تازيون خبرون

Daily Archives: November 3, 2015

ڌي جي ڪري فلم دل والي جو حصو بڻيس: اداڪاره ڪاجول

ممبئي (شوبز نيوز) بالي ووڊ جي اسٽائلش اداڪاره ڪاجول چيو آهي ته انڊسٽري ۾ واپسي جو سبب ڌيءَ آهي ڇو ته ڌيءَ جي چوڻ تي فلم دل والي جو حصو بڻيس، بالي ووڊ جي ڪنگ شاهه رخ ۽ ڪاجول جي جوڙي انڊسٽري جي سڀ کان ڪامياب جوڙي آهي، جڏهن ته هن جوڙي ڪيترن بلاڪ بسٽر فلمن ۾ اداڪاري جا جوهر ڏيکاريا آهن جن ۾ دل والي دلهنيا لي جائينگي، ڪچهه ڪچهه هوتا هي، ڪڀي خوشي ڪڀي غم ۽ ماءِ نيم از خان شامل آهن، جڏهن ته هي جوڙي هڪ ڀيرو ٻيهر ڊگهي عرصي کانپوءِ فلمساز روهيٽ سيٽي جي فلم ۾ دل واري ۾ جوهر ڏيکاريندي، جنهن کي رليز کان اڳ بلاڪ بسٽر قرار ڏنو پيو وڃي، واضح رهي ته شاهه رخ ۽ ڪاجول جي فلم دل والي 18 ڊسمبر تي رليز ڪئي ويندي.

 

شاهه رخ جي زندگي جي سلور جوبلي ۾ هزارين پرستارن جي شرڪت

ممبئي (شوبز نيوز) شاهه رخ خان جي 50 هين سالگره تي سندس گهر ٻهران هزارين پرستار گڏ ٿيا جن جو اداڪار شاهه رخ خان هٿ لوڏي شڪريو ادا ڪيو، اداڪار شاهه رخ اڄ پنهنجي زندگي جي سلور جوبلي ملهائي رهيو آهي، زندگي جا 50 سال پورا ٿيڻ تي اداڪار پنهنجي گهر ٻهران بيٺل هزارين پرستارن جو هٿ مٿي کڻي شڪريو ادا ڪيو، شاهه رخ 80 کان فلمن ۾ اداڪاري جا جوهر ڏيکاريا، دنيا جي سڀ کان اميرن اداڪارن جي لسٽ ۾ شاهه رخ خان 6 سئو ملين ڊالر پراپرٽي جو مالڪ آهي، ديوانا، ڊر، بازيگر، انجام، شاهه رخ خان جون ڪامياب فلمون آهن، دل والي دلهينا لي جائينگي، دل تو پاڳل هي، ڪچهه ڪچهه هوتا هي ۽ ڪڀي خوشي ڪڀي غم شاهه رخ جون سپر هٽ فلمون آهن، ماڌوري کان وٺي دپيڪا پڊڪون هر دور جي بهترين اداڪارائن شاهه رخ سان گڏ ڪم ڪيو آهي. پدماشري 14 فلم فيئر سميت ڪيترا ايوارڊ ماڻيندڙ شاهه رخ اڄ به هر فلم جي روڪن سمجهيو وڃي ٿو.

 

ثانيا مرزا ۽ مارٽينا هنگس ڊبليو ٽي اي چيمپين شپ کٽي ورتي

سنگاپور (اسپورٽس نيوز) ثانيا مرزا ۽ مارٽينا هنگس ڊبليو ٽي اي چيمپين شپ جو ٽائيٽل کٽي ورتو، فيصلائي مقابلي ۾ انڊوسوئس جوڙي گربائن مگروزا ۽ ڪارلا ساريز نوارو کي شڪست ڏني، تفصيل موجن سنگاپور ۾ کيڏيل ڊبليو ٽي اي چيمپين شپ جي وومينز ڊبلز مقابلن جي فائنل ۾ عالمي نمبر هڪ جوڙي ڀارت جي ثانيا مرزا ۽ سوئٽزرلينڊ جي مارٽينا هنگس وينز ويلا جي گربائن مگروزا ۽ اسوپين جي ڪارلا سيريز نوارو کي اسٽريٽ ٽيسٽ ۾ شڪست ڏني ۽ ٽائيتل پنهنجي نالي ڪيو، سندن ڪاميابي جو اسڪور 0-6 ۽ 3-6 رهيو.

