تازيون خبرون

Daily Archives: October 26, 2015

جيڪب آباد سانحو: شهيدن جي وارثن کي 20،20 لک امداد ڏيڻ جو اعلان

جيڪب آباد (ڊ ر) شيعا علماءَ ڪائونسل وڏي وزير جي خاطرين بعد جيڪب آباد ۾ شهيدن جا لاش رکي هنيل ڌرڻو ختم ڪري ڇڏيو، وڏي وزير شهيدن جي وارثن لاءِ 20، 20 لک ۽ زخمين کي 10 لک توڙي نوڪري ڏيڻ جو اعلان ڪيو آهي، سانحي جي شهيدن جو انگ وڌي 25 ٿي ويو، جڏهن ته جاچ لاءِ 2 ٽيمون پڻ جوڙيون ويون آهن. شيعا علماءَ ڪائونسل پاران جيڪب آباد سانحي جي شهيدن جا لاش ڊي سي هائوس آڏو رکي ڪيترن ئي ڪلاڪن تائين ڌرڻو هنيو ويو، جنهن ۾ وڏي انگ ۾ عزادارن شرڪت ڪري انصاف لاءِ نعريبازي ڪئي ان موقعي تي وڏي وزير سيد قائم علي شاهه شيعا اڳواڻن کي ڊي سي هائوس طلب ڪري ڳالهيون ڪيون ۽ کين انصاف توڙي سمورا مطالبا منظور ڪرڻ جي خاطري ڪرائي،جنهن بعد ڌرڻو ختم ڪيو ويو ڳالهين بعد بعد ميڊيا سان ڳالهائيندي وڏي وزير سيد قائم علي شاهه جيڪب آباد سانحي جي شهيدن جي وارثن لاءِ 20، 20 لک رپيا ۽ معذور ٿي ويل زخمين کي 10 لک ۽ نوڪري ڏيڻ جو به اعلان ڪيو. سيد قائم علي شاهه واضح ڪيو ته سانحي جو ڪيس شيعا عالمن جي مرضي موجب داخل ڪرائي جاچ ۾ غير ذميواري ثابت ٿيڻ تي ملوث پوليس عملدارن خلاف قانوني ڪارروائي ڪئي ويندي،دهشتگردن کي ڪنهن به ريت نه بخشيو ويندو. ان موقعي تي علامه مقصود ڊومڪي ڳالهائيندي ٻڌايو ته وڏي وزير اليڪشن ڪميشن جي اجازت سان ايس ايس پي ملڪ ظفر اقبال کي هٽائڻ جي خاطري ڪرائي آهي،جنهن بعد هنن ڌرڻو ختم ڪيو هن چتاءُ ڏنو ته ايس ايس پي سميت ٻين عملدارن خلاف ڪارروائي ڪري مطالبا نه مڃيا ويا ته هو ٻيهر ڌرڻو هڻندا. ٻئي طرف جيڪب آباد سانحي ۾ زخمي ٿيل ٻارڙو فوت ٿي ويو، جنهن بعد شهيدن جو انگ وڌي 25 ٿي ويو،جڏهن ته زخمين جو سکر، لاڙڪاڻي ۽ جيڪب آباد جي اسپتالن ۾ علاج هلندڙ آهي، جن مان 14 جي حالت لاڳيتو ڳڻتيءَ جوڳي ٻڌائي پئي وڃي سول اسپتال جيڪب آباد ۾ زخمين کي علاج جي سهولتن جي فراهمي ۾ غفلت تي ايم ايس الطاف وڳڻ کي هٽايو ويو آهي هوڏانهن واقعي جِي جاچ لاءِ سنڌ پوليس ۽ فرانزڪ ڊويزن تي ٻڌل 2 ڌار ڌار ٽيمون جوڙي ايڊيشنل آءِ جي سي ٽي ڊي ثناءُ الله عباسي ۽ ڊي آءِ جي لاڙڪاڻو سائين رکئي ميراڻي کي سربراهه مقرر ڪيو ويو آهي سنڌ پوليس پاران جوڙيل جاچ ٽيم ۾ جيڪب آباد، شڪارپور ۽ لاڙڪاڻي جا ايس ايس پيز توڙي ايس ايس پي اسپيشل برانچ شامل آهن، جڏهن ته فيڪٽ اينڊ فائينڊنگ ڪميٽي جي ميمبرن کي ڳجهو رکيو ويو آهي فرانزڪ ڊويزن آف سنڌ ۽ پوليس پاران جوڙيل ٽيمون جيڪب آباد ۾ ٿيل آپگهاتي ڌماڪي جا سبب ۽ ماتمي جلوس جي سڪيورٽي ۾ ٿيل ڪوتاهين جو جائزو وٺنديون. ٻئي ڪميٽيون، واقعي جي جاچ مڪمل ڪري رپورٽ آءِ جي سنڌ کي پيش ڪنديون

