تازيون خبرون

Daily Archives: November 14, 2015

پاڪستان هڪ ذميوار ايٽمي رياست آهي، جوهري اثاثا محفوظ آهن: آرمي چيف

راولپنڊي(بيورو) آرمي چيف جنرل راحيل شريف نيوڪلئير سيڪيورٽي جي سينٽر آف ايڪسيلينس جو دورو ڪيو. آئي ايس پي آر پاران راولپنڊي کان جاري بيان مطابق آرمي چيف جنرل راحيل شريف نيوڪلئير سيڪيورٽي جي سينٽر آف ايڪسيلينس جي دوري جي موقعي تي ايٽمي اثاثن جي بهتري ۽ حفاظتتي اعتماد جو اظهار ڪيو. ان موقعي تي سندس چوڻ هو ته  ايٽمي سلامتي مقدس ذميواري آهي. پاڪستان هڪ ذميوار ايٽمي رياست آهي. سينٽر فار ايڪسيلينس جي ٺهڻ کانپوءِ ڪيترن ئي تربيتي ڪورسز جو اهتمام ڪيو ويو. آرمي چيف جنرل راحيل شريف اسٽريٽجڪ پلانز ڊويزن جو دورو ڪيو. ڊائريڪٽر جنرل اسٽريٽجڪ پلانز ڊويزن ليفٽيننٽ جنرل مظهر جميل آرمي چيف جي آجيان ڪئي. ان دوران آرمي چيف جديد سهولتن ۽ تربيتي سرگرمين جو جائزو ورتو ۽ جديد تربيت جي چڪاس به ڪئي. آرمي چيف جو چوڻ هو ته پاڪستان نيوڪلئير سيڪيورٽي کي وڌيڪ مضبوط ڪرڻ لاءِ قدم کنيا آهن ۽ ادارو هن وقت تائين ڪيتريون ئي عالمي تربيتون ۽ ڪورسز پورا ڪرائي چڪو آهي.

 

دهشتگردن ۽ قاتلن خلاف ڪيس هارائڻ گناهه آهي: وڏو وزير

ڪراچي (اسٽاف رپورٽر) سنڌ جَي وڏي وزير سيد قائم علي شاهه چيو آهي ته دهشتگردن خلاف ڪيس هارائڻ افسوسناڪ آهي، پراسيڪيوٽر جنرل ۽ آءِ جي سنڌ جوابدارن خلاف عدالتن ۾ جوڳا ثبوت پيش ڪن، ڪوتاهي برادشت نه ڪئي ويندي. سي ايم هائوس ڪراچي ۾ وڏي وزير سيد قائم علي شاهه سان پراسڪيورٽر جنرل شهادت اعواڻ ملاقات ڪئي، جنهن دوران دهشتگردن خلاف ڪيسز ۾ ٿيل اڳڀرائين بابت خيالن جي ڏي وٺ ڪئي وئي. پراسيڪيوٽر جنرل سنڌ شهادت اعواڻ وڏي وزير کي شڪايت ڪئي ته صوبائي حڪومت دهشتگردن خلاف ڪيسز ۾ مڪمل ڄاڻ ۽ سهڪار نه پئي ڪري، جنهن سبب هو مونجهارن جو شڪار آهن. وڏي وزير پراسيڪيوٽر جنرل کي خاطري ڪرائي ته صوبائي حڪومت دهشتگردن خلاف  ڪيسز ۾ ڀرپور سهڪار ڪندي. هن چيو ته ڪراچي ۾ امن جي بحالي لاءِ ڊگهي عرصي کان جدوجهد جاري آهي، دهشتگردن خلاف ڪيسز ۾ ناڪامي افسوسناڪ آهي. قائم علي شاهه وڌيڪ چيو ته ڪراچي ۾ مستقل امن لاءِ ٽارگيٽڊ آپريشن بنا ڪنهن فرق جي جاري رکيو ويندو، دهشتگردن خلاف ڪيسز ۾ ڀرپور ڄاڻ فراهم ڪئي ويندي.

