تازيون خبرون

Daily Archives: October 26, 2015

فلاپ فلمن جي ڪري مون کي اسٽارڊم تائين رسيو مليو: دپيڪا پڊڪون

ممبئي (شوبز نيوز) بالي ووڊ جي بهترين اداڪارائن ۾ شمار ٿيندڙ اداڪار دپيڪا پڊڪون جو چوڻ آهي ته هن پنهنجي ڪيريئر ۾ ڪيل ڪيترن ئي فلمن مان سکيو آهي جنهن مان فلاپ فلمن جو به اهم ڪردار آهي بالي ووڊ لائيف مطابق دپيڪا هڪ ايونٽ دوران چوڻ هو ته هوءَ پاڻ کي خوشنصيب سمجهي ٿي ته اڄ هن مقام تي موجود آهي هن ٻڌايو ته سندس فلاپ فلمن جي ڪري کيس اسٽار ڊم تائين جو رستو مليو آهي ۽ هوءَ تمام فلمن ۾ ڪم ڪرڻ کانپوءِ ڪجهه نه ڪجهه ضرور سکيوآهي. هن پنهنجين غلطين مان سکيو ۽ انهن کي سڌارڻ جي هر هنڌ تائين ڪوشش ڪئي آهي جنهن تي هوءَ ڪافي حد تائين ڪامياب وئي آهي.

 

سلمان خان ماڌوري ۽ ڀاڳيا شريءَ لاءِ پنهنجي فلم جي اسپيشل اسڪريننگ ڪندو

ممبئي (شوبز نيوز) بالي ووڊ جي دبنگ سپر اسٽار سلمان خان پنهنجي مشهور ڪردار پريم جون پراڻيون يادون تازيون ڪرڻ لاءِ ماضي جي سپر اسٽار ماڌوري ڊڪشٽ ۽ ڀاڳيا شريءَ لاءِ پنهنجي نئين فلم پريم رتن ڌن پايو جي اسپيشل اسڪريننگ ڪندو سلمان خان اداڪاري سان گڏوگڏ انڊسٽري ۾ پنهنجي مخلص دوستي جي ڪري به ڃاتو سڃاتو وڃي ٿو ۽ اهو ئي سبب آهي ته ڪيترائي ناليوارا اداڪار به دبنگ خان جي دوستي کي فراموش نه ٿا ڪن جڏهن ته سلمان خان به ماضي جي سپر اسٽار ماڌوري ڊڪشٽ ۽ ڀاڳيا شريءَ لاءِ پنهنجي نئين ايندڙ فلم جي اسپيشل اسڪريننگ ڪندو.

 

ڀارت ٻطرفي معاهدي تحت سيريز کيڏڻ کان انڪار ڪيو ته بگ ٿري معاهدي سان بغاوت ٿي سگهي ٿي: شهريار خان

لاهور (اسپورٽس نيوز) پاڪستان ڪرڪيٽ بورڊ جيچ يئرمين شهر يار خان خبردار ڪيو آهي ته جيڪڏهن ڀارت ڊسمبر جنوري ۾ پاڪستان سان سيريز کيڏڻ کان انڪار ڪيو ته بگ ٿري معاهدي سان بغاوت ٿي سگهي ٿي. بي سي سي آءِ 2015 -2023 تائين حڪومت جي منظوري جي شرط سان ڇهه سيريز کيڏڻ واري معاهدي جي پاسداري ڪري. چيئرمين پي سي بي ياد ڏياريو ته پاڪستان آءِ سي سي جا معاملا ڀارت انگلينڊ ۽ آسٽريليا جي حوالي جي بگ ٿري معاهدي تي صحيحون ان شرط سان ڪيون هيون ته 8 سالن ۾ پاڪستان ۽ ڀارت وچ ۾ ڇهه سيريز ٿينديون شهر يار خان ٽيليگراف اسپورٽس کي انٽرويو ۾ چيو ته اسان نئين آئين تي صحيح ان خاطري تي ڪئي آهي ته ڀارت 8 سالن ۾ 6 سيريز کيڏندو اسان ئي اهائي خاطري ڪرائي وئي هئي جنهن سبب اسان پنهنجي مخالفت ڇڏي آءِ سي سي سان گڏيل معاهدو ڪيو. جڏهن ته بي سي سي آءِ ڊسمبر ۾ ٻه ٽيسٽ پنج ون ڊي ۽ ٻه ٽي ٽوئئنٽي مئچن تي ٻڌل سيريز جي حوالي سان اڃا تائين ڪو به حتمي جواب ناهي ڏنو.

