تازيون خبرون

Daily Archives: November 11, 2015

2018 ۾بجلي ۽ گيس جي کوٽ ختم ٿي ويندي، ڌرڻن سبب ترقياتي منصوبن تي دير ٿي: نواز شريف

بلوڪي (مانيٽرنگ ڊيسڪ) وزيراعظم نوازشريف چيو آهي ته 2018 ۾ ملڪ اندر بجلي ۽ گيس جي کوٽ ختم ٿي ويندي، ملڪ جي تاريخ ۾ پهريون ڀيرو توانائي جي ٽن منصوبن تي 110 ارب رپين جي بچت ٿي آهي، ڌرڻن سبب ترقياتي منصوبن تي دير ٿي آهي. اهڙن خيالن جو اظهار وزير اعظم ميان نواز شريف بلوڪي ۾ 1223 ميگا واٽ بجلي جي پيدوار واري منصوبي جو پيڙهه جو پٿر رکڻ بعد تقريب کيخطاب ڪندي ڪيو. وزيراعظم نوازشريف چيو ته وفاق ۽ پنجاب هڪ منصوبي تي گڏجي ڪم ڪري رهيا آهن. هن چيو ته گيس مان بجلي جي پيداوار لاءِ ٽن منصوبن جي تعمير تي 300 ارب رپيا رکيا ويا هئا پر شفافيت سبب 110 ارب رپين جي بچت ٿي آهي. وزيراعظم چيو ته پاڪستان ترقي جي رستي تي هلي پيو آهي، ڌرڻن جي ڪري ترقياتي منصوبن ۾ دير ٿي آهي، ڌرڻن جي سياست ڪندڙن جو محاسبو ٿيڻ گهرجي. ميان نواز شريف وڌيڪ چيو ته اقتصادي راهداري سميت ڪيترن ئي منصوبن تي ڪم هلي رهيو آهي، پرڏيهي ادارن پاڪستان جي معاشي ترقي کي ساراهيو آهي. وزير اعظم چيو ته پاڪستان کي آبي ذخيرن جي ضرورت آهي، ديامرڀاشا ڊيم سان آبادگارن کي مفت پاڻي ۽ بجلي فراهم ڪنداسي، اهو تربيلا ۽ منگلا ڊيم کان به وڏو هوندو. هن وڌيڪ چيو ته ڪي پي ڪي ۾ نئون پاڪستان اسان ٺاهي رهيا آهيون، ڪراچي ۾ کان موٽر وي جي تعمير شروع ڪئي آهي، موٽر وي ڪوئيٽا ۽ پشاور کان اڳتي افغانستان تائين کڻي وينداسين.

 

پولنگ اسٽيشن اندر فوج جي مقرري ووٽرکي حراسا ڪرڻ برابر قرار، سنڌ سرڪار مطالبو رد ڪري ڇڏيو

ڪراچي (اسٽاف رپورٽر) سنڌ جي  تعليم واري سينيئر  وزير نثار کهڙي چيو آهي ته سنڌ ۾ مڪاني چونڊن دوران  پولنگ اندر فوج ۽ رينجرز مقرر ڪرڻ جي ضرورت نه آهي، لڳي ٿو ته ذوالفقار  مرزا خانگي فورس ٺاهيو آهي ۽ جيڪو  به فورس ٺاهيندو ان خلاف قانوني ڪارروائي ٿيندي. ڪراچي جي ماڙيپور واري علائقي ۾ اي اين ايف اسپتال جي دوري بعد ميڊيا سان ڳالهائيندي نثار کهڙي چيو ته آر او مقرر ڪرڻ ۽ پولنگس کي نارمل ، حساس ۽ انتهائي حساس قرار ڏيڻ اليڪشن ڪميشن جي ذميواري آهي. هڪ سوال جي جواب ۾ نثار کهڙي چيو ته پولنگ اسٽيشن اندر  ڊيوٽي فوج يا رينجرز جي نه پر پوليس جي هوندي آهي. نثار کهڙي چيو ته حساس پولنگس بابت اليڪشن ڪميشن کي آگاهي ڏيڻ ضلعي انتظاميه جي ذميواري آهي. تعليم واري وزير چيو ته پرزائيڊنگ آفيسر ۽ اينجٽ کانسواءِ ڪنهن کي به پولنگ اندر وڃڻ جي اجازت نه هئڻ گهرجي. نثار کهڙي چيو ته  لڳي ٿو ته  ذوالفقار مرزا خانگي فورس جوڙيو آهي ۽ جيڪو به فورس جوڙيندو ان خلاف قانوني ڪارروائي ڪئي ويندي.صوبائي وزير چيو ته  وفاق ذوالفقار مرزا کي پروٽوڪول ڏنو آهي ته ذميوار به اها هوندي.

