تازيون خبرون

Daily Archives: December 3, 2015

آپريشن جو دائرو پوري سنڌ تائين وڌائڻ، وڌيڪ 30 عدالت ٺاهڻ ۽ 8 هزار پوليس اهلڪار ڀرتي ڪرڻ جو فيصلو

ڪراچي (اسٽاف رپورٽر) سنڌ ايپيڪس ڪميٽي جي اجلاس ۾ دهشتگرد ٽوڙ عدالتن کي وڌائي 30 ٻيون عدالتون ٺاهڻ جو فيصلو ڪيوويو آهي، جڏهن ته ڪراچي آپريشن ۾ به وڌيڪ تيزي آڻيندي، ان جو دائرو به وڌايو ويو آهي. سنڌ جي وڏي وزير سيد قائم علي شاهه  جي صدارت هيٺ صوبائي ايپڪس ڪميٽي جو اهم اجلاس ٿيو،جنهن ۾ سنڌ جو گورنر ڊاڪٽر عشرت العباد، صوبائي وزير، ڪراچي ڪور ڪمانڊر، ڊي جي رينجرز، سنڌ جو چيف سيڪريٽري ۽ گهرو ايڊيشنل سڪريٽري سوڌو حساس ادارن جي اختيارين به شرڪت ڪئي، جڏهن ته اجلاس ۾ پاڪ فوج، رينجرز جي جوانن جي شهادت تي گهري ڏک ۽ ڳڻتي جو اظهار ڪيو ويو. اجلاس جي دوران ڊي جي رينجرز، آئي جي سنڌ، چيف سيڪريٽري ۽ گهرو سيڪريٽري نيشنل ايڪشن پلان ۽ شهر ۾ امن امان جي صورتحال کي برقرار رکڻ لاءِ کنيل قدمن بابت بريفنگ ڏني. سنڌ حڪومت  اجلاس ۾ شامل اعليٰ اختيارين کي نيشنل ايڪشن پلان تي عمل بابت ڄاڻ ڏني وئي. ان موقعي تي سنڌ جي وڏي وزير چيو ته اسان جو فرض آهي ته نيشنل ايڪشن پلان تي مڪمل عمل ڪيون. سنڌ حڪومت ملٽري پوليس جي گاڏي تي حملي ۽ ٻن اهلڪارن جي شهادت کي قانون لاڳو ڪندڙ ادارن تي حملن جو تسلسل قرار ڏيندي ڪراچي ۾ دهشتگردن خلاف آپريشن تيز ڪرڻ جي منظوري ڏئي ڇڏي ، اجلاس ۾ تازن ڏينهن ۾ رينجرز ، پوليس ۽ فوج جي اهلڪارن تي حملن ۽اهلڪارن کي شهيد ڪرڻ وارن واقعن جي مذمت ڪندي فيصلو ڪيو ويو ته دهشتگردن خلاف ڪارروايون وڌايون وينديون، اجلاس ۾ فيصلو ڪيو ويو ته هاڻي پوليس، رينجرز ۽ فوج هجا اهلڪار جيڪڏهن شهر ۾ ويندا ته اهي احتياط ڪندا، انهن جي گاڏين جي پويان موٽر سائيڪل سوار ڪمانڊو به موجود رهندا، ٻه يا 3 اهلڪار ڪنهن گاڏي ۾ شهر جي مصروف علائقي ۾ وڃڻ بدران ٻن گاڏين ۾ ويندا. ايپڪس ڪميٽي جي اجلاس کانپوءِ سنڌ جي  سڌ سماءَ واري صلاحڪار مولا بخش چانڊيو ميڊيا کي بريفنگ ڏيندي ٻڌايو ته اجلاس ۾ دهشتگرد ٽوڙ عدالتون وڌيڪ30 ٻيون به ٺاهڻ جو فيصلو ڪيو ويو آهي،جنهن لاءِ 200 پراسيڪيوٽرز کي به قانون مطابق ڀرتي ڪيو ويندو، پراسيڪيوٽرز جي نوڪرين ۽ گواهن کي تحفظ ڏنو ويندو، جڏهن ته امن امان جي صورتحال  کي اڃان وڌيڪ بهتر بڻائڻ لاءِ پوليس ۾ وڌيڪ 8 هزار ڀرتين جو فيصلو  ٿيو آهي. سنڌ جي سڌ سماءَ واري صلاحڪار چيو ته حضرت امام حسين رضه  جي چاليهي ۽ مڪاني چونڊن جي موقعي تي سيڪيورٽي جا خاص انتظام ڪيا ويندا. مولا بخش چانڊيو چيو ته ايپڪس ڪميٽي جي اجلاس ۾ فيصلو ڪرڻو ئي سڀ ڪجهه ناهي پر ان تي عمل به ضروري آهي، هر اجلاس ۾ گذريل فيصلن تي عمل بابت جائزو ورتو ويندو، ڇو ته جڏهن سڀني فيصلن تي عمل ٿيندو ،تڏهن ئي اسان سک جو ساهه کڻنداسين.سندس چوڻ هو ته اجلاس ۾ ڪراچي ڪور ڪمانڊر ڪنهن به بي يقيني جو اظهار نه ڪيو، سڀئي ادارا هڪ راءِ آهن ۽ ڪنهن ۾ به ڪو اختلاف ناهي، جڏهن ته جيڪي ڳالهيون بد امني جو سبب بڻجي رهيون آهن انهن مسئلن کي حل ڪيو وڃي ۽ سنڌ پوليس جا مسئلا به حل ڪيا وڃن. سڌ سماءَ واري صلاحڪار جو چوڻ هو ته ملٽري پوليس حملي ڪيس جي ڏوهارين جي گرفتاري ۾ گهڻو وقت نه لڳندو، ڏوهاري ترت پنهنجي پڄاڻي واري انجام تي پهچايا ويندا،هن چيو ته ڪراچي ۾ دهشتگردي سبب همٿ ڪمزور نه ٿيندي پر اسان جي همٿ ويتر وڌي ٿي،هن آپريشن ۾ وڌيڪ تيزي آندي ويندي، جيڪي دهشتگرد ڪراچي کان ڀڄي سنڌ جي ٻهراڙين ڏانهن ويا آهن،انهن کي نه ڇڏيو ويندو، جڏهن ته دهشتگرد جتي به ويندا،ادارا انهن جي پويان وڃي کين ڳولي لهندا،مولا بخش چانڊيو جو چوڻ هو ته ڪراچي ۾ مڪاني چونڊن ۾ امن امان جي صورتحال تي ضابطو آڻڻ ۾ اليڪشن ڪم يشن جي سفارشن تي عمل ٿيندو ۽ مڪاني چونڊون امن امان سان ٿينديون.