 

يونس خان ٽيسٽ ڪرڪيٽ ۾ سڀ کان وڌيڪ سينچريون ٺاهيندڙ ٽاپ ٽين بيٽسمينن جي لسٽ ۾ شامل

لاهور (اسپورٽس نيوز) يونس خان ٽيسٽ ڪرڪيٽ ۾ سڀ کان وڌيڪ سينچريون ٺاهيندڙ ٽاپ ٽين بيٽسمينن جي لسٽ ۾ شامل ٿي ويو آهي. دبئي ٽيسٽ جي ٻئي اننگز ۾ انگلينڊ جي خلاف شاندار سينچري اسڪور ڪرڻ کاپوءِ يونس خان ٽيسٽ ڪرڪيٽ ۾ سڀ کان وڌيڪ سينچريون ٺاهيندڙ ٽاپ ٽين بيٽسمينن ۾ شامل ٿي ويو آهي. يونس خان دبئي جي انٽرنيشنل ڪرڪيٽ اسٽيڊيم ۾ انگلينڊ جي خلاف 31 هين سينچري اسڪور ڪري نه صرف آسٽريليا جي ميٿو هيڊن ۽ ويسٽ انڊيز جي چندر پال کي پوئتي ڌڪي ڇڏيو پر ٽيسٽ ۾ سڀ کان وڌيڪ سينچريون ٺاهيندڙ ٽاپ ٽين بيٽسمينن جي لسٽ ۾ شامل ٿي ويو آهي.

 

نواز- اوباما ملاقات: ارشاد ڪاغذي

پاڪستان جي وزيراعظم امريڪا جي صدر بارڪ اوباما سان صدارتي محل وائيٽ هائوس ۾ ملاقات ڪئي ۽ گڏيل دلچسپي جي معاملن تي گفتگو ڪئي. ٻنهي سربراهن پاران هڪ گڏيل پڌرنامو جاري ڪيو ويو آهي. گڏيل پڌرنامي ۾ پاڪ ــ امريڪا لاڳاپن جي وضاحت ڪئي وئي آهي ۽ آئنده به ٻنهي ملڪن جي وچ ۾ ويجها تعلقات رکڻ جو عزم ورجايو ويو آهي. گڏيل پڌرنامي جي شروعات ۾ اها وضاحت ڪئي وئي آهي ته امريڪي صدر جي دعوت تي پاڪستان جي وزيراعظم نواز شريف 20 آڪٽوبر کان 23 آڪٽوبر تائين امريڪا جو سرڪاري دورو ڪيو. ياد رهي ته امريڪا جي قومي سلامتي جي صلاحڪار سوسن رائيس آگسٽ ۾ نواز شريف کي صدر اوباما پاران امريڪا جي دوري جي دعوت ڏني هئي. رائيس، اسلام آباد ياترا جي موقعي تي تکيون مٺيون ڳالهيون ڪيون هيون.

