تازيون خبرون

Daily Archives: December 8, 2015

ڪراچي آپريشن تي سياسي ۽ عسڪري قيادت جا فيصلا

گذريل ڏينهن گورنر هائوس ڪراچي ۾ وزيراعظم نواز شريف جي صدارت هيٺ سنڌ جي ايپڪس ڪميٽي جو اجلاس ٿيو جنهن ۾ آرمي چيف جنرل راحيل شريف، ڊي جي آءِ ايس آءِ ليفٽيننٽ جنرل رضوان اختر، دفاع واري وزير خواجه آصف، وفاقي گهرو وزير چوڌري نثار،  سنڌ جي گورنر ڊاڪٽر عشرت العباد، وڏي وزير سيد قائم علي شاهه، ڪور ڪمانڊر ڪراچي ليفٽيننٽ جنرل نويد مختار، چيف سيڪريٽري محمد صديق ميمڻ، گهرو کاتي جي ايڊيشنل چيف سيڪريٽري محمد وسيم، آءِ جي سنڌ غلام حيدر جمالي، انٽيليجنس ادارن جي سربراهن سميت ٻين اعليٰ اختيارين شرڪت ڪئي، سياسي ۽ عسڪري قيادت دهشت گردي جي خاتمي لاءِ هڪ پيج تي،  ڪراچي ۾ جاري ٽارگيٽڊ آپريشن جاري رکڻ تي اتفاق ڪندي سياسي ۽ عسڪري قيادت چيو آهي ته ڪراچي آپريشن ۽ امن امان جي بحالي ۾ ڪا به رنڊڪ برداشت نه ڪئي ويندي ۽ آپريشن کي انجام تائين پهچايو ويندو، ڪراچي ۾ دهشتگردن جي خلاف جاري آپريشن ۾ سنڌ رينجرز خدمتون سرانجام ڏيندي رهندي ۽ آپريشن اختيارن جي تحت ڏوهاري عنصرن خلاف ڪاررواين کي جاري رکيو ويندو. وزيراعظم نواز شريف سڪيورٽي ادارن کي حڪم ڏنو آهي ته جي آءِ ٽيز ۾ جن جوابدارن جي نشاندهي ڪئي وئي آهي ۽ جيڪي عنصر امن امان جي صورتحال خراب ڪرڻ سميت دهشتگردن جا معاون، سهولتڪار ۽ مالي مددگار آهن، انهن عنصرن جي سرپرستي ڪندڙن کي فوري گرفتار ڪيو وڃي ۽ پراسيڪيوشن جي حوالي سان جيڪي تجويزون ۽ فيصلا ڪيا ويا آهن، انهن تي عملدرآمد ۾ تيزي آندي وڃي، گرفتار دهشتگردن خلاف ڪيسن جا چالان قانوني گهرجون پورو ٿيڻ بعد عدالتن ۾ پيش ڪيا وڃن ته جيئن عدالتون جوابدارن خلاف قانون موجب فيصلو ڏين. وزيراعظم جاچ ۽ قومي ايڪشن پلان تي عملدرآمد ۾ غلفت ڪندڙ آفيسرن کي عهدن تان فارغ ڪرڻ جو حڪم ڏيندي چيو آهي ته وفاقي حڪومت، سنڌ حڪومت ۽ سڪيورٽي ادارن کي هر ممڪن وسيلا ۽ معاونت فراهم ڪندي، دهشتگردي جي خاتمي لاءِ وفاق، عسڪري قيادت، سڪيورٽي ادارا ۽ صوبائي حڪومتون متحد آهن. چيف سيڪريٽري سنڌ محمد صديق ميمڻ اجلاس کي بريفنگ ڏيندي ٻڌايو ته قومي ايڪشن پلان تي عملدرآمد ڪيو پيو وڃي.جنهن تي  وزيراعظم هدايت ڪئي ته قومي ايڪشن پلان تي عملدرآمد کي تيز ڪيو وڃي. اجلاس ۾ ڊي جي رينجرز ميجر جنرل بلال اڪبر ڪراچي ۾ دهشتگردن خلاف جاري آپريشن تي تفصيلي بريفنگ ڏني ۽ ٻڌايو ته رينجرز جي ڪاررواين سان شهر ۾ امن امان جي صورتحال بهتر ٿي آهي، ڪراچي ۾ بنا ڪنهن فرق جي آپريشن جاري آهي، دهشتگردي جي انت واري عدالتن ۾ 2668 ڪيس هلي رهيا آهن، جن مان گذريل مهيني 66 ڪيسن جو فيصلو ٿيو، 30 کي سزا ٿي ۽ باقي بري ٿي ويا. آءِ جي سنڌ اهو به ٻڌايو ته ڪراچي ۾ رينجرز ۽ ملٽري پوليس جي اهلڪارن تي حملي ۾ ملوث جوابدارن کي گرفتار ڪيو ويو آهي. وزيراعظم جاچ ۽ پراسيڪيوشن جي نظام ۾ ڪمزورين تي افسوس جو اظهار ڪندي ۽ ان کي بهتر بڻائڻ جي هدايت ڪئي

