تازيون خبرون

Daily Archives: December 15, 2015

ڪجهه ماڻهو پنهنجن غلط ڪمن کي لڪائڻ لاءِ پاڪستان ۽ سنڌ جي سياست کي ڍال بڻائي رهيا آهن: چوڌري نثار,گهرو وزير سنڌ ۾ گورنر راڄ لڳائڻ جي ڌمڪي ڏني آهي، وفاق گورنر راڄ لڳائي ڏيکاري: نثار کهڙو

اسلام آباد(بيورو) وفاقي گهرو وزير چوڌري نثار هڪ ڀيرو ٻيهر نالو وٺڻ بنا سنڌ حڪومت مٿان الزامن جو مينهن وسائي ڏنو،هڪ بيان ۾ وفاقي گهرو وزير جو چوڻ هو ته سنڌ تي وفاقي حڪومت يا ڪنهن وفاقي اداري حملو ناهي ڪيو،ڪجهه ماڻهن پنهنجن غلط ڪمن کي لڪائڻ لاءِ سنڌ ۽ پاڪستان جي سياست کي ڍال بڻائي رکيو آهي.چوڌري نثار جو چوڻ هو ته ڪيترن ئي سالن کان سنڌ جي وسيلن تي قبضو ڪندڙ ماڻهو سنڌ کي اُڏهيءَ جيان کائي رهيا آهن.پاڪستان پهريون ملڪ آهي جنهن ۾ حج ۽ عمري جي ٽڪيٽن تي به تاريخي ڪرپشن ٿي.وفاقي گهرو وزير جو چوڻ هو ته پنهنجي ڪردار جي باري ۾ ڪابه وضاحت نه ٿو ڏيڻ چاهيان،پر ليڪچر ٻڌائڻ وارن ماڻهن جي اڍائي سالن جي ڪارڪردگي ۽ ڪردار ظاهر ڪيان ته اُهي ماڻهو پنهنجو مُنهن لِڪائڻ ۾ پورا هوندا.

ڪراچي (اسٽاف رپورٽر) پاڪستان پيپلز پارٽي جي سينيئر اڳواڻ نثار کهڙو چيو آهي ته جيڪڏهن وفاقي حڪومت کي سنڌ صوبي ۾ گورنر راڄ لاڳائڻو آهي ته لڳائي ڏيکاري،ڪراچي ۾ پريس ڪانفرنس ڪندي نثار کهڙو جو چوڻ هو ته وفاقي گهرو وزير چوڌري نثار پنهنجي پريس ڪانفرنس ۾ چيو هو ته رينجرز جو معاملو اسيمبلي ۾ کڻي وينداسين، جڏهن ته گهرو وزير سنڌ  ۾ گورنر راڄ لڳائڻ جي به ڌمڪي ڏني آهي، جيڪڏهن وفاق کي سنڌ صوبي ۾ گورنر راڄ لڳائڻو آهي ته لڳائي ڏيکاري، جهموري ادارن جي اهميت کي هيٺ ڪري گورنر  راڄ نه ٿو لڳائي سگهجي. سندس چوڻ هو ته اسان سڀ جمهوري ادارن  تي اعتماد ڇو نه ٿا ڪري سگهون،اُهي به جمهوري ادارا هئا جن فيصلو ڪري پاڪ فوج کي آپريشن ضرب عضب شروع ڪرڻ جي اجازت ڏني هئي ۽ جنهن جو مُدو به ٻه سال ڪيو ويو هو.جيڪڏهن پوليس جي مدد سان سنڌ حڪومت صوبي ۾ امن امان قائم ڪري ٿي ته ڪنهن کي اعتراض ڇو آهن.پاڪستان پيپلز پارٽي جي سينيئر اڳواڻ نثار کهڙو وڌيڪ چيو ته سنڌ حڪومت رينجرز کي واپس موڪلڻ جو ڪو به فيصلو ناهي ڪيو،قانون جي شق نمبر 147 هيٺ رينجرز کي ڪراچي ۾ گهرايو ويو هو ۽ هاڻي اُن جي منظوري اسيمبلي کان وٺڻي آهي ۽ حڪومت کي رينجرز جي اختيارن ۾ واڌ جي معاملي تي ڪي به خدشا ناهن پر منظوري اسيمبلي مان ڪرائڻ ٿا چاهيون.