خميس جي ڏينهن صدر اوباما، وزيراعظم نواز شريف جو وائيٽ هائوس پهچڻ تي آڌرڀاءُ ڪيو. اوول آفيس ۾ ٻنهي اڳواڻن ٻن ڪلاڪن تائين گفتگو ڪئي، ڳالهين ۾ پاڪستان جا وزير به هئا. ٻنهي اڳواڻن لاڳاپن کي وڌائڻ ۽ افغانستان ۾ امن جي قيام جي اميد ڏيکاري، هندستان سان ڪشمير سميت سڀني مسئلن ۽ تڪرارن کي ڳالهين ذريعي نبيرڻ جو عزم ورجايو. ڪنٽرول لائين تي ڀارت جي اشتعال انگيزي ۽ فائرنگ تي ڳڻتي ظاهر ڪئي وئي. وائيٽ هائوس پاران 14 سالن جي افغانستان جي جنگ جي خاتمي لاءِ امريڪا جي مجوزه نظرثاني واري منصوبي ۾ پاڪستان تي زور بار وڌو ويو ته هو ان سلسلي ۾ مڪمل سهڪار ڪري ۽ افغانستان جي سرڪار جي مدد سان ڳالهيون جاري رکڻ جون ڪوششون ڪري ته جيئن امن قائم ٿي سگھي. گذريل هفتي صدر اوباما اعلان ڪيو هو ته افغانستان ۾ امريڪا جي فوج اڃا وڌيڪ عرصو رهندي، جڏهن ته پهريان 2015ع تائين مڪمل انخلا جو واعدو ڪيو هو. تنهن ڪري امريڪي فوج جي رهڻ ۽ افغانستان ۾ امن جي استحڪام لاءِ پاڪستان جو رول اهميت جوڳو آهي تنهن ڪري افغان طالبان سان امن ڳالهين جي همت افزائي ۽ ڳالهيون جاري رکڻ لاءِ پاڪستان کي درخواست ڪئي وئي آهي. هن مهيني جي شروعات ۾ نواز شريف سرڪار افغان حڪومت ۽ طالبان جي نمائندن جي وچ ۾ ڳالهين جي بحاليءَ لاءِ ڪوششون ڪيون ۽ ان کان اول ڳالهيون پڻ ٿيون هيون پر افغان ۽ امريڪا جي سرڪار پاران پاڪستان تي ڊبل گيم کيڏڻ جا الزام عائد ڪيا ويا. ان ڪارڻ پاڪستان هٿ ڪڍي ويو ۽ ڳالهيون اڳتي وڌي نه سگھيون. ٻنهي اڳواڻن جي ملاقات ۾ ان کان علاوه اقتصادي ترقي، واپار ۽ سيڙپڪاري، سول سوسائٽي ۽ تعليم جي شعبن ۾ سهڪار، عالمي صحت کي فروغ، علائقائي سلامتي لاءِ دهشتگردي خلاف تعاون، سائبر سيڪيورٽي، جوهري سلامتي جو تحفظ وغيره جي اهم نقطن تي ڳالهيون ڪيون ويون.

امريڪا، پاڪستان جو پراڻو دوست ملڪ آهي ۽ ٻنهي ملڪن جا لاڳاپا سرد گرم هجڻ جي باوجود امريڪا ۽ پاڪستان جا حڪمران پڪي ياري جا دعويدار آهن. صدر اوباما ۽ وزيراعظم نواز شريف جي ملاقات ۾ بظاهر ڪو بريڪ ٿرو نه ٿي سگھيو پر ٻنهي ملڪن ۾ اعتماد جي فضا ضرور بحال ٿي وئي، جيڪا گذريل مهينن کان ڪشيدگيءَ جي نظر ٿي وئي هئي. ان جا ڪيئي سبب سمجهه ۾ اچن ٿا. پاڪستان طرفان چين سان نوان معاهدا، روس سان ويجها لاڳاپا رکڻ ۽ ڳجهي نموني نيوڪليئر هٿيارن جي ترقي ۽ واڌارو ڪرڻ جي ڪري امريڪا سخت ناراضگي جو برملا اظهار ڪندو رهيو آهي.

پاڪستان جي وزيراعظم نواز شريف، صدر بارڪ اوباما کي هندستان جي پاڪستان ۾ دراندازي جي شڪايت ۽ ثبوت پيش ڪيا، پر ان باري ۾ امريڪا کلي ريت تبصري ڪرڻ کان لنوائي ٿو. جيتوڻيڪ اسٽيٽ ڊپارٽمينٽ جي ترجمان جان ڪيري اخباري عيوضين کي ٻڌايو ته پاڪستان پاران هندستان جي خلاف ڪي شاهديون يا ڪو دستاويز نه مليو آهي. ”اسان کي ان باري ۾ ڪا به خبر ناهي.“

پاڪستان جي وزيراعظم نواز شريف، امريڪا جي صدر بارڪ اوباما کي ٻڌايو ته اسلام آباد پابندين کي قبول نه ڪندو ۽ خاص طور ننڍن جوهري هٿيارن جي باري ۾ ڪابه شرط ۽ پابندي پسند نه ڪندو. پاڪستان جي نمائندن ان باري ۾ ٻڌايو ته پاڙيسري نيوڪليئر ملڪ هندستان جي اوچتي حملي کي روڪڻ لاءِ ننڍا ٽيڪنيڪلي هٿيار ۽ وار هيڊس ضروري آهن ته جيئن هندستان ڪنهن به حملي کان باز رهي. اهڙي قسم جون ڳالهيون پاڪستان جي پرڏيهي سيڪريٽري اعتزاز چوڌري امريڪا ۾ ميڊيا کي ٻڌايون. پهريون دفعو پاڪستان سرڪاري طور اهڙو اظهار ڪيو آهي ۽ هندستان کي جنگ کان روڪڻ جي اها حڪمت عملي طي ڪئي وئي آهي.

