تازيون خبرون

Daily Archives: December 17, 2015

پرينڪا چوپڙا آمريڪي شو لاءِ عڪسبندي مڪمل ڪري ورتي

ممبئي (شوبز نيوز) بالي ووڊ اداڪاره پريانڪا چوپڙا آمريڪي ٽي وي شو جي عڪسبندي مڪمل ڪرائي ورتي. ڀارتي ميڊيا ذريعن موجب پريانڪا چوپڙا پنهنجي بالي ووڊ سرگرمين ۽ آمريڪي شو جي عڪسبندي جي ڪري تمام گهڻي مصروف رهي. اداڪاره سماجي رابطن واري ويب سائيٽ ٽوئيٽر تي مداحن کي ٻڌايو آهي ته هن آمريڪي شو لاءِ عڪسبندي مڪمل ڪري ورتي آهي ۽ هاڻيءَ هوءَ پنهنجو پاڻ کي آزاد محسوس ڪري رهي آهي. واضح رهي ته پرينڪا چوپڙا جي نئين ايندڙ فلم ”باجي رائو مستاني“ آهي جنهن ۾ هوءَ رنوير سنگهه ۽ دپيڪا پڊوڪون سان گڏ پرفارم ڪري رهي آهي. ڄاڻايل فلم سڀاڻي جمعي ڏينهن رليز ٿيندي.

 

پسند جو اسڪرپٽ نه مليو: دپيڪا پڊوڪون نئين سال لاءِ اڃان ڪا فلم سائن نه ڪئي

ممبئي (شوبز نيوز) بالي ووڊ اسٽار دپيڪا پڊوڪون ايندڙ سال لاءِ ڪا نئين فلم سائن نه ڪئي آهي. ڀارتي سڌ سماءَ وارن ذريعن موجب اهڙو انڪشاف دپيڪا پنهنجي هڪ انٽرويو ۾ ڪيو آهي. هن چيو ته هن ڪافي اسڪرپٽ پڙهيا هئا پر کيس انهن متاثر نه ڪيو. هن چيو ته مون کي پنهنجو سال مصروف رکڻ لاءِ ڪا فلم سائن ڪرڻ جي ضرورت نه آهي. هن چيو ته هوءَ هلندڙ سال پنهنجي ٽنهي فلمن مان تمام گهڻو خوش آهي. هن چيو ته سندس دچسپي جو ڪو اسڪرپٽ کيس مليو ته هوءَ ضرور فلم ڪندي. واضح رهي ته دپيڪا پڊوڪون جي نئين فلم ”باجي رائو مستاني“ سڀاڻي جمعي تي رليز ٿيندي.

 

ڀارت پاڪستان جي قومي والي بال ٽيم کي ويزا ڏيڻ کان انڪار ڪري ڇڏيو

لاهور(اسپورٽس نيوز) ڀارت پاڪستان جي قومي والي بال ٽيم کي ويزا ڏيڻ کان انڪار ڪري ڇڏيو،تفصيل مطابق پاڪستان جي قومي والي بال ٽيم کي ڀارت ۾ ٿيندڙ والي بال چيئمپن شپ ۾ شامل ٿيڻو آهي.جڏهن ته ڀارت ويزا ڏيڻ کان انڪار ڪري ڇڏيو آهي، جيڪڏهن ڀارت ويزا جاري نه ڪئي ته پاڪستان جي والي بال ٽيم اڄ ڀارت نه وڃي سگهندي ۽ قومي ٽيم چيئمپن شپ ۾ شامل نه ٿي سگهندي.

 

پاڪ-ڀارت سيريز لاءِ انتظامن جو وقت ختم ٿي چڪو آهي: شهريار خان

لاهور/ممبئي (اسپورٽس نيوز) پاڪستان ڪرڪيٽ بورڊ جي چيئرمين شهريار خان پاڪ-ڀارت سيريز جي ٿيڻ بابت سموريون اميدون ختم ٿيڻ کانپوءِ آخر ڪار چئي ڇڏيو ته هاڻي ٻنهي ملڪن جي وچ ۾ سيريز لاءِ انتظامنجو وقت ختم ٿي چڪو آهي.پي سي بي چئيرمين شهريار خان جو چوڻ آهي ته ڀارتي ڪرڪيٽ بورڊ جي اختيارين جو چوڻ آهي ته کين حڪومت پاران سيريز بابت ڪو به سگنل ناهي مليو،جڏهن ته انگلش بورڊ جي چئيرمين جائلز ڪلارڪ کي چيو آهي ته  پاڪ ڀارت سيريز بابت پنهنجو ردِ عمل جو لکت ۾ جواب ڏئي، ڀارت پاران باقائدا جواب اچڻ کانپوءِ ئي سيريز بابت پنهنجي ردِ عمل جو اعلان ڪندو.ٻئي پاسي آئي پي ايل جي چئيرمين راجيو شڪلا به ڀارتي حڪومت پاران جواب نه اچڻ تي ڪاوڙ جو اظهار ڪندي چيو ته 2 هفتن گذرڻ کانپوءِ به حڪومت سيريز بابت ڪو به جواب ڇو ناهي ڏنو،سيريز بابت جيڪو به فيصلو ڪرڻو هو ان بابت ڀارتي حڪومت کي جواب ڏيڻ گهرجي.

