تازيون خبرون

Daily Archives: October 23, 2015

اوباما-نواز ملاقات، پاڪ-آمريڪا ٻه طرفا لاڳاپا وڌائڻ تي اتفاق

واشنگٽن(م.ڊ) وزيراعظم نواز شريف ۽ آمريڪي صدر براڪ اوباما ۾ وائيٽ هائوس ۾ اهم ملاقات ٿي آهي، ملاقات دوران آمريڪي صدر پاڪستان سان لاڳاپن ۾ واڌ جي خواهش جو اظهار ڪيو، جڏهن ته ميان نواز شريف جو چوڻ آهي ته هو پاڪ – آمريڪا وچ ۾ تاريخي لاڳاپن کي وڌيڪ مضبوط ڪرڻ چاهي ٿو. وزيراعظم نواز شريف پنهنجي وفد سميت واشنگٽن جي بليئر هائوس مان وائيٽ هائوس پهتو، جتي آمريڪي صدر براڪ اوباما ۽ ٻين اعليٰ عملدارن سندس شاندار استقبال ڪيو ٻنهي اڳواڻن خوشگوار ماحول ۾ هڪٻئي سان هٿ ملايو ان موقعي تي ڳالهائيندي آمريڪي صدر براڪ اوباما ميان نواز شريف جي وائيٽ هائوس آمد تي سندس ٿورا مڃيا ۽ چيو ته پاڪستان ۽ آمريڪا ۾ مضبوط لاڳاپا قائم آهن، جن ۾ هو واڌ چاهي ٿو آمريڪي صدر واضح ڪيو ته پاڪ – آمريڪا لاڳاپا رڳو سڪيورٽي تائين محدود ناهن، پاڪستان دهشتگردي خلاف ويڙهه ۾ ڀرپور ڪردار ادا ڪري رهيو آهي صدر براڪ اوباما ان موقعي تي آمريڪا ۾ رهندڙ پاڪستاني ڪميونٽي جي مجموعي ڪردار جي ساراهه پڻ ڪئي ملاقات دوران ڳالهائيندي وزيراعظم نواز شريف،ڀرپور مهمانوازيءَ تي آمريڪي صدر جا ٿورا مڃيا ميان نواز شريف جو چوڻ هو ته پاڪستان ۽ آمريڪا جا لاڳاپا 70 ورهين تي ٻڌل آهن، سندس دوري سان ٻه طرفا لاڳاپا وڌيڪ مضبوط ٿيندا ان کان اڳ وزيراعظم نواز شريف سان نائب آمريڪي صدر جو بائيڊن بليئر هائوس ۾ نيرن تي ملاقات ڪئي ملاقات ۾ ٻه طرفن لاڳاپن سميت مختلف شعبن ۾ سهڪار تي به غور ڪيو ويو ملاقات دوران نائب آمريڪي صدر به دهشتگردي خلاف جنگ ۾ پاڪستان جي ڪردار جي ساراهه ڪئي ۽ سهڪار جاري رکڻ جي خاطري پڻ ڪرائي ان موقعي تي پرڏيهي سيڪريٽري اعزاز چوڌري،آمريڪا ۾ پاڪستان جو سفير جليل عباس جيلاني ۽ ٻيا پڻ موجود هئا.

 

بلوچستان جي علائقي نصيرآباد جي امام بارگاهه ۾ ڌماڪو، 10 ڄڻا شهيد

نصيرآباد(نمائندو) بولان جي علائقي نصيرآباد ۾ امام بارگاهه ۾ ڌماڪي ۾ 10 ڄڻا شهيد ۽ ڪيترائي زخمي ٿي پيا آهن. بلوچستان جي ضلع بولان جي علائقي نصيراباد ۾ ڊاڊر جي ڇلگري امام بارگاهه ۾ ڌماڪو ٿيو جنهن ۾ 10 ڄڻا شهيد ۽ ڪيترائي زخمي ٿي پيا. صوبائي گهرو وزير سرفرفرا بگٽي موجب ڌماڪي ۾ 10 ڄڻا مارجي ويا آهن جڏهن ته زخمين کي فوري طبي امداد لاءِ ڀرپاسي جي اسپتال منتقل ڪيو ويو آهي. ڌماڪو امام بارگاهه جي دروازي جي ڀرسان ٿيو جتي ڪجهه دير کانپوءِ مجلس ٿيڻي هئي، پوليس ۽ قانون لاڳو ڪندڙ ادارن علائقي جو گهيرو ڪري جانچ شرع ڪري ڇڏي آهي جڏهن ته بم ڊسپوزل اسڪواڊ کي به علائي ۾ طلب ڪيو ويو آهي. پوليس ڌماڪو آپگهاتي هئڻ جو شڪ ظاهر ڪيو آهي پر بم ڊسپوزل اسڪواڊ جانچ کانپوءِ ئي ڌماڪي جي نوعيت جو اندازو لڳائي سگهندي. صوبائي گهرو کاتي پاران محرم الحرام ۾ بولان، لورالائي ۽ سبي کي حساس قرار ڏنو ويو جنهن کانپوءِ هتي ستين محرم الحرام جو جلوس به برآمد نه ٿي سگهيو هو.

