تازيون خبرون

Daily Archives: January 4, 2016

دپيڪا سان سُٺي ڪردار واري فلم ۾ ڪم ڪرڻ جي خواهش آهي:رنوير سنگهه

ممبئي(شوبز نيوز) اداڪار رنوير سنگهه چيو آهي ته دپيڪا سان ڪنهن سُٺي ڪردار واري فلم ۾ ڪم ڪرڻ جو خواهشمند آهيان.ممبئي ۾ هڪ اخبار کي انٽرويو ڏيندي رنويرسنگه چيو ته مان اڄ تائين دپيڪا سان جيتريون به فلمون ڪيون آهن انهن جي آخر ۾ اسان ٻنهي جو موتي ٿي وڃي ٿو.پر هاڻي ڪنهن اهڙي فلم ۾ ڪم ڪرڻ چاهيون ٿا جنهن ۾ اسان ٻنهي جو موت نه هجي ۽ جنهن جي ڪهاڻي ڪنهن سٺي منزل تي پهچي.

 

بالي ووڊ فلم ”وزير“ جي خاص اسڪريننگ، اميتاب بچن، سندس زال جيا بچن، ڌيءَ شويتا ۽ فلم جي ڪاسٽ شرڪت ڪئي

ممبئي (اي پي پي) بالي ووڊ جي نئين فلم ”وزير“ جي خاص اسڪريننگ ڪئي وئي. ڀارتي سڌ سماءَ وارن ذريعن موجب فلمساز ونود چوپڙا جنهن راجڪمار هيراني سان گڏجي فلم ”وزير“ پروڊيوس ڪئي آهي. فلم جي ڪاسٽ ۽ بچن فيملي لاءِ خاص اسڪريننگ منعقد ڪئي. ان موقعي تي اميتاب بچن، سندس زال جيا بچن ۽ ڌيءَ شويتا ۽ فلم جي ڪاسٽ شرڪت ڪئي. بعد ۾ اميتاب بچن ونود چوپڙا کي پنهنجي هڪ پيغام ۾ چيو ته جڏهن فلم ختم ٿي ته سندس فيملي طرفان تاڙيون وڄائي ان جي ساراهه ڪئي وئي. ڄاڻايل فلم 8 جنوري تي رليز ٿيندي. فلم ۾ اميتاب بچن، فرحان اختر، اديتيار رائو حيدري ۽ اجن ابراهم مرڪزي ڪردار ادا ڪيو آهي.

 

ياسر شاهه ڊوپ ٽيسٽ ڪيس، تفصيلي رپورٽ پي سي بي کي ملي وئي,2 سالن جي پابندي جو خطرو

لاهور(اسپورٽس نيوز) پاڪستان ڪرڪيٽ ٽيم جي ليگ اسپنر ياسر شاهه جي ڊوپ ٽيسٽ جي تفصيلي رپورٽ پاڪستان ڪرڪيٽ بورڊ کي ملي وئي،جنهن کانپوءِ شق ظاهر ڪيو پيو وڃي ته ياسر شاهه مٿان ٻن سالن جي پابندي لڳي سگهي ٿي.ميڊيا رپورٽ مطابق قومي اسپن بالر ياسر شاهه جي ڊوپ ٽيسٽ جي تفصيلي رپورٽ پي سي بي کي ملي وئي جنهن کانپوءِ اهو شق ظاهر ڪيو پيو وڃي، ته ياسر شاهه جي راند تي ٻن سالن جي پابندي لڳي سگهي ٿي،جڏهن ته ياسر شاهه جي معاملي تي پي سي بي جي قانوني ماهرن رپورٽ تيار ڪري ورتي آهي، ٻئي پاسي پي سي بي اختيارين پاران چيو پيو وڃي ته قومي اسپن بالر جي ڊوپ ٽيسٽ آئي سي سي جي پينل ۾ چيلينج نه ڪئي ويندي.

 

انگلينڊ جو نوجوان ڪرڪيٽر ميٿيو هوبدين لاڏاڻو ڪري ويو

لنڊن (اسپورٽس نيوز) انگلينڊ جو نوجوان فرسٽ ڪلاس ڪرڪيٽر ميٿو هوبڊين لاڏاڻو ڪري ويو. سندس عمر 22 سال هئي. هو سيڪس ڪائونٽي ڪلب جي نمائندگي ڪندو هو. سيسڪس ڪائونٽي ڪلب ميٿيو هوبڊين جي اوچتو موت تي گهري ڏک جو اظهار ڪيو آهي ۽ ڪلب طرفان جاري ڪيل بيان موجب هو گهڻو باصلاحيت ڪرڪيٽر هو ۽ سندس مستقبل روشن هو. هن 2014ع   ۾ فرسٽ ڪلاس ڊيبيو ڪيو ۽ ٽنهي فارميٽن جي ڪرڪيٽ ۾ زبردست ڪارڪردگي جو مظاهرو ڪيو. سسيڪس ڪلب ڪرڪيٽر جي اوچتو فوت ٿي وڃڻ سبب ڪٽنب سان همدردي جو اظهار ڪندي چيو آهي ته ڪلب لاءِ سندس جون خدمتون ڪڏهن وساري نه سگهبيون.

