تازيون خبرون

Daily Archives: January 4, 2016

ڪراچي ۾ داعش سان لاڳاپيل عورتن جو ٻيو ٽولو ظاهر، 121 عورتن جي لسٽ تيار

ڪراچي(اسٽاف رپورٽر) ڪراچي ۾ داعش سان واسطو رکندڙ عورتن جي هڪ ٻيو ٽولو  ظاهر ٿي پيو  آهي، ميڊيا رپورٽ مطابق پنجاب مان پڪڙيل داعش جي ڪارڪن ڪماران گجر جاچ دوران ٻڌايو ته ڪراچي ۾ هن جي زال ۽ ڀيڻ داعش لاءِ رقم گڏ ڪنديون آهن، حساس اداري مطابق هو عورتن کي برين واش ڪرڻ ۾ مهارت رکندڙ آهن، جوابدار انڪشاف کانپوءِ حساس ادارن داعش سان واسطو رکندڙ 121 عورتن جي لسٽ تيار ڪري ورتي آهي، ان سلسلي ۾ مختلف  شهرن ۾ وڌيڪ عورتون گرفتار ڪرڻ جو امڪان آهي، ذريعن جو چوڻ آهي ته حساس ادارن داعش سان واسطو رکندڙ پرڏيهه ۾ رهندڙ پاڪستاني شهرين کي گرفتار ڪرڻ لاءِ انٽرپول سان رابطو ڪرڻ جو فيصلو ڪيو ويو آهي.

 

سمجهه ۾ نٿو اچي ته پنجاب ۾ ڪنهن جي ڇپر ڇانوَ هيٺ داعش جون ڀرتيون ٿي رهيون آهن: خورشيد شاهه

سکر(بيورو) قومي اسيمبلي ۾ مخالف ڌر جي اڳواڻ خورشيد شاهه سکر پهچڻ کانپوءِ ميڊيا سان ڳالهائيندي چيو ته سنڌ ۾ وفاقي حڪومتپاران مداخلت جي معاملي تي وزيراعظم جي سٿ ۾ شامل ڪجهه ماڻهو مسئلو وڌائي رهيا آهن.سندس چوڻ هو ته ڪراچي ۾ رينجرز اختيارن واري معاملي تي وفاق جي مداخلت تي صوبائي حڪومت کي شڪ آهن،جڏهن ته وزيراعظم نوازشريف جي سٿ جا ئي ڪجهه ماڻهو مسئلو وڌائي رهيا آهن،ان ڪري مسئلي جي حل لاءِ وزيراعظم پنهنجو ڪردار نڀائي.سندس اهو به چوڻ هو ته پنجاب ۾ داعش جي ڀرتين تي پنجاب حۡومت ماٺ آهي،ان ڪري سمجهه ۾ نٿو اچي ته پنجاب ۾ ڪنهن جي ڇپر ڇانوَ هيٺ داعش جون ڀرتيون ٿي رهيون آهن.

 