 

جي آءِ ٽي رپورٽس جلد مڪمل ڪرڻ جي هدايت، دهشتگردي خلاف ويڙهه ۾ پوري قوم جي حمايت حاصل آهي:آرمي چيف

اسلام آباد (بيورو) آرمي چيف جنرل راحيل شريف جي صدارت هيٺ ٿيندڙ ڪور ڪمانڊر ڪانفرنس ختم، ڪانفرنس ۾ آپريشن  ضرب عضب ۽ نيشنل ايڪشن پلان  سوڌو ڪيترن ئي اهم معاملن تي گور ويچار ڪيو ويو،اجلاس ۾ ملڪ ۾ هلندڙ آپريشنن کي تيز ڪرڻ جو اصولي فيصلو ڪيو ويو،آرمي چيف جنرل راحيل شريف آپريشنن ۾ ڪاميابي تي خوشي جو اظهار به ڪيو، ڪانفرنس ۾ ملڪ جي اندروني سيڪيورٽي جي معاملن تي به غور ويچار ڪيو ويو، اجلاس ۾ آئي ايس پي آر پاران جاري ڪيل بيان مطابق، اجلاس ۾ خطاب ڪندي آرمي چيف جو چوڻ هو ته هشتگردي جي خلاف ويڙهه ۾  پوري قوم جي حمايت حاصل آهي ،قوم جي تعاون سان دهشتگردي جي خاطمي طرف وڌي رهيا آهيون، سندس چوڻ هو ته بهتر نتيجن لاءِ قوم ۾ اتحاد ۽ سُٺي حڪمراني جي ضرورت آهي، ملڪ ۾ امن امان جي لاءِ  وڏي عرصي لاءِ پاليسيون ٺاهڻ گهرجن،آرمي چيف جو چوڻ هو ته “جي آئي ٽي ” رپروٽون تڪڙيون ۽ ترجيحي بنيادن تي مڪمل ڪيون وڃن، جيڪڏهن انهن کي پورو نه ڪيو ويو ته ملڪ ۾ هلندڙ آپريشنون متاثر ٿينديون، اجلاس ۾ آرمي چيف جي آمريڪا جي دوري دوران پاڪستان جي موقف تي به غور ڪيو ويو.آرمي چيف اجلاس ۾ شريڪ اڳواڻن کي سعودي عرب جي دوري بابت اعتماد ۾ ورتو، اپريشن سبب بي گهر ٿيل قبائيلين کي پنهنجن گهرن ڏانهن واپسي تي به ڳالهايو ويو.

 

عوامي انصاف فراهم ڪرڻ لاءِ بار جو سهڪار اڻٽر آهي، ان کانسواءِ نظام نٿو هلي سگهي: چيف جسٽس

