تازيون خبرون

Daily Archives: November 4, 2015

زلزلي ۾ 226 ماڻهو فوت، 1635 زخمي ٿيا: مشتاق غني

پشاور (اين اين آءِ) وزيراعليٰ خيبرپختونخواهه جي معاون خاص انفارميشن مشتاق غني چيو آهي ته تازي زلزلي سبب 226 ماڻهو فوت جڏهن ته 1635 ماڻهو زخمي ٿيا فوتين 193 ماڻهن جي وارثن کي امدادي رقم ملي چڪي آهي گذريل ڏينهن معاون خاص زلزلي جي تازي صورتحال ۽ امدادي سرگرمين جي حوالي سان ميڊيا کي بريفنگ ڏني مشتاق غني جو چوڻ هو ته پي ڊي ايم اي خيبرپختونخواهه جي جاري ڪيل تازن انگن اکرن مطابق زلزلي سبب ڪل 226 ماڻهو فوت ٿيا آهن جن مان 193 متاثر ڪٽمبن کي معاوضو ملي چڪو آهي زلزلي ڪل 1635 ماڻهو زخمي ٿيا جن ۾ 115 ماڻهن کي معاوضو ڏنو ويو زلزلي ۾ 42722 گهرن کي نقصان پهتو آهي جن مان 398 تباهه ٿيل گهرن جي مالڪن کي معاوضو ڏنو ويو آهي هن چيو ته تازي زلزلي سان 495 سرڪاري اسڪولن جي عمارتن کي نقصان ٿيو آهي زلزلي ۾ ٿيندڙ مختلف نقصانن ۾ جاني ۽ مالي نقصانن جي حوالي سان انهن جو چوڻ هو ته سوات ۾ 35 ماڻهو فوت 253 زخمي ۽ 11294 گهر تباهه ٿيا آهن دير لوئر ۾ 26 ماڻهو فوت 248 زخمي ۽ 2397 گهر تباهه ٿيا آهن دير اپر ۾ 16 فوت 162 زخمي 234 اسڪول ۽ 3170 گهرن کي نقصان پهتو بونير ۾ 9 فوت 98 زخمي ۽ 437 گهر تباهه ٿيا آهن ۽ 151 اسڪولن کي نقصان ٿيو تورغر ۾ 18 فوت 27 زخمي 700 گهر تباهه ٿيا آهن ڪوهستان اپر ۾ 9 فوت 7 زخمي ۽ 440 گهر تباهه ٿيا آهن ڪوهستان لوئر ۾ 3 فوت 27 زخمي ۽ 1486 گهر تباهه ٿيا پشاور ۾ 9 فوت 165 زخمي جڏهن ته 210 گهرن کي نقصان ٿيو چارسده ۾ 4 فوت 8 زخمي ۽ 105 گهرن کي نقصان ٿيو مردان ۾ 5 فوت 16 زخمي ٿيا آهن نوشهره ۾ 2 فوت 17 زخمي ۽ 279 گهر تباهه ٿيا آهن صوابي ۾ 3 فوت 6 زخمي 28 اسڪول ۽ 432 گهر تباهه ٿيا مانسره ۾ 2 فوت 15 زخمي ۽ 31 گهر تباهه ٿيا هنگو ۾ هڪ فوت ۽ 3 گهر تباهه ٿيا ٽانڪ ۾ هڪ فوت هڪ زخمي 53 اسڪول ۽ 15 گهرن کي نقصان پهتو چترال ۾ 32 فوت 200 زخمي ۽ 15937 گهر تباهه ٿيا آهن شانگلا ۾ 49 فوت 265 زخمي ۽ 3311 گهر تباهه ٿيا آهن مالاڪنڊ ۾ 2 فوت 78 زخمي ۽ 792 گهر تباهه ٿيا آهن سڀ کان وڌيڪ مالي نقصان گهر تباهه ٿيڻ ۽ گهرن جون ڀتيون ڪرڻ جا واقعا بونير سوات شانگلا دير مالاڪنڊ ۾ ٿيا آهن.

 

منهنجي ڌيءُ به شوبز جي دنيا ۾ اچڻ چاهي ٿي: شاهه رخ خان

ممبئي(شوبز نيوز)بالي ووڊ اداڪار شاهه رخ خان چيو آهي ته منهنجي ڌيءُ به شوبز  جي دنيا جوائن ڪرڻ چاهي ٿي، ميڊيا سان ڳالهائيندي شاهه رخ خان چيو ته منهنجا ٻار آريان ، سهانا ۽ ابرام اڃا ننڍا آهن ۽ پنهنجي ڪيرئير جي امڪانن تي غور نه ٿا ڪري سگهن، پر سندس ڌيءَ اداڪاري جي ميدان ۾ اچڻ چاهي ٿي، هن ٻڌايو ته سهانا اڪثر پنهنجي اسڪول ۾ مختلف ڊرامن ۾ حصو به وٺندي آهي.

