تازيون خبرون

Daily Archives: November 7, 2015

جيڪڏهن رنڊڪون نه وڌيون وڃن ها ته سڀ ڪم پورا ٿي وڃن ها: نواز شريف

اسلام آباد (اين اين آءِ) وزيراعظم محمد نواز شريف چيو آهي ته هارين لاءِ اعلان ڪيل پيڪيج روڪڻ وارن کي مون سان گڏجي هارين جي خدمت ڪرڻ گهرجي، هاري پنهنجن پيرن تي بيهندا ته پاڪستان خوشحال ٿيندو، رڪاوٽون نه اچن ها ته ڪڏهوڪو ان تي عمل ٿي وڃي ها، غلط بيان کان ڪم نه وٺون، ڪوڙ ڳالهائڻ منهنجي عادت ۾ شامل نه آهي، 2017 تائين لوڊشيڊنگ جو مڪمل خاتمو ڪيو ويندو، هارين جي خدمت پنهنجي خوش قسمت سمجهان ٿو، لوڌران مسلم ليگ ن جو قلعو بڻجي چڪو آهي جيتري محبت لوڌران جي ماڻهن ڏني آهي ان کان وڌيڪ انهن سان محبت ڪندس، گيس جي کوٽ آهي ۽ گيس ٻاهران گهرائي پئي وڃي، 2017 خوشحالي جو سال هوندو، لوڌران کي 2 ارب رپيا نه پر اڍائي ارب رپيا ڏنا ويندا، جمعي تي هارين کي چيڪ ڏيڻ واري تقريب کي خطاب ڪندي وزيراعظم محمد نواز شريف چيو ته هارين سان ملي تمام گهڻي خوشي محسوس ٿي رهي آهي، گهڻي وقت کان خواهش هئي ته هارين سان ملاقات ٿئي، وزيراعظم چيو ته مون هارين جي پيڪيج جو اعلان 15 سيپٽمبر تي ڪيو هو، اڄ اٽڪل 2 مهينا ٿيڻ وارا آهن، چاهي رهيو هيس تي پيڪيج جي اعلان جي هڪ هفتي کانپوءِ هاري سان ملاقات ڪري پيڪيج جو افتتاح ڪيان، هن هارين سان مخاطب ٿيندي چيو ته توهان کي خبر آهي ته ان ڪم ۾ ڪنهن روڪيو آهي، هن چيو ته روڪڻ وارا اهي ئي ماڻهو آهن جيڪي چئي رهيا آهن ته اسان کي هاري تمام گهڻا پيارا آهن، هارين سان محبت آهي، جيڪڏهن توهان کي هارين سان محبت آهي ته نواز شريف کي نيڪ ڪم کان ڇو روڪي رهيا آهيو ۽ توهان کي نواز شريف جو ساٿ ڏيڻ گهرجي، هارين جي مدد لاءِ 24 ڪلاڪن اندر مون وٽ اچڻ گهرجي ها پر اهي ماڻهو منهنجا هٿ روڪي رهيا آهن، جيڪڏهن روڪاوٽ نه هجي ها ته اڄ هي ڪم مڪمل ٿي چڪو هجي ها، وزيراعظم چيو ته حڪومت چاهيو پئي ته وقت اندر مدد ڪئي وڃي، هارين کي ان وقت مدد جي ضرورت هئي ته جيئن هاري