تازيون خبرون

Daily Archives: November 5, 2015

زمانو بدلجي چڪو آهي، ڪنهن به اداڪاره کي پنهنجي عمر لڪائڻ جي ضرورت ناهي: وديا بالن

ممبئي(شوبز نيوز) بالي ووڊ اداڪاره وديا بالن چيو آهي ته اهو دؤر اچي ويو آهي ته ڪنهن به اداڪاره کي پنهنجي عمر لِڪائڻ يا ان جي باري ۾ ڪُوڙ ڳالهائڻ جي ضرورت ناهي. وديا بالن هڪ انٽرويو ۾ چيو ته هاڻي زمانو بدلجي چڪو آهي ان لاءِ ڪنهن به هيروئن تي وڏو رول حاصل ڪرڻ لاءِ عمر لِڪائڻ جو دٻاءُ ناهي. اداڪاره چيو ته مون کي ڪڏهن به عمر جي باري ۾ احساس ڪمتري ناهي ٿي ۽ ان ڳالهه تي فخر آهي ته منهنجي عمر 36 سال آهي، زندگي جيئن جيئن اڳتي وڌندي آهي ائين ئي ان جو جوش وڌندو آهي. هڪ سوال جي جواب ۾ هن چيو ته ڪنهن به ڪردار کي چونڊڻ لاءِ مخصوص فارمولو استعمال ناهيان ڪندي

 

اداڪاره ڪنگا رناوت نئين فلم ۾ 85 سالن جي پوڙهي عورت جو ڪردار ادا ڪندي

ممبئي(شوبز نيوز) بالي ووڊ اداڪاره ڪنگا رناوت فلمساز شيکر ڪپور جي فلم ۾ پوڙهي عورت جو ڪردار ادا ڪندي. ڪنگا چيو ته شيکر طرفان 85 سالن جي پوڙهي عورت جي ڪردار جي پيشڪش ٿي آهي. 28 سالن جي ڪنگنا جو چوڻ اهي ته اهو منهنجي لاءِ هڪ چئلينج ڪردار آهي. اداڪاره وضاحت ڪئي ته شيکر جي فلم ”پاني“ ۾ اهو ڪردار ادا ناهي ڪري رهي هي بلڪ اهو ڪردار ان جي ايندڙ فلم لاءِ هوندو. ڪنگنا چيو ته فلمن ۾ پوڙهي عورت جو ڪردار ڪرڻجي باري ۾ ان جو نظريو فلم ”امور“ ڏسڻ کانپوءِ بدلجي ويو هو، هاڻي هوءَ فلمن ۾ ماءُ جو ڪردار ڪرڻ لاءِ به تيار آهي.

 

حفيظ اوپنر طور ٽيسٽ ۾ وڌيڪ ڀيرا ففٽي پلس اسڪور ٺاهيندڙ چوٿون پاڪستاني رانديگر بڻجي ويو

شارجه(اسپورٽس نيوز) محمد حفيظ اوپنر طور ٽيسٽ ڪرڪيٽ ۾ وڌيڪ ڀيرا ففٽي پلس اسڪور ٺاهيندڙ چوٿون پاڪستاني پليئر بڻجي ويو. حفيظ انگلينڊ خلاف جاري ٽيسٽ جي ٻي اننگز ۾ شاندار اننگز کيڏي هم وطن بيٽسمين محمد حنيف جو اوپنر طور وڌيڪ ڀيرا ففٽي پلس اسڪور ٺاهڻ جو رڪارڊ ٽوڙي ڇڏيو، حنيف محمد 19 ڀيرا اهو ڪارنامو انجام ڏنو هو. پاڪستان طرفان اوپنر طور وڌيڪ ڀيرا ففٽي پلس اسڪور ٺاهڻ جو اعزاز سعيد انور وٽ آهي. هن 36 ڀيرا اهو ڪارنامو انجام ڏنو. شارجه ٽيسٽ جي ٽئين ڏينهن حفيظ انگلش بالرز جو مقابلو ڪيو ۽ شاندار اڌ سينچري مڪمل ڪئي. حفيظ 97 رنسون ٺاهي ناٽ آئوٽ رهيو، ان سان گڏ هو اوپنر طور وڌيڪ ڀيرا ففٽي جو نمبر پار ڪندڙ چوٿون پاڪستاني رانديگر بڻجي ويو آهي. مدثر نذير 24 ڀيرا ان اعزاز سان ٻئين ۽ توفيق عمر 21 ڀيرا اعزاز سان ٽئين نمبرتي موجود آهي.

