تازيون خبرون

Daily Archives: November 13, 2015

دهشتگردي ۽ انتهاپسندي پاڪستان ۽ تاجڪستان جي گڏيل دشمن آهي: نواز شريف

اسلام آباد (بيورو) پاڪستان ۽ تاجڪستان ۾ ڏوهارين جي مٽا سٽا ۽ توانائي شعبي ۾ سهڪار وڌائڻ سميت مختلف معاهدن تي صحيحون ڪيون ويون آهن، وزيراعظم نوازشريف چيو آهي ته دهشتگرد ٻنهي ملڪن جا گڏيل دشمن آهن، تاجڪستان سينٽرل ايشياي ملڪن لاءِ گيٽ وي جي حيثيت رکي ٿو، مختلف شعبن ۾ سهڪار جاري رکيو ويندو. پاڪستان جي دوري تي پهتل تاجڪستان جو صدر امام علي رحمان  پي ايم هائوس پهتو ته وزيراعظم نواز شريف سندس آجيان ڪئي ۽ مهمان صدر کي گارڊ آف آرنر پڻ پيش ڪيو ويو. ان موقعي تي تاجڪستان جي صدر وزيراعظم نواز شريف سان ملاقات ڪئي، جنهن بعد ٻنهي ملڪن ۾ وفد جي سطح تي ڳالهيون ٿيون، جنهن ۾ پاڪستان جي نمائندگي وزيراعظم نواز شريف ۽ تاجڪستان پاران صدر امام علي رحمان سربراهي ڪري رهيو هو. ڳالهين دوران عوامي سطح تي رابطن کي وڌائڻ، توانائي، سلامتي، واپار ۽ مواصلاتي شعبن ۾ سهڪار کي مضبوط ڪرڻ تي غور ڪيو ويو، جڏهن ته دهشتگردي ۽ منشيات جي خاتمي سميت انساني اسمگلنگ روڪڻ لاءِ گڏيل سهڪار  تي به ويچاريو ويو. ٻنهي ملڪن ۾ ڏوهارين جي مٽا سٽا ۽ توانائي شعبن ۾ سهڪار وڌائڻ سميت مختلف منصوبن تي صحيحون پڻ ڪيون ويون. گڏجاڻي بعد تاجڪستان جي صدر سان گڏيل پريس ڪانفرنس ڪندي وزيراعظم نوازشريف چيو ته اسلام آباد جو دورو ڪرڻ تي هو تاجڪ صدر کي ڀليڪار ڪري ٿو، وفدن جي اچ وڄ سان ٻنهي ملڪن جا لاڳاپا وڌيڪ مضبوط ٿيندا. وزيراعظم نواز شريف چيو ته تاجڪستان ايشيائي ملڪن لاءِ گيٽ وي جي حيثيت رکي ٿو، تاجڪستان سان دفاع، ثقافت ۽ توانائي سميت مختلف شعبن ۾ سهڪار ڪيو ويندو. وزيراعظم چيو ته پاڪستان ۽ تاجڪستان ۾ ڪاسا هڪ هزار منصوبي سان زميني ۽ فضائي رابطا مضبوط ٿيندا، ٻنهي ملڪن ۾ ٿيل معاهدن تي عملدرآمد لاءِ بزنس ڪائونسل قائم ڪئي وئي آهي. نواز شريف وڌيڪ چيو ته دهشتگردي ۽ انتهاپسندي ٻنهي ملڪن جي گڏيل دشمن آهن، ان جي خاتمي لاءِ هڪٻئي سان سهڪار جاري رکيو ويندو. ان موقعي تي ڳالهائيندي تاجڪستان جي صدر امام علي رحمان چيو ته علائقائي سهڪار لاءِ وزيراعظم نواز شريف جي وزن جي حمايت ڪيون ٿا، دهشتگردي ۽ منشيات جي خاتمي لاءِ پاڪستان سان سهڪار ڪيو ويندو. تاجڪستان جي صدر چيو ته معاهدن تي صحيحن سان ٻنهي ملڪن جا لاڳاپا مضبوط ٿيندا ۽ ترقي جا نوان رستا کلندا.

