تازيون خبرون

Daily Archives: October 29, 2015

امدادي ۽ بحالي وارن ڪمن جي نگراني پاڻ ڪندس، قدرتي آفت تي سياست نه ٿيڻ گهرجي: نواز شريف

پشاور (بيورو) وفاقي سرڪار، ڪي پي ڪي ۽ فاٽا ۾ زلزلي سبب حياتيون وڃائيندڙن جَي پونئيرن لاءِ 6-6 لک، معذور ٿيلن لاءِ 2-2 لک ۽ زخمين لاءِ هڪ– هڪ لک رپين جو اعلان ڪري ڇڏيو، وزيراعظم جو چوڻ آهي ته امدادي ۽ بحالي وارن ڪمن جِي نگراني هو پاڻ ڪندو، قدرتي آفت تي سياست نه ٿيڻ گهرجي. پشاور ۾ ميڊيا سان ڳالهائيندي وزيراعظم ميان نواز شريف چيو ته زلزلي سبب قيمتون جانيون ضايع ٿيون ۽ ڪيترائي ماڻهو زخمي ٿيا، جنهن تي کيس تمام گهڻو افسوس آهي. هـُن چيو ته خيبر پختونخواهه ۾ سڀ کان وڌيڪ 208 ۽ فاٽا ۾ 29 ماڻهو زلزلي جو شڪار ٿي ويا، جن جي پونئيرن کي 6-6 لک رپيا ڏنا ويندا. وزيراعظم چيو ته ڪي پي ڪي ۽ فاٽا ۾ زلزلي سبب معزور ٿيلن کي 2-2 لک ۽ زخمي ٿيل 16 سئو کان وڌيڪ ماڻهن کي هڪ-هڪ لک رپيا معاوضو ڏنو ويندو. ميان نواز شريف چيو ته زلزلي سبب فاٽا ۽ ڪي پي ڪي ۾ هزارين گهر پڻ ڊهي پٽ پئجي ويا آهن، جن جي متاثرن کي پڻ 2-2 لک رپيا ڏنا ويندا. هـُن چيو ته صوبائي سرڪار جي سهڪار سان ايندڙ هفتي سومر کان خميس تائين متاثرن ۾ امدادي رقم ورهائي ويندي. وزيراعظم چيو ته زلزلي سٽيلن جي ڏک ۾ صوبائي سرڪار جيان وفاقي حڪومت به برابر جي شريڪ آهي ۽ متاثرن کي هن ڏکي گهڙي ۾ اڪيلو نه ڇڏيو ويندو. نواز شريف چيو ته امدادي ۽ بحالي وارن ڪمن جي نگراني هو پاڻ ڪندو ۽ سندس خواهش آهي ته قدرتي آفت تي ڪا به سياست نه ٿئي. خيبر پختونخواهه جي وڏي وزير بابت ڳالهائيندي نواز شريف چيو ته پرويز خٽڪ امدادي ڪمن ۾ ڀرپور نموني حصو وٺي رهيو آهي، جنهن تي هو سندس ٿورائتو آهي. ان کان اڳ گورنر هائوس پشاور ۾ وزيراعظم جي صدارت هيٺ اهم اجلاس ٿيو، جنهن دوران ميان نواز شريف کي ڪي پي ڪي اندر زلزلي سبب ٿيل نقصان بابت تفصيلي بريفنگ ڏني وئي. وزيراعظم کي ٻڌايو ويو آهي ته زلزلي سبب ڪي پي ڪي ۾ 222 ماڻهو فوت ۽ 1688 زخمي ٿيا آهن. ميان نواز شريف کي ٻڌايو ويو ته زلزلي سبب ڪي پي ڪي ۾ 8458 گهرن کي نقصان پهتو. وزيراعظم کي اهو به ٻڌايو ويو ته زلزلي سٽيل علائقن ۾ امدادي ڪارروايون جاري آهن، جڏهن ته 2 هزار خيما ۽ 2 هزار ڪمبل متاثرن تائين پهچايا ويا آهن.

