تازيون خبرون

Daily Archives: December 4, 2015

خيبرپختونخوا ۾ ڏهه ڪروڙ وڻ لڳائڻ جي دعويٰ ڪوڙي آهي: پرويز رشيد

اسلام آباد (بيورو) وفاقي سڌ سماءَ واري وزير پرويز رشيد چيو آهي ته خيبرپختونخوا ۾ ڏهه ڪروڙ وڻ لڳائڻ واري دعويٰ ڪوڙي آهي، عمران خان ٻڌائي ته  اهي وڻ ڪٿان ايندا ۽ ڪٿي لڳندا. اسلام آباد ۾ ميڊيا سان ڳالهائيندي پرويز رشيد چيو ته خيبرپختونخوا جو عوام  به صوبائي حڪومت پاران به طئي ٿيل وڻڪاري ڳولهي رهيا آهن،سندس چوڻ هو ته عمران خان وڻڪاري مهم ۾ حصو وٺندڙ مزدورن جي فهرست ڏئي. ڪي پي ڪي حڪومت وڻ لڳائڻ جي اوٽ ۾ وسيلن تي ڌاڙو هڻي رهي آهي.پرويز رشيد چيو ته صوبائي حڪومت وڻڪاري مهم کي ايترو ڳجهو رکيو جو علائقي واسين کي ئي پتو نه پيو .

 

حڪومت نوڪري دوران فوت ٿيندڙ ملازمن جي وارثن لاءِ امداد ۾ 300 سيڪڙو واڌ جي منظوري ڏئي ڇڏي