پاڪستان ۽ امريڪا جي لاڳاپن کي هٿي وٺائڻ خاطر اوباما انتظاميه پاڪستان کي ايف ـ 16 ويڙهاڪ جهاز وڪرو ڪرڻ جي منظوري ڏئي ڇڏي آهي. امريڪي ڪانگريس به منظوري ڏني آهي ۽ اميد هئي ته اوباما ۽ نواز جي ملاقات تي اهو اعلان ڪيو ويندو پر ايئن نه ٿي سگھيو. ٻنهي اڳواڻن جي ملاقات جي ڳالهين کي ڳجهو رکيو ويو آهي ۽ ڪو به تبصرو ڪونه ڪيو ويو آهي. پر سياسي پنڊتن ۽ پارکن جو خيال آهي ته امريڪا جو افغانستان ۾ 2015ع تي انخلا وارو پروگرام ملتوي ڪرڻ ۽ وڌيڪ ٻن سالن تائين فوج کي اتي رهائڻ جي معاملي تي گھڻو فوڪس ڪيو ۽ طالبان سان ڳالهين لاءِ پاڪستان تي پريشر رکيو ويو. ان کان علاوه هندستان سان ڳالهين ۽ جوهري هٿيارن کي محدود ڪرڻ ۽ جوهري ننڍا هٿيار تيار ڪرڻ تي ڳڻتيءَ جو اظهار ڪيو ويو. اوباما جو چوڻ هو ته ان سان جنگ جو انديشو وڌي سگھي ٿو.

بهرحال ملاقات مثبت ۽ خوشگوار ماحول ۾ ٿي ۽ ان جا ڏور رس نتيجا نڪرندا ۽ ان ۾ ڪو شڪ ناهي ته پاڪستان جي پوزيشن بهتر ٿي آهي ۽ اڳتي هلي پاڪستان سان نيوڪليئر معاملي تي ڪو معاهدو ٿي سگھي ٿو، جنهن جو بنياد نواز ــ اوباما ملاقات سنگ ميل جي حيثيت رکي ٿي.

پاڪستان جي پرڏيهي سيڪريٽري امريڪا ۾ ميڊيا سان جيڪي حال احوال اوريا آهن ۽ خاص ڪري نيوڪليئر هٿيارن جي حڪمت عملي بابت، تنهن تي وڌيڪ تحقيق ۽ رپورٽون شايع ٿيون آهن؛ ٻن مستند جوهري تجزئي ڪارن تجزيو ڪيو آهي ته پاڪستان پنهنجي جوهري هٿيارن جي ذخيري کي ترقي ڏئي گھڻو وڌايو آهي، 110 کان 130 تائين نيوڪليئر هٿيار (Warheads) ۾ اضافو ڪيو آهي ۽ 2011ع ۾ 90 کان 110 تائين وار هيڊس جو تعداد وڌايو هو. تجزئي نگارن هنس ڪرسٽينسين ۽ رابرٽ نورس جي پڪي پختي راءِ آهي ته ايندڙ ڏهن سالن ۾ پاڪستان 220 کان 250 تائين وار هيڊس تيار ڪري سگھي ٿو. ان ڪارڻ امريڪا، روس، چين، فرانس کان پوءِ پاڪستان پنجون نمبر وڏي جوهري هٿيار رکندڙ رياست بنجي ويندو. امريڪا چاهي ٿو ته پاڪستان سان نيوڪليئر معاهدو ڪجي پر ان بابت وائيٽ هائوس اهڙو معاهدو تڪڙ ۾ ڪرڻ نٿو گھري. دهشتگردي جي واقعن ۾ پاڪستان جا شهري ۽ سيڪيورٽي فورسز جا هزارين جوان شهيد ٿي ويا آهن. امريڪا پاران دهشتگردي جي ويڙهه ۾ پاڪستان کي جيڪو نقصان پهتو آهي ان جو اندازو انگن اکرن مان لڳائي سگھجي ٿو. ان کان علاوه پاڪستان ۽ خطي ۾ جيڪا سياسي جاگرافي صورتحال ۾ تبديلي آئي آهي، تنهن پاڪستان کي گوڏن ڀر ڪيرائي وڌو آهي. شدت پسندن ۽ دهشتگردن سان پاڪستان جي اڳوڻي حڪمرانن ۽ خاص طرح آمر ضياءُ جا جيڪي تعلقات هئا ۽ اُن جي دور ۾ امريڪا جي چوڻ تي سوويت يونين جي خلاف جيڪي مجاهد ڀرتي ڪيا ويا ۽ ان بعد امريڪا جي افغانستان ۾ قبضي کان پوءِ جهڙي نموني طالبان جي مدد ڪئي وئي، اها ڪنهن کان به ڳجهي نه آهي. پر انهن قربانين جي باوجود امريڪا، پاڪستان کي وڌيڪ ڪارروائي ڪرڻ جو زور بار وجهندو رهيو آهي ۽ هر دفعي Do more جو مطالبو ڪندو رهي ٿو. هن گڏجاڻي ۾ پاڪستان جي دهشتگردي خلاف ويڙهه کي ساراهيو ويو ۽ هلندڙ آپريشن تي اطمينان جو اظهار ڪيو ويو. ۽ پاڪستان کي مطمئن ڪيو ويو ته آئنده وڇوٽيون ڪونه وڌايون وينديون. ان سموري بحث کي سهيڙيندي اهو چئي سگھجي ٿو ته پاڪستان جي پوزيشن ۽ ڳالهين کي عزت ۽ اهميت ڏئي هڪ سٺو تاثر جوڙيو ويو آهي جنهن جي ڪري ايندڙ وقت ۾ پاڪستان کي فائدو حاصل ٿيندو.

