تازيون خبرون

Daily Archives: November 12, 2015

جيڪڏهن حڪومت ۽ فوج ۾ ويڇا وڌيا ته نقصان عوام کي ٿيندو: سراج الحق

اسلام آباد(بيورو) جماعت اسلامي جي امير سراج الحق چيو آهي ته ملڪ جا مسئلا رڳو آپريشن سان حل نه ٿيندا، ان لاءِ متبادل سياسي نظام به هجڻ گهرجي. هڪ نجي ٽي وي چينل سان ڳالهائيندي سراج الحق چيو ته فوج ڪورڪمانڊرزڪانفرنس ۾ ڪارڪردگي جي ڳالهه ڪئي، جيڪا صحيح آهي، سندس چوڻ هو ته جيڪڏهن حڪومت ۽ فوج ۾ ويڇا وڌيا ته نقصان عوام کي ٿيندو، هن چيو ته 68 سالن کانپوءِ به فاٽا ۾ انگريزن وارو نظام لاڳو آهي، سراج الحق اسپيڪر اياز صادق کي ووٽ ڏيڻ جي حوالي سان سوال جي جواب ۾ چيو ته تحريڪ انصاف اسپيڪر لاءِ اسان کان ووٽ گهريو ئي نه هو، جيڪڏهن گهريو وڃي ها ته ضرور ڏيون ها، جماعت اسلامي جي امير چيو ته اياز صادق پاڻ به ووٽ گهريو ۽ سندس ساٿين به رابطو ڪيو، مان اها ڳالهه تحريڪ انصاف جي اميدوار شفقت محمود کي به ٻڌائي هئي.

 

شادي شدهه عورت آهيان ڪنهن سان به مقابلو ناهي:ڪرينا ڪپور

ممبئي (شوبز نيوز) بالي ووڊ اداڪار ا ڪرينا ڪپور چيو آهي ته، هاڻي شادي شدهه عورت آهيان هاڻي ڪنهن سان به مقابلو ناهي،هڪ انٽرويو ۾ ڪرينا ڪپور جو چوڻ آهي ته، منهنجي دلچسپي رڳو نون تجربن ڪرڻ تي آهي، جنهن مان مزو وٺي رهي آهيان، ياد رهي ته بالي ووڊ اداڪارا ڪرينا ڪپور اڄڪلهه پنهنجي نئين فلم“اڙتا پنجاب” جي فلمبندي ڪرائڻ ۾ مصروف آهي،جڏهن ته فلم دلجيت دوسانجا ۾ ڪرينيا ڪپور مين ڪردار ڪري رهي آهي.

 

ٽوئٽر تي انوشڪا شرما جي پوئلڳن جو انگ 60 لک کان وڌي ويو

ممبئي (شوبز نيوز) بالي ووڊ اداڪارا انوشڪا شرما جي ٽوئٽر تي پوئلڳن جو انگ 60 لک کان وڌي ويو آهي، انوشڪا شرما جو چوڻ آهي ته چاهيندڙ کيس جيڪو پيار ڏين ٿا، ان تي هوءَ سندن ٿورائتي آهي، ڀارتي ميڊيا جي رپورٽن مطابق ٽوئٽر تي پوئلڳن جو انگ 60 لک کان وڌي وڃڻ تي انوشڪا شرما سوشل ميڊيِا جي ان ئي ويب سائٽ تي پنهنجي چاهيندڙن سان سڌيريت چيٽنگ ڪئي، جنهن دوران هن سندن پيار ۽ حمايت تي ٿورو مڃيو، هن پنهنجي پوئلڳن جو انگ وڌڻ تي خوشي اظهار ڪندي ان کي زبردست ڪوٺيو، واضح هجي ته انوشڪا جي ايندڙ فلم اي دل هي مشڪل آهي، جنهن ۾ رنبير ڪپور ۽ ايشوريا رائي بچن به ڪم ڪري رهيا آهن .

 

ناليواري فٽ بالر ڪرسٽيانو رونالڊو جي زندگي تي ٺهندڙ فلم“رونالڊو” جو لنڊن ۾ پريمئير

