تازيون خبرون

Daily Archives: November 7, 2015

فلم سلطان عامر خان جي فلم دنگل کان بلڪل مختلف آهي: سلمان خان

ممبئي(شوبز نيوز) ڀارتي فلم صنعت جي سپر اسٽاف سلمان خان چيو آهي ته فلم سلطان عامر خان جي فلم دنگل کان بلڪل مختلف آهي. سلمان خان فلم دنگل جي واکاڻ ڪندي چيو ته فلم جي ڪهاڻي تمام خوبصورت آهي. سلمان خان عامر خان سان اختلافن جي خبرن جي ترديد ڪندي چيو ته اهڙي ڪا به ڳالهه نه آهي. هن چيو ته اسان ٻنهي جون فلمون هڪٻئي کان مختلف آهن. ان لاءِ ٻنهي فلمن ۾ ڀيٽ ڪرڻ تي خبرون پکيڙيندڙن کي ڏک ٿيندو. هن چيو ته دنگل هڪ شاندار سچي ڪهاڻي آهي جيڪا پيءُ ۽ سندس ٻن ٻارن جي ڪهاڻي آهي جڏهن ته سندس فلم سلطان هڪ رومانوي ڪهاڻي آهي. سلطان راند ۽ محبت جي جنگ آهي ان لاءِ دنگل ۽ سلطان ۾ ڪو به مقابلو نه آهي. هن چيو ته اسان اداڪارن وچ ۾ تعلق کان علاوه ملڪ ۾ ڪيترا ئي اهڙا مسئلا آهن جن تي اسان کان وڌيڪ ڌيان ڏيڻ جي ضرورت آهي.

 

هالي ووڊ ڳائڻي برٽني اپيئرز نئين البم تي ڪم شروع ڪري ڇڏيو

لاس اينجلس: هالي ووڊ جي ڳائڻي برٽني اپيئرز نئين البم تي ڪم ڪرڻ شروع ڪري ڇڏيو آهي. سڌ سماءَ جي ذريعن مطابق ڳائڻي سماجي ميل ميلاپ واري ويب سائيٽ ٽوئيٽر تي البم تي ڪم ڪرڻ جي تصديق ڪندي چيو آهي ته نئين البم تي ڪم ڪرڻ لاءِ سخت محنت ڪري رهي آهي ۽ اهو البم نئين ۽ مختلف انداز ۾ هوندو جيڪو مداحن کي تمام گهڻو پسندايندو. هن چيو ته نئون البم تيار ٿيڻ کانپوءِ جلد رليز ڪيو ويندو.

 

ٽنڊولڪر ۽ وارن نمائشي ٽي 20 ڪرڪيٽ سيريز جي پهرين ميچ اڄ کيڏي ويندي

نيويارڪ(اسپورٽس نيوز) عظيم ڪرڪيٽر سچن ٽنڊولر ۽ شين وارن جي وچ ۾ نمائشي ٽي 20 ڪرڪيٽ سيريز جي پهرين ميچ (اڄ) ڇنڇر واري ڏينهن نيويارڪ ۾ کيڏي ويندي. ڪرڪيٽ آل اسٽارز سيريز 2015ع جي نالي سان کيڏيل سيريز ۾ ٽيسٽ کيڏندڙ ملڪ مان وسيم اڪرم ۽ برائن لارا سميت درجني رٽائرڊ ڪرڪيٽرز به ايڪشن ۾ نظر ايندا. سچن ٽنڊولڪر پنهنجي ٽيم بلاسٽر ۽ شين وارن جي واريرن جي اڳواڻي ڪندو. ٻنهي ٽيمن جي وچ ۾ نمائشي ٽي 20 سيريز جي پهرين ميچ (سڀاڻي) نيويارڪ ۾ کيڏي ويندي. واضح رهي ته ٻنهي ٽيمن جي وچ ۾ نمائشي ٽي 20 سيريز جي ٻي ميچ 11 نومبر تي هيوسٽن، جڏهن ته ٽين ۽ آخري ميچ 14 نومبر تي لاس اينجلس ۾ کيڏي ويندي. نمائشي ٽي 20 سيريز ۾ حصو وٺندڙ پليئرز وسيم اڪرم، شعيب اختر، ثقلين مشتاق، معين خان، سنگاڪارا، مرلي ڌرن، جي ورڌني، لارا، ڪورٽي واش، ڪرٽلي ايمبروز، گريم سوان، مائيڪل وان، جيڪ ڪيلس، شان پولاڪ، لانس ڪلوزنر، جونٽي روڊز، ايلن ڊونڊ، شين وارن، رڪي پونٽنگ، سيٿيو هيڊن، گلين ميگراٿ، بريڊ هيڊن، سچن ٽنڊولڪر، سارو گنگولي، وي وي ايس لڪشن ۽ اجيت اگارڪر شامل آهن.