 

 

رينجرز معاملي کي ڇو پيو وڌايو وڃي، اختيار ته مون وٽ به ناهن: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته رينجرز اختيارن جي معاملي کي ڇو وڌايو پيو وڃي، اختيار ته مون وٽ به ناهن. سنڌ اسيمبلي جي اجلاس کانپوءِ صحافين سان ڳالهائيندي وڏي وزير چيو ته اوهان رينجرز جي معاملي کي ڇو وڌائي رهيا آهيو اختيار ته مون وٽ به ناهن. رينجرز اسان سان گڏ آهي ۽ اسين رينجرز سان گڏ آهيون معاملي کي خوش اسلوبي سان حل ڪيو ويندو. جيڪڏهن اقليتي اپوزيشن اڪثريت کي ڊڪٽيٽ ڪري ته افسوس جي ڳالهه آهي. اسان ايوان جو تقدس برقرار رکندي تحمل جو مظاهرو ڪيو پر هنگامي سبب اجلاس جاري رکڻ ممڪن نه هو جنهن تي اسپيڪر اجلاس ملتوي ڪيو.

 

تعليم کي هٿي ڏئي دشمنن جو مقابلو ڪنداسين: نواز شريف

اسلام آباد (اين اين آءِ) وزيراعظم محمد نواز شريف سان آرمي پبلڪ اسڪول پشاور جي شهيد ٻارڙن کي خراج عقيدت پيش ڪرڻ ۽ انهن جون يادون هميشه لاءِ تازيون رکڻ لاءِ وفاقي گادي واري هنڌ جي 122 ڪاليجن ۽ اسڪولن کي انهن جي نالن سان منصوب ڪرڻ جي منظوري ڏني آهي، ۽ چيو آهي ته عدم برداشت جا عملبردار نٿا چاهين ته اسان جا ٻارڙا تعليم پرائين پر اسان کين ڪامياب ٿيڻ نه ڏينداسين، انهن ٻارڙن روشني خيالي جا ٻج پوکيا آهن ۽ اسان جا دشمن نفرت ۽ انتهاپسندي سان وڙهن ٿا، اسان برداشت کي هٿي ڏئي انهن جو جواب ڏينداسين، سومر تي جاري ڪيل بيان ۾ وزيراعظم چيو ته ان قدم سان ٻارڙن جي يادن کي هميشه محفوظ رکيو ويندو، جن نفرت ۽ جهالت جي قوت جي ڀيٽ ۾ پنهنجون جانيون قربان ڪيون، انهن روشني خيالي جا ٻج ڇٽيا، نواز شريف چيو ته روشني خيالي ۽ تعليم اسان جو سرزمين آهي، اسان جي گهر جي بقا مادر وطن ۽ شهيدن جي يادن کي الڳ الڳ نٿو ڪري سگهجي.

 

آصف علي زرداري 27 ڊسمبر تي پاڪستان ايندو: پيپلزپارٽي اعلان ڪري ڇڏيو

اسلام آباد (بيورو) پاڪستان پيپلزپارٽي اعلان ڪيوآهي ته اڳوڻو صدر آصف علي زرداري کي ڏيهه واپسي تي نه ڪير روڪي سگهيو آهي ۽ نه ڪير روڪيندو، هو 27 ڊسمبر تي پاڪستان واپس اچي رهيو آهي، پيپلزپارٽي جي اڳواڻ قمر زمان قائره هڪ نجي ٽي وي جي پروگرام ۾ ڳالهائيندي چيو ته 27 ڊسمبر تي شهيد بينظير ڀٽو جي ورسي آهي، ان موقعي تي آصف علي زرداري ڏيهه اچي رهيو آهي، هو نئون ديرو ۾ ورسي جي مرڪزي تقريب ۾ شرڪت ڪندو، آصف علي زرداري ڏيهه ورڻ جون تياريون شروع ڪري ڇڏيون آهن.

