تازيون خبرون

Daily Archives: November 10, 2015

پاڪستان ۾ دهشت ڦهلائيندڙ جٿن کي برداشت نه ڪيو ويندو: قومي سلامتي بابت اجلاس ۾ فيصلو

اسلام آباد (اين اين آءِ) وزيراعظم نواز شريف جي صدارت ۾ اجلاس ۾ هڪ ڀيرو ٻيهر واضح ڪيو آهي ته پاڪستان ۾ دهشت ڦهلائيندڙ جٿن کي ڪڏهن برداشت نه ڪيو ويندو، آخري دهشتگرد جي خاتمي تائين آپريشن جاري رهندو، سومر تي وزيراعطم محمد نواز شريف جي صدارت هيٺ وزيراعظم هائوس ۾ قومي سلامتي بابت هڪ اجلاس ٿيو، وزيراعظم هائوس جي بيان مطابق اجلاس دوران نيشنل ايڪشن پلان جي مختلف مرحلن جو جائزو ورتو ويو، اجلاس ۾ گهرو وزير چوڌري نثار علي خان، اسحاق ڊار، وزيراعظم جي صلاحڪار ناصر جنجوعا، سرتاج عزيز ۽ طارق فاطمي شرڪت ڪئي، ان موقعي تي جنرل راحيل شريف، چيف آف جنرل اسٽاف ليٽيننٽ جنرل زبير محمود حيات سميت ٻيا سول ۽ فوجي عملدار پڻ موجود هئا، ان موقعي تي ڳالهائيندي وزيراعظم هڪ ڀيرو ٻيهر واضح ڪيو ته پاڪستان ۾ دهشت ڦهلائيندڙ جٿن کي برداشت نه ڪيو ويندو، ڪراچي جي صورتحال اڳ کان بهتر آهي، سڄي ملڪ ۾ امن امان قائم ٿيڻ تائين سک سان نه ويهنداسين.

 

پي ٽي آءَ چونڊ ۾ حصو وٺي جمهوريت کي مضبوط ڪيو، جمهوريت ۽ آئين جو دفاع ڪيو ويندو: اياز صادق

اسلام آباد(بيورو) نون ليگ اميدوار سردار اياز صادق 268 ووٽ کڻي قومي اسيمبلي جو ٻيهر اسپيڪر چونڊجي ويو، پي ٽي آءِ اميدوار شفقت محمود 31 ووٽ حاصل ڪيا، اياز صادق عهدي جو حلف کڻندي چيو آهي ته اڄوڪي ڪاميابي سندس نه پر پارليامينٽ ۽ جمهوريت جي سوڀ آهي. قومي اسيمبليءَ جو اجلاس وقتي اسپيڪر مرتضيٰ جاويد عباسيءَ جي صدارت هيٺ ٿيو،جنهن ۾ آئين جي آرٽيڪل 53 ۽ قومي اسيمبلي جي قاعدن ۽ ضابطن جي نمب ر 9 موجب اسپيڪر جي چونڊ لاءِ ووٽنگ ڪرائي وئي. سڀ کان پهرين وزيراعظم نواز شريف ووٽ ڪاسٽ ڪيو، جڏهن ته پي ٽي آءِ سربراهه عمران خان،اپوزيشن اڳواڻ خورشيد شاهه ۽ جي يو آءِ سربراهه مولانا فضل الرحمان به پنهنجو ووٽ ووٽ وڌو.. 300 ميمبرن جي ايوان مان نواز ليگ اميدوار اياز صادق 268 ووٽ کڻي قومي اسيمبلي جو 20 هون اسپيڪر چونڊجي ويو، جڏهن ته پِي ٽي آءِ اميدوار شفقت محمود رڳو 31 ووٽ حاصل ڪيا. سردار اياز صادق کي پ پ، ايم ڪيو ايم، جي يو آءِ (ف) ۽ فنڪشنل ليگ سميت سمورين پارٽين جي حمايت حاصل هئي. وقتي اسپيڪر مرتضيٰ جاويد عباسي سردار اياز صادق کان عهدي جو حلف کڻايو. قسم کڻڻ بعد اسپيڪر اياز صادق پيپلز پارٽي، جَي يـُو آءِ (ف)، ايم ڪيو ايم، فنڪشنل ليگ ۽ ٻين حمايت ڪندڙ جماعتن جا ٿورا مڃيا، جڏهن ته هن اسپيڪر جي عهدي لاءِ ٻيهر نامزد ڪرڻ تي وزيراعظم ۽ پنهنجي پارٽي جا به ٿورا مڃيا. سردار اياز صادق پي ٽي آءِ ميمبرن جو ٿورو مڃيندي چيو ته تحريڪ انصاف چونڊ ۾ حصو وٺي جمهوريت کي مضبوط ڪيو. هن چيو ته کيس هڪ ئي اسيمبلي مان 2 ڀيرا اسپيڪر چونڊڻ جو اعزاز حاصل ٿيو. اياز صادق چيو ته اڄوڪي ڪاميابي سندس نه پر پارليامينٽ ۽ جمهوريت جي سوڀ آهي، گڏجي جمهوريت ۽ آئين جو دفاع ڪيو ويندو.

