تازيون خبرون

Daily Archives: November 26, 2015

سيڪريٽري تعليم خلاف سنڌ جي استادن جو ڪراچي ۾ ڌرڻو، لٺبازي، شيلنگ، ڪيترائي گرفتار

ڪراچي (اسٽاف رپورٽر) تعليم کاتي جي سيڪريٽري فضل الله پيچوهي کي هٽائڻ ۽ ٻين مطالبن جي مڃتا لاءِ پ ٽ الف جي سڏ تي سوين استادن ڪراچي پريس ڪلب آڏو احتجاجي ڌرڻو هنيو، جڏهن ته سي ايم هائوس ڏانهن مارچ جي ڪوشش دوران پوليس استادن تي ڪڙڪي پئي، لٺبازي،شيلنگ ۽ واٽر ڪينن جي استعمال سبب ڪيترائي استاد زخمي ٿي پيا، چڪرين بعد پ ٽ الف جي مرڪزي صدر لياقت ديدڙ سميت 7 استادن کي گرفتار پڻ ڪيو ويو. پرائمري ٽيچرس ايسوسيئشنجي سڏ تي مرڪزي صدر لياقت ديدڙ ۽ ٻين جي اڳواڻي ۾ سوين استادن ڪراچي پريس ڪلب آڏو احتجاجي مظاهرو ڌرڻو هڻي نعريبازي ڪئي. استادن تعليم کاتي جي سيڪريٽري فضل الله پيچوهي کي هٽائڻ لاءِ ٻن ڪلاڪن جي مهلت ڏني،جنهن کان پوءِ سي ايم هائوس ڏانهن مارچ شروع ڪيو. سوين استاد گورنر هائوس ويجهو ڦوهارا چوڪ تي پهتا ته پوليس اهلڪار ڏوهارين جيان مٿن ڪڙڪي پيا ۽ چڪريون شروع ٿيون. ان موقعي تي اهلڪارن، استادن تي لٺبازي ۽ شيلنگ ڪئي،جڏهن ته واٽر ڪينن جو استعمال ڪري کين ڇڙوڇڙ ڪرڻ جي ڪوشش پڻ ڪئي وئي،جنهن دوران ڪيترائي استاد ساڻا ۽ زخمي ٿي ڪري پيا. پوليس جي لٺبازي،شيلنگ ۽ واٽر ڪينن جي استعمال سبب علائقو جنگ جو ميدان بڻيل رهيو، جڏهن ته پوليس پ ٽ الف جي مرڪزي صدر لياقت دَيدَڙ ۽ سڪندر جتوئي سميت 7 استادن کي گرفتار پڻ ڪيو. استاد پوليس جي بدترين تشدد باوجود سموريون رنڊڪون ٽوڙي سي ايم هائوس پهچڻ تائين ڪامياب ٿي ويا ۽ ڌرڻو هڻي ناانصافيءَ خلاف نعريبازي ڪئي. پ ٽ الف پاران ڪراچي ۾ مطالبن جي مڃتا لاءِ احتجاج ڪندڙ استادن تي تشدد خلاف اڄ اسڪولن جي تالابندي ۽ هڙتال جو اعلان پڻ ڪيو آهي. ٻئي طرف سنڌ جي تعليم واري سينيئر وزير نثار احمد کهڙو چيو آهي ته حڪومت استادن جي تشدد تي يقين نه ٿي رکي پر استادن کي به قانون جي پاسداري ڪرڻ گهرجي، مسئلن جو حل ڳالهيون آهن  ان لاءِ استاد جائز مطالبا کڻي ڳالهين جي ميز تي اچن ته حڪومت سندس جائز مطالبا تسليم ڪرڻ لاءِ غور ڪندي. اهڙن خيالن جو اظهار هن اربع ڏينهن پنهنجي جاري ڪيل هڪ بيان ۾ ڪيو آهي. نثار احمد کهڙو چيو آهي ته جمهوريت ۾ احتجاج ڪرڻ سڀني جو حق آهي پر استادن جي ريڊ زون ۾ پيش قدمي مناسب عمل نه آهي. هن چيو ته حڪومت ڳالهين تي يقين رکي ٿي ۽ ڳالهيون ئي مسئلي جو حل آهن جيڪڏهن استاد جائز مطالبا پيش ڪندا ته حڪومت سندس جائز مطالبن کي تسليم ڪرڻ لاءِ غور ڪندي. هن چيو ته استادن تي تشدد ۽ سندن گرفتارين جا حامي نه آهيون ان لاءِ گرفتار استادن کي آزاد ڪيو وڃي