لنڊن (اسپورٽس نيوز) سپر اسٽار فٽ بالر ڪرسٽيانو رونالڊو جي زندگي تي ٺهندڙ دستاويزي فلم “رونالڊو” جي بهترين ۽ وڏي سطح تي پريمئير واري تقريب لنڊن ۾ ٿي، جنهن ۾مانچسٽر يونائيٽيڊ جي اڳوڻي مينيجر سر ايلڪس فرگوسن سوڌو فلم ۽ فٽ بال جي ناليوارين شخصيتن شڪت ڪئي. تفصيل مطابق لنڊن جي ڪي ليسٽر اسڪوائر ۾ ٿيندڙ تقريب ۾ رونالڊو جو پٽ، ماءُ حوزي مورينيو، ڪارلو انشلوٽي، ريڊمل فلڪا، گيري نيولي ۽ لوئس ساها به موجود هئا. جڏهن ته ناليوارين ٽي وي شخصيتن ميليني سائڪس تقريب کي اڃان وڌيڪ وڻندڙ بڻائي ڇڏيو. ريال ميڊرڊ جي 30 سالن جي رانديگر جي پريمئير جي تقريب ۾ شامل ٿيڻ تي  چاهيندڙن جي خوشي ڏسڻ وٽان هئي. اها فلم 14 مهينن ۾ پوري ٿي. تقريب جي دوران رونالڊو ماڻهن سان رلي ملي ويو.سندس چوڻ آهي ته  فلم جي پريئمير تي هو تمام گهڻو خوش آهي.

 