 

سنڌ ۾ استاد تنظيمن تي پابندي جي منظوري، عارضي طور پوليو مهم ملتوي ڪرڻ جو فيصلو

ڪراچي (اسٽاف رپورٽر)سنڌ جي وڏي وزير سيد قائم علي شاهه جي صدارت هيٺ ٿيندڙ اجلاس ۾ استاد تنظيمن تي پابندي جي منظوري ڏني وئي.تفصيل مطابق سنڌ جي وڏي وزير سيد قائم علي شاهه جي صدارت هيٺ اجلاس ٿيو، جنهن ۾ وڏي وزير سوڌو ٻين اعليٰ اختيارين به شرڪت ڪئي. اجلاس دوران استاد تنظيمن تي پابندي جي منظوري ڏني وئي. ان کانسواءِ تعليمي کاتي کي لازمي خدمت جو درجو ڏيڻ جو فيصلو به ڪيو ويو. ان موقعي تي سنڌ جي وڏي وزير سيد قائم علي شاهه جو چوڻ هو ته تعليمي کاتي مان گوسڙو ملازمن جو خاتمو ڪيو ويندو، ته جئين بهتر تعليم کي هٿي ڏئي سگهجي. ٻئي طرف سنڌ حڪومت حفاظتي انتظام نه ٿيڻ ڪري پوليو مهم عارضي طور بند ڪرڻ جو فيصلو ڪري ڇڏيو، آءِ جي سنڌ غلام حيدر جمالي چيو آهي ته مڪاني چونڊن سبب پوليس اهلڪارن جي کوٽ ٿيڻ ڪري پوليو مهم لاءِ حفاظتي انتظام نٿا ڪري سگھجن..وزيراعليٰ هائوس ڪراچي ۾ وڏي وزير سيد قائم علي شاهه جي صدارت هيٺ پوليو جي روڪٿام واري پروگرام جو جائزو ورتو ويو..اجلاس ۾ پوليو جي روڪٿام واري پروگرام جي چيئرپرسن عذرا فضل پيچوهو، سنڌ جي چيف سيڪريٽري صديق ميمڻ ۽ ٻين عملدارن شرڪت ڪئي..اجلاس کي آءِ جي سنڌ غلام حيدر جمالي بريفنگ ڏيندي ٻڌايو ته مڪاني چونڊن سبب پوليس اهلڪارن جي کوٽ پيدا ٿي آهي، جنهنڪري پوليو مهم لاءِ حفاظتي انتظام نٿا ڪري سگھجن..جنهن تي ملڻ سبب عذرا فضل پيچوهو چيو ته جيستائين پوليو ٽيمن جي حفاظت لاءِ انتظام نٿا ڪري سگھجن، تيستائين مهم نٿي هلائي سگھجي..اجلاس دوران پوليو مهم عارضي طور بند ڪرڻ جو فيصلو ڪيو ويو، جڏهن ته وڏي وزير سيد قائم علي شاهه هدايت ڪئي ته مڪاني ادارن جي چونڊن سان گڏوگڏ پوليو مهم لاءِ 3 هزار اهلڪارن جو بندو بست ڪيو وڃي، جنهن لاءِ وي وي آءِ پيز کي سيڪيورٽي لاءِ ڏنل اهلڪار واپس گهرايا وڃن.

 