 

راهداري منصوبي ۾ سنڌ کي ڄاڻي واڻي نظر انداز ڪيو ويو آهي: خورشيد شاهه

اسلام آباد (بيورو) مخالف ڌر جي اڳواڻ سيد خورشيد شاهه وزيراعظم نواز شريف کي خط لکي اقتصادي راهداري منصوبي تي خدشا ظاهر ڪري ڇڏيا آهن، خورشيد شاهه چيو آهي ته راهداري منصوبي مان فقط هڪ صوبي کي فائدو پهچائڻ سان ناڪاري اثر پوندا، منصوبي ۾ سنڌ کي ڄاڻي واڻي نظرانداز ڪيو ويو آهي، سنڌ جا خدشا ختم ڪيا وڃن. قومي اسيمبلي ۾ مخالف ڌر جي اڳواڻ سيد خورشيد شاهه وزيراعظم نواز شريف کي لکيل خط ۾ چيو آهي ته اقتصادي راهداري منصوبو ملڪ جي روشن مستقبل جي ضمانت آهي، راهداري منصوبي ۾ سنڌ کي ڄاڻي واڻي نظر انداز ڪيو ويو آهي، راهداري منصوبي سان سڄي ملڪ کي فائدو پهچايو وڃي. خورشيد شاهه چيو ته هڪ صوبي  کي فائدو پهچائڻ سان ٻين صوبن تي منفي اثر پوندا، جيڪي به شاهراهون ٺاهيون پيون وڃن، ان جو فائدو صرف هڪ صوبي کي ٿي رهيو آهي جنهن سبب پنجاب سان ٻين صوبن جي ناراضگي وڌي رهي آهي.. خورشيد شاهه وڌيڪ چيو ته سنڌ 60 سيڪڙو روينيو ملڪ کي ڏئي ٿو، پر ان باوجود کيس نظر انداز ڪيو پيو وڃي، جڏهن ته سنڌ ۾ سڀ کان وڌيڪ گئس جا ذخيرا موجود آهن.. هن چيو ته حيدر آباد ۽ سکر سيڪشن تي نيشنل هاءِ وي اڳ ئي موجود آهي، پر ان باوجود ان تي ٻيهر ڪم شروع ڪيو ويو آهي، اولهه وارو روٽ راهداري منصوبي کي ويجهو هئڻ باوجود ترجيح اوڀر واري روٽ کي ڏني پئي وڃي، جيڪو سندن سمجهه کان ٻاهر آهي، سنڌ سميت ٻين صوبن کي به راهدري منصوبي بابت خدشا آهن، جيڪي ختم ڪيا وڃن

 

عمران خان کان ته پنهنجو گهر ۽ جماعت نه ٿي سنڀالجي ۽ هليو آهي وڏي جماعت جي ليڊر کي سياست سيکارڻ: نثار کهڙو

ڪراچي(اسٽاف رپورٽر)  سنڌ جي اطلاعات واري سينيئر وزير نثار احمد کهڙو چيو آهي ته بلاول ڀٽو زرداريءَ کي ليڊر بڻائڻ جو مشورو ڏيندڙ عمران خان پهريان پاڻ ليڊر بڻجي ڏيکاري پوءِ ڪنهن کي مشورو ڏي. عمران خان کان تهپنهنجو گهر ۽ جماعت نه ٿي سنڀالجي ۽ هليو آهي وڏي جماعت جي ليڊر کي سياست سيکارڻ. جمعي ڏينهن پنهنجي جاري هڪ بيان ۾ هن چيو ته آمر جي حمايتي عمران خان طرفان سنڌ جي عوام کي ڪيڙو چوڻ جي مذمت ڪيون ٿا، ماضيءَ ۾ آمر مشرف سنڌ جي عوام کي جاهل چيو هو ۽ اڄ ان جي وڏي حامي عوام کي ڪيڙو چيو آهي. هن چيو ته عمران خان سنڌ جي عوام کي غلاميءَ مان آزادي ڏيارڻ جو مشورو پاڻ وٽ رکي ڇاڪاڻ ته اهو سنڌ جو عوام ئي هو جنهن ملڪ آزاد ڪرايو. هن چيو ته عمران خان پنهنجي شاهه محمود قريشي کي مشورو ڏي ته هو پنهنجي ماڻهن کان پيرن تي هٿ نه رکرائي. هن چيو ته سنڌ جي عوام جي حقن تي ڌاڙو ڪنهن ٻئي نه پر آمرن ۽ انهن جي حوارين هنيو. هن چيو ته عمران خان ڀلي سنڌ جو دورو ڪري ڏسي کيس مهمانوازيءَ کان سواءِ سنڌ مان ڪجهه به نه ملندو. هن چيو ته سنڌ مان هاڻي راوڻ جو دور ختم ٿي چڪو آهي ان لاءِ آمرن ۽ انهن جي حوارين جو ڳٺ جوڙ پيپلز پارٽيءَ جو ڪجهه به نه ٿو بگاڙي سگهي.