 

لکي ڏنو سون ڪراچي پنهنجي قول فعل سان: ڊاڪٽر در محمد پٺاڻ

پاڪستان ٻه ٽڪر ٿيو، هڪ ملڪ مان ٻه ملڪ بڻجي ويا ۽ پوءِ ماڻهن جا وات کليا ته هاڻي ٻن مان ٻارنهن ٿيندا ۽ ڪڻي مان ڪيچ ٿيندا. ذوالفقار علي ڀٽي کي ملڪ جي واڳ ملي ۽ هن سنڌ ۽ بلوچستان جي حالتن کي ڏسندي چيو ته نه گريٽر بلوچستان قائم ٿيندو ۽ نه وري سنڌوديش ٺهندو. هو پاڻ ته نه رهيو پر ماڻهن جون سوچون ۽ لوچون باقي رهيون.

شهيد ڀٽي جيڪي چڱا ڪم ڪيا، انهن مان هڪ هيءُ به هئو ته جهڙوڪ ديڳ چاڙهي سنڌي ماڻهن کي ڪراچيءَ ۾ نوڪريون به ڏنائين ۽ پلاٽ به ڏنائين. سندس ذهن ۾ اهو هئو ته ڪراچيءَ ۾ لساني توازن قائم ڪجي. هن کان اڳ ايوب به ائين ڪيو هئو. سندس ڏينهن ۾ ڪراچيءَ ۾ ٿيندڙ بي لغام هل هنگامن جو ٽوڙ  هن ٻن طريقن سان ڪڍڻ جي ڪوشش ڪئي؛ پهريون ته پٺاڻن کي ڪراچيءَ ۾ آباد ٿيڻ لاءِ ماحول پيدا ڪري ڏنائين ۽ ٻيو ته ملڪ جي گادي مٽائڻ جو فيصلو ڪيائين ته جيئن حڪمراني ڪندڙن کي عادي وڳوڙين جي مصيبت کان بچائي سگهجي. ايوب جو پٺاڻن پيغام سمجهي ورتو. ان ڪري پٺاڻن چوڪيداريءَ، بوٽ پالش ڪرڻ، ۽ ننڍڙن هوٽلن هلائڻ  وارن ڪمن تي هڪ هٽي قائم ڪري ورتي. هڪ ننڍڙي جاءِ ۾ ٽن شفٽن جي صورت ۾ رهائش اختيار ڪئي ۽ اڄ ڪراچيءَ ۾ اهي پاڻ کي قوت طور مڃائي چڪا آهن.

ان جي برعڪس ڀٽي جي ڳالهه اسان  ماڻهن کي ٻئي طريقي سان سمجهه ۾ آئي. جن کي پلاٽ مليا، تن مان ڪيترن پلاٽ وڪرو ڪري، ڏوڪڙ کيسي ۾ رکي واپس وڃي پنهنجا وٿاڻ سنڀاليا، جن کي نوڪريون مليون، تن مان ڪيترن غنيمت ڄاڻي ڪراچيءَ کي ٻک وجهي رهڻ جو فيصلو ڪيو، انهن مان جن جي هلندي پڄندي هئي، سي بدليون ڪرائي پنهنجي ڳوٺن ڏانهن موٽي ويا. پلاٽ وڪرو ڪندڙ ۽ بدلي ڪرائيندڙن کي امڙ ماتا ته ياد آئي، پر ڌرتي ماتا وساري ويٺا. نتيجي ۾ ڪراچي ٻين حوالي ڪري روئڻ ۽ پٽڻ شروع ڪيائون ته ڪراچي سنڌين جي پيرن هيٺان نڪرندي پئي وڃي.

ڪراچي هاڻي به سنڌين کان خالي ڪانهي، پر سنڌين جي ”مفاداتي لڏپلاڻ“ ڪراچيءَ ۾ باقي رهيل سنڌين کي سمجهوتي واري زندگي گذارڻ تي آماده ڪيو. هنن لاءِ ان کانسواءِ ڪو چارو ئي ڪو نه رهيو ته اهي اڌ ڪاٺ جا ۽ اڌ لوهه جا ٿي رهن. قومي اتحاد ۽ اتفاق جي نالي ۾ پنهنجي گهرن مان پنهنجي مادري زبان کي نيڪالي ڏين. ڪن همراهن قومي يڪجهتيءَ جي عظيم تر مفاد ۾ شاديون مراديون به هتي غيرن ۽ غير زبانن وارن مان ڪيون. پوءِ ”دولها ڀائي“ جي لقب ماڻڻ لاءِ پنهنجي مستقبل ۽ ثقافت جي نسوري ڀينگ ڪري ڇڏي. عبدالواحد انڍهڙ اڳ ۾ ائين شادي ڪئي ۽ هن کي ”جيلاني“ اولاد پيدا ٿيو. سندس اولاد انڍهڙ سڏائڻ بدران جيلاني سڏرايو ۽ سنڌي ڳالهائڻ ۾ عيب  سمجهيو. مرحوم عبدالڪريم سعدي سنڌ جو مايه ناز صحافي هئو. هن ”دولها ڀائي“ جي گهر اچڻ وڃڻ ٿيندو هو. وڏي ۽ شاندار گهر ۾ کيس نوڪرن وارو ڪمرو مليل هئو. پاڻ گهر کان ٻاهر سنڌي ٻوليءَ جي جهولي ڀريندو هو ۽ گهر ۾ سندس جهوليءَ ۾ ڪنهن ٻيءَ ٻوليءَ جو گاهه گند اڇليو ويندو هو.