 

پوري ملڪ ۾ يوم عاشور عقيدت ۽ احترام سان ملهايو ويو، ڪربلا جي شهيدن کي لڙڪن سان ڀيٽا پيش

ڪراچي (نمائندن وٽان) حضرت امام حسين رضه الله تعاليٰ عنهه ۽ سندس جانثار ساٿين جي عظيم شهادت جي ڏهاڙي تي سندن لازوال قربانيءَ کي ڀرپور ڀيٽا پيش ڪئي وئي، 10 محرم الحرام تي سنڌ جي ننڍن وڏن شهرن سميت سڄي ملڪ ۾ ماتمي جلوس منزلن تي پهچي نهر ٿي ويا، شام غريبان جون مجلسون جاري، سيڪيورٽي جا غير معمولي انتظام، هزارين اهلڪارن کي مقرر ڪيو ويو امام حسين رضه ۽ سندس ساٿين جي عظيم قربانيءَ کي ڀيٽا پيش ڪرڻ لاءِ سنڌ جي راڄڌاني ڪراچيءَ ۾ 10 محرم جو مرڪزي ماتمي جلوس سخت سڪيورٽي هيٺ روايتي رستن تان ٿيندو امام بارگاهه حسينيان ايرانيان کارادر پهچي پرامن نموني نهر ٿي ويو،جنهن بعد شام غريبان پڙهي وئي،ماتمي جلوس جي هوائي نگراني به ڪئي وئي. سنڌ جي راڄڌاني واري شهر ڪراچيءَ ۾ عاشوري جو مرڪزي جلوس نشتر پارڪ ۾ مجلس عزا منعقد ڪرڻ بعد برآمد ڪيو ويو،جنهن ۾ وڏي انگ ۾ عزادارن شرڪت ڪئي مرڪزي جلوس نمائش چورنگي،ايم جناح روڊ، سي بريز ۽ ريگل چوڪ سميت ٻين روايتي رستن تان ٿيندو،تبت سينٽر وٽ پهتو،جتي ظهرين جي نماز ادا ڪئي وئي. نماز جي ادائيگي بعد جيڪب آباد سانحي خلاف علامتي ڌرڻو هڻي نعريبازي پڻ ڪئي وئي، جڏهن ته عزادارن ڇرين،زنجيرن ۽ گرزن سان به ماتم ڪيو. مرڪزي جلوس انکانپوءِ ريڊيو پاڪستان،بولٽن مارڪيٽ ۽ لائيٽ هائوس کان ٿيندو شام ڌاري امام بارگاه حـُسينيا ايرانيان کارا در پهچي پرامن نموني نـِهر ٿي ويو،جنهن بعد شام غريبان پڙهي وئي عاشوري جي ماتمي جلوس ۾ ٻارن ۽ عورتن جو وڏو انگ به شريڪ هو،جن جو سڪيورٽي خدشن باوجود حوصلو ڏسڻ وٽان هو. ڪراچي ۾ مرڪزي جلوس جي سڪيورٽي لاءِ غير معمولي انتظام ڪندي پوليس ۽ رينجرز جا 15 هزار کان وڌيڪ جوان مقرر ڪيا ويا جلوس جي روڊن رستن وٽ گهڻ ماڙ عمارتن تي پڻ ماهر نشاني بازن کي الرٽ رکيو ويو ۽ تلاشي بعد عزادارن کي ماتمي جلوس ۾ داخل ٿيڻ جي اجازت ڏني وئي،جڏهن ته بم ڊسپوزل اسڪواڊ،پيري ڪتن ۽ بارود کي ناڪارا بڻائيندڙ روبوٽس جي مدد سان جلوس جي رستن جي تلاشي ۽ سوئيپنگ به ڪئي وئي ڪراچيءَ ۾ عاشوري جي مرڪزي جلوس جي هيليڪاپٽر ذريعي فضائي نگراني پڻ ڪئي وئي. حيدرآباد ڊويزن جي سمورن ننڍن وڏن شهرن ۾ عاشوري جا ماتمي جلوس برآمد ڪري آخري نبيءَ جي ڏوهٽي امام حسين رضي الله تعاليٰ عنهه ۽ ساٿين جي عظيم قربانيءَ کي ڀيٽا پيش ڪئي وئي،جڏهن ته سڪيورٽي جا غير معمولي انتظام ڪندي هزارين اهلڪارن کي مقرر ڪيو ويو هو. 10 محرم الحرام جي موقعي تي ميرپورخاص ۽ شهيد بينظير آباد ڊويزن جي ننڍن وڏن شهرن ۾ به حضرت امام حسين ۽ سندس ساٿين جي عظيم قربانيءَ کي ڀيٽا پيش ڪرڻ لاءِ ماتمي جلوس برآمد ڪري مجلسون منعقد ڪيون ويون، جڏهن ته سڪيورٽيءَ جا انتظام انتهائي سخت ڪيا ويا هئا. اسلام جو مان مٿانهون ڪرڻ لاءِ ڪربلا جي ميدان ۾ سر گهوريندڙ امام حسين رضه ۽ سندس ساٿين جي عظيم قربانيءَ کي لاڙڪاڻي ڊويزن جي سمورن شهرن ۽ ڳوٺن ۾ به ڀيٽا پيش ڪئي وئي، جڏهن ته ماتمي جلوسن ۽ مجلسن جي سڪيورٽي لاءِ انتهائي سخت انتظام ڪيا ويا هئا. ڪربلا جي شهيدن کي ڀيٽا پيش ڪرڻ لاءِ سکر ڊويزن جي سمورن ننڍن وڏن شهرن توڙي ڳوٺن مان به سخت سڪيورٽي هيٺ ماتمي جلوس برآمد ڪري عزاداري ڪئي وئي، جلوسن ۾ عورتن ۽ ٻارن بنه وڏي انگ ۾ شرڪت ڪئي. اسلام جو مان مٿانهون ڪرڻ لاءِ ڪربلا جي ميدان ۾ سر گهوريندڙ امام حسين رضه ۽ سندس ساٿين جي عظيم قربانيءَ کي لاڙڪاڻي ڊويزن جي سمورن شهرن ۽ ڳوٺن ۾ به ڀيٽا پيش ڪئي وئي، جڏهن ته ماتمي جلوسن ۽ مجلسن جي سڪيورٽي لاءِ انتهائي سخت انتظام ڪيا ويا هئا. لاڙڪاڻي شهر ۾ عاشوري جو مرڪزي ماتمي جلوس سيد بهادر حسين شاهه امام بارگاهه مان برآمد ٿيو،جيڪو روايتي رستن تان ٿيندو سج لٿي بعد پاڪستان چوڪ وٽ پهچي نهر ٿي ويو. ‎جلوس ۾ شامل عزادارن مڇي مارڪيٽ ۽ ٻين هنڌن تي زنجيرن ۽ ڇرين سان ماتم ڪيو نئين ديري،رتيديري، ڏوڪري، باڊهه، موهن جو دڙو، باقراڻي ۽ خيرمحمد آريجا سميت ٻين شهرن مان به علم پاڪ، تعزين ۽ ذوالجناح جا جلوس برآمد ڪيا ويا. قمبر ۾ 10 محرم جو مرڪزي جلوس پنهنجي روايتي رستن تان ٿيندو منزل تي پهچي ويو،جنهن ۾ شامل هزارين عزادار زنجيرن ۽ ڇرين سان ماتم ڪندا رهيا، جڏهن ته نوحا خواني به ڪئي وئي. شهدادڪوٽ،قبي سعيد خان، نصير آباد، ميروخان، وارهه، سجاول جوڻيجي،بهرام، عرضي ڀـُٽي، گاجي کهاوڙ ۽ لالورائنڪ ۾به سخت سڪيورٽي هيٺ ماتمي جلوسن جا قافلا پرامن نموني پڄاڻيءَ تي پهچي ويا. وڳڻ ويجهو ڳوٺ ٿرڙي هاشم ۾ 10 محرم جو مرڪزي ماتمي جلوس صبح 10 وڳي برآمد ٿيو،جيڪو مختلف رستن تان ٿيندو پر امن نموني منزل تي پهچڻ بعد نهر ٿيو. شڪارپور شهر ۾ عاشوري جو مرڪزي جلوس ۾ امام بارگاهه جهنگل شاهه،پنج پير،شاهه حسين ۽ قادر پير سميت ٻيا پڙ به شامل ٿيا، مرڪزي جلوس جو قافلو روايتي رستن تان ٿيندو منزل تي پهتو،جڏهن ته عزادار مختلف هنڌن تي زنجيرن ۽ گرزن سان ماتم ڪندا رهيا. لکي غلام شاهه، مديجي، چڪ، خانپور، ڳڙهي ياسين، سلطان ڪوٽ ۽ ڊکڻ جي امام بارگاهن مان عاشوري جا ماتمي جلوس ڪڍيا ويا . جيڪب آباد ۾ ماتمي جلوس تي آپگهاتي حملي بعد سڪيورٽي خدشن سبب عاشوري جو جلوس برآمد نه ٿي سگهيو،جڏهن ته عزادارن فوج جي سڪيورٽي فراهم ڪرڻ جو مطالبو ڪيو. ڳڙهي خيري ۽ ٺل جي مختلف امام بارگاهن مان ماتمي جلوس ڪڍيا ويا،جڏهن ته سڪيورٽي سخت ڪئي وئي ڪشمور – ڪنڌڪوٽ ضلعي ۾ هر سال جيان هن سال به ننڍن توڙي وڏن شهرن مان ماتمي جلوس برآمد ڪيا ويا. ڪنڌڪوٽ، ڪشمور، غوثپور، تنگواڻي، بخشاپور، بڊاڻي ۽ گڊو سميت ٻين شهرن مان ڪڍيل ماتمي جلوس روايتي رستن تان ‎گذرڻ بعد پنهنجي منزلن تي پهتا. لاڙڪاڻي ڊويزن جي سمورن ننڍن وڏن شهرن ۾ ماتمي جلوسن ۽ مجلسن سڪيورٽي لاءِ جا غير معمولي انتظام ڪندي رينجرز ۽ پوليس جا وڏي انگ ۾ اهلڪار مقرر ڪيا ويا، جڏهن ته ماتمي جلوسن ۾ عورتن توڙي ٻارن به وڏي انگ ۾ شرڪت ڪئي

