تازيون خبرون

Daily Archives: October 27, 2015

10 سالن بعد ٻيهر خوفناڪ زلزلي ملڪ جي ڪيترن ئي علائقن کي لوڏي ڇڏيو، 216 ڄڻا فوت، 1100 کان وڌيڪ زخمي، ايمرجنسي لاڳو

ڪراچي (مانيٽرنگ ڊيسڪ)10 ورهين کانپوءِ هڪ ڀيرو ٻيهر آڪٽوبر مهيني ۾ آيل زلزلي سڄي ملڪ کي لوڏي ڇڏيو آهي، خيبرپختونخواهه،مٿانهن علائقن ۽ پنجاب ۾ زلزلي دوران عمارتون ڊهڻ سبب 216 کان وڌيڪ ماڻهو حياتيون وڃائي ويٺا ۽ 11 سئو کان وڌيڪ زخمي آهن، اسپتالن ۾ ايمرجنسي لاڳو ڪري موڪلون رد ڪيون ويون، متاثر علائقن ۾ آفٽر شاڪس جو سلسلو جاري آهي،ريڪٽر اسڪيل تي زلزلي جي شدت 8 ڏهائي هڪ رڪارڊ ڪئي وئي.. 10 سالن کانپوءِ آڪٽوبر مهيني ۾ آيل زوردار زلزل جا لوڏا سنڌ،پنجاب، ڪي پي ڪي، بلوچستان، قبائلي علائقن، آزاد ڪشمير ۽ گلگت بلتستان سميت پاڪستان جي پاڙيسري ملڪن بهمحسوس ڪيا ويا زلزلي سبب مختلف شهرن ۾ ماڻهو ڊپ وچان ڪلمو پڙهندا گهرن ۽ آفيسن مان ٻاهر نڪري کليل آسمان هيٺ پهتا زلزلي سبب سڀ کان وڌيڪ جاني توڙي مالي نقصان ڪي پي ڪي ۾ ٿيو آهي،جڏهن ته دير ۽ چترال وارا علائقا وڌيڪ متاثر ٿيا آهن زلزلي جي نتيجي ۾ سوات ۾ گهر ڪرڻ توڙي ٻين واقعن ۾ 13، چارسدا ۾ 4، مالاڪنڊ ۽ ديامر ۾ 2. 2 ۽ باجوڙ ايجنسي ۾ 22 کان وڌيڪ ماڻهو حياتيون وڃائي ويٺا آهن صوابي ۾ گهر ڪرڻ سبب 3 ڄڻا دٻجي فوت ٿي ويا، لوئر دير ويجهو ثمر باغ ۾ گهر جي ڀت ڪِرڻ سبب 3 ٻارن سميت 11 فوت ٿي ويا،جڏهن ته مردان ۾ به ڀت ڪرڻ سبب ٻارڙي فوت ٿي وئي لوئر دير ۾ به 34 ماڻهو فوت ٿي ويا،جڏهن ته سوات ۾ 13، باجوڙ ايجنسي ۾ 7 ۽ بونير ۾ به 5 کان وڌيڪ ماڻهو حياتيون وڃائي ويٺا، چارسدهه ۾ 4، مالاڪنڊ ۽ ديامر ۾ 2،2 ماڻهو فوت ٿيا مردان ۾ گهر جي ڀت ڪرڻ سبب ٻارڙي فوت ٿي وئي ڪي پي ڪي جي گاديءَ واري شهر پشاور جي مختلف علائقن ۾ گهر ڪِرڻ جي نتيجي ۾ 150 کان وڌيڪ ماڻهو زخمي ٿي پيا،جن کي ليڊي ريڊنگ اسپتال منتقل ڪيو ويو ڪالام ۾ پرائمري اسڪول جي عمارت ڊهي پٽ پئجي وئي،نوشهره ۾ پڻ زلزلي سبب ڪيتريون ئي عمارتون ڪِري پيون، جنهنڪري ڪيترائي ماڻهو زخمي ٿي پيا جڏهن ته ايبٽ آباد جي جوگن واري علائقي ۾ گهر جي ڇِت ڪِرڻ سبب 2 نينگريون سخت زخمي ٿي پيون گلگت بلتسان جي چترال واري علائقي ۾ زلزلي سبب فوتين جو انگ 16 ۽ شانگلا ۾ حياتيون وڃائيندڙن جو انگ 18 کان وڌيڪ ٻڌايو ويو آهي پنجاب جي شهر راولپنڊي ۾ زلزلي سبب عورت ۽ ٻارڙو فوت ٿي ويا، ڪشميري بازار ۾ دڪان جي ڇِت ڪرڻ سبب 17 ڄڻا زخمي ٿي پيا، جڏهن ته ايبٽ آباد جي مختلف علائقن ۾ ڇتيون ۽ ڀتيون ڪرڻ سبب 56 ڄڻا زخمي ٿي پيا پنجاب جي قصور واري علائقي ۾ به ڇت ڪرڻ سبب هڪ ڄڻو فوت ٿي ويو لاهور، راولپنڊي، ميانوالي، اوڪاڙا، گجرات،فيصل آباد، ملتان، رحيم يار خان، ڪوٽ ادو، خانيوال ۽ ٻين شهرن ۾ به زلزلو عمارتن کي لوڏي ويو، جنهن بعد ماڻهن ڊپ وچان گهرن ۽ آفيسن مان نڪري کليل آسمان هيٺ پناهه ورتي وفاقي گاديءَ واري شهر اسلام آباد ۾ به زلزلي سبب عمارتن ۾ ڏار پئجي ويا،جڏهن ته مختلف واقعن ۾ زخمي ٿيل ڪيترن ئي ماڻهن کي پولي ڪلينڪ اسپتال آندو ويو ڪي پي ڪي جي حڪومت صوبي جي سمورين اسپتالن ۾ ايمرجنسي لاڳو ڪري عملي جون موڪلون رد ڪري ڇڏيون آهن، جڏهن ته سمورن متاثر علائقن ۾ ريسڪيو آپريشن به جاري آهي، مٿانهن علائقن ۾ مٽي جو ڇپون ڪرڻ ۽ برفباري سبب ڏورانهن علائقن جو هڪٻئي سان زميني رابطو ڪٽيل آهي سنڌ جي لاڙڪاڻي، گهوٽڪي، ڏهرڪي، ٺل، شهدادڪوٽ، پريالو ۽ اوٻاوڙي سميت ٻين شهرن ۾ به زلزلي جا لوڏا محسوس ڪيا ويا،جڏهن ته بلوچستان جي ڊيرا مراد جمالي،نصير آباد، جعفرآباد ۽ بولان سميت ٻين علائقن ۾ زلزلي سبب ماڻهو گهرن مان ٻاهر نڪري آيا زوردار زلزلي بعد متاثر علائقن ۾ موبائل فون سروس به ڪجهه وقت لاءِ معطل ٿي وئي، جڏهن ته گليشيئرز پڻ ٽٽي پيا. زلزلي جا لوڏا افغانستان، ڀارت، دبئي ۽ فجيءَ جي ٻيٽ تي به محسوس ڪيا ويا موسميات کاتي جي ريڪٽر اسڪيل موجب زلزلي جو مرڪز هندوڪش جو جابلو سلسلو هو،جنهن جي ريڪٽر اسڪيل تي شدت 8 ڏهائي هڪ رڪارڊ ڪئي وئي آهي موسميات کات موجب زلزلي جي زمين هيٺان اونهائي هڪ سئو 93 ڪلوميٽر هئي ياد رهي ته پاڪستان ۾ 10 ورهيه اڳ 8 آڪٽوبر تي به تباهي آڻيندڙ زلزلي سبب هڪ لک کان وڌيڪ ماڻهو فوت ٿي ويا هئا.