 

پاڪستان عالمي برادري سان گڏجي خطي ۾ امن عمل لاءِ ڪردار ادا ڪري رهيو آهي: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد چيو آهي ته پاڪستان عالمي برادري سان گڏجي خطي ۾ امن  عمل لاءِ ڪردار ادا ڪري رهيو آهي، اندروني معاملن ۾ مداخلت برداشت نه ڪئي ويندي. اسلام آباد مان جاري ڪيل بيان ۾ پرويز رشيد چيو ته پاڪستان ڊگهي عرصي کان دهشتگردي خلاف جنگ ۾ رڌل آهي، پر موجوده حڪومت ۾ گهڻيون ڪاميابيون ملي رهيون آهن. هن چيو ته ڀارتي مداخلت بابت وزير اعظم نواز شريف امريڪا سميت گڏيل قومن کي ثبوت پيش ڪري ڇڏيا آهن، امن عمل ۾ رنڊڪ برداشت نه ڪئي ويندي. سندس چوڻ هو ته حڪومت ملڪ مان دهشتگردي جي خاتمي لاءِ ڏينهن رات ڪوششون ڪري رهي آهي، جلد ڌرتي تان دشمن جو خاتمو ڪيو ويندو. وفاقي وزير چيو ته آپريشن ضرب عضب ڪاميابي سان جاري آهي، قوم جي سهڪار سان پاڪستان کي پرامن ملڪ بڻايو ويندو. پرويز رشيد وڌيڪ چيو ته حڪومت ترقياتي منصوبن ۽ دهشتگردي خلاف جاري آپريشن بابت عوام کي اعتماد ۾ ورتو آهي، مخالفن جي تنقيد تي ڌيان ڏيڻ جي ضرورت ناهي.

 

وادي تيره ۾ هوائي ڪارروائي، 21 دهشتگرد مارجي ويا، ٺڪاڻا تباهه

خيبرايجنسي (مانيٽرنگ ڊيسڪ) خيبر ايجنسي جَي وادي تيره ۾ فورسز جي هوائي ڪارروائي جي نتيجي ۾ 21دهشتگرد مارجي ويا ۽ 5 کان وڌيڪ ٿاڪ تباهه ٿي ويا آهن. پاڪ-افغان بارڊر ويجهو وادي تيره ۽ راجگال وارن علائقن ۾ سڪيورٽي فورسز جيٽ جهازن ذريعي دهشتگردن جي ٺڪاڻن تي بمباري ڪئي. آءِ ايس پي آر موجب، سڪيورٽي فورسز جي بمباري ۾ 21دهشتگرد مارجي ويا آهن. آءِ ايس پي آر جو چوڻ آهي ته فورسز دهشتگردن جي ٺڪاڻن کي نشانو بڻايو، جنهن دوران پنج ٿاڪ تباهه به ٿي ويا آهن. واضح رهي ته سڪيورٽي فورسز کي دهشتگردي خلاف آپريشن ۾ وڏيون ڪاميابيون ملي رهيون آهن.

 

ادارا ڪم نه ڪندا ته نقصان عوام جو ٿيندو: چيف جسٽس

ڪراچي (اسٽاف رپورٽر) سپريم ڪورٽ ٿر ۾ 100 ٻارن جي فوت ٿيڻ واري ڪيس ۾ صحت کاتي جي رپورٽ تي اعتماد جو اظهار ڪندي ڪيس اڪلائي ڇڏيو آهي، چيف جسٽس،جسٽس انور ظهير جمالي رمارڪس ڏيندي چيو آهي ته ادارا ڪم نه ڪندا ته نقصان عوام جو ٿيندو، نوٽيس وٺڻ تي چيو ويندو آهي ته عدالت اداري خلاف آهي پر اهو تاثر غلط آهي. سپريم ڪورٽ ڪراچي رجسٽري ۾ چيف جسٽس انور ظهير جمالي جي سربراهي ۾ بئنچ ٿر ۾ 100 ٻارڙن جي فوت ٿيڻ واري پاڻمرادي نوٽيس تي ٻڌڻي ڪئي. صحت کاتي جي اسپيشل سيڪريٽري رپورٽ پيش ڪندي چيو ته مٺي ۽ ٿر جون ٻيون اسپتالون پي پي ايڇ آءِ جي انتظام هيٺ ڪم ڪري رهيون آهن، جتي ڊاڪٽر ۽ دوائون موجود آهن. رپورٽ ۾ چيو ويو آهي ته ٿر جي مختلف اسپتالن ۾ ماهر ڊاڪٽرن جي کوٽ آهي ۽ ٻين اسپتالن مان مريضن  کي مٺي اسپتال آڻي اتي آپريشن ڪيا ويندا آهن. رپورٽ ۾ اهو به چيو ويو آهي ته ٿر جي اسپتالن ۾ ليڊيز ڊاڪٽرز جي کوٽ آهي. رپورٽ ۾ چيو ويو آهي ته ڏيپلو تعلقي اسپتال دل، سرجيڪل،ٻارن، دماغ ۽ ٻين بيمارين جا ماهر ڊاڪٽر ناهن، جنهن تي عدالت اسپشل سيڪريٽري کي چيو ته توهان جي رپورٽ مان لڳي ٿو ٿر ۾ سڀ ڪجهه ٺيڪ ٿي ويو آهي. چيف جسٽس انور ظهير جمالي رمارڪس ڏيندي چيو ته ته ادارا ڪم نه ڪندا ته نقصان عوام جو ٿيندو، نوٽيس وٺڻ تي چيو ويندو آهي ته عدالت اداري خلاف آهي پر اهو تاثر غلط آهي. عدالت صحت کاتي جي رپورٽ تي اعتماد جو اظهار ڪندي ڪيس اڪلائي ڇڏيو آهي.