زلزلي جون تباهيون جاري، ڇت ڪرڻ سبب 3 فوت، انگ 363 ٿي ويو

پشاور (مانيٽرنگ ڊيسڪ) ملڪ جَي مختلف شهرن ۾ خوفناڪ زلزلي جي نتيجي ۾ فوت ٿيلن جو انگ وڌي 363 ٿي ويو آهي، پشاور ۾ زلزلي سبب متاثر ٿيل گهر جي ڇت ڪرڻ سبب ٻن ٻارڙين سميت 3 ڄڻا فوت ٿي ويا، جڏهن ته متاثر علائقن ۾ پاڪ فوج جون امدادي ڪارروايون جاري آهن، سيءَ سبب زلزلي متاثرن جا اهنج وڌي ويا آهن. ملڪ جي مختلف شهرن ۾ 8 ڏهائي هڪ جي شدت سان آيل زلزلي جون تباهڪاريون جاري آهن، زلزلي سبب فوتين جو انگ وڌي 2 سئو 72 ٿي ويو آهي ۽ سوين زخمي آهن، جڏهن ته هزارين متاثر اڃا به امدادي ڪاررواين جا منتظر آهن. زلزلي سبب سڀ کان وڌيڪ متاثر خيبرپختونخواهه جو ضلعو شانگلا ٿيو آهي، جتي 49 کان وڌيڪ حياتيون ضايع ٿيون آهن ۽ هزارين گهر مٽيءَ جو ڍير بڻجي ويا آهن.  زلزلي سبب شانگلا ۾ هزارين متاثرن ۾ اڃا تائين ڪمبل، تنبو ۽ ٻيو امدادي سامان ناهي پهچي سگهيو، سيءَ ۽گهربل شين جي کوٽ سبب متاثرن جا اهنج ٻيڻا ٿي ويا آهن. نيشنل ڊزاسٽر مئنيجمينٽ اٿارٽي زلزلي سبب ٿيل جاني ۽ مالي نقصان بابت تازه انگ اکر جاري ڪندي زلزلي سبب 2 سئو 55 ماڻهو فوت ٿيڻ جي تصديق ڪئي آهي. اين ڊي ايم اي جو چوڻ آهي ته زلزلي سبب 15 سئو 67 ماڻهو زخمي ٿيا آهن، جڏهن ته مجموعي طور تي 9 هزار 209 گهرن کي نقصان پهتو آهي. اين ڊي ايم اين اي موجب، خيبرپختونخواهه ۾ زلزلي سبب فوتين جو انگ وڌي 208 ٿي ويو آهي، جڏهن ته 15 سئو کان وڌيڪ زخمي آهن، جن کي مختلف اسپتالن ۾ طبي امداد ڏني پئي وڃي.انگن اکرن موجب، خيبرپختونخواهه ۾ زلزلي سبب 8 هزار 4 سئو 53 گهرن کي نقصان پهتو آهي. اين ڊي ايم اي موجب، فاٽا ۾ 30 ڄڻا فوت ٿيڻ جي تصديق ٿي آهي، گلگت بلتستان ۾10، آزاد ڪشمير ۾ 2 ۽ پنجاب ۾ 5 ڄڻا حياتيون وڃائي ويٺا آهن، جڏهن ته اپر دير ۾ 20، باجوڙ ايجنسي ۾ 22 ۽ لوئر دير ۾ 23 ڄڻا فوت ٿيا آهن. پاڪ فوج اسلام آباد سميت ملڪ جي مختلف علائقن ۾ امدادي ڪئمپس قائم ڪري ورتيون، جتي متاثرن جي کاڌ خوراڪ سميت ٻيو گهربل سامان گڏ ڪيو پيو وڃي. آءِ ايس پي آر موجب، پاڪ فوج زلزلي متاثر علائقن ۾ امدادي سرگرميون تيز ڪري ڇڏيون آهن، ڏکئي وقت ۾ متاثرن کي اڪيلو نه ڇڏيو ويندو.

 

حڪومت ملڪ ۾ بجلي جي قلت تي ڪنٽرول ڪرڻ لاءِ ايل اين جي سميت توانائي جا سستا ذريعا ڳولي رهي آهي: خواجه آصف

