تازيون خبرون

Daily Archives: November 10, 2015

هر ماڻهو وٽ دشمن کان ڇوٽڪارو ماڻڻ جي ڪنجي موجود آهي: نرگس فخري

ممبئي: بالي ووڊ اداڪارا نرگس فخري چيو آهي ته کيس پڪ آهي ته هر ماڻهو وٽ پنهنجي دشمن کان ڇوٽڪارو حاصل ڪرڻ جي ڪنجي موجود آهي. ڀارتي ميڊيا مطابق هڪ انٽرويو ۾ نرگس فخري چيو ته ماڻهن کي پنهنجي حقن لاءِ اٿي کڙو ٿيڻ ۽ ڳالهائڻ کان ڪيٻائڻ نه گهرجي.نرگس فخري هالي ووڊ فلم اسپائي جي شوٽنگ لاءِ جي تياري ڪري رهي آهي، سندس چوڻ هو ته ماڻهو توهان سان ان ئي نموني پيش ايندا، جنهن جو توهان کين موقعو ڏيندا، تنهن ڪري هر ماڻهو کي پاڻ لاءِ اٿي کڙو ٿيڻ گهرجي ۽ جيڪڏهن ڪا ڳالهه صحيح يا مناسب ناهي ته ان لاءِ ڳالهائڻ گهرجي.

رنبير جي ڀيٽ ۾ رنوير سان منهنجو تعلق ڪجهه مختلف آهي: دپيڪا پدوڪون

ممبئي: بالي ووڊ اڪارا دپيڪا پدوڪون چيو آهي ته فلمن ۾ رنبير ڪپور ۽ رنوير سنگه ٻنهي سان سندس جوڙي پسند ڪئي ويندي آهي پر رنبير جي ڀيٽ ۾ رنوير سان سندس تعلق ڪجهه مختلف آهي. ممبئي ۾ پنهنجي ايندڙ فلم باجي رائو مستاني جو پوسٽر جاري ڪرڻ واري تقريب دوران ڳالهائيندي دپيڪا پدوڪون چيو ته حقيقت ۾ سندس ڪنهن به اداڪار سان جوڙي جي نوعيت جو اندازو فلم ۾ موجود ڪردارن تي ڀاڙي ٿو، جيڪڏهن مان رنبير سان يي جواني هي ديواني ۽ تماشا ۾ ڪم ڪيو آهي ته انهن ۾ اسان ٻنهي جو تعلق مختلف نظر اچي ٿو، اهڙي ريت رام ليلا ۽ باجي رائو مستاني ۾ رنوير سان سندس تعلق مختلف نوعيت جو نظر اچي ٿو، سندس چوڻ هو ته کيس رنوير ۽ رنبير ٻنهي سان ڪم ڪرڻ ۾ ڪا پريشاني ناهي ٿيندي پر جيڪڏهن جوڙِي جي ڳالهه ڪئي وڃي ته رنوير سان سندس تعلق مختلف نوعيت جو نظر ايندو آهي.

 

نيپال ۾ فٽ بال ٽيم جي 5 رانديگرن تي غداري جو ڪيس داخل

کٽمنڊو (اسپورٽس نيوز) نيپال جي فٽ بال ٽيم جي 5 رانديگرن تي 2011ع جي ورلڊ ڪپ دوران ڪواليفائينگ رائونڊ  ۾ ميچ فڪسنگ جي الزام هيٺ غداري جو ڪيس داخل ڪيوويو. برطانوي ميڊيا جي رپورٽ مطابق پوليس جو چوڻ آهي ته نيپال جي فٽ بال ٽيم جي اڳوڻي ڪپتان ساگر ٿاپا ۽ گول ڪيپر رتيش ٿاپا،سوڌو ٻين 3 رانديگرن کي گذريل مهيني حراست ۾ ورتو ويو هو ۽ سندس بنيڪ اڪائونٽ مان غير قانوني پئسا به ڪڍيا ويا هئا.رانديگرن تي الزام آهي ته 2011ع جي ورلڊ ڪپ ڪواليفائنگ رائونڊ جي ميچن ۾ ڄاڻي واڻي گول ڪيپر ڪيترائي گول هٿ سان وڃايا،کٽمنڊو جي خاص عدالت جي هڪ عملدار بهدرا ڪلي  پوکرل جي مطابق،حڪومت گذريل مهيني  5 فٽ بال رانديگرن کي غداري جي الزام ۾ گرفتار ڪيوهو، سندن لاءِ عمر قيد جي سزا جي درخواست ڏني وئي ،پوکرل ٻڌا يو ته رانديگرن تي 1989ع جي قانون مطابق ڪيس داخل ڪيو ويو آهي.جنهن مطابق، جنهن به نيپال ملڪ جي خودمختياري، سلامتي، يا قومي اتحاد  کي خطري  ۾ وجهڻ جي ڪوشش ڪئي.جنهن ۾ عمر قيد به ٿي سگهي ٿي.ياد رهي ته فٽ بال ٽيم ورلڊ گورننگ باڊي، فيفا هلندڙ ڏينهن ۾ بدعنواني ن ۽ ڪيترن ئي اسڪينڊلز جي ور چڙهي وئي آهي.