 

انتها پسندي کي ڄاڻي واڻي هٿي ڏني پئي وڃي: بلاول ڀٽو زرداري

مٺي (اين اين آءِ) پاڪستان پيپلز پارٽي جي چيئرمين بلاول ڀٽو چيو آهي ته آمريت جا پوڄاري نٿا چاهين ته اسان متحد رهون پر اسان سڀني کي متحد ڪنداسين، وزيراعظم ٿر ۾ سکڻا واعدا ڪري هليو ويو ۽ پوئتي ڪنڌ ورائي نه ڏٺو جنهن کي پنهنجو نمائندو بڻائي ڇڏيو ويو اهو ٿر جو راون آهي، هندو ڪميونٽي جي خوشي ۾ شريڪ ٿيڻ آِيو آهيان، ٿر وارن لاءِ وڌيڪ بهتري آڻينداسين، هو خميس تي ٿر ۾ هندو برادري جي ڏڻ ديوالي جي تقريب کي خطاب ڪري رهيو هو، ان کان هن هندن سان ديوالي ملهائي، ديوال جو ڪيڪ ڪاٽيو ۽ نرٽ تي تلڪ به لڳايو، ٻارڙن کي شفقت جو هٿ رکيو، بلاول ڀٽو چيو ته انتهاپسندي کي ڄاڻي واڻيهوا ڏني پئي وڃي، پ پ ديوالي کي پنهنجو ڏڻ سمجهي ٿي ۽ سڀني کي گڏ کڻي هلندي، جيڪي نفرتون پکيڙين ٿا اهي اسان مان نه آهن، پ پ چئني صوبن جي زنجير آهي، مان ديوالي جي خوشين ۾ شريڪ ٿيڻ آيو آهيان، 19 نومبر تي تير تي ٺپو عوام کي آزادي ملندي، هن چيو ته وزيراعظم به هتي آيو هو ۽ هو واعدا ۽ اعلان ڪري هليو ويو، ميان صاحب ڪجهه ته پوئتي ڇڏي وڃو ها، اوهان جي واعدن ۽ اعلان جو ڇاٿيو اهي صرف اعلان ئي رهجي ويا، مون کي ۽ ٿر جي ماڻهن کي خبر آهي ته ميان صاحب اوهان ڪجهه نه ڪندا، هن چيو ته مون کان جيترو ٿي سگهيو پنهنجن ڀائرن ۽ ڀينرن لاءِ ڪوشش ڪندس، پ پ جي برابري جي ڳالهه ڪري ٿي، عوام جي ڳالهه ڪري ٿي، هي سڀ غريب ۽ عوام دشمن ماڻهو آهن، پ پ هارين، شاگردن ۽ عوام جي ڳالهه ڪري ٿي، هن چيو ته ٿر جي ماڻهن کي خبر آهي ته اوهان ڪجهه نه ڪندا، جڏهن اليڪشن ٿيندي آهي ته هڪ پوسٽر تي بيٽ ۽ شير کڏ ٿيندا آهن، پ پ خلاف اهي سڀ گڏجي ويندا آهن، هن چيو ته هي سڀ غريب دشمن آهن، سياستدان ديوالي ملهائڻ سنڌ آيا آهن، پر ووٽ کين نه ملندو، سنڌ ۾ ووٽ ڪنهن پير مير نه پر بينظير جو آهي، ان موقعي تي نثار کهڙو چيو ته بلاول ڀٽو زرداري ته پهرين سال ديوالي ملهائي سڀني کي راغب ڪيو ته ديوالي ڪئين ملهائي ويندي آهي، ڪراچي ۾ ديوالي جي تقريب ۾ وزيراعظم چيو ته رنگ وجهڻ آيو آهيان، ان کي خبر هئڻ گهرجي تي ديوالي تي رنگ نه پر ڏيئا ٻاريا ويندا آهن، هن چيو ته پ پ کي ڪير به ختم نٿو ڪري سگهي.