 

اليڪشن ڪميشن پنجاب ۾ مڪاني چونڊن جي ٻي مرحلي دوران 960 پولنگ اسٽيشنز کي حساس قرار ڏئي ڇڏيو

اسلام آباد (بيورو) اليڪشن ڪميشن، پنجاب ۾ مڪاني چونڊن جي ٻي مرحلي دوران 960 پولنگ اسٽيشنز کي حساس قرار ڏئي ڇڏيو آهي، سيڪريٽري اليڪشن ڪميشن چيو آهي ته اين اي 122 جيان هر پولنگ اسٽيشن تي فوج مقرر نٿي ڪري سگهجي، حساس پولنگ اسٽيشن تي آرمي گشت ڪندي. لاهور ۾ چيف اليڪشن ڪمشنر جي صدارت هيٺ اعليٰ سطحي اجلاس ٿيو، جنهن ۾ پنجاب ۾ مڪاني چونڊن جي ٻي مرحلي لاءِ سڪيورٽي انتظامن جو جائزو ورتو ويو. اجلاس ۾ سيڪريٽري اليڪشن ڪميشن، چيف سيڪريٽري پنجاب، آءِ جي پوليس، اليڪشن ڪميشن پنجاب جي ميمبر ۽ ٻين اعليٰ عملدارن شرڪت ڪئي. اجلاس ۾ اليڪشن ڪميشن کي پنجاب ۾ مڪاني چونڊن جي ٻي مرحلي لاءِ سڪيورٽي انتظامن بابت تفصيلي بريفنگ ڏني وئي. اجلاس کي خطاب ڪندي چيف اليڪشن ڪمشنر چيو ته صاف ۽ شفاف چونڊون ڪرائڻ اليڪشن ڪميشن جي آئيني ذميواري آهي، ان لاءِ سمورا ادارا اليڪشن ڪميشن سان سهڪار ڪن. چيف اليڪشن ڪمشنر چيو ته مڪاني چونڊن جو پهريون مرحلو پر امن طريقي سان گذريو ويو، اميد آهي ته ٻيو مرحلو به احسن طريقي سان گذري ويندو، جتي به شڪايت ملي اتي ڪارروائي ڪئي ويندي. هن چيو ته قائد اعظم جو قول آهي ته بنا خوف ۽ خطري جي پنهنجيون ذميواريون ادا ڪيون، اليڪشن ڪميشن جا عملدار به بنا خوف ۽ خطري جي مڪاني چونڊن دوران پنهنجيون ذميوارين ادا ڪن. اجلاس کانپوءِ ميڊيا کي بريفنگ ڏيندي اليڪشن ڪميشن جي سيڪريٽري بابر فتح محمود يعقوب چيو ته پنجاب ۾ 960 پولنگ اسٽيشنز کي حساس قرار ڏنو ويو آهي، اين اي هڪ سئو 22 تي ننڍي چونڊ دوران مڪاني چونڊن جي موقعي تي هر پولنگ اسٽيشن تي فوج مقرر نٿي ڪري سگهجي. هن چيو ته پنجاب ۾ مڪاني چونڊن جي ٻي مرحلي دوران سڪيورٽي لاءِ هڪ لک پوليس اهلڪار مقرر ڪيا ويندا، پاڪ فوج رڳو حساس پولنگ اسٽيشن تي گشت ڪندي. اليڪشن ڪميشن جي سيڪريٽري چيو ته هٿيارن جي نمائش تي ڪيس داخل ڪيا ويندا، جڏهن ته جهيڙا روڪڻ لاءِ چونڊن ۾ ڪاميابي کانپوءِ ريليون ڪڍڻ تي پابندي لڳائي وئي آهي. هڪ سوال جي جواب ۾ اليڪشن ڪميشن جي سيڪريٽري چيو ته مڪاني چونڊن جي ٻي مرحلي لاءِ پولنگ شام ساڍي پنجين تائين جاري رهندي، آخري مرحلي لاءِ پولنگ جو وقت پنجين وڳي تائين ڪرڻ جي تجويز ملي آهي، جنهن تي غور ڪيو ويندو.