 

ڪراچي آپريشن دوران ثبوتن آڌار ٿيندڙ گرفتارين تي اعتراض قبول ناهن: نثار کهڙو

ڪراچي(اسٽاف رپورٽر)  سنڌ جي اطلاعات واري سينيئر وزير نثار احمد کهڙو چيو آهي ته بنا ڪنهن جواز ۽ ڏوهه جي جيڪڏهن ايم ڪيو ايم جي ڪارڪنن جون گرفتاريون ٿيون آهن ته ان بابت جاچ ڪرائي ازالو ڪيو ويندو، ڪراچي آپريشن بنا ڪنهن فرق جي جاري آهي ۽ رهندو، ڪراچي آپريشن تحت ثبوتن جي آڌار تي ٿيندڙ گرفتارين تي اعتراضن کي تسليم نه ڪيو ويندو. اهڙن خيالن جو اظهار هن سومر ڏينهن جاري ڪيل هڪ بيان ۾ ڪيو آهي. نثار احمد کهڙو چيو آهي ته بلدياتي چونڊن جي ٻئي مرحلي ۾ ڪراچي، حيدرآباد سميت ٻين ضلعن ۾ ووٽر پنهنجو حق استعمال ڪرڻ ۾ آزاد آهن۽عوام جنهن جماعت کي اڪثريتي بنياد تي چونڊيندو ته پوءِ ميئر به ان ئي جماعت جو ٿيندو ۽ اها ئي اڪثريتي جماعت مڪاني حڪومت جوڙيندي.هن چيو ته ايم ڪيو ايم جون مڪاني چونڊن کان اڳ ڪراچي ۽ حيدرآباد جي ميئرشپ حاصل ڪرڻ جون ڳالهيون وقت کان اڳ آهن. هن چيو ته مڪاني چونڊن جي ٻئي مرحلي ۾ امن امان جي قيام لاءِ رينجرز پولنگ اسٽيشنن ٻاهران مقرر هوندي جڏهن ته فوج کي پڻ اسٽينڊ باءِ رکيو ويندو ۽ پوليس، ريپڊ ريسپانس فورس هر هنڌ موجود هوندي ته جيئن ڪو به ووٽرس، عملي ۽ ايجنٽن کي حراسان نه ڪري سگهي. هن چيو ته سنڌ حڪومت شفاف چونڊن تي يقين رکي ٿي ان حوالي سان اليڪشن ڪميشن سان مڪمل سهڪار ڪيو ويندو. هن چيو ته پهريون ڀيرو جماعتي بنيادن تي ٿيندڙ چونڊن سان جمهوريت وڌيڪ مضبوط ٿيندي.

 

اقبال ڊي تي تعليمي ادارا کليل رهڻ جو مقصد صرف نئين نسل تائين اقبال جو پيغام پهچائڻ، ٻيو مطلب نه وٺڻ گهرجي: پرويز رشيد