 

ڀارت ۽ ڏکڻ آفريقا وچ ۾ پهرين ٽيسٽ اڄ شروع ٿيندي

موهالي(اسپورٽس نيوز) ڀارت ۽ ڏکڻ آفريقا جي ڪرڪيٽ ٽيمن وچ ۾ 4 ٽيسٽ ميچن جي سيريز جي پهرين ٽيسٽ اڄ کان 9 نومبر تائين پنجاب ڪرڪيٽ ايسوسيئيشن اسٽيڊيم موهالي ۾ کيڏي ويندي. ڏکڻ آفريقن دؤري دوران بهترين

ڪارڪردگيءَ جو مظاهرو ڪيو ۽ ميزبان ٽيم ڀارت کي شڪست ڏئي ون ڊي ۽ ٽي 20 سيريز پنهنجي نالي ڪئي. ان لحاظ کان هن کي ٽيسٽ سيريز ۾ نفسياتي سرسي حاصل هوندي. ڀارت ۽ ڏکڻ آفريقا وچ ۾ پهرين ٽيسٽ 5 کان 9 نومبر، ٻي ٽيسٽ 14 کان 18 نومبر، ٽين ٽيسٽ 25 کان 29 نومبر، جڏهن ته چوٿين ۽ آخري ٽيسٽ 3 کان 7 ڊسمبر تائين کيڏي ويندي.

 

سنڌ حڪومت ۽ پلڊاٽ جي تازي سروي رپورٽ: رياض احمد آگرو

اسان جي آسپاس ڪيترائي ملڪ اڄ کان ٻه يا ٽي ڏهاڪا اڳ اسان وانگر ترقي پذير هئا پر اڄ اُهي ترقيءَ جا ڏاڪا طئي ڪري ترقي يافته ٿي چڪا آهن. جيڪڏهن صرف پنهنجي چوڌاري ڏسنداسين ته ڪيترائي اهڙا مثال نظر ايندا. اسان جي ڏکڻ اوڀر ۾ سنگاپور، ملائيشيا، ٿائلينڊ ۽ انهن کان ڪجهه اڳتي چين، ڪوريا، سن سٺ واري ڏهاڪي ۾ غريب ملڪ هئا. وري جو اولهه طرف نظر ڪريون ته صحرا عرب جا ملڪ خاص طور تي دبئي پڻ ساڳي ڏهاڪي ۾ غريب ۽ اڻ سڌريل علائقو هو. هي سڀ اسان جا لڳ ڀڳ پاڙيسري جنت بنجي چڪا آهن. پر ان جي ابتڙ اسان جي مُلڪ ترقيءَ جا جيڪڏهن ٻه قدم کنيا آهن ته ضرور پنج قدم پوئتي هٽيو آهي. مثال طور اڄ کان ڏهه سال اڳ بجلي ڪافي حد تائين ميسر هئي پر اڄ اها ناياب ٿيندي پئي وڃي. سڄي ملڪ سان گڏ سنڌ جي ٻهراڙيءَ وارن علائقن ۾ ته چوويهن ڪلاڪن ۾ مشڪل سان پنج يا ڇهه ڪلاڪ ڏني ٿي وڃي. ڪراچيءَ کان سواءِ سنڌ جي باقي شهرن جي حالت به ڪا گهڻي مختلف ڪانه آهي. اهو ته بجليءَ جو حال آهي، باقي شعبن جي ڪارڪردگي به ساڳي آهي. جيڪڏهن رياست پنهنجي شهرين کي بجلي، صاف پاڻي، صحت ۽ تعليم مهيا نه ڪري سگهي، عوام کي انڌيرن ۾ رکي ته ان کي ڪيتري ڪامياب رياست چئي سگهجي ٿو؟ اهو پنهنجي جاءِ تي هڪ سوال آهي.

ڪنهن غريب گهراڻي کي مجموعي طرح غريب چئبو، پر جيڪڏهن انهيءَ جي اندر جهاتي پائي ڏسبو ته خبر پوندي ته اتي به هڪ جهڙائي نه آهي. عورت لاءِ ان گهر اندر موقعا بلڪل گهٽ هوندا ۽ اها غربت جا ڏنگ وڌيڪ سهندي نظر ايندي بنسبت مرد جي. اهڙي طرح پاڪستان کي مجموعي طرح ڏسبو ته اهو مٿي بيان ڪيل منظر پيش ته ڪندو پر جيڪڏهن غور ڪبو ته صوبن ۾ حڪومت ڪرڻ جو انداز ۽ ترقيءَ جي ليول ۾ هڪجهڙائي نظر نه ايندي.