ايندڙ فصل لاءِ ڪم ڪن، پاڪستان جي تاريخ ۾ 341 ارب رپين جي پيڪيج جو اعلان نه ٿيو آهي ۽ نه ئي ڪنهن حڪومت منظور ڪيو آهي، هاري خوشحال هوندا ته پاڪستان به خوشحال هوندو، وزيراعظم چيو ته هاري راتين جو اٿي فصل کي پاڻي ڏئي ٿو ۽ سڄو ڏينهن اس ۾ محنت ڪري پنهنجن ٻچن جو پيٽ پالي ٿو ۽ مشڪل حالتن ۾ انهن کي تعليم حاصل ڪرائي ٿو، هاري سموري قوم لاءِ اناج پيدا ڪري ٿو، جيڪڏهن ان کي صحيح معاوضو نه ملي ته افسوس جي ڳالهه آهي، وزيراعظم چيو ته سڪندر بوسڻ کي شاباش هجي جنهن پنهنجو قيمتي وقت پيڪيج تي لڳايو ۽ پيڪيج ٺاهڻ تي وڏي محنت ڪئي آهي، منهنجي، حڪومت ۽ ناڻي جي وفاقي وزير جي معاونت ڪئي آهي، وزيراعظم چيو ته اسان ڀاڻ جي قيمت ۾ 5 سئو رپيا في ٻوري گهٽتائي ڪئي آهي، ڊيزل جي قيمت به گهٽ ڪئي وئي آهي، ٽيوب ويل سستا هلي رهيا آهن، بجلي مهانگي هئي، الله تعاليٰ جي فضل سان ڊيزل جي قيمت گهٽ ٿي، انٽرنيشنل سطح تي ڊيزل جي قيمت گهٽ ٿي آهي، اسان چاهيون ٿا ته وڌيڪ قيمتون گهٽ ڪيون وڃن، سمشي توانائي تي ٽيوب ويل لڳائي رهيا آهيون ته جئين آبادگارن کي سستي بجلي فراهم ڪئي وڃي، حڪومت آبادگارن کي قرض ڏيندي ۽ رعايت ڏيندي، آبادگارن کي بجلي جو بل گهڻو ايندو هو، سمشي توانائي تي هلندڙ ٽيوب ويل سستو آهي، آبادگارن کي فائدو ٿيندو، چاهيون ٿا ته آبادگارن کي معاوضو ملي، معاوضو صحيح نه ملندو ته آبادگارن جي چيلهه چٻي ٿي ويندي پر حڪومت ساڍا 30 سئو ارب رپين جو منصوبو جوڙيو آهي، ان سان آبادگار پنهنجن پيرن تي بيهند ۽ جڏهن آبادگار پنهنجن پيرن تي بيهندا ته ٻين مسئلن تي ڪنٽرول ڪري وٺنداسين، زراعت سان گهڻو جلد پيسو واپس اچي، آبادگارن جي خدمت عبادت آهي، اسان عبادت سمجهي آبادگارن جي خدمتون ڪريون ٿا، وزيراعظم چيو ته اسان غلط بياني نٿا ڪريون، ڪوڙ ڳالهائڻ منهنجي عادت نه آهي، صاف ۽ سچي ڳالهه ڪريان ٿو ۽ سچائي ۾ الله تعاليٰ برڪت وجهندو آهي، آبادگارن لاءِ وڌيڪ اسڪميون تيار ڪرڻ گهرجن ته جئين اهي خوشحال ٿي سگهن.

