تازيون خبرون

Daily Archives: November 12, 2015

پاڪستان ۾ اقليتي برادري جي حقن جو مڪمل تحفظ ڪيو ويندو: نواز شريف

ڪراچي (اسٽاف رپورٽر) وزيراعظم حيدرآباد ۾ ڀڳت ڪنور رام ميڊيڪل ڪامپليڪس جوڙائڻ جو اعلان ڪري ڇڏيو، نواز شريف جو چوڻ آهي ته پاڪستان ۾ اقليتي برادري جي حقن جو مڪمل تحفظ ڪيو ويندو، جيڪڏهن ڪو مسلمان هندوءَ سان ظلم ڪندو ته هـُو مظلوم جو ساٿ ڏيندو، قوم ۾ اَيڪو پيدا ڪرڻ سندس مشن آهي. ڪراچي ۾ هندو برادري جي مذهبي ڏڻ ڏياري جي تقريب کي خطاب دوران وزيراعظمحيدرآباد ۾ ڀڳت ڪنور رام ميڊيڪل ڪامپليڪس جوڙائڻ جو اعلان ڪيو. نواز شريف چيو ته ڏياري جي ڏڻ واري تقريب ۾ شرڪت ڪري کيس تمام گهڻي خوشي ٿي آهي، ڏياري جي خوشين ۾ سڀني کي شريڪ ٿيڻ گهرجي. هن چيو ته پاڪستان ۾ اقليتي برادري جي حقن جو مڪمل تحفظ ڪيو ويندو، جيڪڏهن ڪو مسلمان هندوءَ سان ظلم ڪندو ته هـُو مظلوم جو ساٿ ڏيندو. نواز شريف چيو ته ملڪ اندر ماڻهن ۾ ايڪو ۽ اتحاد پيدا ڪرڻ سندس مشن آهي، دنيا جو ڪو به مذهب مظلوم تي ظلم جي اجازت نه ٿو ڏئي. ان کان اڳ وزيراعظم نواز شريف، هڪ ڏينهن جي دوري تي ڪراچي پهتو، جتي ايئرپورٽ تي وڏي وزير سيد قائم علي شاهه سندس آجيان ڪئي. وزيراعظم نواز شريف، انکانپوءِ پاڪ نيوي جي جنگي مشق سي اسپارڪ 2015ع جو معائنو ڪيو،جتي کيس تفصيلي بريفنگ پڻ ڏني وئي. نواز شريف اونهي سمنڊ ۾ پاڪ نيوي جي جنگي مشقن ۽ ٻين فوجن سان رابطن توڙي گڏيل آپريشنل صلاحيتن جو مشاهدو به ڪيو. ان موقعي تي وڏو وزير سيد قائم علي شاهه ۽ بچاءُ وارو وزير خواجه آصف پڻ موجود هئا.

 