بلدياتي چونڊن جو ٻيو مرحلو ۽ سنڌ جي ساڃاهه وندن جو ڪردار: مظهر خاصخيلي

سنڌ جن حالتن مان گذري رهي آهي ان مٿان جيڪڏهن نظر ڦيرائبي ته خبر پئجي ويندي ته لطيف ۽ سچل جي امن پيار ڀائيچاري واري سنڌ اندر جنهن نفرتن جنم ورتو آهي اهي پيدا ڪرڻ ۾ ڪنهن جو هٿ آهي ماضي واري سنڌ جنهن ۾ مان ڏنو ويندو هو ۽ مان ورتو ويندو هو اڄ اها سنڌ ڇا ائين ڪجهه ڏينهن اندر نفرتن جو جيڪو روپ اختيار ڪري وئي آهي اهو سڀ ڪجهه پاڻ مرادو ٿيو آهي يا ان صورتحال کي پيدا ڪرائڻ ۾ ڪن ڌرين جو هٿ آهي ان پاسي سوچي سمجهي ڪجهه سوچڻ جي لاءِ جيڪڏهن ڪجهه گهڙيون هن هلندڙ نفسا نفسي واري دور ۾ ڪڍي صرف سنڌ ۽ ان جي اصل ڌرتي ڌڻين سنڌين جي باري ۾ سوچ ويچار ڪبو ته ڪيترائي سوال ذهن ۾ اڀري ايندا ۽ هر هڪ سوال ۾ وري ٻيا کوڙ سارا ڪيترائي سوال جنم وٺي سامهون نڪري ايندا جن جا جواب به خود هڪ سوال هوندا اهڙي صورتحال جي ڪري سنڌ جي هر سمجهه ۽ سوچ رکندڙ فرد کي اڳتي اٿي اچڻو پوندو ۽ هر ڪنهن کي پنهنجي پنهنجي حصي جو ڪم انتهائي ايمانداري ۽ سچائي سان ڪرڻو پوندو ڇو ته جنهن نموني سان 19 نومبر تي ٿيندڙ بلدياتي چونڊن جي ٻئي مرحلي واري اليڪشن جي حوالي سان ميڊيا تي جيڪي انتهائي خوفناڪ بيان ڪجهه پارٽين جي سربراهن جا سامهون اچي رهيا آهن انهن ۾ خاص ڪري پ پ کان بغاوت ڪري باغي بڻيل ذوالفقار مرزا جنهن انداز سان اها ڳالهه ڪري رهيو آهي ته سندس هڪ حامي کي جيڪڏهن ماريو ويو ته ان جي بدلي ۾ هو 10 پ پ وارن جا ماڻهو ماريندو اها ڳالهه ڪا ننڍڙي ناهي ان سان جيڪا سنڌ اندر باهه ٻرندي ۽ ان سان گهرو ويڙهه به شروع ٿي سگهي ٿي پوءِ ان کي ختم ڪير ڪرائيندو ۽ ٻريل باهه کي ڪير وسائيندو. ان جي ڪري اسان سنڌ جي ماڻهن کي هاڻي کان وٺي پنهنجيون اکيون کولي رکڻيون پونديون ۽ سمورن پ پ جي اڳواڻن ۽ انهن سان اليڪشن وڙهندڙ ٻين پارٽين جي سربراهن مسلم ليگ ف جي پير پاڳاري سميت ڪجهه خانداني اتحادي ارباب شيرازين، جتوئين ۽ ٻين اڳيان سنڌ جي ساڃاهه وند ڌرين کي اهو سوال رکڻ گهرجي ته اها جيڪي به اليڪشن جي سياست ڪري رهيا آهيو اوهان هن وقت تائين سنڌ ڌرتيءَ جي رهواسين کي ڪجهه به ناهي ڏنو ۽ نه ئي وٺي ڏئي سگهيا آهيو اوهان سدائين سنڌ مٿان هڪ ٻئي جي پويان حڪمراني ڪئي آهي اوهان ئي سنڌ جي موجوده حالتن ۽ مسئلن جا ذميوار آهيو پوءِ ڇو نه سنڌ جا اهي ڀڳل ٽٽل روڊ هجن يا وري اسپتالن ۾ مٿي جو سور کان پيٽ جي سور تائين نه ملندڙ هڪ روپئي واري ٽڪي هجي يا وري اهي اسڪول جن کي هن وقت تائين چوديواريون ناهن اچي سگهيون ۽ اتي پڙهندڙ شاگردن جي هنگڻ مٽڻ جي به جاءِ ناهي ٺهي سگهي هي جيڪا سنڌ تباهي جو منظر ڏيکاري رهي آهي ان کي ڪنهن ٻاهران اچي اهڙي حال ۾ ناهي پهچايو ان صورتحال جا ذميوار جتي پيپلزپارٽي جا چونڊيل ايم پي ايز وزير آهن ته اتي اوترائي فنڪشنل ليگ سان واسطو رکندڙ ايم پي ايز ۽ اڳواڻ آهن ۽ اهي خانداني ڀوتار جيڪي شيرازي، ارباب، مهر، جتوئي ۽ ٻيا ننڍن ننڍن ٽولن ۾ ورهايل هڪ ٻئي جي سياسي ڏنڊا پٽ ڪندڙ آهيو. اوهان ته هن وقت تائين سنڌ ڌرتيءَ جي ڪنهن به اجتماعي مسئلي تي ڪو به اهڙو احتجاج ناهي ڪيو ۽ نه ئي سنڌ کي ناڻي ۽ پاڻي سميت وسيلا وٺي ڏئي سگهيا آهيو پر اوهان جا پنهنجا انفرادري مفاد آهن جن کي حاصل ڪرڻ جي لاءِ اوهان سنڌ اندر