 

آرمي پبلڪ اسڪول سانحو ۽ بي مندائتو موت: رشيد سومرو

اهو 16 ڊسمبر 2014 جي صبح جو 10 وڳي جو وقت هو ته پشاور شهر جي وارسڪ روڊ تي پشاور ڪينٽ جي آرمي پبلڪ اسڪول ۾ 16 فوجي وردي ۾ ملبوس دهشتگرد داخل ٿيا، جن اسڪول جي ديوار جي پوئين پاسي کان ڀتون ٽپي اسڪول ۾ داخل ٿي اسڪول ۾ هلندڙ هڪ خاص تقريب ۾ شريڪ شاگردن ۽ استادن کي يرغمال بڻائي انهن کي اسڪول جي هڪ آڊيٽوريم ۾ گڏ ڪيو ۽ مٿن جديد هٿيارن سان فائرنگ شروع ڪري ڏني، جنهن جي نتيجي ۾ 131 شاگردن سميت 141 ڄڻا شهيد ٿي ويا، شهيد ٿي وڃڻ وارن ۾ اسڪول جي پرنسپال طاهره قاضي به شامل هئي، جنهن دهشگردن سان مزاحمت ڪئي، جنهن تي انهن درنده دهشتگردن پهرين ان کي شهيد ڪيو، جنهن بعد هو آڊيٽوريم حال ۾ يرغمال بڻايل معصوم شاگردن تي جديد هٿيارن سان بارود جو وسڪارو شروع ڪري ڏنو، جنهن جي نتيجي ۾ 8 کان 18 سالن جا 131 معصوم ۽ بيگناهه شاگرد شهيد ٿي ويا، معصوم شاگرد جان بچائڻ لاءِ بينچن، ڪرسين ۽ ٻين جڳهين تي لڪي جان بچائڻ جي ڪوششن ۾ رڙيون ڪندا رهيا، پر ظالم ۽ وحشي دهشتگردن انهن معصوم ۽ پتڪڙن ٻارڙن جي نازڪ سينن ۽ ڇاتين کي گولين سان پروڻ ڪري ڇڏيو. هر طرف ريهون ۽ چيخون هيون، هر طرف رت جو درياءَ وهي رهيو هو، ان واقعي مان ائين پئي لڳو ته دهشتگردن جو ٽارگيٽ وڌ کان وڌ شاگردن کي مارڻ ئي هو، جنهن ڪري هنن اسڪول ۾ داخل ٿيڻ کان پهرين کين کڻي آيل سوزوڪي بولان  ST41کي بم سان اڏائي ڇڏيو. ائين محسوس ٿي رهيو هو ته هو مرڻ ۽ مارڻ لاءِ هتي پهتا هئا. واقعي جي اطلاع تي پاڪ فوج جي اسپيشل سروس گروپ جا جوان پهچي ويا، جن دهشتگردن سان مقابلو ڪري انهن مان ست دهشتگردن کي ماري وڌو، جنهن ۾ هڪ چيچن، ٽي عرب ۽ ٻه افغان دهشتگرد شامل هئا، جڏهن ته باقي دهشتگردن کي آرمي اسپيشل گروپ جي جوانن مقابلي بعد گرفتار ڪري ورتو، جن مان چئن دهشتگردن کي 2 ڊسمبر 2015 تي ڦاهي تي لٽڪايو ويو.

