تازيون خبرون

Daily Archives: November 9, 2015

وڏي وزير جو بيان رد، دير جي ذميوار سنڌ سرڪار آهي: وفاقي حڪومت

اسلام آباد (اين اين آءِ) وفاقي حڪومت سنڌ کي فنڊ نه ڏيڻ واري قائم علي شاهه جي بيان کي رد ڪري ڇڏيو، ناڻي وزارت جي ترجمان مطابق دير جي ذميوار سنڌ حڪومت آهي، سنڌ اينگرو پراجيڪٽ جي حوالي سان ناڻي وزارت جي ترجمان وضاحت ڪئي ته پراجيڪٽ لاءِ حڪومتي گرانٽي ۾ دير جي ذميوار سنڌ حڪومت آهي، هن چيو ته ان ڏس ۾ وڏي وزير جو بيان حقيقتن جي ابتڙ آهي ۽ ڪوڙ تي ٻڌل آهي، ڪي فور پراجيڪٽ لاءِ وفاق جي فنڊز کي سنڌ حڪومت استعمال نه ڪري سگهي، پهريان کان جاري ٿيل فنڊن جي استعمال کانپوءِ وڌيڪ فنڊ جاري ٿيندا، ترجمان چيو ته صوبائي حڪومتن پاران موڪليل معاملا ميرٽ تي اڪلايا وڃن ٿا.

 

9 گوسڙو ڊاڪٽر برطرف، 15 کي شوڪاز نوٽيس جاري

ڪراچي(اسٽاف رپورٽر)سنڌ جي صحت کاتي واري وزير ڄام مهتاب حسين ڏهر ڊيوٽي تان بغير ڪنهن اطلاع جي مسلسل غيرحاضر رهندڙ 9 ڊاڪٽرن کي برطرف ڪري ڇڏيو آهي. برطرف ٿيندڙ ڊاڪٽرن ۾ ڊاڪٽر صوفيه، ڊاڪٽر ماريه بلوچ، ڊاڪٽر سيتا، ڊاڪٽر جي ڪماري، ڊاڪٽر معصومه، ڊاڪٽر نورين حنيف، ڊاڪٽر فرهين ۽ ڊاڪٽر محمد بيگ شامل آهن. جڏهن ته 15 ڊاڪٽرن کي فائنل شوڪاز نوٽيس جاري ڪيا ويا آهن، ته جيئن 15 ڏينهن جي اندر اندر اهي پنهنجي ڊيوٽين تي حاضر ٿين، ٻي صورت ۾ انهن کي به برطرف ڪيو ويندو. ان موقعي تي صوبائي وزير اهو ٻڌايو ته انهن غير حاضر ڊاڪٽرن مان گهڻا بغير ڪنهن اطلاع يا اجازت جي ٻاهرين ملڪن ڏانهن ويل آهن.

 

وزيراعظم فاٽا جي بهتري لاءِ 5 رڪني ڪميٽي جوڙي ڇڏي، نوٽيفڪيشن جاري

اسلام آباد (بيورو) وزيراعظم نوازشريف فاٽا بهتري لاءِ 5 رڪني ڪميٽي جوڙي ڇڏي ، جنهن جو نوٽيفڪيشن موڪل جو ڏينهن هجڻ کانپوءِ به جاري ڪيو ويو. ذريعن مطابق اسپيڪر جي چونڊن لاءِ فاٽا کان ميمبر جي جي جمال مسلم ليگ(ن) جي اميدوار سردار اياز صادق جي حق ۾ هٿ کڻڻ جو اعلان ڪري ڇڏيو، جنهن کانپوءِ وزيراعظم نوزشريف فاٽا بهتري لاءِ 5 رڪني ڪميٽي جوڙي ڇڏي جنهن جو نوٽيفڪيشن به جاري ڪيو ويو آهي، نوٽيفڪيشن ۾ چيو ويو آهي ته ڪميٽي  ترت پنهنجو ڪم شروع ڪري ڇڏي.فاٽا بهتري ڪميٽي ۾ وزير اعظم جي گهرو معاملن واري  صلاحڪار سرتاج عزيز، خيبرپختونخوا جي گورنر سردار مهتاب عباسي، وفاقي وزير عبدالقادر بلوچ، ناصر جنجوعا ۽ زاهد حامد شامل آهن. جڏهن ته وفاقي وزير سيفران عبدالقادر بلوچ ڪميٽي جي سيڪريٽري جا ڪم سنڀاليندو.