 

مخدوم امين فهيم جي حالت ڳڻتي جوڳي، پاڪستان منتقل ڪرڻ جون تياريون

دبئي (مانيٽرنگ ڊيسڪ) پاڪستان پيپلز پارٽي جي مرڪزي اڳواڻ مخدوم امين فهيم جي حالت خراب ٿيڻ تي کيس پاڪستان منتقل ڪرڻ جون تياريون ڪيون پيون وڃن. ايئر ايموبلنس جي ذريعي 24 کان 48 ڪلاڪن اندر کيس پاڪستان منتقل ڪرڻ جو امڪان آهي. مخدوم امين فهيم ڪينسر جو مريض آهي ۽ ان جو لنڊن مان علاج ڪرايو پيو وڃي. امين فهيم جي علاج جا چار مرحلا مڪمل ٿي چڪا آهن ۽ علاج جا وڌيڪ ٻه مرحلا رهيل آهن. ڊاڪٽرن امين فهيم کي وڌيڪ علاج لاءِ توانائي بحال ڪرڻ لاءِ آرام جو مشورو ڏنو هو آرام لاءِ امين فهيم دبئي ۾ رهيل آهي جتي سندس حالت ناساز ٿيڻ تي کيس پاڪستان منتقل ٿيڻ جون تياريون ٿي رهيون آهن ذريعن مطابق امين فهيم کي سندس خواهش تي ڏيهه واپس آندو پيو وڃي.