اسلام آباد (اين اين آءِ) چيف جسٽس آف پاڪستان جسٽس انور ظهير جمالي چيو آهي ته عوام کي انصاف فراهم ڪرڻ لاءِ بار جو تعاون اڻٽر آهي، ان کانسواءِ نظام نٿو هلي سگهي، مضبوط ۽ آزاد عدليه لاءِ مضبوط بار اڻٽر آهي،وڪيل غير ضروري هڙتالن کان پاسو ڪن ته جئين عوام جي اميدن تي پورا لهي سگهن، هو اڱاري تي سپريم ڪورٽ ۾ سپريم ڪورٽ بار ايسوسئيشن جي نئين چونڊيل صدر علي ظفر جي قيادت ۾ نئين ڪابينا ۽ رٽائرڊ صدر فضل الحق جي قيادت ۾ رٽائرڊ عهديدارن کي خطاب ڪري رهيو هو، ان موقعي تي جسٽس ثاقب نثار موجود هو، چيف جسٽس چيو ته اها ڳالهه سٺي آهي جو نئين چونڊيل ڪابينا کي خطاب ڪري رهيو آهيان، بينچ ۽ بار وچ ۾ ويجهو تعلق انٽر آهي، ٻئي انصاف جي نظام جو لازمي حصو آهن، بينچ جي ذميواري خوف ۽ لالچ کانسواءِ قانون مطابق انصاف فراهم ڪرڻ آهي، بار جو فرض آهي ته هو عوام کي انصاف فراهم ڪرڻ ۾ بينچ سان تعاون ڪري، ٻئي ادارا گڏجي عوام جون اميدون ۽ قانوني ضرورتون پوريون ڪري سگهن ٿا ۽ ڪيسن جا فيصلا تيزي سان ٿي سگهن ٿا. بار جي رٽائرڊ صدر فضل الحق عباسي چيف جسٽس جي انصاف جي فراهمي لاءِ ڪردار کي ساراهيو، نئين چونڊيل صدر علي ظفر چيو ته ان جي اڳواڻي بار مڪمل تعاون ڪندي ته جئين اداري کي مضبوط بڻائي سگهجي، وفد چيف جسٽس ۽ سينيئر جج ميان ثاقب نثار کي شيلڊ پيش ڪيون، چيف جسٽس ان ملاقات تي بار جو شڪريو ادا ڪيو.

 

حڪومت جون ترجيحون ميٽرو بس ۽ اورينج ٽرين منصوبا آهن: خورشيد شاهه

اسلام آباد (بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته حڪومتي منصوبن تي سڄي دنيا کِلي رهي آهي، حڪمران بک ۽ بدحالي جي ور چڙهيل ماڻهن جي ترقيءَ لاءِ قدم کڻن. قومي اسيمبلي جي اجلاس دوران خطاب ڪندي خورشيد شاهه چيو ته حڪومت جون ترجيحون ميٽرو بس ۽ اورينج ٽرين جهڙا منصوبا آهن. هن چيو ته حڪمران سمجهن ٿا ته هڪ يا ٻن شهرن ۾ ترقي ٿيڻ سان سڀ ڪجهه ٺيڪ ٿي ويندو،اسلام آباد ايئرپورٽ جي تعمير جو منصوبو 35 اربن مان وڌي 100 ارب رپين تائين وڌي ويو پر ڪو پــُڇڻ وارو ناهي. خورشيد شاهه چيو ته حڪومت جي منصوبن کي ڏسي دنيا کِلي رهي آهي ته بک ۽ بدحالي جي شڪار ماڻهن جون ترجيحون ڪهڙيون آهن؟ اپوزيشن ليڊر چيو ته پيپلز پارٽي سوات آپريشن جي متاثرن کي ٽن مهينن اندر بحال ڪيو پر ان باوجود سندن حڪومت کي خراب چيو ويو. هن چيو ته بنون ۾ گذريل ٻن سالن کان ماڻهو اڃا به آءِ ڊي پيز طور ترسيل آهن،چترال، بونير، دير سمورا علائقا پاڪستان جو حصو آهن، اتان جي ٻارن جو به حق آهي ته کين لاهور جهڙيون سهولتون ملن. خورشيد شاهه چيوته خيبر پختونخواهه حڪومت کي پنهنجي علائقن تي ڌيان ڏيڻ گهـُرجي ۽ وزيراعظم به ڪي پي ڪي جو دورو ڪري.

 

ايم ڪيو ايم ميمبرن جي استعيفائن جي منظوري جو نوٽيفڪيشن تيار ٿي ويو هو، متحده جي ڪائي اڳواٽ شرط ناهي مڃي: اسحاق ڊار