 

ويسٽ انڊيز جي اسپنر سنيل نارائڻ جو ايڪشن وري شڪي قرار، آئي سي سي کيس بالنگ ڪرائڻ کان روڪي ڇڏيو

دبئي (اسپورٽس نيوز) ويسٽ انڊيز ڪرڪيٽ ٽيم جي اسپن بالر سنيل نارائڻ جو بالنگ ايڪشن هڪ ڀيرو ٻيهر شڪي رپورٽ ڪيو ويو آهي، عالمي ڪرڪيٽ ڪائونسل (آئي سي سي) پاران جاري ڪيل بيان ۾ چيو ويو آهي ته سنيل نارائڻ جو بالنگ ايڪشن هڪ ڀيرو وري رپورٽ ٿيو آهي، جنهن ڪري کيس بالنگ ڪرائڻ کان روڪيو ويو آهي، آئي سي سي مطابق سنيل نارائڻ جي بالنگ ايڪشن جي ٽيسٽ 14 ڏينهن اندر ڪرائڻ لازمي آهي، جڏهن ته ان جي رپورٽ 13 کان 14 ڏينهن اندر ملڻ جو امڪان آهي، جنهن جي روشني ۾ سندس بالنگ جي حوالي سان ڪو فيصلو ڪيو ويندو.

 

بهار ۾ مودي جي انتهاپسند پاليسي کي بدترين شڪست: ارشاد ڪاغذي

ڀارت جي صوبي بهار ۾ رياستي اليڪشن ۾ بي جي پي کي بدترين شڪست نصيب ٿي آهي، هن وقت تائين جيڪي نتيجا سامهون آيا آهن، تن مطابق بي جي پي ۽ ان جي اتحاد کي سخت ڌڪ رسيو آهي، جڏهن تـ لالو پرساد ۽ اڳوڻي وڏي وزير ۽ موجوده نامزد وڏو وزير ۽ ان جو گڏيل اتحاد سرسي ۾ آهي. بهار رياست ۾ 5 مرحلن ۾ اليڪشن ڪرائي وئي، جيڪا 12 آڪٽوبر کان 5 نومبر تائين ٿي گذري ۽ هينئر ووٽن جي ڳڻپ ٿي رهي آهي. هن اليڪشن ۾ بي جي پي تمام گھڻو زور لڳايو ۽ خاص ڪري  مسلمانن ۽ پاڪستان مخالف مهم هلائي، پر ان جي باوجود هو ڪاميابي حاصل نه ڪري سگھي.

بهار رياست جي 243 سيٽن جي اليڪشن لاءِ ڪل ووٽرن جو تعداد 6.68 ڪروڙ هو، 2.6 ڪروڙ نوان ووٽ داخل ڪيا ويا هئا، 2010ع کان پوءِ ووٽرن جو تعداد ايترو وڌي ويو هو، جيڪي ووٽ ڏيڻ جا حقدار هئا. 2169 ووٽر ٽين جنس جا به هئا. 174 اهڙا اميدوار چونڊ ۾ حصو وٺي رهيا هئا، جن تي ڪرمنل ڪيس درج ٿيل آهن. ان جو مطلب ته اڌ کان وڌيڪ اميدوار ڏوهن ۾ ملوث آهن، جيڪي اسيمبلي ميمبر بڻجڻ لاءِ پاڻ پتوڙي رهيا آهن.