 

ڀارت پاڪستان ۾ ٿيندڙ دهشتگردي ۾ ملوث آهي، ٺوس ثبوت آمريڪا حوالي ڪيا آهن: سرتاج عزيز

واشنگٽن (اي پي پي) وزير اعظم جي پرڏيهي معاملن بابت صلاحڪار سرتاج عزيز چيو آهي ته ڀارت پاڪستان ۾ ٿيندڙ دهشتگردي ۾ ملوث آهي جنهن جا ٺوس ثبوت آمريڪي اختيارين حوالي ڪيا آهن. اميد آهي ته عالمي برادري ڀارتي مداخلت تي هاڪاري قدم کڻندي.آمريڪا ڪشمير کي مسئلو نه پر تڪرار قرار ڏنو آهي جيڪو ڀارت لاءِ واضح اشارو آهي.اهڙو اظهار هن واشنگٽن ۾ هڪ پريس ڪانفرنس ڪندي ڪيو. هن چيو ته آمريڪا تسليم ڪيو آهي ته خطي ۾ امن لاءِ ڪشمير مسئلي جو حل انتهائي ضروري آهي. مجموعي طور تي وزير اعظم محمد نواز شريف جو آمريڪي دورو ڪامياب رهيو. وزير اعظم محمد نواز شريف ۽ آمريڪي صدر بارڪ اوباماسمورن شعبن ۾ سهڪار وڌائڻ تي اتفاق ڪيو آهي جيڪو سٺوسنئوڻ آهي. پرڏيهي وزير چيو ته گذريل 2 سالن ۾ پاڪستان جي آمريڪا سان ناتن ۾ بهتري آئي آهي. گذريل 2 سالن ۾ معطل ورڪنگ گروپس جا اجلاس به ٿيا آهن. دنيا اهو به تسليم ڪيو آهي ته پاڪستان جو ڪمانڊ اينڊ ڪنٽرول نظام مضبوط آهي. هن چيو ته پاڪستان جا ايٽمي هٿيار محفوظ آهن ۽ انهن جي فول پروف هجڻ جو آمريڪا به تسليم ڪيو آهي.پاڪستان دهشتگردي خلاف جامع قدم کنيا آهن جڏهن ته ملڪ ۾ وڌندڙ دهشتگردي کي به روڪيو آهي. اهو ئي سبب آهي جو پاڪستان ۾ دهشتگردي جي واقعن ۾ گذريل سال جي ڀيٽ ۾ 70 سيڪڙو گهٽتائي آئي آهي. سرتاج عزيز چيو ته پاڪستان خطي ۾ امن جو خواهشمند آهي ۽ پنهنجي سرزمين کي ڪنهن به ملڪ خلاف استعمال ٿيڻ نه ڏيندو. پاڪستان دهشتگردي ۽ انتها پسندي کي پاڙ کان ختم ڪرڻ لاءِ آپريشن ضرب عضب شروع ڪيو جنهن سان دهشتگردن جي صلاحيت ختم ٿي وئي آهي. ڪامياب آپريشن ضرب عضب جي سڄي دنيا واکاڻ ڪئي آهي. نواز – اوباما گڏيل پڌرنامو ان جو واضح ثبوت آهي. هن چيو ته سڄي ملڪ ۾ اڄ به نيشنل ايڪشن پلانتحت ڪارروائيون جاري آهن جڏهن ته پاڪستان جي هڪ لک 90 هزار فوج قبائلي علائقن ۾ مقرر آهي.آمريڪي دوري دوران اسان کي سڀ کان وڌيڪ ڳڻتي ڀارت بابت هئي ڇاڪاڻ ته ڀارت لائين آف ڪنٽڙول ۽ ورڪنگ بائونڊري تي لڳاتار ڀڃڪڙيون ڪري رهيو آهي. ان کان علاوه ڀارت جي پاڪستان ۾ مداخلت تي به اسان کي ڳڻتي آهي جنهن جي متعلق آمريڪي اختيارين کي آگاهه ڪيو آهي. آمريڪا کي ٻڌايو آهي ته ڀارت پاڪستان ۾ دهشتگردي ۾ ملوث آهي جنهن جا ٺوث ثبوت آمريڪا حوالي ڪيا آهن. هاڻي اميد آهي ته عالمي برادري ڀارتي مداخلت تي هاڪاري قدم کڻڻدي. ڪشمير جي حوالي سان پڻ ڳالهه ٻولهه ٿي آهي. سرتاج عزيز چيو ته ڪشمير جي حوالي سان پاڪستاني موقف کي ڀرپور انداز ۾ پيش ڪيو ويو جنهن تي آمريڪا تسليم ڪيو آهي ته خطي ۾ امن لاءِ ڪشمير مسئلي جو حل ضروري آهي. آمريڪا ڪشمير کي مسئلو نه پر تڪرار قرار قرار ڏنو آهي. آمريڪا طرفان ڪشمير کي تڪراري چوڻ ڀارت لاءِ واضح اشارو آهي. آمريڪا ڀارت سان ڪشمير سميت سمورن معاملن جي حل تي پڻ زور ڀريو آهي. هن چيو ته ڀارت شملا معاهدي جي پاسداري ناهي ڪري رهيو ۽ ورڪنگ بائونڊري ۽ لائين آف ڪنٽرول تي لڳاتار ڀڃڪڙيون ڪري رهيو آهي، پاڪستان ايل او سي تي ڀارتي جارحيت جو هاڻي به ڀرپور جواب ڏئي رهيو آهي، افغانستان ۾ مفاهمتي عمل جي حوالي سان پڇيل سوال جي جواب ۾ هن چيو ته پاڪستان ماضيءَ ۾ به افغان مفاهمتي عمل ۾ هاڪاري ڪردار ادا ڪيو آهي، جنهن جي آمريڪا به تعريف ڪئي آهي، پاڪستان افغانستان ۾ مفاهمتي عمل جي حوالي سان آئنده به هاڪاري ڪردار جاري رکندو، ڇاڪاڻ ته افغانستان ۾ پاڪستان ۽ آمريڪا جو گڏيل حدف آهي، پاڪستان آمريڪا کي ٻڌايو آهي ته افغانستان ۾ امن لاءِ ڳالهين جي واٽ اپنائڻي پوندي ۽ افغانستان ۾ امن ڳالهين سان ئي ممڪن آهي، ماضيءَ ۾ پاڪستان افغان اختيارين ۽ طالبان وچ ۾ ڳالهين لاءِ گهڻيون ڪوششون ڪيون پر ملا عمر جي موت جي خبر سان افغان مذاڪراتي عمل ثبوتاز ٿيو، هاڻي افغانستان ۾ ڳالهيون ٻيهر شروع ڪرائڻ جو عمل آسان ناهي پر ناممڪن به نه آهي، هڪ ٻئي سوال جي جواب ۾ پرڏيهي صلاحڪار جو چوڻ هو ته پاڪستان جا ايٽمي هٿيار پوري ريت محفوظ آهن، هڪ ٻئي سوال جي جواب ۾ هن چيو ته آمريڪي مارڪيٽ تائين رسائي جي حوالي سان آمريڪي اختيارين سان ڳاليهون ٿيون آهن، جنهن جو مقصد واپاري ناتن ۾ اضافو آهي، هن چيو ته توانائي بحران جي خاتمي لاءِ به آمريڪا سان 3 هزار ميگاواٽ جي رٿائن تي ڳالهه ٻولهه ٿي آهي، جڏهن ته آمريڪا پاڪستان ۾ جاري توانائي رٿائن ۾ به سهڪار ڪندو.