لاهور (اين اين آءِ) سڌسماءَ جي وفاقي وزير سينيٽر پرويز رشيد چيو آهي ته اقبال ڊي جي موقعي تي تعليمي ادارن جو کليل هجڻ جو مقصد صرف نئين نسل تائين اقبال جو پيغام پهچائڻ آهي ان جو ڪوئي ٻيو مطلب نه وٺڻ گهرجي لامه اقبال صرف فڪر جو نه پر عمل جو انسان هو جنهن کي نه فقط پاڪستان پر دنيا جون ڪافي قومون فلسفي شاهر مڃن ٿيون علامه اقبال جو تصور پاڪستان ان جي فڪري نظام سان مربوط آهي جيڪو اقبال پيش ڪيو اسان جيڪڏهن اقبال جي فڪر ۽ فلسفي جي سچي تعبير ڪيون ته پاڪستان سياسي معاشي مذهبي ۽ معاشرتي لحاظ کان دنيا ۾ ممتاز مقام جو مالڪ ٿي سگهي ٿو علم جا سرچشما اسان وٽ آهن جڏهن ته ترڪي ۽ ايران ان مان فائدو وٺي رهيا آهن جڏهن ته اسان محروم آهيون اهڙن خيالن جو اظهار هن گذريل ڏينهن ايوان اقبال ۾ اقبال ڊي جي حوالي سان هڪ سيمينار کي خطاب ڪندي ڪيو تقريب ۾ پنجاب جو گورنر محمد رفيق رجوانا، سراج الحق، وليد اقبال، مجيب الرحمان شامي، عارف نظامي، ۽ سجاد مير پڻ خطاب ڪيو. ان موقعي تي شاگردن ۽ شاگردياڻين ۽ هر مڪتبه فڪر سان تعلق رکندڙ وڏي انگ شرڪت ڪئي. وفاقي وزير پرويز رشيد چيو ته اقبال جي فڪر جو بنيادي مقصد انفرادي ۽ اجتماعي خودي کي مسلم معاشري جي روايتي تصورن کان هم آهنگ بنائڻو هو اقبال اسان کي درس ڏي ٿو ته اسان کي امن ڪيئن قائم ڪرڻو آهي ان جو فرمان هو ته مسلمان لاءِ نفرت جو لفظ بلڪل منع ٿيل آهي ڇو ته هو مثالي معاشري جو قيام ڀائپي رواداري ۽ برداشت سان آهي نڪي نفرت ۽ بغض سان آهي هن چيو ته مان اقبال کي اوهان جيترو ئي مڃان ٿو اوهان ماڻهن کان گهٽ آهيان ۽ اڄ هن تقريب ۾ سب کان پهريان انهيءَ ڪري آيو هيس ته جيئن اوهان جهڙا استاد ۽ دانشورن جو فلسفو اقبال تي ڪجهه ڳالهيون ٻڌي سگهان ۽ مان انهيءَ انتظار ۾ رهيس ۽ اوهان ماڻهن جون تقريرون خودي جي فلسفي بدران موڪل جي فلسفي تي شروع ٿي ويون ۽ مون کي لڳي ٿو ته اڄ مان اهو ئي ٻڌي ويندس هن چيو ته اقبال ڊي تي موڪل ڪرڻ گهرجي يا نه جيڪڏهن عوام جو مطالبو هوندو ته ضرور موڪل ٿيندي پر اقبال ڊي جي موقعي تي تعليمي ادارن جو کليل رهڻ جو مقصد صرف نئين نسل تائين اقبال جو پيغام پهچائڻ آهي ان جو ڪوئي ٻيو مطلب نه وٺڻ گهرجي. امير جماعت اسلامي سراج الحق تقريب کي خطاب ڪندي چيو ته علامه اقبال صرف هڪ فرد نظريو فلسفي يا عقيدي جو نالو نه آهي پر هي هڪ جدوجهد جو نالو آهي، هڪ تحريڪ جو نالو آهي ۽ انسانيت سان محبت جو نالو آهي انهيءَ ڪري حڪومت اقبال جي نظرين جي وارث نه بڻي پر پاڪستان جو 18 ڪروڙ عوام ان جو وارث آهي اقبال جي شاعري نوجوان نسل لاءِ سرمايو آهي ۽ اسان جو نوجوان اقبال جي مشن کي پنهنجي منزل تي ضرور پهچائنيدا هن چيو ته حڪومت اقبال جي موڪل ختم ڪري سٺو ناهي ڪيو جڏهن ته پهرين مئي تي آمريڪا جي شهر شڪاگو ۾ مزودر جي عزت ۽ احترام لاءِ ملايو ويندڙ سڄي دنيا ۾ ملهايو وڇي ٿو ته اقبال جي ڏينهن تي موڪل ڪري ڇو نٿو ملهائي سگهجي هي اقبال کي يقين ۽ مظلوم بنائڻ جي بابر آهي پر اقبال موڪل جو مهتاج نه آهي اقبال نئين نسل جي دلين ۾ وسي ٿو جيستائين نوجوان نسل زنده آهي اقبال زنده رهندو تقريب جي پڄاڻي تي سراج الهق دعا ڪرائي