پشاور واقعو ڪراچي جناح ايئرپورٽ تي 2007 ۾ ٿيل حملي کان به خطرناڪ ۽ ڀوائتو هو، جنهن ۾ معصوم انسانيت ۽ علم جي پروانن کي ڳولي ڳولي شهيد ڪيو ويو، دراصل هي واقعو پاڪستان ۾ وڌندڙ دهشتگردي کي ڪچلڻ لاءِ جون 2014 ۾شروع ڪيل آپريشن ضرب عضب جو رد عمل هو، آپريشن ضرب عضب ۾ اتر وزيرستان ۾ پاڪ فوج جي جوانن 2100 دهشتگردن جو صفايو ڪيو هو ۽ ڪجهه مهينن جي آپريشن بعد اتر وزيرستان جي 90 سيڪڙو علائقي کي دهشتگردن کان آجو ڪرايو هو. پاڪستان ۾ دهشتگردي جو آغاز 90 جي ڏهاڪي کانپوءِ شروع ٿيو، افغانستان ۾ پلجندڙ افغان طالبان ۽ پاڪساني طالبانن جي درميان اتحاد ٿيو، جنهن سبب هڪ طرف افغانستان ۾ معصوم انسانن جون زندگيون کسڻ جو سلسلو شروع ٿيو ته ٻئي طرف پهرين صوبو سرحد ۽ ان بعد پورو پاڪستان دهشتگردن جي نشاني تي اچي ويو. پاڪستان جي تاريخ ۾ دهشتگردي جي بدترين واقعن ۾ سڀني کان هي پشاور وارو سانحو انتهائي ڀوائتو ۽ المناڪ هو. نائن اليون کانپوءِ پاڪستان دهشتگردي خلاف جيڪا ويڙهه ڪئي، ان جي رد عمل ۾ مغربي ملڪ خصوصن آمريڪا ۽ يورپ جا ملڪ محفوظ بڻجي ويا، پر پاڪستان القائده ۽ تحريڪ طالبان جي نشاني تي اچي ويا، پاڪستان دهشتگردي خلاف جيڪا ويڙهه ڪئي آهي، سا اسان جي سامهون آهي، پر پاڪستان کي ان جي موٽ ۾ اهو بهتر تعاون نصيب نه ٿيو.جنهن جو پاڪستان حقدار هو. عالمي دنيا ان کان به وڌيڪ نتيجا حاصل ڪرڻ لاءِ پاڪستان تي زور ڀريندي رهي.جنهن بعد پاڪستان پاران آپريشن ضرب عضب شروع ڪري پنهنجي ملڪ کي دهشتگردي جي لعنت کان ڇوٽڪارو ڏيارڻ جو فيصلو ڪيو ويو. جنهن ۾ پاڪستان 90 سيڪڙو ڪاميابي حاصل ڪئي آهي، پر اڃان به پاڪستان ۾ را جي موجودگي ۽ دهشتگردي جي واقعن پٺيان هندستان جي ملوث هجڻ جا ثبوت ملي رهيا آهن.

پشاور آرمي پبلڪ اسڪول سانحو اهو دل ڏاريندر واقعو هو، جنهن پوري پاڪستان جي ماڻهن جي دلين کي جهوري پور پور ڪري ڇڏيو، جنهن بعد ان واقعي سبب پوري قوم پهريون ڀيرو متحد ٿي دهشتگردي خلاف ويڙهه ۾ پاڪ فوج سان مڪمل اظهار يڪجهتي ڪئي، جيڪا هن کان پهرين ڪڏهن به قوم ۾ نظر نه آئي، جڏهن پاڪستاني قوم معصوم گلڙن جا چچريل لاش ڏٺا ۽ غم ۾ ورتل والدين جي اکين ۾ آيل ڳوڙها ڏٺا ته هر فرد ائين پيئي محسوس ڪيو ته ڄڻ  هن جي گهر جي گلستان مان گلڙا ڇڄي ويا آهن، جنهن پوري قوم کي پهريون ڀيرو محسوس ڪرايو ته هاڻي دهشتگردن سان متحد ٿي وڙهڻ کانسواءِ ٻي ڪا به واهه نه بچي آهي، پشاور سميت پورو پاڪستان آرمي پبلڪ سڪول سانحي سبب ڪئين ڏينهن سوڳ ۾ مبتلا رهيو.