27 آڪٽوبر 2015ع تي ملڪ جي هڪ معتبر اداري پاڪستان انسٽيٽيوٽ آف ليجسليٽو ڊيولپمينٽ-پلڊاٽ معياري ۽ بهتر حڪمرانيءَ تي هڪ سروي شايع ڪئي، جيڪا اهميت جي لائق آهي. هن سروي ۾ ڪل 28 انڊيڪيٽر يا اهڃاڻن تي عوام کان راءِ ورتي ويئي ته انهن 28 اهڃاڻن تي صوبائي حڪومت جي ڪارڪردگيءَ مان ڪيتري حد تائين مطمئن آهن؟ جن مان ڪجهه هي آهن، امن امان جي صورتحال، غربت جو خاتمو، تعليم ۽ صحت جون سهولتون، شفافيت، ڪرپشن جي روڪٿام، صفائيءَ جا انتظام، بي روزگاريءَ جو خاتمو، ميرٽ تي نوڪريون ڏيڻ وغيره. هونئن ڪافي پيچيده قسم جي سروي آهي پر پاڻ ان جي ٿلهن نقطن تي بحث ڪيون ٿا. سروي مطابق بهتر حڪمرانيءَ ۾ صوبو خيبر پختونخواه لاءِ راءِ ڏيندڙن 28 مان 18 اهڃاڻن کي مثبت قرار ڏئي پهريون نمبر ڏنو، پنجاب لاءِ 8 اهڃاڻن تي مثبت راءِ ڏئي ٻيو نمبر ڏنو، جڏهن ته سنڌ ۽ بلوچستان جي صوبائي حڪومتن لاءِ راءِ ڏيندڙن 28 مان صرف ٻن اهڃاڻن تي مثبت راءِ ڏني. سنڌ حڪومت جي ٻن ڳالهين مان راءِ ڏيندڙ مطمئن نظر آيا سي هڪ امن امان جي بهتر صورتحال ۽ ٻيو ٻارڙن کي بيمارين کان پيارجندڙ ڦڙن کي اطمينان بخش قرار ڏنو، باقي ٻين سڀني ڳالهين ۾ عوام جي راءِ منفي رهي. بلوچستان لاءِ به لڳ ڀڳ سنڌ جهڙي راءِ رهي. هتي پاڻ سنڌ جي صورتحال تي بحث ڪريون ٿا.