 

ايم ڪيو ايم وفد جي وڏي وزير سان ملاقات، مڪاني چونڊن جي حوالي سان شڪايتون

ڪراچي (اسٽاف رپورٽر) ايم ڪيو ايم وفد ڪراچي ۾ وڏي وزير سان ملاقات ڪري مڪاني چونڊن جي حوالي سان شڪايتون ڪيون، متحده اڳواڻ خواجه اظهار الحسن چيو آهي ته حڪومت ايم ڪيو ايم حقيقي جي سرپرستي ڪري رهي آهي، وڏي وزير سيد قائم علي شاهه چيو آهي ته حڪومت ڪنهن به گروپ جي سرپرستي نه پئي ڪري، ڏوهاري ڪهڙي به گروپ جو هجي ان خلاف ڪارروائي ٿيندي. ايم ڪيو ايم وفد سيد سردار احمد ۽ خواجه اظهار الحسن جي اڳواڻي ۾ وزير اعليٰ هائوس پهچي سنڌ جي وڏي وزير سيد قائم علي شاهه سان ملاقات ڪئ ايم ڪيو ايم وفد پاران وڏي وزير کي شڪايت ڪئي وئي ته مختلف علائقن ۾ سندن اميدوارن کي هيسايو پيو وڃي، ڪيترن ئي ڪارڪنن کي گرفتار ڪيو ويو آهي. سنڌ جي وڏي وزير سيد قائم علي شاهه پاران ايم ڪيو ايم وفد کي اسيمبلين مان استعفائون واپس وٺڻ تي واڌايون ڏنيون ويون ۽ خاطري ڪرائي وئي ته حڪومت ڪنهن به گروپ جي سرپرستي نه ڪري رهي آهي، ڏوهاري ڪير به هجي ان خلاف ڪارروائي ٿيندي. ايم ڪيو ايم ۽ پ پ وفد ۾ مڪاني چونڊن سميت مختلف معاملن تي ڳالهيون ٿيون ۽ مستقبل ۾ پڻ ملاقاتون جاري رکڻ تي اتفاق ڪيو ويو.

 

آمريڪي ميڊيا پاڪ ڀارت ڇڪتاڻ ۾ ذميوار ڀارتي وزيراعظم کي قرار ڏيئي ڇڏيو

نيويارڪ (اين اين آءِ) آمريڪي ميڊيا پاڪستان ۽ ڀارت وچ ۾ وڌندڙ ڇڪتاڻ تي ڳڻتي جو اظهار ڪندي ان جو ذميوار ڀارتي وزيراعظم نريندر مودي کي قرار ڏنو آهي ۽ ان تي زور ڀريو ته ڏکڻ ايشيا ۾ ايٽمي هٿيارن جي ڊوڙ روڪڻ تي عالمي برادري کي فوري توجهه ڏيڻ گهرجي آمريڪي اخبار نيويارڪ ٽائيمز پنهنجي ايڊيٽوريل ۾ انڪشاف ڪيو ته نيوڪليئر

سپلائيزر گروپ ۾ شموليت لاءِ پاڪستان کي ڪجهه شرطون پيش ڪيون ويون آهن ۽ ان کي چيو ويو ته هو ننڍن ايٽمي هٿيارن جي تياري فوري طور تي روڪي ڇڏي ايٽمي ڌماڪو نه ڪرڻ جي ٺاهه تي صهيحون ڪري ۽ ڊگهي مدي ميزائيلن جي تياري به روڪي ڇڏي اخبار لکي ٿي ته اٽڪل 120 وار هيڊز جي موجودگي ۾ پاڪستان آمريڪا ۽ روس کان پوءِ ايٽمي هٿيارن وارو وڏو ملڪ ٿي سگهي ٿو جنهن سان چين فرانس ۽ برطانيا پوئتي هليا ويندا هي صورتحال عالمي برادري لاءِ ڳڻتي جوڳي هئڻ گهرجي ڇو ته پاڪستان جا هي اختيار نه صرف ڀارت کي نشانو بڻائي سگهن ٿا پر پاڪستان وٽ ڊگهي فاصلي جا نيو ڪليئر ميزائيل به موجود آهن جڏهن ته پاڪستان ۾ انتهاپسند گروپ موجود آهن جن کي ڀارت مخالف سيڪيورٽي حلقن جي مبينه طور تي پٺڀرائي حاصل آهي جنهن سان ڏکڻ ايشيا ۾ خطرا وڌيڪ وڌي وڃن ٿا.