 

موجوده مرڪزي حڪومت ڪارڪردگي ڏيکارڻ ۾ ناڪام رهي آهي: خورشيد شاهه

سرگوڌا (م.ڊ) قومي اسيمبلي ۾ مخالف ڌر جي اڳواڻ خورشيد شاهه چيو آهي ته جمهوريت کي بچائڻ لاءِ اسپيڪر جي چونڊ ۾ اياز صادق جي حمايتر ڪرڻ جو فيصلو ڪيو آهي. سرگوڌا ۾ ميڊيا سان ڳالهائيندي مخالف ڌر جي اڳواڻ خورشيد شاهه جو چوڻ آهي ته جمهوريت کي بچائڻ لاءِ اسپيڪر جي چونڊ ۾ ايازصادق جي حمايت جو فيصلو ڪيو آهي، قومي اسيمبلي جي اسپيڪر شپ جي معاملي تي شفقت محمود سان رابطو ناهي ٿيو. سندس چوڻ هو ته  موجوده مرڪزي حڪومت ڪارڪردگي ڏيکارڻ ۾ ناڪام رهي آهي، ٻين صوبن جي ڳالهه ڇڏيو، پنجاب ۾ به سهولتون نه هجڻ جي برابر آهن، ماڻهن وٽ پيڻ جو پاڻي ناهي،۽ حڪومت ميٽرو بسن ۽ ٽرينن تي پئسو ضايع ڪري رهي آهي.خورشيدشاهه چيو ته ملڪ ۾ پڇاڻو بنا فرق جي ٿيڻ گهرجي، ڪرپشن جي نالي تي انتقامي ڪارروائي نه ٿيڻ گهرجي، ڇا پنجاب جا حڪمران کير سان وهنتل آهن جو رڳو سنڌ ۾ ڪارروايون هلي رهيون آهن. عمران خان جي ريحام سان طلاق جي معاملي تي سندس چوڻ هو ته  عمران خان کي هاڻي ٽين شادي ڪرڻي آهي يا نه ڪرڻي آهي، عمران خان کان پڇيو وڃي پر عمران خان کي هڪ صلاح آهي ته هو ڪجهه ڏينهن لاءِ موڪلن تي هليو وڃي.

 

110 ٽيڪس نه ڏيندڙن جا اي سي ايل ۾ شامل ڪرڻ جو فيصلو

اسلام آباد (اين اين آءِ) فيڊرل بورڊ آف روينيون 110 ٽيڪس نه ڏيندڙن جا نالا ايگزيڪٽ ڪنٽرول لسٽ ۾ شامل ڪرڻ جو فيصلو ڪري ورتو، ڊسمبر تائين 2 هزار ٽيڪس چورن کي بليڪ لسٽ ڪيو ويندو، ذريعن مطابق 2012-13-14 ۾ جن ماڻهن ٽيڪس نه ڏني، ايف بي آر انهن مان 110 وڏن ٽيڪس نه ڏيندڙ جا نالا اي سي ايل ۾ شامل ڪرڻ جو فيصلو ڪيو آهي، ان سلسلي ۾ ايف بي آر پنهنجا سمورا ريجنل ٽيڪس آفيسرن کي انتظام ڪرڻ جي هدايت ڪئي آهي، گهرو وزارت کي به خط لکيو ويندو، ذريعن مطابق ايف بي آر هلندڙ سال جي آخر تائين 25 هزار کان وڌيڪ ٽيڪس نه ڏيندڙن کي بليڪ لسٽ ڪرڻ جو فيصلو آهي انهن کي نوٽيس به اماڻيا ويا آهن.

 

لوئر دير ۾ بيڪري اندر باهه،5 پورهيت فوت

لوئر دير (م.ڊ) لوئر دير ۾ بيڪري اندر بجلي جي شارٽ سرڪٽ سبب باهه لڳڻ جي نتيجي ۾ 5 پورهيت فوت ٿي ويا، خال بازار ۾ هڪ بيڪري ۾ بجلي مان باهه لڳي وئي، جنهن سبب بيڪري اندر ستل 5 پپورهيت بيهوش ٿي ويا، اطلاع ملڻ تي فائر برگيڊ پهچي باهه وسائي ورتي، جنهن کانپوءِ بيهوش ٿيل پورهيتن کي طبي امداد لاءِ ڊسٽرڪٽ هيڊڪوارٽراسپتال نيو ويو، جتي علاج دوران 5 ئي ڄڻا فوت ٿي ويا، پوليس مطابق فوتي پورهيتن جو تعلق آزاد ڪشمير سان آهي، جن جا مڙهه سندن اباڻن علائقن ڏانهن روانا ڪيا ويا.