 

پنهنجي جگر جي صرف 25 سيڪڙو حصي تي زنده آهيان: اميتاڀ بچن

ممبئي (شوبز نيوز) بالي ووڊ ميگا اسٽار اميتاڀ بچن چيو آهي ته هو اڄ پنهنجي جگر جي صرف 25 سيڪڙو حصي تي زنده آهي ۽ هيپاٽائيٽس بي جهڙي وائرس جي بيماري سبب جگر جو 75 سيڪڙو حصو وڃائي چڪو آهي ڀارتياخبار مطابق هيپاٽائيٽس جهڙي بيماري جي حوالي سان هڪ مهم دوران اميتاڀ بچن پنهنجي بيماري جو انڪشاف ڪيو اميتاڀ بچن جو چوڻ هو ته مون کي اتفاقي طور تي هيپاٽائيٽس بي ٿي فلم قلعي جي سيٽ تي مونسان حادثو پيش اچڻ کان پوءِ مون کي 200 ماڻهن خون ڏنو ۽ منهنجي جسم ۾ رت جون 60 بوتلون چاڙهيون ويون ان دوران مون کي رت ڏيندڙ هڪ شخص کي هيپاٽائيٽس بي هئي جنهن سبب اها بيماري مون ۾ منتقل ٿي ويئي ان حادثي کي تقريبن 18 سال بعد ڊاڪٽرن کان پنهنجي عام چيڪب دوران مون تي اهو انڪشاف ٿيو ته مان پنهنجي جگر جو 75 سيڪڙو حصو وڃائي چڪو آهيان ۽ صرف 25 سيڪڙو تي زنده آهيان.

 

پريتي زنٽا جيون ساٿي ڳولي ورتو، شادي جي تقريب آمريڪا ۾ ٿيندي

ممبئي (شوبز نيوز) بالي ووڊ اداڪاره پريتي زنٽا پنهنجي آمريڪي دوست سان شادي جو فيصلو ڪيو آهي ۽ شادي جي تقريب آمريڪا ۾ ئي ٿيندي ڀارتي ميڊيا مطابق پريتي زنٽا پنهنجي شادي جي خبرن جي ترديد ڪئي آهي پر بالي ووڊ اداڪاره جي انتهائي قريبي ذريعن جو چوڻ آهي ته هو ايندڙ سال جنوري ۾ آمريڪا روانو ٿي ويندي جتي هو پنهنجي آمريڪي دوست جيني گوڊ اينف سان رشتو جوڙيندي. شادي جي تقريب نجي نوعيت جي هوندي جنهن ۾ ٻنهي جي گهروارن کان علاوه انتهائي ويجها دوست شريڪ ٿيندا.

 

پاڪستان ٽيم لاءِ انگلينڊ خلاف ٽي ٽوئنٽي سيريز اهم بڻجي وئي

دبئي (اسپورٽس نيوز) پاڪستان ٽيم کي ٽي ٽوئنٽي رينڪنگ ۾ ٻيو نمبر بچائڻ لاءِ انگلينڊ خلاف 1-2 تان سيريز کٽڻ لازمي بڻجي وئي،انگلينڊ خلاف ٽيسٽ سيريز کٽڻ کانپوءِ ون ڊي سيريز جي ناڪام قومي ٽيم تي پريشر هوندو،پر قومي ٽيم جي ڪپتان شاهد خان آفريدي جو چوڻ آهي ته ٽيم جو ڪامبينيشن بهتر آهي، سڀ رانديگر محنت سان کيڏي رهيا آهن،انشاالله انگلينڊ خلاف ڪاميابي ماڻينداسين،.ڪرڪيٽ ماهرين جو چوڻ آهي ته جيڪڏهن انگلينڊ ٽيم پاڪستان کي سيريز ۾ هارائي ٿو وڃي ته پاڪستان ٽيم چوٿين نمبر تي هليو ويندو ۽ پاڪستان ڪرڪيٽ ٽيم انگلينڊ کي وائيٽ واش ڪري ٿي ته انگلينڊ ڇهين نمبر تي هلي ويندي،ڪرڪيٽ ماهرين جو اهو به چوڻ آهي ته ٻنهي ٽيمن لاءِ هي سيريز اهم ٿي وئي آهي، ان لاءِ رانديگرن کي سخت محنت جي ضرورت آهي، پاڪستان ۽ انگلينڊ وچ ۾ ٽن ميچن واري سيريز سڀاڻي کان گڏيل عرب امارات ۾ ٿي رهي آهي، سيريز جون پهريون ٻه ميچون دبئي ۾ کيڏيون وينديون،پاڪستان121 پوائنٽس سان آئي سي سي ڪرڪيٽ ڪائونسل جي رينڪنگ ۾ ٻئين ۽ انگليند 107 پوائنٽن سان 8 نمبر تي آهي.جڏهن ته سريلنڪا 126 پوائنٽس سان پهرين نمبر تي موجود آهي، پاڪستان کي ٻيو نمبر بچائڻ لاءِ انگلينڊ خلاف سيريز کٽڻ لازم بڻجي ويو،جيڪڏهن پاڪستان انگلينڊ هٿان 1-2 تان مات کائي ٿو ته پوءِ انگلينڊ ڇهين نمبر تي ۽ پاڪستان چوٿين نمبر تي اچي ويندو،پاڪستان ڪرڪيٽ ٽيم جيڪڏهن سيريز کٽي ٿو ته 126 پوائنٽون کڻي سريلنڪا سان گڏ  ٻئي نمبر تي ايندو ۽ پنهنجي پهرين نمبر جي پوزيشن چٽي ڪندو.