وفاقي حڪومت جا حامي آهيون عليحدگي جي ڳالهه نه ڪئي آهي نه ڪنداسين: مولابخش چانڊيو

حيدرآباد(اي پي پي) سنڌ جي وڏي وزير جي اطلاعات کاتي بابت صلاحڪار مولا بخش چانڊيو چيو آهي ته اسان وفاق سان ڳالهيون ڪري سنڌ جا حق حاصل ڪنداسين حق ۽ سهولتون گهرڻ ڪو گناهه نه آهي. اهڙن خيالن جو اظهار هن اڄ پريس ڪلب حيدرآباد جي دوري جي موقعي تي صحافين سان ڳالهائيندي ڪيو. هن چيو ته اسان هميشه آئين ۽ قانون جي حدن ۾ رهندي خود مختياري جي ڳالهه ڪئي آهي جيڪو اسان جو جائز حق آهي پاڪستان اسان جو ملڪ آهي پاڪستان جا وسيلا پوري ملڪ جي عوام جا وسيلا آهن جيڪي برابري جي بنيادي تي ڏيڻ گهرجن. هن چيو ته اسان وفاقي حڪومت جا حامي آهيون ڪڏهن به عليحدگي جي ڳالهه نه ڪئي آهي ۽ نه ڪنداسين هن چيو ته عمران خان پنهنجي اسپتال ۾ دهشتگردن جو علاج ڪري پاڻ اعتراف ڪيو آهي مون کيس دهشتگرد نه چيو آهي هن چيو ته پاڪستان وڏيون قربانيون ڏيڻ باوجود تحمل جو مظاهرو ڪيو آهي هن چيو ته دهشتگردي جي واقعن ۾ ڪيترائي معصوم ۽ پيارا ماڻهو مارجي ويا آهن جن ۾ فوج، رينجرز، پوليس سميت عام ماڻهن جو وڏو انگ پڻ شامل آهي جن کي ياد ڪرڻ اسان جو اخلاقي فرض آهي ۽ اسان کي ڪڏهن به انهن شهيدن جي قربانين کي فراموش نه ڪرڻ گهرجي. هن چيو ته ملڪ جي سلامتي ۽ استحڪام لاءِ سڀني کي گڏجي پنهنجو ڪردار ادا ڪرڻو پوندو پاڪستان جي فوج دهشتگردن جي خاتمي واري ويڙهه ۾ اهم ڪردار ادا ڪري رهي آهي ۽ اهو اعزاز جنرل راحيل شريف ڏانهن وڃي ٿو جڏهن ته ڪراچي ۾ پوليس ۽ رينجرز جو گڏيل آپريشن آخري دهشتگرد جي خاتمي تائين جاري رهندو اسان دهشتگردن جي خاتمي ۽ آپريشن جا حامي آهيون جڏهن ته سنڌ اسيمبلي ۾ پيش ڪيل قرارداد ۾ رينجرز جي ڪردار جي واکاڻ ڪئي وئي آهي هن چيو ته وڏو وزير سيد قائم علي شاهه آئين ۽ قانون موجب سنڌ حڪومت هلائي رهيو آهي ۽ جيستائين الله پاڪ چاهيندو هو ان وقت تائين وڏو وزير رهندو صوبائي صلاحڪار چيو ته نواز شريف جي حڪومت ۾ آصف زرداري تي ڪوڙا ڪيس مڙهيا ويا پر ڪو به الزام ثابت نه ٿي سگهيو هن چيو ته اسين احتساب جا حامي آهيون پر اهو غير جانبدار ٿيڻ گهرجي هن چيو ته هن وقت تائين ملڪ ۾ سياسي ڪلچر پنهنجون پاڙون پختيون نه ڪري سگهيو آهي ۽ ملڪ ۾ هميشه خوف جي جمهوريت رهي آهي ايم ڪيو ايم بابت سوال تي هن چيو ته متحده سنڌ جي وسندڙ جماعت آهي جنهن جو پنهنجو منشور آهي. مقامي حڪومت بابت سوال تي هن چيو ته معاشري جو ماحول بهتر بڻائڻ لاءِ حڪومت ۾ قانون سازي ٿيندي رهندي آهي جيڪي اختيار قانون موجب ضروري هوندا اهي ڏنا ويندا مشرف دور جو ناظمي نظام سنڌ لاءِ بهتر نه هو هن چيو ته اسان به آئين جي ڳالهه ڪئي آهي ۽ وفاقي حڪومت به آئين جي ڳالهه ڪري رهي آهي ۽ ٿيندو به اهو جيڪو آئين ۾ هوندو هن چيو ته فهميده مرزا ۽ سندس مڙس حڪومت تي مسلسل الزام مڙهي رهيا آهن پر پ پ پ محتاط آهي ۽ صوبائي گهرو وزير سهيل انور سيال اهڙو ماڻهو نه آهي جو کين نقصان پهچائي ان موقعي تي پريس ڪلب حيدرآباد جو صدر جئه پرڪاش ۽ جنرل سيڪريٽري ناصر شيخ کان علاوه ٻيا سينئر صحافي پڻ موجود هئا.اي پي پي/ن – ش 18:14