اصل ۾ دهشتگردن جو ڪو به مذهب نه آهي، هو درندا آهن، جنهن جو صرف هڪ ئي مقصد هوندو آهي ته پنهنجي دهشت ۽ وحشت کي برقرار رکيو وڃي، هنن کي ان ڳالهه جو ڪو به احساس ڪونهي هوندو ته هنن شهيد ٿيل معصوم ٻارڙن جو ڪهڙو ڏوهه هو، هنن جي والدين جي هنن سان وابسته اميدن سان هنن کي ڪو به سروڪار ناهي، موت جي خوف کان بي خطرا انهن معصوم گلڙن تي جديد هٿيارن جو ايترو ته بارود وسايو ويو جو معصوم شاگرد ۽ استادن سميت سوين والدين جون آسون به بارود جي انهيءَ دونهين ۾ دفن ٿي ويون، اڄ هو پنهنجن پيارن جي قبرن تي وڃي کين عقيدت جي ڀيٽا پيش ڪن ٿا ۽ سندن فريم ۾ بند ٿيل مرڪندڙ تصويرن کي ڏسي پنهنجا لڙڪ هارين ٿا، جيتوڻيڪ اسان سميت پوري انسانيت هن ڏکوئيندڙ واقعي تي اڃان به غمزده آهي، پر شهيدن جي پيرسن والدين جي نماڻين اکين ۾ گهوري ڏسبو ته سندن سڪي ويل اکين ۾ اڄ به درد جو اهو درياءَ وهي پيو، جنهن کي اسان ۽ اوهان محسوس نٿا ڪري سگهون.انهن والدين جون عيدون ۽ شام جا پويان پهر ۽ رات جي خاموشي کين پنهنجن کسجي ويل گلڙن کانسواءِ ڪيئن گذرنديون هونديون؟ ان درد جي ڪٿا جو اندازو صرف اهو ئي انسان ڪري سگهي ٿو جنهن جي گهر جي مٿان اهڙي قيامت گذري هوندي. هو معصوم شهيد ٿي امر بڻجي ويا ۽ دهشتگرد به گولين ۽ ڦاسين جو بک بڻجي مٽي جي ڍير ۾ دفن ٿي ويا، پر شهيدن کي اڄ پوري قوم سرخ سلام پيش ٿي ڪري ۽ انهن جي دلين ۾ اڄ به سندن لاءِ محبت ۽ دعائن جو درياءَ موجود آهي ۽ رهندو.

 

اختيارن جي ويڙهه ۾ وڃائجي ويل زندگيون: اقبال ملاح

پاڪستان ۽ خاص طور تي سنڌ جي اها بدقسمتي رهي آهي ته هتي نج عوامي مسئلن تي ڳالهائڻ ۽ ان جا حل ڳولڻ بجاءِ نان اشوءَ کي اشو بڻايو ويندو رهيو آهي، مون سوچيو پئي ته 11 ڊسمبر تي ڪراچي پريس ڪلب ۾ ٿيندڙ پريس ڪانفرنس پاڪستان جي سياسي پارٽين جي مُک ايجنڊا بڻجي ويندي، جنهن ۾ هي خطرناڪ انڪشاف ٿيل هو ته پاڪستان ۾ 2 ڪروڙ ماڻهو هيپاٽائٽس جي مرض ۾ مبتلا آهن ۽ اُها سنڌ جنهن ۾ پيپلز پارٽي ۽ وفاق وچ ۾ رينجرز جي اختيارن ۽ مُدي وڌائڻ تي بحث هلندڙ هجي، لطيف ۽ سچل جي ان سنڌ جا 25 لک ماڻهو هيپاٽائٽس جهڙي مرض ۾ ورتل آهن.