 

ڀارت جو جنگي جنون عالمي امن جي لاءِ خطرو آهي: پرويز رشيد

لاهور (بيورو) سڌ سماءَ واري وفاقي وزير پرويز رشيد چيو آهي ته ڀارت جو جنگي جنون عالمي امن جي لاءِ خطرو آهي،پاڪستان ۾ مهمانن کي وڏي عزت ڏني ويندي آهي، جنهن جو مثال گيتا آهي. لاهور ۾ ميڊيا سان ڳالهائيندي وفاقي وزير پرويز رشيد چيو ته ڀارت جي رياست ۽ سوسائٽي انتهاپسندي سان ڀريل آهي، ڀارت ۾ هندو انتهاپسندي کي هٿي وٺرائڻ جو مقصد اصل مسئلن تان ڌيان هٽائڻ آهي. هن چيو ته پاڪستان جي امن واري خواهش کي ڪمزوري نه سمجهيو وڃي، اسان عزت ۽ وقار سان جيئڻ چاهيون ٿا. هڪ سوال جي جواب ۾ پرويز رشيد چيو ته ڀارتي جنگي جنون ۾ ڏينهون ڏينهن واڌ ٿي رهي آهي، جيڪو خطي جي امن لاءِ خطرو آهي. پرويز رشيد جو چوڻ آهي ته پاڪستان مهمان نواز ملڪ آهي، هتي ڀارت سميت سمورن ملڪن جي مهمانن کي وڏي عزت ڏني ويندي آهي، جنهن جو مثال گيتا آهي پر ڀارت ۾ پاڪستاني مهمانن سان جيڪو سلوڪ ڪيو ويو، اهو سڄي دنيا ڏٺو آهي.