اهڙيءَ  ريت گهڻو اڳ ڪراچيءَ ۾ اسان سنڌي ٻوليءَ جي بچاءَ ۽ ترقيءَ لاءِ وڏا وڏا ميڙ ڪندا هئاسين، جلسا ڪندا هئاسين ۽ اجلاس گهرائيندا هئاسين. انهن ميڙن ۾ جيڪو گهڻيون دانهون ۽ ڪوڪون ڪندو هو، ان جي گهر جي چوکٽ کان اندر سنڌي ٻولي جو نالو نشان به ٻڌڻ ڏسڻ ۾ ڪو نه ايندو هو.

ڀٽي کان وٺي بينظير ۽ انهن ٻنهي شهيدن کان وٺي ويندي اڄوڪي دور تائين سنڌ ۾  اڪثر حڪومتون سنڌين جون ئي رهيون آهن. هاڻي حڪمرانن ۾ ڀٽي جهڙي سوچ نه رهي آهي. هنن وٽ منظم نموني سان ڪراچيءَ ۾ لساني توازن قائم ڪرڻ ۽ سنڌين جي ڪراچيءَ تي حق قائم ڪرڻ جي ڪا منظم ۽ واضح  حڪمت عملي ڪانهي. پر جت پنهونءَ جا ڀائر مصداق ماڻهن جي به پنهنجي عظيم شهر ۽ باقي شهرن سان لاتعلقي واري ساڳي تحريڪ جاري آهي. حڪومت خواهه اسان انهن روايتن کي اڃا به قائم ۽ دائم رکندا پيا اچون. اسان جون دانهون ۽ ڪوڪون به ساڳيون آهن، عمل ۽ افعال به ساڳيا آهن. ان ڪري صورتحال به ساڳي آهي.

تازو ٿيل مڪاني چونڊن جي نتيجي ۾ ڪراچي جي وقتي مالڪيءَ لاءِ جيڪو فيصلو اڳيان آيو آهي، اهو باشعور ۽ سنڌ دوستن ماڻهن جي لونءَ ڪانڊارڻ جي لاءِ ڪافي آهي. ائين به ٿيندو آهي ته سياست جي شطرنج جي مُهرن کي استعمال ڪرڻ لاءِ چونڊن ۾ اهڙي چال هلائي ويندي آهي ته جيئن مستقبل قريب ۾ ان جا سياسي مقصد حاصل ڪري سگهجن. هڪ طرف الطاف ۽ سندن ساٿين تي ڊاڪٽر عمران فاروق جي قتل ڪيس جي وفاق پاران ايف آءِ آر داخل ڪرڻ ۽ ٻئي طرف ڪراچيءَ ۾ انهيءَ جماعت جي مڪاني چونڊن ۾ اڪثريت سان ڪامياب ٿيڻ هڪ ئي سڪي جا ٻه پاسا ٿي سگهن ٿا ۽ اهو سڪو مستقبل قريب ۾ استعمال ڪري سگهجي ٿو. ڳالهه ڪيئن به هجي پر ويچارڻ جي ڳالهه اها آهي ته اسان سنڌ واسي ڪٿي بيٺا آهيون ۽ ڪهڙيءَ ريت پنهنجي شهرن جي وارثيءَ ۽ مالڪيءَ تان هٿ پيا کڻون.

 