 

سنڌ فيسٽيول تي 2 ارب خرچ، نيب گهپلن جي جاچ شروع ڪري ڇڏي

ڪراچي (اسٽاف رپورٽر) قومي احتساب بيورو بلاول ڀٽو زرداري جي خواهش تي ٿيندڙ سنڌ فيسٽيول جي خرچن بابت جاچ شروع ڪري ڇڏي آهي نيب ڪجهه سرڪاري ۽ خانگي ماڻهن کي نوٽيس جاري ڪري طلب ڪري ورتو آهي جڏهن ته پيپلزپارٽي جي ترجمان سينيٽر فرحد الله بابر نيب پاران ان ڪارروائي تي ردعمل ڏيڻ کان انڪار ڪري ڇڏيو آهي ذريعن مطابق نيب سنڌ پاران اطلاعات کاتي ۾ اربين رپين جي بيقاعدگين بابت جاچ ۾ انڪشاف ٿيو آهي ته سنڌ فيسٽيول دوران سنڌ حڪومت 40 ڪروڙ رپيا هڪ ايدورٽائيزنگ ڪمپني کي جاري ڪيو فيسٽيول جي افتتاحي ڪمپي لاءِ هڪ نجي ڪمپني 18 ڪروڙ رپيا فراهم ڪيا ويا فيسٽيول جي دوران ڪمپني کي مختلف انتظامن جي مد ۾ 40 ڪروڙ رپيا ادا ڪيا ويا ذريعن مطابق ان صورتحال تي نيب ڪجهه سرڪاري ۽ خانگي ماڻهن کي نوٽيس جاري ڪري طلب ڪيو آهي نيب کي ان فيسٽيول ۾ مالي بيضابگيون اختيارين کان وڌي وڃڻ ۽ تاريخي ورثي کي نقصان رسائڻ جون شڪايتون مليون آهن حڪومتي فنڊ جاري ڪرڻ لاءِ حد کان وڌي وڃڻ ۽ من پسند سيڪريٽري مقرر ڪيو ويو انهن شڪايتن جي صداقت ڄاڻڻ لاءِ جاچ ٿي رهي آهي سنڌ فيسٽيول جو بجيٽ سنڌ حڪومت پاران 25 ڪروڙ رپيا کيو ويو هو بجيٽ کان علاوه عطيات جي درخواست ڪئي ويئي هئي بلاول ڀٽو زرداري اعلان ڪيو هو ته ان فيسٽيول جو خرچ پارٽي فنڊ مان ڏنو ويندو ميڊيا رپورٽ مطابق ايئن ناهي ٿيو ۽ سمورو خرچ جيڪو اٽڪل 2 ارب رپيا ٿئي ٿو سنڌ حڪومت جي ترقياتي سرڪاري فنڊ مان ورتو ويو زريعن مطابق افتتاحي تقريب تي 18 ڪروڙ رپيا خرچ ٿيا نيب مطابق اها ڳالهه به نوٽ ڪئي ويئي ته فيسٽيول جي اهتمام کان اڳ ڪجهه سرڪاري آفيسرن حڪومت جي نامناسب حڪمن جي حڪم عدولي ڪئي ته کين عهدي تان هٽايو ويو فيسٽيول جي سمري تي صحيح نه ڪرڻ تي ٻن ڏينهن ۾ ٻه سيڪريٽري تبديل ٿيا نيب پاران سنڌ فيسٽيول رڪارڊ تحويل ۾ ورتو ويو آهي.

 

ذوالفقار مرزا پاران 100 ماڻهن کي مارڻ جي ڌمڪي ڳڻتي جوڳو عمل آهي: نثار کهڙو

ڪراچي(اسٽاف رپورٽر) سنڌ جي اطلاعات واري سينيئر وزير نثار احمد کهڙو چيو آهي ته ذوالفقار مرزا پاران 100 ماڻهن کي مارڻ جي ڌمڪي ڏيڻ تشويشناڪ عمل آهي، عدليه ۽ قانون لاڳو ڪندڙ ادار ذوالفقار مرزا جي خونريزي وارين ڌمڪين جو نوٽيس وٺن ۽ سندس ڌمڪين واري بيانن کي ريڪارڊ تي رکيو وڃي.  اهڙن خيالن جو اظهار هن جمعي ڏينهن پنهنجي جاري ڪيل هڪ بيان ۾ ڪيو آهي. هن چيو ته اهڙيون ڌمڪيون ڏيندڙ شخص کي وفاقي گهرو وزير چوڌري نثار علي خان جي حڪم تي پروٽوڪول فراهم ڪيو پيو وڃي. هن چيو ته اهو عمل ظاهر ڪري ٿو ته سنڌ ۾ مڪاني چونڊن ۾  ناڪامي کانپوءِ ن ليگ جي وفاقي حڪومت عوام کي پاڻ ۾ ويڙهائڻ ۾ يقين رکي ٿي. هن چيو ته ن ليگ جي حڪومت سنڌ جي عوام کي ڊيڄاري مڪاني چونڊن جي ٻئي مرحلي ۾ سياسي يتيمن کي چونڊرائڻ لاءِ عوام تي دٻاءَ وجهي رهي آهي  جيڪو ن ليگ جي حڪومت جو شرمناڪ  ۽ جمهوري روايتن جي خلاف عمل آهي . هن چيوته سنڌ حڪومت صوبي جي ڌرتيءَ تي ڪنهن کي به قانون کي هٿ ۾ کڻڻ جي اجازت نه ڏيندي. هن چيو ته نواز شريف جي حڪومت وفاقي ايجنسيز جي ذريعي سنڌ جي سنڌ جي عوام کي ڌمڪائڻ بند ڪري. هن چيو ته ارباب غلام رحيم، ذوالفقار مرزا جهڙا سياسي يتيم ن ليگ لا ءِ ووٽ نه ٿا وٺي سگهن پر وفاقي حڪومت جي آڙ ۾ لڪي سنڌ جي عوام کي پنهنجي نجي فورس ذريعي ڌمڪائي ڊيڄاري پنهنجي وڃايل ساک کي بحال ڪرڻ جي ناڪام ڪوشش ڪري رهيا آهن پر سنڌ جو عوام هاڻي سجاڳ آهي سندس اهڙين ڌمڪين کان نه دڄندو. هن چيو ته نواز شريف وفاقي ايجنسيز ذريعي سنڌ جي عوام کي ڊيڄارڻ بند ڪري ۽ شفاف مڪاني چونڊن ذريعي جمهوريت کي اڳتي هلڻ ڏي