 

برصغير جي امن کي تباهه ڪندڙ مذهبي انتهاپسندي…!! : اشرف نوناري

برصغير جي تاريخ جو جائزو وٺبو ته گڏيل هندوستان جي ورهاڳي کان اڳ برصغير ۾ رهندڙ سمورن مذهبن سان تعلق رکندڙ ماڻهن ۾ محبت، امن ۽ ڀائيچاري جي ڊگهي تاريخ آهي. هر مذهب جو ماڻهون ٻئي مذهب جو احترام ڪندو هو، عيدون، ڪرسمس ڊي توڙي هولي وغيره گڏيل طور تي ملهايون وينديون هيون، جڏهن گڏيل هندوستان جو ٻه قومي نظريي تحت ورهاڳو ٿيو ته ائين پيو لڳي ڄڻ ملڪن جو نه پر مذهبن جو ورهاڳو ٿيو هجي 1947ع کان 1954ع تائين ٻنهي پاسن جي مذهبي ماڻهن جو تاريخي مالي ۽ جاني نقصان ٿيو، دنيا جي تاريخ ۾ مذهبي بينادن تي هڪ وڏي لڏپلاڻ ٿي ۽ لکين ماڻهون پنهنجي جنم ڀومين ۽ وطن کان جدا ٿيا، ورهاڳي کانپوءِ مذهبي بنيادن تي هڪ ٻئي جون مال ملڪيتون لٽيون ويون ۽ ڪيترن ئي عورتن کي جنسي تشديد جو نشانو بڻايو ويو. پنهنجي ڌرتي نه ڇڏيندڙن کي زبردستي وطن ڇڏڻ تي مجبور ڪيو ويو ۽ آخرڪار ائين ٿيو ته مسلمانن ۽ هندن کي پنهنجو الڳ الڳ وطن مليو ٻه قومي نظريي جي بنياد تي ٺهندڙ ٻنهي ملڪن جي آئين ۽ قانون ۾ اقليتن ۽ غيرمذهب ماڻهن جي مذهبي آزادي ۽انهن جو تحفظ شامل آهي جڏهن ته ٻئي ملڪ دنيا ۾ سيڪيولر هئڻ جا دعويدار آهن، گڏيل هندوستان جي ورهاڳي کانپوءِ برصغير ۾ سڀ کان وڏو نقصان آدم جي اولاد جو ٿيو، اڄ ٻنهي ملڪن ۾ انسانيت جو وجود خطري ۾ آهي جڏهن ته مذهبي انتهاپسندي تيزي سان وڌنڌي پئي وڃي ۽ ٻئي ملڪي مذهبي انتهاپسند دهشتگردن هٿان مجبور آهن، هندوستان ۾ وڌنڌڙ مذهبي جنونيت پٺيان حڪومتي هٿ شامل آهن، جڏهن نريندر مودي گجرات جو وزيراعليٰ هو ان وقت گجرات ۾ مذهبي بنياد تي جيڪي فساد ڪرائي بيگناهه مسلمانن جو قتل عام ڪرايو ويو، سوين ماڻهن کي مذهبي بنياد تي زندهه ساڙيو ويو، ان فسادن هندوستان ۽ پاڪستان ۾ مذهبي انتهاپسندي واري باهه مٿان پيٽرول وارو ڪردار ادا ڪيو. ان کانپوءِ بابري مسجد کي شهيد ڪري مندر تعمير ڪرڻ جو فيصلو ڪيو ويو، جنهن عمل به نفرتن جي ديوار کي مضبوط ڪيو، ڀارت ۾ هن وقت جيڪو ڪجهه ٿي رهيو آهي اهو قابل مذمت ۽ ڳڻتي جوڳو عمل آهي، ڇو جو برصغير جو اصل مسئلو غربت، بک ۽ بيروزگاري آهي مگر انسان جي بنيادي مسئلن کي پٺ تي رکي هڪ سازش تحت مذهبي ڪٽر پڻي کي وڏو مسئلو بڻايو ويو آهي، ۽ اهائي وجه آهي جو پاڪستان ۽ ڀارت کي مذهبي انتهاپسندي جي چغل ۾ ڦاسائي نه صرف ٻنهي ملڪن کي ترقي کان بلڪي ٻنهي ملڪن جي عوام کي به بنيادي حقن کان محروم رکيو پيو وڃي،جنهن سبب دنيا اندر ٻنهي ملڪن جي سيڪيولرصورت شديد متاثر ٿيندي پئي وڃي، ڀارت ۾ جڏهن کان مودي سرڪار آئي آهي ته مذهبي انتهاپسندي واري واقعن ۾هڪ دفعو ٻيهر اضافو ٿيندو پيو وڃي، شيوسينا جي هندو انتهاپسند دهشتگردن هڪ هفتو اڳ پاڪستان جي اڳوڻي پرڏيهي وزير خورشيد قصوري جي ڪتاب واري مهور تي تقريب جي ميزبان سندرا ڪلڪرني کي تشدد جو