 

برلن (اسپورٽس نيوز) آسٽريليا ۽ نيوزيلينڊ جي ڪرڪيٽ ٽيمن وچ ۾ ٽن ٽيسٽ ميچن جي سيريز جي پهرين ميچ 5 کا ن9 نومبر تائين برسبين ۾ کيڏي ويندي، تفصيل موجب ڪيوي ٽيم برينڊن ميڪ ڪولم جي قيادت م اڄ ڪلهه آسٽريليا جي دوري تي آهي، جتي هو ٽن ٽيسٽ ميچن جي سيريز کيڏندي، آسٽريلوي ٽيم اسٽيون سمٿ جي قيادت ۾ ميدان ۾ لهندي، جڏهن ته نيوزيلينڊ جي ڪپتاني جو فرض برينڊن ميڪ ڪولم ادا ڪندو، ٻئين ٽيسٽ 13 کان 17 نومبر تائين کي0ڏي ويندي، ان کان پوءِ نيوزيلينڊ جي ٽيم ويسٽرن آسٽريليا خلاف ٻن ڏينهن واري ٽور ميچ کيڏندي، سيريز جي ٽئين ۽ آخري ٽيسٽ ميچ 27 نومبر کان پهرين ڊسمبر تائين کيڏي ويندي.

برلن (اسپورٽس نيوز) آسٽريليا ۽ نيوزيلينڊ جي ڪرڪيٽ ٽيمن وچ ۾ ٽن ٽيسٽ ميچن جي سيريز جي پهرين ميچ 5 کا ن9 نومبر تائين برسبين ۾ کيڏي ويندي، تفصيل موجب ڪيوي ٽيم برينڊن ميڪ ڪولم جي قيادت م اڄ ڪلهه آسٽريليا جي دوري تي آهي، جتي هو ٽن ٽيسٽ ميچن جي سيريز کيڏندي، آسٽريلوي ٽيم اسٽيون سمٿ جي قيادت ۾ ميدان ۾ لهندي، جڏهن ته نيوزيلينڊ جي ڪپتاني جو فرض برينڊن ميڪ ڪولم ادا ڪندو، ٻئين ٽيسٽ 13 کان 17 نومبر تائين کي0ڏي ويندي، ان کان پوءِ نيوزيلينڊ جي ٽيم ويسٽرن آسٽريليا خلاف ٻن ڏينهن واري ٽور ميچ کيڏندي، سيريز جي ٽئين ۽ آخري ٽيسٽ ميچ 27 نومبر کان پهرين ڊسمبر تائين کيڏي ويندي.

 

 

درازا شريف جي سرزمين تي انسانن جو وهايل رت خوني اليڪشن جو پارٽ ون!: منظور ڪالرو

سنڌ ۾ گهڻي عرصي کانپوءِ مرحليوار مڪاني اليڪشن لاءِ چونڊن جو عمل شروعاتي طور اٺن ضلعن ۽ ٻن ڊويزنن کان شروع ٿيو، جن ۾ سکر، خيرپور، لاڙڪاڻو، جيڪب آباد، گهوٽڪي، قمبرشهدادڪوٽ ۽ ڪنڌڪوٽ سرفهرست رهيا. اهي علائقا هونئن به برادري جي جهيڙن پراڻين دشمنين ۽ ڪاروڪاري جي مسئلن سميت امن امان جي حوالي سان خطرناڪ سمجهيا ويندا رهيا آهن، جتي سياسي ڇڪتاڻ يا سياسي پارٽين وچ ۾ ناراضگين ۽ مخالفتن کي ذاتي حيثيت ۾ تبديل ڪرڻ جي ڪري جهيڙا ٿين ٿا، جيڪي پوءِ خوني ويڙهه ۾ تبديل ٿيو وڃن، جنهن سان امن امان وارو مسئلو ڳنڀير صورتحال اختيار ڪري ٿو. مڪاني چونڊن جو هي پهريون عمل جيئن ته اتر سنڌ جي انهن علائقن کان شروع ڪيو ويو آهي، جتي اڳ ۾ ئي سرداري راڄ قبائلي نظام ۽ وڏين ننڍين برادرين جا مضبوط رشتا رهيا آهن. اهڙي راڄ يا نظام ۾ ’جيڪو ڏاڍو سو گابو‘ واري چوڻي تي عمل ٿيندو رهيو آهي. وري جو اهي سردار حڪومت ۾ به شريڪ هجن ته پوءِ کين ويتر انتظامي ۽ سرڪاري سطح جو مضبوط پٺ حاصل ٿيڻ سبب اهي اڇي ڪاري جا مالڪ بڻجي وڃن ٿا. پوليس سان گڏوگڏ ٻين ادارن ۾ مقرريون ۽ بدليون سندن هڪڙي فون ڪال تي ٿيڻ ڪري آفيسر به کانئن لهرائين ٿا، ان ڪري غريب عوام غلام رهڻ ۾ ئي شايد عافيت سمجهي ٿو.