 

دهشتگردي جي خلاف ويڙهه ۾ ڪاميابيون پيشيواراڻا مهارت جو ثبوت آهن: آرمي چيف

راولپنڊي(بيورو) سرڪاري خابرو اداري مطابق پاڪ فوج جي سربراهه جنرل راحيل شريف اٽڪ جي ويجهو ٽئين فزيڪل چئيمپين شپ جي پڄاڻي واري تقريب سان خطاب ڪندي چيو ته اسان کي  ويڙهه واري هاڻوڪي سطح کي برقرار رکڻو پوندو ۽ سخت تربيت جي ذريعي ان کي وڌيڪ بهتر بڻائڻ لاءِ اڻ ٿڪ ڪوششون ڪرڻيون پونديون، سندس چوڻ هو ته دهشتگردي جي خلاف ويڙهه ۾ ڪاميابيون پاڪ فوج جون  پيشيواراڻا مهارت جو چٽو ثبوت آهن، جن جو عالمي سطح تي به اعتراف ڪيو ويو آهي.

 

پ پ کي ختم ڪرڻ وارا پاڻ ختم ٿي ويا، پارٽي اڳ کان وڌيڪ مضبوط ۽ مستحڪم ٿي آهي: بلاول ڀٽو

ڪراچي( اسٽاف ررپورٽر) پاڪستان پيپلزپارٽي جي چيئرمين بلاول ڀٽو زرداري چيو آهي ته پيپلزپارٽي غريبن ۽ مزدورن جي پارٽي آهي ۽ غريبن ۽ مظلومن جي مفادن جو تحفظ ڪرڻ تي وڏيرن ۽ جاگيردارن کي پيپلزپارٽي ان جي وجود واري ڏينهن کان ئي کُٽڪي ٿي،بلاول ڀٽو زرداري اهڙو اظهار اڄ بلاول هائوس ۾ پاڪستان پيپلزپارٽي ڪراچي جي ملير، ڏکڻ ۽ اوله ضلعن جي وفدن سان ملاقات دوران ڪيو، ان موقعي تي آصفه ڀٽو زرداري، ايم اين اي فريال ٽالپر، وڏو وزير سيد قائم علي شاه، سينيٽر شيري رحمان، سينئر صوبائي وزير نثار احمد کهڙو، چونڊيل اسيمبلي ميمبر، ضلعي عهديدار۽ معززين به موجود هئا، بلاول ڀٽو زرداري چيو ته تاريخ شاهد آهي ته جن به پيپلزپارٽي جي پٺيءَ ۾ ڇُرو هڻڻ جي ڪوشش ڪئي آهي ان کي رسوائي ۽ ذلت ئي نصيب ٿي آهي پر پيپلزپارٽي اڳ کان وڌيڪ مضبوط ۽ مستحڪم ٿي آهي،ان موقعي تي ڪراچي ڊويزن جي ٽن ضلعن سان تعلق رکندڙ پ پ اڳواڻن چيئرمين بلاول ڀٽو زرداري کي ڪراچي ۾ هلندڙ ترقياتي ڪمن ۽ رٿيل مڪاني چونڊن جي حوالي سان بريفنگ ڏني ۽ پارٽي معاملن تي به خيالن جي ڏي وٺ ڪئي وئي، اڳواڻن چيو ته پارٽي ۽ ان جا ڪارڪن ڏينهن رات سخت محنت ڪري رهيا آهن ۽ پارٽي مڪاني چونڊن ۾ اڪثريت ماڻي شهرلاءِ جيالو ميئرآڻيندي.