اهڙيون حالتون پيدا ڪرائڻ جون ڪوششون ڪري رهيا آهيو ۽ اوهان جي پويان لڳي ٿو ته انهن ساڳين سگهارين ڌرين جو هٿ آهي خاص ڪري پنجاب سان واسطو رکندڙ انهن سرمائيداريءَ وارو ذهن رکندڙ پنجابي ڪامورن ۽ سياستدانن جو جيڪا سالن کان وٺي سنڌ جي وسيلن جي ٻنهي هٿن سان ڦرلٽ ڪندا ٿا اچن ۽ شايد اهو ئي سبب آهي ته 19 نومبر تي ٿيندڙ بلدياتي چونڊن جي ٻئي مرحلي کي ڪٿي رتوڇاڻ بڻائڻ جي لاءِ ڪو منصوبو نه جوڙيو ويو هجي الله تعاليٰ سمورين سياسي اڳواڻن کي سمجهه ۽ عقل ڏيندو ڪير ڪنهن جي ٻچڙن جو دشمن نه ٿيندو ۽ بلدياتي اليڪشن جنهن ۾ ٻنهي پاسن کان اميدوار بيٺل آهن انهن کي به اها ڳالهه ذهن ۾ رکڻ گهرجي ته هر يوسي يا ٽائون اندر بيهندڙ ڪائونسلر ۽ ضلعي ڪائونسل جي ميمبر کان وٺي چيئرمين ۽ وائيس چيئرمين تائين جيڪي هڪ ٻئي سان مقابلي ۾ بيٺل آهن انهن مان هڪڙو ڪامياب ٿيندو ۽ ٻيو هارائيندو ٿيڻ ته ائين گهرجي ته جيڪو اليڪشن ۾ هارائجي وڃي ٿو اهو کٽي ايندڙ کي مبارڪون ڏئي ۽ کيس چوي ته جيڪڏهن تون پنهنجي علائقي جي ماڻهن جا ڪم نه ڪرائيندي ته هو سندس سخت مخالفت ڪندو ۽ ماڻهن کي هن جي خلاف ٻاهر روڊ رستن تي وٺي ايندو پر اهو سڀ ڪجهه ته انهن ملڪن اندر ٿيندو آهي جتي ادارا جڙيل هوندا آهن هتي ته ڪو به اهڙو ادارو جڙيل ناهي جنهن جي مٿان آڱر نه کڻي سگهجي. سڀ ڪجهه تباهه لڳو پيو آهي شايد ان جي ڪري اسان وٽ هاڻي اها رسم بڻجي وئي آهي ته هر اليڪشن ۾ نتيجا اچڻ کان پهريان هارائيندڙ اميدوار دانهو شروع ڪري ڇڏيندو آهي ته هن سان ڌانڌلي ڪئي وئي آهي اڄ ڏينهن تائين ڪنهن به اها همٿ ڪري سچ ناهي ڳالهايو ته عوام انهن کي ووٽ ناهي ڏنو يا وري انهن پاران بيهاريل اميدوار نااهل ۽ ڪمزور هئا ايندڙ اليڪشن ۾ وڌيڪ محنت ڪندا ۽ عوام ۾ مقبوليت رکندڙ ڀلي ڪردار ۽ قول ۽ فعل جي پڪن اميدوارن کي ميدان ۾ ٻيهر لاهيندا اهو سڀ ڪجهه ڪنهن به سياسي پارٽي جو سربراهه همٿ ڪري چوڻ جي لاءِ تيار ناهي ۽ شايد ان جو به سڀ کان گهڻو سبب اهو آهي ته انهن سياسي پارٽين جي سربراهن کي به اهو سبق مليل آهي ته اوهان کي هينئن بيان ڏيڻو آهي يا وري انهن کي اها خبر آهي ته اسان وٽ جيڪو به اقتدار ۾ هوندو آهي ان جي مرضي آهي ته ڪنهن به اداري جي آفيسر کي ڪنهن وقت به استعمال ڪري انهن ادارن جي آفيسرن ۾ اها همت ۽ جرئت ناهي جو هو انهن پارٽين جي سربراهن يا وري چونڊيل نمائندن کي جواب ڏئي اهو چون ته هو ڪو به اهڙو غير قانوني يا غلط ڪم نه ڪندا جنهن سان سندن ساک ۽ ادارو بدنام ٿيندو هجي اهو سڀ ڪجهه انهن ملڪن اندر هلي ۽ ٿي رهيو آهي جتي انصاف ۽ عدل جي حڪمراني آهي اتي جو قانون هر مير، پير، ڀوتار ۽ وزير جي لاءِ اوترو برابر آهي جيترو ڪنهن مسڪين شهريءَ پوءِ اهو ڪهڙو به ڪاروبار دوڪان هلائيندو هجي يا وري ڪنهن به هوٽل تي پورهيو ڪري پنهنجو پيٽ گذر ڪندو هجي انهن سڀني لاءِ قانون برابر هوندو آهي ۽ ان قانون جي ڪير به ڀڃڪڙي ناهي ڪري سگهندو اهو ان جي ڪري انهن ملڪن اندر ٿئي ٿو ته اتان جا ادارا ايترا سگها ۽ مضبوط آهن پر پاڻ جنهن ملڪ اندر رهون ٿا اتي ته موراڳي سرعام خون ڪري ايندڙ جوابدار پئسا ڏيو ڪجهه ڏينهن اندر ٻاهر آزاد گهمندا ڦرندا رهن ٿا ۽ انهن ساڳين ماڻهن آڏو فخر ۽ ٽرڙائپ واري انداز سان ٻانهون لوڏي گهمندي چون ٿا ته هنن انهن جي پيءُ، ڀاءُ، ماروٽ، ماسات، ڦڦاٽ يا وري ڪنهن رشتيدار کي قتل ڪيو آهي هنن کيس ڇا ڪيو؟ ۽ ان جو عمل اهو ورجايو ويندو آهي ته جيڪي ماڻهو پنهنجي دل سان قانوني جنگ وڙهڻ جي ڪوشش ڪندا آهن ۽ قلم وسيلي گهڻو ڪجهه لکي ادارن ڏانهن ٽيليگرام ۽ درخواستون موڪليندا آهن پوءِ مجبور انهن هٿن ۾ اهي ماڻهو هٿيار کڻي انهن ظالمن کي اهڙي ئي ظلم جو جواب ڏيندا آهن جيڪو اڄڪلهه اسان ۽ اوهان جي آڏو ٿي ۽ هلي رهيو آهي اهو سڀ ڪجهه اهڙي ظالماڻي سماج جو نتيجو آهي ۽ ان جي ڪري ڪير ڪنهن کي جهلڻ پلڻ وارو ناهي ۽ اهو ئي سبب آهي ته اڄ اسان وٽ ٿيندڙ موجوده بلدياتي چونڊن دوران جيڪي 31 آڪٽوبر تي ٿي گذريون آهن انهن ۾ گهڻي ڀاڱي اهي ڏوهاري ماڻهو به چونڊجي آيا آهن جن تي ڪيترائي ڪيس داخل ٿيل آهن اهي صحيح آهن يا غلط انهن جو فيصلو ته هتان جي عدالتن کي ڪرڻ گهرجي پر اسان وٽ سالن جا سال ڪيس هلندا رهن اتي ماڻهو باغي نه ٿيندا ته ٻيو وري ڇا ٿيندا ۽ اهو وري ڪٿان جو انصاف آهي جيڪڏهن مان اها ڳالهه لکان ته پنهنجو پاڻ کي ساڃاهه وند ۽ سنڌ دوست سڏائيندڙ ڌريون وڏي فخر سان اها ڳالهه ڪن ته سنڌ اندر موجوده صورتحال پيدا ڪرڻ ۾ صرف پيپلزپارٽي جي ستن سالن واري حڪومت ذميوار آهي ته اهو ڪهڙو سچ چئبو ۽ اهي سنڌ جا ماڻهو انهن ڌرين مٿان ڪاوڙ ڪرڻ جو حق رکن ٿا جن جو خيال آهي ته 65 سالن اندر هن ملڪ اندر جنهن نموني سان سنڌ سميت موجوده ملڪ جي جيڪا حالت ڪئي وئي آهي ان جي ذميواري پيپلزپارٽي کان وڌيڪ انهن ڌرين مٿان لڳائي سگهجي ٿي جيڪي پردي پويان ويهي پنهنجو پاڻ کي سگهاري قوت سمجهڻ سان گڏ اهڙا عمل ورجائيندا آهن جو سنڌ مٿان ڪڏهن ڄام صادق جهڙو وزيراعليٰ ته ڪڏهن لياقت جتوئي ته وري ڪڏهن ارباب رحيم جهڙو وزير مڙهي ڪجهه مٺ جيترن خانداني وڏيرن کي گڏي ايم ڪيو ايم کي ڄڻ ته سنڌ جو مالڪ بڻائي باقي سنڌي ماڻهن کان اقتدار کسيو ويندو آهي اهو سڀ ڪجهه اڳوڻي آمر جنرل مشرف جي 11 سالن جي اقتدار دوران اوهان ۽ اسان ٿيندي ڏٺو ان جي لاءِ هن وقت سوچڻ ۽ سمجهڻ جي ڳالهه اها آهي ته جيڪي ڌريون پنهنجو پاڻ کي ساڃاهه وند سڏائن ۽ سمجهن ٿيون انهن مٿان سڀ کان وڌيڪ ذميواري عائد ٿئي ٿي ته هو پنهنجي آسپاس ۾ ٿيندڙ ٻئي مرحلي واري بلدياتي اليڪشن جيڪا 19 نومبر تي ٿي رهي آهي ان جي حوالي سان انهن بيٺل اميدوارن کي ٻئي هٿ ٻڌي اها هدايت ڪن ته اوهان ڀلي ڪنهن به پارٽيءَ پاران بيهاريل اميدوار هجو ۽ اوهان جو ڀلي ڇو نه پنهنجي يوسي يا تڪ ۾ برادري جو وڏو وووٽ هجي اوهان مهرباني ڪري اهڙو ماحول پيدا نه ڪيو جو اوهان هڪ ٻئي جي خون جا پياسي بڻجي وڃو اسان وٽ جتي انارڪي وارو ماحول جوڙيو ويو آهي اتي ته هاڻي اهو خوف به ٿئي ٿو ته ڪٿي سٻاجهي سنڌ اندر هٿ سان گهرو ويڙهه ته نه ٿي ڪرائي وڃي يا وري سنڌ جي اهڙي صورتحال بڻائي موجوده صوبائي سنڌ حڪومت سميت وفاقي حڪومت کي گهر ڀيڙو ته نه ڪيو ويندو ۽ اهي به چوٻول آهن ته بلدياتي اليڪشنن کان پوءِ ٿي سگهي ٿو ته موجوده ۽ وفاقي ۽ صوبائي حڪومتون گهر ڀيڙيون ٿي وڃن ڀلي ڪير به حڪمراني ڪري پر گهٽ ۾ گهٽ سنڌ ۽ سنڌين جي وجود سان هٿ چراند نه ڪئي وڃي ڇو ته ان سان جيڪا باهه ٻرندي پوءِ اها باهه وسائڻ انهن سگهارين ڌرين جي وس ۾ نه هوندو جيڪي هن مهل تائين اقتدار ڊاهڻ ۽ ٺاهڻ واري راند کيڏندا پيا اچن.