 

انگلينڊ ڪرڪيٽ ٽيم جو فاسٽ بالر جيمز اينڊرسن به پاڪستان سپر ليگ کيڏندو

دبئي (اسپورٽس نيوز) انگلينڊ ڪرڪيٽ ٽيم جي فاسٽ بالر جيمز اينڊرسن ۽ بيٽسمين اين بيل پاران پاڪستان سپر ليگ ۾ کيڏڻ جي پڪ،جڏهن ته ڪپتان اليسٽر ڪُڪ سان ڳالهيون هلي رهيون آهن،ڪرڪيٽ جي مشهورويب سائيٽ جي رپورٽ مطابق انگلينڊ ٽيم جي رانديگرن جيمز اينڊرسن ۽ بيل، پاڪستان سپر ليگ سان کيڏڻ جي حامي ڀري  هئي ۽ ان کانپوءِ پاڪستان ڪرڪيٽ انتظاميا ۽ انگلينڊ رانديگرن وچ ۾ ڳالهيون ٿيون ۽ انگلينڊ جي ٻنهي رانديرگرن پي سي ايل ۾ کيڏڻ جي حامي ڀري ورتي، جڏهن ته انگلينڊ جي ڪپتان اليسٽر ڪُڪ سان اڃان ڳالهيون هلي رهيون آهن،ٽورنامينٽ  ۾ انگلينڊ جي رانديگرن پاران شامل ٿيڻ سان پي سي ايل وڌيڪ مضبوط ٿيندي، ٻئي پاسي پاڪستان ڪرڪيٽ بورڊ انتظاميا جو چوڻ آهي ته سپر ليگ جي ٽيمن جو اعلان 4 کان 24 فيبروري 2016ع گڏيل عرب امارات ۾ ڪيو ويندو جنهن ۾ اسلام آباد،پشاور،ڪراچي،لاهور ۽  جون ٽيمون  شامل آهن،ٽورنامينٽ ۾ گڏيل طور تي 24 ميچون ٿينديون.

 

اين ايڇ اي جي تعميري منصوبن ۾ ننڍا صوبا وڏا حصيدار! : ڪاشف زمان / ڊائريڪٽر پبلڪ رليشنز

روڊ انفرا اسٽرڪچر جي تعمير و ترقي لاءِ پاڪ وطن جا ننڍا صوبا نيشنل هاءِ وي اٿارٽي جي عظيم تعميراتي منصوبن ۾ وڏا حصيدار آهن، انهن صوبن ۾ خيبرپختونخواهه يارنهن اهم منصوبن سان سڀ کان اڳتي آهي، جڏهن ته بلوچستان ۾ ترتيب وار ڏهه ۽ نو منصوبن تي ڪم جاري آهي