 

ڀارت جو اصلي چهرو دنيا اڳيان اچڻ گهرجي: چوڌري نثار

اسلام آباد(بيورو) وفاقي گهرو وزير چوڌري نثارعلي خان جو چوڻ آهي ته ڀارت ۾ هولندڙ ڏينهن ۾ ٿيندڙ واقعا تمام ڳڻتي جوڳا ۽ پريشان ڪندڙ آهن ۽ ڀارت جو اصلي چهرو دنيا اڳيان اچڻ گهرجي.اسلام آباد ۾ پريس ڪانفرنس ڪندي چوڌري نثار جو چوڻ هو ته پاڙيواري ملڪ ڀارت ۾ ملسمانن سان جيڪو ڪجهه ٿي رهيو آهي اهو ڳڻتي جوڳو آهي ۽ پاڪستانين جي خلاف توهين وارو رويو ناهي قبول، هلندڙ ڏينهن ۾ ٿيندڙ واقعا بدترين آهن. سندس چوڻ هو ته جيڪو ڪجهه پاڙيواري ملڪ ۾ ٿي رهيو آهي اهو دنيا لاءِ ڳڻتي وارو آهي.وفاقي گهرو وزير جو چوڻ هو ته وزارت ۾ سمورن هيٺين ادارن کي ڪمپيوٽرائيزڊ ڪيو ويو آهي، جڏهن ته نادرا ۾ ڪرپشن ڪندڙ 200 کان وڌيڪ ماڻهن کي ڪڍيو ويو آهي، اهڙي طره ايف آئي اي جو به پڇاڻو ٿيندو. چيئرمين تحريڪ انصاف عمران خان جي حوالي سان چوڌري نثار جو چوڻ هو ته عمران خان جي ذاتي زندگي جي واقعي تي دلي ڏک آهي.

 

ڪوڙ جو راڳ الاپيندڙ ڌانڌلي جا ثبوت پيش ڪرڻ ۾ ناڪام ويا، عوام مخالفن جي الزام کي رد ڪري ڏيکاريو:سردار اياز صادق

اسلام آباد (بيورو) نواز ليگ اڳواڻ سردار اياز صادق چيو آهي ته ڪوڙ جو راڳ الاپيندڙ ڌانڌلي جا ثبوت پيش ڪرڻ ۾ ناڪام ويا، ننڍي چونڊ ۾ عوام مخالفن جي الزام کي رد ڪري ڏيکاريو. اڳوڻي اسپيڪر سردار اياز صادق سميت قومي اسيمبلي جي نون چونڊيل ميمبر طور حلف کڻي ورتو، اياز صادق جي ايوان آمد تي ميمبرز پاران سندس شاندار آجيان ڪئي وئي. ڊپٽي اسپيڪر مرتضيٰ جاويد عباسي اجلاس دوران سردار اياز صادق سميت نون چونڊيل ميمبرز کي حلف کڻايو. حلف کڻڻ کانپوءِ خطاب ڪندي سردار اياز صادق چيو ته ڪوڙ جو راڳ الاپيندڙ ڌانڌلي جا ثبوت پيش ڪرڻ ۾ ناڪام ويا، ننڍي چونڊ ۾ عوام مخالفن جي الزام کي رد ڪري ڏيکاريو. هن چيو ته مخالفن پاران مٿس مڙهيل الزام اين اي 122 تي ننڍي چونڊ ۾ ڪاميابي کانپوءِ ڪوڙا ثابت ٿي ويا آهن، جڏهن ته هــُـو سياسي پارٽين پاران حمايت تي سندن ٿورائتو آهي. سردار اياز صادق چيو ته ڌرڻن دوران ملڪي معيشت کي ڪروڙين رپين جو نقصان پهتو، جڏهن ته پاڪستان جي ساک به متاثر ٿي. اياز صادق چيو ته ڌانڌلين جا الزام مڙهيندڙن جي ڌرڻن دوران ملڪ کي پهتل نقصان جي ذميوار ڪير ته کڻي عوام کي جواب ڏي.