 

مون گارڊن ڪيس: سنڌهاءِ ڪورٽ پوليس کي ڪارروائي کان روڪي ڇڏيو، بلڊر جي گرفتاري جو حڪم

ڪراچي (اسٽاف رپورٽر)  سنڌ هاء ِڪورٽ مون گارڊن ڪيس بابت پوليس کي 18 نومبر تائين ڪارروائي ڪرڻ کان روڪيندي رهاڪن جي ڌر بڻجڻ واري درخواست به منظور ڪري ڇڏي. ذريعن مطابقسنڌ هائيڪورٽ موڳن گارڊن ڪيس جي رهاڪن کي وقتي رليف ڏئي ڇڏيو، عدالت مون گارڊن جي سمورين ڌرين کي 18 نوممبر تي گهرائيندي بلڊر کي گرفتار ڪرڻ ۽ آئي جيسنڌ کي رپورٽ پيش ڪرڻ جو حڪم ڏيندي ڪيس ۾ ملوث سڀني ادارن کي نوٽيس موڪلي ڇڏيو، جڏهن ته پوليس کي مون گارڊن ڪيس ۾ 18 نومبر تائين ڪارروائي روڪڻ جو حڪم ڏئي ڇڏيو. عدالت مون گارڊن  جي رهاڪن جي ڌر بڻجڻ بابت درخواست به منظور ڪري ڇڏي آهي. ٻئي پاسي سنڌ هائيڪورٽ پاران وقتي رليف جي خبر ملندي ئي عدالت ۾ موجود متاثرن جي مک تي خوشي جي لهر اچي وئي، جڏهن ته متاثرن احتجاج ختم ڪندي پنهنجي گهرن ڏانهن وڃڻ شروع ڪيو ۽ احتجاج ختم ٿيڻ کانپوءِ روڊ کي ٽريفڪ لاءِ کولي ويو ۽ پوليس به واپس هلي وئي. متاثرن جو چوڻ هو ته اسان سڀ گذريل 4 ڏينهن کان هتي ويٺا آهيون پر اڄ عدالت جي حڪم کان پوءِ سک جو ساهه کنيو آهي پر اڃان وڏيڪ خوشي تڏهن ٿيندي جڏهن عدالت 18 کانپوءِ به اسان جي حق ۾ فيصلو ڏئي. هوڏانهن پوليس پنهنجي ناڪامي ظاهر ڪندي چيو ته اسان بلڊرز کي گرفتار ڪرڻ ۾ ناڪام رهيا آهيون.

 

بلاول ڀٽو کي سياست بابت ڪهڙي ڄاڻ آهي؟،مون وٽ اچي ته کيس سيکاريان ته وڏو ليڊر ڪيئن ٿبو آهي:عمران خان

عمرڪوٽ(نمائندو) پي ٽي آءِ چيئرمين عمران خان چيو آهي ته بلاول ڀٽو کي سياست بابت ڪهڙي ڄاڻ آهي؟، هو مون وٽ اچي ته کيس  سيکاريان ته وڏو ليڊر ڪيئن ٿبو آهي، جمهوريت آهي ته بلاول کي اهڙي تقرير نه ڪرڻ کپي ها، جيڪڏهن بادشاهت آهي ته پوءِ مٿس معيار ناهي. عمرڪوٽ ۾ ڪارڪنن ۽ چونڊ اميدوارن کي خطاب ڪندي عمران خان جو چوڻ هو تهسنڌ جا ماڻهو غلامي واري زندگي گذاري رهيا آهن، جنهن مان کين ڇوٽڪارو ڏياريو ويندو. عمران خان چيو ته ظالم ماڻهو صاف شفاف چونڊون ٿيڻ نه ڏيندا، سنڌ جي ماڻهن کي ظلم جو خاتمون آڻڻون پوندو نه ته سندن ٻچڙا به غلامي واري زندگي گذاريندا. پي ٽي آءِ سربراهه چيو ته سنڌ جا وڏيرا سڀ کان وڌيڪ بزدل آهن، جيڪي پوليس جي پٺيان پٺيان هلن ٿا. عمران خان بلاول ڀٽو کي مخاطف ٿيندي چيو ته بلاول پٽ توهان کي سياست بابت ڪهڙي ڄاڻ آهي؟، مون وٽ اچو ته توهان کي سيکاريان ته وڏو ليڊر ڪيئن ٿبو آهي. عمران خان چيو ته جمهوريت آهي ته بلاول ڀٽو کي اهڙي تقرير نه ڪرڻ کپي ها، جي ڪڏهن ته بادشاهت آهي ته مٿس معيار ناهي. عمران وڌيڪ چيو ته ڪراچي ۾ به شوڪت خانم اسپتال قائم ڪئي ويندي ۽ 29 ڊسمبر تي پشاور ۾ شوڪت خانم ڪئنسر اسپتال جو  افتتاح ڪيو ويندو. عمران خان ڪارڪنن کي خطاب ڪرڻ بعد هيليڪاپٽر ذريعي ماتلي روانو ٿي ويو، جتي هو عوامي ميڙاڪي کي خطاب ڪندو.