اسلام آباد (اين اين آءِ) ناڻي وزير اسحاق ڊار چيو آهي ته ايم ڪيو ايم ميمبرن جي استعيفائن جي منظوري جي نوٽيفڪيشن تيار ٿي ويو هو ايم ڪيو ايم جي ڪائي اڳواٽ شرط ناهي مڃي ڪراچي آپريشن تي ڪائي سوديبازي نه ٿيندي 40 ارب رپين جا نوان ٽيڪس اميرن کان اڳاڙينداسين آءِ ايم ايف جون شرطون پوريون ڪرڻيون پونديون هڪ انٽرويو ۾ هن چيو ته ڊالر جو ملهه ڪرڻ وارو آهي 40 ارب رپين جا نوان ٽيڪس اميرن کان وصول ڪنداسين وفاقي ناڻي وزير اسحاق ڊار تصديق ڪئي ته ايم ڪيو ايم جي استعفائن جي منظوري جو نوٽيفڪيشن تيار ٿي ويو هو پر مان وچ ۾ لهي حالتن کي سنڀاليو ڳالهين ۾ ايم ڪيو ايم جي ڪائي اڳواٽ شرط ناهي مڃي ڪراچي ۾ ٿيندڙ رينجرز اپريشن تي ڪائي سوديبازي نه ٿيندي اسحاق ڊار ٽيڪس پاليسي واضح ڪندي چيو ته آءِ ايم ايف جون شرطون پوريون ڪرڻيون پوندو 40 ارب ارب رپين جا نوان ٽيڪس ايندڙ مهيني کان لڳندا جيڪي اميرن کان وصول ڪيا ويندا.

 

مخالف پارٽين پاران سنڌ ۾ مڪاني چونڊون فوج جي نگراني ۾ ڪرائڻ جو مطالبو

ڪراچي (اسٽاف رپورٽر) سنڌ ۾ مڪاني چونڊن جي ٻئي مرحلي بابت اپوزيشن پارٽين جا خدشا برقرار آهن، مخالف ڌر جي پارٽين اليڪشن ڪميشن کي مڪاني چونڊن جي ٻئي مرحلي ۾ فوج مقرر ڪرڻ جو هڪ ڀيرو وري مطالبو ڪيو آهي،ارباب غلام رحيم ۽ ٻين اڳواڻن جو چوڻ آهي ته آرمي مقرر نه ڪئي وئي ته درازا جهڙو واقعو ٻيهر ٿي سگهي ٿو. سنڌ ۾ مخالف ڌر جي اڳواڻن ارباب غلام رحيم، سينيٽر مظفر حسين شاهه، سيد ظفر علي شاهه، اعجاز شاهه شيرازي،اسماعيل راهو ،راحيلا گل مگسي، نند ڪمار، غلام شاهه ۽ شاهه محمد شاهه ڪراچي ۾ صوبائي اليڪشن ڪمشنر تنوير ذڪي سان ملاقات ڪئي. اپوزيشن ڳواڻن مڪاني چونڊن جي ٻئي مرحلي جي حوالي سان شڪايتون اليڪشن ڪمشنر آڏو پيش ڪندي هڪ ڀيرو وري مطالبو ڪيو ته مڪاني چونڊون فوج جي نگراني ۾ ڪرايون وڃن. ملاقات کانپوءِ ميڊيا سان ڳالهائيندي اڳوڻي وڏي وزير ارباب رحيم واضح ڪيو ته هو مڪاني چونڊن جو بائيڪاٽ نه ڪندا،فوج مقرر نه ڪرڻ جي صورت ۾ درازا جهڙو واقعو ٻيهر ٿي سگهي ٿو. اڳوڻي وڏي وزير وزيراعظم ۽ اليڪشن ڪميشن کان مطالبو آهي ته سندن خدشا ختم ڪيا وڃن. مسلم ليگ ن سنڌ جي صدر اسماعيل راهو مطالبو ڪيو ته ڊي آر اوز سنڌ حڪومت بدران وفاقي کاتن مان مقرر ڪيا وڃن،سمورن ضلعن جي پولنگ کي حساس قرار ڏنو وڃي. سينيٽر مظفر حسين شاهه ۽ ٻين چيو ته راڻيپور ۾ فوج مقرر هجي ها ته واقعو نه ٿئي ها،ايندڙ مرحلي دوران ووٽرز جو اعتماد بحال ڪرڻ جي ضرورت آهي.