 

لاهور فيڪٽري سانحو، وڌيڪ 6 لاش ڪڍيا ويا، حياتيون وڃائيندڙن جو انگ 35 ٿي ويو

لاهور (بيورو) لاهور فيڪٽري حادثي بعد ڍيرن مان وڌيڪ 6 لاش هٿ ڪيا ويا، جنهن بعد حياتيون وڃائيندڙ پورهيتن جو انگ 35 ٿي ويو،جڏهن ته فوجي جوانن جي مدد سان ريسڪيو آپريشن جاري آهي. 2 ڏينهن اڳ لاهور جي سندر انڊسٽريل اسٽيٽ ۾ ڪري پيل چار ماڙ فيڪٽري جي ڇت جي ڍيرن هيٺان وڌيڪ 6 لاش ڪڍيا ويا،جنهن بعد حياتيون وڃائيندڙن جو انگ وڌي 35 ٿي ويو آهي. هانءُ ڏاريندڙ حادثي ۾ زخمي ٿيل 80 کان وڌيڪ پورهيتن جو مختلف اسپتالن ۾ علاج هلندڙ آهي. ٻئي پاسي ڊهي پيل فيڪٽريءَ جي ڍيرن هيٺان دٻيل سـَوَ کان وڌيڪ ماڻهن کي ڪڍڻ لاءِ پاڪ فوج، بحريه ٽائون ۽ ٻين ادارن جي مدد سان امدادي سرگرميون جاري آهن. ريسڪيو آپريشن سي ڊي اي جي 50 رڪني ٽيم پڻ حصو وٺي رهي آهي. ريسڪيو ذريعن موجب، مٽيءَ جي ڍيرن هيٺان دٻيل ڪيترن ئي ماڻهن جو پتو ناهي پئجي سگهيو،جنهن سبب فوتين جي انگ ۾ واڌ جو خدشو آهي

 

ايم ڪيو ايم سنڌ اسيمبلي مان به استعيفائون واپس وٺي ڇڏيون

ڪراچي (اسٽاف رپورٽر) ايم ڪيو ايم،قومي اسيمبلي ۽ سينيٽ کانپوءِ سنڌ اسيمبلي مان به استعيفائون واپس وٺي ڇڏيون آهن. سيد سردار احمد، خواجه اظهار، هير سوهو ۽ سليم ٻنڌاڻي سميت متحده جي 40 کان وڌيڪ ايم پي ايز سنڌ اسيمبلي پهتا. متحده جي ميمبرن ان موقعي تي استعيفائن جي واپسي لاءِ درخواستون اسپيڪر آغا سراج دراني وٽ جمع ڪرايون. سنڌ اسيمبلي ۾ ايم ڪيو ايم جي 51 ميمبرن اڍائي مهينا اڳ استعيفائون ڏنيون هيون. استعيفائون ملڻ بعد ميڊيا سان ڳالهائيندي اسپيڪر آغا سراج دراني جو چوڻ هو ته متحده ايم پي ايز جي درخواستن تي قانون موجب اڳڀرائي ڪئي ويندي. هڪ سوال جي جواب ۾ آغا سراج دراني انڪشاف ڪيو ته مڪاني چونڊن دوران شڪارپور جي ڊپٽي ڪمشنر،آر او ۽ ڊي آر اوز سندس خلاف ڪم ڪري رهيا پر عوام پ پ جي اميدوارن تي اعتماد جو اظهار ڪري کين ڪامياب ڪرايو. سنڌ اسيمبلي جي اسپيڪر آغا سراج دراني جو وڌيڪ چوڻ هو ته درازا سانحي جي جاچ ڪرائڻ حڪومت جي ذميواري آهي.