 

اسپيڪر لاءِ نامزدگي ڪاغذ جمع، پي ٽِي آئي کانسواءِ سڀ پارٽيون مونکي ووٽ ڏيڻ لاءِ تيار آهن: اياز صادق

اسلام آباد (بيورو) مسلم ليگ (ن) جي ايم اين اي اياز صادق قومي اسيمبلي جي اسپيڪر جي عهدي لاءِ نامزدگي ڪاغذ جمع ڪرائي ڇڏيا، سندس دعويٰ آهي ته تحريڪ انصاف کانسواءِ سڀئي پارٽيون کيس ووٽ ڏيڻ لاءِ تيار آهن، اياز صادق پنهنجي ساٿين سان گڏجي قومي اسيمبلي سيڪريٽريٽ پهتو،جتي هن پنهنجا نامزدگي ڪاغذ جمع ڪرايا،ان موقعي تي ميڊيا سان ڳالهائيندي اڳوڻي اسپيڪر چيو ته پيپلز پارٽِي ۽ مخالف ڌر جي اڳواڻ سيد خورشيد شاهه، جي يو آئي (ف) جي سربراهه مولانا فضل الرحمان، عوامي نيشنل پارٽي جي غلام احمد بلور، ايم ڪيو ايم، مسلم ليگ فنڪشنل ۽ ٻين پارٽي کيس ووٽ ڏيڻ جي خاطري ڪرائي آهي. سندس چوڻ هو ته مسلم ليگ (ق) جي پرويز الاهي ۽ مسلم ليگ (ضياءَ) جي اعجاز الحق به کيس ووٽ ڏيڻ جو اعلان ڪيو آهي.هن ٻڌايو ته پختونخوا ملي عوامي پارٽي جي سربراهه محمود خان اچڪزئي، قومي وطن پارٽي جي آفتاب احمد شيرپائو۽ پرويز مشرف جي آل پاڪستان مسلم ليگ جي ميمبر افتخار الدين سان به ووٽ ڏيڻ جي حوالي سان سندس ڳالهه ٻولهه ٿي آهي، جڏهن ته فاٽا جي آزاد گروپ جي حمايت وٺڻ لاءِ اڄ ڳالهيون ٿينديون. ڪي پي ڪي ۾ تحريڪ انصاف جي اتحادي جماعت بابت اياز صادق جو چوڻ هوته جماعت اسلامي به کيس ووٽ ڏيڻ جو اعلان ڪيو آهي، ان حوالي سان لياقت بلوچ ۽ قومي اسيمبلي ۾ جماعت جي پارلياماني ليڊر صاحبزادا طارق الله سان ڳالهه ٻولهه ٿي چڪي آهي. تحريڪ انصاف جي حوالي سان هن چيو ته خورشِيد شاهه ۽ پرويز الاهي پي ٽي آئي سان رابطو ڪيو آهي، سندس چوڻ هو ته جيڪڏهن مان اسپيڪر چونڊجي ويس ته پهرين کان بهتر ڪم ڪرڻ جي ڪوشش ڪندس،قاعدن ۽ ضابطن مطابق مخالف ڌر جي ميمبرن کي ڳالهائڻ جو موقعو ڏنو ويندو. هڪ سوال جي جواب ۾ اياز صادق چيو ته عمران خان کي مات ڏئي هيٽ ٽرڪ مون ڪئي،2012ع ۽ 2013ع ۾ عمران خان کانپوءِ هاڻ وري ننڍي چونڊ ۾ پي ٽي آئي جي عليم ڊار کي مات اصل ۾ عمران خان جي هار آهي.

 