ويا مور مري هنج نه رهيو هيڪڙو: حاجي گل حسن آريسر

در حقيقت ٿر جو 19 هزار چورس ميلن جو علائقو، جنهن جو دارومدار ۽ گذر سفر فقط خدا تعاليٰ جي نعمت برسات تي آهي، جنهن جي لاءِ عام چوڻي آهي ته ”وسي ته ٿر نه ته بر ئي بر.“ ٿر جي مارو ماڻهن جو گذر سفر جو ذريعو به فصل کان به وڌيڪ چوپائي مال تي آهي، هنن کي مال لاءِ گاهه ۽ چارو ملي ٿو ته هو خوش آهن، پر برسات کانسواءِ گاهه ۽ چارو ملي ته ڪٿان، گوار جي ڪٽي ۽ بوهه، جنهن کي ڪو زمانو هو آبادگار اڇلائي ڇڏيندا هئا، اهو بوهه، گوار جي ڪٽي ۽ ديوين جا پلڙا جيڪي گڏهن جو کاڄ آهن اهو به ٿر جي واپارين ڏڪارن جو مسلسل فائدو وٺندي جمع ڪري رکيو آهي اهي ايٽم به مجبور مالدارن کي ٻه سئو کان ٽي سئو روپيا مڻ تائين وڪرو ڪيا ٿا وڃن. ٻڌايو ته ٿر جا غريب ماروئڙا ٻچن جو پيٽ پالڻ يا چوپائي مال جي کاڌي لاءِ ڪيئن گذر سفر ڪري سگهندا هوندا؟ انهن سمورن درپيش مسئلن ۽ ڏڪارن جي باوجود به ٿر جو هي خطو سياست جي ميدان ۾ ڪنهن به حالت ۾ سنڌ کان گهٽ نه رهيو آهي، هاڻي ڪو سياست سکي ته ”ٿرين کان سکي“ وڏن وڏن سياسي چال بازين ۽ سياسي هيراڦيرين ۾ ٿريا وڏا ٽرينڊ آهن، سو ٿرپارڪر ضلعي ۾ چار وڏيون برادريون آباد آهن ۽ ٿر جي مالڪي به اهي برادريون ڪن ٿيون، انهن برادرين ۾ ٻن برادرين نهڙيا برادري جي سردار ارباب الهجڙيو، ارباب توگاچي، ارباب امير حسن مرحوم کان هلندو اچي ٿو. نهڙين جي ٻڌي ۽ اتحاد سبب سردار ساڳئي ئي ساڳئي ڪٽنب جو رهيو آهي ۽ هلندو اچي ٿو.

ٿر جي ٻي برادري راهمان برادري جو سردار ارباب مقبول احمد سردار بڻيو، جيڪو سندس حد مان صوبائي اسيمبلي جي تڪ مان ٻه دفعا هارائي ويو. حالانڪه ان جو والد مرحوم ارباب نور محمد راهمون وڏي هلت چلت وارو ۽ دٻدٻي وارو راهمن جو قومي سردار هو، پيپلزپارٽي جي ٽڪيٽ تي انهيءَ صوبائي حلقي مان ارباب نور محمد راهمون بنا مقابلي ڪامياب به ٿيو، پر هن جي لاڏاڻي بعد برادري ۾ ڌڙابندي ٿي وئي. ان ڪري راهمان برادري گروپن ۾ ورهائجي وئي. ٿر جي هڪ کاهوڙ وارو حصو، جنهن خوش نصيب خطي سرفروش جيالي ڪامريڊ خان محمد راهمون مرحوم ۽ شهيد ڊاڪٽر ڪمال راهمون کي جنم ڏنو. ان خطي ڀارتي ڪانگريس جي باني مهاتما گانڌي جي محبت کي دهرائيندي هڪ ڳوٺڙي جي همراهه راهمون برادري جي فرد پنهنجو نالو گانڌي رکيو، چوندا آهن ته ”ڪانءُ کي لڙ ۾ مزو“ سو گانڌي راهمي جي پٽ راهمن جي ڌڙابندي جو فائدو وٺندي پاڻ کي ان جي جاءِ تي سردار بڻائڻ جي ڪوشش ڪئي ۽ ان جو فائدو وٺندي هي همراهه به انهيءَ حلقي مان اسيمبلي جو ميمبر ايم پي اي بڻجي يو ۽ بعد ۾ ان جو ڀائيٽو به ايم پي اي ٿيو آهي ۽ صوبائي وزير به بڻيو، هن ڳوٺ کيمي جو پار ايٽ ڏاهلي کي جدا تعلقو به ٺهرايو پر پوءِ به راهمان برادري جو ٻيو وڏو ڌڙو عبدالرزاق راهمون ۽ برادرس ۽ هن جو سابقه وزيراعليٰ سنڌ ارباب غلام رحيم جي گروپ ۾ هئڻ ۽ حمايت هئڻ سبب هن جو مقابلو ڪندا آيا آهن ۽ ڪندا اچن ٿا. هنن انهيءَ گانڌي گروپ کي موقعي پرست قرار ڏئي ڪڏهن به تسليم نه ڪيو آهي. عبدالرزاق راهمون ٻه ڀيرا هن حلقي مان ايم پي اي به ٿيو آهي، هاڻي ڳالهه ٿي هلي ته ان دور ۾ ٿر جي هڪ وڏي ڳوٺ سوجي بقا تعلقو ڇاڇرو هاڻي تعلقو ڏاهلي ۾ جنم وٺندڙ ماهر تعليم محنتي استاد مجاهد آچار سميجو جيڪو ٿر جي هڪ وڏي برادري سميجا جو فرد هو، هن جاکوڙي انسان پرائمري ماستر هئڻ سان گڏ پنهنجا پرائمري جا فرائض ادا ڪرڻ بعد هن ان علائقي جي ڏتڙيل ٿري عوام جي سورن ۽ دردن جا داستان ٻڌي ۽ هنن جي مدد ڪرڻ لاءِ ميدان ۾ آيو، مجاهد آچار هڪ رٽائرد پرائمري استاد سان گڏ خلق خدا جي خدمت ڪرڻ جو ايڌي وانگر خلق خدمت جو جذبو رکندڙ انسان هو. هن ٿر جي سميجا برادري کان علاوه ٿر جي سمورين برادرين جي غريب ۽ مسڪين ماڻهن لاءِ هڪ قومي تحريڪ جو ڪردار ادا ڪيو هو. برادري جي غريب مسڪين ماڻهو لاءِ هڙان وڙان به خرچ ڪري مسڪينن جا ڪم ڪرائيندو هو، ٿر ۾ ظلمن ۽ ڪرپشن جي هن دور ۾ مجاهد آچار سميجو جي آواز کان وڏا وڏا تيس مار خان به لهرائيندا هئا ۽ سياسي وڏيرا ته مجاهد جو نالو سامهون ايندو هو ته ڄڻ انهن لاءِ ايمرجنسي جو اعلان ٿي ويندو هو، هو هميشه چوندو هو ته ٿر ۾ مسڪين ماڻهن کي ظالم سياسي وڏيرن ۽ تپيدارن ڳٺ جوڙ سان لٽيو ۽ ڦريو آهي ”جيئرن کي مئا ۽ مئلن کي جيئرا بڻايو ڇڏين ٿا“ هن جو تڪيو ڪلام هو ”اوپر رب باري نيچي پٽ واري“ ڇاڪاڻ ته ٿر جو تپيدار به وڏو ظالم ۽ بي رحم هوندو آهي، هو زمين مالڪن جي بي خبري ۾ وڪڻي کاتا به تبديل ڪري ڇڏيندو آهي.