 

عمران خان وزيراعظم جي لوڌران ۾ هاري پيڪيج جي اعلان کي ڌانڌلي قرار ڏئي ڇڏيو

اسلام آباد(بيورو) چئيرمين تحريڪ انصاف عمران خان وزيراعظم نوازشريف پاران لوڌران ۾ ننڍين چونڊن کان اڳ هاري پيڪيج جي اعلان کي ڌانڌلي قرار ڏئي ڇڏيو. اسلام آباد ۾ پريس ڪانفرنس ڪندي عمرا خان جو چوڻ هو ته لوڌران ۾ وزيراعظم نوازشريف هاري پيڪيج  جو اعلان ڪري ننڍين چونڊن ۾ ڌانڌلي جو بنياد رکيو آهي، اهڙي ئي طرح لاهور ۾ ووٽرن کان بنا پڇئي انهن جا ووٽ ٻين تڪن تي منتقل ڪيا ويا، جيستائين شفاف چونڊون لاءَ آواز نه اٿارينداسين، تيستائين مئسلا حل نه ٿيندا. جڏهن ته 2013ع جون چونڊن ۾  ملڪ جي تاريخي ڌانڌلي ٿي هئي. لاهور جي تڪ اين اي 122 ۾ امڪاني ڌانڌلي جي حوالي سان عمران خان اعلان ڪيو ته تحريڪ انصاف ڌانڌلي جا سمورا رڪارڊ اليڪشن ڪميشن کڻي ويندي، اسان پولنگ اسٽيشن تي ڌانڌلي روڪي هئي ان ڪري اسان کي نادرا سان ملي هارايو ويو، لاهور جي ننڍين چونڊن ۾ ووٽ گم ڪيا ويا ۽ 17 هزار 874 ووٽ ڀرپاسي جي علائقن مان اين اي 122 ۾ منتقل ڪرايا ويا ،ن ليگ سروي ذريعي پي ٽي آئي جي ووٽرن جي ڄاڻ حاصل ڪئي ۽ اسان جي ووٽرن کي تڪ مان ڪڍيو ويو. سندس چوڻ هو ته هر ڀيري چيو ويندو آهي ته  عمران خان جي سئي ڌانڌلي تي ٽنگي پئي آهي ۽ ملڪ جي ٻين مسئلن تي ڳالهه نه پئي ڪئي وڃي، مون کي ڪو به شوق ناهي ته هڪ مسئلي تي ٽنگيو پيو هجان ۽ 126 ڏينهن تائين ڌرڻا هڻا، ان کان اڳ هڪ سال تائين مهم هلائي، جيڪڏهن اسان هن ملڪ ۾ صاف ۽ شفاف چونڊن لاءِ آواز نه اٿارينداسين ته ڪو به مسئلو حل نه ٿيندو، جيتوڻيڪ مڪاني چونڊن جو مثال سڀني جي اڳيان آهي،اسان جو مقصد آهي ته جيڪي مسئلا عوام کي اڳيان آهن،عوام پنهنجي ووٽ ذريعي حڪومت کي ڪا سزا ڏئي سگهي ،هارين جو جيڪو معاشي قتل ٿيو آهي،عام ماڻهو پنهنجي ووٽ جي حق جي استعمال سان پنهنجي تڪليف جو اظهار ڪري سگهي. چئيرمين تحريڪ انصاف صحافي کي دڙڪو ڏيڻ تي کائنس معافي وٺندي چيو ته پارٽي چئيرمين کان پهرين انسان آهيان ۽ انساني گهرج آهي ته  ڪنهن جي گهر ۾ ڏک، سور، تڪليف يا ماتم هجي ته ان سان همدردي جو اظهار ڪيو وڃي، نه ڪي ان جي زخمن تي لوڻ ٻرڪيو وڃي. صحافي پاران اوچتو ذاتي سوال پڇڻ تي ڪاوڙ اچي وئي هئي. سندس چوڻ هو ته پنهنجي اڳوڻي گهرواري سان جهڙا به اختلاف هجن پر  ان بابت ڪجهه نه ٻڌندس، منهنجي درخواست آهي ته ذاتي سوالن کان پاسو ڪيو وڃي.