 

وزيراعظم ۽ آرمي چيف پاران زلزلي متاثر علائقن ۾ امدادي سرگرميون شروع ڪرڻ جي هدايت

اسلام آباد (بيورو) وزيراعظم نواز شريف سول توڙي ملٽري ادارن کي الرٽ رهڻ جو حڪم ڏئي ڇڏيو، آرمي چيف جنرل راحيل شريف طرفان فوجي جوانن کي زلزلي متاثر علائقن ۾ امدادي ڪارروايون شروع ڪرڻ جي هدايت ڪئي آهي. ملڪ ۾ آيل شديد زلزلي کانپوءِ وزيراعظم نواز شريف سمورن ادارن کي الرٽ رهڻ جي هدايت ڪري ڇڏي آهي. وزيراعظم چيو آهي ته سمورا ادارا زلزلي متاثر علائقن ۾ ڪاررواين شروع ڪن. آرمي چيف جنرل راحيل شريف زلزلي متاثر علائقن ۾ ڪارروايون شروع ڪرڻ جي هدايت ڪندي چيو آهي ته جوان حڪم ملڻ جو انتظار ڪرڻ بنا ئي متاثر علائقن ۾ امدادي ڪارروايون شروع ڪن.

 

پيپلزپارٽي جي سينيئر اڳواڻ مخدوم امين فهيم ڪراچي پهچي ويو

ڪراچي (اين اين آءِ) پيپلزپارٽي جو اڳواڻ مخدوم امين فهيم دبئي مان ڪراچي پهچي ويو مخدوم امين فهيم ڪينسر جو مريض آهي هو ڪجهه عرصو اڳ ڪينسر جي علاج لاءِ لنڊن ويل هو جتان هو دبئي هليو ويو مخدوم امين فهيم سان گڏ ان جو پٽ جميل زمان به وطن واپس پهتو ڪراچي ايئرپورٽ تي سندن استقبال راشد رباني ۽ وقار مهدي ڪيو جڏهن ته ان جو پٽ رفيق الزمان به ايئرپورٽ تي موجود هو مخدوم امين فهيم کي ايئرپورٽ کان نجي اسپتال منتقل ڪيو ويو هو ڪجهه ڏينهن قيام کان پوءِ علاج لاءِ ٻيهر لنڊن ويندو ميڊيا سان ڳالهائيندي وڏي وزير جي خاص صلاحڪار علي حسن چيو ته مخدوم امين فهيم کي سندس خواهش تي وطن آندو ويو پارٽي ڪارڪنن سان ملاقات جو خواهشمند هو.

 

ميرپورخاص ۾ روڊ حادثو، 2 عورتن سميت 4 ڄڻا فوت، 5 زخمي، حالت نازڪ

ميرپور خاص (اين اين آءِ) ميرپورخاص ۾ ٽريڪ حادثي ۾ ٻن عورت سميت 4 ڄڻا فوت ۽ 5 سخت زخمي ٿيا ميرپورخاص جرواري رنگ روڊ باءِ پاس چونا فيڪٽري ويجهو مسافر ڪوچ ۽ ڪار ۾ ٽڪر جي نتيجي ۾ ٻن عورتن سميت 4 ڄڻا فوت 5 سخت زخمي ٿيا ميرپورخاص ۾ عمر ڪوٽ کان ڪراچي ويندڙ مسافر ڪوچ ڪار ۾ خوفناڪ تڪر ۾ 80 ورهين جو حاجي غلام محمد، آمنه زال فتح محمد، 14 ورهين جي صاحبه ڌيءَ فتح محمد ۽ 35 ورهين جو صمد علي فوت ٿي ويو جڏهن ته فتح محمد منور روشنا شهنيلا ۽ مشرف پرويز سخت زخمي ٿي پيا جن کي زخمي حالت ۾ سول اسپتال ميرپورخاص آندو ويو سول اسپتال ۾ علاج جي سهولت نه هئڻ سبب زخمين کي طبي امداد ڏيئي حيدرآباد منتقل ڪيو ويو جڏهن ته لاش وارثن حوالي ڪيا ويا ذريعن مطابق بدنصيب ماڻهن جو تعلق عمرڪوٽ سان آهي جيڪي ڄامشورو ۾ پنهنجي مائٽن جي دعوت تان واپس اچي رهيا هئا ته حادثو پيش آيو.