بدين، سانگهڙ ۽ حافظ آباد ضلعن ۾ فوج مقرر ڪرڻ جو اعلان

اسلام آباد(بيورو) اليڪشن ڪميشن آف پاڪستان سنڌ ۽ پنجاب جي حڪومتن کي هدايت ڪئي آهي ته مڪاني چونڊن دوران امن امان کي برقرار رکڻ لاءِ پولنگ کان ٻه ڏينهن اڳ هٿيارن جا سمورا لائسنس معطل ڪيا وڃن. اهڙو فيصلو چيف اليڪشن ڪمشنر جسٽس(ر) سردار رضا خان جي صدارت هيٺ سنڌ ۽ پنجاب حڪومت جي عملدارن جي اجلاس دوران ڪيو ويو. اليڪشن ڪميشن جي سيڪريٽري بابر يعقوب فتح محمد اجلاس بعد ميڊيا سان ڳالهائيندي ٻڌايو ته پنجاب ۾ مڪاني چونڊن دوران پاڪ فوج جون 40 ڪمپنيون جڏهن ته سنڌ اندر 16 ڪمپنيون مقرر ڪيون وينديون. پولنگ واري ڏهاڙي پاڪ فوج ڪوئيڪ رسپانس فورس جي حيثيت ۾ ذميواريون نڀائيندي. هن ٻڌايو ته امن امان جي بنيادي ذميواري سول انتظاميا نڀائيندي جڏهن ته ضرورت پوڻ تي فوج کي طلب ڪري سگهجي ٿو. هن چيو ته اليڪشن ڪميشن حساس نوعيت هجڻ جي ڪري بدين، سانگهڙ ۽ حافظ آباد ۾ امن امان برقرار رکڻ لاءِ فوج مقرر ڪرڻ جو فيصلو ڪيو آهي. هن چيو ته پولنگ واري ڏينهن قلم 144 لاڳو هوندو ۽ پولنگ اسٽيشن جي 200 ميٽرن جي اندر ڪو به ميڙاڪو نه ڪري سگهبو. سمورن اميدوارن کي اليڪشن ڪميشن جي ضابطه اخلاق تي عمل جي پابندي ڪرڻ بابت حلف نامو ڏيڻو پوندو. سنڌ اندر حساس پولنگ اسٽيشنن ٻاهران رينجرس مقرر ڪئي ويندي. اليڪشن ڪميشن سنڌ ۽ پنجاب ۾ چونڊن کٽڻ بعد هوائي فائرنگ ڪرڻ ۽ ريليون ڪڍڻ تي پڻ پابندي لڳائي ڇڏي آهي.

 

پاڪ چين اقتصادي راهداري نه صرف پاڪستان پر خطي جي قسمت سنواري ڇڏيندي: صدر ممنون حسين

اسلام آباد (اين اين آءِ) صدر ممنون حسين چيو آهي ته پاڪستان لاءِ امڪانن جي هڪ شاندار دنيا منتظر آهي، اها ڳالهه صدر 6 سيپٽمبر 1965 جي جنگ جي 50 هين سالگره جي سلسلي ۾ هڪ تقريري مقابلي عنوان هڪ قوم هڪ منزل ۾ شاگردن کي خطاب ڪندي صدر چيو ته موجود حڪومت قومي معيشت جي استحڪام لاءِ ٺوس اپاءَ ڪيا آهن، هن چيو ته پاڪ چين اقتصادي راهدري نه رڳو پاڪستان پر خطي جي تقدير سنواري ڇڏيندي، هن رٿا جي مڪمل ٿيڻ کانپوءِ پاڪستان خطي جو سڀ کان اهم ملڪ طور اڀري ايندو، صدر چيو ته بلوچستان ۾ ترقي جي نئين دور جي شروعات ٿي چڪي آهي ۽ ان سلسلي ۾ 5 سئو ڪلوميٽر کان وڌيڪ رستا ٺهي مڪمل ٿي چڪا آهن، گوادر ڊيپ سي پورٽ ۽ گوادر ۾ انٽرنيشنل ايئرپورٽن جهڙن منصوبن جي شروعات ڪئي وئي آهي، ملڪ ۾ امن امان بهتر ٿي رهيو آهي، دهشتگردي جي خاتمي لاءِ آپريشن ضرب عضب ڪامياب سان جاري آهي جنهن جا بهتر نتيجا اڳيان اچي رهيا آهن، صدر شاگردن کي هدايت ڪئي ته اهي تعليم پرائڻ کانپوءِ ملڪ جي ترقي ۾ پنهنجو حصو وجهن، ان موقعي تي صدر 6 سيپٽمبر جي شهيدن کي خراج تحسين پيش ڪيو.