 

دهشتگردي ايتري قدر وڌي چڪي آهي جو ان کي روڪڻ ڏکيو آهي: ناصر شاهه

جيڪب آباد (اين اين آءِ) سنڌ جي بلديات جي وزير سيد ناصر حسين شاهه چيو آهي ته دهشتگردي ايتري قدر وڌي چڪي آهي جو ان کي روڪڻ ڏاڍو ڏکيو آهي جيڪب آباد ڌماڪي جي زخمين جي عيادت جي موقعي تي ميڊيا سان ڳالهائيندي هن چيو ته پيپلز پارٽي جي حڪومت محرم دوران تخريبڪاري کي روڪڻ جي ڀرپور ڪوشش ڪئي جڏهن ته دهشتگردي ايتري قدر وڌي چڪي آهي جو ان کي ٻنجو ڏيڻ ڏاڍو ڏکيو آهي هن چيو ته جيڪب آباد ۾ ٿيل ڌماڪو آپگهاتي هيو ۽ هن واقعي ۾ جيڪي ماڻهو شهيد ٿيا اهي سڀ اسان جا پنهنجا آهن ڌماڪي جي ذميوارن جي خلاف سخت ڪارروائي ڪئي ويندي. هن چيو ته سنڌ حڪومت ۽ پيپلز پارٽي جلوسن کي بهترين سڪيورٽي ڏني، مظاهرين اڃا تائين ڪو به مطالبو ناهي ڪيو ۽ انهن جا جيڪي مطالبا هوندا مڃيا ويندا.