ڀارت ۾ اقليتن تي ظلم جي خلاف اولهه جي ماٺ ڳڻتي جوڳي آهي: رضا رباني

پشاور/سرگوڌا (م.ڊ) سرگوڌا ۾ ميڊيا سان ڳالهائيندي  سينٽ جي چئيرمين رضا رباني چيو ته ڀارت ڪنهن به غلط فهمي ۾ نه رهي، ملڪ ڏانهن ميري اک سان ڏسندڙن کي منهن ٽوڙ جواب ڏينداسين.  سندس چوڻ هو ته ڀارت ۾ اقليتن تي ظلم جي خلاف اولهه جي ماٺ ڳڻتي جوڳي آهي،سندس چوڻ هو ته سينٽ سان خطاب دوران چيف جسٽس جو اهو چوڻ بلڪل صحيح آهي ته جيڪڏهن جمهوري ادارا ٺيڪ طرح سان ڪم نه ڪندا آهن ته ٻيا ادارا مداخلت ڪندا آهن، جمهوري ادارن جي مضبوطي لاءِ سڀني کي گڏجي پنهنجو ڪردار نڀائڻو پوندو. ان کانپوءِ پشاور ۾ مفتي محمود سيمينار سان خطاب ڪندي چئيرمين سينٽ چيو ته ماضي ۾ آمرن آئين کي پيرن هيٺان چيڀاٽيو، آمريت جي دور ۾ جمهوري ادارن کي هڪٻئي سان ويڙهايو ويو، آئين کي اصلي شڪل ۾ آڻڻ لاءِ سڀني سياسي پارٽين ڪردار نڀايو، اڄ هن ملڪ کي ٻيهر اهڙي سوچ جي ضرورت آهي، وفاق جي مضبوطي لاءِ سڀ سياسي قوتون اختلاف وساري ڇڏين، جمهوريت ئي پاڪستان جي مضبوطي جو واحد رستو آهي. اسان چاهيون ٿا ته ادارن وچ ۾ رابطا وڌن، گڏجي ويهن، ڪا وچين واٽ ضرور نڪرندي، ڇو ته وچين واٽ ئي قوم جي ڀلائي جي واٽ آهي.

 

بهار مودي کي آرسي ڏيکاري ڇڏي، چونڊن ۾ بي جي پي کي بدترين مات

پٽنه (م.ڊ) ڀارتي وزيراعظم نريندر مودي کي انتها پسند پاليسين جو پهريون نتيجو ملي ويو، بهار جي چونڊن ۾ بي جي پي کي مات ملي ۽ جنتا دل اتحاد گهڻائي ماڻي ورتي، نتيش ڪمار ئي وڏو وزير رهندو.بڪا-بهار مودي کي آرسي ڏيکاري ڇڏي،مودي سرڪار جي حڪومت ۾ اچڻ کانپوءِ کان هاڻي تائين پاڪستان ۽ مسلمان مخالف قدم، بيان، ۽ دعويٰ، مٽي ۾ ملي ويا، ڀارتي عوام بي جي پي جي تخت کي اونڌو ڪري ڇڏيو،۽ اهو فيصلو ٻڌائي ڇڏيو ته ڀارت ۾ عوام کي هڪٻئي سان نه ٿو ويڙهائي سگهجي.نتيش ڪمار جي اڳواڻي ۽ لالو پرساد جي ساٿ ۾ ان اتحاد 140 کان وڌيڪ سيٽون ماڻي ورتيون آهن، ميٿيلا،سيمانچل، بوج پور ميگاڊهه ۽ انگا، سڀ صاف ٿي ويا، جتنا دل بي جي پي تي ٻهارو ڦيري ڇڏيو.

 

عمران خان جي ڪتن جو بيڊروم اچڻ ۽ جمائما سان لاڳاپا ريحام سان طلاق جو اصل ڪارڻ بڻيا: برطانوي اخبار

لنڊن (م.ڊ) برطانوي اخبار دعويٰ ڪئي آهي ته عمران خان ۽ ريحام خان ۾ ڪيترن ئي معاملن تي اختلاف هئا پر عمران جي ڪتن سان وڏي لڳاءَ ۽ اڳوڻي گهرواري جمائما خان  سان لاڳاپا عمران ۽ ريحام ۾ طلاق جو اصل ڪارڻ بڻيا. برطانوي اخبار ڊيلي ميل پنهنجي رپورٽ ۾ انڪشاف ڪيو آهي ته ريحام خان جا مائٽ بني گالا ايندا ويندا هئا پر عمران خان جي مائٽن توڙي دوستن جو بني گالا اچڻ ريحام کي نه وڻندو هو،رپورٽ ۾ چيو ويو آهي ته ريحام خان کي عمران جي ڪتن جو بيڊروم ۾ اچڻ به صفا نه وڻندو هو، ان کانسواءِ عمران خان جا پنهنجي اڳوڻي گهرواري جمائما خان سان لاڳاپا به ريحام کي پسند نه هئا، اهي ئي اختلاف ٻنهي وچ ۾ طلاق جو اصل ڪارڻ بڻيا، اخبار مطابق ريحام خان سياست ۾ داخل ٿيڻ سان گڏ عمران خان کي پنهنجي قبضي ۾ رکڻ پئي چاهي، جيڪا ڳالهه پي ٽِي آئي چيئرمين کي نه پئي وڻي.ڊيلي ميل لکيو آهي ته عمران خان ايس ايم ايس ذريعي ريحام کي ٽي ڀيرا طلاق. طلاق، طلاق جو نياپو اماڻيو ۽ اي ميل به ڪئي، ريحام کي طلاق وارو ايس ايم ايس برمنگهم ايئرپورٽ پهچڻ تي مليو.