گڏيل دلچسپي وارن معاملن تي ڳالهيون

اسلام آباد (اين اين آءِ) وفاقي ناڻي واري وزير اسحاق ڊار سان ورلڊ بئنڪ جي ايگزيڪيوٽو ڊائريڪٽر ناصر محمود کوسا ملاقات ڪئي ۽ گڏيل دلچسپي وارن معاملن تي خيالن جي ڏي وٺ ڪئي. ناصر محمود کوسا ورلڊ بئنڪ جي صدر جي تازي پاڪستان جي دوري بابت آگاهه ڪيو. اسحاق ڊار چيو ته بئن الاقوامي ادارن پاران معاونت ۽ تعاون واکاڻ جوڳو آهي جيڪي جملي معاشي استحڪام جا مقصد حاصل ڪرڻ ۾ مددگار ثابت ٿيو آهي. هن توقع ظاهر ڪئي ته عالمي بئنڪ سان پارٽنرشپ مستقبل ۾ به جاري رهندي. ورلڊ بئنڪ جي ايگزيڪيوٽو ڊائريڪٽر چيو ته موجوده حڪومت جي مشڪل ۽ انتهائي ضروري سڌارن جي ڪامياب نفاذ سان بين الاقوامي سطح تي پاڪستان جو اميج بهتر ٿيو آهي. هن چيو ته ورلڊ بئنڪ جي صدر جي تازي دوري جا پاڪستان ۾ انفرا اسٽرڪچر ۽ سماجي ترقي جي شعبي ۾ مثبت اثر پوندا.