 

چين گوادر بندرگاهه ۾ دلچسپي رکي ٿو پر ان کي ڪيٽي بندر تي به ڌيان ڏيڻ گھرجي: وڏو وزير

ڪراچي (اسٽاف رپورٽر) وفاقي ۽ سنڌ حڪومت چين سان پاڪ چائنا ڪوريڊور تحت توانائي، ترقي ۽ سيڪيورٽي بابت چئن معاهدن تي صحيحون ڪري ڇڏيون، وڏي وزير سيد قائم علي شاهه چيو آهي ته چين گوادر بندرگاهه ۾ دلچسپي رکي ٿو پر ان کي ڪيٽي بندر تي به ڌيان ڏيڻ گھرجي..ڪراچي جي هڪ مقامي هوٽل ۾ ڪوٺايل تقريب ۾ وڏي وزير قائم علي شاهه، وفاقي وزير احسن اقبال، صوبائي وزير سيد مراد علي شاهه ۽ چيني عملدارن شرڪت ڪئي..تقريب کي خطاب ڪندي وڏي وزير سيد قائم علي شاهه چيو ته 46 ارب ڊالرن جي لاڳت واري اڪنامڪ ڪوريڊور سان ملڪ جي قسمت بدلجي ويندي، پر ان رٿا ۾ اهم شين کي شامل ڪرڻ تمام ضروريآهي..هن چيو ته ڪراچي کان لاهور تائين موٽر وي تعمير ڪيو پيو وڃي، پر حيدرآباد کان سکر تائين هاءِ جي حالت خراب آهي، ان جي به مرمت ڪئي وڃي.. قائم علي شاهه جو چوڻ هو ته ڪيٽي بندر تائين رسد لاءِ روڊن جي حالت کي به بهتر بڻايو وڃي..هن چيو ته چين گوادر بندرگاهه ۾ دلچسپي وٺي رهيو آهي، جنهن تي کين ڪو به اعتراض نه آهي، پر چين کي ڪيٽي بندر تي به ڌيان ڏيڻ گھرجي.

 

پاڪستان ۽ چين وچ ۾ ڀائراڻا لاڳاپا آهن، ٻئي ملڪ هميشه آزمائش جي گهڙي ۾ هڪٻئي جي اميدن تي پورا لٿا آهن:آرمي چيف

راولپنڊي (بيورو) آرمي چيف جنرل راحيل شريف چيو آهي ته پاڪستان ۽ چين وچ ۾ ڀائراڻا لاڳاپا آهن، ٻئي ملڪ هميشه آزمائش جي گهڙي ۾ هڪٻئي جي اميدن تي پورا لٿا آهن.  جي ايڇ ڪيو راولپنڊي ۾ آرمي چيف جنرلراحيل شريف سان چين جي اعليٰ سطحي فوجي وفد ملاقات ڪئي. آءِ ايس پي آر موجب، چين جي سينٽرل ملٽري ڪميشن جي قيادت جو 11 سالن ۾ پهريون دورو آهي، چيني فوجي وفد جي قيادت جنرل فين چينگ لونگ ڪئي. ملاقات دوران ٻنهي ملڪن وچ ۾ دفاعي سهڪار وڌائڻ ۽ سڪيورٽي معاملن تي ڳالهيون ڪيون ويون. ان موقعي تي ڳالهائيندي آرمي چيف جنرل راحيل شريف چيو ته چين ۽ پاڪستان جو سٺو پاڙيسري ۽ ويجهو دوست آهي،  ٻنهي ملڪن ۾ ڀائراڻا لاڳاپا آهن. آرمي چيف چيو ته پاڪستان ۽ چين وچ ۾ ڀائراڻا لاڳاپا آهن، ٻئي ملڪ هميشه آزمائش جي گهڙي ۾ هڪٻئي جي اميدن تي پورا لٿا آهن، ٻنهي ملڪن جا لاڳاپا مستقل ۾ وڌيڪ بهتر ٿيندا. چين جي فوجي وفد دهشتگردي جي خاتمي لاءِ پاڪستان جي ڪوششن جي ساراهه ڪندي چيو ته اقتصادي راهداري منصوبو ٻنهي ملڪ لاءِ فائديمند آهي.