جيئن ته اسان وٽ سياسي بلوغت جا جيوڙا انهيءَ حد تائين نه وڌي سگهيا آهن، جن سان سياست ۾ تحمل، بُردباري درگذري ۽ ڊگهي نظر جي ماڻهپي يا محبت ڀريا منظر ڏسي سگهجن، هتي عام زندگيءَ ۾ ”مون سان سياست ٿو ڪرين“ وارا لفظ معنيٰ مون سان ٺڳي ۽ دولاب ٿو ڪرين طور گهڻو استعمال ٿيندا رهن ٿا، ڇو جو اسان جو سياسي ڪلچر جيڪو سڄو ڏينهن پورو مهينو ۽ سمورو سال سياست ۾ ته مشهور ۽ مشغول ڏسڻ ۾ ايندو، ننڍا وڏا سياسي پارٽين جا ورڪر سياست- سياست ڪندي جوڙ توڙ جو حصو رهن ٿا، پر سياست جي منزلت ۽ اوچائي ڪيتري قدر ۽ ان جا مقصد ڇا هئڻ کپن، تنهن بابت اڻ ڄاڻائي جي حد افسوسناڪ ڏسجي ٿي، سياسي طور اسان جي پارٽين جي ورڪرن يا عهديدارن جي سکيا ٿيندي ڏسڻ ۾ نٿي اچي. ان ڪري اهي به اهو ئي ڪن ٿا، جيڪو سندن سامهون ٿيندو آيو يا ٿي رهيو هوندو آهي، تنهن ڪري هتي جي سياست ۾ درگذري ۽ همدرديءَ وارا لاڙا دلي طور اڃا پري آهن، اهي ملڪ ئي ٻيا، جتي سياست کي سياست سمجهي ان مطابق سماج، شهر ۽ ملڪ جي خدمت لاءِ پاڻ کي وقف ڪيو وڃي ٿو، جتي عوام خاص طور غريب ۽ بي پهچ عوام جي حقيقي طور عزت ٿيندي ڏسجي ٿي، جنهن ڪري انهن جي ترقيءَ جا گراف اسان کان سئو سيڪڙو مٿي رهيا آهن.

جيڪڏهن ڏٺو وڃي ته سماج ۾ بهتريون آڻڻ ۽ ادارن کي پنهنجو ڪم ذميواريءَ سان ادا ڪرڻ بنيادي طور مڪاني نظام کي مضبوط ڪرڻ لاءِ لازمي آهي، ان لاءِ جيڪڏهن چونڊ عمل وسيلي عوام مان عوام جا چونڊيل نمائندا چونڊجي مڪاني نظام جو وهنوار هلائين ته اهو بهتر سمجهيو وڃي ٿو پر افسوس جو اهڙو وهنوار حڪومتي سياسي پارٽين جي نظر ڪرم تي رهي ٿو، تنهن ڪري اهي ضروري سمجهن ته بلدياتي چونڊون ڪرائين ۽ جيڪڏهن نه سمجهن ته اهي نه ڪرائين پوءِ ڀلي عوام انهيءَ لاءِ مطالبا، گذارشون ۽ التجائون ڪندو رهي. انهيءَ ڪري هتي بلدياتي سسٽم جيڪو اڄ کان فقط 35-40 سال اڳ هو، اهو به بگڙي ويو ۽ ميونسپل ڪميٽين جي سربراهن پنهنجو بنيادي ڪم ڪرڻ ڇڏي ڏنو ۽ ”ڪنهن ٻئي“ ڪم طرف ڌيان ڏيڻ لڳا. گذريل ستن سالن دوران ته ميونسپل ايڊمنسٽريشن پنهنجي بدنامي جا سمورا رڪارڊ ٽوڙي بربادي ڪري ڇڏي، ڇو جو ڪا به بهتري يا ترقي ته ڏسڻ ۾ نه آئي، البته تباهه ڪارين جا ديدار ضرور نصيب ٿيا!!