اسلام آباد (اين اين آءِ) پاڻي ۽ بجلي جي وفاقي وزير خواجه آصف چيو آهي ته حڪومت ملڪ ۾ بجلي جي قلت تي ڪنٽرول ڪرڻ لاءِ ايل اين جي سميت توانائي جا سستا ذريعا ڳولي رهي آهي هو اربع ڏينهن اسلام آباد ۾ توانائي جي بچت بابت هڪ سيمينار کي خطاب ڪري رهيو هو هن چيو ته 2005 جي زلزلي سبب نيلم جهلم پن بجلي رٿا جي لاڳت ۾ اضافو ٿيو آهي هن واضح ڪيو ته ننديپور بجلي جي منصوبي جو پي سي ون 59 ارب رپين جي لاڳت سان مڪمل ڪيو ويو وفاقي وزير ميڊيا تي غور ڪيو ته هو بجلي جي منصوبن بابت غلط حقيقتن ۽ انگ اکر شمار ڪرڻ کان پاسو ڪن ان موقعي تي خيالن جو اظهار ڪندي شاهد خاقان عباسي چيو ته پاڪستان توانائي جي مثبت بل جي ضرورتن کي پورو ڪرڻ لاءِ ايل اين جي گهرائي رهيو آهي هن چيو ته هي مسلم ليگ (ن) جي ئي حڪومت آهي جنهن پهريون ڀيرو ملڪ ۾ ايل اين جي ٻاهران گهرائي.

 

آمريڪا ۽ پاڪستان افغان مصلحتي عمل جي مڪمل حمايت ڪن ٿا: سرتاج عزيز

اسلام آباد (اين اين آءِ) وزيراعظم جي پرڏيهي صلاحڪار سرتاج عزيز چيو آهي ته آمريڪا ۽ پاڪستان ٻئي افغان مصلحتي عمل جي مڪمل حمايت ڪن ٿا هڪ انٽرويو ۾ هن چيو ته هي افغان حڪومت تي دارومدار آهي ته هو هن عمل کي جاري رکڻ گهري ٿي يا نه هن چيو ته بين الاقوامي برادري کي افغانستان جي صورتحال تي ڳڻتي اهي ۽ ڪائي به عالمي طاقت افغانستان ۾ جنگ کي پسند نٿي ڪري هن چيو ته پاڪستان ۽ آمريڪا افغان حڪومت ۽ طالبان وچ ۾ ٻيهر ڳالهيون شروع ڪرڻ جو حامي آهي سرتاج عزيز چيو ته طالبان سان رابطي جي حوالي سان افغان حڪومت اڃا تائين پاڪستان سان ڪوئي رابطو ناهي ڪيو هڪ سوال تي هن چيو ته جيتوڻيڪ طالبان پاڪستان جو ڪجهه اثر رسوخ آهي جڏهن ته ان مٿان اسان جو ڪوئي ڪنٽرول نه آهي طالبان سان ڳالهيون ٻيهر شروع ڪرڻ جو فيصلو افغان حڪومت کي ڪرڻو آهي ۽ اسان سلسلي ۾ فقط سهولتڪار جو ڪردار ادا ڪري سگهون ٿا. سرتاج عزيز چيو ته پاڪستان جو موقف چٽو آهي ته هو پنهنجي سرزمين کي ڪنهن ٻئي ملڪ جي خلاف استعمال ڪرڻ نه ڏيندو.

 

پنجاب ۽ سنڌ جي مڪاني چونڊن ۾ پولنگ جو وقت هڪ ڪلاڪ وڌائڻ جو اعلان

اسلام آباد (اين اين آءِ) اليڪشن ڪميشن آف پاڪستان پنجاب ۽ سنڌ جي مڪاني چونڊن ۾ پولنگ جو وقت هڪ ڪلاڪ وڌائڻ جو اعلان ڪري ڇڏيو اليڪشن ڪميشن پاران جاري پڌرنامي مطابق سنڌ ۽ پنجاب جي مڪاني چونڊن لاءِ پولنگ جو وقت هڪ ڪلاڪ وڌايو ويو آهي جنهن کان پوءِ هاڻي ووٽنگ جو عمل 9 بدران 10 ڪلاڪ بنا وقفي جاري رهندو اليڪشن ڪميشن مطابق پولنگ جو عمل صبح ساڍي ست وڳي شروع ٿيندو ۽ شام ساڍي پنج وڳي تائين جاري رهندو اليڪشن ڪميشن پولنگ جي عملي کي مقرر وقت کان ٻه ڪلاڪ اڳ پولنگ اسٽيسن پهچڻ جون هدايتون جاري ڪيون آهن جڏهن ته اهو به واضح ڪيوآهي ته پولنگ دوران ميڊيا نمائندن مبصرن کي اجازت نامي کان سواءِ چونڊ عمل ڏسڻ جي اجازت نه هوندي. واضح رهي ته سنڌ ۽ پنجاب جي مڪاني چونڊن جي پهرين مرحلي جي پولنگ 31 آڪٽوبر تي ٿيندي.