مجاهد آچار ظالم وڏيرن ۽ ڪامورن کي مخاطب ٿيندي چوندو هو ته ”مت ستائو غريب ڪو غريب روءِ ديگا اگر خدا ني سن ليا تو جڙ سي نيست و نابوت ڪر دي گا“ هن مجاهد جي آذان اها آهي ته غريب کي، ظالم چاهي وڏيرو هجي يا سرمائيدار، اُن کان حق وٺرائي ڏيڻ آهي ڇا اها وڏي عبادت نه آهي؟ جيڪا مجاهد آچار سميجو ادا ڪئي پر هن مجاهد جو عظيم ڪردار به اڄ تائين گمنام رهيو آهي، اهڙا ماڻهو صدين ۾ پيدا ٿيندا آهن. هو هن ٿر جي ظالم ۽ واعدي خلاف سياستدانن لاءِ هڪ تاريخ ٿي اڀريو هو. هي انسان دوست انسان 30 آڪٽوبر 2008 ۾ پنهنجي رب حقيقي سان وڃي مليو، ٿر جا غريب ماڻهو اڄ به مجاهد کي ياد ڪن ٿا ۽ چون ٿا ته الله سائين مجاهد جي اولاد ۾ اهڙو ڪو مجاهد پيدا ڪري.

 

ثقافتي ڏهاڙو: اسان ڪٿي بيٺل آهيون؟: رشيد سومرو

سنڌ ۾ هر سال جيان هن سال به ثقافتي ڏهاڙي کي ملهائڻ لاءِ سرگرميون شروع ٿي ويون آهن. ثقافتي رسمون، گيتن، لولين، ٻولين ۽ ٻين تقريبن ذريعي پنهنجي ڌرتي، قوم ۽ ثقافت کي جلا بخشڻ لاءِ سنڌ جو هر ننڍو توڙي وڏو فرق شاگرد ۽ شاگردياڻيون پنهنجي قومي ڏهاڙي کي ڀرپور انداز سان ملهائڻ لاءِ تحرڪ ۾ اچي چڪا آهن.

ڪنهن به قوم جي حقيقي سڃاڻپ ان جي تهذيب، ثقافت، اٿڻي ويهڻي، رهڻي ڪهڻي، ٻولي ۽ ان جي سماجي قدرن مان پوي ٿي، سنڌي قوم توڙي انهن جي ثقافت 5 هزار سال پراڻي عرصي تي مبني آهي. ثقافت صرف گيت ڳائڻ ۽ نچڻ ٽپڻ جو نالو نه آهي پر ثقافت تهذيب جي انهن سمورن پهلوئن جي پرک ۽ تحفظ جو نالو آهي، جنهن مان سماج ۾ قوم جي سڃاڻپ ٿيندي هجي. سنڌي تهذيب آرين جي سنڌ ۾ آمد کان به اڳي جي آهي، راجا پورس کان ويندي موجوده دور تائين مختلف دور آيا، پر انهن دورن ۾ مختلف سماجي تبديلين اچڻ جي باوجود سنڌي ثقافت اڄ به زنده آهي. ٽوپي، اجرڪ، پٽڪو اڄ دنيا جي ٻين قومن جي لباسن کان منفرد ۽ مختلف آهي. اهو ئي سبب آهي جو اڄ به سنڌي ماڻهو هزارن ماڻهن ۾ پڌرو هوندو آهي.

سنڌي ادب ۾ ڪچهري، مچ ڪچهرين، سگهڙ ڪچهرين، اوطاق ڪچهرين کان ويندي دنبوري تي سر آلاپڻ، بانسري تي راڳ ڇيڙڻ ۽ ڌنون وڄائڻ توڙي چنگ تي نرالا سر آلاپڻ سنڌي ثقافت ۽ تهذيب جو اهو جز رهيا آهن، پر هن وقت جڏهن اسان ثقافتي ڏهاڙا ملهايون ٿا ته انهن ۾ مذڪوره عنصرن کان وڌيڪ ناچ گانن کي وڌيڪ ترجيح ڏيئي سنڌي ثقافت سان ڄڻ مذاق ڪيو ٿو وڃي.