 

سنڌ حڪومت گڏيل مفادن واري ڪائونسل جو اجلاس گهرائڻ جو مطالبو ڪري ڇڏيو

ڪراچي (اسٽاف رپورٽر) سنڌ حڪومت گڏيل مفادن واري ڪائونسل جو اجلاس گهرائڻ جو مطالبو ڪري ڇڏيوڪراچي ۾ ميڊيا سان ڳالهائيندي ناڻي واري صوبائي وزير مراد علي شاهه چيو آهي ته هر ٽئين مهيني گڏيل مفادن واري ڪائونل جو اجلاس گهرائڻ آئيني گهرج آهي. هن چيو ته هر ٽئي مهيني اجلاس نه گهرائڻ آئين جي ڀڃڪڙي آهي. سندس چوڻ هو ته اجلاس سڏائڻ لاءِ سنڌ حڪومت ڪيترائي ڀيرا وفاق کي خط لکيو آهي پر ان باوجود ڪي به قدم نه پيا کنيا وڃن. مراد علي شاهه چيو ته گيس ڊولپمينٽ واري معاملي تي سنڌ کي اعتراض آهن پر ان باوجود وفاق جو نظر انداز ڪري ڇڏڻ سمجهه کان ٻاهر آهي.

 

ڪشمير کانسواءِ ڀارت سان ڳالهيون قبولڻ جوڳيون نه آهن: سراج الحق

لاهور (بيورو) سراج الحق چيو آهي ته ڪشمير کانسواءِ ڀارت سان ڳالهيون قبولڻ جوڳيون نه آهن جماعت اسلامي جي امير سراج الحق چيو آهي ته ڪشمير کانسواءِ ڀارت سان ڳالهيون قبولڻ جوڳيون نه آهن لاهور ۾ تقريب کي خطاب ڪندي سراج الحق چيو ته ڀارت ايئربيس حملي ۾ پاڪستان کي ملوث ڪرڻ جي سازش ڪري رهيو آهي،جنهن کي ڪڏهن به برداشت نه ڪيو ويندو. هن چيو ته قبائلي علائقن ۾ لکين پناهگير امداد جي انتظار ۾ آهن، جيڪي ٻين جي ڏوهن جي سزا ڀوڳن پيا. سراج الحق جو چوڻ هو ته ڪرپشن خلاف عوام کي سجاڳ ڪيو ويندو. جماعق اسلامي جي امير جو چوڻ هو ته ايمنسٽي اسڪيم سميت ٻين اسڪيمن سان خاص طبقي کي فائدو پهچي رهيو آهي.

 

ماڊل ٽائون سانحي ۾ انصاف نه مليو ته رائيونڊ ۾ ٿرٿلو مچائي ڇڏينداسين: طاهرالقادري

لاهور(م.ڊ) پاڪستاني عوامي تحريڪ جي سربراهه ڊاڪٽر طاهرالقادري جو چوڻ آهي ته ماڊل ٽائون سانحي ۾ 14 ڄڻن جي قتل ۾ حڪمران ملوث آهن ۽ جيڪڏهن انصاف نه مليو ته رائيونڊ پري ناهي،ان ۾ ٿرٿلو مچائي ڇڏينداسين.لاهور ۾ پاڪستان عوامي تحريڪ جي ڪارڪنن سان ڳالهائيندي سندس چوڻ هو ته ماڊل ٽائون سانحي ۾ قتل ٿيندڙ 14 ڄڻن جو ڪيس