 

پيپلزپارٽي جمهوري ادارن ۽ پارليامينٽ جي مضبوطي تي ڪڏهن به سوديبازي نه ڪندي: يوسف رضا گيلاني

لاهور (اين اين آءِ) پاڪستان پيپلزپارٽي جي مرڪزي اڳواڻ ۽ اڳوڻي وزيراعظم سيد يوسف رضا گيلاني چيو ته پيپلزپارٽي جو آئين ۽ جمهوريت جي بقا تي ايمان جي حد تائين يقين آهي پيپلزپارٽي جمهوري ادارن ۽ پارليمينٽ جي مضبوطي تي ڪڏهن به سوديبازي نه ڪندي بينظير ڀٽو عالمي برادري جي ذريعي مشرف کي آرمي چيف جو عهدو ڇڏڻ تي مجبور ڪيو ۽ ملڪ ۾ جمهوريت بحال ٿي ملڪ ۾ اڄ جمهوريت بينظير ڀٽو جي سياسي ڏاهپ جي ڪري آهي ان نوازشريف کي اليڪشن جو بائيڪاٽ نه ڪرڻ تي راضي ڪيو پوءِ ان جي شهادت کان پوءِ آصف زرداري نوازشريف کي 2008 جي چونڊ ۾ حصو وٺڻ تي قائل ڪيو ڇو ته هو ڇو ته هو ان کان وڌيڪ ان جي بائيڪاٽ جو اعلان ڪري چڪو هو خانگي ٽي وي کي انٽرويو ڏيندي سيد يوسف رضا گيلاني پيپلزپارٽي تي ڪرپشن جا ڪيس داخل ٿيڻ جو ذڪر ڪندي چيو ته هي الزام ميڊيا ٽرائيل جي زمري ۾ اچن ٿا ڇو ته سمورا ڪيس عدالتن هيٺ ٻڌڻي هيٺ آهن هن چيو ته چارٽر آف ڊيموڪريسي کي هن 85 سيڪڙو عملدارامد ڪيو پر 15 سيڪڙو ان تي مسلم ليگ (ن) جي ڪري عملدرامد نه ٿي سگهيو يوسف رضا گيلاني چيو ته ميثاق جمهوريت تي احتساب ڪميشن جو قيام شامل هو هن سڀ کان پهريان پنهنجي وزارت اعظميٰ جي شروع ۾ ئي نيب کي وزيراعظم سيڪريتريٽ مان قانون واري وزارت ۾ ٽرانسفر ڪري ڇڏيو هن وڌيڪ چيو ته احتساب ڪميشن دٻاءُ ۽ ڪجهه مصلحت جي ڪري پارليمينٽ مان قانون پاس نه ٿي سگهيو جنهن جو ان کي گهڻو ڏک آهي هن پنهنجي اسپيڪر شپ جي دوران ڀرتيون ڪرڻ جي ڏوهه ۾ جيل مينوئل تحت 10 سال سزا ڀوڳي پر اعليٰ عدليه ان کي انهن الزامن مان عزت سان بري ڪري ڇڏيو جڏهن هن نيب کان معافي وٺڻ جو مطالبو ڪيو ته ان اداري معافي وٺڻ بدران ان جي خلاف هڪ ٻيو ڪيس داخل ڪري ڇڏيو هن ياد ڏياريو ته هن موجوده چيئرمين نيب کي گهرو سيڪريٽري جي عهدي تان فارغ انهيءَ ڪري ڪيو هو جو هن ان وقت جي دفاع واري وزير چوڌري مختار کي چين وڃڻ کان روڪي ڇڏيو هو هڪ سوال جو جواب ڏيندي هن چيو ته جيتوڻيڪ چيف جسٽس افتخار چوڌري جي عدالت سندس حڪومت کي ڪم نه ڪرڻ ڏنو پر ان جي باوجود سندس حڪومت تاريخي فيصلا ڪيا جنهن ۾ آئين جي متفقه طور تي بحالي جيڪا 446 جي هائوس ۾ مشڪل ڪم هو ان سطح جي مشڪل 1973 جي آئين سازي اسيمبلي کي آڏو نه هئي جيڪا صرف 128 ميمبرن تي ٻڌل هئي ان کان علاوه هن چيو ته ان جي حڪومت