 

اسان جمهوريت طرف وڃي رهيا آهيون، اهو وقت گذري ويو جڏهن مارشلا لڳندي هئي ۽ ڊڪٽيٽر اچي ويندو هو: خورشيد شاهه

ڪراچي (اسٽاف رپورٽر) قومي اسيمبلي ۾ مخالف ڌر جي اڳواڻي خورشيد  شاهه چيو آهي ته اسان جمهوريت طرف وڃي رهيا آهيون، اهو وقت گذري ويو، جڏهن ته مارشلا لڳندي هئي ۽ ڊڪٽيٽر اچي ويندو هو. ڪراچي ۾ عالمي ڪتاب ميلي جي افتتاح بعد ميڊيا سان ڳالهائندي خورشيد شاهه چيو ته  عمران خان کي ميچوئر ٿيڻ ۾ وقت لڳندو ۽ هن اڳ ۾ ئي چيو ته جيڪڏهن پاڻ به کٽي ويندو  ته چوندو مان ان کي نٿو مڃان. هن چيو ته تعليم تي ڌيان ڏيڻ جي ضرورت آهي، يونيورسٽين ۽ ڪاليجن ۾ گورنر، وڏي وزير ۽ وزيرن جي ڪوٽا ختم ٿيڻ سان غريب شاگردن کي فائدو پهتو آهي. خورشيد شاهه چيو ته اسان تعليم تي ڌيان نه ڏنو ان ڪري پڙهيل لکيل قوم سڏائي نٿا سگهون ۽ دنيا اسان جي لسٽريسي شرح کي به تسليم نٿي ڪري. هن چيو ته اسان وڏا ڪارناما ڪيون ٿا پر ڪتاب کي پنهنجو دشمن سمجهون ٿا پر ياد رکڻ گهرجي ته ماضي کي  ڏسڻ لاءِ ڪتاب اهم هوندو آهي. خورشيد شاهه چيو ته اليڪشن۾ ساڻن جيڪو ڪجهه ٿيو ان تي هوبه پريشان آهن. هن چيو ته پاڪستان دهشتگردي سميت ٻين مسئلن ۾ ڦاٿل آهي ۽ پارليامينٽ جي آزادي وارو ملڪ ئي ترقي يافته سڏبو آهي.  ذوالفقار مرزا  کي سڪيورٽي فراهم ڪرڻ بات پڇيل سوال جي جواب ۾خورشيد شاهه چيو ته اڳ ۾ هو پنهنجي ماڻهن جو  تحفظ ته ڪن.

 

سنڌ سرڪار تي عدالتي حڪمن جي ڀڃڪڙي جو الزام آهي، ڇو نه چيف سيڪريٽري خلاف توهين عدالت جي ڪارروائي هلائي وڃي؟: امير هاني مسلم