نشانو بڻائڻ بعد ان جو منهن ڪارو ڪيو. ان کان علاوه شيوسينا جي غنڊن بي سي سي آءِ جي آفيس مٿان حملو ڪيو، ان کان علاوه ڪشميري مسلمان ڊرائيور کي ان ڪري ساڙيو ويو ته ان هڪ ڳئون ماتا ماري هئي، اهڙي طرح والاريل ڪشمير جي مسلمان اسيمبلي ميمبر مٿان به ڪارو رونگ هاري ان جو ڪارو منهن ڪيو ويو،بمبئي پوليس پنهنجي ئي ملڪ جي مسلمانن کي گرفتار ڪري تشدد ڪري ٿي جيڪو سڀ ڪجهه مذهب جي بنياد تي ڪيو پيو وڃي، هندوستان سان گڏوگڏ پاڪستان ۾ به مذهبي بنياد تي ٿيندڙ واقعا ڳڻتي جوڳا آهن، صرف سنڌ جي ڳالهه ڪبي ته سنڌ ۾ گذريل ٽن سالن ۾ 22 کان وڌيڪ هندن جون مذهبي عبادت گاهون مذهبي بنياد تي ساڙيون ويون، جنهن ۾ لاڙڪاڻي جي ڌرم شالا مندر، حيدرآباد جي ڪالي ماتا وارو مندر، عمر ڪوٽ جو شيو مندر ۽ حيدرآباد جي شيو ڀڳوان جي مندر سميت ڪراچي، گولاڙچي، ٽنڊو محمد خان، شيخ ڀرڪيو، ٽنڊوالهيار ، مٺي ، ڪنڌڪوٽ سميت سنڌ جي ڪيترن ئي شهرن ۾ هندن جي ڀڳوانن جون مورتيون ٽوڙي مندر ساڙيا ويا، سنڌ ۾ هندن جا اغوا به محمول بڻيل آهن جان ۽ مال جي خطري کان پوءِ صرف ٽن سالن ۾ 8 هزار هندو خاندان سنڌ ڇڏي هندوستان لڏي ويا آهن، ان کان علاوه مذهب جي نالي تي هندومعصوم ڇوڪرين کي اغوا بعد زبردستي مذهب مٽرائڻ وارا واقعه به عام جام آهن، جڏهن ته هندو نوجوان ڇوڪرين کي اغوا بعد اجتماعي جنسي ڏاڍائن کان پوءِ مارڻ واري واقعن ۾ به اضافو ٿيندو پيو وڃي، صرف ٻن مهينن ۾ عمر ڪوٽ جي حوا عرف حوي مينگهواڙ، ريشمان ڪولهي، ڪڪوڪولهي ليلان ڀيل سميت هڪ درجن کان وڌيڪ هندو ڇوڪرين کي جنسي ڏاڍائين کانپوءِ بيدردي سان ماريو ۽ ساڙيو ويو آهي، ان کان علاوه پنگريو جي ڀورو ڀيل جي دفن ٿيل لاشن کي قبر مان ڪڍي پنگريو جي گهٽين ۾ گهليو ويو ان کان وڌيڪ پاڪستان / سنڌ ۾ بدترين مذهبي انتهاپسندي جي ٻئي شڪل ڪهڙي ٿي سگهي ٿي . پنجاب اندر ته وقت جي گورنر سلمان تاثير کي سرعام گوليون هڻي ماريو ويو ۽ چيو ويو ته سلمان تاثير توهين رسالت ڪئي آهي اڄ مذهبي بنياد تي ان قاتل جي حقن ۾ هزارين ماڻهون احتجاج ڪري رهيا آهن سندس موقف آهي ته سلمان تاثير جو قاتل ممتاز قادري اسلام جي تعليم جي عين مطابق ڪم ڪيو آهي، پر اسلام هڪ انسان جي قتل کي پوري انسانيت جو قتل قرار ڏنو ويو..! جهڙي طرح هندوستان ۾ هندو انتهاپسندن مسلمانن مٿان حمله ڪرڻ شروع ڪيا آهن ته هندوستان جي سوين ساڃاهه وند، اديبن، دانشورن، قلم ڪارن، صحافين ۽ مختلف شعبن سان تعلق رکندڙن انسان پسند ماڻهن هندوستان حڪومت کي ايوارڊ واپس ڪندي هندوانتهاپسندي تي سخت احتجاج ڪيو آهي ۽ چيو ته هي منهن ڪارو مسلمانن جو نه پر هندوستان جو ٿي رهيو آهي، اهڙي طرح پاڪستان ۾ به ساڃاهه وندن کي مذهبي انتهاپسندي خلاف اٿڻو پوندو، برصغير جي ملڪن خاص سنڌ جيڪو دنيا ۾ امن ۽ انسانيت جو عملبردار رهيو آهي، جتان هميشه دنيا جي سلامتي کي دعا مليل آهي، جهڙوڪ،