 

منهنجي زندگي ۾ اڳتي ڇاٿيندو ڪا خبر ناهي ان بابت پريشان آهيان:سلمان خان

ممبئي(شوبز نيوز) ڀارت جي ميڊيا رپورٽ مطابق، هڪ انٽرويو ۾ بالي ووڊ اداڪار سلمان خان چيو آهي ته عدالت جي فيصلن ۾ ڇا پيو ٿئي ، جيڪڏهن توهان 5. 5 سال گڏ ڪيو ته 10.15 سال ٿي ويندا،هي منهنجي ۽ منهنجي مائٽن لاءِ هڪ وڏي پريشاني جي ڳالهه آهي هي ڪيس مئجسٽريٽ جي عدالت ۾ نه پر هائيڪورٽ ۾ هلي رهيو آهي  ۽ اڳتي ڇاٿيندو منهنجي زندگيءَ جو سفر ڪئين گذرندو ڪا به خبر نه ٿي پوي.سلمان خان تي الزام  هو ته سيپٽمبر 2002 ع ۾ ممبئي ۾ رات وقت شراب پي گاڏي هلائي هئي ۽ پنهنجو هوش هواس وڃائي ويٺو هو جنه ن سبب هڪ شخص فوت ۽ ڪيترائي زخمي پڻ ٿيا هئا.جنهن کانپوءِ سلمان خان اُن حادثي واري جاءِ تان ڀڄي ويو هو.سندس خلاف قتل، عير ذميداري ۾ گاڏي هلائڻ، ماڻهن جي زندگي خطري ۾ وجهڻ ، ڪيترن کي ئي نقصان پهچائڻ ۽ نشي ۾ گاڏي هلائڻ سوڌو 8 ڪيس داخل هن.

 

عبدالقادر جو مصباح الحق کي ٽيسٽ ڪرڪيٽ جاري رکڻ جو مشورو

اسلام آباد(اسپورٽس نيوز) اڳوڻي ٽيسٽ ڪرڪيٽر عبدالقادر مصباح الحق کي ٽيسٽ ڪرڪيٽ جاري رکڻ جو مشورو ڏنو آهي. سندس چوڻ آهي ته مصباح ون ڊي تان پڻ جلد رٽائرمينٽ وٺي ڇڏي، هو ٻنهي فارميٽ تي کيڏڻ لاءِ فٽ آهي. پنهنجي هڪ بيان ۾ هن چيو ته پي سي بي چيئرمين شهريار خان مصباح کي رٽائرمينٽ نه وٺڻ جي درخواست ڪري صحيح قدم کنيو. ٽيسٽ ڪپتان مڪمل طور تي فٽ آهي ۽ بهترين ڪارڪردگيءَ جو مظاهرو ڪري رهيو آهي. هن چيو ته مصباح الحق کي ون ڊي تان رٽائرمينٽ نه وٺڻ گهرجي.

 

زنگجي ويل سماج ۽ قلمڪار جو قتل: ستار جانوري

اسين جنهن معاشري ۾ رهون ٿا ۽ جن حالتن مان گذري رهيا آهيون، اهڙي صورتحال ۾ حق ۽ سچ سان صحافت جا فرض سرانجام ڏيڻ جو ڪم ڏاڍو ڏکيو ٿي پيو آهي، ڇاڪاڻ ته ڪيترائي ناليوارا صحافي هڪڙي پاسي دهشتگردن جي ٽارگيٽ تي آهن ته ٻئي پاسي مقامي صحافي سياسي ڀوتارن، وڏيرن، جاگيردارن ۽ سماج لاءِ ناسور بڻيل عنصرن جي اکين ۾ ڪنڊي جيان چڀي رهيا آهن، جيڪڏهن ڪو صحافي ڪرپٽ سياستدان جي سنهي ڪرڻ بجاءِ ڪرپشن ۽ ٻين ڪوتاهين تي لکي ٿو ته اهو کيس ڪٿي نه ڪٿي چپ ڏياريندو، جيڪڏهن توهان ڪنهن وڏيري جي ظلمن خلاف لکندئو ته اهو توهان کي پنهنجي واٺن هٿان جاني يا مالي نقصان پهچائيندو، مشيات فروشي، ڀتاخوري، قبضاگيري سميت سماج جي ٻين برائين خلاف به توهان ان صورت ۾ کليل نموني لکي سگهو ٿا، جڏهن توهان کي پنهنجي ۽ پنهنجي پيارن جي جان جو اونو نه هجي.