 

حڪومت قرض وٺي عوام کي غلام بڻائي ڇڏيو آهي: عمران خان

اسلام آباد (بيورو) پاڪستان تحريڪ انصاف جي چيئرمين عمران خان چيو آهي ته حڪومت قرض وٺي عوام کي غلام بڻائي ڇڏيو آهي اسپيڪر قومي اسيمبلي جي چونڊ لاءِ پنهنجو ووٽ ڪاسٽ ڪرڻ کان پوءِ ميڊيا سان ڳالهائيندي عمران خان چيو ته پاڪستان علامه اقبال جو هڪ پراڻو خواب هو جڏهن ته نهايت افسوس جي ڳالهه آهي جو سڄي دنيا مان قرض وٺي اسان پاڪستاني قوم کي غلام بڻائي ڇڏيو آهي جنهن کان به قرض وٺنداسين هو اوهان تي پنهنجو شرطون لاڳو ڪندو اسان جو جيڪو ڪردار هو اهو اسان ادا ڪيو ۽ ڪري رهيا آهيون عمران خان حڪومت ورلڊ بئنڪ ۽ آءِ ايم ايف کان قرض وٺي رهي آهي جنهن کان قرض وٺي رهيا آهيون ان جو غلام ٿيڻو پوي ٿو قرضن جو بار عوام تي پوندو ۽ سڄي قوم غلام بڻجي ويندي.

 

قائد اعظم مديني جهڙي اسلامي رياست جو چيو پر نواز شريف چوي ٿو ته پاڪستان کي لبرل بڻائينداسين: سراج الحق

لاهور:جماعت اسلامي جي امير سراج الحق چيو آهي ته قائد اعظم پاڪستان کي مديني شريف جهڙي اسلامي رياست بڻائڻ جو چيو هو پر وزيراعظم نواز شريف چوي ٿو ته پاڪستان کي لبرل بڻائينداسين. لاهور ۾ علاما اقبال جي جنم ڏينهن جي حوالي سان ايوان اقبال ۾ رٿيل تقريب کي خطاب ڪندي سراج الحق چيو ته  ترڪي سيڪيولرازم کان اسلامي ترڪي طرف سفر شروع ڪري ڇڏيو آهي، اسان پاڪستان کي علاما اقبال ۽ قائد اعظم وارو پاڪسان بڻائينداسين. سندس چوڻ هو ته علاما اقبال هڪ فلسفي، نظريي ۽ انسانيت جو نالو آهي، سراج الحق جو چوڻ هو ته جماعت اسلامي ملڪ ۾ اسلامي نظام لاڳو ڪرڻ لاءِ جاکوڙي رهي آهي.

 