سائيم سدائين ڪري مٿي سنڌ سڪار،

دوست مٺا دلدار عالم سڀ آباد ڪرين (شاهه)

هزارين ساله تاريخ رکندڙ سنڌ جتي سمورن مذهبن جو احترام ڪيو ويندو آهي اڄ اها سنڌ مذهبي انتهاپسندي جي ڌٻڻ ۾ ڦاسندي پئي وڃي، جيڪڏهن سنڌ ۾ مذهبي انتهاپسندي کي نه روڪيو ويو ته پوءِ دنيا اندر مذهبي نفرتن جو سيلاب ايندو ۽ خلق خدا بي موت مرندي رهندي، برصغير جي امن کي تباهه ڪندڙ مذهبي انتهاپسندي کي روڪڻ لاءِ عالمي دنيا کي نوٽيس وٺڻو پوندو، ننڍي کنڊ جي ڏيڊ ارب ماڻهن کي مذهبي انتهاپسندي جي بنياد تي فساد نه پر امن ۽ سک گهرجي چند انتهاپسند برصغير ۾ مذهبي بنيادن تي نفرتن جو زهر پکيڙي رهيا آهن جنهن جي رستا روڪ ڪرڻ گهرجي، نه ته سمورو برصغير ان مذهبي دهشتگردي جي لپيٽ ۾ اچي ويندو، برصغير جاملڪ پنهنجي آئين، قانون ۽ سيڪيولر ملڪن واري دعويٰ کي سچ ڪندي ملڪن ۾ موجود سمورن مذهبي قومن کي مذهبي آزادي ڏيئي انتهاپسندي جو خاتمو آڻين ۽ انسانيت جي عظمت کي بحال ڪن،

بقول حافظ نظاماڻي جي؛

ڪوآرحمان جي پاسي ڪو آ ڀڳوان جي پاسي،

اسانجو سجدو آ ان کي جيڪو آ انسان جي پاسي،

 

 