 

مظهر خاصخيلي   03003779059

 

1947ع کان پوءِ زيادتين جو نشانو بڻجندڙ سنڌ: اڪبر بخاري

دنيا جو گولو جڏهن اسين مختلف آفيسن جي ڀتين تي ڏسندا آهيون يا ٽيبل تي بيضوي نما ٺهيل رنگا رنگي شيشي جي ٺهيل ٽڪري کي ڏسندا آهيون ته دنيا اسان کي ڏسڻ ۾ تمام ننڍڙي ۽ محدود لڳندي آھي پر جڏهن اسان دنيا جي نقشي ۾ نظر ايندڙ ڪنهن هڪ به ڪنڊ جي جاچ ۽ انهي جي ريسرچ ڪندا سين ته اسان کي صديون گذري وينديون پر اسان انهي نظر ايندڙ زمين جي ٽڪري ۾ وڃي ڪري اتان جي ثقافت، رسمن، تهذيب، ماضي متعلق ڄاڻي نه سگهندا سين ڇاڪاڻ ته هيءُ دنيا خدا تعالي هزارين اڳ پنهنجي قدرت سان وجود ۾ آندي هئي دنيا جي جوڙ جڪ انهي جو وجود هن زمين تي تخليق ٿيل حيوانيات ۽ جيوت جي وجود بابت دنيا جا لکين سائسندان صرف پنهنجيون ٿيوريز ڏئي چڪا آھن پر يقين سان اڄ ڏينهن تائين ڪو به مفڪر يا سائنسدان دنيا جي ڪنهن به شيءِ جي مڪمل جاچ ڪري انهي چيپٽر کي بند نه ڪري سگهيو آھي بلڪي صديون گذرڻ باوجود به انهي تحقيقن تي جاچ هلندي رهي ٿي اهڙي طرح سان هن دنيا ۾ تعليم ۽ ريسرچ جو سلسلو جاري هلندو آيو آھي جيئن دنيا جي هر ڪنڊ ڪڙڇ ۾ مختلف علائقن جي مختلف حصن ۾ پنهنجي پنهنجي ثقافت، رسم، رواج، رهڻي ڪهڻي هلڻ چلڻ جو طور طريقو هلندو رهيو آھي ساڳئي طرح سنڌ امڙ جو وجود انهي جون رسمون رواج، ثقافت، تهذيب به هزارين سالن کان پنهنجي رهي آھي. پوءِ انهيءَ ۾ وقت جي گذرڻ سان تبديليون اينديون پيون اچن انهن مان ڪجهه ماضي جون شيون ختم ٿينديون پيون وڃن يا وري روز مره جي زندگي ۾ ڪافي نواڻ ايندي پئي اچي.

پاڪستان جي وجود کان اڳ ۾ هن سموري خطي کي هنڌ ۽ سنڌ جي نالي سان سڃاتو ويندو هو پر برٽش حڪومت جي خاتمي کان پوءِ هندستان کي الڳ ڪري هتي پاڪستان ملڪ جو نالو ڏئي ڪري اسلامي جمهوريه پاڪستان ٺاهيو ويو پاڪستاني جي آزادي هجي يا ملڪ ٺاهڻ جي تحريڪ انهي ۾ سنڌ امڙ جي هنج ۾ رهندڙ ماڻهن جو ڪردار ۽ قربانيون، تاريخدانن کان لڪيل نه آھن سنڌ امڙ کي ريگستان، گئس، کير ٿر جبل جون بهارون، سنڌو درياءَ، سڪ، سرسبزي سميت خدا جي ڏنل هر نعمت آھي سنڌ کي جديد دور ۾ پڙهيل لکيل طبقو دبئي جي ڀيٽ ڪري ”سنڌ دبئي آھي“ جا به مثال ڏيندو آھي. پر ايترو سارو سنڌ کي پنهنجون نعمتون هجڻ باوجود سنڌ ۾ رهندڙ 90 فيصد ماڻهو ھن وقت بکون ڪاٽي رهيا آھيون پاڪستان جي آزادي کان پوءِ سنڌ مان مهمان نوازي، پيار محبتون ختم ٿينديون ويون جيڪي هاڻي نفرت بيزاري جي آخري منزلن تي پهچي چڪيون آھن آزادي کان اڳ ۾ سنڌ ۾ رهندڙ هر ماڻهو سکيو خوشحال ۽ پيار محبت سان رهندو هو شايد اهو ئي سبب هو جو سنڌ ۾ هر قوم، نسل، مذهب، ذات پات جا قبيلا رهائش پذير آھن انهن کي سنڌ امڙ جي خوشبو ۾ ايترو ته مزو آيو جو هو هتي صدين کان آباد ٿي ويا آھن پاڪستان جي آزادي بعد پاڪستان جي جوڙ جڪ ۽ انهي جو قانون اهڙي ريت ٺاهيو ويو جنهن ۾ سنڌ کي برابر جا حق حاصل نه آھن پاڪستان کي ٺهندي ڪافي سارا سال گذري چڪا آھن پر ھن وقت تائين سنڌ کي پنهنجي حقن مان 50 فيصد به حق نه ڏنا ويا آھن ماضي ۾ سنڌ جنهن جي ڌرتي مان هر وقت پيار جي خوشبو دنيا جي ڪنڊ ڪڙڇ ڏانهن فضائن ذريعي گونجندي هئي اڄ انهي سموري سنڌ ۾ خودڪشن حملن جا ڌماڪا شروع ٿي ويا آھن پاڪستان جي آزادي کان پوءِ ھن وقت تائين جمهوريت جا ڪوڙا نعرا هڻي ڪري سنڌ کي سواءِ لٽڻ جي ٻيو ڪجهه به نه ڏنو ويو آھي سنڌ سان ٿيندڙ انهي ناانصافي ۾ سنڌ جا سياسي اڳواڻ ملوث جيڪي پاڪستان جي وجود کان ھن وقت تائين سياسي پارٽين تي قبضو ڪري سنڌ کي لٽڻ ۾ وفاقي حڪومتن جي مدد ڪري انهن جو ساٿ ڏئي رهيا آھن.