صحافت جي هن اڙانگي سفر ۾ اسان جا ڪيترائي ساٿي پنهنجو ڳاٽ اوچو رکڻ لاءِ حق ۽ سچ لکندي اهڙن پاپي رهزنن هٿان شهادتون ماڻي چڪا آهن، جن وٽ انسانيت جي احساس نالي ڪا شيءِ ناهي، اهڙن ئي درندن هٿان تازو چوٽياريون جو کاهوڙي صحافي اڪبر ڪيريو پڻ شهادت ماڻي چڪو آهي. اڪبر ڪيريو جيتوڻيڪ سانگهڙ ضلعي جي هڪ ننڍڙي شهر چوٽياريون جو صحافي هو، پر هن ان ننڍڙي شهر ۽ آسپاس جي ڪيترن ئي ڳوٺن ۾ قلم ذريعي بااثر ظالم وڏيرن، جاگيردارن، منشيات فروشن ۽ راشي پوليس عملدارن جون ننڊون ڦٽائي ڇڏيون هيون، اهو ئي سبب آهي جو هن کان منشيات فروشن جياپي جو حق کسي ورتو.

صحافي اڪبر ڪيريي جي شهادت کي تقريبن ٻه هفتا ٿيڻ وارا آهن، پر افسوس سان چوڻو ٿو پئي ته چوٽياريون پوليس جي مجرماڻي خاموشي سندن ضمير جي حوالي سان ڪيترائي سوال اٿاري رهي آهي، ڪيڏي نه حيرت جهڙي ڳالهه آهي ته هڪ قلمڪار بيدرديءَ سان قتل ٿيو ۽ پوليس وري قاتلن کي ڇوٽ ڏئي ويٺي آهي، جيتوڻيڪ نه صرف چوٽياريون ۽ سانگهڙ جا پر حيدرآباد کان وٺي سنڌ جي مختلف ضلعن جا صحافي سانگهڙ ۽ ٻين شهرن ۾ قاتلن جي گرفتاري لاءِ احتجاج ڪري چڪا آهن، ان جي باوجود چوٽياريون ٿاڻي جي ايس ايڇ او جي ضمير کي لڳل زنگ لهي ناهي سگهيو. افسوس نه صرف پوليس جي اهڙي عمل تي آهي، پر انهن انساني حقن جون دعوائون ڪندڙ موسمي اين جي اوز وارن تي به حيرت آهي، جيڪي پاڻ کي عالمي امن جا علمبردار سمجهن ٿا، اهي به هن واقعي تي مسلسل خاموش آهن. ساڳي ريت عدليه، ميڊيا جي آزادي ۽ جمهوريت جون ڳالهيون ڪندي دهل وڄائيندڙ انهن سرمائيدار سياستدانن تي به حيرت آهي، جن هن هيتري واقعي جو نوٽيس وٺڻ ته پري جي ڳالهه آهي پر تعزيتي بيان به جاري ناهي ڪيو…!

اسين ڪهڙي بي حس معاشري ۾ زندگي گذاري رهيا آهيون، جتي منشيات جهڙي لعنت سميت معاشري جي ٻين سماجي برائين خلاف ۽ مظلوم ماڻهن جي حقن لاءِ قلم ذريعي جدوجهد ڪندي شهيد ٿيل صحافي اڪبر ڪيريو جا يتيم پاڻ انصاف لاءِ اڄ واجهائي رهيا آهن، اڪبر جون معصوم نياڻيون وسيمه، نجمه ۽ پٽ سڪندر ۽ بابر کيڏڻ ۽ ڪُڏڻ واري عمر ۾ پنهنجي جوان شهيد پيءُ جون پريس ڪلب اڳيان تعزيتون وصول ڪري رهيا آهن.