ثقافت کي اجاگر ڪرڻ لاءِ جنڊي جي هنر، ڪاشيگري، ڪنڀارڪي ڪرت، ماٽي ۾ لسي ولوڙڻ جهڙين رمزن کي اجاگر ڪرڻ جي ضرورت آهي. ثقافتي پوشاڪ اوڍڻ ۽ ان کي دنيا جي سامهون پيش ڪرڻ ئي حقيقي ثقافتي عڪس آهي نه ڪي اسٽيجن تي بيهي نياڻين کي نچائي واهه واهه ڪرڻ سنڌي ثقافت آهي. جيتوڻيڪ ڪن ماڻهن کي اسان جي ان نقطئه نظر تي اعتراض به هوندو پر جي حقيقتن جي آئيني ۾ توري تڪيو ته اسان وارو نقطئه نظر صحيح نظر ايندو.سنڌي اديبن، ليکڪن، مؤرخن، شاعرن، ڪلاڪارن جي هنري محنت کي اجاگر ڪرڻ ۽ ٻولي جي رمزن کي صحيح نموني نشانبر ڪرڻ ئي حقيقي ثقافتي رنگ آهن، جنهن کان شايد اسان ڪوهين ڏور آهيون. ڀلي ثقافتي ڏينهن تي ريليون ۽ تقريبون منعقد ڪيون وڃن پر انهن جو محور ثقافتي قدرن کي اجاگر ڪرڻ هئڻ گهرجي.

لطيفي وايون، بيت، گيت، غزل، داستان، ڪلاسيڪل سماجي اصولن ۽ آدرشن کي جيڪڏهن پس پشت رکي صرف نچڻ تي زور ڏيون ته اها قومي زيادتي هوندي. ثقافتي ڏهاڙن تي جن سماجي شخصيتن نمايان خدمتون سرانجام ڏنيون، جن ٻولي ۽ تهذيب جي واڌ ويجهه لاءِ پتوڙيو، انهن کي به ياد ڪيو وڃي ۽ انهن جي خدمتن کي دنيا سامهون آندو وڃي ته جيئن نئين نسل کي پنهنجي حقيقي ثقافتي اصولن جو پتو پوي. ڀڳت ڪنور رام کان ويندي، استاد جمن تائين ڀلوڙ قومي راڳين، لطيف اياز کان ويندي منشي تائين قومي شاعرن کي عقيدت جي ڀيٽا ڏيڻ گهرجي، جن جي طفيل اڄ به سنڌي ٻولي قائم و دائم آهي.

جديد دور ۾ ثقافتي ريتن، رسمن ۽ اصولن کان اڻ واقف ماڻهو سگريٽ جي ڪش کي مٺ سان ڇڪڻ ۽ نسوار جي وزن کي منهن ۾ وجهي سمجهي ٿو ته هو ثقافتي اصولن جو پاسدار آهي ته اهو غلط آهي. موهن جي دڙي، ڪوٽڏيجي، رني ڪوٽ جي قلعن، ميرن جي صاحبي ۽ مڪلي جي ٽڪرين جي سياسي تاريخ رکڻ ۽ ان کي پنهنجي ايندڙ نسل کي منتقل ڪرڻ حقيقي ثقافت آهي. سنڌ جي عظيم بزرگن شاعرن ۽ سورمائن، لطيف، صوفي شاهه عنايت، نوري ڄام تماچي، دولهه دريا خان ۽ روپلو ڪولهي کي پرکڻ ۽ پڙهڻ حقيقي ثقافت جا انمول رنگ آهن، جنهن کان گهڻي حد تائين اسان ناواقف آهيون، انڪري ضرورت ان ڳالهه جي آهي ته پنهنجي اصلوڪي ۽ حقيقي ثقافت کي اجاگر ڪرڻ لاءِ استادن، عالمن، ميڊيا توڙي سنڌ جي سڀني گهڻ گهرن کي اڳتي اچڻ گهرجي ته جيئن هن ڌرتي جي حقيقي تهذيب کان اسان سڀئي روشناس ٿي سگهون.