 

لاهور ۾ داعش جي موجودگيءَ تي خاموشي ڇو؟!: وينگس

جڏهن سياست عوام جي جڳهه تي ذاتي مفادن لاءِ ٿيڻ لڳي، اتي سياسي ويڙهه جو ڏيک به ائين ئي هوندو آ، جيئن اڄڪلهه پاڪستان جي سياست ۾ ٿي رهيو آهي.

گذريل ڪالمن ۾ مان لکي چڪي هئس ته ڪراچي آپريشن جو اصل نشانو سنڌ حڪومت هوندي ۽ گورنر راڄ لڳي سگهي ٿو. حڪومت جنهن انداز سان ڪراچي آپريشن جي نالي تي مسئلن مٿان مسئلا پيدا ڪري پئي، اهي اڳتي هلي سياسي ڊيڊلاڪ پيدا ڪري سگهي ٿو ۽ ان سياسي ڊيڊ لاڪ جو ڪريڊيٽ صرف چوڌري نثار ڏانهن ويندو.

چوڌري نثار، جنهن مسلسل ڪراچي آپريشن کي پهرين نمبر تي رکيو آهي ۽ ڪراچي ۾ ئي نيشنل ايڪشن پلان تي عمل ٿيڻ گهرجي، پوءِ سوال ۽ خدشا حڪومت مٿان اُٿندا.

نيشنل ايڪشن پلان ڇا جي لاءِ جوڙيو ويو؟ پشاور اسڪول سانحي کان پوءِ 20 نقطن تي جوڙيل اين اي پي جوڙيو ويو ته جيئن دهشتگردي کي ختم ڪري سگهجي. حڪومت ٻڌائي ته انهن هينئر تائين 20 نقاطي ايجنڊا تي عمل ڪندي ملڪ جي ڪيترن حصن مان دهشتگردي کي ختم ڪرايو؟ چوڌري نثار کي خبر هوندي ته ملڪ ۾ تقريبن 212 ڌماڪا صرف 2015 سال دوران ٿيا، هيءُ انگ اين اي پي جي جوڙڻ کان پوءِ جو آهي.

حڪومت جي نڪ هيٺان اهو ڪيئن ممڪن ٿي سگهيو ته ايڏا ڌماڪا ٿيا؟ جڏهن ملڪ جون سموريون پارٽيون نيشنل ايڪشن پلان تي سهمت هيون، آخر ڪهڙا سبب هئا جو حڪومت نيشنل ايڪشن پلان تي عمل نه ڪرائي سگهي؟

نيشنل ايڪشن پلان صرف هڪ صوبي لاءِ ناهي، ان کي سڄي ملڪ ۾ لاڳو ٿيڻ گهرجي. چوڌري نثار گهرو وزير، اين اي پي مان صرف هڪ ايجنڊا ڪراچي آپريشن جو کنيو آهي، جو هر وقت ان تي ئي ڳالهائيندي نظر اچن ٿا. ان ئي ايجنڊا ۾ 19 ٻيا نقطا به آهن، جن تي عمل وفاقي حڪومت نه ڪندي ته پوءِ ٻيو ڪير ڪندو؟

گهرو وزير چوڌري نثار، پنجاب ۾ آپريشن بابت ڇا ٻڌائيندو؟ اتي موجود militancy  ۽ انهن جي سهولتڪارن جي لاءِ ڪيترا سخت قدم کنيا ويا آهن؟ حڪومت ملڪ ۾ سواءِ جماعت الدعوه جي ٻين جماعتن تي بندش لڳائي ڇڏي ۽ جماعت الدعوه کي نگراني هيٺ رکيو ويو.

وفاقي حڪومت ڪنهن به صورت ۾ سمجهوتو نه ڪرڻ جي ڳالهه ڪري ٿي پوءِ ڪنهن هڪ جماعت تي سمجهوتو ڪنهن جي لاءِ آهي؟ جڏهن سيالڪوٽ مان داعش جي لاءِ مدد ڪندڙ گروپ کي گرفتار ڪيو ويو ته ان جا ميمبر سندن پسنديده جماعت جا نڪتا، پر حڪومت قدم کڻندي نظر نه ٿي اچي.

پنجاب ۾ ان انداز سان آپريشن ناهي ٿي رهيو، جيئن ٿيڻ گهرجي ۽ جنهن جي لاءِ حڪومت ڳالهه ڪئي هئي ته اهي پنجاب ۾ ڪنهن به دهشتگرد کي سک سان ساهه کڻڻ نه ڏيندا، پر اطلاع آهن ته لاهور مان 20 عورتون، مرد ۽ ٻار داعش ۾ شموليت ڪرڻ لاءِ شام هليا ويا.