راشٽريه جنتا دل (آر جي ڊي) ۽ گرينڊ الائنس جي اڳواڻ لالو پرساد آچر جي صبح جو چيو هو ته هو پراميد آهي ته گرينڊ الائنس اليڪشن ۾ ڪاميابي حاصل ڪندو. هن اخباري عيوضين سان ڳالهائيندي چيو ته ”سڀني کي صبح جو سلام، مان رات جو سڪون سان ستو آهيان.“ پٽنه ۾ صحافين سان ڳالهائيندي هن چيو ته” اسان کٽي رهيا آهيون، ان ۾ ڪو به شڪ شبهو ناهي“. هن وڌيڪ چيو ته ” ڏسندا وڃو ته ڇا ٿو ٿئي، شام جو وڌيڪ ڳالهائبو“. لالو مسڪرائيندي چيو.

بهار جي اليڪشن ۾ لالو پرساد، نتيش ڪمار، ڪانگريس ۽ ٻين سياسي جماعتن وسيع تر اتحاد ٺاهي اڪثريت سان ڪاميابي ماڻي ورتي آهي ۽ آئنده جي سرڪار اهي ٺاهيندا ۽ نئين حڪومت جو وڏو وزير نتيش ڪمار هوندو. ياد رهي ته بهار صوبي ۾ لالو پرساد ۽ سندس گھرواري راٻڙي ديوي به ڪيئي دفعا وڏ وزارت جو مزو ماڻيو هو. هن سٽن لکڻ مهل تائين گرينڊ الائنس زبردست رڪارڊ ڪاميابي حاصل ڪري ورتي هئي ۽ سندس 139 ميمبر چونڊجي آيا آهن، جڏهن ته سرڪار لاءِ اڪثريت حاصل ڪرڻ لاءِ 122 ووٽن جي ضرورت آهي. جڏهن ته بي جي پي اتحاد بري طرح شڪست کاڌي آهي ۽ فقط 77 سيٽون حاصل ڪيون آهن.

نتيش ڪمار جيڪو پيشي جي لحاظ کان انجينئر آهي، هو گذريل ڏهاڪي کان بهار جي وڏ وزارت جي گدي تي ويهي راڄ ڪندو رهيو آهي، سو هن ڀيري به وڏ وزارت جو اميدوار آهي. هو 2005ع کان 2014ع تائين بهار سرڪار ۾ وڏو وزير رهيو آهي. هو جنتا دل (يونائيٽيڊ) جو اڳواڻ آهي. هو مرڪزي وزير به رهيو آهي. وڏ وزارت جي عرصي دوران هن تمام گھڻا ۽ سٺا ترقياتي ڪم ڪرايا هئا، جن ۾ پليون، عمارتون، روڊ ۽ رستن جي تعمير وغيره شامل آهي، هن هڪ لک ٽيچر، ڊاڪٽرن جي اسڪولن ۽ بنيادي صحت گھرن ۾ مقرري، ۽ ڪرائيم تي ڪنٽرول ڪيو هو. 17 مئي 2014ع ۾ هن وڏ وزارت تان استعيفيٰ ڏني هئي، ڇاڪاڻ ته عام اليڪشن ۾ پنهنجي پارٽي جي ناقص ڪارڪردگي جي ڪري اخلاقي طرح هو پوئتي هٽي ويو هو.

نتيش ڪمار جي جنتا دل پارٽي ۽ لالو پرساد جي پارٽي راشٽريا جنتا دل 243 جي ايوان ۾ هرهڪ پارٽي سئو کان وڌيڪ سيٽن تي اليڪشن ۾ حصو وٺي رهيا آهن ۽ باقي سيٽن تي ڪانگريس ۽ ٻين حصو ورتو. بهار ۾ لالو پرساد جي پارٽي وڌيڪ سيٽون حاصل ڪيون آهن. شرد ياديو جنتا دل يونائٽيڊ جو ليڊر چئي ٿو ته ”جيتوڻيڪ لالو جي پارٽيءَ وڌيڪ سيٽون حاصل ڪيون آهن پر پوءِ به وڏ وزارت تي نتيش ڪمار ويهندو.“