صوبي خيبرپختونخواهه ۾ پهاڙ سرڪني واري مان ٺهندڙ عطاالله جهيل مان اين 35 تي روڊ جي 24 ڪلو ميٽر متاثر حصي جو ڪم مڪمل ٿي چڪو آهي، اهڙي طرح اين 15 تي جهلڪڊ—چلاس اين 35 تي 147 ڪلو ميٽر، ٿاڪوٽ – رائيڪوٽ اي 35 ڪلوميٽر برهان حويليان ايڪسپريس وي، اين 45 نوشهره-چڪدره دير ۽ پشاور ناردرن باءِ پاس جي تعمير جو عمل پوري عروج تي آهي، ڄاڻايل تعميراتي منصوبا ايندڙ سال مڪمل ڪيا ويندا، ان کان علاوه اين 50 تي 240 ڪلوميٽر تي محيط برهان، ڊيره اسماعيل خان، ايس 1 تي 164 ڪلوميٽر مشتمل جنگلوٽ – اسڪردو روڊ، اين 35 تي 120 ڪلوميٽر جي حويليان، ٿاڪوٽ شاهراهه ۽ اين 95 تي 82 ڪلوميٽر جي چڪدره، مينگورا، فتحپور سيڪشنز جو تعميري عمل ايندڙ چند مهينن دوران شروع ٿيڻ جو چٽو امڪان آهي، بلوچستان جنهن جي ترقي ۽ تعمير موجوده جمهوري حڪومت جي اولين ترجيح آهي، جن مان ڪيترن ئي منصوبن تي ڪم جاري اهي، جن ۾ سوراب، چمن سيڪشن جو اين اي 25 تي 226 ڪلوميٽر تي مشتمل آهي، جيڪو پڄاڻي جي آخري مرحلن ۾ داخل آهي، جڏهن ته ڪيترن ئي تعميري منصوبن جو تعميري عمل مڪمل ٿي چڪو آهي، جن ۾ ايم 8 تي واقع 148 ڪلوميٽر تي مشتمل خضدار شهدادڪوٽ، ۽ اسي موٽروي تي 193 ڪلو ميٽر جو حصو گوادر، تربت هوشاب ۽ ڪولپور رهائي پاس جيڪو اين 85 تي واقع آهي، ۽ 450 ڪلوميٽر مشتمل آهي جنهن جو 50 فيصد ڪم مڪمل ٿي چڪو آهي، جڏهن ته اين 30 تي 110 ڪلوميٽر خضدار بسيمه شاهراهه جي فزيبلٽي تياري، جي مرحلن ۾ آهي، 3 وڏا منصوبا قلعه سيف الله ويگم زو جيڪو اين 70 تي 128 ڪلو ميٽر تي مشتمل آهي، اهڙي طرح اين 50 تي 81 ڪلو ميٽر جو مغل ڪوٽ، زوب حصو ۽ اين 70 تي 326 ڪلو ميٽر راکي گج بيوانا روڊ جو ڪم جلد ئي شروع ٿيڻ وارو آهي،

صوبي سنڌ ۾ اڌ درجن کان وڌيڪ تعميري منصوبي مڪمل ٿيڻ تي آهن، جنهن ۾ لياري ايڪسپريس وي جو 81 فيصد گهارو ڪيٽي بندر روڊ 84 فيصد لاڙڪاڻو موئنجو دڙو 82 فيصد لاڙڪاڻو قمبر 82 فيصد قاضي احمد آمري پل 70 فيصد ۽ لاڙڪاڻو نصيرآباد روڊ جو 64فيصد ڪم مڪمل ٿي چڪو آهي، انهن منصوبن ۾ ٿوري دير جو سبب فنڊ هيا، جيڪي فنڊ مهيا ڪيا ويا ترجيحي بنيادن تي انهن منصوبن کي مڪمل ڪيو ويندو، ان کان علاوه اهم ترين منصوبن ايم 9 تي 392 ڪلو ميٽر جي سکر ملتان موٽر وي ۽ 296 ڪلو ميٽر جي حيدرآباد سکر موٽر وي جو تعميري عمل تمام جلد شروع ٿيڻ وارو آهي،

ڄاڻايل منصوبن جي تعمير ۽ تڪميل جو واحد اهو ئي مقصد ناهي ته موااصلات ٽرانسپورٽ نيٽ ورڪ کي مستحڪم موثر ۽ فعال بڻايو وڃي بلڪي قومي مفادن کي نظر ۾ رکي معاشرتي ترقي ۽ اقتصادي طور تي انقلابي تبديلي آڻڻي آهي، ته جيئن وطن عزيز جا ننڍا منصوبا عوام جي معيار زندگي بلند ٿي سگهي، ۽ انهن جي محرومين جو ازالو ٿي سگهي.