وفاقي حڪومت انڪار ڪندي نظر ٿي اچي ته داعش جي موجودگي ملڪ ۾ ناهي؛ سمجهه ۾ نٿو اچي ته آخر گهرو وزير  چوڌري نثار صاحب کي داعش جي موجودگي ۽ ان جي سهولتڪارن جي لاءِ اڃا ڪيترا ثبوت گهرجن؟

داعش جي موجودگي ۽ ان جا سهولتڪار ملڪ ۾ موجود آهن، ان حوالي سان ڪيترائي ڀيرا رپورٽون اڳيان اچي چڪيون آهن. جيڪڏهن ڪير مڃڻ لاءِ تيار ناهي ته اهو چوڌري نثار خان ۽ سندس پارٽي مسلم ليگ ن آهي.  پنجاب ۾ آپريشن نه ڪرڻ لاءِ ڪيترائي ڀيرا ان قسم جي اڳيان آيل خبرن کي ميڊيا تي بحث ۾ ناهي آندو ويو ۽ شين کي ڪارپيٽ هيٺيان لڪائڻ جي پوري ڪوشش ٿيندي رهي آهي.

حڪومت نيشنل ايڪشن پلان تي پنهنجي سنجيدگي جو مظاهرو ڪندي صرف ڪراچي تائين محدود نظر اچي ٿي. ڪنهن به صورت ۾ ڪرپشن ۽ سهولتڪارن کي بخش نه ڪندا، وفاقي حڪومت انتهائي جذباتي انداز اختيار ڪري ٿي، ڄڻ اهي واقعي ۾ ايترا ئي سنجيده آهن.

عمران خان لاهور شوڪت خانم اسپتال ۾ طالبان اڳواڻ جي علاج ڪرڻ جو پاڻ انڪشاف ڪيو صرف انڪشاف ئي نه ڪيو پر اُن جو اظهار ڪندي هُو خوش پڻ نظر آيو. عمران خان پاڻ طالبانن کي پنهنجو ڀاءُ چئي چڪو آهي، انهن جي لاءِ آفيس کولڻ به چاهي پيو، جيڪڏهن سندن حڪومت ٺهي ها ته شايد انهن کي آفيس کولي به ڏين ها پر پاڪستان جي خوشقسمتي چئبي جو عوام کين اهڙو مينڊيٽ نه ڏنو.

پر عمران خان شوڪت خانم اسپتال ۾ طالبان اڳواڻ کي علاج جي سهولت ضرور مهيا ڪري رهيو آهي. هاڻي هو اهو چئي ته ان کي خبر خط ذريعي پئي، اهو ممڪن نظر نه ٿو اچي. ڇاڪاڻ جو علاج ڪرائيندڙ طالبان اڳواڻ هو، يقينن ان جو پروفائيل هاءِ هوندو ۽ ان کان انتظاميا غير واقف هجي، ڳالهه ايتري سادي ناهي ۽ نه ئي عوام کي ايترو سادو سمجهڻ گهرجي.

افسوس ان ڳالهه جو آهي ته هيءَ ڪهڙي سياست آهي، ڪهڙي حڪمراني آهي؟ سندن حڪومت ۾ ڪجهه ڏينهن اڳ ئي مردان اندر نادرا آفيس ۾ دهشتگردن ڌماڪو ڪيو ۽ 20 کان مٿي ماڻهو فوت  ۽ پشاور اسڪول ۾ 100 کان مٿي ٻار فوت ٿي ويا. عمران خان کي انهن مان ڪنهن جو به خيال نه آيو ته هو جنهن انداز سان بيان ڪري رهيو آهي، ان جو اثر متاثرين تي ڪهڙو پوندو؟ هڪ سياسي اڳواڻ جي حيثيت ۾ ان کي ايترو احساس هجڻ گهرجي ته ڪٿي، ڪيئن ۽ ڪهڙي انداز سان ڳالهائڻ گهرجي؟

هُن پوري دنيا کي پيغام ڏنو ته هڪ اڳواڻ جي حيثيت سان هو طالبانن جي لاءِ ڪيتري حد تائين وڃي سگهي ٿو؟ سڀاڻي جيڪڏهن ملڪ جي واڳ کين ملي وئي، تصور ڪري سگهجي ٿو ته هو ملڪ کي ڪيڏانهن کڻي ويندو؟ ضياءَ جي ڪاري باب مان اڃان نڪري نه سگهيا آهيون، شايد هو ضياءَ جي اُن ڪاري باب کي وڌيڪ گهرو ڪندي ملڪ ۾ طالبانن کي سافٽ راهه ڏين.

عمران خان، شوڪت خانم اسپتال لاهور  جي هاڻي ڳالهه ڇو ڪئي؟ ڪٿي مسلم ليگ ن ته ان ڳالهه کي اڳيان کڻي اچڻ نه پئي چاهيو؟ ۽ عمران خان جلدي ۾ اِها ڳالهه پاڻ ڪري اُن جو اثر گهٽائڻ ٿي چاهيو. ڪجهه ته ضرور هو جو کيس اها ڳالهه ڪرڻي پئجي وئي.