اسلام آباد (اين اين آءِ) وزيراعظم محمد نوازشريف نوڪري دوران وفات ٿيندڙ سرڪاري ملازمن جي وارثن لاءِ نظرثاني ٿيل امدادي پئڪيج جي منظور يڏني آهي پئڪيج 9 فيبروري 2015 کان نافذ ٿيندو خميس تي جاري اعلان مطابق نوڪري دوران فوت ٿيندڙ سول ملازمن جي لاءِ 2006 جي پئڪيج ۾ 300 کان ٻيڻو اضافو ڪيو ويو آهي اضافي ٿيل پئڪيج ٿيل نوڪري دوران وفات ٿيندڙ گريڊ هڪ کان چئن جي ملازمن جي وارثن کي 6 لک رپيا، اسڪيل پنج کان 10 جي وارثن کي 9 لک رپيا 11 کان 15 اسڪيل جي وارثن کي 12 لک رپيا، اسڪيل 16 کان 17 جي وارثن کي 15 لک رپيا ۽ گريڊ 18 کان 19 گريڊ جي ملازمن جي وارثن کي 24 لک رپيا ۽ گريڊ 20 ۽ ان کان مٿي جي ملازمن جي وارثن کي 30 لک رپين جي گرانٽ ڏني آهي. سيڪيورٽي متعلق فوت ٿيڻ جي صورت ۾ گريڊ هڪ کان 16 لاءِ 30 لک رپيا گريڊ 17 جي لاءِ 50 لک رپيا گريڊ 18 ۽ 19 لاءِ 90 لک رپيا ۽ گريڊ 20 ۽ ان کان مٿي جي لاءِ هڪ ڪروڙ رپيا ڏنو ويندو. مقابلن بم ڌماڪن فساد فرض جي ادائيگي يا دهشتگردي جي ڪارروائي جي نتيجي ۾ زخمي هجڻ تي معذور ٿيڻ ۽ ملازمت مان رٽائرڊ ٿيندڙ آفيسرن اهلڪارن کي 70 لک رپيا ڏنا ويندا. حادثي ۾ زخمي ٿيندڙ جي نتيجي ۾ معذور ٿيندڙ آفيسرن ۽ اهلڪارن جيڪي کاتي ۾ بدستور خدمتون سرانجام ڏيئي رهيا هجن انهن کي 50 لک رپيا ڏنا ويندا. نوڪري دوران وفات ۽ سيڪيورٽي متعلق موت ٻنهي صورت ۾ سرڪاري ملازمن جي وارثن کي ان جي سروس ۽ آخري پگهار مطابق 100 سيڪڙو پينشن ڏني ويندي 10 سال کان گهٽ سروس جي صورت ۾ گهٽ ۾ گهٽ 10 سال جي سروس جي شرح کان پينشن لاڳو ٿيندي. وارثن کي سرڪاري جڳهه يا رٽائرڊمينٽ جي مدت تائين جڳهه جو ڪرايو حاصل ڪرڻ جي اجازت هوندي ان پئڪيج جي تحت سرڪاري ملازمن جي تمام ٻارڙن کي ڪنهن به پبلڪ سرڪاري تعليمي ادارن ۾ گريجوئيشن تائين مفت تعليم جي سهولت حاصل هوندي جنهن ۾ ٽيوشن فيس ڪتابن متعلق مواد ۽ گذارو الائونس وغيره شامل آهن پلاٽ جي الاٽمينٽ لاءِ 2 سيڪڙو ڪوٽا جي اهليت ختم ڪندي ماضي ۾ ڪوبه پلاٽ الاٽ نه ٿيڻ جي صورت ۾ پلاٽ جي بدران گريڊ هڪ کان 8 جي ملازمن کي 20 لک رپيا، گريڊ 9 کان 16 کي 50 لک رپيا، ۽ گريڊ 17 ۽ ان کان مٿان جي ملازمن کي 70 لک رپيا ڏنا ويندا امدادي پئڪيج ۾ نوڪري دوران وفات ٿيندڙ ملازمن جي ٻارڙن کي گريڊ هڪ کان 15 جي آسامين تي اشتهار جي بغير ٻه سال ڪانٽريڪ جي بنياد تي نوڪري ڏني ويندي نوڪري دوران وفات ٿيندڙ ملازمن جي وارثن کي هڪ ڌيءَ جي شاديءَ لاءِ 8 لک رپين جي گرانٽ ڏني ويندي سروس دوران اهليت مطابق حاصل مفت طبي سهولتون فراهم ڪيون وينديون. اي جي پي آر صوبائي اي جي آفيس پاران منظور ٿيل پگهارن تي ايڊوانس جي صورت ۾ غير ادا ٿيل رقم معاف ڪئي ويندي. گريڊ 17 يا گريڊ 18 جي ڪنهن به آفيسر کي هر وزارت ڊويزن کاتي پاران ڪائونسل طور تي نامزد