لالو پرساد جي ڌي ميسا ڀارتي اليڪشن جي رزلٽ تي تبصرو ڪندي خوشي جو اظهار ڪيو، هن چيو ته بهار جي اليڪشن جا نتيجا وزيراعظم مودي لاءِ وڏو ڌچڪو آهن. ”بهار جي عوام مودي کي بي عزتو ۽ خوار ڪيو آهي.“ هن چيو ته لالو پرساد جي ڌي ڀارتي اليڪشن مهم جي سرگرم اڳواڻ هئي. ڀارت جي وزيراعظم نريندر مودي، نتيش ڪمار کي ٽيليفون ڪري مبارڪون ڏنيون. هن اليڪشن جي نتيجي جي ڪري بي جي پي تي هر طرف کان تنقيد ٿي رهي آهي. بهار جي رياستي چونڊ کي هند جا سياستدان مودي جي فاشسٽ ايجنڊا جي شڪست سان تعبير ڪري رهيا آهن. بزرگ مارڪسي سياستدان ۽ ڪيرالا جي اڳوڻي وڏي وزير اچو تانندن، نتيش ڪمار ڏانهن هڪ اي ميل موڪلي مبارڪ ڏني. ”اليڪشن جي رزلٽ ظاهر ڪيو آهي ته بهار جو عوام وزيراعظم سان گڏ ڪونهي، جيڪو فرقي پرستي ۽ فاشسٽ سوچ جو مالڪ آهي، رزلٽ ٻڌائي ٿو ته سيڪيولر ۽ جمهوري قوتن جو اتحاد قائم آهي.“ بهار جي اليڪشن جي نتيجي جي ڪري بي جي پي جي ساک متاثر ٿي آهي ۽ مودي تي تنقيد جا تير وسايا پيا وڃن. پر بي جي پي نڪ جي پڪائي سان چئي رهي آهي ته بهار جي اليڪشن معمول مطابق رياستي اليڪشن هئي، هي ڪو ريفرنڊم نه آهي جو مودي ۽ مرڪزي سرڪار تي ان جو ڪو اثر پوندو. تنهن ڪري بي جي پي جي هارائڻ يا کٽڻ کي ريفرنڊم نه سمجهيو وڃي.

بهار جي اليڪشن ۾ سيڪيولر ۽ جمهوري سياسي جماعتن جو هڪٻئي سان سهڪار ڪرڻ جي ڪري هي معرڪو ڪاميابي سان سر ڪيو آهي. ڀارت جون جماعتون گڏجي هڪ وسيع تر اتحاد ٺاهي بي جي پي کي بري شڪست ڏني آهي ۽ ان ڪارڻ بي جي پي تي دٻاءُ وڌي ويو آهي ۽ آئنده به بي جي پي دٻاءَ ۾ رهندي. ڀارت ۾ مودي جي مرڪزي سرڪار ۽ شيو سينا تي فرقي پرستي ۽ فاشسٽ طور طريقن جي ڪري هندو، مسلمان، سک، عيسائي ۽ ٻين جي وچ ۾ ڇڪتاڻ جا منظر نظر اچن ٿا ۽ هن اليڪشن ۾ مسلمانن جي گھڻي تعداد ۾ ووٽ جي ڪري بي جي پي هارائي وئي ۽ ان کان علاوه ننڍن ذاتين دلت ڪميونٽي جو ووٽ لالو پرساد، نتيش ڪمار، ڪانگريس ۽ ٻين ڏانهن ويو، تنهن ان ۾ مکيه ڪردار ادا ڪيو.

بهار جي اليڪشن ڀارت جي ايندڙ سياسي منظر نامي کي بدلائڻ ۾ اهم پيش رفت ثابت ٿيندي ۽ وسيع اتحاد جي جڙڻ ۽ ڪاميابي حاصل ڪرڻ جي ڪري مستقبل ۾ به جمهوري ۽ سيڪيولر ڌريون جيڪي بظاهر ان روپ ۾ آهن، اهي آئنده به گڏجي اليڪشن ۾ اتحاد ڪنديون ۽ ان سان گڏوگڏ ڀارت جي ٻين رياستن ۾ به اليڪشن ٿيڻ واري آهي، اتي به بهار جي ڪاميابي اثرانداز ٿي سگھندي. هندستان ۾ بي جي پي جي اقتدار ۾ اچڻ کانپوءِ هي پهريون دفعو آهي جو بي جي پي ۽ مودي جي مقبوليت کي گھڻو ڌڪ رسيو آهي ۽ بي جي پي صدمي جي حالت ۾ آهي ۽ سڀني طرفن کان ايستائين جو شو سينا پاران مودي تي تنقيد ٿي رهي آهي. وزيراعظم ڀارت جي عوام کي جيڪي سنهري خواب ڏيکاري رهيو هو ته ڀارت خوشحال ٿيندو پر مودي جي شدت پسندي، فرقي پرستي ۽ فاشسٽ سوچ جي ڪري ڀارت ۾ هم آهنگي ۽ يڪجهتي کي ڪاپاري ڌڪ لڳو آهي. بهار جي اليڪشن سيڪيولر، جمهوري ۽ روشن خيال سياسي جماعتن جي فتح آهي، بهار جي عوام جو فيصلو شدت پسندي جي خلاف آيو آهي، اهو آئنده لاءِ خوش آئنده آهي.