قرآن شريف جو پهريون ترجمو سنڌي ۾ ٿيڻ ثابت ڪري ٿو ته ماضي ۾ سنڌ جا ماڻهو ڪيترا هوشيار ۽ تعليمدان هوندا هئا پاڪستان جي آزادي کان پوءِ ھن وقت تائين سنڌ جي تعليم ڏينهون ڏينهن تباهه ٿيندي پئي وڃي سنڌ جا 80 سيڪڙو ماڻهو پنهنجي اولاد کي پيٽ پالڻ لاءِ دڪانن، ريڙهن، بسن، هوٽلن تي ڪمرائي پنهنجو پيٽ پالي رهيا آھن نه ڪي انهن کي پڙهائي رهيا آھن پاڪستان جي سموري سياسي بحث کي ڇڏي ڪري صرف سنڌ جي سياسي منظر نامي ڏانهن ڌيان ڪندا سين ته هن جمهوري سياست سنڌ کي سواءِ بک، دهشتگردي، مهنگائي، قتل وغارت جي ڪجهه به نه ڏنو آھي سنڌ جي پيرن، ميرن، وڏيرن ئي پاڪستان جي وجود کان پوءِ سنڌ کي لٽيو آھي جيڪو سلسلو ھن وقت تائين جاري آھي. پاڪستان جي ايوانن ۾ سنڌ جي حقن جا نعرا ڪنهن به سياسي پارٽي جو اڳواڻ نه هڻندو آھي ڇاڪاڻ ته هو ڪنهن وڏيري، رئيس، سردار،پير جو پٽ هوندو آھي جيڪو پنهنجي ابن ڏاڏن کان ايوانن جي ڪرسين تي قبضو ڪيون ويٺو آھي. پاڪستان جي وجود کان پوءِ ھن وقت تائين سنڌ جو هر کاتو ترقي بجاءِ تباهي ڏي وڌندو پيو وڃي امير سنڌ جا غريب ماڻهو بک بدحالي سبب ٻچن سميت واهن ۾ خودڪشيون ڪري رهيا آھن مور پکي جي حسين ٿر جي ماروئڙن جي هزارين جي تعداد ۾ معصوم ٻچڙا مري رهيا آھن سنڌ جا اسڪول تباهه ڪيا ويا آھن، سنڌ جا صحت جا ادارا تباهه ڪيا ويا آھن. سنڌ جي نوجوانن کي قلم بجاءِ هٿيار ڏنا ويا آھن اهي سڀ مهربانيون سنڌ صوبي تي ڪنهن ٻئي جون نه پر سنڌ جي سياسي اڳواڻن جون آھن جنهن ڪري اسين هن وقت ذلت ۽ رسوائي واري زندگي گذارڻ تي مجبور ٿي چڪا آھيون سنڌ جيڪا پاڪستان جي ٺهڻ کان اڳ ٻين ملڪن جي مدد ڪندي هئي پر اڄ اها سنڌ ايتري محتاج آھي جو انهي تي رهندڙ پکي، جانور توڙي جو انسان بک مري رهيا آھن سنڌ جون بهارو پاڪستان جي ٺهڻ سان هن وقت تائين ختم ٿينديون پيون اچن ڪٿي به اڄ مهمانوازي، اعتبار، محبت واري رسم بچي ئي ڪو نه آھي سنڌ جي ماڻهن کي هاڻي پنهنجي ايندڙ نسل ۽ پنهنجي سنڌ امڙ جي ثقافت، تهذيب، رسمن جي باري ۾ سوچڻو پوندو هاڻي ماڻهن کي سوچڻ گهرجي ته هو ڪهڙي راهه ڏانهن پاڻ ۽ پنهنجي اولاد کي ڌڪي رهيا آھن ڏينهون ڏينهن جيڪا بک بدحالي وڌندي پئي وڃي انهي جو ذميوار ڪير آھي آخر ڪهڙا عنصر آھن جيڪي سنڌ امڙ جي هنج ۾ رت جون نديون وهائي رهيا آھن هاڻي عوام کي سنڌ ۾ هلندڙ ڪوڙي جمهوريت جي نظام کي تبديل ڪري حقيقي جمهوريت تي هلڻو پوندو سنڌ ۾ جيڪي به سياسي پارٽيون آھن انهن ۾ سڀ وڏيرا، جاگيردار آھن انهن جو ساٿ ڇڏي ٻڌي ايڪو ڪري سنڌ جي تهذيب ثقافت پيار محبت کي بچائڻو پوندو نه ته اهو ڏينهن پري ناهي ته سنڌ به ڦاٽا، ڪرم ايجنسي، اتر وزيرستان جهڙن علائقن جيان مذهب پرستي، ذات پرستي، قوم پرستي جي باهه ۾ وڪوڙجي ويندي ۽ دنيا جي نقشي تي نظر ايندڙ سنڌ امڙ جو حصو دنيا کي ڏسندي ئي اجرت ۾ وجهي ڇڏيندو ته سنڌ پهريان ڪيئن هئي ۽ هاڻي ڪهڙي بڻجي چڪي آھي.