 

آپريشن جي خاتمي تائين فوج جي واپسي ناممڪن قرار، ڪراچي آپريشن تيزي سان جاري رکڻ جو اعلان

ڪراچي (اسٽاف رپورٽر) چيف آف آرمي اسٽاف جنرل راحيل شريف ڪراچي ۾ سيڪيورٽي جي صورتحال ذڪر جوڳو سڌارو آڻڻ ۽ پرامن مڪاني اليڪشن جي اهتمام تي آرمي، رينجرز، انٽيليجنس ايجنسين ۽ قانون لاڳو ڪندڙ ٻن ادارن جي ڪارڪردگي کي ساراهيو آهي آرمي

چيف جنرل راحيل شريف جي صدارت هيٺ ڪور هيڊڪوارٽرز ڪراچي ۾ سيڪيورٽي صورتحال بابت اعليٰ سطحي اجلاس ٿيو جنهن ۾ ڪراچي سميت سڄي سنڌ ۾ سيڪيورٽي صورتحال جو جائزو ورتو ويو اجلاس ۾ ڪور ڪمانڊر ڪراچي، ڊي جي آءِ ايس آءِ ۽ ڊي جي رينجرز شرڪت ڪئي. چيف آف آرمي اسٽاف جاري آپريشن ذريعي ڪراچي ۾ سيڪيورٽي جي صورتحال ۾ ذڪر جوڳو سڌارو آڻڻ تي پاڪ فوج رينجرز انٽيليجنس ايجنسين ۽ قانون لاڳو ڪندڙ ٻين ادارن جي ڪارڪردگي کي ساراهيو آرمي چيف ڪراچي ۾ مڪاني اليڪشن جي پرامن اهتمام تي به ڄاڻايل ادارن جي تعريف ڪئي. آمرمي چيف جنرل راحيل شريف اعلان ڪندي چيو آهي ته ڪراچي آپريشن بنا ڪنهن فرق جي جاري رهندو ۽ آپريشن مڪمل ڪرڻ کانسواءِ هتان واپسي ممڪن ناهي، هڪ نجي ٽي وي مطابق ايپڪس ڪاميٽي جي اجلاس ۾ آرمي چيف چيو ته ڪراچي ۾ آپريشن جي ڪري امن و امان جي صورتحال ۾ واضح نموني بهتري ٿي آهي ۽ امن و امان جي صورتحال ۾ بهتري قربانين جو نتيجو آهي، ان لاءِ ڪراچي جي امن و امان کي ٻيهر خراب ٿيڻ نه ڏينداسين، هن چيو ته ڪراچي آپريشن مڪمل طور غير سياسي آهي، آپريشن لاءِ وفاقي ۽ صوبائي ادارن جو وڌيڪ تعاون جي ضرورت آهي، ڪراچي دهشتگردن ۽ انهن جي حمايتن خلاف آهي هتان هاڻي واپسي ممڪن ناهي، آرمي چيف اجلاس ۾ ڪراچي پوليس کي جديد هٿيار ڏيڻ جي حمايت ڪئي ۽ چيو ته پوليس کي آپريشن جي لاءِ جديد هٿيار ڏيڻ گهرجن.

ڪراچي ۾ دهشتگردن جي ٻيهر واپسيءَ جا سمورا دڳ بند ڪرڻا پوندا: نواز شريف

ڪراچي (اسٽاف رپورٽر) ڪراچي ۾ دهشتگردن جي ٻيهر واپسيءَ جا سمورا دڳ بند ڪرڻا پوندا وزيراعظم جي صدارت هيٺ سياسي ۽ عسڪري قيادت جي اجلاس دوران اتفاق، وزيراعظم چيو آهي ته ڪراچي جي امن تي ڪا به سوديبازي نه ڪئي ويندي، ڪارڪردگي کي رڳو گرفتارين سان جاچڻ بدران اهو جائزو وٺڻ گهرجي ته گهربل هدف ڇو حاصل نه ٿيا، آءِ جي سنڌ اجلاس کي بريفنگ ڏيندي ٻڌايو ته ڪراچي ۾ رينجرز ۽ ملٽري پوليس تي حملن جا جوابدار گرفتار ڪيا ويا آهن وزير اعظم نواز شريف ڪيسن جي پيروي ۽ ڪمزور جاچ تي ڳڻتي ظاهر ڪندي چيو آهي ته ڪراچي ۾ امن امان جي صورتحال تي ڪا به سوديبازي نه ڪئي ويندي، پنهنجي ڪارڪردگي کي رڳو گرفتاري سان نه جاچڻ گهرجي، ان ڳالهه جو جائزو وٺڻ گهرجي ته گهربل حدف ڇو ناهن حاصل ٿيا آهن. گورنر هائوس ڪراچي ۾ وزير اعظم جي صدارت هيٺ امن امان بابت اعليٰ سطحي اجلاس ٿيو، جنهن ۾ آرمي چيف جنرل راحيل شريف، ڊي جي آءِ ايس آءِ ليفٽيننٽ جنرل رضوان اختر، وفاقي گهرو وزير چوڌري نثار، گورنر ڊاڪٽر عشرت العباد، وڏو وزير سيد قائم علي شاهه، ڊي جي رينجرز، آءِ جي سنڌ ۽ ٻيا عملدار شرڪت ڪئي. اجلاس ۾ وڏي وزير سيد قائم علي شاهه بريفنگ ڏيندي چيو ته ڪراچي ۾ امن جي بحالي لاءِ بنا فرق جي آپريشن جاري آهي، جڏهن ته پوليس کي جديد هٿيار ۽ نادرا جي ڊيٽا تائين رسائي ڏني وڃي. وڏي وزير چيو ته سنڌ حڪومت دهشتگردي جي انت واريون وڌيڪ 30 عدالتون قائم ڪري رهي آهي، ٽارگيٽڊ آپريشن ۾ رينجرز ۽ پوليس جو ڪردار واکاڻ جوڳو آهي. آءِ جي سنڌ غلام حيدر جمالي اجلاس کي بريفنگ ڏيندي چيو ته نيول ملٽري پوليس تي حملي ۾ ملوث جوابدارن کي گرفتار ڪيو ويو آهي.