 

چوڌري نثار وفاقي سرڪار لاءِ مسئلا پيدا ڪري رهيو آهي: خورشيد شاهه

اسلام آباد (بيورو) پيپلز پارٽي رينجرز اختيارن وارن معاملي تي چوڌري نثار جي رويَي خلاف قومي اسيمبلي ۾ احتجاج جو فيصلو ڪيو آهي، اپوزيشن ليڊر خورشيد شاهه چيو آهي ته چوڌري نثار وفاقي حڪومت لاءِ 2014ع جي ڌرڻن جهڙي صورتحال پيدا ڪرڻ چاهي ٿو، سنڌ حڪومت رينجرز جي اختيارن واري معاملي تي سنجيده آهي. اپوزيشن ليڊر سيد خورشيد شاهه سنڌ جي وڏي وزير قائم علي شاهه سان فون تي رابطو ڪري صوبي ۾ رينجرز اختيارن واري معاملي تي تفقصيلي بريفنگ ورتي. سيد خورشيد شاهه وفاقي گهرو وزير چوڌري نثار علي جي ڌمڪين واري بيان تي سخت احتجاج ڪندي چيو آهي ته قومي اسيمبليءَ ۾ احتجاج ڪيو ويندو. هن چيو ته چوڌري نثار سنڌ حڪومت کي 18هين ترميم جي ڌمڪي ڏني آهي، هـُو وفاقي حڪومت لاءِ 2014ع جي ڌرڻن جهڙي صورتحال پيدا ڪرڻ چاهي ٿو. اپوزيشن ليڊر خورشيد شاهه چيو ته سنڌ حڪومت رينجرز کي اختيار ڏيڻ جي معاملي ۾ سنجيده آهي پر چوڌري نثار جي غلط رويَي سبب مسئلا پيدا ٿي رهيا آهن.

 

سنڌ اسيمبلي جو اجلاس، رينجرز اختيارن وارو ٺهراءُ پيش نه ٿيڻ خلاف مخالف پارٽين جو سخت احتجاج، هنگامو

ڪراچي (اسٽاف رپورٽر) سنڌ اسيمبليءَ جي اجلاس ۾ رينجرز جي خاص اختيارن وارو ٺهراءُ پيش نه ٿيڻ خلاف پ پ مخالف پارٽين ايوان ۾ سخت احتجاج ڪري ڇتي نعريبازي ڪئي،اپوزيشن جي احتجاج سبب اسپيڪر آغا سراج دراني بيوسيءَ جو اظهار ڪرڻ بعد اجلاس سڀاڻي صبح 10 وڳي تائين ملتوي ڪري ڇڏيو. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو، جنهن ۾ پ پ مخالف ٽن پارٽين مسلم ليگ فنڪشنل، نواز ليگ ۽ پاڪستان تحريڪ انصاف جي ميمبرن گڏيل طور تي رينجرز کي خاص اختيار ڏيڻ لاءِ اعتراز واري نڪتي ڳالهائڻ لاءِ اٿي بيهي سخت احتجاج ڪري وقت گهريو. اسپيڪر مخالف ڌر جي ميمبرز کي ڳالهائڻ کان روڪي ڇڏيو. آغا سراج دراني جي اهڙي رولنگ تي مخالف ڌر جي پارٽين جا ميمبر سراپا احتجاج بڻجي اسپيڪر جي روسٽرم آڏو پهچي ويا جتي سخت احتجاج ڪيو ويو. اسپيڪر بار بار ميمبر کي پنهنجي سيٽن تي ويهڻ لاءِ چوندو ۽ سمجهائيندو رهيو پر ڪنهن به ميمبرز ساڻس هڪ به نه ٻڌي ۽ پنهنجو احتجاج جاري رکيو. گوڙ دوران سينئر صوبائي وزير نثار احمد کهڙي پاليسي بيان ڏيڻ جي ڪوشش ڪئي پر اسميبلي مڇي مارڪيٽ بڻجڻ سبب ڳالهائي نه سگهيو. اسپيڪر مخالف ڌر جي سخت احتجاج دوران متحده ايم پي اي خالد احمد کي ڳالهائڻ لاءِ فلور ڏنو ته مخالف ڌر ميمبرز ڇتي نعريبازي شروع ڪري ڇڏي. ايوان دهشتگردن جو يار آ غدار غدار آ، ڪرپشن جو يار غدار غدار آ ۽ شيم شيم توڙي گو گو جي نعرن سان گونجي اٿيو. اسپيڪر ٻيهر رولنگ ڏيندي چيو ته احتجاج ڪندڙ ميمبرز جو مٿس اعتماد ناهي ته ڀلي بي اعتمادي جي رٿ آڻين پر ڪارروائي ايجنڊا موجب هلائي ويندي. سينئر صوبائي وزير نثار احمد کي ٻيهر مداخلت ڪرڻي پئي، هو جذباتي ٿي ويو ۽ چيائين ته مخالف ڌر وارا ڪارروائي هلائڻ نه ٿا ڏين اجلاس ملتوي ڪيو وڃي. مخالف ڌر جي سخت احتجاج حڪومت جون متيون مجهائي ڇڏيون ۽ نيٺ اسپيڪر هل هنگامي واري صورتحال دوران اجلاس جي ڪارروائي اڱاري صبح 10 وڳي تائين ملتوي ڪري ڇڏي، جنهن کان پوءِ پي ٽي آءِ ميمبر خرم شير زمان ايجنڊا جون ڪاپيون ڦاڙي ڇڏيون.