ڪٿي اِهو سڀ فنڊنگ جي سلسلي جي ڪڙي ته ناهي!؟ ان جو پتو ته وفاقي حڪومت کي لڳائڻ گهرجي، جن جي هٿن ۾ نيشنل ايڪشن پلان آهي. جيتري همدردي هيءُ صاحب طالبانن لاءِ رکي ٿو اوتري ئي همدردي، مسلم ليگ ن وٽ پاڻ به آهي، جو انهن پنهنجي مخالف جي اهڙي اقرار ڪرڻ تي خاموشي اختيار ڪئي آهي، ڄڻ انهن سندس بيان ٻڌو ئي نه هجي.

ڪراچي ۾ آپريشن ۽ سهولتڪارن جي خلاف ڪنهن به صورت ۾ سمجهوتو نه ڪندا …. پر شوڪت خانم اسپتال ۾ طالبان اڳواڻ جو علاج ٿئي ٿو، اهي خط لکي شڪريو ادا ڪن ٿا ۽ خود عمران خان خوشي جو اظهار ڪندي ٽي وي پروگرام ۾ ڳالهائي ٿو، اتي سڀ خاموش آهن ۽ اليڪٽرانڪ ميڊيا جو انداز ’مين نا جانون‘ جهڙو آهي.

ان رويي کي ڪهڙو نالو ڏجي؟ ان مان مطلب وفاقي حڪومت نيشنل ايڪشن پلان جي تلوار کي صرف پنهنجي مفادن جي لاءِ استعمال ڪرڻ چاهي ٿي ۽ جڏهن خبر ضياءَ جي باقيات يا آمرن جي سپورٽ ڪندڙن جي خلاف اچي ٿي ته ميڊيا اکيون، ڪن ۽ وات تي هٿ رکي ويهي رهي ٿي.

ان انداز سان ملڪ جي ٻين صوبن ۾ تڪليف پيدا ٿيندي ته هڪ صوبي جي ننڍڙي خبر کي جبل جيڏي خبر بڻائي پيش ڪرڻ ۽ جمهوريت جو راڳ ڳائيندي نظر اچڻ ۽ ٻين تي خاموشي جو روزو رکڻ تي عوام ڪيترن اندازن سان سوچي سگهي ٿو؛ پوءِ اهو به سوچڻو پوندو ته ويڇا ڪير ۽ ڪيئن وڌائي رهيو آهي؟

واپس اچون ٿا وفاقي حڪومت ۽ چوڌري نثار خان تي، جنهن کي نيشنل ايڪشن پلان جي هڪ ئي ايجنڊا ۽ صوبو نظر پيو اچي. سياسي گهما گهمي مان منجهيل شيون واضح ٿي ويون آهن. ڪراچي آپريشن پٺيان سياسي مقصد ۽ انا آهي.

حڪومت جو چوڻ ته اهي دهشتگردن جي خلاف آهن، جيڪڏهن ائين ئي آهي ته پوءِ طالبان اڳواڻن جي علاج واري انڪشاف تي خاموشي ڇو آهي؟ اتي نيشنل ايڪشن پلان لاڳو ڇونه پيو ٿئي؟ پنجاب مان داعش جا سپورٽر ملن ٿا پر حڪومت اگنور ڪندي رهي ٿي.  اهڙن اندازن کان پوءِ اهو ڪيئن مڃي وٺجي ته حڪومت دهشتگردن کي ختم ڪرڻ لاءِ برابريءَ وارو رويو اختيار ڪري پئي…!

اندازِ بيان ۽ اندازِ عمل ڪجهه ٻيو ٻڌائي رهيا آهن. هن ڀيري وري وفاق سنڌ جي سياسي اختيارن سان ڇيڙڇاڙ ڪري رهيو آهي ۽ ان حوالي سان ”اعتزاز احسن بهترين ماضي جو مثال ڏيندي نواز شريف کي ياد ڏياريو ته توهان شهيد محترمه بينظير ڀٽو جي طرفان هڪ پوليس آفيسر جي تبديلي تي پنجاب تي وار قرار ڏنو هو.“

هاڻي جڏهن وفاقي اختيار پاڻ وٽ رکي، سنڌ حڪومت کي حڪم صادر ڪرڻ چاهي پيو ته وفاق طرفان اهڙي رويي کي سنڌ صوبو ڪيئن ٿو قبول ڪري سگهي، جتي اڻبرابري هجي. جڏهن ته هيءَ ويڙهه سياسي پاور جي آهي پر ان ۾ ڪنهن به صوبي سان اڻبرابري نه ٿيڻ گهرجي ۽ سو به نيشنل ايڪشن پلان جي نالي تي قدم کڻي ٽارگيٽ ڪرڻ، اُن سان مسئلا وڌندا.