منهنجو جھيڙو آصف زرداري سان آهي، ان جي کير پياڪ حوارين سان نه : ذوالفقار مرزا

بدين (ڊ.ر) ڊاڪٽر ذوالفقار مرزا چيو آهي ته منهنجو جھيڙو آصف زرداري سان آهي. ان جي کير پياڪ حوارين سان نه آهي. سنڌ منهنجو ايمان آهي. زرداري 11 سال جيل ۾ به عيش و آرام سان گذريا جيل جون اذيتون ۽ سختيون هن نه ڏٺيون. سنڌ ۾ شهيد محترمه جي سيڪورٽي منهنجي حوالي هئي، ڪارساز سانحي ۾ مون پنهنجي زندگي خطري ۾ وجھي شهيدبينظير ڀٽو کي باحفاظت بلاول هائوس پهچايو پنڊي ۾ زرداري جا ساٿاري شهيد بينظير تي حملي وقت ڀڄي ويا هئا اهڙو اظهار هن بدين جي ملوڪ شاهه پاڙي ۾ مرزا گروپ پاران وارڊ نمبر 7 جي ميونسپل ڪميٽي جي اميدوار محمد رحيم کٽي پاران سڏايل وڏي عوامي ميڙاڪي کي خطاب ڪندي ڪيو. ان موقعي تي هن چيو ته آئون وارڊ نمبر 7 ميونسپل ڪميٽي جي اميدوار رحيم کٽي کي مبارڪباد ڏيان ٿو ته   جو هزارن جي تعداد ۾ سندس حمايت ۾ ماڻهو گڏ ٿيا آهن ضلعي سميت سموري سنڌ جي عوام منهنجي ساٿ ڏئي ته گڏجي سنڌ ۾ ڀتا خوري ڪرپشن ڪندڙ ۽ دهشتگردن جو صفايو ڪري سنڌ کي امن جو گهر بڻائي سگھجي ٿو. بدين جي عوام سان اسان جو رشتو خوشين، غمين، جيئڻ ۽ مرڻ جو آهي بدين منهنجو گهر آهي ۽ اسان ضلعي جي عوام جي خدمت ڪئي آهي. منهنجو جيئڻ مرڻ عوام سان آهي جيڪو رشتو ڪڏهن به ٽٽي نٿو سگهي. ضلعي ۾ ترقياتي ڪمن سميت هزارين  نوجوانن کي نوڪريون ڏنيون ۽ ضلعي ۾ 980 غريب ماڻهن کي بجلي جون  اسڪيمون ۽ بدين گولارچي، ڪڍڻ، لنواري، ترائي، ڏندو، تلهار ۽ سوين شهرين  ۽ ڳوٺن تي گئس جي سهولت مهيا ڪئي. بدين گولاڙچي ۽ ٽنڊوباگو ۾ سرڪاري خالي پيل پلاٽن تي شهيدن جي نالي سان وڏا پارڪ ٺهرائي عوام کي سير تفريح جي سهولت ڏني. عوام لٽيرن، قبضه گيرن ۽ دهشتگردن جي پٺڀرائي ڪندڙن کي هرگز ووٽ نه ڏيندو. بدين ضلعي مان مرزا گروپ جا نامزد اميدوار  ڪامياب ٿيندا ۽ ضلعي مان زرداري ليگ جو صفايو ڪيو ويندو. ان موقعي  ميونسپل  وارڊ نمبر 7 جي اميدوار رحيم  کٽي جلسي کي خطاب ڪندي چيو ته اڄ مونکي يقين ٿي ويو آهي هن وڏي عوامي ميڙ جي اچڻ تي شير سنڌ ڊاڪٽر ذوالفقار مرزا جي ڪاميابي آهي. عوام جي ووٽن سان ڪامياب ٿي عوام جي خدمت ڪندس. هن وارڊ جي عوام جي بنيادي مسئلن پاڻي، بجلي گئس، ڊرينييج، گھٽين روڊن جي حل لاءِ آئون ڊاڪٽر ذوالفقار مرزا جي سرپرستي ۽ قيادت ۾  هڙان وڙان پتوڙيندس. عوام ڊاڪٽر ذوالفقار ۽ ان جي نامزد  اميدوارن کي ڪامياب ڪري سڄو ضلعو ڪلين سوئيپ ڪيندو. ان موقعي  تي ڊاڪٽر عبدالخالق کٽي، نورمحمد نوتڪاڻي، عمران سومرو، رئيس عبدالقادر گوپانگ، غلام حسين انصاري ۽ ٻين خطاب ڪيو. جڏه ته پنڊال ۾ ڊاڪٽر ذوالفقار جي اچڻ تي هزارين ماڻهن اٿي بيهي آيو آيو مرزا آيو، آيو آيو شير آيو  جا اڀ ڏاريندڙ نعرا هنيا ۽ گلن جي ورکا ڪئي سون جي تعداد ۾ کيس اجرڪون اوڍايون ويون. عبدالقادر بلوچ پاران کيس پٽڪو پارايو ويو.