 

”محبتن ۽ روشنين جو تهوار“   ڏياري: مجيب آزاد ڀيلار

ڏياري جو تهوار هندن جو وڏو ڏڻ آهي جيڪو مهالڪشمي پوجا ديوالي جي صورت ۾ هر سال اسوءِ جي مهيني ۾ ملهايو ويندو آهي،هن ڏينهن کي قديم وقت کان وٺي خاص اهميت حاصل آهي.هيءُ ڏڻ سارين ۽ ٻين فصلن لهڻ وقت ايندو آهي هن ڌرتي جي قديم رهواسين انهيءَ خوشحالي جي مند ۾ لڪشمي پوڄا جو ڏهاڙو مقرر ڪيو هو.هو انهيءَ رات روشني ڪندا هئا ۽ سڄي رات اوجاڳو ڪندا هئا.انهن جو عقيدي هو ته لڪشمي (دولت جي ديوي) روشني صفائي ۽ سٿرائي تي مهربان ٿي دولت ۽ ڀاڳ سان نوازيندي آهي.انهيءَ مقرر ٿيل ڏڻ جي صدين گذرڻ باوجود اڄ به ساڳي شرڌا سان هندو ڀائر ڏيئا ٻاري ڦٽاڪا ڇوڙي خوشيون ملهائي ديوالي جي سواگت ڪن ٿا.مريادا پرشوتم ڀڳوان رام چندر 14 سال بنواس جهاڳي ساٿين سان ايوڌيا پهتا ته اهو ڏڻ لڪشميءَ پوڄا جو هو.شري رام چندر جي ايوڌيا پهچڻ سان ديوالي جون خوشيون تمام وڌي ويون ۽ نتيجي ۾ هندن جي وڏي ڏڻ جي صورت ۾ ڏياري جو ڏڻ وجود ۾ آيو.

ڏياري اهو پوتر ڏينهن آهي جڏهن ناصاف ظلم تي فتح پاتي،ظالم سدائين خوار ۽ خراب ٿئي ٿو.جڏهن رام چندر پنهنجي گهر واري سيتا کي حاصل ڪرڻ لاءِ راوڻ سان يڌ ڪئي هئي.ان وقت راوڻ کي گهمنڊ هو ته رام چندر ۽ سندس ساٿي منهنجي زبردست (فوج) سئنا جو مقابلو نه ڪري سگهندا.پر دنيا ڏٺو شري رام چندر ۽ سندس ساٿين ظالم راجا راوڻ جو انت آندو ۽ انصاف ظلم تي فتح پاتي.ڏياري ٽي ڏهاڙا ملهائبي آهي. ڏياري جي رات لڪشمي ديوي جي پوڄا هر هندوءَ جي گهر ۾ ٿيندي آهي.ڏياري واپارين جو پڻ ڏهاڙو آهي،واپاري فرد نيون چوپڙيون ۽ کاتا رکندا آهن،گذريل سال جو پوتاميل به ڪندا آهن.اڳئين زماني ۾ هن مند ۾ ٻيڙين ۽ جهازن وسيلي سمنڊ جو واپار ٿيندو هو.سمنڊ ماٺ ۾ رهدو هو،غوراب دنگيون هلنديون هيون مرشد ڀٽ ڌڻي به سر سامونڊي ۾ فرمائي ٿو ”ڏٺي ڏياري سامونڊين سڙهه سنباهيا“ڏياري ايندي ئي بازارن ۾ رونق وڌي ويندي آهي گهرن کي صاف سٿرو رکيو ويندو آهي.مندر توڙي گهرن ۾ سڄي رات مهالڪشمي گئيش ست سنگ ڀڳتي جو پروگرام ڪيو ويندو آهي.ڀڳت شري رام چندر،ماتا سيتا،راجه دسترٿ ۽ ڀرت جي جيون تي روشني وڌي ويندي آهي.