وفاقي حڪومت جو موڊ گورنر راڄ لڳائڻ جو آهي پر جيڪڏهن ائين ٿيو ته حڪومت پنهنجي اهڙي رويي سان هڪ وڏي سياسي غلطي ڪندي. ڇاڪاڻ جو ڪيترائي پاسا اڳيان اچي چڪا آهن، جن تي وفاقي حڪومت ۽ گهرو وزير اکيون بند ڪري ويٺا آهن پر انهن جي نظر صرف ڪراچي آپريشن تي آهي، جنهن سان مسئلا وڌيڪ وڌندا. حڪومت کي برابري جي سطح تي نيشنل ايڪشن پلان لاڳو ڪرڻ گهرجي. 19 نقطن تي خاموشي ۽ هڪ نقطي تي اچي گوڙ مچائي آپريشن ڪرڻ سان سياسي ماحول گرم ٿيندو ۽ ان ۾ گورنر راڄ لڳي سگهي ٿو ته پوءِ ڇا وفاقي حڪومت گورنر راڄ کان پوءِ رهي سگهندي؟

 

وقت جي اهميت کان وانجهيل سماج: وسعت الله خان

هر سال نئون سال ايندو آهي پر اها خبر ناهي پوندي ته اسان سال گذريو يا سال اسان کي گذاريو. اولهه پنج سئو سال اڳ ۽ جاپانين، ڪورين، چينين گذريل هڪ سئو سالن دوران اهو راز پرکي ورتو آهي ته وقت کي طاقت ۾ ڪيئن تبديل ڪري سگهجي ٿو. هنرمندي ۽ تعليم سان واندي وقت کي قيمتي ڪيئن بڻائي سگهجي ٿو؟. ان کي پيداواري شڪل ڪيئن ڏئي سگهجي ٿي؟. وسيلا ٿورڙا هجن يا نه به هجن وقت کي وسيلن جي متبادل ڪيئن ٿو بڻائي سگهجي؟

وقت کي سرمايو سمجهندڙ ملڪن ۾ باقاعده حساب رکيو ويندو آهي ته قوم انفرادي و اجتماعي طور ڪيترا پيداواري ڪلاڪ ڪم آندا يا ضايع ڪيا ۽ ان گهاٽي کي ايندڙ هفتي، مهيني يا سال ڪيئن گهٽ ڪري سگهجي ٿو.

ڪڏهن غور ڪَيُوَ ته انگريز ننڍي کنڊ جي هر اهم شهر ۾ گهنٽا گهر ڇو ٺهرا هئا! جيتوڻيڪ سان ننڍي لاڪون ٻڌندا پيا اچون ته ايتري ننڊ ٺيڪ ناهي، وقت وڃائڻ ٺيڪ ناهي، جڏهن پهرين درجي ۾ داخل ٿيون ٿا ته ڪلاس جي ڀتين تي ٿلهن لفظن ۾ لکيل ڏسون ٿا ته ”ويل وقت وري ناهي ورندو، وقت جو قدر ڪيو، وقت وڏي دولت آهي، اڄ جو ڪم سڀاڻي تي نه ڇڏيو وغيره وغيره.

استاد اسان کي اهو ٻڌائڻ ڪڏهن ناهن وساريندا ته محمد علي جناح وقت جو ڪيترو پابند هو، نهرو جي کي ڏسي ماڻهو ڇو پنهنجي گهڙين جا ڪانتا ٺيڪ ڪندا هئا. وري اسان اڃا وڏا ٿيون ٿا ته خوشي وچان چمڪندڙ گهڙي خريد ڪريون ٿا. وقت تي جاڳڻ لاءِ الارم ڪلاڪ لڳايون ٿا. آفيس، اجلاس يا تقريب ۾ پهچڻ لاءِ جلدي جلدي تيار ٿيون ٿا ۽ وقت تي پهچي فاتحاڻي نموني انهن ڪرسين ڏانهن ڏسئون ٿا جيڪي خالي هجن ٿيون. پنهنجي مسئلن جي ذميواري ٻين تي وجهڻ ۾ وقت لڳائڻ بلڪل خراب ناهي پر 24 ڪلاڪ ايئن ئي ڪندو رهڻ ڪيترو ٺيڪ آهي؟

ٿي سگهي ٿو يهودو هنود مسلمانن خاص ڪري پاڪستانين جا ازلي دشمن هجن پر ڇا هي به غيرن جي سازش آهي ته اسان پنهنجو ذميوار ڪم به وقت تي مڪمل نه ڪري سگهون. ڪنهن به شادي غميءَ ۾ وقت تي پهچڻ کي بيوقوفي سمجهون، ڪنهن به وڏي يا ننڍي منصوبي لاءِ ڊيڊ لائين اسان لاءِ مقدس نه هجي، امپورٽ، ايڪسپورٽ جو ڪوبه آرڊر اهو ڄاڻڻ بنا وٺندا وڃون ته ظاهري و غائب سببن ڪري اهو بروقت مڪمل نه ٿي سگهيو ته بي عزتي ٿيندي.