اسلام آباد (بيورو) سـُپريم ڪورٽ، سنڌ ۾ غير قانوني مقررين، ڀرتين ۽ ڊپوٽيشن بابت ڪيس ۾ سنڌ جي چيف سيڪريٽري ۽ مڪاني ادارن واري سيڪريٽري کي توهين عدالت جا شوڪاز نوٽيس جاري ڪري ڇڏيا آهن، جسٽس امير هاني مسلم ريمارڪس ۾ چيو آهي ته سنڌ سرڪار تي عدالتي حڪمن جي ڀڃڪڙي جو الزام آهي، ڇو نه چيف سيڪريٽري خلاف توهين عدالت جي ڪارروائي هلائي وڃي.؟ چيف جسٽس، جسٽس انور ظهير جمالي جي سربراهي ۾ سپريم ڪورٽ جي ٽـَي رڪني بينچ سنڌ پوليس سميت مختلف کاتن ۾ آفيسرز جي غير قانوني مقررين، ترقين ۽ ڊيپوٽيشن تي مقررين بابت مختلف درخواستن تي ٻڌڻي ڪئي. ٻڌڻيءَ دوران هڪ درخواستگذار محمود اختر نقوي موقف اختيار ڪيو ته ڪراچي بلڊنگ ڪنٽرول اٿارٽي جي آفيسر آغا مقصود کي ايل ڊي اي جو ڊائريڪٽر جنرل مقرر ڪيو ويو آهي، جيڪو عمل عدالتي حڪمن جي ڀڃڪڙي آهي. جسٽس امير هاني مسلم سوال ڪيو ته آغا مقصود کي ڪهڙي قانون تحت ايل ڊي اي ۾ مقرر ڪيو ويو آهي.؟ جسٽس امير هاني مسلم ريمارڪس ۾ چيو ته سنڌ حڪومت تي عدالتي حڪمن جي ڀڃڪڙين جو الزام آهي، ڇو نه چيف سيڪريٽري خلاف توهين عدالت جي ڪارروائي هلائي وڃي. عدالت، توهين عدالت درخواست تي سنڌ جي چيف سيڪريٽري ۽ مڪاني ادارن واري سيڪريٽري کي شوڪاز نوٽيس جاري ڪندي کين ذاتي طور تي پيش ٿيڻ جو حڪم ڏنو آهي. عدالت، اي آءِ جي اسٽيبلشمينٽ کي 4 پوليس آفيسرن نور الحق رند، علي اصغر شاهه، ارشاد سيهڙ ۽ منير کهڙو جا سروسز پروفائيل به پيش ڪرڻ جو حڪم ڏيندي ٻڌڻي ملتوي ڪري ڇڏي.

 

فوج کي ڪو به حق ناهي ته آئيني سول حڪومت تي تنقيد ڪري: اعتزاز احسن

اسلام آباد(بيورو) پاڪ فوج پاران سول معاملن بابت بيان تي سينيٽ ۾ سخت ردِ عمل، پيپلز پارٽي سينيٽرز فوج کي سخت تنقيد جو نشانو بڻايو. فرحت الله بابر جو چوڻ آهي ته ناڪارا گورننس سول ادارن، عدالت ۽ فوجي ادارن ۾ به آهي. اعتزاز احسن جو چوڻ هو ته فوج کي ڪو به حق ناهي ته آئيني سول حڪومت تي تنقيد ڪري. چئيرمين رضارباني جي صدارت هيٺ سينيٽاجلاس ۾ آئي ايس پي آر پاران جاري بيان تي سخت تنقيد ڪئي وئي. ناڪارا گورننس جي خاتمي لاءِ هڪ طريقيڪار موجود آهي، ڪمانڊرز ڪانفرنس ۾ جيڪو طريقيڪار اختيار ڪيو ويو اهو بلڪل غلط آهي، اهڙو بيان حڪومتي نااهلي ظاهر ڪري ٿو.اهو سوال فوج کان به پڇي سگهجي ٿو پر ڪڏهن به کلي عام ائين ناهي ٿيو. حڪومت کي ان جو جواب ڏيڻ گهرجي ها پر مون کي حڪومتي ترجمان بڻجڻو پوي پيو، تمام گهڻي اهم بحث هلي رهي آهي پر حڪومتي ميمبر هتي موجود ناهن، جنهن تي سينيٽر رضا رباني چيو ته انهي جي ڪري حڪومت کي ناڪارا گورننس جو طعنو ڏنو وڃي ٿو. حڪومت وٽ ڪو به گهرو وزير ناهي، نه ئي ڪو مستقل بچاءَ وارو وزير آهي، آئي ايس پي آر جو بيان گهڻو گهرو آهي، ان کي ڏسڻو پوندو.مخالف ڌر جي اڳواڻ اعتزاز احسن چيو ته حڪومتي ميمبر ٽي وي تي اچي اسان جي ڪردار ڪُشي ڪن ٿا، فوج کي ڪو به حق ناهي ته آئيني سول حڪومتي تي تنقيد ڪري. پختون ملي عوام پارٽي جي سينيٽر عثمان ڪاڪڙ چيو ته فوج گهرو ۽ ٻاهرين پاليسين ۾ لاڳيتو مداخلت ڪري رهي آهي. پاليسيون ترتيب ڏيڻ فوج جو نه پر چونڊيل عوامي نمائندن جو حق آهي، مسلم ليگ نه جي سينيٽر نيهال هاشمي چيو ته ڪجهه ادارا پنهنجي حدن کان ٻاهر هوندا آهن، پارليامينٽ هميشا کان ئي اهم رهي آهي. چئيرمين رضا رباني چيو ته حڪومت کي رڳو صلاح ڏئي سگهان ٿو ته سڀئي ادارا پنهنجن حدن ۾ رهن ۽ حڪومت پارليامينٽ جو ڪئيمرا اڳيان گڏيل اجلاس گهرائي، ممڪن ناهي ته سينيٽ ۾ معاملو آندو وڃي، مسئلن جو حل پارليامينٽ ۾ آهي. سينيٽر محسن لغاري چيو ته زلزلا هجن يا ٻوڏ، فوج کي گهرايو ويندو آهي، سول ادارا پنهنجا ڪم نٿا ڪن، اليڪشن جهڙي جمهوري عمل لاءِ فوج کي گهرايو وڃي ٿو، پر معاملي ۾ فوج کي گهليو ويندو آهي، ان ۾ ڪو به شڪ ناهي ته ناڪارا گورننس جو معاملو آئي ايس پي آر جي پريس رليز ۾ نه اچڻ گهرجي ها، مسلم ليگ ن جي سينيٽر پروفيسر ساجد مير چيو ته فوج کي سول حڪومت جو سپر وائيزر نه ٺاهڻ گهرجي ها.