حڪمرانن تي هلايو وڃي ۽ ان ڪيس کي فوجي عدالت ۾ هلڻ گهرجي،اسان ڪنهن کان به ڪجهه نٿا گهرون،رڳو ماڊل ٽائون جي معصوم 14 شهرين جي قتل ۾ ملوث ڏوهارين کي پنهنجي پڄاڻي تي پهچايو وڃي.سندس چوڻ هو ته ڪيس ۾ اسان جي مظلومن ۽ شاهدن تي فرد جرم لاڳو ڪرايا ويا، واقعي ۾ 14 لاش ڪيرائيندڙ دهشتگرد حڪمران آهن،جيڪي اسلام آباد ۾ ويٺا آهن،ان ڪري انهن جي خلاف ڪيس هلايو وڃي ۽ حڪمرانن جي رويي مان لڳي ٿو ته هو اسلام آباد ۾ هڪ ڀيرو ٻيهر ڌرڻو چاهين ٿا.سندس چوڻ هو ته پوري ملڪ ۾ دهشتگردي جو مرڪز پنجاب آهي ۽ دهشتگردن جو جنم به اتان ئي ٿئي ٿو ۽ اتي ئي انهن کي پناهون به ملن ٿيون،جيڪڏهن دهشتگردي کي ختم ڪرڻو آهي ته ظالم حڪمرانن کي ختم ڪرڻ ضروري آهي.

 

بلدياتي چونڊون: سنڌ ۾ ٽنهي مرحلن جو ٽرن آئوٽ 48 سيڪڙو رهيو: اليڪشن ڪميشن

اسلام آباد (اين اين آءِ) اليڪشن ڪميشن آف پاڪستان سنڌ ۾ بلدياتي چونڊن جي ٽنهي مرحلن جي ٽرن آئوٽ جو تفصيل جاري ڪري ڇڏيو اليڪشن ڪميشن مطابق سنڌ جي مڪانيچ ونڊن ۾ ٽنهي مرحلن جو ٽرن آئوٽ 48 سيڪڙو رهيو سنڌ صوبي جي 52 سيڪڙو وُٽرز بلدياتي چونڊن ۾ حصو نه ورتو 1 ڪروڙ 72 لک مان 82 لک 91 هزار ووٽرز پنهنجو ووٽ ڪاسٽ ڪيو بلدياتي اليڪشن ۾ سنڌ جي 89 لک 47 هزار ووٽرز ووٽ ڪاسٽ نه ڪيو، سنڌ ۾ سڀ کان وڌيڪ ٽرن آئوٽ ٿرپارڪر ۾ 70 سيڪڙو رهيو جڏهن ته سڀ کان گهٽ ٽرن آئوٽ ڪراچي ايسٽ ۾ 29 سيڪرو رهيو اليڪشن ڪميشن مطابق خيرپور ۾ 60، عمرڪوٽ، مٽياري ۾ ٽرن آئوٽ 63 سيڪڙو رهيو. پهرين مرحلي جي 8 ضلعن ۾ ٽرن آئوٽ 54 پوائنٽ 28 سيڪڙو رهيو ٻئي مرحلي جي 14 ضلعن ۾ 58 سيڪڙو ٽرن آئوٽ رهيو ٽئين مرحلي جي ڇهن ضلعن ۾ ٽرن آئوٽ سڀ کان گهٽ 36 سيڪڙو رهيو. سانگهڙ ۾ امن جي صورتحال خراب هجڻ سبب اليڪشن اڃا تائين ناهي ٿي سگهي.

 

عوام سان اڻٽٽ رشتو آهي، ايندڙ نسلن جو مستقبل سنوارڻ لاءِ ميدان تي نڪتو آهيان: ذوالفقار مرزا