ڪري سگهجي ٿو. جيڪو نوڪري دوران فوت ٿيندڙ سرڪاري ملازمن جي وارثن کي پئڪيج تحت ڏنل تمام سهولتن کي هڪ مهيني جي اندر حتمي شڪل ڏيڻ ان جي فراهمي جو ذميوار هوندو. سيڪيورٽي متعلق موت جي صورت ۾ بيني لينٽ فنڊ مان 2 لک مان 5 لک رپين تائين جي ادائيگي جي به منظوري ڏني ويئي آهي ان حوالي سان گريڊ هڪ کان 10 تائين 2 لک رپيا 11 کان 16 تائين 3 لک رپيا 17 کان 19 تائين 4 لک رپيا ۽ گريڊ 20 ۽ ان کان مٿي تائين 5 لک رپين جي ادائيگي ٿيندي نوڪري دوران فوت ٿيندڙ سرڪاري ملازمن کي ماهوار بينولنٽ گرانٽ جي حوالي سان وڌ کان وڌ 5 هزار رپين جي پي سلپ تي 4000 رپيا 5001 کان 5500 رپين تي 4150 رپيا، 5501 کان 6000 رپين تي 4300 رپيا، 6001 کان 6500 رپين تي 4450 رپيا، 6501 کان 7000 هزار رپين تي 4600 رپيا، 7001 کان 7500 رپين تائين 4750 رپيا، 7501 کان 8000 رپين تائين 4900 رپيا، 8001 رپين کان 8500 رپين تي 5050 رپيا، 8501 کان 9000 رپين تي 5200 رپيا، 9001 کان 9500 رپين تي 5350 رپيا، 9551 کان 11000 رپين تي 5600 رپيا، 11001 رپين کان 13000 رپين تي 5900 رپيا، 13001 رپئي کان 15000 رپين تي 6200 رپيا، 15001 کان 17 هزار تي 6500 رپيا، 17001 رپئي کان 19000 هزار تي 6800، 19001 رپئي کان 21000 تي 7100، 2101 رپئي کان 23000 رپين کان 25000 رپين تي 7700 رپيا، 25001 رپئي کان 27000 تي 8 هزار، 27001 رپئي کان 29 هزار تي 80300 29001 کان 31000 تي 8600، 31001 رپئي کان 33000 تي 8600، 31001 کان 33000 تي 8900، 33001 کان 35000 تي 9200، 35001 کان 37000 تي 9500، 37001 کان 39000 تي 9800 ۽ 39001 ۽ ان کان مٿي 10100 رپين جي ادائيگي ٿيندي. نوڪري دوران فوت ٿيڻ جي صورت ۾ سرڪاري ملازمن جي وارثن جي سهولت لاءِ واسطيدار وزارت ڊويزن کاتي پاران فوري طور تي بنيادي تقاضا پورا ڪيا وڃن ته جيئن سرڪاري ملازمن کي وارثن کي ڪنهن دير جي بغير اهي سهولتون حاصل ٿين. ان حوالي سان فئملي پينشن ڪيس فوري طور تي داخل ڪيو وڃي. ڊائريڪٽ ڪريڊٽ اسڪيم پينشن جي آن لائين ادائيگي لاءِ آپشن فارم پيشگي پينشن مجموعي پيشن جو 80 سيڪڙو جي لاءِ درخواست ڏني وڃي ان کان علاوه هر وزارت ڊويزن کاتو فعال حڪمت عملي جي تحت پنهنجي ملازمن جي حوالي سان ضروري عمل اختيار ڪري ۽ پينشن جي مقصد لاءِ هر ملازم جي وارثن جي تازه لسٽ فوري طور تي تيار ڪئي وڃي. وزيراعظم ان ڳالهه جي به منظوري ڏني ڪوبه موت سيڪيورٽي متعلق موت تصور ڪيو ويندو جيڪڏهن دهشتگردي جي ڪارروائي يا دهشتگردن جو مقابلو ڪرڻ جو واقعو هجي يا ان جي امر ۾ فوت ٿيندڙ ماڻهو قانون نافذ ڪندڙ اداري يا ميمبر يا سول ملازم آهي قانون نافذ ڪندڙ ادارن جي ڪنهن به ميمبر جو موت جيڪڏهن دهشتگردي جي ڪارروائي کان سواءِ ڪنهن ٻئي سبب سان واقعو ٿئي ٿو ته اهو نوڪري دوران موت تصور ڪيو ويندو.