 

اينٽي ڪرپشن جا نوبشاهه، ڏهرڪي، ٺارو شاهه ۽ ڀرياسٽي جي اسپتالن تي ڇاپا، رڪارڊ تحويل ۾ وٺي ڇڏيو

ڪراچي (نمائندن وٽان) اينٽي ڪرپشن جون سنڌ ۾ ڪاررايون جاري آهن،  نوبشاهه، ڏهرڪي، ٺارو شاهه ۽ ڀرياسٽي  جي اسپتالن تي ڇاپا هڻي رڪارڊ تحويل ۾ ورتو  آهي، جڏهن ته ايف آءِ اي ڪراچي جي اردو بازار ۾ ڪارروائي ڪري غير قانوني طور ڇپيل ڪتاب هٿ ڪري ٻن ڄڻن کي گرفتار ڪري ورتو آهي. اينٽي ڪرپشن ٽيم نوابشاهه جي پيپلز  ميڊيڪل يونورسٽي اسپتال تي ڇاپو هڻي رڪارڊ ۽ ڇنڊ ڇاڻ ڪئي ۽ عملي ۽ مريضن کان پڇا ڳاڇا ڪئي. اسسنٽنٽ ڊائريڪٽر علي اڪبر بروهي جو چوڻ هو ته هاءِ ڪورٽ جي حڪم  تي اسپتالن ۾ دوائن ۾ ٿيل ڪرپشن جي جاچ ڪئي وئي وڃي. ڏهرڪي جي تعلقي اسپتال تي اينٽي ڪرپشن ٽيم ڇاپو هڻي عملي کان پڇا ڳاڇا ڪرڻ بعد رڪارڊ تحويل ۾ وٺي ڇڏيو آهي. اينٽي ڪرپشن نوشهرو فيروز جي ٽيم سرڪل آفيسر اسد الله ڦلپوٽو جي اڳواڻي ۾ رورل هيٿ سينٽر ٺارو شاهه ۽ رورل هيلٿ سينٽر ڀرياسٽي تي ڇاپا هنيا. ڇاپن دوران رورل هيلٿ سينٽرز تي دوائون جي خريداري ۽ سينٽرز جي بجيٽ بابت رڪارڊ تحويل ۾ ورتو ويو آهي. سرڪل آفيسر اسد الله ڦلپوٽو جو چوڻ  هو ته ٺارو شاهه رورل هيلٿ سينٽر تي ڇاپي دوران لکين رپين جون مدي خارج دوائون هٿ ڪيون ويون آهن. هن چيو ته ڇاپن دوران مريضن دوائون نه ملڻ ۽ درست نموني علاج نه ٿيڻ جون شڪايتون ڪيون آهن، جنهن بابت جاچ ڪري ملوث عملدارن خلاف ڪارروائي ڪئي ويندي. ايف آءِ اي اردو بازار ۾ ڪارروائي دوران فزڪس ۽ ڪيمسٽري جا غير قانوني طور 1737 ڇپيل ڪتاب هٿ ڪري ٻن ڄڻن عظمت علي ۽ محمد عارف کي گرفتار ڪري ورتو آهي.