اسان ته ڪنهن کي فوري امداد به وقت تي نه ٿا ڏئي سگهون، پوءِ ڀلي سائل پاڻ هلي ڇو نه اچي. هي به اسان جي سوچ جي ايجنڊا جو حصو ناهي ته وڌ کان وڌ سرگرمي ۽ ڪاروبار ڏينهن جي روشنيءَ ۾ ڪيون ته جيئن توانائي ۽ وسيلا ايندڙ ڏينهن ڪم اچن.

توهان ڪنهن کان به وقت گهري ڏسو چوندا، شام کانپوءِ جڏهن چاهيو ملو، صبح اچ، بس واري کان پڇنداسين ڪيتري وڳي هلندي ته جواب ملندو هڪ اڌ ڪلاس ۾، وزير کان پڇو هي منصوبو ڪهڙي تاريخ تي مڪمل ٿيندو، هو چوندو سال، ڇهن مهينن ۾. جيڪڏهن اسرار ڪيو ته اندازن ڪهڙي تاريخ تائين؟ هو ابتو اوهان کان پڇي سگهي ٿو ته پاڪستان ۾ رهين ٿو يا ندا حسين ۾؟

قوم جي غم ۾ مرندڙ هر اڳواڻ ڪيئن نه آسانيءَ سان هي چئي جند ڇڏائي ٿو ڇڏي ته اسان وٽ ڪو الادين جو چراغ ناهي جو راتو رات سڀ ڪجهه ٺيڪ ٿي وڃي. پر ڪيترا ماڻهو ڄاڻن ٿا ته وقت ئي اصل ۾ الادين جو چراغ آهي ۽ اهو چراغ هر ڪنهن وٽ آهي پر شعور گهٽ آهي.

جيئن ته وقت ئي سڌو نه پيو ٿئي، تنهن ڪري ڪجهه به سڌو نه پيو ٿئي، حيرت آهي جنهن ملڪ جي اڌ آبادي غربت جي لڪير کان هيٺ هجي، جتي وسيلا پنهنجي استعمال جي انتظار ۾ سڙي رهيا هجن، جتي صلاحيتن جي کوٽ نه هجي، اتي اڪثريت وري واندڪائي ئي واندڪائي ۾ آهي.هي ڪو الميو ئي ناهي ته صبح کان رات تائين هر ڳوٺ ۽ واهڻ جا چانهين جا هوٽل پنهنجو ڪم ڪنهن ٻئي کي سونپيندڙ ڪاهل ماڻهن سان سٿيل هوندا آهن. ڏينهن ڳالهين، تبصرن، ٽي وي ڏسڻ، غيبتن ۾ گذري ويندو آهي ۽ رات جي قبر مان اٿندڙ نئون ڏينهن وري سڀني کي لپيٽ ۾ آڻي ڇڏيندو آهي.

ڏينهن، مهينن ۽ سالن ۽ ڏهاڪن ۾ تبديل ٿي وڃن ٿا ۽ خواب ۾ ترقي جا عادي ڳالهير اڪثريت ۾ قبرستان پهچي وڃن ٿا.

بي دلي ڪيا يون هي دن گذر جائينگَي

صرف زنده رهَي هم تو مرجائينگَي

 

شيعا عالم شيخ نمر النمر جي سزا بعد ايران سعودي تڪرار

شيعا عالم شيخ نمر النمر جي سزا بعد سعودي عرب ۽ ايران ۾ ڇڪتاڻ وڌي ويو آهي، سعودي حڪومت ايراني سفير کي 24 ڪلاڪن ۾ ملڪ ڇڏڻ جو حڪم ڏئي ڇڏيو آهي، سعودي عرب ۾ مشهور شيعا عالم شيخ نمر النمر جي سزا بعد ايران سعودي سفير کي طلب ڪري شديد احتجاج ۽ سنگين نتيجا ڀوڳڻ جون ڌمڪيون ڏنيون هيون، جڏهن ته پرڏيهي ميڊيا مطابق سعودي اختيارن پاران 2 ڏينهن پهرين ٻن مذهبي اڳواڻن شيخ نمر النمر ۽ فارس الشويل کي موت جي سزا ڏيڻ کانپوءِ کين سِر سِسيءَ کان ڌار ڪري ڇڏيو هو،جنهن کانپوءِ ايران سوڌو ڪيترن ئي ملڪن ۾ سعودي حڪومت جي اهڙي عمل خلاف احتجاج ڪيا پيا وڃن، ان سلسلي ۾ ايران جي به ڪيترن ئي ننڍن وڏن شهرن ۾ شيعا مذهبي اڳواڻن جي قتل خلاف احتجاج ڪيا ويا.پرڏيهي ميڊيا کان ڄاڻ ملي آهي ته تهران  ۾ سعودي عرب جي سفارتخاني ٻاهران شهرين احتجاج ڪيو ۽ سفارتخاني ۾ اندر داخل ٿي ڀڃ ڊاهه ڪئي ۽ مڇريل ماڻهن سفارتخاني کي باهه ڏيڻ جي به ڪوشش ڪئي. جنهن بعد سعودي حڪومت ايران سان تحريري طور تي اهڙي عمل خلاف سخت احتجاج ڪيو ۽ ايراني سفير کي طلب ڪندي کيس 24 ڪلاڪن ملڪ ڇڏڻ جو حڪم ڏنو ويو آهي، سعودي پرڏيهي وزارت جي ترجمان جي بيان موجب ايران جي اشتعال انگيز بيان جي جواب ۾ ايراني سفير کي طلب ڪري سخت احتجاج ڪيو ويو آهي. هوڏانهن ڇڪتاڻ سبب سعودي جي پرڏيهي سفير پاڪستان جو دورو ملتوي ڪري ڇڏيو آهي، پاڪستاني پرڏيهي ترجمان قاضي خليل الله ميڊيا سان ڳالهائيندي چيو آهي ته سعودي عرب جي پرڏيهي وزير عادل بن الجير ٻن ڏهاڙن واري دوري تي اڄ آچر ڏهاڙي پاڪستان پهچڻو هو، جيڪو دورو سعودي عرب ۽ ايران ۾ ڇڪتاڻ سبب ملتوي ڪيو ويو آهي، هن ٻڌايو ته دورو منسوب ناهي ٿيو ۽ ان حوالي سان جلد نئين تاريخن جو اعلان ڪيو ويندو، ياد رهي ته سعودي پرڏيهي وزير جي دوري دوران پاڪستاني سياسي ۽ عسڪري قيادت سان 34 ملڪن جي فوجي اتحاد ۽ پاڪستان جي ان بابت ڪردار جي حوالي سان ڳالهه ٻولهه توڙي معاملا طئي ٿيڻا هئا.