 

بلدياتي اليڪشن کانپوءِ سنڌ جو سياسي وايو منڊل : اسحاق سومرو

پاڪستان جي تاريخ ۾ پهريون دفعو پارٽي بنيادن تي ٿيندڙ بلدياتي اليڪشن  ۾ سنڌ جي 22 ضلعن جي چونڊ نتيجن ۾ پاڪستان پيپلز پارٽي هڪ دفعو ٻيهر وڏي اڪثريت سان سوڀ ماڻي چڪي آهي. اليڪشن جي ٻئي مرحلي ۾ جتي 14 ضلعن ۾ چونڊ عمل ٿيو، پهرين مرحلي جيان ٻئي مرحلي ۾ به سنڌ ۾ پ پ جي مخالف پارٽين ٿوڙي روايتي ڌرين کي عبرتناڪ شڪست جو منهن ڏسڻو پيو. اهي روايتي جاگيردار گهراڻا پنهنجا اباڻا ضلعا ۽ تعلقا به وڃائي ويٺا، جتي سوين سالن کان سندن حاڪميت جو طبل وڄندو هو، سواءِ بدين ۾ ذوالفقار مرزا جي جنهن ضلعي جون 50 سيڪڙو سيٽون حاصل ڪري پنهنجي منفرد سياسي حيثيت قائم رکي. ٻئي طرف ضلعي نوشهروفيروز جو جتوئي خاندان، جنهن کي جهوني سياستدان سيد ظفر علي شاهه جي حمايت پڻ حاصل هئي، سئو سالن کان وٺي موري شهر تي پنهنجي سياسي مالڪي به هو مڪاني چونڊن ۾ وڃائي ويٺا، جيستائين سوال آهي، نوشهري فيروز ضلعي جي شهرن محرابپور ۽ ڀرياسٽيءَ جو، جتان پ پ کي مڪمل ناڪامي جو منهن ڏسڻو پيو آهي، اتان کٽي آيل اڪثريت آبادي اردو ۽ پنجابي ڳالهائيندڙ جي آهي، جيڪي هميشه پ پ مخالف ووٽ جي ڪري مشهور آهن. ان ڳالهه جي تصديق نامياري صحافي حسن مجتبى ويهه سال اڳ محرابپور کي پنجاب جي شهر “ٽوباٽيڪ سنگ” سان ڀيٽ ڏيندي هڪ دلچسپ ڪالم لکيو هو، ڇاڪاڻ ته اتي لڳ ڀڳ آبادي پنجابي ۽ اردو زبان ڳالهائيندڙن جي آهي. جڏهن ته اتان اعلانيل اليڪشن نتيجا ٻڌائين ٿا ته ٻنهي شهرن ۾ هر اليڪشن ۾ ووٽ پ پ جي مخالفت ۾ رهيو آهي. اهڙيءَ طرح جڏهن اسين بدين جي شهر گولاڙچيءَ جي چونڊن واري تاريخ ۽ ووٽ جي رخ تي نظر وجهون ٿا ته  اتي پڻ پ پ مخالف ووٽ پنجابي ڳالهائيندڙن جي ڪري سرس آهي، دلچسپ ڳالهه ته سنڌ ۾ رهندڙ پنجابين جو هي وڏي ۾ وڏو تعلقو پڻ آهي. ظاهر آهي ته اتان ڪامياب ٿي ايندڙن جي اڪثريت پڻ پنجابي ئي آهن. هنن چونڊن ۾ به گولاڙچي ٽائون ڪاميٽيءَ جي 6 مان 4 سيٽون پنجابي ڳالهائيندڙ کٽي آيا آهن.

باقي بدين ۽ ٽنڊي باگو مان مرزا جي ڪاميابي ڪا گهڻي غيرمتوقع نه آهي، بدين مان مرزا جي ڪاميابيءَ جي پٺيان ڊي جي رينجرز جي موجودگي، عزيز ميمڻ کي ٽن ڪلاڪن تائين حراست ۾ رکڻ، چونڊ کان چند ڪلاڪ پهرين 22 پولنگ اسٽيشن کي ٻين جڳهين تي منتقل ڪرڻ جو پ پ قيادت الزام هڻي رهي آهي.