 

مڪاني چونڊون ووٽ ذريعي جاگيرداري نظام کي شڪست ڏيڻ جو بهتري موقعو آهي: جلال محمود شاهه

حيدرآباد (بيورو) سنڌ يونائيٽيڊ پارٽي جي چيئرمين ۽ سنڌ اسيمبلي جي اڳوڻي اسپيڪر سيد جلال محمود شاهه چيو آهي ته سنڌي عوام وٽ بهترين موقعو آهي ته هو مڪاني چونڊن ۾ وڏيرن ۽ جاگيردارن کي ووٽ نه ڏئي جاگيرداراڻي نظام کي شڪست ڏئي. پ پ هميشه شهيدن جي نالي تي ووٽ حاصل ڪري سنڌ دشمن فيصلا ڪيا آهن، مڪاني چونڊن جي پهرين مرحلي ۾ پ پ ڌانڌلي ڪري ڪاميابي حاصل ڪئي آهي. هن اهڙو اظهار کنڊوءَ ۾ ٿيل هڪ ڪارنر گڏجاڻي کي خطاب ڪندي ڪيو. ان موقعي تي سنڌ نيشنل تحريڪ جي چيئرمين اشرف نوناري، رسول بخش ٿيٻو، عبدالجبار ڀٽو، واحد بخش سنگراسي، فدا حسين خاصخيلي، منور خاصخيلي ۽ ٻين پڻ خطاب ڪيو. سيد جلال محمود شاهه الزام هنيو ته پيپلزپارٽي جي سنڌ دشمن پاليسي جي ڪري سنڌ جو عوام پ پ جو نالو ٻڌڻ لاءِ به تيار ناهي، مڪاني چونڊن جي ٻي مرحلي ۾ پ پ حڪومت ڌانڌلي ۽ خونريزي جو منصوبو جوڙيو آهي، جيڪڏهن 19 نومبر تي ٿيندڙ مڪاني چونڊن جي ٻي مرحلي ۾ خونريزي يا ڌانڌلي ٿي ته ان جي ذميوار سنڌ حڪومت هوندي، سنڌ ۾ اسان جو مقابلو پ پ جي جاگيردارن سان آهي، هن عوام کي اپيل ڪئي ته هو سنڌ ۾ سياسي تبديلي لاءِ قومپرست  اميدوارن کي ووٽ ڏئي ڪامياب ڪن.

 

ڊي آر او ٺٽي ۾ فوج جي مقرري جو مطالبو ڪري ڇڏيو

ڪراچي (نمائندن وٽان) ٺٽي ضلعي ۾ سياسي صورتحال چڱي ناهي، ڊسٽرڪٽ ريٽرنگ آفيسر  مڪاني چونڊن دوران ضلعي ۾ فوج مقرر ڪرڻ لاءِ اليڪشن ڪميشن ۽  اعليٰ اختيارين کي درخواست ڏئي ڇڏي، دادو ضلعي ۾ سڪيورٽي انتظام سنڀالڻ لاءِ رينجرز جا 126 اهلڪار پهچي ويا. ٺٽي ضلعي ۾ مڪاني چونڊن دوران فوج مقرر ڪرڻ لاءِ ڊي آر او پاران اليڪشن ڪميشن ۽ اعليٰ اختيارين کي درخواست اماڻي وئي آهي ۽ دادو ضلعي ۾ سڪيورٽي انتظام سنڀالڻ لاءِ رينجرز جا 126 اهلڪار پهچي ويا آهن. مڪاني چونڊن جي ٻئي مرحلي دوران ٺٽي ضلعي ۾ فوج مقرر ڪرڻ لاءِ ڊي آر او پاران اليڪشن ڪميشن ۽ اعليٰ اختيارين کي درخواست اماڻي وئي آهي. ڊي آر او نديم الدين ميمڻ جو چوڻ آهي  ته ضلعي اندر 306 پولنگ اسٽينشنز مان 70 حساس ۽ 171 پولنگ اسٽينشنز انتهائي حساس آهن، جتي فوج مقرر ڪرڻ لاءِ درخواست ڪئي وئي آهي. ايس ايس پي ٺٽو فدا حسين مستوئي جو چوڻ آهي ته حساس پولنگ اسٽيشنز وارن علائقن ۾ اڄ کان هٿيارن جي نمائش ڪندڙن خلاف ٽارگيٽڊ آپريشن شروع ڪيو ويو آهي. هوڏانهن دادو ضلعي ۾ مڪاني چونڊن جي ٻئي مرحلي دوران سڪيورٽي انتظام سنڀالڻ لاءِ رينجرز جا 126 اهلڪار پهچي ويا آهن.