ڪاش! چوٽياريون ٿاڻي جو ايس ايڇ او ۽ سانگهڙ جو ايس پي پنهنجي اولاد وانگر انهن پتڪڙن ٻارن کي تصور ڪن ته آئون سمجهان ٿو ته شايد سندن ضميرن تي لڳل زنگ به لهي ويندو ۽ شهيد جا قاتل به بااثر ڀوتارن وٽان گرفتار ٿي ويندا، پر لڳي ائين رهيو آهي ته پوليس عملدارن جي سينن ۾ ڌڙڪندڙ دلين بجاءِ شايد ڪي پٿر رکيل ۽ اکين تي پردا چڙهيل آهن جو اهي اهڙا دردناڪ  لمحا نه ڏسڻ کان محروم آهن…!

قصو اڪبر جي شهادت ۽ ان جي معصوم ٻارن جي دردناڪ ڳالهين تي دنگ نه ٿو ٿئي، پر هتي ڪيترائي اڪبر جهڙا ارڏا صحافي ائين رهزنن هٿان شهيد ٿي چڪا آهن، اڄ انهن جا قاتل مزي ۾ آهن، جڏهن ته شهيدن جو اولاد انصاف لاءِ دربدريءَ واري زندگي گذاري رهيو آهي. اسين سمجهون ٿا ته هن سڄي معاملي ۾ رياست جي ذميواري آهي ته اها نه صرف صحافين پر هر شهريءَ جي جان ۽ مال جي تحفظ کي يقيني بڻائي، ان لاءِ سنڌ سرڪار کي گهرجي ته نه صرف شهيد اڪبر ڪيريي جي قتل جو نوٽيس وٺي جوابدار گرفتار ڪرايا وڃن ۽ انهن کي سزائون پڻ ڏياريون وڃن، پر انهي سان گڏ شهيد اڪبر جي بيوه زال ۽ سندس 5 معصوم ٻارن جي مالي سهائتا ڪرڻ سميت انهن جي تعليم جو پڻ جوڳو بندوبست ڪيو وڃي

 

ڪتم سڀ ڄمار .ڪتاب جي مهورت 4 نومبر 2015ع جي مناسبت سان——شمس جعفراڻي ۽ ڪتم سڀ ڄمار…..آتم ڪٿا: حميد ڀٽو

 

 