 

اوٿل: ٽريفڪ حادثا، 7 ڄڻا فوت، 15زخمي، 5 جي حالت نازڪ

اوٿل (اين اين آءِ) مڪران ڪوسٽل هاءِ وي تي ٻن ٽريڪ حادثن ۾ 7 ڄڻا فوت، 15 زخمي، زخمين مان پنجن جي حالت ڳڻتي جوڳي. تفصيل مطابق آچر ڏينهن تربت کان ڪراچي ويندڙ بلوچستان مسافر ڪوچ بلوچستان جي ضلعي لسٻيلا جي صدر مقام اوٿل کان 140 ڪلوميٽر پري مڪران ڪوسٽل هاءِ وي تي بزي ٽاپ جي هنڌ وٽ بريڪ فيل ٿيڻ سبب اونهي کڏ ۾ وڃي ڪري جنهن سبب ڪوچ ۾ ويٺل 4 مسافر ٿڏي تي ئي فوت ٿي ويا، جڏهن ته 14 مسافر زخمي ٿي پيا، ان حادثي جي جهٽ کانپوءِ هڪ مال کڻندڙ ٽرڪ انهيءَ هنڌ تي اونهي کڏ ۾ وڃي ڪري جنهن سبب ٽرڪ ڊرائيور غلام فاروق، مهراڻ ۽ واحد ٿڏي تي ئي فوت ٿي ويا جڏهن ته حفيظ الله زخمي ٿي پيو.

 

بلوچستان جي مختلف علائقن ۾ تيز برستات، کنوڻ ڪرڻ سبب 5 ڄڻا اجل جو شڪار

ڪوئيٽا (اي پي پي) بلوچستان جي مختلف علائقن ۾ گذريل رات تيز برسات سبب آسماني بجلي ڪرڻ جي نتيجي ۾ 5 ماڻهو اجل جو شڪار جڏهن ته 4 زخمي ٿي پيا آهن، پوليس ۽ اسپتال ذريعن موجب گذريل رات تيز برسات سبب آسماني بجلي ڪرڻ جا واقعا پيش آيا آهن، جنهن ۾ بلوچستان جي ضلعي هرنائي جي علائقي وام تنگي ۾ هڪ گهر تي آسماني بجلي ڪرڻ سبب 3 ٻارڙا اجل جو شڪار جڏهن ته 3 زخمي ٿي پيا آهن، جڏهن ته ٻيو واقعو لورالائي جي علائقي وڪي ۾ پيش آيو، جنهن ۾ آسماني بجلي ڪرڻ جي نتيجي ۾ 2 ماڻهو اجل جو شڪار ٿي ويا، جڏهن ته هڪ زخمي ٿي پيو، مقامي ماڻهن موجب آسماني بجلي ڪرڻ جي نتيجي ۾ ٻن گهرن کي باهه لڳي وئي ۽ ماڻهو پنهنجي زندگي بچائڻ لاءِ گهرن کان ٻاهر نڪري آيا، اسپتال ذريعن موجب زخمين جي حالت ڳڻتي جوڳي ٻڌائي وئي آهي،جن جو اڌ جسم سڙي ويو آهي، جن کي ڪوئيٽا اسپتال منتقل ڪيو ويو آهي.

 

جي يو آءِ (ف) سربراهه مولانا فضل الرحمان ۽ جماعت اسلامي امير سراج الحق ۾ ملاقات

اسلام آباد (اي پي پي) پاڪستان جي مستقبل جو داروماد پاڪ چين اقتصادي لنگهه منصوبي جي مڪمل ٿيڻ تي آهي، ان رٿا سان ملڪ جي پوئتي پيل علائقن ۾ خوشحالي ايندي، سموريون سياسي پارٽيون، جماعتي مفادن کان مٿانهون ٿي عوام جي خدمت ڪن، پارلياماني ڪميٽي اقتصادي لنگهه منصوبي تي اڳڀرائي جي نگراني ڪري رهي آهي. اهڙو اظهار جماعت اسلامي جي امير سراج الحق ۽ جي يو آءِ (ف) جي سربراه مولانا فضل الرحمان ملاقات کان پو3 صحافين سان ڳالهائيندي ڪيو. جماعت اسلامي امير سراج الحق يقين ظاهر ڪيو ته منصوبي جي اولهندي حصي کي معاهدي مطابق مڪمل ڪيو ويندو. هن چيو ته اسان ان اهم رٿا کي تڪراري نه ٿا بڻائڻ چاهيون ڇو ته ان سان ملڪ جي پٺتي پيل علائقن ۾ خوشحالي ايندي. سراج الحق سمورين سياسي پارٽين تي زور ڀريو ته هو پارٽي مفادن کان مٿانهون ٿي وام جي خدمت ڪن. ان موقعي تي جي يو آءِ (ف) جي سربراهه مولانا فضل الرحمان چيو ته هڪ پارلياماني ڪميٽي پاڪ چين اقتصادي لنگهه منصوبي تي اڳڀرائي جي نگراني ڪري رهي آهي هن چيو ته عارضي طور تي بي گهر ٿيندڙ ماڻهن جي مڪمل بحالي لاءِ فوري قدم کڻڻ گهرجن.