 

وفاق ذميوارين کي سٺي نموني سمجهي ٿو، صوبن سان بهتر لاڳاپا رکڻ چاهيون ٿا: پرويز رشيد

اسلام آباد (اين اين آءِ) وفاقي وزير پرويز رشيد چيو آهي ته صوبن سان بهتر لاڳاپا رکڻ چاهيون ٿا، وفاق پنهنجي ذميوارين کي چڱي ريت سمجهي ٿو ۽ پورو ڪري رهيو آهي، اهڙن خيالن جو اظهار هن گذريل ڏينهن خانگي ٽي وي سان ڳالهائيندي ڪيو،م هن چيو ته ڪي پي ڪي ۾ زلزلي دوران وزيراعظم نواز شريف پرويز خٽڪ سان ڀرپور تعاون ڪيو آهي ۽ اهڙي طرح سنڌ کي به مطمئين ڪيو ويندو، سمورن صوبن کي گڏ کڻي هلڻ چاهيون ٿا،هڪ سوال جي جواب ۾ هن چيو ته ڪراچي ۾ پاڻي جي منصوبي لاءِ وفاقي هن وقت تائين سنڌ کي 22 ارب رپيا ادا ڪري چڪو آهي، اسان سنڌ ڪراچي جون حالتون بهتر ڪرڻ لاءِ هر قرباني ڏينداسين، هن چيو ته صوبن وٽ پنهنجا وسيلا ڪافي آهن، پنجاب وانگر سنڌ حڪومت به پنهنجا وسيلا استعمال ڪري، پنجاب ۾ سمورا وسيلا صوبائي حڪومت جا آهن ۽ ڪنهن به منصوبي لاءِ وفاق پنجاب کي پيسو نه ڏنو آهي، سنڌ حڪومت کي پاڻي جي منصوبي لاءِ 22 ارب ڏنا ويا آهن ۽ گرين لائين منصوبو وفاق پاران سنڌ حڪومت لاءِ خاص تحفو آهي، ڪراچي آپريشن ۾ پاڪستان حڪومت رينجرز کي اتي مقرر ڪيو آهي ۽ ڪراچي آپريشن ۾ رينجرز جا سمورا خرچ وفاقي حڪومت برداشت ڪري رهي آهي.

 