سنڌ کي قدرت انهن سڀني نعمتن سان نوازيو آهي، جن کي استعمال ۾ آڻي عوام کي خوشحال معاشرو ڏيئي سگهجي ٿو. انگريزن سنڌ جي فتح وقت هن ماٿريءَ کي نئين مصر جي نالي سان سڏيو هو. سنڌ ۽ مصر ۾ جيڪا هڪجهڙائي آهي، ان جا چند مثال هتي ڏجن ٿا. جاگرافيائي بيهڪ مطابق مصر جي اولهه ۾ صحرائي لبيا نالي ريگستان آهي، سنڌ جي اولهه ۾ به ڪراچيءَ کان قمبر شهدادڪوٽ تائين ڊگهي جابلو پٽي آهي جنهن جي موڪر 60-70 ڪلوميٽر آهي. مصر جي اوڀر ۾ وري هڪ ٻيو وڏو ريگستان آهي، جيئن سنڌ جي اوڀر ۾ بدين کان گهوٽڪيءَ تائين ڊگهي ٿر جي پٽي آهي. اهڙي طرح ٻنهي جي وچ وارو علائقو زخيز زرعي آهي، هڪڙي کي نيل سيراب ڪري ٿي، ٻئي کي وري سنڌو درياهه امرت ڌارا ڏئي ٿو. مصر جي معيشت ۾ زراعت به اهم عنصر آهي. سنڌ جي آباديءَ جي وڏي حصي جو گذران پڻ زراعت تي آهي. سڀ کان اهم ڳالهه ته هي ٻئي خطا 5000 سالن کان پراڻي انساني تهذيب جا وارث آهن. پر مصر اڳ وانگر هينئر به خوشحال علائقو آهي، ان جي ابتڙ سنڌ جي صورتحال پلڊاٽ جي سروي ۾ واضح آهي. مصر جي ماضي اهرامن جي صورت ۾ دنيا اڳيان اجاگر بيٺي آهي، جيڪا سياحن لاءِ وڏي ڪشش رکي ٿي، هر سال لکين سياح اچڻ ڪري مصر اربين ڊالر ڪمائي ٿو. ٻئي طرف ان صنعت جي ترقيءَ جا سنڌ ۾ به ڪافي امڪان آهن، سنڌ جي عظيم تهذيب موهن جو دڙو سڄي دنيا ۾ اهم مقام رکي ٿو، ان جو هڪ مثال اهو آهي ته آمريڪي صدر ڪلنٽن ڏکڻ ايشيا جي دوري دوران انڊيا کي وڌيڪ اهميت ڏني هئي. ڇوته ان زماني ۾ پاڪستان ۾ مشرف جي تازي مارشل لا لڳي هئي، هو مختصر وقت لاءِ پاڪستان آيو هو شايد چند ڪلاڪن لاءِ، پاڪستان جي عوام کي خطاب ڪندي هن موهن جي دڙي ۽ وادي مهراڻ جي تهذيب جي تمام گهڻي ساراهه ڪئي ۽ چيو ته هو هن تهذيب جو مداح آهي. حقيقت ۾ وادي مهراڻ جي تهذيب موجوده پاڪستان جي سڀني علائقن تي مشتمل خطن جي تهذيب آهي. موهن جو دڙو ان جو مرڪز آهي. پر افسوس ته ڪجهه وقت اڳ تائين ڪيترائي مغربي سياح ۽ ماهر گهمڻ ۽ تحقيقات ڪرڻ لاءِ موهن تي ايندا هئا، پر ڪيتري ئي وقت کان بدانتظامي ۽ امن امان جي ابتر صورتحال جي ڪري هينئر انهن جو اچڻ بند آهي. ٻئي طرف مغربي ۽ مصري ماهر، مصر جي پراڻي تهذيب جا لڪل گوشا ڏينهون ڏينهن اجاگر ڪري رهيا آهن. نوان اهرام دريافت ٿي رهيا آهن، انهن لاءِ قائم ٿيل ٿيوريز تي جديد سائنسي انداز ۾ ڪم هلي رهيو آهي. پر سنڌ جي بدعنوان ۽ بي حس حڪمرانن جي طرز حڪمرانيءَ ڪري، سنڌ جي تهذيب جي لڪل گوشن ۽ اهڃاڻن کي اجاگر ڪرڻ ۽ ڳولڻ ته پري رهيو (موهن جي دڙي جو ڪيتري ئي حصي جي کوٽائي مڪمل نه ٿي آهي) پر هن پوري انسانيت جي ورثي جي سارسنڀال ۽ حفاظت لاءَ رکيل پئسا پنهنجن نه ڀرجندڙ پيٽن ۾ هڙپ ڪيون ويٺا آهن. تاريخي آثار سم ۽ ڪلر جي ور چڙهي رهيا آهن. جيڪڏهن هيءَ سائيٽ ڪنهن شهر جي ويجهو هجي ها ته يقينن ان جي پلاٽ تي قبضو ٿي چڪو هجي ها يا ڪو بلڊرچائنا ڪٽنگ ڪري فليٽ ٺهرائي ڇڏي ها. 18 ترميم جي پاس ٿيڻ کان پوءِ صوبا ڪيترن ئي شعبن ۾ اڳتي وڌي ڪري ترقي ڪري سگهن ٿا. پر سنڌ جي حڪمرانن 18هين ترميم جو فائدو به وڌيڪ ڪرپشن ڪرڻ جي صورت ۾ وصول ڪيو آهي.

مٿين ڳالهين جو مقصد آهي ته سنڌ کي اڳتي وڌڻ جي ڪيتري نه صلاحيت آهي. ڪنهن به خطي جي ترقي ڪرڻ لاءِ گهربل سمورا وسيلا سنڌ ۾ موجود آهن. زراعت، معدنيات، افرادي قوت، گيس، تيل، سڀ ڪجهه آهي پر افسوس ته هتي اڪثر اهڙي قيادت ملي آهي، جيڪا انتها درجي جي بدعنوان ۽ ويڪائو ثابت ٿي آهي. ڪنهن به خلوص سان صوبي ۽ ان جي عوام جي خدمت نه ڪئي آهي. خرابين جي انهيءَ سلسلي گذريل 10 يا پندرهن سالن کان تيزيءَ سان اسپيڊ ورتي آهي، جنهن جو تازو اظهار پلڊاٽ جي سروي به آهي. ٻيا صوبا ڪنهن حد تائين خوشقسمت آهن جو انهن کي سٺي حڪمراني ملي رهي آهي ۽ اهي اڳتي وڌي رهيا آهن، جيڪڏهن ساڳي صورتحال برقرار رهي ته سنڌ پاڪستان جو مڪمل پٺتي پيل صوبو رهجي ويندو ۽ ٻيا صوبا گهڻو اڳتي نڪري ويندا. جيئن هينئراسان ۽ اسان جي پاڙيسري ملڪن جي وچ ۾ فرق آهي.