ڪتيم سڀ ڄمارنالي واري ڪاموري شمس جعفراڻي جي آتم ڪٿا، جيون ڪٿا ۽ پنهنجي زندگي جي حال احوال کان سواءِ اردگرد جي ماحول، سماجي حالتن ۽ مشاهدن جو بهترين انداز ۾ ذڪر ڪيو آهي. زندگيءَ جو ساروڻيون سارڻ انتهائي اوکو ڪم هوندو آهي. جنهن تحت پنهنجا مشاهدا ڪتاب جي شڪل ۾ لکڻ کان پوِءِ سوين دوست خوش ٿين ٿا ته اتي سوين ماڻهو دوستن منجهان دشمن پڻ بڻجيو پون. شمس جعفراڻي مسلسل جستو ۽ جدوجهد جو نالو آهي. صحافت جي ڏکين پيچرن تان هلندي سنڌ حڪومت جي سيڪريٽري سطح تائين پهنجي سرڪاري ڪاموري واري زندگي جي مشاهدي تي مشتمل ڀرپور واقعا شمس جعفراڻيءَ پنهنجي ان آتم ڪٿا ڪتاب ۾ ڄاڻايا آهن. جنهن ڪتاب جي اڄ چوٿين نومبر 2015ع تي ڪراچي جي مقامي هوٽل تي رونمائي تقريب رٿي وئي آهي. شمس جعفراڻي ماڻهن ۾ موتي داڻو آهي. انسانيت، ثقافت، ٻولي، تهذيب ۽ تمندن سان انتها کان وڌيڪ پيار ڪندڙ سنڌ ڌرتي جو نهايت ئي مانائتو ۽ شانائتو ماڻهو آهي. منهنجي ساڻس اڄ کان ويهارو کن سال اڳ لاڙڪاڻو ۾سندس ڊپٽي ڪمشنر جي مقرري دوران ملاقاتون ٿيديون رهيون، سندس پيار ۽ پاٻوهه جي ڪري ان وقت کان وٺي کائنس تمام گهڻو متاثر آهيان. هن لاڙڪاڻي جي دبنگ ڊپٽي ڪمشنر طور 96-1995ع ۾ خدمتون سرانجام ڏنيون. ان وقت سنڌ جي فنڪارن جي لاءِ جاکوڙيندڙ اداري سنڌ فنڪار ويلفيئر ٽرسٽ جي سرپرستي ڪيائين، مالي توڙي اخلاقي طور تي ڀرپور مدد ڪندو رهيو. فن ۽ ادب سان لاڳاپيل ماڻهن سان ننڍ پڻ کان وٺي اڄ ڏينهن تائين ڀرپور محبت ڪندو رهي ٿو. ڊپٽي ڪمشنر لاڙڪاڻو کان وٺي سيڪريٽري ثقافت کاتي تائين فن ۽ ثقافت سان لاڳاپيل سوين ماڻهن جي مالي سهائتا کان ويندي سندن ڏک ۽ سک ۾ فوري طور اڳيان اڳيان رهندو آيو آهي. مون کي چڱي طرح سان ياد آهي ته شمس جعفراڻي لاڙڪاڻي ۾ ڊپٽي ڪمشنر هيو ۽ نالي وارو شاعر واجد انتهائي گهڻو بيمار هيو. ان بابت جڏهن کيس خبر پئي ته فوري طورتي واجد جي علاج جي لاءِ مالي سهائتا جو چيڪ ڏنائين ۽ وڌيڪ علاج جي سلسلي ۾ ڪراچي وڃڻ جي لاءِ  جهاز جي خرچ ۽ ڀاڙي سميت پهنجي خرچ تي علاج ڪرايو. واجد جي وفات وقت شمس جعفراڻي جي اکين ۾ آيل لڙڪ مون کي اڄ به ياد آهن. اهڙي طرح سان لاڙڪاڻي ۾ ٻيا کوڙ سارا شاعر ۽ اديب توڙي فنڪار بيمار ٿيا ته شمس جعفراڻي انهن جي علاج ۽ مالي سهائتا لاءِ اڳيان اڳيان رهيو، لاڙڪاڻي جو شاعر وشال جڏهن بيمار ٿيو، جنهن بابت جڏهن کيس ٻڌايوسين ته لاڙڪاڻي جو سٺو شاعر شاميون ۽ ڪباب کپائي پنهنجو گذر سفر ڪري ٿو ۽ علاج لاءِ کيس ڏوڪڙ ڪونهن، جنهن تي شمس جعفراڻي فوري طور تي سندس علاج لاءِ مالي مدد ڪئي. ساڳئي وقت لاڙڪاڻي ۾ ثقافتي سرگرمين کي هٿي وٺرائڻ لاءِ پڻ ڀرپور ڪردار ادا ڪيو. ڊپٽي ڪمشنر هجڻ دوران سوين يادگار ثقافتي پروگرام، سيمينار ۽ ادبي پروگرام منعقد ڪرائڻ سميت مالي معاونت ڪرڻ ۾ سندس ڪردار نمايان رهيو آهي. لاڙڪاڻي جو 1995ع ۾ منعقد ٿيندڙ پيپلزڪلچر ميلو شمس جعفراڻي جي ڀرپور سهڪار سان منعقد ٿيو. ان کان سواءِ سنڌ فنڪار ويلفيئر ٽرسٽ طرفان سندس سرپرستي هيٺ ان وقت لاڙڪاڻي ۾ منعقد ٿيندڙ وومئين ڪلچرل ميلا، مينا بازارون ۽ ڪلچرل ايوارڊ تقريبن سميت پشاور جي مشهور ڊراما سيريل ”شاخسار“ جي فنڪارن کي لاڙڪاڻي ۾ فن جو مظاهرو ڪرڻ سميت چين مان هڪ سئو کان وڌيڪ چيني فنڪارن تي مشتمل ثقافتي پروگرام جناح باغ لاڙڪاڻي ۾ منعقد ڪيو ويو، جنهن جو سمورو ڪريڊٽ شمس جعفراڻي ڏانهن وڃي ٿو. شمس جعفراڻي جي ڊپٽي ڪمشنر جي دور ۾ لاڙڪاڻي ۾ ريڊيو پاڪستان جو قيام عمل ۾ آيو، جيڪو خواب نالي واري شاعر شاهن باڊاهي، الهورايو انور ۽ منظور لاڙڪ سان گڏجي اسان ڏسندا هئا سين، جيڪوخواب ساڀيان  ڪرڻ ۾ شمس جعفراڻي جو اهم ڪردار آهي. ساڳئي وقت لاڙڪاڻي ۾ شاليمار ٽيليويزن نيٽ ورڪ (ايس ٽي اين) جو وجود پڻ سندس جي ڊپٽي ڪمشنر هجڻ دوران پيو. اهڙي طرح سان کوڙ سارا ٻيا ادارا قائم ڪرڻ ۾ سندس جستجو ۽ جاکوڙ واري طبيعت جو هجڻ شامل آهي. شمس جعفراڻي حيدرآباد ۾ مختلف نوڪرين دوران پڻ فنڪار گڏجاڻين ۽ ثقافتي ميڙاڪن ۾ پنهنجو اهم ڪردار ادا ڪندو رهيو، سوين فنڪارن جي ماني جو بندوبست شمس جعفراڻي ڪندو رهيو.