فوج جو پڌرنامو حڪومت لاءِ لڪل لفظن ۾ واضح پيغام آهي: خورشيد شاهه

اسلام آباد (بيورو) قومي اسيمبلي ۾ ڪور ڪمانڊرز ڪانفرنس جي پڌرنامي جو ذڪر ٿيو آهي، اپوزيشن اڳواڻ خورشيد شاهه چيو آهي ته بهتر حڪمراني قائم ڪرڻ بابت پاڪ آرميءَ جو بيان حڪومت لاءِ وڏو اشارو آهي،جنهن کي سمجهڻ گهرجي،محمود خان اچڪزئي جو چوڻ آهي ته جيڪڏهن ٻئي شريف هڪ پيج تي هوندا ته هو سندن غيرمشروط حمايت ڪندو. قومي اسيمبليءَ جو اجلاس اسپيڪر اياز صادق جي صدارت هيٺ شروع ٿيو ته مخالف ڌر ڪورم پورو نه هئڻ جي نشاندهي ڪئي. ايوان ۾ ڳالهائيندي مخالف ڌر جي اڳواڻ سيد خورشيد شاهه چيو ته ڪور ڪمانڊرز ڪانفرنس ۾ بهتر حڪمراني قائم ڪرڻ لاءِ چيو ويو آهي. خورشيد شاهه چيو ته پاڪ آرميءَ جو بيان حڪمرانن لاءِ واضح اشارو آهي،جنهن کي سمجهڻ گهرجي،جڏهن ته جنرل راحيل شريف جي هدايت باوجود وزيراعظم ڪابينا ميمبرن کي بهتر حڪمرانيءَ لاءِ ڪجهه به ناهي چيو. مخالف ڌر جي اڳواڻ ان موقعي تي اڻپوري ڪورم جي نشاندهي پڻ ڪئي،جنهن تي اسپيڪر اجلاس جي ڪارروائي 10 منٽن لاءِ ملتوي ڪئي. هڪ موقعي تي شيخ رشيد به ڪورم جي نشاندهي ڪرڻ جي ڪوشش ڪئي پر اسپيڪر کيس روڪي ورتو، جنهن تي شيخ رشيد جو چوڻ هو ته هي ايوان اپوزيشن هلائي رهي آهي، حڪومت جي غير سنجيدگي مناسب ناهي. ڪورم پورو نه هئڻ تي پشتونخواهه ملي عوامي پارٽيءَ جي سربراهه محمود خان اچڪزئي ايوان مان علامتي واڪ آئوٽ ڪيو. ايوان ۾ ڳالهائيندي محمود خان اچڪزئي جو چوڻ هو ته ٻئي شريف هڪ پيج تي هوندا ته هو سندن غير مشروط حمايت ڪندو. هن چيو ته جيڪڏهن جمهوري حڪومت لاءِ خطرا پيدا ٿيندا ته هو سويلين شريف جي ڀر ۾ بيٺل رهندو، جنهن سان ئي آئين جي بالادستي ثابت ٿيندي. محمود خان اچڪزئي وڌيڪ چيو ته هو وزيرن ۽ ايم اي ايز کي عياشي ڪرڻ جي اجازت نه ڏيندا، هاڻي هو پاڻ ڪورم جي نشاندهي ڪندو. قومي اسيمبلي جي اجلاس دوران ميمبرن جي پڇيل سوالن جا گهرو وزير چوڌري نثار علي لکت ۾ جواب پيش ڪيا. گهرو وزارت پاران ايوان اندر لکت ۾ پيش ڪيل سوالن جا جواب ڏيندي ٻڌايو ويو ته اسلام آباد ۾ 19 دڪانن تي ڇاپن دوران حرام گوشت نه مليو،97 ڪلو صحت لاءِ هاڃيڪار گوشت هٿ آيو،26 هوٽل ۽ بيڪريون سيل ڪري 9 لک 40 هزار رپيا ڏنڊ پڻ مڙهيو ويو. جواب ۾ وڌيڪ چيو ويو ته دهشتگردي خلاف جنگ ۾ پاڪستان کي 118 ارب رپين کان وڌيڪ نقصان ٿي چڪو آهي. گهرو وزارت جي جواب ۾ چيو ويو ته سنڌ ۾ 16 ارب ۽ پنجاب ۾ 13 ارب رپين کان وڌيڪ نقصان ٿيو جڏهن ته خيبر پختون خواهه ۾ 15 ارب ۽ بلوچستان ۾ 4 ارب رپين کان وڌيڪ خرچ ٿيا.

 

بلاول ڀٽو جي ان انداز کي ڏسي اڄ عمران خان ۽ ميان نواز شريف کي ڏياري ياد آئي آهي: نثار کهڙو

ڪراچي (اي پي پي) سنڌ جي اطلاعات ۽ تعليم واري سينيئر وزير نثار احمد کهڙو چيو آهي ته ڏياري ملهائڻ جي شروعات گذريل سال پارٽي چيئرمين بلاول ڀٽو زرداريءَ نئون ديرو ۾ هندو ڪميونٽي سان گڏجي ملهائي شروع ڪئي. بلاول ڀٽو جي ان انداز کي ڏسي اڄ عمران خان ۽ ٻين اڳواڻن کي ڏياري ياد آئي آهي. ڏياري ملهائڻ جو ڪريڊٽ بلاول ڀٽو زرداريءَ ڏانهن وڃي ٿو ۽ اهو ڪريڊٽ بلاول ڀٽو کان ڪير به کسي نه ٿو سگهي. اهڙن خيالن جو اظهار هن اربع ڏينهن ڪراچيءَ جي مقامي هوٽل ۾ آر ايس يو پاران منعقد ڪيل سيمينار کانپوءِ ميڊيا سان ڳالهائيندي ڪيو. هن چيو ته سياست اکاڙي ۽ مڇي مارڪيٽ جو نالو نه آهي ۽ سنڌ ۾ ڪهڙي جماعت مقبول آهي اهو اسان کي ٻڌائڻ جي ضرورت ناهي. هن چيو ته 8 ضلعن جي مڪاني چونڊن ۾ اهو عوام ٻڌائي ڇڏيو آهي ته ڪير مقبول آهي. تقريب کي خطاب ڪندي هن چيو ته بايوميٽرڪ جي تحت هڪ لک 43 هزار استادن کي رجسٽرڊ ڪيو ويو آهي ۽ بايو ميٽرڪ رجسٽريشن جي ڪري استان جي حاضري ۽ اسڪولن جي خراب صورتحال جي خبر پئجي ويندي. هن چيو ته اسڪولن ۾ انرولمينٽ وڌائڻ لاءِ شاگردن کي هڪ ويلي جي ماني فراهم ڪرڻ تي غور ڪري رهيا آهيون جڏهن ته ساڍا 4 لک شاگردياڻين کي ڏيڍ ارب رپين جو وظيفو ڏنو ويو آهي جيڪو هر سال ڏنو ويندو. هن چيو ته هر بورڊ مان پوزيشن حاصل ڪندڙ شاگردن کي 10 هزار رپيا ڏنا ويندا. هن چيو ته خراب اسڪولن جي حالت کي بهتر ڪرڻ لاءِ 5 ارب رپين جي منصوبي سان هڪ سال اندر پهرين مرحلي ۾ 16 سئو اسڪولن ۾ سڀئي سهولتون فراهم ڪيون وينديون.