هاڻ جڏهن معزز سپريم ڪورٽ جي حڪم تي بلدياتي چونڊون نيٺ ڪرايون وڃن پيون ته خير سان 31 آڪٽوبر تي سنڌ ۽ پنجاب جي ڪجهه ضلعن ۾ پولنگ ٿي ته اُميدون به قائم ٿيون آهن ته هاڻ ڪا ترقي ۽ بهتري آندي ويندي، جتي ترقي ۽ بهتر نظام لاءِ هي چونڊ عمل شروع ٿيو آهي، تڏهن ٻنهي صوبن جي پولنگن تي جيڪي افسوسناڪ واقعا رونما ٿيا آهن، تن مان پتو پوي ٿو ته اسان سياست سياست جا لفظ اچاري سگهون ٿا پر سياست ڪا ٻي شيءِ آهي جيڪا امن، محبت، ترقي، درگذري ۽ همدردي جي صفت سان مالا مال آهي، جنهن کانپوءِ اسان جون سياسي پارٽيون دور آهن.

خيرپور جي شهر ڇا پر مشهور صوفي بزرگ سچل سرمست جي نگري درازا شريف ۾ پولنگ واري ڏينهن فقط بلدياتي چونڊن جي عمل لاءِ ٿيل ننڍڙي جهيڙي کي جديد هٿيارن جي ڌڙاڌڙ فائرنگ سان 12 انسانن جو خون ڪري ڇڏڻ سان ڇا اسان کي سڌريل سماج طور سمجهيو ويندو؟ اهي 12 انسان فقط ان ڪري ماريا ويا جو انهن مڪاني چونڊن ۾ پنهنجو حصو شامل ڪندي پولنگ تي آيا ۽ ڪنهن سياسي پارٽي جو ساٿ ڏنو ڇا؟ ڪنهن سياسي جماعت جو ساٿ ڏيڻ يا ان سان شراڪتداري به ڪو ڏوهه آهي؟ درازا جي امن واري ڌرتي تان ته محبتن، پيار، ڀائپي، هڪ ٻئي جو احترام ۽ درگذري جا پيغام عام ٿيندا رهيا آهن پوءِ اهي ڪهڙا وحشي جانور نما انسان هئا، جيڪي جديد هٿيارن سان آيا ۽کلي عام پولنگ واري عمل دوران ماڻهن کي قتل عام ڪندي دهشتگردي ۽ وحشتن سان انسانن جو خون ڪري درازا جي ڌرتي کي ڳاڙهي رت سان رڱي هليا ويا!