 

ڀارتي الزام رد، هارٽ آف ايشيا ڪانفرنس ۾ سشما سوراج جي شموليت بابت تصديق ناهي ٿي: پاڪستان

اسلام آباد (بيورو) پرڏيهي کاتي جي ترجمان قاضِر خليل الله چيو آهي ته وزيراعظم نواز شريف ڀارتي وزيراعظم نريندر مودي سان ملاقات بابت بيان ڏئي چڪو آهي، ان حوالي سان وڌيڪ ڪجهه به چوڻ جي ضرورت ناهي، اسلام آباد ۾ ميڊيا کي هفتيوار بريفنگ ڏيندي پرڏيهي ترجمان چيو ته هارٽ آف ايشيا ڪانفرنس ۾ ڀارتي پرڏيهي وزير سشما سوراج جي شموليت جي حوالي سان تصديق جو انتظار آهي، هن چيو ته افغانستان ۾ مقرر ڀارتي سفير جو پيرس ۾ ڏنل بيان پاڪ – افغان لاڳاپن جي حوالي سان سفارتي اصولن جي خلاف آهي،ڪنهن به سفير جو پنهنجي ميزبان ملڪ ۽ ٽئين ملڪ جي لاڳاپن جي حوالي سان بيان ڏيڻ مناسبناهي، سندس چوڻ هو ته ڀارت نئين دهلي ۾ پاڪستاني اهلڪار تي جاسوسي جي الزامن ۽ جاچ جي حوالي سان ناهي ٻڌايو، پاڪستاني انٽيليجنس ايجنسي تي الزام بي بنياد آهن، قاضي خليل الله چيو ته ڀارت سدائين پاڪستاني ايجنيسن تي الزام مڙهيندو رهيو آهي، ماضي ۾ به ڀارت اهڙا الزام هنيا پر ڪڏهن به اهي ثابت نه ڪري سگهيو، هڪ سوال جي جواب ۾ پرڏيهي ترجمان چيو ته هارٽ آف ايشيا ڪانفرنس جو افتتاح وزيراعظم نواز شريف ۽ افغان صدر اشرف غني ڪندا، افغان صدر جي پاڪستاني دوري بابت باضابطا طور ناهي ٻڌايو ويو، سندس چوڻ هو ته ان ڪانفرنس جو مقصد افغانستان ۽ پاڙيسري ملڪن سان لاڳاپا بهتر بڻائڻ آهي، قاضي خليل الله ٻڌايو ته ڪانفرنس ۾ چين، تاجڪستان، ڪرغزستان، ايران ۽ افغانستان جي شموليت جي تصديق ٿي چڪي آهي، باقي ڀارت اڃا باضابطا طور تي ڪجهه ناهي ٻڌايو. هن چيو ته اسان افغان طالبان جي امير ملا اختر منصور جي زخمي هجڻ بابت خبرون ميڊيا ذريعي ٻڌيون آهن، سندس مارجي وڃڻ يا زخمي ٿيڻ بابت ڪابه ڄاڻ ناهي، هڪ سوال جي جواب ۾ پرڏيهي کاتي جي ترجمان ٻڌايو ته سعودي عرب جي جيلن ۾ 5 هزار پاڪستاني قيد آهن.

 

پاڪستان آمريڪا سان لاڳاپن کي وڌيڪ مضبوط بڻائڻ جو خواهشمند آهي: صدر

اسلام آباد (اين اين آءِ) پاڪستان لاءِ آمريڪا جي نامزد سفير ڊيوڊ ايم هيل صدر ممنون حسين کي پنهنجا سرٽيفڪيٽ ايوان صدر ۾ پيش ڪيا، سفير صدر سان ملاقات ڪئي جنهن ۾ گڏيل دلچسپي وارن معاملن تي بحث ڪيو ويو، صدر ممنون حسين چيو ته پاڪستان آمريڪا سان لاڳاپن کي وڌيڪ مضبوط بڻائڻ جو خواهشمند آهي، صدر وڌيڪ چيو ته پاڪستان دهشتگردي خلاف جنگ ۾ وڏيون قربانيون ڏنيون آهن ۽ ان جي خاتمي لاءِ پاڪستان بين الاقوامي برادري سان ڀرپور تعاون ڪري رهيو آهي، هن چيو ته آپريشن ضرب عضب ڪاميابي سان جاري آهي ۽ ان سلسلي ۾ ٿيندڙ ڪارروايون آخري دهشتگرد جي خاتمي تائين جاري رهنديون، واضح رهي ته سرٽيفڪيٽ پيش ڪرڻ جون تقريبون قومي زبان اردو ۾ ڪئي وئي.

 

جوڊيشل ڪميشن خلجي عارف حسين ۽ طارق پرويز جي سپريم ڪورٽ ۾ بطور ايڌهاڪ جج مقرري جي منظوري ڏئي ڇڏي