اهڙي طرح سان ڪالا باغ ڊيم جي هلندڙ تحريڪ دوران پڻ شمس جعفراڻي جو اهم ڪردار رهيو آهي، حيدرآباد ۾ ڪالا باغ ڊيم خلاف سوين فنڪارن جي تاريخي ريلي ۾ سوين ماڻهن جي ماني جو بندوبست پڻ شمس جعفراڻي ڪيوهو جنهن مان سندس جو سنڌ سان عشق نمايان نظر اچي ٿو ته ڪنهن ڪاموري طور منعقد ٿيل قومي مظاهري يا ڪوٺ ۾ هو شريڪ نه ٿي سگهيو پر اهڙن قومي ڪاڄن ۽ جدوجهد ۾ سندس ڪردار اڳيان اڳيان رهيو. شمس جعفراڻي جڏهن ملير ۾ ايڊمنسٽريٽر مقرر ٿيو تڏهن ڪراچي ۾ قيام امن جي سلسلي ۾ امن ايوارڊ تقريب منعقد ڪرڻ ۾ ڀرپور ڪردار ادا ڪيائين. ثقافت کاتي ۾ ڊائريڪٽر جنرل کان ويندي سيڪريٽري ثقافت تائين هن پنهنجي وس کان وڌيڪ نمايان خدمتون ثقافت کي هٿي وٺرائڻ سميت سنڌ جي فنڪارن جي پذيرائي لاءِ ڪيون ۽ ان لاءِ هن پنهنجو ڀرپور ڪردار ادا ڪيو. اداڪار انور سولنگيءَ جي بيماري دوران جڏهن کيس انور سولنگي جي بيماري جي ڄاڻ ملي ته هن پنهنجي کيسي مان 75 هزار رپيا کڻي مون سان گڏجي فيڊرل بي ايريا جي علائقي يوسف پلازه ۾ هليو ۽ انور سولنگي کي علاج لاءِ سهائتا ڪئي ۽ ان وقت شمس جعفراڻي سختي سان اهيا به هدايت ڪئي ته منهنجي هن مالي سهائتا کي ڪٿي به منظر تي نه آندو وڃي. ان بعد فوري طور سيڪريٽري ثقافت طور لکين رپين جي امداد انور سولنگي کي سرڪار جي فنڊن مان ڪرائي، جنهن مان انور سولنگي هڪ ڀيرو عمرو به ڪري آيو ۽ پنهنجي هڪ نياڻي جي شادي پڻ انهي مدد سان ڪرائي ۽ آخري گهڙين تائين شمس جعفراڻي لاءِ دعاگو رهيو. اهڙي ريت نالي واري اداڪار شفيع محمد شاهه جي بيماري دوران پڻ تمام وڏي رقم شفيع محمد شاهه جي علاج توڙي وفات کان پوءِ ان جي فيملي جي مدد ڪئي.