نواز اوباما- ملاقات، رسمي يا نتيجا ڏيندڙ

سوال اهو ٿو اٿي ته وزير اعظم نواز شريف جي جي آمريڪي ياسترا جنهن کي ڪجهه ڌريون ڪامياب ته ڪجهه ڌريون ناڪام قرار ڏئي رهيو آهن، جنهن جي وضاحت ڪجهه هن ريت آهي ته واشنگٽن وائيٽ هائوس ۾ ٿيل پاڪستان جي وزيراعظم نواز شريف ۽ آمريڪي صدر براڪ اوباما ۾ ملاقات دوران آمريڪي صدر پاڪستان سان لاڳاپن ۾ واڌ جي خواهش جو اظهار ڪيو، جڏهن ته ميان نواز شريف خواهش ڏيکاري ته پاڪ – آمريڪا وچ ۾ تاريخي لاڳاپن کي وڌيڪ مضبوط ڪرڻ چاهي ٿو، وزيراعظم نواز شريف پنهنجي وفد سميت واشنگٽن جي بليئر هائوس مان وائيٽ هائوس پهتو، جتي آمريڪي صدر براڪ اوباما ۽ ٻين اعليٰ عملدارن سندس شاندار استقبال ڪيو ٻنهي اڳواڻن خوشگوار ماحول ۾ هڪٻئي سان هٿ ملايو ان موقعي تي ڳالهائيندي آمريڪي صدر براڪ اوباما ميان نواز شريف جي وائيٽ هائوس آمد تي سندس ٿورا مڃيا ۽ چيو ته پاڪستان ۽ آمريڪا ۾ مضبوط لاڳاپا قائم آهن، جن ۾ هو واڌ چاهي ٿو آمريڪي صدر واضح ڪيو ته پاڪ – آمريڪا لاڳاپا رڳو سڪيورٽي تائين محدود ناهن، پاڪستان دهشتگردي خلاف ويڙهه ۾ ڀرپور ڪردار ادا ڪري رهيو آهي صدر براڪ اوباما ان موقعي تي آمريڪا ۾ رهندڙ پاڪستاني ڪميونٽي جي مجموعي ڪردار جي ساراهه پڻ ڪئي ملاقات دوران ڳالهائيندي وزيراعظم نواز شريف،ڀرپور مهمانوازيءَ تي آمريڪي صدر جا ٿورا مڃيا ميان نواز شريف جو چوڻ هو ته پاڪستان ۽ آمريڪا جا لاڳاپا 70 ورهين تي ٻڌل آهن، سندس دوري سان ٻه طرفا لاڳاپا وڌيڪ مضبوط ٿيندا ان کان اڳ وزيراعظم نواز شريف سان نائب آمريڪي صدر جو بائيڊن بليئر هائوس ۾ نيرن تي ملاقات ڪئي ملاقات ۾ ٻه طرفن لاڳاپن سميت مختلف شعبن ۾ سهڪار تي به غور ڪيو ويو ملاقات دوران نائب آمريڪي صدر به دهشتگردي خلاف جنگ ۾ پاڪستان جي ڪردار جي ساراهه ڪئي ۽ سهڪار جاري رکڻ جي خاطري پڻ ڪرائي.

جئين ته پاڪستان جا اهم مسئلا هڪ لائين آف ڪنٽرول تي ڀارتي اڳڀرائي جيڪا وقفي وقفي سان جاري اهي ۽ جنهن جو شڪار سرحد لڳ آباد ڳوٺن جا مقامي ماڻهو بڻجي رهيا آهن، ڪشمير مسئلو پڻ پنهنجي جڳهه تي اهميت رکي ٿو ڇو جو ڀارت ۽ پاڪستان ۾ ڪشمير تڪرار تمام پراڻو ۽ حل طلب رهيو آهي جنهن بابت پاڪستان گڏيل قومن سميت هر فورم تي دانهيو آهي، پاڪستان ۾ جاري رهشتگردي ته به ڳالهيون ٿينديون رهيون آهن، جوهري هٿيارن جا معاملا به پنهنجي جڳهه تي اهميت رکن ٿا، اهڙا ٻيا به مسئلا هن جن جو حل ٿيڻ انتهائي اهم آهي، پاڪ آمرڪي سربراهن جي ملاقات ۾ انهن مسئلن تي ڪو خاص ڌيان ناهي ڏنو ويو البته رسمي بيان بازي ضرور ڪئي آهي جنهن مان واضح ٿئي ٿو ته وزير اعظم صاحب جي آمريڪي ياترا فوٽو سيشن کانسواءِ ڪا فائدي مند ناهي رهي.