نوابشاهه ضلعي ۾ پ پ جو مقابلو سنڌ يونائيٽڊ پارٽي جو زين شاهه ۽ نواب شاهه شهر ۾ متحده قومي موومينٽ سان هو. نوابشاهه شهر جي اليڪشن ملتوي ٿي وئي، سيد زين شاهه سڪرنڊ تعلقي مان پنهنجا اميدوار بيهاريا هئا. 2013ع جي عام چونڊن ۾ سيد زين شاهه  سڪرنڊ واري صوبائي اسميبليءَ جي تڪ تي پ پ جي اميدوار غلام قادر چانڊيو سان ڀرپور مقابلو ڪيو هو ۽ سڪرنڊ جو شهر کٽيو هو. ان کي هن اليڪشن ۾ بدترين شڪست ملي آهي، شهر سڪرنڊ جي 15 وارڊن تان هڪ به ڪائونسلر نه چونڊرائي سگهيو پر دلچسپ ڳالهه ته پنهنجي ڳوٺ واري يونين ڪائونسل مجيد ڪيريو تان سندس چيئرمين، وائيس چيئرمين، توڙي ضلعي ڪائونسل تي چونڊ وڙهندڙ پڻ هارائي ويا، کيس پوري يوسي ۾ صرف هڪ ڪائونسلر جي سيٽ ملي سگهي ۽ اهڙيءَ طرح سندس پارٽيءَ جي ڄامشوري ضلعي ۾ سواءِ 4 ڪائونسلرن جي ڪٿان به کٽي نه سگهيا، قاسم آباد جيڪو سنڌ جي قوم پرست پارٽي جو دارالحڪومت پڻ سڏجي ٿو، جتي سڀني قوم پرست پارٽين جون مرڪزي آفيسون ۽ سرگرمين جا ڳڙهه سڏبا آهن. قوم پرستن کي بدترين شڪست ڪيترائي سوال ڇڏي ٿي. 2013ع جي الڪيشن ۾ سنڌ قومي عوامي اتحاد جي اياز لطيف پليجي جنهن 14 هزارن کان به وڌيڪ ووٽ کنيا، اتان هن جي پارٽي هڪ به ڪائونسلر چونڊرائي نه سگهي، پر پي ٽي آءِ جو هڪ ڪائونسلر قاسم آباد مان چونڊيو ويو، جڏهن ته حيدرآباد شهر مان متحده قومي موومينٽ کي واضح برتري ملي، جتان پ پ کي صرف 15 يونين ڪاميٽين جون سيٽون مليون. هالا جي شهر  ۽ مٽياريءَ جي پوري ضلعي ۾ پ پ کي سرسي ملي، ضلعي ٽنڊو الهيار مان سينيٽر راحيله مگسي جي پٽ کي ٻن ڊسٽرڪٽ ڪائونسل جي سيٽن تان  شڪست ملي، ٿرپارڪر ضلعي مان اربابن جي تڏا ويڙهه ۽ شيرازين جي ٺٽي ۽ سجاول مان بادشاهي جو خاتمو، عمرڪوٽ ۽ ٽنڊو محمد خان مان واضع اڪثريت هڪ دفعو ٻيهر پ پ کي سنڌ ۾ سوڀارو ڪيو. 2013ع ۽ هاڻي اڍائي سالن کانپوءِ 22 ضلعن ۾ مليل واضع برتريءَ ٿي، مڪاني چونڊن ۾ شڪست سان همڪنار ٿيل اڳواڻن ڪراچيءَ ۾ پريس ڪانفرنس ڪندي چونڊن ۾ ڌانڌلين جو الزام هڻندي فوج ۽ رينجرز جي نگرانيءَ ٻيهر چونڊ ڪرائڻ جو مطالبو ڪيو آهي.

1970ع کان وٺي سنڌ ۾ ٿيندڙ سڀني چونڊن جو جيڪڏهن گهرائي سان جائزو ورتو وڃي ته هر اليڪشن ۾ هر طرف پاڪستان پيپلزپارٽي ۽ ٻي طرف پ پ مخالف روايتي ڌريون آهن. انهن ۾ اڪثريت انهن جي آهي جيڪي 35 سالن ۾ هڪ کان وڌيڪ ڀيرا سياسي پارٽيون بدلائي ۽ نيون پارٽيون ٺاهي اقتدار جا مزا ماڻيندا رهيا آهن، سندن سياسي پارٽين جو وجود سندن ذاتي حلقن يا ڪجهه ضلعن تائين رهيو آهي. جيتوڻيڪ پاڪستان پيپلزپارٽيءَ جي سٺي حڪمراني واري ڪارڪردگي بلڪل نه رهي آهي، پر پ پ جون هيءَ مخالف شخصيتون وري پنهنجا پاسا بدلائي ۽ پوئين در کان اقتدار ماڻڻ واري رڪارڊ جي ڪري سنڌ جي ماڻهن ۾ پنهنجي جڳهه ٺاهڻ ۾ ناڪام ويون آهن. جنهن جو فائدو هر اليڪشن ۾ پيپلز پارٽيءَ کي مليو آهي، هن بلدياتي اليڪشن کان پوءِ اها ڳالهه واضح ٿي ويئي هئي ته سڀني ضلعن ۾ پ پ جي نشان تير تي اليڪشن وڙهندڙ جي مقابلي ۾ مخالف سياسي پارٽين پنهنجا 20 سيڪڙو کان به گهٽ اميدوار بيهاريا هئا، سياسي پارٽين کان وڌيڪ آزاد اميدوار يا پاڪستان پيپلزپارٽيءَ جي ورڪرن ئي فارم جمع ڪرايا هئا، جن کي سيٽون نه مليون هيون، پ پ کي هر سيٽ تي ڪارڪنن ۽ همدردن طرفان وڏي تعداد ۾ پارٽي ٽڪيٽن لاءِ درخواستون مليون، ٻئي طرف مخالف ڌرين کي هر سيٽ تي بيهارڻ جيترا اميدوار به نه ملي سگهيا.