خيبرپختونخواهه کي سڃاڻپ ڏني گلگت بلتستان کي اسپيشل اسٽيٽس ڏنو ايف سي آر ۾ ترميمون آنديون فاٽا ۾ پوليٽيڪل پارٽيز ايڪٽ نافذ ڪيو ستون نيشنل فنانس ايوارڊ گڏيل طور تي منظور ڪيو بلوچن جي سياسي ۽ معاشي محرومي ختم ڪرڻ لاءِ آغاز حقوق بلوچستان ڏنو مالاڪنڊ ۽ سوات ۾ دهشتگردن جي خلاف آپريشن ڪيو ۽ پاڪستاني جهنڊو ٻيهر ڦڙڪايو ان کان سواءِ 25 لک آءِ ڊي پيز کي ٽن مهينن ۾ پنهنجي گهرن ڏانهن عزت ۽ وقار سان اماڻيو ويو عورتن جي خلاف تشدد کي روڪڻ لاءِ تاريخي قانونسازي ڪئي ۽ بينظير انڪم سپورٽ پروگرام تحت عورتن کي بااختيار بڻايو ان کانسواءِ اقليتن جي حقن لاءِ سنگ ميل قدم کنيا. جن ۾ سينيٽ ۾ انهن لاءِ 4 مخصوص سيٽون ڏنيون ويون يوسف رضا گيلاني چيو ته جنرل ڪياني جي نوڪري جي مدي ۾ واڌ ان ڪنهن دٻاءُ بنا ڪئي ۽ دٻاءُ ڪنهن طرفان نه هو ڪرپشن جي هڪ سوال جو جواب ڏيندي هن چيو ته حج ڪرپشن جي الزام تي سندس پٽن خلاف ڪيس داخل ڪيا ويا ۽ مسلم ليگ (ن) جي هڪ ميمبر ايئن ڪيو پر سپريم ڪورٽ ان بي بنياد ڪيس جي ڏوهه ۾ حڪم ڏنو ته ڪيس ڪندڙ ميمبر خلاف ڪيس داخل ڪيو وڃي هن افسوس سان چيو ته ميڊيا اڃا تائين ڪيس آجو قرار ناهي ڏنو ڀارت سان لاڳاپن جي حوالي سان هڪ سوال جي جواب ۾ هن هندستان جي ان وقت جي وزيراعظم من موهن سنگهه سان شرم الشيخ ۾ ملاقات جو ذڪر ڪندي چيو ته گڏيل بيان ۾ هي عهد ڪيو ويو ته سمورا مسئلا، ڪسمير، سرڪريڪ، سياچن ۽ هندستان جي بلوچستان ۾ مداخلت کي ڳالهين جي ذريعي حل ڪرڻ تي زور ڏنو ويو جيڪا ان جي وڏي ڪاميابي هئي پاڪستان پيپلزپارٽي جو ذڪر ڪندي هن چيو ته جمهوري نظام ۾ سياسي جماعتن تي اهڙا وقت ايندا رهن ٿا هن چيو ته 90 جي ڏهاڪي ۾ پيپلزپارٽي جي قومي اسيمبلي ۾ فقط 14 سيٽون هيون جڏهن ته سنڌ ۾ اپوزيشن ۾ به نه هئي پر ايندڙ چونڊن ۾ پيپلزپارٽي ٻيهر ووٽن ذريعي چونڊجي اقتدار ۾ آئي هن چيو ته بلاول ڀٽو 60 سيڪڙو پاڪستان جي آبادي جي نوجوانن جي ترجماني ڪري ٿو جڏهن ته ٻي سڄي ليڊرشپ هاڻي 60 سالن کان مٿي آهي هن انڪشاف ڪيو ته پارٽي جي سي اي سي جي اجلاس ۾ هن پنهنجي استعيفا رضاڪاراڻي طور پيش ڪئي ۽ تجويز ڪيو ته نوجوان قيادت آڏو آندي وڃي هن اهو به چيو ته هن انهيءَ اجلاس ۾ چيئرمين بلاول ڀٽو کي هاڻي کان پارليمينٽ ۾ آڻڻ جي تجويز ڏني هئي ته جيئن هو پاڪستان جي سياست ۽ سياستدانن کان روشناس هجي ۽ سياسي تجربو هاصل ڪري جيڪو ان لاءِ ۽ پارٽي ۽ ملڪ لاءِ وڏو فائديمند هوندو.