 

وفاق سان ڪي به اختلاف ناهن، رينجرز مئنڊيٽ موجب ڪارروائي ڪري: وڏو وزير

لاهور (بيورو) سنڌ جي وڏي وزير سيد قائم علي شاهه چيو آهي ته دهشتگردي هڪ صوبي نه پر سڄي ملڪ جو مسئلو آهي کيس اميد آهي ته چوڌري نثار سان ڳالهيون نتيجو ڏيندڙ ثابت ٿينديون. لاهور ۾ ميڊيا سان ڳالهائيندي سيد قائم علي شاهه چيو ته هو رينجرز جي ڪارڪردگيءَ جو اعتراف ڪري چڪا آهن. هن چيو ته رينجرز کي چئن معاملن تي اختيار ڏنا ويا آهن، ان کي مئنڊيٽ موجب ڪارروائي ڪرڻ گهرجي. سنڌ جي وڏي وزير چيو ته سنڌ ۾ 80 سيڪڙو امن بحال ٿي چڪو آهي، دهشتگردي جي مڪمل خاتمي تائين رينجرز موجود رهندي. سندس چوڻ هو ته دهشتگردي سنڌ نه پر سڄي ملڪ جو مسئلو آهي، داعش ڪنهن به هنڌ هجي سندن خلاف ڀرپور ڪارروائي ڪرڻ گهرجي. سيد قائم علي شاهه چيو ته وفاق سان سندن ڪي به اختلاف نه آهن، چوڌري نثار سنڌ جلد ايندو، ساڻس مئنڊيٽ بابت ڳالهيون ٿينديون. هن چيو ته کيس اميد آهي ته چوڌري نثار سان ملاقات نتيجو ڏيندڙ ثابت ٿيندي. سنڌ جي وڏي وزير سيد قائم علي شاهه چيو ته اتفاق سان هلياسين ته دهشتگدري ختم ٿي ويندي، سنڌ هر معاملي تي سهڪار ڪيو آهي، اميد ته وفاق به سهڪار ڪندو.

 

ڪرڪ انڊس هاءِ وي تي بس ۾ سيلينڊر ڌماڪو،9 ڃاڃي اجل جو شڪار،ڪيترائي زخمي

ڪرڪ(م.ڊ) انڊس هاءِ وي تي ڃڃ سان ڀريل هڪ بس ۾ سيلينڊر جي ڌماڪي جي نتيجي ۾ عورتن ۽ ٻارن سوڌو 9 ڄڻا اجل جو شڪار ٿي ويا ۽ 7 ڄڻا زخمي ٿيا،ميڊيا رپورٽن مطابق پشاور کان ڊيرا اسمائيل خان ويندي انڊس هاءِ وي جي ڪندا خرم واري هنڌ تي ڃڃ سان ڀريل بس ۾ سيلينڊر ڌماڪي سبب باهه ڀڙڪي پئي،جنهن جي نتيجي ۾ 4 عورتن  ۽ 2 ٻارن سوڌو 9 ڄڻا ٿڏي تي ئي فوت ٿي ويا ۽ ڪيترائي زخمي پڻ ٿيا. ريسڪيو ذريعن مطابق زخمين کي اسپتال موڪليو ويو آهي،جتي سندن اعلاج هلي رهيو آهي.