 

سنڌ ۾ تبديلي آڻڻ جي سخت ضرورت آهي، ماڻهن کي آزاد ڪرايو ويندو: عمران خان

ڄامشورو (بيورو) تحريڪ انصاف جي چيئرمين عمران خان ڄامشوري ۾ پارٽي ڪئمپ جو دورو ڪيو آهي، عمران خان چيو آهي ته سنڌ ۾ تبديلي آڻڻ جي سخت ضرورت آهي، ماڻهن کي آزاد ڪرايو ويندو، سنڌ ۾ پوليس جي زور تي مڪاني چونڊ وڙهي پئي وڃي. عمران خان مڪاني چونڊن جي مهم جي سلسلي ۾ ٻن ڏينهن جي دوري تي سنڌ پهتو آهي، ڪراچي کان عمران خان ڄامشوري پهچي پارٽي جي ڪئمپ جو دورو ڪيو. عمران خان قاسم آباد ۾ به پي ٽي آءِ جي ڪئمپ جو دورو ڪندو ۽ ٽنڊوڄام ويجهو خاوند بخش جهيجو هائوس بعد مٺي روانو ٿيندو. عمران خان چيو آهي هت سنڌ ۾ ڏنڊي جي زور تي مڪاني چونڊ وڙهي پئي وڃي، سنڌ ۾ تبديلي جي ضرورت آهي، ماڻهن کي آزاد ڪرايو ويندو. هن وڌيڪ چيو ته مڪاني چونڊن ۾ ڪارڪنن کي چونڊ مهم نه پئي هلائڻ ڏني وڃي، ڪارڪنن کي حراسان ڪري مٿن ڪيس داخل ڪيا پيا وڃن. عمران خان چيو ته بدقسمتي آهي جو ڪراچي امير ترين شهر هئڻ باوجود صاف پاڻي کان به محروم آهي، بهتر گڊ گورننس عوام جو مطالبو آهي. هن چيو ته حڪومت عوام مٿان اضافي ٽيڪس لاڳو ڪيو، جنهن سان غربت ۾ اضافو ٿيندو، نئين پاڪستان ۾ غربت جي خاتمي لاءِ پاليسي جوڙي ويندي، نئين پاڪستان ۾ پوليس غير جانبدار ۽ غيرسياسي هوندي، جڏهن ته اسپتالن جو نظام بهتر ۽ شفاف هوندو جنهن ۾ مداخلت برادشت نه ڪئي ويندي. عمران خان چيو ته امن امان جي صورتحال ٺيڪ نه هئڻ سبب ملڪ بيروزگاري جي ور چڙهيل آهي، امن امان جي صورتحال بهتر هوندي ته ٻاهرين ملڪ جي سيڙپڪاري وڌندي جنهن سان بيروزگاري جو خاتمو ايندو.