 

بنگلاديش ۽ زمبابوي جي ڪرڪيٽ ٽيمن وچ ۾ پهرين ون ڊي ميچ (اڄ) کيڏي ويندي

ڍاڪا(اسپورٽس نيوز) بنگلاديش ۽ زمبابوي جي ڪرڪيٽ ٽيمن وچ ۾ ٽن هڪ ڏينهن جي بين الاقوامي ميچن تي ٻڌل سيريز جي پهرين ميچ (اڄ) ڇنڇر تي ڍاڪا ۾ کيڏي ويندي. زمبابوي جي ٽيم سيريز کيڏڻ لاءِ بنگلاديش پهچي چڪيآهي ۽ ان پريڪٽس ميچ ۾ بنگلاديش جي ڪرڪيٽ بورڊ اليون کي شڪست ڏئي دوري جي ڪامياب شروعات ڪئي هئي. ٻنهي ٽيمن وچ ۾ 3 ون ڊي ۽ 2 ٽي-20 ميچن جي سيريز کيڏي ويندي. ٻنهي ٽيمن وچ ۾ ون ڊي سيريز جي شروعات (اڄ) ڇنڇر تي ٿيندي جنهن بعد ٻنهي ٽيمن وچ ۾ سيريز جي ٻئين ميچ 9 نومبر جڏهن ته ٽئين ۽ آخري ميچ 11 نومبر تي کيڏي ويندي. ٻنهي ٽيمن وچ ۾ ٽي-20 سيريز جي پهرين ميچ 13 نومبر جڏهن ته ٻئين ۽ آخري ميچ 15 نومبر تي کيڏي ويندي.

 

اليڪشن، سياسي موسم ۽ سوشل ميڊيا: پروفيسر الله ڏنو ابڙو

واعدن جي موسم جي ٻئي دور جي شروعات: طارق سنديلو

هڪ ڀيري پاڙي جي هڪ چونڊيل ايم پي اي ۽ تر جي زميندار وٽ هلي ويس ڪنهن ڪم سانگي سائين جن پهريان ته ڏاڍو مان ڏنو حال احوال به اوريا ۽ مٿان وري مون سان گڏ هلندڙ پنهنجي خاص حامي کي فوري طورتي اهو جملو ٺهڪائي ڏنو ته هي ته فلاڻي پاڙي وارا آهن ۽ اسان کي ووٽ ڪندا ئي ناهن، بحرحال ڪوشش ڪنداسين ته هن جو ڪم ٿي وڃي.