 

جارحاڻي ملٽري ڊاڪٽرائن سبب خطي ۾ جديد هٿيارن جي اچڻ ۾ واڌ ٿي آهي: صدر ممنون حسين

اسلام آباد (بيورو)  صدر ممنون حسين چيو آهي ته جارحاڻي ملٽري ڊاڪٽرائن سبب خطي ۾ انتهائي جديد هٿيارن جي اچڻ ۾ واڌ ٿي آهي، جنهن سان طاقت جو توازن بگڙڻ جو خدشو آهي. اهڙين حالتن ۾ پاڪستان جي بچاءَ واريصلاحيت ۾ واڌ ۽ معاشي بهتري وقت جي اهم ترين ضرورت آهي، جنهن جي ذريعي اسان نه رڳو اندرين ۽ ٻاهرين چئلينجن کي منهن ڏئي سگهون ٿا پر قومي معيشت کي به مضبوط بڻائي سگهون ٿا. هن اڄ ڊفينس ايڪسپورٽ پروموشن آرگنائيزيشن جي اهتمام هيٺ دفاعي پيداوار ۽ روانگي واپار ۾ پرائيويٽ پبلڪ پارٽنرشپ جي موضوع تي ٻن ڏينهن جي سيمينار جو افتتاح ڪندي چئي. ان موقعي تي دفاعي پيداوار وارو وفاقي وزير رانا تنوير حسين، ڊائريڪٽر جنرل ڊفينس ايڪسپورٽ آرگنائيزيشن ميجر جنرل آغا مسعود اڪرم ۽ انٽرنيشنل اسٽريٽجڪ اسٽيڊيز اسلام آباد سينٽر  جي ايگزيڪيٽو ڊائريڪٽر علي سرور نقوي به خطاب ڪيو. صدر وڌيڪ چيو ته پاڪستان جون دفاعي مصنوعات عالمي معيار جي مطابق آهن پر ناڪافي مارڪيٽنگ ۽ ٻين مسئلن سبب صلاحيت جي مطابق ان جي برآمدات نه ٿي رهي آهي، هن چيو ته ان مسئلي جو حل هي آهي ته سرڪاري شعبو نوان تصور ۽ ڪاروباري طور طريقا اختيار ڪري ۽ نجي شعبي جي تجربن مان فائدو کڻي. هن چيو ته دفاعي پيداوار جي مختلف شعبن ۾ نجي شعبي جي سيڙپڪاري جي حوصلا افزائي ڪئي وڃي. ان سلسلي ۾ ترڪي جي تجربن مان به فائدو کڻڻ گهرجي. هن اميد ظاهر ڪئي ته سيمينار وسيلي سرڪاري ۽ نجي شعبي جي سهڪار جي مختلف رخن جو جائزو وٺي دفاعي برآمدات ۾ اضافي جي لاءِ ٺوس تجويزون ملي سگهنديون.

 

خصوصي فردن ۾ معذوري ڳولڻ بدران ان ۾ سندن قابليتون ڳوليون وڃن: بلاول ڀٽو

ڪراچي(اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري، اڄ پوري دنيا ۾ گڏيل قومن جي طرفان ملهائجندڙ معذورن جي عالمي ڏينهن جي موقعي تي پنهنجي پيغام ۾ پاڪستاني سماج تي زور ڀريندي چيو آهي ته اهي خصوصي فردن ۾ معذوري ڳولڻ بدران ان ۾ سندن قابليتون ڳوليون وڃن، بلاول ڀٽو زرداري چيو ته هڪ اندازي موجب مختلف معذورين وارا هڪ ارب ماڻهو هن ڌرتي جي گولي تي رهن ٿا ضرورت ان ڳاله جي آهي ته کين انساني ترقي ۾ برابر جو حصيدار بنائڻ لاءِ کين انسان طور سماج جي سمورن شعبن سان ڳنڍڻ گھرجي، پيپلزپارٽي جي چيئرمين وڌيڪ چيو ته خصوصي فردن سان ورتاءُ مان ئي قوم جي اخلاقي ۽ سماجي قدرن جي عڪاسي ٿئي ٿي تنهنڪري اسان جي سماج ۽ حڪومتن کي گهرجي ته کين انساني ترقي جي سمورن شعبن تعليم، روزگار، آمدرفت ۽ ٻين شعبن ۾ مناسب ۽ برابر پهچ ڏيڻ لاءِ پنهنجون ڪوششون ٻيڻيون ڪيون وڃن، بلاول ڀٽو زرداري وفاقي حڪومت، چئني صوبائي حڪومتن، آزاد ڪشمير ۽ گلگت بلتستان جي حڪومتن تي زور ڀريو ته سرڪاري توڙي خانگي ادارن ۾ معذورن جي لاءِ 2 سيڪڙو ڪوٽا تي عمل ڪيو وڃي.