 

سنڌ مير، پير ڀوتارن جي نه پر سنڌين جي آهي…: مظهر خاصخيلي

هن ملڪ جي ٺهڻ کان وٺي جيڪي نظام جوڙيا ويا آهن انهن کي گهڻي ڀاڱي آمرن ۽ انهن فوجي جنرلن جوڙيو آهي جن اقتدار مٿان قبضا ڪري پنهنجي حڪومت کي ڊيگهه ڏني آهي جنهن جو ٿورڙو مثال اهو آهي ته اڳوڻي آمر جنرل ضياءُ الحق جنهن بلدياتي اليڪشنون ڪرائي ضلعي ڪائونسل وارو نظام جوڙيو جڏهن ته وري پرويز مشرف بلدياتي چونڊون ڪرائي ضلعي گورنمينٽ وارو نظام متعارف ڪرايو انهن ٻنهي آمرن 11، 11 سال ملڪ مٿان پنهنجي حڪومت ڪئي انهن 22 سالن جي عرصي دوران جيڪڏهن تاريخ جا ورڪ اٿلائي ڏسبا ته اهي سمورا غير قانوني ناانصافين وارا ڪم هنن جي دور حڪومت ۾ ٿيل آهن اصل ۾ مٿي ڳالهه ڪرڻ جو مقصد اهو آهي ته موجوده حالتن دوران اسان جي ملڪ جي ٻن اهم صوبن پنجاب ۽ سنڌ ۾ بلدياتي اليڪشن وارو پهريون مرحلو جيڪو 31 آڪٽوبر تي ٿي گذريو آهي ان تي جڏهن نظر ڦيرائبي ته جيڪي اليڪشن دوران ڌانڌليون ٿيون يا نه انهن جي به هڪ تاريخ آهي ڇو ته هن ملڪ اندر گهڻي ڀاڱي عوام کان پنهنجي راءِ پڇي ناهي وئي. جيڪڏهن ماڻهو ڪنهن پارٽي کي دل سان چاهين ٿا ته ان پارٽي کي اقتدار جي اصل ڌڻين سدائين ڀت سان لڳائڻ جي ڪوشش ڪئي آهي اهو سچ آهي جيڪڏهن مٿين آمرن جي بلدياتي ڪرايل چونڊن تي نظر ڦيرائبي ته انهن ٻنهي پنهنجي دور حڪومت ۾ جيڪي بلدياتي چونڊون ڪرايون ويون هيون اهي غير جماعتي بنيادن تي ڪرايون هيون هي جيڪي هاڻي بلدياتي چونڊون اسان وٽ ٿي رهيون آهن اهي سياسي بنيادن تي ڪرايون وڃن ٿيون ان جي ڪري 31 آڪٽوبر تي جيڪا بلدياتي اليڪشن سنڌ ۽ پنجاب اندر ٿي اها سياسي بنيادن تي ڪرائي وئي ان جو وڏي ۾ وڏو سبب اهو آهي ته ڪافي سياسي پارٽين جا خاص ڪري سنڌ اندر پول وائکا ٿي ويا آهن ڇو ته جيڪي سياسي پارٽيون سڄي سنڌ اندر پنهنجا اميدوار ئي بيهاري ناهن سگهيون انهن سياسي پارٽين ۽ سياسي اڳواڻن کي سنڌ جي سٻاجهن ۽ سادڙن ماڻهن تي تنقيد ڪرڻ ۽ ڳالهائڻ جو ڪو به حق ناهي ۽ جنهن نموني سان 31 آڪٽوبر تي سنڌ جي ضلع خيرپورم سچل جي نگري جٿان محبت پيار امن جو درس ملي ٿو اتي نفرت جي باھ لگائي وئي قيمتي جانين جو رت وھايو ويو ۽ انسانيت جو جنازو ڪڍيو ويو انھي تي جيترو ڀي افسوس ڪجي اھو گهٽ آهي منھنجو سوال انھن ماڻهن کان آهي جن هي الميو ڪرايو آهي ۽ بيگناھ 12قيمتون جانيون قربان ٿي ويون آهن 12 خاندانن جون خوشيون ختم ٿي ويون، قاتل مير، پير، جاگيردار سرمائيدار ۽ وڏيرا جن اھو ڪم ڪرايو انھن درندن جي روح کي ڪجھ ڀي لوڏو نه آيو سندن ضمير مري ويل آهي. ڇا هي اسان ڇاڪري رھيا آھيون ان تي اسان ويهي ڪجهه گهڙيون سوچيو آهي ته جيڪي مير، پير ڀوتار، وڏيرا، سرمائيدار اقتدار ۽ ڪرسين کي حاصل ڪرڻ لاءِ اسان مسڪين، بي پهچ دل جي سچائي سان پيار محبت ڪندڙ انهن سنڌ جي سٻاجهڙن سادن سچن ماڻهن کي ڪيئن استعمال ڪري رهيا آهن ڇا جيڪي 12 ڳڀرو نوجوان رت ۾ وهنجاري ماريا ويا انهن جي مائرن، ڀينرن، ونين وٽ وڃي ڪنهن انهن کان پڇيو آهي ته اوهان جا پيارا اوهان کان وڇڙي ويا آهن اوهان ڪيئن ٿيون محسوس ڪيو. هي ڳالهه ته اهي درد منديون دليون رکندڙ ئي سمجهنديون جن کان پنهنجا پيارا وڇڙي ويا هوندا.