ڏياري مها لڪشمي جي آراڌنا جو ڏڻ آهي، اي مها لڪشمي ديوي! جيڪڏهن تو انيڪ سنت، مهاتما، رشي، مني مڪت ڪيا آهن ائين ڪرپا ڪري هنن ڀليل انسانن کي مڪتي ڏيکار. اي ماتا! تون هڪ هوندي به تنهنجا انيڪ روپ آهن تون ته هڪ وقت ۾ مهادرگا، مها ڪالي، مها سرسوتي، مهالڪشمي آهين، مها لڪشمي جي روپ ۾ تون جڳت ۾ (دولت) ڌن ۽ سمپتي جي ديوي آهين ۽ هر منش تنهنجي ئي انهيءَ روپ جو متلاشي آهي،پر اي ماتا توکي ڪرپا جي ديوي به ته ڪوٺيل آهي.تنهنڪري پنهنجي ڪرپا ڪندي تون انسانن جي عيبن ۽ اوگڻن طرف نظر نه وجهج.هي ڪل جڳت جو دور آهي،ٻيون به انيڪ چنتائون آهن.تنهنڪري هر روز تنهنجي آپسنا منش ڪيئن ٿو ڪري سگهي.جڏهن تون ڪرپا ڪري منش کي سال ۾ هڪ ڀيرو ڏياري رات مڪتي ڏيکار ته منش تنهنجو ٿورائتو رهندو.ڏياري روشني جي علامت آهي،انهيءَ روشنيءَ جي ڳولا ڪندي اسين هر سال ڏياري تي پنهنجي حصي جو هڪ ڏيئو ٻاري جوت جلايون ٿا پر اسان جا اندر مڪمل طرح اجرا ۽ روشن هجڻ بدران لوڀ،موهه اهمڪار،ڪروڌ سان ڀريا پيا هوندا آهن.جيستائين اسان پنهنجي دل کي صاف نه ڪنداسين اوستائين اسان هزارين ڏيئا ٻاريون پر اندر هميشه ميرو رهندو تنهنڪري اسان کي پنهنجي اندر ۾ جهاتي پائي ڏسڻو پوندو ته اسين پنهنجو پاڻ سان،سماج سان، ڌرم سان ڪيترو سچا آهيون،اسان جو اندر ڪيترو اجرو آهي.جيڪڏهن هر گهر جو وڏو رام چندر ٿئي هر ڀاءُ لڪشمڻ ۽ ڀرت ٿئي هر ناري ڪوشليا ۽ ماتا سيتا بڻجي وڃي ته هي ڌرتي سرڳ (جنت) بڻجي پوي.

ڏياري رات هر طرف روشني پکڙيل هوندي آهي جڏهن ته آڪاش ۾ ڪاري اماوس ڇانيل هوندي آهي.تڏهن ڌرتيءَ تي ڏيئن ميڻ بتين جي روشني لاٽ آڪاش مارگ وسيلي انساني ڪامنائون پرماتما تائين پهچڻ لڳن ٿيون.ڏياري جي رات شري رام چندر ايوڌيا پهتا هئا پر ڇا ان کان پوءِ اڄ تائين هن ڌرتيءَ تي راوڻن جنم نه ورتو آهي؟ ها اڄ به ڪيترائي راوڻ ظلم جي بازار گرم ڪيو ويٺا آهن،انهن خلاف آواز اٿارڻ اسان جو ڌرم هجڻ گهرجي.ڏياري ته نالو آهي سچ جي جئه (فتح) جو،پاپ جي انت جو،ظلم جي خاتمي جو پر اهو ظلم اڃا برقرار آهي.اسان کي ڏياري جي سڀ ڏڻ رام کي ريجهائي پنهنجي دل روپي ايوڌيا ۾ وٺي اچڻو پوندو.ڏياري اسان کي ياد ٿي ڏياري ته نئين جذبي سان منش کي پنهنجو جيون سڦل بڻائڻ لاءِ ڪجهه سٺا ڪم ڪري پر لوڪ (ايندڙ وقت) جو ثمر گڏ ڪيون.