بحر حال اچون ٿا مقصد جي ڳالهه تي به سنڌ ۾ مڪاني چونڊن جي پهرين مرحلي جي پڄاڻي بعد ٻيو دور شروع ٿي چڪو آهي، جئين ته پهرين دور ۾ ڪجهه خاميون ڏٺيون ويون هيون ان ڪري سنڌ سرڪار انهن خامين کي نه ورجائڻ لاءَ اهم اجلاس گهرائي جوڳا بندوبست ڪرڻ جا ارادا ظاهر ڪيا آهن، جن جي جيڪڏهن عمل ٿيو ته بهتر هوندو، جي نه ته سنڌي جي چوڻي موجب ( ساڳيا ڪنا ساڳ جا) هن مهل چونڊن ۾ بيٺل اميدوار پنهنجي ڪاميابي کي يقيني بڻائڻ خاطر ميدان ۾ نڪري پيا آهن، ۽ عوام جا به ڀاڳ کلي پيا آهن، جن جي درن تي سالن تائين نه لڙندڙ ڪامورا هاڻي پراڻين فوتگين کي تازو ڪري تعزيتون ڪرڻ لاءِ ميدان ۾ لٿل آهن، اڳ جيان اهڙا پڪا واعدا به ڪيا پيا وڃن ڄڻ سندس ڪاميابي بعد سنڌ پئرس بڻجي ويندي، چونڊ جلسڙين ۾ وڏي واڪي اميدوار عوام کي پنهنجي ڪيل خدمتن جا قصا بيان ڪري ووٽ ڏيڻ جي اپيل پيا ڪن، انهن ڳوٺن ۾ هاڻي گاڏين جون قطارون لڳيون پيون آهن جن ڳوٺن ۾ ڪو لڙي ئي ڪون، جن کي ڪڏهن رستي ۾ ڪامورا سلام جو جواب نه ڏيندا آهن هاڻي انهن جي درن تي وڃي کين وڏا وڏا ڀاڪر هنيا پيا وڃن، يقينن انهن اميدوارن جي ڪاميابي بعد اهي ڳوليا ته لڀندا ئي ڪو پر عوام ويتر عزاب ۾ اچي ويندو، جي ڪنهن ڪاموري جي ڀر وٺندو اهو هارائي ويو ۽ ان جي مقابلي ۾ بيٺل سرهو ڪامورو ميدان ماري ويو ته پوءِ مخالف غريب جا ته لاهه نڪري ويندا، حال بهتر ٿيڻ بجاءِ غريب جا حال ويتر عذاب بڻجي ويندا،

پهرين مرحلي جي پڄاڻي بعد آفيسرن جي مٽ سٽ جو سلسلو شروع آهي، ان سان گڏوگڏ مخالفن کي مختلف بهاني سان حيسائڻ ۽ پريشان ڪرڻ سان گڏ مخالفت ڪرڻ جو سبق سيکارڻ جا پراڻا نوان طريقا پڻ آزمايا پيا وڃن، جيڪو ٿيڻ نه گهرجي، ووٽر کي کليل آزادي هئڻ گهرجي ته هو ڪنهن کي ووٽ ڪري ٿو ۽ ڪنهن کي نه.

مڪاني چونڊن ۾ بيٺل اميدوارن مان ڪي کٽيندا ته ڪي هارائيندا ڇو ته ويڙهه جو اصول آهي ته 2 وڙهندا ته هڪ ئي کٽيندو، ان ڪري جيڪي اميدوار ميدان ۾ لٿل آهن ميدان مارڻ بعد اهو نه وسارين ته کين عوام چونڊيو آهي ۽ ان يوسي لاءِ چونڊيو آهي جنهن جي حد ۾ حامي به اچن ٿا ته مخالف به ان ڪري نمائندن کي گهرجي ته چونڊن ۾ ڪاميابي بعد پنهنجا پراوا واري سياست کي هڪ پاسي رکي پوري حد جي عوام جي خدمت ڪن ته بهتر هوندو ۽ عوام جي اڳتي جي ڪاميابي جي اميد به زنده رهندي، پر جي توهان ڪاميابي بعد حامين کي نوازڻ ۽ مخالفن کي ڇيڀاٽڻ ۽ اذيتون ڏيڻ جو سلسلو شروع ڪيو ته اهو مناسب نه هئڻ سان گڏ توهان کي مليل موقعو آخري موقعو بڻائي ختم ڪري ڇڏيندو، ان ڪري چونڊن ۾ ميدان ۾ لٿل اميدوار عوام سان اهڙا واعدا ڪن جيڪي سندن وس ۾ هجن بعد ۾ ائين نه ٿئي جو توهان کي چونڊيدڙ عوام احتجاج ڪري توهان جي خلاف ٿاڻن تي وڃي درخواستون ڏئي ته اسان جا چونڊيل نمائدان گم آهن ڳولي ڏيو ڇو جو ماضي ۾ اهڙا واقعا ٿيندا رهيا آهن.