جڏهن شفيع محمد شاهه جي وفات تي تعزيتي ريفرنس منعقد ٿيو ته ان پروگرام ۾ تمام گهڻن ماڻهن شفيع محمد شاهه جي سرڪار پاران سهائتا نه ڪرڻ جون دانهون ۽ ڪوڪون ڪيون پر شمس جعفراڻي تمام گهڻي سهائتا باوجود خاموش رهيوڇاڪاڻ ته شمس جعفراڻي نيڪي ڪري درياهه ۾ ڦٽو ڪرڻ جو عادي رهيو آهي. پنهنجي نيڪي کي هميشه لڪائڻ جو عنصر سندس ۾ موجود آهي. انهيءَ تقريب ۾ هڪ قومپرست رهنما انتهائي ڇتي تنقيد ڪئي ته ان جو جواب تڌهن مون کي ڏيڻو پيو، جنهن جي حقيقت سامهون اچڻ بعد شمس جعفراڻي شفيع محمد شاهه جي ڪيل مالي سهائتا بابت بعد ۾ ٻڌايو، اهڙي طرح سهراب فقير، مصري ڏيپلائي، شفيع محمد جمن، سينگهار علي سليم سميت ٻين وڏن فنڪارن جي مالي سهائتا ۾ پڻ شمس جعفراڻي جو اهم ڪردار رهيو آهي ۽ سندس ڪريڊٽ تي ثقافت کاتي ۾ پڻ سوين يادگار پروگرامن جو شمار ڪري سگهجي ٿو. سندس جا دورازا هميشه فن ۽ ثقافت سان لاڳاپيل ماڻهن لاءِ کليل هوندا هئا. سرڪاري ڪاروهنوار اڪلائڻ ۾ جنن جيان ڪم ڪندو آهي، ڪڏهن ڪڏهن سندس سرڪاري آفيس ۾ ڪم ۾ جنبيل ڏسندي محسوس ٿيندو هو ته هي ڪو وڏو جن آهي يا ڪو سائنسي روبوٽ آهي!!.. شمس جعفراڻي ڪنهن به ڪم جي سستي کي قبول نه ڪندڙ شخصيت آهي ۽ هو هميشه پنهنجي دوستن ۽ واسطيدارن جي عزت ڪرائڻ ۾ اڳڀرو، ڏک ۽ سک ۾ اڳيان اڳيان رهندڙ شخصيت  طور پنهنجون خدمتون سرانجام ڏيندو رهيو آهي. لاڙڪاڻي ۾ مقرري دوران مان پنهنجي ثقافتي آفيس جي بجلي ٺهرائڻ جي لاءِ هڪ اليڪٽريشن کي وٺي آيس جيڪو بجلي جي ٿنبي تي حادثاتي طور تي وفات ڪري ويو، جنهن تي ان وقت جي ليبر يونين جاچڱا مڙس منهنجي خلاف سراپا احتجاج بڻجي ويا ۽ مون جڏهن ان اليڪٽريشن کي ڳڻتي جوڳي حالت ۾ کڻي وڃي اسپتال داخل ڪيو ۽ شمس جعفراڻي سان رابطو ڪيم، جنهن ان زخمي ٿيل اليڪٽريشن کي بچائڻ لاءِ اهم ڪردار ادا ڪيو پر انهيءَ اليڪٽريشن جي حياتي ايتري ئي هجڻ سبب ٽوڙهو منهنجي ڳچي ۾ پئجي رهيو هو، ڇاڪاڻ ته ڪجهه مخالف سياسي ڌريون انهيءَ مسئلي کي اٿاريندي منهنجي ڳچي ۾ ڦاهو وجهڻ پيون چاهين پر حقيقت پسندي جو مظاهرو ڪندي شمس جعفراڻيءَ ٻن ڪلاڪن اندر قانوني طريقي سان بيگناهه پوندڙ ڦاهي کان بچايو، اهڙي طرح سان اهو پڻ محسوس ٿيو ته شمس جعفراڻي ڪنهن به بي گناهه کي بچائڻ لاءِ انصاف ڏياريندو هو، جنهن جا ڪيترائي مثال ٻيا به آهن.

محترمه بينظير ڀٽو شهيد جي ٻيو ڀيرو وزير اعظم هجڻ دوران لاڙڪاڻي جو دبنگ ڊپٽي ڪمشنر هو ۽ ڪنهن به سياسي دٻاءَ ۾ نه ايندو هو ۽ انتظامي معاملن ۾ خودڪفيل رهندو هو. سندس ڪارنامن تي الڳ ڪتاب لکي سگهجي ٿو. شمس جعفراڻي 16 آگسٽ 1949ع تي جنم تي ڳوٺ غلام محمد هنڱورجو جاتي تعلقي ضلعي ٺٽي جي محمد جمن جعفراڻي جي گهر ۾ جنم ورتو. شمس جعفراڻي پنهنجي آتم ڪٿا ۾ تمام گهڻيون اهم ڳالهيون لکيون آهن ٽنڊو بهاول واري ڪيس ۾ مئجسٽريٽ طور ملزم بڻيل ميجر جو بيان پڻ قلم بند ڪيوجيڪو سنڌ جي تاريخ جو هڪ اهم واقعو آهي، جنهن ۾هڪ ميجر کي شمس جعفراڻي جي قلم بند ڪيل بيان جي نتيجي ۾ عدالتي سزا ملي. هن پنهنجي عملي زندگي جي شروعات روزاني مهراڻ اخبار کان ڪئي، جنهن بعد مخلتف اخبارن ۾ صحافتي ذميواريون ادا ڪيون ۽ ثقافت واري کاتي ۾ پڻ نوڪري ڪئي. ڪتاب ۾ پاڪستان جي سياسي اٿل پٿل، مارشلائي دور، ايوب خان جي ڊڪٽيٽر شپ، جنرل ضياءُ الحق جي ڊڪٽيٽر شپ واري دور کان 1983ع وارن سياسي دورن بابت سرڪاري ۽ زندگي جو تجربو واضع انداز ۾ لکيو آهي. اسسٽنٽ ڪمشنر کان ويندي سيڪريٽري تائين اهم پوسٽن تي سندس خدمتون وسارڻ جوڳيون ڪونهن، هن رٽائرمينٽ کان بعد  پڻ سنڌ جي ثقافت ۽ ٻولي لاءِ سندس جاکوڙ جاري آهي، ٻولي سان پيار ڪندڙ ماڻهن سان ڪچهريون ۽ ثقافتي ميڙاڪن ۾ هميشه مٿانهون ڪردار رهيو آهي، سندس صاحب ڪتاب بڻجڻ تي کيس جيتريون به واڌايون ڏجن ته اهي گهٽ آهي ۽ دعا آهي ته الله پاڪ شمس جعفراڻي کي وڏي ڄمار ڏئي ۽ هو ثقافت توڙي ٻولي جي تمام گهڻي خدمت ڪري سگهي.