 

آرمي چيف سان پاڪ-افغان بابت آمريڪا جي خاص نمائندي جي ملاقات

 

راولپنڊي (اي پي پي) چيف آف آرمي اسٽاف جنرل راحيل شريف سان پاڪستان ۽ افغانستان لاءِ آمريڪا جي خاص نمائندي رچرڊ اولسن سومر ڏينهن جنرل هيدڪوارٽرز ۾ ملاقات ۽ آءِ ايس پي آر مطابق ملاقات ۾ افغانستان جي حوالي سان خاص طور مجموعي علائقائي صورتحال تي خيالن جي ڏي وٺ ٿي، رچرڊ اولسن جو هلندڙ سال نومبر ۾ آمريڪا جي خاص نمائندي وارو منصب سنڀالڻ کان پوءِ جي ايڇ ڪيو جو اهو پهريون دورو هو.

 

وفاقي گهرو وزير ۽ گورنر سنڌ جي ملاقات، آپريشن تيز رفتاري سان جاري رکڻ تي اتفاق

ڪراچي (اسٽاف رپورٽر) وفاقي گهرو وزير چوڌري نثار ۽ سنڌ جي گورنر ڊاڪٽر عشرت العباد ملاقات ڪري ڪراچي ۾ آپريشن تيز رفتاري سان جاري رکڻ تي اتفاق ڪيو. گورنر هائوس ڪراچي ۾ وفاقي گهرو وزير چوڌري نثار گورنر داڪٽر عشرت العباد سان ملاقات ڪئي. ملاقات ۾ ڪراچي ۾ جاري ٽارگيٽيڊ آپريشن تي غور ويچار ڪيو ويو. ملاقات دوران وفاقي گهرو وزير چوڌري نثار چيو ته ڪراچي ۾ آپريشن جا بهتر نتيجا سامهون اچي رهيا آهن. هن چيو ته آپريشن سان ڪراچي ۾ امن امان جي صورتحال بهتر ٿي رهي آهي.

 

پي آءِ اي کي خانگائڻ ۾ جلدبازي ڪرڻ سان اشارا ڪنهن کي نوازڻ طرف وڃي رهيا آهن: خورشيد شاهه

اسلام آباد (بيورو) قومي اسيمبلي ۾ مخالف ڌر جي اڳواڻ خورشيد شاهه چيو آهي ته پي آءِ اي کي خانگائڻ ۾ جلدي ڪرڻ سان اشارا ڪنهن کي نوازڻ پاسي وڃي رهيا آهن، تفصيل مطابق اسپيڪر سردار اياز صادق جي صدارت ۾ قومي اسيمبلي جي اجلاس دوران پنهنجي خيالن جو اظهار ڪندي پيپلزپارٽي جي اڳواڻ خورشيد شاهه چيو ته حڪومت کي الله نه ڪري ڪيرائڻ جون ڳالهيون ڪيون، پر جڏهن وقت ايندو آهي ته توهان حڪمران ٿي ويندا آهيو ۽ رڳو پنهنجي لاءِ ئي سوچيندا آهيو عوام لاءِ نه. پي آءِ اي کي خانگائڻ ۾ جلدي ڇا جي آهي، ڪنهن کي نوازڻ جي ڳالهه هلي رهي آهي، اشارا ان پاسي وڃن ٿا، خيال ڪريو.مخالف ڌُر جي اڳواڻ سيد خورشيد شاهه جو چوڻ هو ته مسلم ڀاءُ ملڪ ۾ وزيراعظم جي دوست سيف الرحمان پڻ رهندو آهي، ڪيترائي دوست هن ايوان ۾ موجود آهن جيڪي سيف الرحمان جي نالي کان چڙندا آهن

 

ڪراچي ۾ امن جي نالي تي مذاق وارو سلسلو بند ٿيڻ گهرجي : آصف زرداري

دبئي (م.ڊ) اڳوڻي صدر آصف علي زرداري چيو آهي ته ڪراچي ۾ امن جي نالي تي مذاق وارو سلسلو بند ٿيڻ گهرجي، جمهوري عمل کي هر حال ۾ اڳتي وڌڻ گهرجي، دبئي مان جاري ڪيل بيان ۾ آصف زرداري چيو ته پاور بروڪرن پ پ خلاف سازش ذريعي ڪراچي کي مسئلن جو بنياد بڻايو، پيپلز پارڙي جي ٻن حۡومتن جو خاتمو بهانو هو، سندس چوڻ هو ته طاقت ذريعي مسئلا حل ناهن ٿيندا پر ويتر منجهي ويندا آهن، آصف علي زرداري چيو ته رڳو چونڊيل حڪومت ئي ڪراچي ۾ امن قائم ڪري سگهي ٿي.