لاهور (اين اين آءِ) چيف جسٽس آف پاڪستان، جسٽس انور ظهير جمالي جي اڳواڻي ۾ جوڊيشل ڪميشن جو اجلاس سپريم ڪورٽ لاهور رجسٽري ۾ ٿيو، اجلاس ۾ ڪميشن جي ميمبرن، سپريم ڪورٽ جي سينيئر جج جسٽس ميان ثاقب نثار، جسٽس آصف سعيد خان کوسو، جسٽس امير هاني مسلم، جسٽس اعجاز افضل خان، اسلام آباد هاءِ ڪورٽ جي چيف جسٽس انور خان، اسلام آباد هاءِ ڪورٽ جو سينيئر جج نور الحق قريشي، وفاقي قانون جي وزير پرويز رشيد، اٽارني جنرل ۽ ميمبر پاڪستان بار ڪونسل ياسين آزاد ۽ ٻين شرڪت ڪئي. اجلاس ۾ وڪيل تنظيمن جي نمائندن اڳوڻي جج طارق پرويز ۽ خلجي عارف حسين جي بطور ايڌهاڪ ججز سپريم ڪورٽ مقررين جي نامزدگي پيش ڪرڻ تي اختلافي نوٽ جمع ڪرائيندي چيو ته سپريم ڪورٽ اهو اصول طئه ڪري چڪي آهي ته ايڌهاڪ جج مقرر نٿا ڪري سگهجن ان سان عدليه جو تاثر متاثر ٿيندو، چيف جسٽس انور ظهير جمالي چيو ته آئين جي آرٽيڪل 182 سپريم ڪورٽ کي اهو اختيار آهي ته ضرورت مطابق ايڌهاڪ جج مقرر ڪري سگهي، جوڊيشل ڪميشن خلجي عارف حسين ۽ طارق پرويز جي سپريم ڪورٽ ۾ هڪ هڪ سال لاءِ بطور ايڌهاڪ جج اسلام آباد هاءِ ڪورٽ لاءِ محسن ڪياني ۽ اورنگزيب خان کي بطور ايڊيشنل جج، جڏهن اسلام آباد هاءِ ڪورٽ جي ايڊيشنل جج عامر فاروق کي بطور پڪو ڪرڻ جي سفارش ڪئي، جوڊيشل ڪميشن جون سفارشون اڄ پارلياماني ڪميٽي ڏانهن موڪليون وينديون.

 

وڌنڌڙ آباديءَ کي نه روڪيو ويو ته صحت، تعليم ۽ غربت جي حوالي سان خراب اثر مرتب ٿيندا: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه 51.2 بلين ارب رپين جي لاڳت سان بهبود آبادي جي پنج سالن جي پروگرام جي شروعات ڪندي چيو ته جيڪڏهن وڌنڌڙ آباديءَ کي نه روڪيو ويو ته سماجي بهبودآبادي تي صحت، تعليم ۽ غربت جي حوالي سان خراب اثر مرتب ٿيندا. اهڙي ڳالهه انهن اڄ بهبود آبادي سان لاڳاپيل ڪاسٽينڊ امپليمينٽيشن پلان (سي آءِ پي) جي وزير اعليٰ هائوس ۾ لانجنگ تقريب کي خطاب ڪئي. تقريب ۾ ايم اين اي عذرا پيچوهو، شهناز وزير علي، چيف سيڪريٽري سنڌ محمد صديق ميمڻ، وڏي وزير جي پرنسپل سيڪريٽري علم الدين بلو، سيڪريٽري