ضرور پوليس عملو مقرر هوندو يا حفاظتي انتظام ڪيل هوندا، اهو به ان حالتن ۾ جڏهن اهي ضلعا يا انهن جا ڪيترائي شهر حساس قرار ڏنل هئا، پوءِ اهي ڪهڙي ”خوني مخلوق“ هئي، جيڪا اهڙي موتمار فائرنگ ڪندي ماڻهو ماري گاڏين تي وحشياڻه حملا ڪري آساني سان فرار ٿي وئي؟ ڪو جهنگ هو، ٻيلو هو يا اتر وزيرستان واري جاگرافي واري حالت هئي، جبل پهاڙ هئا، جو خوني ڏوهه ڪري ماڻهو بيدردي سان ماري هليا ويا؟ سنڌ ۾ ماڻهو مارڻ ايترو سستو ۽ سولو ٿي ويو آهي جو ڪو احساس ڪو ڊپ ۽ خدا کي جواب ڏيڻ جو خوف، سڀ ختم ٿي چڪو آهي، فقط درازا جي بلديات تي مقررين لاءِ ايڏو وڏو خوني اليڪشن ٻڌائي ٿو ته هاڻ سنڌ ۾ جيڪو طاقتور سردار هوندو ۽ اهو حڪومتي پارٽيءَ سان حمايتي هوندو ته ان لاءِ سڀ خون معاف سمجهيا وڃن.درازا شريف جي ”وريو واهڻ“ ۾ ٿيل هي خونخوار دهشتگردي ٻڌائي ٿي ته انتظام بهتر طور نه ڪيل هئا ۽ ڪنهن اڻ وڻندڙ واقعي کي منهن ڏيڻ جا بندوبست نه ٿيڻ سبب ننڍڙو جهيڙو وڌي (12) انسانن جي قتل جو سبب بڻيو، جنهن لاءِ آءِ جي سنڌ پوليس پاران جاچ ڪميٽي جو اعلان ڪيو ويو آهي. ڪاش! اتي اڳواٽ ئي رينجرز يا فوج کي مقرر ڪيو وڃي ها ته اهڙو افسوسناڪ واقعو رونما نه ٿيڻ جا گهڻا امڪان هئا. اهڙي واقعي بعد گذريل ڏينهن به سنڌ جي گهڻن شهرن ۾ هڙتال ۽ سوڳ واري حالت ڏٺي وئي، مقتولن جي جنازي نماز بعد کين مٽيءَ ماءُ حوالي ڪيو ويو آهي، پر سندن اجڙيل گهرن ۾ انهن جا پيارا اڄ به کين ساري روئي لڙڪ ڳاڙي رهيا آهن، ان جو حساب ڪير ڏيندو؟  ساڳئي وقت پ پ جي ڪاميابي تي ٿيندڙ جشن ملهائي ناچ ڪري ٻارنهن خونن کي ڪا به اهميت نه ڏيڻ وارا ڏکوئيندڙ منظر به ڏسجن پيا. ان هوندي به اُميد ته سرڪار ۽ قانون لاڳو ڪندڙ ادارا 12ڄڻن جي قاتلن جا پيرا کڻي کين گرفتار ڪندا ته جيئن سنڌ ۾ شروع ٿيندڙ مڪاني چونڊن جو ٻيو مرحلو امن امان سان گذري سگهي.

 

سنڌ ۾ خون سان چٽيل مڪاني ادارن جو پهريون روپ!!: ڊاڪٽر عبدالقدير ميمڻ

درازا شريف، خيرپورجي وي سي پريو واهڻ جي پولنگ اسٽيشن جي حدن ۾  مڪاني چونڊن جي پهرين مرحلي ۾ 11 انساني جانيون ضايع ٿيڻ سنڌ ۾ اليڪشن ۽ حڪومت جي ناتظامن کي جٿي داغدار بڻائي ڇڏيو آهي اتي پاڪستان پيپلز پارٽي جي قيادت ، وزير اعظم پاڪستان ، صدر پاڪستان ، گورنر سنڏ ۽ ٻي اعلي سياسي يا حڪمراني قيادت طرفان مذمتي بيان نه اچڻ ۽ انهيء ڏهڪاء واري سانحي جي جوڊيشنل انڪوائري جو حڪم نه ڏيڻ سراسر ملڪي تاريخ ۾ هڪ ڪارو انصاف چئي سگھجي ٿو  .

انهن معتبرن ۽ ذميوارن جي خاموشي پڻ ذو معني لڳي رهي آهي ۽ اتي موجود سيڪيورٽيء جي هوندي به کلي عام اهڙي واقعي کان پوء به سيڪيورٽي ادارن جي لاتعلقي جا سبب ڪير ٻڌائيندو؟.

مڪاني ادارن جي چونڊن جي پهرين مرحلي ۾ سنڌ اندر پاڪستان پاڪستان پيپلز پارٽي جي ڪاميابي هڪ اهڙو بحث آهي جنهن کي ڇيڙڻ فلحال وقت جي نزاڪت سان مذاق ڪرڻ جي مترادف آهي ، هاڻي جڏهن پ پ پ مڪاني چونڊن جو پهريون مرحلو کٽي آئي آهي ته بظاهر پ پ پ ۽ دنيا سموري انهيء کي پ پ پ جي ڪاميابي سمجھي رهي آهي ، جڏهن ته انهن علائقن جي اڪثر قيادت ” لوٽن “ تي مبني ضرور آهي ۽ اهو ووٽ سياسي طرح گھٽ باقي ذاتي ، قبائلي ، جاگيرداري ووٽ وڍيڪ رهيو آهي ۽ جنهن مان ثابت ٿئي ٿو ته سنڌ جي انهن علائقن جي ماڻهن کي ڪيئن ته ذاتي چنبن ۾ قابو رکي سياسي ميدان واري شعور کان ٻاهر رکيو ويٺا آهن.