 

مودي سرڪار جي پاليسين خلاف اڳوڻا فوجي به سراپا احتجاج، ميڊل واپس ڪرڻ جو اعلان

نئين دهلي (م.ڊ) ڀارت ۾ مودي سرڪار جي پاليسين خلاف سڄي ملڪ ۾ احتجاج جو سلسلو هلندڙ آهي، ڪٿي عدم برداشت ۽ وڌندڙ انتهاپسندي ته ڪٿي وري مودي سرڪار جي پاليسين کي تنقيد جو نشانو بڻايو پيو وڃي، هاڻ ملڪ ۾ احتجاج طور اعزاز واپس ڪندڙن ۾ اڳوڻا فوجي به شامل ٿي ويا آهن، ڀارتي حڪومت تازو ئي هڪ رينڪ هڪ پينشن واري قانون ۾ ترميم ڪئي آهي، جنهن خلاف اڳوڻن فوجين اعزاز واپس ڪرڻ جو اعلان ڪيو آهي، اڳوڻن ڀارتي فوجين جو چوڻ آهي ته حڪومت ساڻن غلط ورتاءُ ڪري رهي آهي، ان ڪري هو پنهنجا ميڊل واپس ڪري رهيا آهن.

 

ليڊي ڪانسٽيبل تشدد ڪيس: شاهه جهان منڱريو جي گرفتاري کان اڳ واري ضمانت منظور

اسلام آباد (بيورو) اسلام آباد جي مقامي عدالت، پارليامينٽ لاجز ۾ ليڊي ڪانسٽيبل تي تشدد ڪندڙ قومي اسيمبلي جي ميمبر شاهه جهان مڱريو جي گرفتاري کان اڳ واري ضمانت منظور ڪري ورتي. اسلام آباد جي ايڊيشنل سيشن جي جج راجا آصف محمود، عورت ايم اين اي شاهه جهان مڱريو جي گرفتاري کان اڳ واري ضمانت جي درخواست منظور ڪئي. ٻڌڻي دوران شاهه جهان جي وڪيل عدالت کي ٻڌايو ته سندس اصيل خلاف جيترا به قلم لاڳو ڪيا ويا آهن اهي سڀئي ٻڌڻي جوڳا آهن، ان کانسواءِ ميڊيڪل رپورٽ مان به تشدد جو ڪو قلم نه ٺهي رهي آهي. وڪيل ٻڌايو ته پوليس به سي سي ٽي وي فوٽيج مان ڪو رڪارڊ حاصل ناهي ڪيو، ان ڪري عدالت کان درخواست آهي ته شاهه جهان مڱريو جي ضمانت منظور ڪئي وڃي. عدالت درخواست گذار جي وڪيل جو موقف ٻڌڻ بعد 10 هزار رپين جي ضمانتي مچلڪن عيوض شاهه جهان مڱريو جي گرفتاري کان اڳ واري ضمانت منظور ڪري ورتي. ياد رهي ته 21 آڪٽوبر تي پارليامينٽ لاجز اسلام آباد ۾ مقرر ليڊي ڪانسٽيبل افشان وومين ٿاڻي ۾ درخواست ڏني هئي ته هوءَ پارليامينٽ لاجز ۾ فرض انجام ڏئي رهي هئي ته نيشنل پيپلز پارٽي جي عورت ايم اين اي شاهه جهان مڱريو کيس گارگند ڪيو ۽ چماٽ به هنئي

 

عمران خان ۽ ريحام وچ ۾ طلاق وارا دستاويز پڌرا ٿي ويا

ڪراچي (مانيٽرنگ ڊيسڪ) تحريڪ انصاف جي سربراهه عمران خان ۽ ريحام وچ ۾ طلاق وارا دستاويز پڌرا ٿي ويا آهن، ريحام خان چيو آهي ته زالن کي مڙسن کان ڌار ڪرڻ لاءِ شيطان ڪارو علم سيکاريو آهي. عمران خان پاران ريحامخان کي ڏنل طلاق وارا دستاويز سامهون اچي ويا آهن، اردو ۾ لکيل طلاق نامي تي عمران خان جي صحيح سان گڏ آڱوٺي جو نشان به موجود آهي، جنهن تي ريحام به صحيح ڪئي آهي. ريحام خان سماجي رابطن واري ويب سائيٽ تي ٽوئيٽ ڪيو آهي ته قرآن پاڪ ۾ واضح آهي ته ابليس ان ڪري ڪارو علم سيکاريو ته جيئن زالن کي مڙسن کان ڌار ڪري سگهجي.