اسان جي ميڊيا ۽ اخبارن ۾ سنڌ جي وڏي وزير قائم علي شاهه ۽ وفاق جي نمائندي چوڌري نثار وچ ۾ ڏي سوال وٺ جواب واريون خبرون ڇپجن ٿيون، پر افسوس اِهو آهي ته اسان جي هن بيحس سماج ۾ پاڪ هيلٿ ڪيئر سينٽر لاهور جي ميان عزيز الرحمان ۽ ڀارت جي ٽرانسپلانٽ ماهر ڊاڪٽر واسو ديو جي پريس ڪانفرنس کي ٻڌو اڻ ٻڌو ڪيو ويو. سياست تي تجارت ڪندڙ جمهوري وڏيرن کي اهو اندازو نٿو ٿي سگهي ته هيپاٽائٽس مرض “سائلينٽ ڪِلر” جيان مسڪين ۽ بي پهچ ماڻهن کي ماري رهيو آهي ۽ ماڻهو آهن جو سرڪاري اسپتالن جي درن تي ڊوڙي ڊوڙي ٿڪجي پيا آهن، پر سندن اوهي واهي ٿيڻ وارو ڪير به ناهي. ڊاڪٽرن چواڻي ته پنجن سالن تائين سنڌ ۾ هيپاٽائٽس جي مريضن جو انگ 50 لک تائين پهچي سگهي ٿو. ماڻهو سلهه ۽ هيپاٽائٽس جهڙن مرضن ۾ مرندا هجن، سنڌ ۾ قبائلي جهيڙن جي تڪرار ۾ لاش ڪرندا هجن، پوليس ۽ انصاف ڏيندڙ سمورن سرڪاري ادارن تي ويساهه نه رهي، اهڙين حالتن ۾ هاڻ ماڻهو اختيارن جي هن جنگ جي ميدان ۾ لٿل سياستدانن ڏانهن واجهائيندي هي چئي رهيا آهن ته سياستدانن کي ڪڏهن اِها سمجهه ايندي ته هاڻ هو پنهنجو ووٽ فقط قرض طور ڏين ٿا، کين خبر آهي ته هنن سياستدانن وٽ عوام ۽ سماجي تبديليءَ واري ايجنڊا ناهي رهي. مون کي ته گورک هل جي ڪکاون گهرن ۾ سڙي فوت ٿي ويل هڪ ئي خاندان جي 6 ڀاتين واري خبر من جي اڱڻ تي ڇِپ جيان ڪريل نظر اچي رهي آهي، جنهن خبر کي ڪنهن به وڏي چئنل ڪا وڏي خبر نه سمجهيو ۽ نه ئي ان خبر جو ڪو فالو اَپ هليو. جوهي ۽ دادوءَ جي صحافين ڀنل اکين سان اُها خبر رپورٽ ڪئي آهي ۽ ان گهر جو سربراهه مسڪيني حال ۾ رتاوان ڳوڙها ڳاڙي رهيو آهي، پر ڪنهن به سياسي اڳواڻ لڙي وڃي سندس لڙڪ ناهن اُگهيا.

اسين جڏهن ڪنهن جي سڙي مري وڃڻ واري خبر جي ڳالهه ڪيون ٿا يا هيپاٽائٽس بابت ٿيل پريس ڪانفرنس کي اهم خبر سمجهون ٿا، تنهن جو سڌو مقصد سٺي حڪمرانيءَ واري سوال سان هجي ٿو. پاڪستان اندر اسٽيبلشمنيٽ ۽ سياسي پارٽين وچ ۾ هلندڙ پراڻي ۽ حل ٿيندي نظر نه ايندڙ جهيڙي جي نتيجي ۾ نه رڳو جمهوري ادارا متاثر ٿيا آهن، پر ان سڄي جهيڙي جو سڄو بار وڃي مسڪين ۽ بي پهچ ماڻهن مٿان ڪريو آهي. دهشتگرديءَ خلاف جنگ جي اعلان کانپوءِ اهڙي ڪهڙي سياسي جماعت آهي، جنهن نيشنل ايڪشن پلان جي حمايت نه ڪئي هئي، ته پوءِ آخر اوچتو  ئي اوچتو رينجرز کي اختيار نه ڏيڻ وارو معاملو ڪيئن اُڀري سامهون آيو آهي ۽ ڳالهه وڃي سنڌ ۾ گورنر راڄ جي ڌڙڪن ۽ وضاحتن تي پهتي آهي. رينجرز ته گذريل 26 سالن کان سنڌ ۾ موجود آهي ۽ آئون هفتو اڳ اڳڪٿي ڪري چڪو آهيان ته وفاق ۽ سنڌ جي وچ ۾ رينجرز جي مُدي وڌائڻ واري ڇڪتاڻ لفظن تائين رهڻي آهي. ڪراچيءَ ۾ رينجرز کي نه رڳو رهڻو آهي، پر آپريشن به وڌيڪ سخت ٿيڻو آهي ته پوءِ اخباري اڱڻ تي سيد قائم علي شاهه جي اها خبر ڪهڙو نياپو ٿي ڏئي، جنهن ۾ هن چيو آهي ته رينجرز کي ٽارگيٽ ڪلنگ، دهشتگردي، اغوا ۽ ڀتاخوريءَ خلاف اختيار ڏنا ويا هئا، پر اها ڪرپشن خلاف به ڪارروائي پئي ڪري. سماج ۽ ميڊيا ۾ پيپلز پارٽيءَ کي “هڪ ماڻهو” کي بچائڻ وارا الزام ٿا لڳن ۽ چوڌري نثار پيپلز پارٽي مٿان سنڌ جي وسيلن کي ڦرڻ ۽ لٽڻ وارا الزام هڻي هي ثابت ڪري رهيو آهي ته پيپلز پارٽيءَ جي مُک قيادت ڪرپشن ۾ سڌي طرح ملوث رهي آهي. هتي سڀ کان وڏي تڪليف جي ڳالهه هيءَ آهي ته اُها سنڌ جنهن جمهوريت جي بحاليءَ لاءِ پهرين مورچي تي ويڙهه پئي وڙهي، تنهن سنڌ تي گورنر راڄ لڳڻ واريون خبرون ۽ تبديلي ڪرپشن جهڙي الزام سان جڙيون آهن. عام تاثر اهو پيدا ڪيو ويو آهي ته سنڌ حڪومت انتهائي ڪرپٽ آهي ۽ وفاقي ادارا سنڌ ۾ ڪرپشن جو خاتمو چاهين ٿا، ان قسم جي صورتحال نه رڳو جمهوريت پر خود سنڌ جي ساک لاءِ به سٺو نياپو ناهي. ٿيڻ ته ائين گهرجي ها ته سنڌ حڪومت وفاق کي اهو چئي خوش آمديد ڪري ته سنڌ ڪرپٽ نه پر ايماندار سياسي قيادت جي هٿن ۾ آهي، اچو اوهان اسان جا ادارا وِزٽ ڪيو، جيڪڏهن ڪو ڪرپٽ ماڻهو هجي ته اوهين نشاندهي ڪيو، سزا سنڌ ان کي پاڻ ڏيندي.