هيلٿ سعيد مڱڻيجو، سيڪريٽري بهبود آبادي سليم رضا کهڙو، سي آءِ پي ٽيم جو اڳواڻ ڊاڪٽر طالب لاشاري ۽ بل اينڊ ميلينڊ اگيٽس فائونڊيشن جي ميمبرن شرڪت ڪئي. سنڌ جي وڏي وزير چيو ته آبادي ۾ غير ضروري واڌ سان سماجي ترقي ۽ خوشحاليءَ بري طرح متاثر ٿئي ٿي تنهن ڪري سنڌ سرڪار فيملي پلاننگ تي خاص توجهه ڏئي رهي آهي، ان کان سواءِ فيملي پلاننگ جي منصوبي ڪاسٽينڊ امپليمينٽيشن پلان (سي آءِ پي) جي آغاز سان سنڌ ۾ وڌيڪ بهتر نتيجا سامهون ايندا. سيڪريٽري پاپوليشن ويلفيئر سليم رضا کهڙي اجلاس کي ٻڌايو ته سماجي گهٽ ترقي وارن 187 ملڪن ۾ پاڪستان 146هين نمبر تي آهي. سنڌ ۾ آبادي 2 سيڪڙو جي حساب سان وڌي رهي آهي جيڪڏهن آبادي جي واڌ ان رفتار سان جاري رهي ته 2020ع تائين سنڌ جي آبادي 6 ڪروڙ ٿي ويندي. سنڌ صوبي بابت ڪجهه اهم نڪات بابت ٻڌائيندي هن چيو ته هن وقت مجموعي فريٽاليٽي جي شرح (ٽي ايف آر) 3.9 سيڪڙوآهي، جڏهن ته 1990-91۾ 5.1 هئي ۽ 2001ع ۾ ان جو اندازو 4.8 سيڪڙو هيو. ان طرح ڪنٽرا  سيپٽيو پري ويلنس ريٽ (سي پي آر) 24.3 سيڪڙو جڏهن ته 1990ع ۾ اهو 9.1 سيڪڙو هو. ۽ 2001ع ۾ 20.2 سيڪڙو هو. سي آءِ پي ٽيم اڳواڻ ڊڪٽر طالب لاشاريءَ پاڪستان جي ڊيموگرافڪ هيلٿ سروي (پي ڊي ايڇ ايس) جو حوالو ڏيندي ٻڌايو ته 1990ع ۾ وومين وانٽ نومور برٿس (ڊبليو ڊبليو اين بي) جي شرح 35.8 سيڪڙو هئي ۽ جڏهن ته 2012-13ع ۾ اها وڌي 51.2 سيڪڙو ٿي وئي. ان طرح 1990ع ۾ ان ميٽ نيڊ فار ڪنٽرا سيپٽيو جي شرح 23.9 سيڪڙو هئي ۽ هاڻ گهٽ ٿي 20.8 سيڪڙو ٿي وئي آهي. 2020ع تائين سي آءِ پي جا هدفن ۽ مقصدن بابت ٻڌائيندي طالب لاشاريءَ چيو ته سي پي آر ۾ 30 کان 40 سيڪڙو واڌ ٿي آهي، ان ميٽ نيڊ فار فيملي پلاننگ 21 سيڪڙو کان 14 سيڪڙو ۽ ڪنٽرا سيپٽيو ڪموڊيٽي سيڪيورٽي 80 سيڪڙو ٿي ويندي؛ سمورن پبلڪ سيڪٽر جي آئوٽ ليٽس ۾ 2018ع تائين. سنڌ جي وڏي وزير ڊونر ايجنسيءَ جي جذبي ۽ ڪاوشن جي واکاڻ ڪندي بهبود آبادي کاتي تي زور ڀريو ته اهي پريزينٽيشن ۾ بيان ڪيل هدف جي حصول کي يقيني بڻائن. انهيءَ کان پوءِ هن سي پي آءِ جي ڪاغذات جي رونمائي ڪئي.