 

 

مودي جي انتهاپسند سياست کي بهار جي عوام جي ڏيکاريل آرسي

گذريل ڪيترن ئي ڏينهن کان ڀارت ۾ ڀارتي وزير اعظم نريندي مودي جي سرڪار جي سرپرستي م هندو انتهاپسند شيو سينا جي غنڊه گردي توڙي مسلمانن ۽ گهٽ زات جي جي ماڻهن سان ٿيندڙ ظلم جا قصا اخبارن جي زينت بڻيا رهيا، مودي سرڪار سياست دوران مذهبي ڪارڊ کيڏڻ جي جيڪا سازش ڪئي اها عوام ووٽ ذريعي ناڪام بڻائيندي مودي سان نفرت جو اظهار پڻ ڪيو آهي، ڀارتي  وزيراعظم نريندر مودي کي انتهاپسندي جو منهن ٽوڙ جواب ملي ويو، بهار جي عوام بي جي پي جي انتها پسند سوچ کي  رد ڪري ڇڏيو، نتيش ڪمار ۽ لالو پرساد يادو ۽ ڪانگريس جي اتحاد 243 سيٽن جي ايوان ۾ 140 سيٽون حاصل ڪري واضح اڪثريت حاصل ڪري  ورتي آهي، جڏهن ته بي جي پي صرف 79 سيٽون حاصل ڪري سگهي، بهار رياست جي چونڊن ۾ راشٽريا جنتادل ۽ جنتادل يونائيٽيڊ ۽ ڪانگريس جي اتحاد ۽ بي جي پي جي اتحاد اين ڊي اي ۾ مقابلو هو، 243 سيٽن  جي ايوان لاءِ 5 مرحلن ۾ چوندون ٿيون. پهرين مرحلو 12 آڪٽوبر ۽ آخري مقابلو 5 نومبر تي هو. بهار جي رياستي چونڊن ۾ حڪمران پارٽي بي جي پي پنهنجي تاريخ جي مهانگي ترين مهم هلائي پر بي جي پي مخالف اتحاد  نريندر مودي جي ڪوشش تي ٻهارو ڦيري ڇڏيو، بهار ۾ نتيش ڪمار جي وزيراعليٰ بڻجڻ جو رستو صاف ٿي ويو آهي. بهار ڀارت جي اتر اولهه ڀارت جي وڏين رياستن مان  هڪ آهي، هن جي آبادي 10 ڪروڙ آهي، هن جي آبادي جي اڪثريت غربت جو شڪار آهي، پر نتيش ڪمار جي وڏو وزارت دوران بهار ترقي جي رستي تي آيو هو، لالو پرساد يادو به  گهڻو وقت  بهار جو وڏو وزير رهيو آهي، هوڏانهن ڀارتي وزير اعظم نريندر مودي پنهنجي شڪست قبول ڪري ورتي آهي، هن  ٽوئيٽ ۾ به چيو آهي ته  نتيش ڪمار کي مبارڪ باد ڏني آهي، ٻئي طرف بي جي پي چيو آهي ته شڪست پنهنجي جاءِ تي پر  بي جي پي حڪومت کي تاريخي شڪست ملي آهي، هوڏانهن دهلي جي وزير اعليٰ  عمر عبدالله  نتيش ڪمار کي مبارڪ باد ڏني آهي. ڪانگريس پارٽي جي اڳواڻ راهل گانڌي چيو آهي ته بهار ۾ غرور جي هار ۽ سچائي ۽ ڀائيچاري کي سوڀ ملي آهي، بي جي پي جون نفرت ۽ انتهاپنسدي واريون پاليسيون ناڪام ٿي ويون آهن.
عوامي فيصلي بعد مودي سرڪار جو اقتدار ۾ رهڻ جمهوريت جي خلاف ورزي آهي، جيڏهن عوام ائين ئي ووٽ ذريعي پنهنجو فيصلو ڏيندو رهيو ته اهو ڏينهن پري ناهي جڏهن پوري دنيا ۾ مڪمل جمهوريت جو راڄ هوندو بلڪه عوام جا نوڪر حقيقت ۾ عوام جي نوڪري ڪندا ۽ عوام خوشحال ٿي ويندو.