 

آپريشن کانپوءِ دهشتگرد سنڌ جي هيٺين علائقن ۾بزدلاڻيون ڪارروايون ڪري رهيا آهن: خورشيد شاهه

جيڪب آباد (بيورو) قومي اسيمبلي ۾ اپوزيشن ليڊر سيد خورشيد شاهه چيو آهي ته جيڪب آباد سانحي تي کيس تمام گهڻو افسوس آهي، سنڌ سرڪار واقعي جي جاچ ڪرائي رهي آهي، آپريشن ضرب عضب دهشتگردن جي چيلهه چٻي ڪري ڇڏي آهي، جنهن ڪري هو سنڌ جي هيٺين علائقن ۾ بزدلاڻيون ڪارروايون ڪري رهيا آهن. سيد خورشيد شاهه جيڪب آباد پهچي سانحي ۾ شهيد ٿي ويلن جي وارثن سان ملاقات ڪئي ۽ کين  سانحي جي مڪمل جاچ ڪرائڻ جي خاطري ڪرائي. ميڊيا سان ڳالهائيندي سيد خورشيد شاهه چيو ته آپريشن عضب هشتگردن جي چيلهه چٻي ڪري ڇڏي آهي، جنهن ڪري هو سنڌ جي هيٺين علائقن ۾ اهڙيون بزدلاڻيون ڪاررروايون ڪري رهيا آهن. سيد خورشيد شاهه چيو ته  جيڪب آباد سانحي کي کيس تمام گهڻو افسوس آهي، سنڌ سرڪار واقعي جي درست نموني جاچ ڪرائي رهي آهي. خورشيد شاهه چيو ته سکر، جيڪب آباد، شڪارپور ۽ گُهوٽڪي سرحدي علائقا آهن، ان ڪري اتي پرڏيهي چر پر آهي، جتي انٽيليجنٽس کي ڪم ڪرڻ جي ضروت آهي، جنهن سان دهشتگردن خلاف آپريشن وڌيڪ ڪامياب ٿيندو. سيد خورشيد شاهه چيو ته ڀارتي مودي سرڪار پاڪستان کي ترقي ڪندي ڏسڻ نٿي چاهي، جنهن ڪري خوفيا ايجنسي “را“ جي ذريعي ملڪ ۾دهشتگردي ڪرائي رهيو آهي. سيد خورشيد شاهه جو وڌيڪ چوڻ هو ته عارف علوي جيڪب آباد سانحي تي سنڌ جي گهرو وزير لاءِ استعيفا ڏيڻ جو چيو، ڪي پي ڪي ۾ به اهڙيون ڪيتريون ئي ڪارروايون ٿيون، جيڪڏهن اتي جو گهرو وزير استعيفا ڏي ها ته سنڌ جو گهرو وزير به ضرور استعيفا ڏئي ها.

 

سينيئر صوبائي وزير پاران لاڙڪاڻي جي مختلف اسڪولن جا دورا، انتظاميه کي معياري تعليم ڏيڻ جي هدايت