 

سنڌ ۾ مڪاني چونڊن جو ٻيو مرحلو: بدين ۽ سانگهڙ ضلعا انتهائي حساس قرار

حيدرآباد (اي پي پي) سيڪريٽري اليڪشن ڪميشن آف پاڪستان بابر يعقوب فتح محمد چيو آهي ته بلدياتي چونڊن جي ٻئي مرحلي جي سلسلي ۾ امن امان ۽ صاف ۽ شفاف چونڊون ڪرائڻ جي حوالي سان لاڳاپيل ادارن سان گڏجاڻيون جاري آهن. سومر ڏينهن حيدرآباد ۾ بلدياتي چونڊن جي ٻئي مرحلي جي حوالي سان امن امان جو جائزو وٺڻ جي سلسلي ۾ ڪيل اهم گڏجاڻي بعد ميڊيا سان ڳالهائيندي بابر يعقوب چيو ته اليڪشن ڪميشن آف پاڪستان ۽ سنڌ حڪومت وچ ۾ سنڌ جي 15 ضلعن ۾ ٿيندڙ اليڪشن جي حوالي سان گڏجاڻيون ڪيون پيون وڃن ته جيئن اهي چونڊون پرامن ماحول ۾ صاف شفاف نموني ٿي سگهن، هن ٻڌايو ته ٻئي مرحلي ۾ سنڌ جي 15 ضلعن ۾ ٿيندڙ چونڊ ۾ 7 هزار پولنگ اسٽيشنز ٺاهيون ويون آهن، جن تي 60 هزار پولنگ عملو ڊيوٽي سرا نجام ڏيندو، جڏهن ته انهن پولنگ اسٽيشنن تي 51 هزار نفري مقرر ڪئي ويندي، هن ٻڌايو ته سنڌ جي 2500 پولنگ اسٽيشنز کي انتهائي حساس جڏهن ته 2500 پولنگ اسٽيشنن کي حساس قرار ڏنو ويو آهي، هن ٻڌايو ته اجلاس ۾ سمورن ڊي آر اوز ۽ لاڳاپيل عملدارن گهر ڪئي آهي ته انهن پولنگ اسٽيشنن تي فوج يا رينجرز مقرر ڪئي وڃي، جڏهن ته سنڌ جي گهرو کاتي طرفان پڻ فوج جون 16 ڪمپنيون مقرر ڪرڻ جي گهر ڪئي وئي آهي، ان سلسلي ۾ اليڪشن ڪميشن آف پاڪستان انهن ڳالهين تي بحث لاءِ سڀاڻي اربع تي اسلام آباد ۾ هڪ اجلاس سڏايو آهي، جنهن ۾ دفاع وارو سيڪريٽري، وفاقي گهرو سيڪريٽري ۽ ٻنهي صوبن جا گهرو سيڪريٽري شرڪت ڪندا، جنهن ۾ غور بعد ڪو فيصلو عمل ۾ آندو ويندو، هن ٻڌايو ته هن قسم جي هڪ ٻي اهم گڏجاڻي 13 تاريخ تي لاهور ۾ پڻ گهرائي وئي آهي، رڳو انتهائي حساس ۽ حساس نه پر هر پولنگ اسٽيشن تي مڪمل نظر رکي ويندي، هن چيو ته رڳو حيدرآباد جي 203 پولنگ اسٽيشنن کي پڻ نظر ۾ رکيو ويو آهي، ڇو ته اتي به خدشا موجود آهن، هن ٻڌايو ته خيرپور واقعي کي نظر ۾ رکندي اهو چئي سگهجي ٿو ته اهو لازمي ناهي ته حساس پولنگ اسٽيشنن تي ئي ڪو واقعو ٿئي، ان لاءِ هاڻي اسان جي هر پولنگ اسٽيشن تي مڪمل نظر هوندي، اليڪشن جي ڪوڊ آف ڪنڊڪٽ تي عمل کي يقيني بڻايو ويندو، هن سمورن ڊي آر اوز ۽ لاڳاپيل اختيارين کي هدايت ڪئي ته اهي چونڊن ۾ بيٺل سمورن اميدوارن کي ان بابت آگاهي ڏين، هٿيارن جي نمائش تي بندش لڳائي ويندي، هن ٻڌايو ته امن امان کي يقيني بڻائڻ لاءِ سمورن ادارن کي غير جانبدار هئڻ گهرجي، اي سي پي جي اها آئيني ذميواري آهي ته اها ادارن سان سهڪار جاري رکي، هن ٻڌايو ته هن گذريل ڏينهن