 

مذهب بابت قانون جي غلط استعمال خلاف نيشنل ايڪشن پلان جي نقطي نمبر 9 تحت قدم کنيو وڃي: بلاول ڀٽو

ڪراچي( اسٽاف رپورٽر) پاڪستان پيپلزپارٽي جي چيئرمين بلاول ڀٽوزرداري چيو آهي ته شهيد سلمان تاثير هن ملڪ جي ڪمزور ۽ پوئتي پيل ماڻهن جي تحفظ لاءِ ۽ ملڪي قانون جي استحصال ۽غلط استعمال خلاف پنهنجي جان قربان ڪئي، پنجاب جي اڳوڻي گورنرسلمان تاثير جي پنجين شهادت جي ڏهاڙي تي پنهنجي پيغام ۾ کيس خراج عقيدت پيش ڪندي پيپلزپارٽي جي چيئرمين بلاول ڀٽو زرداري چيو ته  لاهور قلعي جي ڪال ڪوٺڙين کان وٺي شهادت تائين سلمان تاثيرتاريخ ۾ هڪ عظيم ڪردار رهيو جنهن پنهنجي سموري حياتي جمهوريت ۽ انساني حقن جي تحفظ لاءِ قوم جي هڪ سچي هيرو طور جدوجهد ڪندي گذاري ۽ شهادت ماڻي، بلاول ڀٽو زرداري وڌيڪ چيو ته شهيد سلمان تاثير شهيد ذوالفقار علي ڀٽو ۽ شهيد بينظير ڀٽو جي مشن تي هلندي انهن قوتن جي خلاف جبل جيان ارڏو بيٺل رهيو جيڪي هن ملڪ کي پٿر واري اونداهي دور۾ ڌڪڻ چاهين ٿيون،هن چيو ته آمريتي دورن ۾  اهي قوتون ڄاڻي ٻجهي پيدا ڪيون ويون ته جيئن ملڪ جي عوام کي جمهوريت، انساني حقن ۽ برابري کان پري رکجي ۽ عوام جي اختيارن کي ڳچ عرصي تائين غصب ڪجي، بلاول ڀٽو زرداري چيو ته پاڪستان پيپلزپارٽي هميشه ڪنهن به فرد يا گروپ طرفان مذهب بابت ملڪي قانون کي غلط استعمال ڪرڻ خلاف آواز اٿاريو آهي ، بلاول ڀٽو زرداري اختيارين تي زور ڀريو آهي ته مذهب بابت ملڪي قانون جي غلط استعمال خلاف نيشنل ايڪشن پلان جي نقطي نمبر 9 تحت قدم کنيو وڃي جنهن ۾ ڄاڻايو ويو آهي ته ” مذهبي اقليتن تي ٿيندڙ ظلم خلاف پُر اثر قدم کنيو ويندو“. بلاول ڀٽو زرداري چيو ته اڄ ڏينهن تائين نيشنل ايڪشن پلان جي انهيءَ اهم نقطي تحت ڪوبه قدم نه کنيو ويو آهي، هن چيو ته پوروپاڪستان خاص طور تي هن ملڪ جو ڪمزور طبقو ۽ پاڪستان پيپلزپارٽي جا ميمبر ۽ ڪارڪن شهيد سلمان تاثير کي ڪڏهن به نه وساريندا ۽ شهيد سلمان تاثير انهن سمورن محب وطن پاڪستانين جي دل ۽ دماغ ۾ هميشه عزت جي نگاه سان ڏٺو ويندو جيڪي هميشه کان چاهين ٿا ۽ جدوجهد ڪري رهيا آهن ته پاڪستان ان جي بانين جي ويزن جي حقيقي عڪاسي ڪري، بلاول ڀٽو زرداري سڏ ڏيندي چيو آهي ته شهيد سلمان تاثير جي روح جي ايثال ثواب لاءِ ۽ کيس خراج عقيدت پيش ڪرڻ لاءِ پوري ملڪ ۾ خصوصي دعائون گھريون وڃن ته جيئن اهو ثابت ڪري ڏيکاريون ته ڇا به ٿي پوي پر اسان پنهنجي هيروز کي ڪڏهن به وساريندا ناهيون. ٻئي طرف پاڪستان پيپلز پارٽي جي چيئرمين بلاول ڀٽو زرداري جي هدايت تي پي پي پي سنڌ جي صدر ۽ وزير اعليَ سنڌ سيد قائم علي شاهه اعلان ڪيو آهي ته اڱاري 5 جنوري 2016 تي پي پي جي باني چيئرمين ۽ فخر ايشيا شهيد ذوالفقار علي ڀٽو جي 88 هين سالگره نهايت جوش ۽ جذبي سان ملهائي ويندي. ان موقعي تي پارٽي جي سمورين ضلعي آفيسن/ هيڊ ڪوارٽرز ۾ سالگره تقريبون منعقد ٿينديون جنهن ۾ پارٽي جا ڪارڪن / عهديدار ۽ پارليامينٽ جا ميمبر شرڪت ڪندا ۽ شهيد ڀٽو جي خدمتن ۽ جدوجهد تي پنهنجي خيالن جو اظهار ڪندا. ان موقعي تي سالگره جا ڪيڪ پڻ ڪاٽيا ويندا.