 

گذريل حڪومت جا قرض لاٿا، اسان ڪِشتو ناهي  کنيو: اسحاق ڊار

لاهور(م.ڊ) وفاقي ناڻي واري وزير اسحاق ڊار چيو آهي ته آپريشن ضرب عضب ۾ ڪيترائي دهشتگرد سوگها ڪيا ويا آهن،هاڻوڪي حڪومت ڪشتو ناهي کنيو، گذريل حڪومت جا به قرض لاٿا. ذريعن مطابق لاهور ۾ ايف بي آر آفيس ۾ خطاب ڪندي ناڻي واري وزير چيو ته معاشي بهتري آڻڻ سولو ڪم ناهي. حڪومت معيشت کي صحيح واٽ تي هلائڻ لاءِ پڪو ارادو رکي ٿي،انڪم ٽيڪس جي شين ۾ 23 سيڪڙو واڌ ٿي آهي.ناڻي جي مٽا سٽا جا ذخيرا 20 ارب ڊالر کان مٿي ٿي ويا آهن،اسحاق ڊار چيو ته اسان دهشتگردي تي گهڻي حد تائين ضاببطو آندو آهي، دهشتگردن جي خلاف آپريشن آخري مرحلن ۾ آهي،ناڻي واري وزير جو چوڻ هو ته وزيراعظم نوازشريف واڌو فنڊ ختم ڪري ڇڏيو آهي. حڪومت هاڻي فاٽا جي متاثر علائقن جي تعمير ڪرائي رهي آهي.

 

سنڌ جي وڏي وزير شرجيل ميمڻ کان وزارتون واپس وٺي ڇڏيون

ڪراچي (اسٽاف رپورٽر) سنڌ جي وڏي وزير سيد قائم علي شاهه صوبائي وزير شرجيل ميمڻ کان وزارتن جا قلمدان واپس وٺي ڇڏيا. ذريعن مطابقسنڌ جي وڏي وزير سيد قائم علي شاهه صوبائي وزير شرجيل ميمڻ کان وزارتن جا قلمدان واپس وٺي ڇڏيا آهن، جن جو باقائدا نوٽيفڪيشن به جاري ڪيو ويو آهي. شرجيل ميمڻ  وٽ ورڪس اينڊ سروسز ۽ آرڪائيو جا کاتا هئا، جڏهن ته  هو ڊگهي وقت کان پرڏيهه ۾ رهي رهيو آهي.واضع هجي ته سنڌ حڪومت شرجيل ميمڻ کان سڌ سماءُ جي وزارت جو قلمدان واپس وٺندي ورڪس اينڊ سروسز ۽ آرڪائيو جا قلمدان ڏنا هئا، جڏهن ته شرجيل ميمڻ جو نالو گهرو وزارت پاران اي سي ايل ۾ به شامل آهي.

 

هاري پيڪيج هڪ ڀيرو ٻيهر رولڙي جو شڪار، مداخلت تي چيف اليڪشن ڪميشنر ڪاوڙجي پيو

اسلام آباد (بيورو) اليڪشن ڪميشن وزيراعظم هاري پيڪيج کي مٿاڇري سطح تي هڪ ڀيرو ٻيهر روڪي ڇڏيو. ساڍا12 ايڪڙ کان گهزمين رکندڙ هارين کي 5 ڊسمبر تائين  امدادي پئسا نٿا ڏئي سگهجن. چيف اليڪشن ڪميشنر چيو آهي ته عدالتي رنڊڪن سبب سموري سگهه ضايع پئي ٿئي. ذريعن مطابق سنڌ ۽ پنجاب جي مڪاني چونڊن جي شيڊيول جو اعلان ٿيندي ئي وفاقي حڪومت 341 ارب رپين جي رقم جو وزيراعظم هاري پيڪيج جو اعلان ڪيو هو، جنهن تي مخالف پارٽين ۽ چونڊ ماهرن جي تنقيد کانپوءِ اليڪشن ڪميشن پاڻ مرادو نوٽيس وٺندي هاري پيڪيج جي ٽن حصن تي عمل روڪي ڇڏيو هو، جنهن تي وفاقي حڪومت اسلام آباد هائي ڪورٽ سان رابطو ڪري هاري پيڪيج بحال ڪرايو هو.اسلام آباد هائي ڪورٽ فيصلو وفاق جي حق ۾ ڏيندي معاملي جو نئين سر جائزو وٺڻ لاءِ ڪيس اليڪشن ڪميشن کي ٻيهر موڪلي ڇڏيو.اليڪشن ڪميشن هاري پيڪيج بابت ٽن کان وڌيڪ ٻڌڻيون ڪيون، جنهن کان پوءِ فيصلو ٻڌايو.اليڪشن ڪميشن جي نئين فيصلي مطابق وفاقي ۽ صوبائي حڪومتون 5 ڊسمبر تائين ساڍا 12 ايڪڙ کان گهٽ زمين رکندڙ هارين کي امدادي پئسا نه ڏئي سگهندي، جڏهن ته زرعي اپت ۾ واڌ لاءِ امدادي پئسا 2کان 4 هزار تائين ڪرڻ ۽ ڪپهه،چانور جي پوک لاءِ قرض جي شرح ٻه سيڪڙو ڪرڻ جي اجازت ڏني وئي. چيف اليڪشن ڪمشنر ٻڌڻي دوران هڪ ڀيرو ٻيهر هائي ڪورٽ جي مداخلت تي ڪاوڙجي پيو ۽ چيو ته اسان جيترا به فيصلا ڏيون ٿا، هائي ڪورٽ ان جي ابتڙ حڪم جاري ڪري ٿي ڇڏي. عدالتن کي اليڪشن ڪميشن جي اختيارن ۾ مداخلت جو ڪو به حق ناهي.