هاڻي جڏهن 19 نومبر تي ٻيو مرحلو ٿي رهيو آهي ، جيڪو يقينن ڪنهن نه ڪنهن، ڪٿي نه ڪٿي درازا جهڙا واقعا انهيء ڪري به ممڪن آهن جو سانگهڙ ۾ مسلم ليگ فنڪشنل جو مظبوط ڳڙه هجڻ سان گڏ اتي 19 نومبر تي اليڪشن هجڻ ڪري امن امان بحال رکڻ ۽ اهڙي واقعي کان بچڻ مشڪل نظر اچي رهيو آهي.

جيئن ته هاڻي پيپلز پارٽي مڪاني چونڊن جي پهرين مرحلي جي کٽڻ تي گد گد آهي ، جڏهن ته ٻئي مرحلي جا نتيجا انهيء جي ابتڙ نڪرڻ جي توقع ڪئي پئي وڃي . ٻئي مرحلي جي چونڊن ۾ نوابشاه ضلعي کانسواء ٻين ضلعن ۾ پ پ پ جو ايئن کٽڻ مشڪل نظر اچي رهيو آهي جيئن هن پهرين مرحلي ۾ کٽيو آهي.

نوشهروفيروز ، سانگھڙ ، ميرپورخاص ، ٺٽو ۽ بدين ضلعا پ پ پ جي هٿان نڪري سگھن ٿا .۽ اهڙيء طرح مڪاني ادارن جي ٽئين مرحلي ۾ پ پ پ جو ڪو خاص رول ، ڪردار يا اليڪشن کٽڻ جو جواز ڏسڻ ۾ نٿو اچي ، ڇا پ پ پ جي ٽئين مرحلي ڪراچيء ۾ ايتري ڪارگردگي ڏسڻ ۾ ايندي جيتري هن پهرين مرحلي ۾ اتر سنڌ ۾ حاصل ڪئي آهي ؟

ڪالھ سنڌ جي 8 ضلعن جي پ پ پ جي غرور يافته ڪاميابي 2018 جي چونڊن ۾ ممڪن آهي ته بحال نه رهي سگهي ، ممڪن آهي ته پ پ پ جي موجوده قيادت 2018 جي اليڪشن ۾ اڏامي ڪنهن ٻئي آکيري ۾ وڃي ساه پٽي سگھڻ جي سياسي پيشنگوئي ڪري سگھجي ٿي .

هاڻي جڏهن پ پ پ مڪاني ادارن جي چونڊن جي پهرين مرحلي ۾ شاندار ڪاميابي پنهنجي نااهليت ۽ ڪرپشن جي ڪهاڻين کانپوء به حاصل ڪرڻ کان پوء سنڌ جا باشعور ، انقلابي ، مزاحمتي ، تبديلي پسندن جي مٿان بظاهر پاڻي هارجي ويو آهي ، مگر انهن کي اهو به ڏسڻ گهرجي ته سندن سياسي ۽ سماجي ڪردار به اهڙو ناهي رهيو جو هو پ پ پ جو متبادل سنڌ ۾ پيدا ڪري ناهن سگھيا .

اچانڪ اڏامندي اڏامندي انقلاب ته ناممڪن آهي ته پوء هن موجوده حالتن ۽ حالتن جي تبديليء تي نظر رکي مستقبل جي لاء ڊگهي دور انديشي سان ڪجھ ممڪن ڪري سگھجي ٿو . اهڙي مقابلي جي طاقت تڏهن پيدا ڪري سگھجي ٿي جڏهن توهان هڪ سياسي سگھ هجڻ سان گڏ قرباني ڏيندڙ قيادت اندر ۾ موجود هجي ، جنهن سان هڪ سياسي صحتمندانه ماحول پيدا پڻ ٿي سگھي ٿو ، باقي وقت جي وهڪرن ۾ چڙهڻ وري ڪري پوڻ جي پرئڪٽس تي مايوس ٿيڻ جو مقصد مستقل مزاجي جي کوٽ ئي چئي سگھجي ٿي. باقي هن دنيا ۾ لالچ سان گذارڻ جو مقصد ايئن آهي ته لالچ سان  نه ڪنهن جو پيٽ ڀرجندو نه ئي ڪنهن جي اکين جو ڍئو ٿي سگھندوآهي.