تلهار(نمائندو) منهنجو غريب عوام سان ڪڏهن به نه ٽٽندڙرشتو آهي اسان جي تعلقاتن ۾ ڪا به لالچ ناهي آئون جنهن سان نينهن جو ناتو جوڙيندو آهيان اهو توڙ تائين نڀائيندو آهيان آئون عوام جي ٻچن جي مستقبل سنوارڻ لاءِ نڪتو آهيان ان خيالن جو اظهار ڊاڪٽر ذوالفقار مرزا تلهار جي مختلف ڳوٺن ۾ ماڻهن سان تعزيت ۽ ملاقاتن دوران ڪيو هن چيو ته انهن لٽيرن کان پاڻ ۽ پنهنجي نسلن کي بچايو جيڪي سبز باغ ڏيکاري مطلب ڪڍڻ بعد نظر نٿا اچن ۽ وري اليڪشن جي وقت ظاهر ٿي پنهنجي ڪرسي لاءِ واڳون وارا لڙڪ وهائي ووٽن لاءِ منٿون ڪن ٿا صحيح وقت اچي ويو آهي سوچي سمجھي فيصلو ڪيو ته جيئن اڳيان هلي اسان کي پڇتاءُ نه ٿئي ڊاڪٽر مرزا پاران ڳوٺ مراد ٽالپر ۾ عبدالجبار بهراڻي سان سندس والده جي وفات تي تعزيت ڪئي ڳوٺ خدابخش خاصخيلي ۾ محرم خاصخيلي جي وفات تي سندس ڀاءُ منٺار خاصخيلي سان، ڳوٺ حاجي سومار جوڻيجو ۾ شاهنواز جوڻيجو سان، غفور حاجاڻو سان ساڻس ڀاءُ جي وفات سميت رينجرز اهلڪار اعجاز جوڻيجو جي تڏي تي پهچي سندس ڀاءُ ڇٽن جوڻيجو ۽ وارثن سان تعزيت جو اظهار ڪيوجنهن بعد ڊاڪٽر مرزا وڪيل اشرف سمون پاران ڏنل آجياڻي ۾ پڻ شرڪت ڪئي.

 

ڊگها وار سٺا ناهن لڳندا، پنهنجا وار پاڻ ئي ڪٽي ڇڏيندي آهيان: سوڪي واٽر هائوس

لاس اينجلس (شوبز نيوز) هالي ووڊ ماڊل سوڪي واٽر هائوس چيو آهي ته پنهنجا وار ڊگها ٿيڻ تي پاڻ ئي ڪٽي ڇڏيندي آهيان. سڌ سماءَ وارن ذريعن موجب سوڪي واٽر هائوس چيو ته مون کي منهنجا ڊگها وار سٺا ناهن لڳندا.ان ڪري وار وڏا ٿيڻ تي پاڻ ئي ڪٽي ڇڏيندي آهيان. هن چيو ته آئون پنهنجن وارن جو تمام گهڻو خيال رکندي آهيان ۽ معياري پراڊڪٽس استعمال ڪندي آهيان ۽ اهو ئي منهنجي وارن جي خوبصورتي جو راز آهي.

 

شرڌا ڪپور نئين فلم ”هاف گرل فرينڊ“ ۾ مرڪزي ڪردار ادا ڪندي

ممبئي (شوبز نيوز) بالي ووڊ جي خوبصورت اداڪاره شرڌا ڪپور نئين فلم ”هاف گرل فرينڊ“ ۾ اداڪاره پرينيتي چوپڙا جي جاءِ تي مرڪزي ڪردار ادا ڪندي. ڀارتي سڌ سماءَ وارن ذريعن موجب اداڪاره پرينيتي چوپڙا فلمساز موهت سوري جي فلم ”هاف گرل فرينڊ“ مان آئوٽ ٿي ويئي آهي. جنهن کان پوءِ هاڻي انهيءَ فلم ۾ اداڪاره شرڌا ڪپور پرفارم ڪندي. اداڪاره پرينيتي چوپڙا جي فلم کان عليحدگي جو ڪارڻ منظرعام تي نه اچي سگهيو آهي. فلم جي عڪسبندي جلد شروع ڪئي ويندي. واضح رهي ته شرڌا ڪپور پنهنجي ٻن نين ايندڙ فلمن ”راڪ آن 2“ ۽ ”باغي“ جي عڪسبندي ۾ مصروف آهي.