 

لياري کي پوليس ۽ عوام جي مدد سان سنڀالينداسين: ڊي جي رينجرزسنڌ

ڪراچي (اسٽاف رپورٽر) ڊي جي رينجرز سنڌ بلال اڪبر چيو آهي ته لياري جي جوانن پاڪستان جي جهنڊي جو مان مٿاهون ڪيو آهي،لياري جي حالتن کي عوام ۽ پوليس جي مدد سان سنڀالينداسين. ڪراچي جي علائقي لياري ۾ عامر خان باڪسنگ چيمپيئن شپ منعقد ڪئي وئي، ان موقعي تي ڊي جي رينجرز خطاب ڪندي چيو ته ڪراچي آپريشن ۾ سنڌ پوليس جو اهم ڪردار رهيو آهي ۽ پوليس جي ساٿ ڏيڻ سبب لياري جي حالتون ٺيڪ ٿيون آهن، هن چيو ته لياري جي سڃاڻپ هتان جا رانديگر آهن، انهن نوجوانن پاڪستان جي جهنڊي جو مان مٿاهون ڪيو آهي.

 

ڪرپشن لڪائڻ لاءِ رينجرز جي اختيارن ۾ واڌ نه پئي ڪئي وڃي: عمران خان

شانگلا  (مانيٽرنگ ڊيسڪ) تحريڪ انصاف جي چيئرمين عمران خان ڪراچي ۾ رينجرز جي اختيارن ۾ واڌ جي حمايت ڪندي چيو آهي ته ڪرپشن لڪائڻ لاءِ رينجرز جي اختيارن ۾ واڌ نه ڪئي پئي وڃي، ميڊيا سان ڳالهائيندي هن چيو ته ڪراچي ۾ جيڪڏهن پوليس ٺيڪ هجي ها ته رينجرز کي اچڻو نه پوي ها، ڪرپشن لڪائڻ لاءِ اختيارن ۾ واڌ نه ڪئي پئي وڃي، ڪراچي جي پوليس تباهه ٿي وئي آهي، رينجرز کانسواءِ امن بحال نه ٿيندو، هن چيو ته تبديلي بلدياتي نظام تحت اچي سگهي ٿي، تحريڪ انصاف سبب ن ليگ ۽ پ پ تي دٻاءُ وڌيو، هن چيو ته حڪمران ٻڌائين ته انهن جا اثاثا ڪيترا آهن، عوام جي محنت جو پيسو چوري ٿي ٻاهر وڃي رهيو آهي، نواز شريف ۽ پرويز مشرف جو ڀاءُ ڪنهن ٻئي جو ڀاءُ نٿو ٿي سگهي، هن چيو ته ڪي پي ڪي ۾ هڪ تعليمي نصاب آڻي رهيا آهيون ته جئين غريبن جا ٻارڙا اڳتي وڌي سگهن.