افواهن جا جهان اڻکٽ هجن ٿا، ڳالهه رڳو عتاب هيٺ آيل هڪ ماڻهوءَ جي ناهي، عام ڪچهرين ۾ سلجهيل ماڻهن واتان مون هڪ نه پر سوين دفعا اها ڳالهه ٻڌي آهي ته هر ضلعي جي هر اداري ۾ هڪ ماڻهو اهڙو ضرور هجي ٿو، جيڪو صحت، تعليم، بلدياتي ادارن مان هڪ وڏي رقم ٻوريون ڀري پهچائي ٿو، ممڪن آهي ائين نه هجي، جيئن ڳالهه پيش ڪئي ٿي وڃي، پر پوئين 8 سالن ۾ سنڌ جا ادارا لاوارث ۽ لٽيل هجڻ جون خود پاڻ شاهديون ڏين ٿا.

روڊ تي بيٺل ٽريفڪ سپاهيءَ کان وٺي اسپتال جي ايم ايس تائين، رشوت جي بازار گرم هجي ٿي، اڳ ۾ لکندا هئاسين ته هتي ٿاڻا وڪامجن ٿا، پر هاڻ ته اسپتالون به وڪرو ٿين ٿيون، اهڙين حالتن ۾ جڏهن سنڌ جو وڏو وزير هي چوي ته “رينجرز کي ڪرپشن خلاف ڪارروائيءَ جا اختيار نٿا ڏئي سگهجن” واري بيان کي ماڻهو شڪ جي نظر سان ڏسن ٿا ته آخر ڪرپشن خلاف ڪارروائي نه ڪرڻ تي سنڌ حڪومت ڇو ضد تي بيٺل آهي. مڃوسين ته وفاق کي صوبن جي معاملن ۾ مداخلت نه ڪرڻ گهرجي، اها ڳالهه اصولي آهي، پر سنڌ اندر هيٺ کان مٿين سطح تائين ٿيندڙ ڪرپشن ۾ ڪير ملوث آهي ۽ اُها رڪڻ بجاءِ ڏينهون ڏينهن وڌندي ڇو پئي وڃي، هر شهر ۾ اهڙا ڪيترائي ماڻهو نظر اچن ٿا، جيڪي بنا محنت ۽ بنان ڪنهن پورهئي جي لکن مان ارب پتي بڻجي ويا آهن ۽ ڪالهه تائين جيڪي موٽرسائيڪل ۽ رڪشا ۾ هلندڙ هئا سي اڄ 50 لکن کان وڌيڪ رقم واري گاڏيءَ جا مالڪ بڻجي ويا آهن. سنڌ جا شهر ۽ انهن جون گهٽيون، اسپتالون ۽ اسڪول بد کان بدتر ٿيندا ويا ۽ هن جمهوريت جو مٺو ميوو ڪروڙن ۽ اربن جي شڪل ۾ انهن تائين وڃي پهتو، جن سنڌ بجاءِ پنهنجن مفادن کي ترجيح ڏني، جڏهن اهڙي صورتحال ٿي تڏهن سنڌ ۾ پهريون دفعو پيپلز پارٽيءَ جي تڪليف وارن ڏينهن ۾ سندن اتحادي جماعتن پيپلز پارٽيءَ جي خلاف مظاهرا ڪري رينجرز کي اختيار ڏيڻ واري گهر ڪئي آهي ۽ “ميري هم وطنو” وارو ڊپ ڏياريندڙ سنڌ ۾ حڪومتي جماعت کي اِهو ٻيهر جائزو وٺڻ گهرجي ته ڪرپشن واري معاملي تي سنڌ جا ماڻهو انهن کان ناراض آهن ۽ هو انهن ڌرين لاءِ مظاهرو ڪن ٿا، جن کي پيپلز پارٽي اسٽيبلشمينٽ جو نالو ڏئي ٿي، تنهن ڪري هن دفعي پيپلز پارٽيءَ کي اِها ڳالهه ياد رکڻ گهرجي ته ڊاڪٽر عاصم جهڙا ماڻهو پنهنجي مرضيءَ جو بيان ڏين ٿا يا نه، پر کين خود تنقيدي جائزو وٺڻ بعد اِها ڳالهه ضرور سوچڻ گهرجي ته سوشل ميڊيا تي هڪ اڳوڻي وزير جي تصوير ڇپي آهي، جنهن ۾ هو هڪ عاليشان دُڪان مان سبزيون خريد ڪري رهيو آهي، ان ئي تصوير سان گڏ سنڌ ۾ سندس وزارت دوران اُها تصوير نڪتل آهي، جنهن ۾ هو هڪ شهزادي جيان گارڊن جي سيڪيورٽيءَ ۾ گهمي رهيو آهي.