 

حڪومت پاران سيلينڊر ۽ ايل پي جي جو ڌماڪو، اگهه ۾ 10 روپيا واڌ

اسلام آباد(بيورو) ٿڌ جي شدت ۾ واڌ ٿيندي ئي ايل پي جي مارڪيٽ ڪمپنين ايل پي جي جي  اگهن ۾ 10 رپيا في ڪلو گرام واڌ ڪري ڇڏي آهي. گهر۾ استعمال ٿيندڙ سلينڊر 120 رپيا ۽ ڪمرشل سيلينڊر 480 رپيا في ڪلو گرام مهانگو ٿي ويو. ذريعن مطابق آل پاڪستان ايل پي جي ڊسٽريبيوٽر ايسوسئيشن جي چئيرمين عرفان کوکر مطابق ايل پي جي مارڪيٽ ڪمپنين ايل پي جي جي اگهن ۾ 10 رپيا في ڪلو گرام واڌ ڪري ڇڏي آهي، مختلف شهرن ۾ ايل پي جي جي نون اگهن جي مقرري ڪئي وئي آهي.ڪراچي ۾ ايل پي جي  جا نوان اگهنن 95 رپيا في ڪلو، لاهور،قصور، گجرانوالا ۽ جهلم ۾ 105 رپيا في ڪلو گرام،رحيم يار خان،صادق آباد حيدرآباد

۽ اٽڪ ۾ ايل پي جي جا اگهه 110 رپيا في ڪلو گرام  مقرر ڪيا ويا.

 

نواز شريف تي اسٽيبلشمنٽ جو ڊپ سوار رهندو آهي ، مودي سان سندس ڳجهين ملاقاتن جو ٻڌي حيرت ٿي: عمران خان

اسلام آباد (بيورو)تحريڪ انصاف جي چيئرمين عمران خان چيو آهي ته وزير اعظم نواز شريف ۽ نريندر مودي جي کٽمنڊو ۾ ملاقات جي خبر ٻڌي ڇرڪ نڪري ويو، انهن ٻنهي وچ ۾ ڳجهي ملاقات جو انتظام ڀارتي واپاري ڪيو، جنهن تي حيرت آهي، نواز شريف تي هر وقت اسٽيبلشمنٽ جو ڊپ سوار رهندو آهي، هو پاڪ فوج جي ساک متاثر ڪري رهيو آهي، اهڙن خيالن جو اظهار هن سماجي رابطي جي ويب سائٽ ٽوئٽر تي پنهنجي نياپي ۾ ڪيو، عمران خان چيو ته نريندر مودي کاٻي ڌر جي حامين جو غلام بڻجي چڪو آهي، بدقسمتي سان پاڪ – ڀارت وزير اعظمن ۾ قائداڻي صلاحيت موجود ناهي، نواز شريف بااعتماد طريقي سان اڳتي وڌڻ جي صلاحيت کان محروم آهي، سندس چوڻ هو ته پاڪ فوج دهشتگردي خلاف ويڙهه ۾ ڪامياب آهي، نواز شريف جي حرڪتن سان پاڪ فوج جي ساک متاثر ٿي رهي آهي.