 

سنڌ حڪومت پاڪستان اسٽيل ملز زمين جي ليز ختم ڪرڻ جي ڌمڪي ڏئي ڇڏي

اسلام آباد (بيورو) وفاقي حڪومت پاڪستان اسٽيل ملز جي زمين سوئي سدرن گئس کي ڏيڻ تي غور شروع ڪري ڏنو آهي، جنهن تي سنڌ حڪومت پاڪستان اسٽيل وٺڻ کان انڪار ڪري زمين جي ليز ختم ڪرڻ جي ڌمڪي ڏئي ڇڏي آهي. سينيٽر تاج حيدر جو چوڻ آهي ته وفاق پاڪستان اسٽيل جي رهتن بدلي زمين سوئي سدرن کي ڏيڻ ٿي چاهي، سنڌ حڪومت زمين پاڪستان اسٽِل  لاءِ ڏني هئي، پلاٽ ٺاهي وڪڻڻ لاءِ نه ڏني هئي. تاج حيدر چيو ته وفاقي حڪومت پاڪستان اسٽيل جي زمين سوئي سدرن گئس ڪمپني کي ڏئي رهي آهي.هن چيو ته ڪاغذ جي هڪ ٽڪڙي تي پاڪستان اسٽيل نٿي وٺي سگهي، وفاقي حڪومت پاڪستان اسٽيل جي آڇ سان گڏ شرطن جي

وضاحت به ڪري. سنڌ حڪومت شرطون طئي ڪرڻ بنا پاڪستان اسٽيل نٿي وٺي سگهي.

 

پرڏيهي پاليسي، نيشنل ايڪشن پلان تي بريفنگ لاءِ ان ڪئميرا اجلاس سڏايو وڃي: رضا رباني

اسلام آباد (بيورو) چيئرمين سينيٽ ميان رضا رباني چيو آهي ته پرڏيهي پاليسي ۽ نيشنل ايڪشن پلان تي تفصيلي بريفنگ ۽ بحث لاءِ سينيٽ يا پارليمان جو ان ڪئميرا اجلاس سڏايو وڃي اربع تي سينيٽ اجلاس دوران ميان رضا رباني چيو ته پنهنجي عهدي جي حلف کي نظر ۾ رکندي مان حڪومت کي تجويز ڏيڻ چاهيان ٿو ته سينيٽ پارليمان جو ان ڪئميرا سيشن گهرائي ملڪ جي پرڏيهي پاليسي ۽ نيشنل ايڪشن پلان تي تفصيلي بريفنگ ۽ بحث ڪيو وڃي پارليمان انهيءَ لاءِ هوندو آهي ته هي مناسب هوندو جيڪڏهن حڪومت ان تي غور ڪري مان حڪومت کي هدايت نٿو ڏيئي سگهان تجويز ڌيئي سگهان ٿو اميد آهي ته حڪومت ان تي غور ڪندي پرڏيهي صلاحڪار وزيراعظم کي هي تجويز پهچائي سوالن جي وقفي دوران نيڪٽا ۾ مقررين بابت گهرو مملڪتي وزير جي جواب تي چيئرمين سينيٽ چيو ته بيروڪريسي جو ان حوالي سان رويو نامناسب آهي تاڪه هي رويو نيشنل ايڪشن پلان تي عملدرامد جي حوالي سان پارليمينٽ جي ڪوششن کي ضايع ڪري رهيو آهي چيئرمين سينيٽ ديواني جي تهوار تي هندو برادري کي واڌايون ڏنيون آهن ميان رضا رباني چيو ته هندو برادري اڄ ديوالي جو تهوار ملهائي رهي آهي هن موقعي تي انهن کي مبارڪون ڏيان ٿو هن اميد ظاهر ڪئي ته ملڪ اندر بين المذاهب هم آهن تي کي وڌيڪ هٿي ڏني ويندي.