 

نيب اڳوڻي وزير اعظم راجا پرويز اشرف خلاف جاچ جي منظوري ڏئي ڇڏي

اسلام آباد (بيورو) نيب اڳوڻي وزيراعظم راجا پرويز اشرف ۽ راڻا مشهود تي الزامن سوڌو ٻين ڪيسن جي جاچ جي منظوري ڏئي ڇڏي، اڳوني وزيراعظم تي رينٽل پاور رٿائن ۾ ڪرپشن جا الزام آهن، سنڌ بورڊ آف ريوينيو، سي ڊي اي ۾ بي ضابطگين جي جاچ به ٿيندي.ذريعن مطابق نيب راجا پرويز اشرف، اڳوڻي  پاڻي ۽ بجلي واري سيڪريٽري راڻا مشهود تي الزامن سوڌو ٻين ڪيسن جي جاچ جي منظوري ڏئي ڇڏي آهي. ذريعن مطابق نيب ايگزيڪيوٽو بورڊ جي اجلاس ۾ سنڌ بورڊ آف ريوينيو، سي ڊي اي ۽ اوڪاڙا بائي پاس ۾ بي ضابطگين جي جاچ جي به منظوري ڏئي ڇڏي آهي.

 

40 ارب جو نئون ٽيڪس مڙهڻ غريب عوام خلاف جنگ جو اعلان آهي: سراج الحق

مردان (اين اين آءِ) امير جماعت اسلامي سينيٽر سراج الحق چيو آهي ته حڪومت 40 ارب رپين جو نئون ٽيڪس مڙهڻ غريب عوام خلاف جنگ جو اعلان آهي، ان سان مهانگائي جو طوفان ايندو، اسيمبلي ۾ بغير پيش ڪيل ٽيڪس مڙهڻ اسيمبلي جي توهين آهي، ناڻي جي وزيرن جي فيصلن سان عوام متاثر ٿيندو، ورلڊ بينڪ ۽ آءِ ايم ايف جي حڪم تي ٽيڪس مڙهڻ ذهني ۽ معاشي غلام آهي جنهن کي اسان رد ڪريون ٿا. قومي اسيمبلي ۽ سينيٽ ۾ ان خلاف احتجاج ڪنداسين، پاڪ چين اقتصادي راهداري سان ڪي پي ڪي جي وڏي حصي کي محروم ڪيو وڃي ٿو، ان تي قومي اتفاق راءِ جي ضرورت آهي، ڪي پي ڪي جي تمام علائقن کي اقتصادي راهداري ۾ شامل ڪيو وڃي، ان منصوبي کي ناڪام بڻائڻ جي ڪوشش ملڪ سان دشمني جي برابر آهي، وفاق ڪي پي ڪي جو پنهنجو حصو نه ڏئي رهيو آهي، ڪي پي ڪي کي 380 بلين رپين کان وڌيڪ بجلي جو خالص منعافو ڏنو وڃي ته صوبو ٻين کي قرض ڏيڻ جي ڪابل ٿي ويندو، اسان کي خيرات نه پر پنهنجو حق ڏنو وڃي، صوبي ۾ مڪاني چونڊن سان حڪومت مضبوط ٿي آهي، پنجاب ۽ سنڌ ۾ نالي ماتر مڪاني چونڊون ڪرايون ويون، اتي مڪاني نمائندن کي فنڊ ۽ اختيار نه ڏنا ويا، پنجاب ۽ سنڌ ۾ ڪي پي ڪي جو مڪاني نظام اختيار ڪرڻ گهرجي، ڪراچي ۾ عوام پنهنجي ووٽ ذريعي بدامني، ڀتي خوري ۽ ٽارگيٽ ڪلنگ کان نجات حاصل ڪري موجوده آپريشن جي حمايت ڪريون ٿا، مڪمل امن جي قيام تائين آپريشن جاري رکيو وڃي ان کي سياست جي ور نه چاڙهيو وڃي، اهڙن خيالن جو اظهار هن مردان ۾ پريس ڪانفرنس ڪندي ڪيو. ان موقعي تي جماعت اسلامي ڪي پي ڪي جو امير مشتاق احمد، مرڪزي ڊپٽِي سيڪريٽري جنرل محمد اصغر، سراج الحق جي معاون خاص شبير احمد خان، ضلعي مردان جي امير ڊاڪٽر عطا رحمان ۽ هاري راڄ تحريڪ جي اڳواڻ ارسلان خان به موجود هئا، هن چيو ته وفاقي خزاني جو وزير 351 اهم استعمال جي شين تي نئون ٽيڪس مڙهيو آهي، سڄي دنيا ۾ سال ۾ هڪ ڀيرو بجيٽ پيش ڪئي وڃي ٿي پر هتي هر ڀيري مني بجيٽ پيش ڪئي وڃي، بجيٽ هميشه اسيمبلي مان پاس ڪرائي ويندي آهي پر هتي اسيمبلي جي منظوري کانسواءِ ٽيڪس لڳايو ويو آهي. هن چيو ته جيڪڏهن عوام اسان تي اعتماد ڪيو ته ڪراچي کي استبول جهڙو ترقي يافته ۽ پرامن شهر بڻائينداسين.

 

اڳواڻ هڪ نظريي تي هلندو آهي ۽ انهي ئي نظريي سان قوم جي اڳواڻي ڪندو آهي: عمران خان