 

خيرپور ناٿن شاهه لڳ گاڏهي ۽ شاهاڻي برادرين ۾ جهيڙو، 3 ڄڻا قتل

خيرپور ناٿن شاهه (ڊ.ر) خيرپور ناٿن شاهه؛ ڪاڇي جي ڳوٺ سالاري ۾ پراڻي زميني تڪرار تان گاڏهي ۽ شاهاڻي برادرين ۾ خوني جهيڙو، فائرنگ جي نتيجي ۾ 3 ڄڻا قتل، تفصيل موجب؛ خيرپور ناٿن شاهه جي ڪاڇي جي علائقي سالاري ٿاڻي جي حد جي ڳوٺ سالاري ۾ پراڻي زميني تڪرار تان گاڏهي ۽ شاهاڻي برادري جي ٻن ڌرين ۾جهيڙو ٿي پيو، ٻنهي ڌرين وچ ۾ انڌاڌنڌ فائرنگ ٿيڻ جي نتيجي ۾ 45 ورهين جو عبدالڪريم شاهاڻي ۽ 30 ورهين جو حاجي شاهاڻي موقعي تي قتل ٿي ويا اطلاع ملڻ تي سالاري ۽ ڪي اين شاهه جي پوليس ٻئي لاش کڻائي تعلقه اسپتال پهچايا جتي لاشن جي پوسٽ مارٽم ۽ ضروري ڪاروائي بعد ٻئي لاش وارثن حوالي ڪيا ويا جڏهن ته ٻي ڌر گاڏهي برادري جي زخمي ڄاڻايل علي ڏنو گاڏهي بابت فوت ٿيڻ جا اطلاع مليا آهن خوني جهيڙي بعد ڳوٺ سالاري ۾ ٻئي ڌريون مورچا بند بڻيل آهن، علائقو نوگو ايريا بڻيل آهي، علائقي ۾ خوف و حراس ڇانيل آهي ۽ جهيڙي واري صورتحال برقرار آهي، جڏهن ته پوليس پاران ڪي خاص انتظام نه وٺڻ سبب وڌيڪ صورتحال خراب ٿيڻ جا امڪان آهن، هوڏانهن آخري اطلاعن تائين ڪو به ڪيس داخل ٿي نه سگهيو.

 

ڀارتي فنڪار پنهنجي ئي ملڪ ۾ محفوظ ناهن: نور

لاهور (شوبز نيوز) فلم اسٽار نور چيو آهي ته ڀارت ۾ انساني حقن جي کلي عام ڀڃڪڙي ٿي رهي آهي. پنهنجي ملڪ ۾ ئي ڀارتي فنڪار محفوظ ناهن، پاڪ-ڀارت ٺهڻ کانپوءِ ڀارت جارحاڻا روين سان پاڪستان مٿان لت رکڻ ۽دٻائڻ جي ڪوشس ڪئي پر خدا جا لک ٿورا جو هن اسان کي ايٽم بم جي ڇٽي سان امن جي ڇانو ڏني، جنهن کانپوءِ ڀارت جو رويو مٽجي ويو۽ هاني مودي سرڪار جي حڪومت ۾ اچڻ کانپوءِ ڀارتي عوام کي دادگيري جو لائيسينس ملي ويو آهي،جنهن جي چاهين ٿا عزت گهٽ ۽ وڌ ڪن ٿا.خاص طور تي مسلمان فنڪارن کي ٽارگيٽ ڪرڻ خاص مقصدن کي ماڻڻ آهي.