 

پهرين نومبر کان پيٽروليم جي شين جي اگهن ۾ في ليٽر 6 رپين تائين اضافي جو امڪان

اسلام آباد (بيورو) حڪومت عوام تي مهانگائي جو بم ڪيرائڻ جي تياري ڪري ورتي، پهرين نومبر کان پيٽروليم جي شين جي اگهن ۾ في ليٽر 6 رپين تائين اضافو ڪرڻ جو امڪان ظاهر ڪيو پيو وڃي..ذريعن موجب اوگر پهرين نومبر کان پيٽروليم جي شين جي اگهن ۾ واڌ ڪرڻ جي سمري تيار ڪري ورتي آهي، جيڪا سڀاڻي منظوري لاءِ پيٽروليم واري وزارت ڏانهن اماڻي ويندي.پهرين نومبر کان پيٽرول 5 رپيا 35 پئسا، ڊيزل 2 رپيا 43 پئسا، گاسليٽ 3 رپيا 17 پئسا، لائيٽ ڊيزل 3 رپيا 63 پئسا ۽ هاءِ آڪٽين 6 رپيا 10 پئسا في ليٽر اضافو ڪرڻ جو امڪان آهي.پيٽروليم واري وزارت جي منظوري کانپوءِ اوگرا پاران تيل جي شين جي نئين اگهن جو نوٽفيڪيشن جاري ڪيو ويندو.

 

جماعت اسلامي زلزلي سٽيلن جي بحالي لاءِ 20 ڪروڙ رپيا فراهم ڪري ڇڏيا ، صوبائي ۽ مرڪزي حڪومت جنگي بنيادن تي بحالي پلان جوڙين: سراج الحق

پشاور (اين اين آءِ) جماعت اسلامي پاڪستان جو امير سراج الحق مرڪزي ۽ صوبائي حڪومتن کان جنگي بنياد تي زلزلي سٽيل ماڻهن کي بحال ڪرڻ لاءِ گڏيل رٿا شروع ڪرڻ جو مطالبو ڪيو آهي ۽ چيو ته جماعت اسلامي فوري طور امدادي ۽ بحالي جي ڪمن لاءِ 20 ڪروڙ رپيا فراهم ڪري ڇڏيا آهن سڄي ملڪ جي زلزلي سٽيل علائقن ۾ جماعت اسلامي جا ڪارڪن ۽ الخدمت جا خدائي خدمتگار 4520 جي انگ ۾ متاثر علائقن ۾ امدادي ۽ بحالي جي ڪمن ۾ مصروف آهن هو صوبائي امير مشتاق احمد خان سان گڏ متاثر علائقن دير پائن دبالا باجوڙ بونير ۽ سوات جي ٻن ڏينهن واري دوري تي روانو ٿيڻ کان اڳ المرڪز پشاور ۾ ڪانفرنس کي خطاب ڪري رهيو هو هن چيو ته ڪراچي لاهور راولپنڊي ۽ ٻين شهرن ۾ صاحب حيثيت دل کولي اسان سان مصيبت ماريل ڀائرن جي مدد لاءِ تعاون ڪيو آهي هن وقت تائين اسان 47 لک رپين جا خيما، 38 لک 50 رپين جا ترپال 16 لک رپين جو غذائي پئڪيج ۽ 10 لک رپين جا هنڌ ۽ ٻه لک رپين جا ڪمبل فراهم ڪري چڪا آهيون هن چيو ته هي قومي اهميت جو فوري مسئلو آهي ان لاءِ فنڊ گڏ ڪرڻ جو ڪم جاري آهي ۽ سڄي قوم کي اپيل آهي ته 2005 جي ڪشمير ۽ بالاڪوٽ جي زلزلي ۾ جنهن جذبي جو اظهار ڪيو ويو هو ان کان وڌيڪ عزم ۽ همت جي ضرورت آهي سراج الهق چيو ته خيبرپختونخواهه جي متاثر علائقن کي جماعت اسلامي ٽن زونز ۾ ورهايو آهي ديربالا ۽ چترال ۾ سينيئر صوبائي وزير عنايت الله خان جي نگراني ۾ آپريشن جاري آهي جنهن ۾ اتان جا ايم پي ايز ضلعي ناظم ۽ چونڊيل بلدياتي نمائندن سميت ضلعن جي اميرن جي قيادت ۾ جماعت الامي جون سموريون تنظيمون شامل آهن ضلعي دير پائن ۽ چترال ۾ آپريشن جي نگراني صوبائي ناڻي وزير مظفر سيد ڪري رهيو آهي ايم پي ايز، ضلعي ناظم ۽ ضلعن جا امير انهن سان گڏ آهن بونير سوات ۽ شانگلا ۾ امدادي آپريشن جي نگراني صوبائي وزير زڪوات حبيب الرحمان ڪري رهيو آهي.