 

سنڌ ۾ چونڊن دوران پاڪ فوج جي مقرري ٿيندي…..؟

سنڌ سرڪار سنڌ ۾ مخالف پارٽين جي مڪاني چونڊن جي ٻئي مرحلي ۾ پاڪ فوج جي مقري کي رد ڪري ڇڏيو آهي، سنڌ جي  تعليم واري سينيئر  وزير نثار کهڙي چيو آهي ته سنڌ ۾ مڪاني چونڊن دوران  پولنگ اندر فوج ۽ رينجرز مقرر ڪرڻ جي ضرورت نه آهي،اي اين ايف اسپتال جي دوري بعد ميڊيا سان ڳالهائيندي نثار کهڙي جو چوڻ هو ته آر او مقرر ڪرڻ ۽ پولنگس کي نارمل ، حساس ۽ انتهائي حساس قرار ڏيڻ اليڪشن ڪميشن جي ذميواري آهي. پولنگ اسٽيشن اندر  ڊيوٽي فوج يا رينجرز جي نه پر پوليس جي هوندي آهي. حساس پولنگس بابت اليڪشن ڪميشن کي آگاهي ڏيڻ ضلعي انتظاميه جي ذميواري آهي. پرزائيڊنگ آفيسر ۽ اينجٽ کانسواءِ ڪنهن کي به پولنگ اندر وڃڻ جي اجازت نه هئڻ گهرجي. صوبائي وزير پ پ جي باغي اڳواڻ ڊاڪٽر ذوالفقار مرزا جي باري ۾ چيو ته لڳي ٿو ته  ذوالفقار مرزا خانگي فورس جوڙيو آهي ۽ جيڪو به فورس جوڙيندو ان خلاف قانوني ڪارروائي ڪئي ويندي.وفاق ذوالفقار مرزا کي پروٽوڪول ڏنو آهي ته ذميوار به اها هوندي.

مضبوط ۽ آزاد عدليه لاءِ بار جو ڪردار

گذريل ڏينهن چيف جسٽس آف پاڪستان جسٽس انور ظهير جمالي سپريم ڪورٽ ۾ سپريم ڪورٽ بار ايسوسئيشن جي نئين چونڊيل صدر علي ظفر جي قيادت ۾ نئين ڪابينا ۽ رٽائرڊ صدر فضل الحق جي قيادت ۾ رٽائرڊ عهديدارن کي خطاب ڪندي چيو آهي ته عوام کي انصاف فراهم ڪرڻ لاءِ بار جو تعاون اڻٽر آهي، ان کانسواءِ نظام نٿو هلي سگهي، مضبوط ۽ آزاد عدليه لاءِ مضبوط بار اڻٽر آهي، وڪيل غير ضروري هڙتالن کان پاسو ڪن ته جئين عوام جي اميدن تي پورا لهي سگهن، اها ڳالهه سٺي آهي جو نئين چونڊيل ڪابينا کي خطاب ڪري رهيو آهيان، بينچ ۽ بار وچ ۾ ويجهو تعلق انٽر آهي، ٻئي انصاف جي نظام جو لازمي حصو آهن، بينچ جي ذميواري خوف ۽ لالچ کانسواءِ قانون مطابق انصاف فراهم ڪرڻ آهي، بار جو فرض آهي ته هو عوام کي انصاف فراهم ڪرڻ ۾ بينچ سان تعاون ڪري، ٻئي ادارا گڏجي عوام جون اميدون ۽ قانوني ضرورتون پوريون ڪري سگهن ٿا ۽ ڪيسن جا فيصلا تيزي سان ٿي سگهن ٿا.