دلچسپ ڳالهه ته پ پ جا اُهي ئي مخالف آهن جيڪا ڏهاڪن کان پ پ جو سنڌ ۾ مقابلو ڪن ٿا، جن شخصيتن ۽ پارٽين ۾ مسلم ليگ فنڪشنل، لاڙڪاڻي جو ممتاز ڀٽو ۽ ڏوڪري جا انڙ، ٻيٽي ضلعي دادو جا جتوئي، موري جا جتوئي، ٿر جا ارباب، ٺٽي جا شيرازي، سن جا سيد ۽ هاڻي بدين ۾ زرداري مخالف ذوالفقار مرزا آهي.

سنڌ ۾ 2008ع جي اليڪشن کانپوءِ پ پ جو متبادل ڳولڻ جون ڪوششون ۽ خواهشون ڪجهه سنجيده انداز ۾ شروع ٿي ويون، 2013ع جي اليڪشن ۾ پاڪستان مسلم ليگ (ف) جي پيرپاڳاري جي اڳواڻي ۾ ڏهه جماعتي اتحاد پڻ قائم ٿيو پر اهو اتحاد به ان اليڪشن ۾ نتيجا نه ڏئي سگهيو ۽ ان اتحاد تان به اهي ئي روايتي مخالف اليڪشن ۾ ڪامياب ٿيا هئا، هاڻي به 22 ضلعن ۾ اهي ئي ساڳيا چهرا پ پ سان مقابلو ڪري رهيا هئا. جن کي 2013 کان به وڌيڪ بري شڪست ڏسڻي پئي آهي.

هيٺين سطح تي ٿيل هن اليڪشن ۾ جتي پ پ پنهنجي هزارين ورڪرن کي هڪ سياسي سيٽ اپ جو حصو بنائڻ ۾ ڪامياب وئي آهي ۽ پهريون دفعو پ پ بلدياتي سطح تي پهچي وئي آهي. پ پ لاءِ اهو سونهري موقعو آهي ته اها سنڌ ۾ هيٺين سطح تي ماڻهن جي خدمت ڪري، ٻئي طرف پ پ جي مخالفن جو وڌيڪ ڪمزور ٿيڻ ۽ خصوصن قوم پرست پارٽين جي انتهائي مايوس ڪن ڪارڪردگيءَ هڪ دفعو ٻيهر پ پ کي سنڌ جي واحد سياسي پارٽيءَ طور هڪ دفعو ٻيهر سامهون آندو آهي، پ پ جو متبادل اهي روايتي پ پ مخالف آهن جيڪي پنهنجي پروفائل ۾ پارٽيون بدلائڻ جو وڏو رڪارڊ، وڏن جي مدد سان اقتدار ۾ ايندا رهيا آهن. جڏهن ته سنڌ ۾ پ پ جو متبادل مڊل ڪلاس جي  صورت ۾ حقيقي جمهوريت پسند پارٽي ۽ ايماندار ماڻهو ٿي سگهن ٿا.