وڇوڙو ڇا ٿيندو آ ان جو احساس ڀلا انهن مير، پير ڀوتارن ۽ اقتدار جي پوڄارن وٽ ڪٿي هوندو جن ڪڏهن ڀلجي به پنهنجن پيارن جي لاش کي ڪلهو ناهي ڏنو. هونئن ته سنڌ اهڙي ڌرتي آهي جنهن تي هزارين اهڙيون مائرون اڄ به موجود آهن جيڪي پنهنجي گهر جي درن ۾ اکيون وجهيو ويٺيون آهن ته ڪنهن وقت ٿا انهن جا اهي لاڏلا پٽ موٽي اچن جيڪي انهن جي گهرن جي زينت بڻيل هوندا هئا. ڇا مري ويل ماڻهو به ڪڏهن موٽي ايندو آهي اها ڳالهه انهن مائرن کي ڪير سمجهائي جن جون دليون اهو مڃڻ لاءِ تيار ئي ناهن ته ڪو هنن جا مور پٽ ابدي ننڊ سمهي پيا آهن اها هڪ الڳ رمز آهي ته جسماني جدائي سان روح جا ناطا ناهن ٽٽندا جيڪي ماڻهو دل اندر گهر ڪري ويندا آهن اهي مرڻ کان پوءِ دل ۾ موجود رهندا آهن ڀلي ڇو نه هو جسماني طور هزارين ڪوهه پري هليا ويا هجن ۽ اهو به سچ هجي ته هو هاڻي موٽي نه ايندا پوءِ به اها ڳالهه نه مڃجي اهو ئي عشق آهي ۽ عشق کي هارائڻ ڪنهن جي وس جي ڳالهه ناهي. ڇو ته سچ ته اهو آهي جنهن سٻاجهي سنڌ مٿان اسان سنڌ جا رهواسي رهون ٿا ان سنڌ جا ايترا وسيلا آهن جو سنڌ جي فردن مٿان خرچ ڪيا وڃن ته ڪو به سنڌ جو گهر اهڙو نه رهندو جيڪو خوشحال زندگي نه گذاري سگهي ۽ اها به حقيقت آهي ته سنڌ جي وسيلن کي ٻنهي هٿن سان لٽيندڙ ڪي ڌاريا نه پر هن ملڪ جا اهي واڳ ڌڻي آهن جيڪي سدائين پردي پويان رهي پنهنجو ڪردار ادا ڪندا آهن ۽ من پسند ماڻهن کي اقتدار مٿان حاوي رکڻ لاءِ غلط حربا هلائيندا آهن ۽ ان جي ئي ڪري هٿ سان پنهنجي پسند جون سياسي پارٽيون جوڙائي انهن کي اقتدار تي ويهارڻ به انهن ڌرين جو ڪمال آهي پر شهيد بينظير جي شهادت کان پوءِ جيڪي موجوده ملڪ جون حالتون تبديل ٿيون آهن ان کي به سچي دل سان مڃڻ گهرجي ۽ هن وقت اهي سگهاريون ڌريون مجبور آهن ته هو اقتدار مٿان سڌي نموني قبضو نه ٿيون ڪري سگهن ان جي لاءِ ئي غلط حربا استعمال ڪيا پيا وڃن اها ڳالهه به سنڌ جي ساڃاهه وند ماڻهن کي ذهن ۾ رکڻ گهرجي مون سميت سنڌ جا لکين نوجوان اهو سڀ ڪجهه سمجهن ٿا ته هي بلدياتي اليڪشن وارو کيل ۽ ڊرامي بازي صرف ان لاءِ رچائي وئي آهي جيئن سنڌ جا وسيلا سالن کان وٺي جيڪي هضم ڪيا پيا وڃن اها به هضم ڪيا وڃن باقي جنهن انداز ۽ نموني سان دنيا اندر بلدياتي نظام ان ڪري جوڙيا ويندا آهن ته جيئن اقتدار هيٺين طبقي تائين عام ماڻهن وٽ منتقل ڪجي جيئن اتان جو چونڊيل ڪائونسلر، چيئرمين، وائيس چيئرمين پنهنجي پنهنجي ڳوٺ، گهٽي شهر جا مسئلا پاڻ حل ڪرائي پر اسان وٽ هن وقت تائين جيڪي بلدياتي اليڪشن ٿي گذريون آهن انهن تي جيڪڏهن نظر ڦيرائبي ته ڇا اهي بلدياتي اليڪشنون اهڙي رزلٽ ڏئي سگهيون آهن ۽ اقتدار هيٺ تائين منتقل ٿيو آهي يا نه؟ هي هڪ سچو ۽ اهڙو سوال آهي جنهن جو جواب هر سنڌ واسي ٻڌڻ چاهي ٿو ته هن وقت تائين سنڌ کي جنهن ڌٻڻ ۾ ڌڪيو ويو آهي ان ڌٻڻ مان سنڌ جا ماڻهو نڪرڻ لاءِ ڇا وري به بلدياتي اليڪشن ۾ پنهنجو ووٽ استعمال ڪري پنهنجا پنهنجا نمائندا چونڊرائن يا نه. هي هڪ الڳ بحث آهي ان تي گهڻو ڪجهه لکي سگهجي ٿو پر پاڻ صرف اها ڳالهه ڪنداسين جيڪا 31 آڪٽوبر تي ٿيندڙ بلدياتي چونڊن جي حوالي سان بيٺل اميدوارن جي نتيجن کان پوءِ سامهون آئي آهي سڄي سنڌ جي 8 ضلعن مان پ پ جا اميدوار وڏي اڪثريت سان ڪاميابي ماڻي آيا آهن جڏهن ته ٻيو نمبر وري به آزاد اميدوار آيا آهن اهي آزاد اميدوار به حقيقت ۾ پيپلزپارٽيءَ جا بيهاريل اميدوار سمجهيا وڃن ٿا ڇو ته جهڙي نموني سان ڪشمور ڪنڌڪوٽ ۾ پ پ جي ايم پي اي بجاراڻي ۽ پ پ جي ئي ايم پي اي سندراڻي پينل ۾ مقابلو ٿيو ۽ قمبر شهدادڪوٽ جي وري ٻن نوابزادن مگسي چانڊيا برادري جي سردارن جي وچ ۾ جيڪا اليڪشن واري راند ٿي ان کان پوءِ مٿيان نتيجا سامهون آيا ۽ مسلم ليگ فنڪشنل ته موراڳو ٽئين نمبر تي ٿيل بلدياتي اليڪشن ۾ آئي آهي هيءَ حقيقت تسليم ڪرڻي پوندي ته سنڌ اندر اڃا اهي ڌريون پيپلزپارٽيءَ جي لاءِ متبادل ٺاهي ناهن سگهيون ته مقابلو وري ڪٿان ڪنديون باقي رڳي پريس رليز جي سياست ۽ الزام بازي سنڌ سان سڄڻائپ ناهي جيڪڏهن ڪنهن به پارٽي کي ڪنهن به پارٽي سان مقابلو ڪرڻو آهي ته سڀ کان پهريان اول هن کي اهڙي صف بندي جوڙڻي پوندي ۽ پهريان ته متبادل ٺاهڻو پوندو ۽ عام ماڻهوءَ تائين لهي اچڻو پوندو. اسان وٽ ته پهريان جيڪي بلدياتي چونڊون ٻن آمرن جي وقت دوران ڪرايون ويون هيون اهي اصل ۾ غير جماعتي هيون جن ۾ اها خبر ئي نه پئجي سگهي ته ڪهڙي پارٽي ڪهڙي پوزيشن ۾ آهي سچ ته هاڻي سامهون آيو آهي جڏهن اهي چونڊيون پارٽي بنيادن تي ٿيون آهن هار جيت انهن اميدوارن کي ذهن ۾ رکي پوءِ ئي اليڪشن ۾ بيهڻ گهرجي جنهن نموني سان موجوده بلدياتي اليڪشن کي هر برادري پاڙي، راڄ ڀاڳ تائين هيٺ آندو ويو آهي ۽ گهر گهر ۾ جهيڙو ڪرائڻ وارو سلسلو به پنهنجي جاءِ تي حقيقت آهي ان جي لاءِ اسان جيڪي سنڌ جا رهواسي پنهنجي ڌرتي ۽ ان جي رهندڙ ڌرتي ڌڻين سان پيار محبت جون جيڪي حاميون ڀرڻ سميت ڳالهيون ڪري رهيا آهيون ان کي عملي جامو پارائڻ جو وقت اچي ويو آهي ۽ اسان پنهنجي هڪ ٻئي جي آسپاس رهندڙ انهن بلدياتي اليڪشن ۾ حصو وٺندڙ اميدوارن ۽ انهن جي ووٽرن کي اها ڳالهه ذهن ۾ ويهارڻ جي ڪوشش ڪيون ته اوهان ڀلي اليڪشن ۾ حصو وٺو ۽ پنهنجو ووٽ ڏيو پر اها ڪٿان جي عقلمندي آهي ته اوهان هڪٻئي جي خون جا پياسا ٿي وڃو ۽ اليڪشن ۾ هڪ ٻئي مٿان هٿيارن جا منهن کولي ڇڏيو ان جي لاءِ سوچڻ ۽ سمجهڻ جي اها ڳالهه آهي ته ٻه اميدوار بيهندا انهن مان هڪ ڪرندو ۽ ٻيو کٽيندو ڪرڻ واري کي پنهنجي ذهن ۾ اها ڳالهه ويهارڻ گهرجي ته هن کي شڪست ڇو ملي ۽ جيڪو کيس اليڪشن ۾ هار ڏئي کٽي ويو آهي ڇا اهو هن کان وڌيڪ ڪم ڪندڙ آهي يا هو اهو ٻنهي اميدوارن کي سوچڻ گهرجي سنڌ جي ماڻهن کي ٻئي مرحلي ۾ ٿيندڙ 19 نومبر واري بلدياتي اليڪشن ۾ سڀ کان پهريان اهو خيال ڪرڻ گهرجي ته هو هڪ ٻئي جي عزت ۽ نفس جو خيال رکن مير، پير، ڀوتار ۽ اقتدار جا اهي پوچاري جيڪي اصل ۾ مسڪين، غريب، سچن ۽ سادن ماڻهن جي محبت ۽ سادگي جو غلط فائدو وٺندي انهن کي ويڙهائي وجهن ٿا اهڙن غلط پروپيگنڊا ڪندڙن کان پاسو ڪن ۽ مان ھٿ ٻڌي عرض ٿو ڪريان توھان ووٽ ڪنھن کي ڀي ڏيو پر پنھنجي قيمتي جان ڪنھن پيرمير ۽ ظالم وڏيري مٿان قربان نه ڪيو جيڪو غريب جو ھمدرد ناھي ڇو ته هيءَ سنڌ صرف انهن ميرن پيرن جي ناهي پر سنڌ سنڌين جي آهي.