هاڻي جڏهن ڀاڳ ناڙي ، جيڪب آباد ، درازا خيرپور جهڙن واقعن جي سنڌ ۾ سيريز شروع ٿي چڪي آهي ته يقين سمجڻ گھرجي ته اهڙا حادٿا اڳتي به ٿيڻ وارا آهن ، ڇو ته هن رياست لاء دهشتگردي هڪ وڏو چئيليج آهي جنهن سان رياستي ادارا جنگ جوٽيندي نظر اچي رهيا آهن ، مگر پوء به اڃان بزدلانه دهشتگردي جاري آهي ۽ محسوس ايئن ٿي رهيو آهي ته ضرب عضب کانپوء پاڪستان ۾ دهشتگرديء جو محور سنڌ ، بلوچستان ۽ پنجاب جا ڪجھ حصا  جا پڻ اهڙن واقعن سان متاثر ٿي رهيا آهن .

ضرورت انهيء ڳالھ جي آهي ته کٽڻ ۽ هارائڻ اليڪشن جو هڪ حصو ۽ جمهوريت جو هڪ حسن هوندو آهي ، انهيء کي دلي طور تسليم ڪرڻ سان گڏ سنڌ ۾ پ پ پ ۽ پنجاب ۾ مسلم ليگ ن جي ڪاميابيء تي کين دلي طور مبارڪ باد پيش ڪجي  ۽ سموري سنڌ جي ماڻهن کي گذارش عرض ڪجي ٿي ته پاڻ ۾ سياسي سجاڳي سان گڏ سياسي مزاجن کي بحال ڪريو ۽ سياست کي هڪ عبادت جو فريضو سمجھڻ ۾ ئي اسان سڀني جي بهتري ۽ فلاح آهي .

 