 

سرڪاري ادارن کي خانگائڻ جي سفارش ۽ ملازمن جو مستقبل

گذريل ڏينهن سينيٽ جو اجلاس چيئرمين ميان رضا رباني جي صدارت هيٺ ٿيو، جنهن ۾ مختلف معاملن تي بحث ڪيو ويو. اسحاق ڊار چيو ته ڪابينا ڪميٽي 69 سرڪاري يونٽس جي نجڪاري جي سفارش ڪئي آهي، جڏهن ته ٽن سالن دوران 5 يونٽس جي نجڪاري وارو عمل مڪمل ٿي چڪو آهي. سينيٽر سردار اعظم موسيٰ خيل چيو ته وفاق سنڌي، پشتو ۽ بلوچن کي نظر انداز ڪري رهيو آهي، جڏهن ته وفاقي ادارن ۾ننڍن صوبن جي ماڻهن کي نوڪريون نه ملڻ ظلم آهي. حڪومت رڳو پنجاب ئي پاڪستان سمجهي ٿي، اهڙو ملڪ نه کپي، جنهن ۾ صوبن کي برابري جا حق ملڻ بدران نظر انداز ڪيو وڃي. سينيٽر طاهر مشهدي چيو ته حڪومت جي غلط ورتاءُ سبب وفاق ڪمزور ٿي رهيوآهي، جڏهن ته ادارن جي ڪارڪردگي به مايوس ڪندڙ آهي. سنڌ جي صنعت ۽ پيدوار واري وزارت طرفان سينيٽ کي آگاهي ڏني وئي ته اسٽيل ملز جي ملازمن کي گارنٽي جي ادائيگي لاءِ 3 ارب رپيا گهربل آهن. صنعت ۽ پيداوار واري وزارت چيو ته اسٽيل ملز جي ملازمن لاءِ پينشن لاءِ ڪابه اسڪيم ناهي جوڙي وئي، جنهن سبب ملازمن ۾ بيچيني پکڙيل آهي. اسٽيل ملز جي نجڪاري جي حوالي سان ناڻي واري وزارت سينيٽ کي لکت ۾ آگاهي ڏني ته گڏيل مفادن واري ڪائونسل اسٽيل ملز جي نجڪاري جي منظوري ڏئي ڇڏي آهي. اسحاق ڊار چيو ته ڪابينا ملڪ جي مختلف سرڪاري ادارن جي 69 يونٽس کي خانگائڻ جي سفارش ڪئي آهي، ناڻي واري وزارت 5سالن دوران آيل ٻوڏ بابت لکت ۾ جواب جمع ڪرائيندي ڄاڻايو ته 11،2010۽ 15 ۾ ٻوڏ سبب ملڪي معيشت کي 14 ارب، 16 ڪروڙ ڊالرز جو نقصان ٿيو، جڏهن ته پرڏيهي ملڪن پاران متاثرن لاءِ 70 ڪروڙ ڊالرز امداد ڏني وئي. 3سالن دوران 5يونٽس جي نجڪاري وارو عمل مڪمل ٿي ويو آهي. پيٽروليم واري وزير شاهد خاقان عباسي چيو ته نجڪاري ادارن جي ملازمن جو تحفظ ڪيو ويندو.

سرڪاري کاتن جي نجڪاري جي سفارش پنهنجي جڳهه تي پر حڪومت جيڪڏهن پنهنجا نواز پاليسي ۽ ڪرپشن کي ٻنجو ڏئي ته شايد ڪنهن به سرڪاري اداري جي ڪارڪردگي تي سوال ئي نه اٿئي، ڪرپشن پنهنجا نواز پاليسي اڏهي جيان ادارن کي کائي کوکلو ڪري ڇڏيو آهي، وڏين وڏين پگهارن کڻندڙ ۽ مراعتون وٺندڙ ڪامورا ڪم ڪن ئي ڪونه، ان ڪري ادارن جي ڪارڪردگي زيرو بڻيل آهي، سرڪار سڳوري کي التجا آهي ته ادارن کي خانگائڻ بدران ادارن اندر ڪرپشن،سفارشي ڪلچر کي ختم ڪيو وڃي ته جئين ادارا پنهنجي اصل پوزيشن ۾ بيهي ملڪي ترقي ۾ ڪردار ادا ڪري سگهن ٿا.