 

نوازشريف ٻڌائي نئين خيبرپختونخوا ۾ سندس ڪيترو حصو آهي: عمران خان

پشاور(م.ڊ) ڳڙهي چندر ۾ سونامي بلين ٽري براجيڪٽ جي چڪاس کانپوءِ ميڊيا سان ڳالهائيندي عمران خان چيو ته سونامي بلين ٽري پاڪستان جي مستقبل لاءِ گهڻي اهم رٿا آهي. تاريخ ۾ اهڙي ڪوشش پهرين ڪڏهن ناهي ڪئي وئي. پنجن سالن ۾ هڪ ارب وڻ لڳائڻ جي رٿا پوري ڪنداسين. سندس چوڻ هو ته انهن وڻن کي لڳائڻ سان جهانگا مانگا کان ڏهه سيڪڙوٻيڻو وڏو جهنگ اڀرندو ۽ 2017ع تائين پنهنجو اهو ٽارگيٽ پورو ڪندو. سندس چوڻ هو ته ن ليگ ۽ پي ٽي آئي ۾ اهو ئي فرق آهي  ته هو پراجيڪٽ ٺاهي رهي آهي ۽ اسان ادارا ٺاهي رهيا آهيون. ن ليگ سريا ۽ سيمنٽ تي سيڙپڪاري ڪري رهي آهي ۽ اسان هارين تي سيڙپڪاري ڪري رهيا آهيون. عمران خان جو چوڻ هو ته لڳي ٿو ته اياز صادق جي وڪيٽ ٽيون ڀيرو به ڪرڻ واري آهي. شفاف چونڊون نه ٿين ته ماڻهن جا حق غضب ٿيندا آهن.

 

منهنجي زبان کلي ته نثار کهڙو منهن ڏيکارڻ جي لائق به نه رهندو: ڊاڪٽر ذوالفقار مرزا

ڪراچي (اسٽاف رپورٽر) سنڌ جي اڳوڻي گهرو وزير ذوالفقار مرزا نثار کهڙو کي وارننگ ڏيندي چيو ته جيڪڏهن بيان بازي بند نه ڪئي ته هني جو پول کلي ويندو ذوالفقار مرزا چيو ته جيڪڏهن منهنجي زبان کلي ته پوءِ نثار کهڙو ڪنهن کي منهن ڏيکارڻ جي لائق نه رهندو هو نوڪري پڪي ڪرائڻ لاءِ منهنجي خلاف ڳالهائي رهيو آهي هن چيو ته نثار کهڙو فريال ٽالپر لاءِ جيڪي لفظ ڳالهايا جيڪڏهن وڊيو منظر تي آئي ته ڪٿان جو نه رهندو هن سخت لفظن ۾ وارننگ ڏيندي چيو ته ان جي خلاف ڳالهائڻ بند ڪيو وڇي جيڪڏهن ايئن نه ٿيو ته هو پنهنجي زبان کوليندو ۽ نثار کهڙو وضاحتون پيش ڪري ٿڪجي پوندو.