لاڙڪاڻو (اي پي پي) اطلاعات ۽ تعليم کاتن جي سينيئر صوبائي وزير نثار احمد کهڙو ڪالهه لاڙڪاڻي شهر جي مختلف اسڪولن جا دورو ڪري تعليم کاتي جي عملدارن ۽ اسڪولن جي انتظاميا کي هدايت ڪئي ته اسڪولن ۾ پڙهندڙ شاگردن کي معياري تعليم ڏيڻ ۾ ڪا به ڪثر نه ڇڏي وڃي. سينيئر صوبائي وزير گورنمينٽ گرلز پرائمري اسڪول چانڊڪا ڪالوني ۾ ٺاهيل ٻن واڌو ڪلاسن، ليويٽري بلاڪ، ڪمپائونڊ وال ۽ اسٽيل گيٽ جو افتتاح ڪيو. ان موقعي تي صوبائي وزير اسڪول جي ڪلاس رومز جو دورو ڪيو ۽ اتي پڙهندڙ شاگردياڻين کان سوال جواب پڻ ڪيا. هن اسڪول جي هيڊمسٽريس ۽ ٻين ماسترياڻين کي هدايت ڪئي ته اسڪول ۾ ٻارن جي داخلا وڌايو ۽ شاگردياڻين جي حاضري يقيني بڻائي وڃي. هن اسڪول انتظاميه کي خاطري ڪرائي ته سندن باقي مسئلا به جلد حل ڪيا ويندا. ان بعد صوبائي وزير گورنمينٽ پائليٽ هائير سيڪينڊري اسڪول پهچي ايجوڪيشن ورڪس پاران لاڙڪاڻو پيڪيج تحت تيار ڪيل سائنس ليبارٽري جو افتتاح ڪيو. ان موقعي تي هن اسڪول انتظاميا کي هدايت ڪئي ته ليبارٽرين ۾ شاگردن کي پريڪٽيڪل ڪرائڻ لاءِ سموريون سهولتون ڏنيون وڃن. ان موقعي تي ايجوڪيشن ورڪس کاتي جي عملدارن صوبائي وزير کي بريفنگ ڏيندي ٻڌايو ته سائنس ليبارٽري تي ڪل لاڳت هڪ ڪروڙ 17 لک 57 هزار روپيه آئي آهي ۽ اهو ڪم وقت اندر مڪمل ڪري اسڪول انتظاميه حوالي ڪيو ويو آهي. نثار احمد کهڙو اسڪول جا ڪلاس رومز به گھمي ڏٺا ۽ شاگردن کان سوال پڻ پڇيا. جڏهن ته هن ڊرائنگ روم جو به معائنو ڪيو ۽ استادن کي هدايت ڪئي ته شاگردن جون ٺاهيل پئنٽنگز ۽ ڊرائنگ تي سندن نالا، اسڪول ۽ تاريخ لکي وڃي ته جيئن گھمڻ لاءِ ايندڙ ماڻهن کي ڄاڻ ملي سگھي. صوبائي وزير چيو ته پائليٽ اسڪول لاڙڪاڻو جو تاريخي تعليمي ادارو آهي جتي شاگردن کي بهترين ۽ معياري تعليم ملڻ گھرجي. هن چيو ته مان پاڻ هن اسڪول مان تعليم حاصل ڪئي آهي. هتان پڙهي نڪرندڙ شاگردن زندگي جي مختلف شعبن ۾ وڏو نالو ڪمايو آهي. هتي ماضي ۾ شاندار استاد رهي چڪا آهن جيڪي شاگردن تي وڏي محنت ڪندا هئا ۽ انهن جي محنت جي ڪري ئي سندن شاگرد اڄ اعليٰ مرتبي تي پهتا آهن. هن چيو ته هاڻوڪن استادن ۾ به پڙهائڻ وارو اهو چاھ هجڻ گھرجي ۽ سندن محنت سبب شاگرد پنهنجو ۽ سنڌ جو نالو روشن ڪري سگھن ٿا. ان کانپوءِ صوبائي وزير نثار احمد کهڙو گورنمينٽ هاءِ اسڪول سينٽ جوزف ۾ واڌو ڪلاس رومز جو پڻ افتتاح ڪيو، جتي 45 لک هڪ هزار روپين جي لاڳت سان تيار ڪيا ويا آهن.صوبائي وزير اسڪول جي مختلف ڪلاس رومز جو دورو ڪيو، جتي ڪو ايجوڪيشن ۾ پڙهندڙ شاگردن ۽ شاگردياڻين کان هن سوال جواب پڻ ڪيا. صوبائي وزير آءِ ٽي ليبارٽري جو پڻ معائنو ڪيو ۽ ان جا انتظام ڏسي واکاڻ ڪئي. ان بعد سينئر صوبائي وزير گرلز ڊگري ڪاليج لاڙڪاڻو جي نئين تعمير ٿيندڙ بلڊنگ جو دورو ڪيو جتي ايجوڪيشن ورڪس کاتي جي سپرنٽنڊنٽ انجنيئر فيروزالدين صديقي ۽ ايڪسئين خليل شيخ کيس هلندڙ ڪم بابت بريفنگ ڏني. هن کين هدايت ڪئي ته ڪم جي معيار جو خاص خيال رکيو وڃي ان ڏس ۾ ڪا ڪوتاهي نه ٿيڻ گھرجي. ان بعد نثار احمد کهڙو بيگم نصرت ڀٽو گرلز ڊگري ڪاليج لاڙڪاڻو جي هلندڙ ترقياتي ڪم جو معائنو ڪندي هدايت ڪئي ته ڪم وقت سر مڪمل ڪيو وڃي، جنهن تي ايجوڪيشن ورڪس کاتي پاران خاطري ڪرائي وئي. ان بعد صوبائي وزير نظر محلي ۾ پ پ پ ڪارڪن آصف ابڙو سان سندس والد جي وفات تي گھر پهچي عذرخواهي ڪئي. دوري دواران پ پ پ اڳواڻ خيرمحمد شيخ، محمد اسلم شيخ، محمد امين شيخ، امير بخش گاد، علي مردان کوسو ۽ ٻيا پ پ پ اڳواڻ ۽ ڪارڪن وڏي انگ ۾ موجود هئا.ا