جمهوري وڏيرن جي زور تي اليڪشن ۾ بيهي ۽ کٽي به سگهجي ٿو، پر هن تبديل ٿيندڙ دنيا ۾ ڪنهن ڪنهن کي خاموش ڪري سگهجي ٿو ۽ واقعي ئي ڄاڻ حاصل ڪرڻ جا الاهي سارا در کلي چڪا آهن، اُهي بند نٿا ٿي سگهن.

ماڻهو رڳو هيپاٽائٽس نٿي ماري، ماڻهو رڳو دهشتگردن ۽  ڌاڙيلن هٿان نٿا مرن، اڻ سهپ، سياسي رويا ۽ هٿيارن جو استعمال انهن بيگناهه ماڻهن جون زندگيون به کسي ٿو، جن جو ڪو به ڏوهه نٿو هجي. هي درد جون ڳالهيون لکي رهيو هئس ته سانگهڙ مان عوامي آواز جي ضلعي رپورٽر ۽ نامياري ليکڪ عبدالجبار ڌاريجو فون ڪري سانگهڙ ۾ بيگناهه ماڻهن جي مارجي وڃڻ جي خبر ٻڌائي. ها واقعي ئي اها خبر ٻڌي من جي اڱڻ تي تڏو وڇائجي ويو، ائين جيئن درازا واري واقعي تي سنڌ جي شعور جون اکيون ڀنل هيون. سانگهڙ جي هن واقعي تي به سنڌ رتاوان ڳوڙها پئي ٿي ڳاڙي. انسان وڏي ڳالهه هجي ٿو، وڇوڙا ۽ يتيميون هيپاٽائٽس جهڙي موت ذريعي ملن يا سياسي ۽ ذاتي جهيڙي جي نتيجي ۾ ڪو جسم ٿڌو ٿيندو هجي، وڇوڙو ته وڇوڙو هجي ٿو، ڇا جڏهن سڀ ڪجهه نه رهندو، تڏهن هوش ايندو، انهن صاحبن کي جن وٽ طاقت ۽ حڪومت آهي؟ منهنجي خيال ۾ سنڌ جي شعور جون ڀنل اکيون پنهنجي من اڱڻ جي وڇايل تڏي تي ٻيهر هي اِلتجا ڪن ٿيون ته زندگي اهم ٿئي ٿي ۽ زندگيءَ کان وڏو نه ڪو اشو ٿي سگهي ٿو ۽ نه ڪا ايجنڊا، تنهن ڪري نان اشوءَ کي اشو بڻائڻ بجاءِ اُن اشوءَ کي اشو بڻائڻ گهرجي جتي زندگي خطرن هيٺ هجي ٿي.