هن وقت تائين ۽ خاص طور تي هن بلدياتي چونڊن جي نتيجن کان پوءِ اهو هاڻي بلڪل چٽو ٿي ويو آهي ته تبديليءَ جو راڳ ڳائيندڙ، ووٽ جي اهميت تي ليڪچر ۽ روزانو جا ڀاشڻ ڏيندڙ ڪالم نگارن طرفان تبديليءَ جي لاءِ عطائي ڊاڪٽرن وارو لٻاڙي فلسفو ٻڌائيندڙن کي اعتراف ڪرڻ کپي ته هنن جي ٻڌايل نسخن تي سنڌ جي ماڻهن ڪوبه ڌيان نه ڏنو آهي. جيستائين سياسي پارٽين جو تعلق آهي ته اهو به واضح ٿي ويو آهي ته سنڌ جو ماڻهو پ پ کي سواءِ ڪنهن به ٻي ملڪي سطح جي پارٽي خاص طور تي مسلم ليگ (ن) ۽ پاڪستان تحرڪ انصاف کي ووٽ ڏيڻ لاءِ تيار نه آهي، جيستائين پاڪستان مسلم ليگ فنڪشنل جو تعلق آهي ته اها سنڌ جي ٻن يا ٽن ضلعن ۾ ئي پ پ جو مقابلو ڪري ٿي، اها به گهڻو ڪري پنهنجي مريدن جي ووٽن تي، سنڌ جي قوم پرست پارٽين طرفان سنڌ ۾ پهريون دفعو سياسي بنيادن تي ٿيندڙ هن بلدياتي چونڊن ۾ ڀرپور حصو نه وٺي هڪ سونهري موقعو وڃائي ڇڏيو. جنهن ڪري سندن کي به ٻيهر صف بندي ڪرڻ جي ضرورت آهي. وقت جي ضرورت آهي ته حقيقت پسنديءَ جو مظاهرو ڪري وچين ڪلاس جي سياست کي مضبوط ڪرڻ لاءِ هڪ دفعو سنجيدگيءَ سان سوچڻ ۽ لوچڻ گهرجي.

 

18 سالن بعد بريت جو فيصلو

گذريل ڏينهن راولپنڊي جي احتساب عدالت اڳوڻي صدر آصف علي زرداري کي ايس جي ايس ۽ ڪوٽيڪنا ريفنرسز ڪيس مان بري ڪري ڇڏيو آهي، فاروق ايڇ نائيڪ چيو آهي ته نيب وٽ ريفرنسز جا اصل ڪاغذ ئي موجود نه هئا، سياسي انتقام وٺڻ لاءِ سيف الرحمان ڪميشن ڪيس ٺاهيا، فيصلو حق ۽ سچ جو ٿيو آهي. احتساب عدالت جي جج محمد بشير جي سربراهي ۾ اڳوڻي صدر آصف علي زرداري خلاف ايس جي ايس ۽ ڪوٽيڪنا ريفرنسز جي ٻڌڻي ٿي. ٻڌڻي دوران نيب پاران ثبوت پيش نه ڪرڻ تي عدالت اڳوڻي صدر آصف علي زرداري کي ايس جي ايس ۽ ڪوٽيڪنا ريفرنسز مان آجو قرار ڏئي ڇڏيو.. عدالت ٻاهران ميڊيا سان ڳالهائيندي آصف زرداري جي وڪيل فاروق ايڇ نائيڪ چيو اڄ انصاف ۽ قانون جي فتح ٿي آهي، نيب پاران ڪو به اهڙو ثبوت پيش نه ڪيو ويو جنهن سان ثابت ٿئي تي آصف علي زرداري پرڏيهي ڪمپني کان ڪا ڪميشن ورتي هئي. فاروق ايڇ نائيڪ وڌيڪ چيو ته نيب وٽ داخل ڪرايل ريفرنسز جا اصلي ڪاغذات ئي موجود نه هئا، سياسي انتقام وٺڻ لاءِ سيف الرحمان ڪيس ٺهرايا.. فاروق ايڇ نائيڪ جو چوڻ هو ته آصف علي زرداري 8 سالن تائين جيل ڪاٽي چڪو آهي، هو هن وقت تائين ٽن ڪيسن مان باعزت بري ٿي چڪو آهي، هاڻي هو ڪيس داخل ڪرڻ وارن کان پڇڻ ٿا چاهيون ته ٻڌايو وڃي ڪيس داخل ڪرڻ سان کين ڪهڙو فائدو ٿيو؟ فاروق ايڇ نائيڪ چيو ته ڪمشين جي وصولي جا الزام بينظير ڀٽو جي دور ۾ لڳايا ويا هئا، بينظير ڀٽو جي شهادت کانپوءِ سندس نالو ريفرنسز مان خارج ڪيو ويو هو، آصف علي زردري خلاف 18 سالن کانپوءِ ڪيس ختم ڪيا ويا آهن.. آصف علي زرداري تي پرڏيهي ڪمپني کان ٺيڪو ڏيارڻ لاءِ ڪميشن وٺڻ جو الزام هو، جڏهن ته ڪيس جي جج محمد بشير پاران 11 نومبر تي ڪيس جو فيصلو محفوظ ڪيو هو جنهن جو اڄ فيصلو ٻڌايو ويو آهي.