لاهور (م.ڊ) پاڪستان تحريڪ انصاف جي چئيرمين عمران خان لاهور جي مقامي هوٽل ۾ هڪ سيمينار سان خطاب ڪندي چيو ته پاڪستان کي اڄ اڳواڻن جي گهرج آهي پر ڏک سان چوڻو ٿو پوي ته  پاڪستان ۾ اڳواڻن جي کوٽ آهي،اڳواڻن جو ڏکئي وقت ۾ ئي پتو پوندو آهي. اڳواڻ هڪ نظريي تي هلندو آهي ۽ انهن ئي نظريي سان قوم جي اڳواڻي ڪندو آهي ۽ ڪنهن کان به ناهي ڊچندو. مان نيلسن منڊيلا کي وڏو اڳواڻ سمجهان ٿو.نيلسن منڊيلا پنهنجي اڳواڻي جي ڪري ئي ڏکڻ آفريڪا کي بچايو. عمران خان چيو ته پاڪستان کي هن وقت اڳواڻن جي ضرورت آهي،ڳجهين گڏجاڻين جي نه.نيپال جي گادي واري شهر کٽمنڊو ۾ نوازشريف ۽ نريندر مودي جي ڳجهي ملاقات ٿي هئي. نوازشريف ان ملاقات ۾ اسٽيبليشمينٽ کان ڊڄي رهيو هو. اڳواڻ لڪي گڏجاڻيون ناهن ڪندا،ان جي هڪ اهليت هوندي آهي. بدقسمتي سان ڀارت ۽ پاڪستان ۾ اڳواڻي نظر ئي نٿي اچي.سندس چوڻ هو ته پاڪستان جو سڀ کان وڏو مسئلو غربت آهي. غربت کي ختم ڪرڻ لاءِ امن پهرين اهميت هجڻ گهرجي. عمران خان چين جو مثال ڏيندي چيو ته چين سڀ کان اڳ ملڪ مان غربت ختم ڪئي. غربت ختم ڪرڻ سان چين جي اوسر وارو ريٽ وڌي ويو.

 

پوري ملڪ ۾ ڪربلا جي شهيدن جو چاليهو عقيدت ۽ احترام سان ملهايو ويو، انتظام سخت

ڪراچي(نمائندن وٽان) سنڌ سميت سڄي ملڪ ۾ ڪربلا جي شهيدن جو چاليهو ملهايو ويو، مختلف شهرن مان ماتمي جلوس برآمد ڪيا ويا ، سيڪيورٽي انتظام سخت ڪندي پوليس سان گڏ رينجرز کي به مقرر ڪيو ويو . اسلام جي سربلندي لاءِ عظيم قرباني ڏيندڙ امام حسين ۽ سندس جانثارن جو چاليهو عقيدت ۽ احترام سان ملهايو ويو، سنڌ جي ننڍن وڏن شهرن مان ماتملي جلوس برآمد ڪيا ويا . حيدرآباد جي مختلف شهرن مان ماتمي جلوس برآمد ٿيا، جڏهن ته جلوسن جي سيڪيورٽيسخت ڪئي وئي. ٽنڊوالهيار ضلعي جي مختلف علائقن جھنڊومري، پيارو لنڊ، چمبڙ، نصرپور ۽ ٻين علائقن مان جلوس ڪڍيا ويا ، جلوسن جي حفاظت لاءِ پوليس سان گڏ رينجرز کي به مقرر ڪيو ويو . عمرڪوٽ ضلعي جي مختلف شهرن ڪنري، سامارو، پٿورو، ڍورونارو سميت ٻين شهرن ۾ ماتمي جلوس ڪڍيا ويا، شام جو ڇرين ۽ زنجيرن سان ماتم ڪيو ويو ۽ باهه تي ماتم پڻ ڪيو ويو. ڳڙهي خيرو ۾ ڪربلا جي شهيدن جي چاليهي تي مختلف امام بارگاھ کان ماتمي جلسو برآمد ڪيا ويا ، زنجير زني پڻ ڪئي وئي. سکر، لاڙڪاڻو، شهدادڪوٽ، ڪنڌڪوٽ، جيڪب آباد، سانگهڙ، مٽياري، ڪشمور، پنوعاقل، اوٻاوڙو، خانپور، ميرپور بٺورو، ڊگهڙي، ۽ شهرن مان به ماتمي جلوس برآمد ٿيا، جتي سينا زني ۽ زنجيرن سان ماتم ڪيو ويو. مختلف شهرن ۾ مجلسون پڻ برپا ڪيون ويون ، جتي عالمِ دين حضرت امام حسين ۽ سندس ساٿين جي عظيم قرباني تي روشني وڌي وئي.