سيڪيورٽي پرنٽنگ پريس جو دورو ڪيوآهي، جتي ڇپائي جو ڪم 97 سيڪڙو مڪمل ٿي چڪو آهي ۽ سنڌ جي 15 مان 7 ضلعن ۾ بيلٽ پهچائڻ وارو ڪم مڪمل ڪيو ويو آهي، باقي ضلعن اندر هڪ ٻن ڏينهن ۾ بيلٽ پيپر پهچي ويندا، هن سمورن ڊي آر اوز کي هدايت ڪئي ته ڪنهن به پولنگ اسٽيشن جي تبديلي بنا سبب نه ڪئي وڃي، ڪنهن به پولنگ اسٽيشن تي ڪنهن به واقعي جي صورت ۾ فوري طور تي اطلاع ڏنو وڃي ۽ عملي جي مقرري کي هر حال ۾ يقيني بڻايو وڃي، جڏهن ته سمورين سياسي پارٽين سان برابري جي بنيادن تي ورتاءُ ڪيو وڃي، هڪ سوال جي جواب ۾ هن ٻڌايو ته خيرپور واقعي جي جاچ هلندڙ آهي، جيڪا تمام جلد منظر عام تي آندي ويندي، هن ٻڌايو ته ضلعي سيڪيورٽي ڪاميٽي جي رپورٽ تي حساس ۽ انتهائي حساس پولنگ اسٽيشنن جو تعين ڪيو وڃي ٿو، جڏهن ته ماضي جي رپورٽن ۽ تازين حالتن کي نظر ۾ رکندي پولنگ اسٽيشنن جي حساس ۽ انتهائي حساس جو تعين ڪيو وڃي ٿو، هڪ سوال تي هن چيو ته هزارن جي انگ ۾ ٻاهران عملو گهرائي چونڊن جي ڊيوٽي نٿي ڪرائي سگهجي، پر تنهن هوندي به هنن چونڊن ۾ اليڪشن ڪميشن آف پاڪستان ڊي آر اوز گهڻي انگ ۾ ٻاهرين شهرن جا رکيا آهن، هڪ ٻئي سوال تي هن چيو ته آرمي پولنگ اسٽيشن اندر هجي يا ٻاهر ان بابت اڃا فيصلو نه ٿي سگهيو آهي، پر وڏي انگ ۾ پولنگ اسٽيشنن تي اندر ۽ ٻاهر آرمي مقرر ڪرڻ شايد ڏکيو ڪم آهي، پر جتي گهڻو خطرو هوندو اتي اهو عمل ضرور ڪبو، هن چيو ته سانگهڙ ۽ بدين ضلعا حساس ترين ضلعن ۾ شامل آهن، جڏهن ته سانگهڙ ۾ ڪيتري انگ ۾ سيڪيورٽي عملو مقرر ڪجي ان تي پڻ غور هلندڙ آهي، بدين ضلعي ۾ هڪ سياسي شخصيت طرفان ڌمڪيون ڏيڻ بابت هن چيو ته ڌمڪين جو نوٽيس ورتو ويو آهي، جڏهن ته چونڊن ۾ ڌانڌلي کي روڪڻ لاءِ هڪ ڊي آر او کي پاسيرو جڏهن ته 2 کان 3 آر اوز تي نظر رکي پئي وڃي، هن چيو ته اليڪشن ڪميشن ۾ ميڊيا سيل موجود آهي، جنهن سان لهوچڙ ۾ اچي سگهجي ٿو، هن چيو ته پاڪ آرمي هميشه اي سي پي جي گهرجن کي نظر ۾ رکندي پنهنجا جوان اليڪشن ڊيوٽين لاءِ ڏنا آهن، جيڪڏهن ضرورت پئي ته وڌيڪ فوج پڻ گهرائي سگهجي ٿي، هن ٻڌايو ته پهرين مرحلي جي چونڊن ۾ اليڪشن ڪميشن آف پاڪستان کي 140 شڪايتون مليون، جن جي جاچ ضرور ڪئي ويندي، ان کان اڳ سيڪريٽري اليڪشن ڪميشن آف پاڪستان بابر يعقوب فتح محمد جي سربراهي ۾ چونڊن ۾ امن امان جي حوالي سان هڪ اهم گڏجاڻي ڪئي وئي، جنهن ۾ آءِ جي سنڌ، سنڌ جي گهرو کاتي جو ايڊيشنل چيف سيڪريٽري ، حيدرآباد، نوابشاهه ۽ ميرپور خاص جي ريجنل اليڪشن ڪمشنرن، رينجرز جي سيڪٽر ڪمانڊر ۽ ٻين اعليٰ عملدارن شرڪت ڪئي.