 

سپريم ڪورٽ ڊاڪٽر عاصم حسين کي اسپتال ۾ داخل ڪرائڻ جي درخواست اڪلائي ڇڏي

اسلام آباد (اين اين آءِ) سپريم ڪورٽ ڊاڪٽر عاصم حسين کي اسپتال ۾ داخل ڪرڻ جي درخواست اڪلائي ڇڏي آهي سپريم ڪورٽ سنڌ رجسٽري ۾ ڊاڪٽر عاصم هسين جي زال پاران داخل درخواست جي ٻڌڻي ڪئي ويئي جنهن ۾ ڊاڪٽر عاصم جي زال عدالت کي درخواست ڪئي هئي ته ڊاڪٽر عاصم حسين جي طبيعت ٺيڪ نه آهي تنهنڪري کيس دل جي بيمارين جي اسپتال ۾ داخل ڪيو وڃي ميڊيڪل بورڊ عدالت ۾ رپورٽ پيش ڪئي جنهن ۾ ٻڌايو ويو ته ڊاڪٽر عاصم حسين جي طبيعت بلڪل ٺيڪآهي ۽ کيس اسپتال داخل ڪرڻ جي ضرورت نه آهي عدالت ميڊيڪل رپورٽ پڙهندي ڊاڪٽر عاصم حسين کي اسپتال داخل ڪرڻ جي درخواست اڪلائي ڇڏي آهي جنهن کان پوءِ عدالت ڊاڪٽر عاصم کي ٻيهر رينجرز جي تحويل ۾ ڏيئي ڇڏيو.

 

سپر ماڊل ايان علي خلاف ڪرنسي اسمگلنگ جي ٻڌڻي 3 نومبر تائين ملتوي

اسلام آباد (اين اين آءِ) سپر ماڊل ايان علي جي خلاف ڪرنسي اسمگلنگ جي ٻڌڻي 3 نومبر تائين ملتوي ڪئي وئي آهي جڏهن ته ماڊل ايان علي چيو آهي ته اڄوڪي دليلن کانپوءِ سچ شيشي وانگر واضح ٿي ويو عدليا جو احترام ڪيان ٿي ۽ ڪندي رهنديس، تفصيل مطابق ڪسٽم عدالت جي جج آفتاب ڊالر اسمگلنگ ڪيس ۾ ايان علي جي بريت واري درخواست جي ٻڌڻي ڪئي، جنهن دوران ايان علي جي وڪيل سردار لطيف کوسا دليل ڏنا. دليل مطابق ڪسٽم عدالت جي جج راڻا آفتاب ڪيس جي ٻڌڻي 3 نومبر تائين ملتوي ڪري ڇڏي ۽ ايندڙ ٻڌڻي تي به ايان علي جو وڪيل لطيف کوسا دليل جاري رکندو.