 

ِڊي آءِ جي ٽريفڪ جا نت نوان حڪم، ڪراچي واسي عذاب ۾ اچي ويا

عوام جي به قسمت اهڙي آهي جو هڪ مصيبت ٽري ٿي به ٻئي ڪر کنيو بيٺل آهي، اهڙي ئي ڪجهه حالت ڪراچي جي عوام جي به آهي جتي مسئلا حل ٿيڻ بدران وڌندا پيا وڃن، حڪومتي اعلان ته بنا لائسنس گاڏي هلائيندڙ کي گرفتار ڪيو ويندو ته شهري گرفتاري جي خوف کان آپي مان نڪري پيا اچي لائسنس آفيس ڪڙڪيا، هوڏانهن وري حڪومت لائسنس ٺهرائڻ جو اعلان ڪري اهو به نه سوچيو ته هيڏي وڏي آبادي واري شهر ۾ لائسنس ٺهرائڻ کان اڳ ڪا جاڳرتا مهم هلائي وڃي يا لائسنس ٺاهڻ وارن سينٽرن ۾ ڪو اضافو ڪيو وڃي جئين عملي ۽ شهرين کي ڪا تڪليف نه ٿي سگهي پر ائين نه ٿيو، ٽريفڪ عملدارن جي نت نون حڪمن جوام کي ٻٽي عزاب ۾ ڦاسائي ڇڏيو آهي، گزريل ڏينهن به ڪجهه ائين ٿيو، حڪومتي اعلان بعد شهري ڊوڙندا اچي لائسنس آفيس پهتا رش جو فائدو وٺندي ايجنٽن مفت واري فارم جي فيس 100 کان 150 ڪري ڇڏي، گهڻي رش سبب پوليس به آپي مان نڪري پئي ۽ لٺين جا ٽڙڪا لائي ڏنا جنهن بعد حڪومت سڳوري جي به اک کلي، سنڌ جي گهرو وزير سهيل انور سيال ڪار ۽ موٽر سائيڪل هلائيندڙن کي لائسنس ٺهرائڻ لاءِ هڪ مهيني جي مهلت ڏئي ڇڏي، گڏو گڏ گهرو وزير صاحب لاڳاپيل عملدارن کي هدايت ڪئي ته شهرين کي سهولتون ڏنيون وڃن، ان ڏس ۾ ڪا ڪوتاهي برداشت نه ڪئي ويندي، ان کان اڳ ڊي آءِ جي ٽريفڪ ڪراچي امير شيخ مطابق شهر ۾ ٽريفڪ سسٽم دنيا جي ٻين ملڪن جيان بڻايو پيو وڃي، شهر ۾ هن وقت تائين ڊرائيونگ لائسنس کان بغير گاڏي هلائيندڙ جا ڪجهه چالان ڪيا ويندا هئا پر هاڻ بغير لائسنس گاڏي هلائيندڙ خلاف سخت قانوني ڪارروائي جو فيصلو ڪيو ويو آهي جنهن تي عملدرآمد 2 نومبر کان شروع ٿيڻو هو، شهرين جي درخواست تي کين وڌيڪ مهلت ڏني وئي آهي. هاڻي ڏسجي ته سرڪار سڳوري جي حڪم تي پوليس عملدار ڪهڙي سهولتن جي آڌار شهرين کي سولائي سان لائسنس جاري ڪن ٿا.