 

دوستن ڪڏهن به منهنجو نالو غلط استعمال ناهي ڪيو: ٽيلر سوئفٽ

لاس اينجلس (شوبز نيوز) هالي ووڊ جي پاپ اسٽار ٽيلر سوئفٽ پنهنجي دوستن کي ڀيٽا پيش ڪندي چيو آهي ته سندس دوستن ڪڏهن به سندس نالي جو استعمال نه ڪيو آهي. ٽيلر سوئفٽ پنهنجي هڪ بيان ۾ چيو تهسندس

گهڻا ويجها دوست آهن، جن ۾ سيلينا گومز، گيگي حديد ۽ڪارلي ڪلاس اهم آهن پر انهن سڀني سماج ۾ جاءِ ٺاهڻ لاءِ ڪڏهن به کيس استعمال ناهي ڪيو ، هن چيو ته انهن ماڻهن سان هن پنهنجن پيشيور معاملن کي اڪلائڻ لاءِ مشورا ورتا ۽ سندن هدايتن تي عمل ڪيو. ٽيلر سوئفٽ چيو ته هوءَ دوستن جي راءِ جو بيحد احترام ڪندي آهي ۽ انهن ۾ اميد آهي ته جيڪڏهن انهن کي سندس ڪو گانو پسند نه ٿو اچي ته اهي کليل نموني ان تي تنقيد ڪري سگهن ٿا ۽ کيس ٻڌائي سگهن ٿا ته اهو گانو نه ڳاءِ. ياد رهي ته ٽيلر سوئفٽ ميوزڪ انڊسٽري جي سڀ کان وڌيڪ ڪمائيندڙ اداڪاره آهي.

 

24 ورهين جي شادي هڪ منٽ ۾ ختم، مسٽر بين کي زال طلاق ڏئي ڇڏي

لنڊن: مشهور برطانوي اداڪار روون ايٽڪنسن عرف مسٽر بين جي 24 سالن جي شادي ٽٽي وئي. مسٽر بين جي 60 سالن جي زال سنيترا سينٽرل لنڊن ۾ ضلعي عدالت ۾ رڳو 65 سيڪنڊن ۾ پنهنجي مڙس کي طلاق ڏئي ڇڏي، جڏهن ته ان قسم جي عدالت ۾ زال مڙس کي ٻيهر ٺاهه ڪرڻ يا سوچڻ لاءِ ڪيترن ئي مهينن جو وقت ڏنو وڃي ٿو پر سنيترا جج جي سامهونمسٽر بين جي غير موجودگي ۾ عدالت ۾ سوچڻ جو وقت نه وٺڻ جي درخواست ڏيندي طلاق لاءِ صحيح ڪرڻ ۾ هڪ منٽ لڳايو. روون ۽ سنيترا 1990ع ۾ شادي ڪئي هئي ۽ سندن شادي ختم ٿيڻ جو سبب روون کان عمر ۾ 32 سال ننڍي اداڪاره لوئيس فورڊ بڻي، جنهن جي روون سان گذريل ڏيڍ سال کان دوستي هلي رهي آهي. ذريعن مطابق عدالت سنيترا کي پنهنجي طلاق تي نظر ثاني ڪرڻ ۽ مالي معاملا طئي ڪرڻ لاءِ ڏيڍ مهيني جو وقت ڏنو آهي.