 

گلن جهڙن ٻارڙن قرباني ڏيئي قوم کي دهشتگردي خلاف ڪٺو ڪيو: ماروي ميمڻ

سانگهڙ شهر جي باکوڙو روڊ تي پ پ ۽ فنڪشنل مسلم ليگ جون ريليون پاڻ ۾ آمهون سامهون ٿي پيا ۽ هڪٻئي جي خلاف نعريبازي ڪئي پٿراءَ ۽ لٺبازي بعد ڪرڻ بعد فائرنگ ڪئي ويئي جنهن سبب پ پ جي ريلي ۾ شامل پ پ جهول جو اهم اڳواڻ گل محمد مري ۽ ٻه پوليس اهلڪار نبي بخش ڏيرو، عاشق مري ٿڏي تي فوت ٿي ويا، گل محمد مري کي فوري طور اسپتال پهچايو ويو، جڏهن ته پوليس اهلڪارن جا لاش هڪ ڪلاڪ تائين واقعي واري هنڌ تائين پيل رهيا، ۽ گوليون ، لٺيون لڳڻ سبب 9 ماڻهو جيڪي  پ پ پ جي ريلي ۾ هئا، جن ۾ پ پ اڳواڻ فدا حسين ڏيرو جو ڀائيٽو شير محمد ڏيرو، ايريگيشن جو سب انجنيئر گل محمد شاھ ، الياس بگٽي، صلاح الدين، زوهيب ڏيرو، محمود بڙدي، ۽ راشد زخمي ٿي پيا، جن کي فوري طور سول اسپتال سانگهڙ ۾ داخل ڪرايو ويو، جتان فدا حسين ڏيرو جي ڀائيٽي شير محمد ڏيرو کي نازڪ حالت ۾ حيدرآباد نيو ويو، ۽ ايريگيشن جي سب  انجنيئر گل محمد شاھ کي نوابشاھ نيو ويو جتي زخمن جا سور نه سهي فوت ٿي ويو،  جڏهن ته ٻين زخمين کي به علاج لاءِ نوابشاھ نيو ويو، جڏهن ته واقعي واري هنڌ روڊ تي 7 کان وڌيڪ گاڏيون جن ۾ ڊبل ڍور، لينڊ ڪريوزر، ۽ ڪارون شامل هيون تباھ ٿي ويون انهن گاڏين جا شيشا ٽٽل هئا، ڪيتريونئي گاڏيون اونڌيون ٿيل هينون ،واقعي بعد علائقي ۾ خوف و حراس پکڙجي ويو، جڏهن تي واقعي واري هنڌ تان اهلڪار عاشق مري جو لاش دير سان پوليس اڇي ڪلر  جي ڍبل ڊور گاڏي مان ڪڍيو ۽ پوليس اهلڪار نبي بخش ڏيرو جو لاش واقعي واري هنڌ روڊ تي پيل هو، واقعي هنڌ پوليس دير سان پهتي، جڏهن ته بعد ۾ وڏي انگ ۾ سانگهڙ ضلعي جي پوليس نفري ۽ رينجرز پهتي ، جنهن بعد علائقي جو ڪڙو چاڙهيو، ۽ نظاماڻي پاڙي جي سرچ آپرشن ڪري گهر گهر جي تلاشي ورتي ۽ ڪيترائي ماڻهو شڪ جي بنياد تي پڻ گرفتار ڪيا، گرفتار ڪيلن جا نالا انتظاميه راض ۾ رکيا،  واقعو ضلعي ۾ باھ جيان پکڙي ويئي وڏي انگ ۾ ماڻهو سول اسپتال سانگهڙ پهتا، سانگهڙ سانحي تي سولاسپتال سانگهڙ ۾ ايمرجنسي لڳائي ويئي ، موڪل تي ويل ملازمن کي گاڏيون موڪل گهران گهرايو ويو، وڏي انگ ۾ شهري توڙي پ پ ڪارڪن سول اسپتال پهتا، ان موقعي تي پ پ اڳواڻ فدا حسين ڏيرو، علاوالدين جوڻيجو، ممتازشاھ، قاضي صدرالدين، اسلام قريشي ۽ ٻيا اڳواڻ موجود هئا، ۽ ان موقعي سول اسپتال سانگهڙ ۾ ڊپٽي ڪمشنر سانگهڙ ، ايس ايس پي سانگهڙ ۽ رينجرز آفيسر پڻ پهتا، زخمين کان معلومات واقعي متعلق ورتي.

چونڊن جي ماحول ۾ قتل و غارت جو سلسلو پراڻو آهي پر جيڪي ماڻهو قتل ٿين پيا انهن سان ڪو انصاف به ٿيندو يا رڳو ماحول سوڳوار رهندو ۽ پوليس پنهنجي خانه پوري ڪندي ڪيس ته داخل ڪندي پر ان جو کڙ تي ڪو نه نڪرندو ۽ اهي ڪيس فائيلن جي صورت ۾ تاريخ جو حصو بڻجي ويندا، تازن قتلن جو ڪو زميوار به ٿيندو يا اهي بس لال جي ليکي ۾ هليا ويندا.