مڪاني چونڊون: سنڌ ۽ پنجاب ۾ حڪمران جماعتن جي اڪثريت سوڀ

گذريل 31 سيپٽمبر 2015 تي سنڌ ۽ پنجاب ۾ ٿيل مڪاني چونڊن جا غير سرڪاري ۽ غير حتمي نتيجا ٻنهي صوبن جي حڪمران جماعت جي حق ۾ اچي ويا آهن، جنهن موجب سنڌ جي 8 ضلعن ۾ پيپلز پارٽي 800 کان وڌيڪ سيٽون کڻي مڪاني چونڊن جو ميدان ماري ورتو، جڏهن ته سندس مخالف جماعتن فنڪشنل ليگ هڪ سئو 15 سيٽن سان ٻئي نمبر تي اچي وئي، آزاد اميدوارن پڻ 105 سيٽون ماڻيون. غير حتمي ۽ غير سرڪاري نتيجا اچڻ جو سلسلو جاري آهي، ايم ڪيو ايم 15 ۽ تحريڪ انصاف چار جڏهن ته نون ليگ 3 سيٽون کنيون آهن. ڪاميابي ماڻيندڙ اميدوارن جا حامي خوشيءَ وچان رستن تي نڪري آيا، مختلف شهرن ۾ ريليون ڪڍي دهلن ۽ شرنائين تي رقص ڪيو ويو.  پنجاب ۾ به ٿيل مڪاني چونڊن جَي پهرئين مرحلي ۾ حڪمران ليگ ساڍا 8 سئو کان وڌيڪ سيٽون ماڻي واضح برتري حاصل ڪري ورتي، جڏهن ته ٻئي نمبر تي آزاد اميدوارن 640 ۽ ٽئين نمبر تي پي ٽي آءِ 171 سيٽون حاصل ڪيون آهن. مڪاني چونڊن جَي پهرئين مرحلي ۾ پنجاب جَي 12 ضلعن اندر ٿيل پولنگ جا غيرحتمي ۽ غيرسرڪاري نتيجن موجب 2 هزار 6 سئو 87 يونين ڪائونسلن مان هڪ هزار 5 سئو 51 يو سيز جا غير حتمي ۽ غير سرڪاري نتيجا پڌرا ٿي چڪا آهن، جن مان 741 سيٽون ماڻيندڙ نون ليگ اڳڀري آهي. غير حتمي ۽ غير سرڪاري نتيجن موجب، تحريڪ انصاف يونين ڪائونسلن جون 168 سيٽون حاصل ڪيون آهن، جڏهن ته 46 پ پ ۽ 3 قاف ليگ ۽ 546 سيٽون آزاد اميدوارن پنهنجي ناءُ ڪيون. لاهور ۾ چيئرمين جِي 274 سيٽن مان 242 جا غيرحتمي ۽ غير سرڪاري نتيجا پڌرا ٿي چڪا آهن، جن ۾ پڻ ن ليگ کي 206 سيٽن سان برتري حاصل آهي. لاهور ۾ تحريڪ انصاف جي 11 ۽ پي پي جي هڪ اميدوار چيئرمين چونڊيو ويو آهي، جڏهن ته 24 آزاد اميدوار پڻ ڪامياب ٿيا آهن. فيصل آباد ۾ سڀ کان وڌيڪ آزاد اميدوارن 103 سيٽون ماڻيون آهن، جڏهن ته ن ليگ 71 ۽ پي ٽي آءِ 20 سيٽون حاصل ڪيون. پاڻي ۽ بجلي واري مملڪتي وزير عابد شير جو ڀاءُ ۽ ميئر جو اميدوار عامر شير علي راڻا ثناءُ الله جي حمايت يافته اميدوار عاشق رحماني کان هارائي ويو. اوڪاڙا مان حڪمران ليگ 60 ۽ آزاد اميدوارن 46، جڏهن پي پي پي ۽ پي ٽي آءِ 9-9 سيٽون حاصل ڪيون. بهاولنگر مان آزاد اميدوار 105 سيٽون کڻي ويا، جڏهن ته ن ليگ 34، مسلم ليگ ضياءِ 19 ۽ تحريڪ انصاف 9 سيٽون ماڻيون. پاڪپتن ۾ ن ليگ 44، پي ٽي آءِ 11 ۽ عوامي تحريڪ هڪ، جڏهن ته آزاد اميدوار 38 سيٽون کٽڻ ۾ ڪامياب ٿي ويا. غير حتمي ۽ غير سرڪاري نتيجن موجب، چڪوال مان 10 سيٽون آزاد اميدوارن ۽ 9 سيٽون حڪمران ليگ حاصل ڪيون. قصور مان ن ليگ 52 سيٽون ماڻي ميدان ماري ورتو، جڏهن ته آزاد اميدوارن 23، پي ٽي آءِ 13 ۽ ق ليف 2 سيٽون ماڻيون. گجرات مان ن ليگ 50، پي ٽي آءِ، 16، قاف ليگ 13 ۽ آزاد اميدوارن 35 سيٽون حاصل ڪيون، جڏهن ته ننڪانه صاحب مان ن ليگ 53، آزاد اميدوار 49، پي ٽي آءِ 15۽ پي پي 2 سيٽون ماڻڻ ۾ ڪامياب ٿي. وهاڙي ۾ آزاد اميدوار 46 سيٽون حاصل ڪري سرفهرست آهن ۽ 32 سيٽون ماڻيندڙ ن ليگ ٻئي نمبر تي آهي، جڏهن ته پي ٽي آءِ ۽ پي پي رڳو 2-2 سيٽون حاصل ڪري سگهيون.

اليڪشن کان وڏيون وڏيون دعوائون ڪندڙ مختلف پارٽيون حڪمران جماعتن کان وڏي ليڊ سان هارائي چڪيون آهن، هاڻي ڏسجي ته ٻئي مرحلي ۾ ڪنهن جي سوڀ واضح ٿئي، ٻنهي صوبن جي سرڪار سڳوري کي عرض آهي ته هن ڀيري اهڙا اپاءَ ورتا وڃن جئين پهرين مرحلي ۾ ٿيل قتل و غارت کي نه ورجايو وڃي، ۽ عوام آزادي سان پنهنجي نمائندن جي چونڊ ڪري سگهي.