 

جيڪب آباد ۾ ڌماڪي کانپوءِ ايس ايس پي ۽ ڊي سي خلاف ڪارروائي نه ٿيڻ خلاف شيعا تنظيمن ڊي سي چوڪ تي ٻيهر ڌرڻو شروع

جيڪب آباد (ڊ ر) جيڪب آباد ۾ ڌماڪي کانپوءِ ايس ايس پي ۽ ڊي سي خلاف ڪارروائي نه ٿيڻ خلاف شيعا تنظيمن ڊي سي چوڪ تي ٻيهر ڌرڻو شروع ڪري ڇڏيو آهي، چيمبر آف ڪامرس جي سڏ تي شهر ۾ شٽربند هڙتال ڪئي وئي. شيعا تنظيمن گذريل ڏينهن وڏي وزير قائم علي شاهه سان ڳالهين ۾ ايس ايس پي ۽ ڊپٽي ڪمشنر خلاف فوري طور تي ڪارروائي جو مطالبو ڪيو هو، جن خلاف ڪارروائي لاءِ وڏي وزير شيعا اڳواڻن کي خاطري ڪرائي هئي. ڊپٽي ڪمشنر ۽ ايس ايس پي خلاف ڪارروائي نه ٿيڻ کانپوءِ شيعا تنظيمن طرفان فتح علي جعفري جي اڳواڻي ۾ ڊي سي چوڪ تي تعزيتي ميڙاڪي کانپوءِ ٻيهر ڌرڻو هنيو ويو آهي، جنهن ۾ شهرين سميت مختلف سياسي سماجي تنظيمن جا اڳواڻ ۽ ڪارڪن شامل آهن. هوڏانهن جيڪب آباد ۾ ماتمي جلوس دوران ٿيل آپگهاتي بم ڌماڪي ۾ شهيد ٿي ويل ٻن ٻارڙن 12 ورهين جي علي رضا مغل ڪوئيٽا روڊ ۽ 10 ورهين جي اويس پنهور جي اسٽيشن روڊ تي جنازي نماز ادا ڪئي وئي، جنهن ۾ شهر جي سياسي سماجي ڌرين سميت وڏي انگ ۾ ماڻهن شرڪت ڪئي. ٻئي پاسي، چيمبر آف ڪامرس جي سڏ تي شهر ۾ شٽربند هڙتال ڪئي وئي آهي، ڪاروباري مرڪز بند آهن، جڏهن ته ٽرئفڪ پڻ معمول کان گهٽ آهي. هوڏانهن، سانحي ۾ شهيد ٿي ويلن جي وارثن سان تعزيت جو سلسلو جاري آهي، جتي پ پ اڳواڻ اعجاز جکراڻي، قومپرست اڳواڻ رياض چانڊيو ۽ ٻين پهچي شهيدن جي وارثن سان تعزيت ڪئي

 

جيڪب آباد ڌماڪي جا 11 زخمي سي 130 ذريعي ڪراچي منتقل

ڪراچي (اي پي پي) چيف آف ايئر اسٽاف جي هدايتن تي پاڪ فضائيه جي ٽيم جيڪب آباد بم ڌماڪي جي متاثرن جي سار سنڀار ۽ زخمين کي طبي امداد فراهم ڪئي، آچر ڏينهن جاري ڪيل پڌرائي موجب مجموعي طور 32 زخمين کي پي اي ايف اسپتال شهباز آندو ويو هو، جن کي ضروري طبي امداد مهيا ڪئي وئي، پڌرائي موجب 11 سخت زخمين کي فضائيه جي سي -130 جهاز ذريعي ڪراچي منتقل ڪيو ويو.