 

نومبر تائين سنڌ ۾ 106، پنجاب ۾ 64 جوابدارڦاهي چڙهيا: رپورٽ

ڪراچي (اين اين آءِ) سنڌ ۾ گذريل 5 سالن دوران ٻين ٽن صوبن جي ڀيٽ ۾ سڀ کان وڌيڪ دهشتگردن کي ڦاهيون جون سزائون ڏنيون ويون، صوبي ۾ هاڻ به ڪيترائي جوابدار موت جي سزا جي انتظار ۾ ويٺا آهن، گهرو وزارت پاران جاري ڪيل انگ اکرن ۾ سنڌ ۾ گذريل مهيني تائين 106، پنجاب ۾ 64 جوابدارن کي ڦاهي ڏني وئي، بلوچستان، ڪي پي ۽ اسلام آباد ۾ هڪ هڪ دهشتگرد کي ڦاهي ڏني وئي، پاڪستان جي انتظام هيٺ ڪشمير فاٽا، گلگت بلتستان ۾ ان عرصي دوران ڪنهن دهشتگرد کي ڦاهي نه ڏني وئي، اهڙي طرح سنڌ ۾ موت جي سزا جي قيدين جو انگ ٻين صوبن ۽ علائقن جي ڀيٽ ۾ سڀ کان وڌيڪ آهي، سنڌ ۾ هن وقت 98، پنجاب ۾ 81، ڪي پي ڪي ۾ 25، بلوچستان ۽ اسلام آباد ۾ هڪ هڪ قيدي ڦاهي جي سزا تي عملدرآمد جي انتظار ۾ آهي، فاٽا، ڪشمير ۽ گلگت بلتستان ۾ ڪو به اهڙي قيدي نه آهي جنهن کي ڦاهي جي سزا ڏني وئي هجي، واضح رهي ته پ پ جي دور ۾ اڻ ڄاتل مدي تائين سزا تي عمل روڪيو ويو هو.

 

زرداري ليگ رينجرز جي اختيارن ۽ آپريشن ۾ رڪاوٽ وڌي ته دمادم مست قلندر ٿيندو:ذوالفقار مرزا

بدين (ڊ.ر) زرداري ليگ جيڪڏهن رينجرز جا اختيار وڌائڻ ۽ آپريشن ۾ رڪاوٽ وڌي ته دمادم مست قلندر ٿيندو،اهڙن خيالن جو اظهار اڳوڻي گھَرو وزير ڊاڪٽر ذوالفقار مرزا بدين جي ميمڻ جماعت جي صدر گلزار ميمڻ پاران ڪرايل جلسي کي خطاب ڪندي ڪيو،هن چيو ته جيڪڏهن رينجرز کي اختيار نه ڏنا ويا ته 19 ڊسمبر کان ڪراچي،نواب شاھ،سکر،لاڙڪاڻي ۽ ٻين شهرن۾ ڌرڻا هنيا ويندا،هن وڌيڪ چيو ته جيڪڏهن زرداري ليگ رينجرز جي اختيارن ۾ رڪاوٽ وجھي ته وفاقي حڪومت سمورا وسيلا ڪتب آڻي، اسان ۽ سنڌ جو عوام مڪمل حمايت ڪندو،هن چيو ته بدين جي عوام جھڙي طرح رزداري ٽولي کي عبرتناڪ شڪست ڏني آهي، اهڙي طرح 17 ڊسمبر تي بدين جو عوام هميشه لاءِ زرداري ٽولي کي بدين مان تڙي ڪڍندو،هاڻ سنڌ جو عوام چورن ۽ ڦورن کي ڪڏهن به برداشت نه ڪندو،زرداري سنڌ جي عوام جي حقن تي ته ڌاڙو هنيو پر شهيد ڀٽو ۽ شهيدبينظير ڀٽوجي جان نثار ڪارڪنن کي اَٽو،لٽو۽ اجھو ته نه ڏنو پر انهن  جي نوڪرين جا به پيسا ورتا، انهن جي پلاٽن تي قبضا ڪيا ويا. لينڊ مافيا سان ملي ڪري اربين رپيا هڙپ ڪيا،غريب هارين کان انهن جو روزگار کسي انهن جي زمينن تي انور مجيد قبضا ڪيا،هاڻ وقت اچي ويوآهي ته چور ۽ ڦورو حڪمرانن مان جان آجي ڪرائڻي پوندي ۽ انهن کي عبرتناڪ نشانو بڻائينداسين،هاڻ انهن جو لنڊن ۽ ۽ دبئي تائين پيڇو ڪندس،ان موقعي تي گلزارميمڻ،تنويرآرائين،عيسى ملاح ۽ ٻين پڻ خطاب ڪيو.