 

 

 

 

سنڌ ۾ بلدياتي چونڊن جو پهريون مرحلو ۽ سرڪاري ملازمن جو ڪردار

31 آڪٽوبر 2015 تي پنجاب جيان سنڌ ۾ به پهريون مرحلو رت جي راندي بعد پنهنجي پڃاڻي تي پهتو بيگاني شادي عبدالله ديوانه جيان ڪيترن ئي ماڻهن جا اڃا تائين زخم به ختم نه ٿيا آهن، هاڻي وري ٻئي مرحلي جي تياري پئي هلي، جئين ته قانون موجب ڪو سرڪاري ملازم بلدياتي سميت عام چونڊن ۾ حصو نه ٿو وٺي سگهي اهو ئي نه پر جيڪڏهن ڪو تازو رٽائرڊ ٿئي به ان کي به چونڊ وڙهڻ جي اجازت ناهي هوندي، پر تازين بلدياتي چونڊن ۾ مختلف کاتن جا سرڪاري ملازم سري عام چونڊ مهم هلائيندي ۽ اميدوارن جي ڀرپور ساٿ ڏيندي نظر آيا آهن، توڙي جو انهن کي اڻڌريو ٿي ڪري پنهنجي نوڪري جا فرض انجام ڏيڻ گهرجين، ان باوجود سرڪاري ملازم اليڪشن جي چهچٽي ۾ سلهاڙيل رهيا، رڳو اهو ئي نه انهن جا ته اميدوارن جي چونڊ جلسن ۾ به گفتا ٻڌڻ آيا ۽ فوٽو سيشن پڻ ٿيندا رهيا. پوءِ ڇو نه اهي بئنڪ ملازم هجن يا اسڪول جا ماستر ، سرڪار کي عرض آهي ته سرڪاري ملازمن کي پنهنجي ڊيوٽي جو پابند ڪيو وڃي نه ڪي انهن کي اها کليل اجازت ڏني وڃي ته هو سري عام ڀوتارن جي چونڊ مهم هلائين ۽ پنهنجي نالن ۽ تصويرن سان پينا فليڪس ۽ پملفليٽ ڇپائي ديوارن جي زينت وڌائيندا وتن، سندن ڪم پنهنجي آفيس يا اسڪول ۾ ذميواري نڀائڻ جو آهي جنهن جو هو پگهار کڻي رهيا آهن، جيڪو قوم جو فرض پڻ آهي ان ڪري سرڪار سڳوري ايندڙ چونڊ مرحلي ۾ اهڙي قسم جي سرگرمين تي نظر وجهي اهڙا حڪم جاري ڪري جئين ڀوتارن جي چونڊ سرگرمين ۾ عوام جا نوڪر کين آفيسن ۾ رولي پاڻ اليڪشن ڪمپين هلائڻ لاءِ نڪتل هجي ۽ ماڻهو آفيسن جا چڪر ڪاٽيندا وتن.