 

ڊاڪٽر عاصم حسين ۽ ٻين کان جاچ: نيب ۽ رينجرز جي گڏيل ٽيم جاچ جو دائرو وڌائي ڇڏيو

اسلام آباد (اين اين آءِ) اڳوڻي وزير ڊاڪٽر عاصم حسين ۽ ٻين جي گرفتاري ۽ انهن کان جاچ کان پوءِ قومي احتساب بيورو ۽ پاڪستان رينجرز جي گڏيل ٽيم توانائي جي شعبي ۾ بيضابگين ۽ ڪرپشن جي الزامن جي جاچ جو دائرو 5 ڪمپنين ۽ ادارن تائين وڌائي ڇڏيو آهي ۽ اسٽيٽ بئنڪ مقامي ۽ پرڏيهي بئنڪن ۽ مالياتي ادارن کان ڪراچي سان تعلق رکندڙ 15 ماڻهن جي بئنڪ اڪائونٽس جو تفصيل گهريو آهي ذريعن مطابق توانائي جي شعبي ۾ ڪرپشن جي جاچ وڌائڻ جو فيصلو ڊاڪٽر عاصم حسين، سوئي سدرن گئس ڪمپني جا اڳوڻا مئنجنگ ڊائريڪٽرز هير صديقي ڪمپني جو اڳوڻو ڊپٽي مئنجنگ ڊائريڪٽر شعيب وارسي ۽ ڪامران احسان جي گرفتاري کان پوءِ ڪيو ويو نيب پاران اسٽيٽ بئنڪ کي لکيل تازي خط ۾ چيو ويو ته هو سنڌ صوبي جي سمورن مالياتي ادارن ۽ پرڏيهي بئنڪن کي تجمل حسين روبينا حسين سبينه خالد عارف حسين احسن احمد افضل احمد نور فاطمه خالد بن شاهين مريم خالد مرزا خالد زياد عارف دانيال عارف اعجاز فاطمه ۽ عماد حسين جي بئنڪ اڪائونٽس جو تفصيل فراهم ڪرڻ جا حڪم جاري ڪري ذريعن جو چوڻ آهي ته انهن ماڻهن جي بئنڪ اڪائونٽ جو تفصيل فراهم ڪرڻ جا حڪم ڊاڪٽر عاصم، سوئي سدرن گئس ڪمپني سوئي ناردرن پائيپ لائين لميٽيڊ پاڪستان پيٽروليم لميٽيڊ، آئل اينڊ گئس ريگيوليٽري اٿارٽي، ڪي اليڪٽرڪ ۽ ٻين ڪمپنين جي خلاف جاچ جو دائرو وڌائڻ جي حوالي سان ڏنا ويا.

 

ڀارتي شهري گيتا، 13 سالن کان پوءِ ڪراچي کان پنهنجي ملڪ پهتي

ڪراچي (اين اين آءِ) ڀارتي شهري گيتا 13 سالن کان پوءِ ڪراچي مان پنهنجي ملڪ ڀارت پهتي آهي ان سان گڏ بلقيس ايڌي، صبا ايڌي ۽ حمزه ايڌي سميت 5 ماڻهو دهلي پهتا آهن. هن کان اڳ ڪراچي ايئرپورٽ تي ڳاڙهو وڳو پهريل گيتا کي عام شهرين پاران تحفا ۽ گل پيش ڪيا ويا بلقيس ايڌي جو چوڻ هو ته هو گيتا جي ڪٽنب لاءِ به تحفا کڻي وڃي رهي آهي جنهن ۾ گيتا جي ماءُ لاءِ 4 ساڙهيون شامل آهن گيتا سان گڏ پريس ڪانفرنس ۾ فيصل ايڌي جو چوڻ هو ته هي گيتا جي ڪٽنب جي تصديق جي حوالي سان ڪجهه ابهام آهي پر ڊي اين اي ٽيسٽ ذريعي صورتحال واضح ٿي ويندي. هوڏانهن ڀارتي پرڌيهي وزارت به واضح ڪري چڪي آهي ته جيڪڏهن ڊي اين اي ٽيسٽ مثبت نٿو اچي ته به گيتا کي ڪنهن محفوظ هنڌ تي رهائڻ جا انتظام ڪيا ويندا.