 

بلوچستان مان احساس محرومي ختم ڪري بنيادي سهوليتون ڏنيون وڃن: بلاول ڀٽو

ڪراچي(اسٽاف رپورٽر) پاڪستان پيپلزارٽي جي چيئرمين بلاول ڀٽو زرداري وفاقي توڙي بلوچستان حڪومت تي زور ڏيندي چيو آهي ته بلوچستان صوبي مان احساس محرومي ختم ڪري صوبي جي ماڻهن کي بنيادي سهوليتون مهيا ڪري ڏنيون وڃن، بلاول ڀٽو زرداري اهڙو اظهار اڄ بلاول هائوس ۾ گوادر مان پ پ جي ٽڪيٽ هولڊر اعجاز بلوچ سان ملاقات دوران ڪيو. اعجاز بلوچ پ پ چيئرمين کي ٻڌايو ته گوادرجا رهواسي ٽن مهينن کان پيئڻ جي پاڻي جي شديد کوٽ کي منهن ڏئي رهيا آهن، عوام جي احتجاج ۽ مظاهرن باوجود انتظاميا حرڪت ۾ اچڻ لاءِ تيار ناهي، هن اها به شڪايت ڪئي ته تازو گوادر ۾ سئي گئس جو پلانٽ لڳايو ويو آهي پر صرف من پسند ماڻهن کي گئس جي سهوليت ڏني وئي آهي جڏهن ته غريب ماڻهو۽مقامي مُهاڻا انهي سهوليت کان محروم آهن، بلاول ڀٽو زرداري چيو ته صوبي ۾ بنيادي سهوليتن جي حوالي سان اهڙي ناانصافي ۽ مت ڀيد کي برداشت نه ڪبو ۽ پارٽي اهڙي عمل تي خاموش نه ويهندي، بلاول ڀٽو زرداري وڌيڪ چيو ته شهيد محترمه بينظير ڀٽو1988ع ۾ وزارت عظميٰ دوران گوادر لڳ اڪرا ڪور ڊيم اڏڻ جو حڪم ڏنو هو ۽ پوءِ پيپلزپارٽي جي ٻئي دور ۾ 1995ع ۾ گوادر جي عوام کي پيئڻ جي پاڻي جي فراهمي لاءِ اهو ڊيم مڪمل ڪيو ويو، پ پ پ چيئرمين وفاقي ۽ بلوچستان جي صوبائي حڪومتن تي زور ڀريو آهي ته گوادر۾ ڪنهن وڏي انساني سانحي کان بچڻ لاءِ پاڻي جي کوٽ جي خاتمي تي ڌيان ڏنو وڃي ڇاڪاڻ ته  ارڙهين ترميم تحت مقامي ماڻهن کي پنهنجي وسيلن جو مالڪ باڻيو ويو آهي، بلاول ڀٽو زرداري، اعجاز بلوچ کي خاطري ڪرائي ته هو جلد بلوچستان جي ڪارڪنن سان ملاقاتون ڪندو پارٽي مامرن جي به جاچ ڪندو.

 

2012-13 ۾ تعليم کاتي ۽ مڪاني ادارن ۾ اضافي ڀرتيون ٿيون، ذميوار ڪامورا آهن: نثار کهڙو

لاڙڪاڻو (اي پي پي) سڌ جي اطلاعات ۽ تعليم کاتن واري سينيئر صوبائي وزير نثار احمد کهڙي چيو آهي ته ڪراچي آپريشن جي حوالي سان ايم ڪيو ايم جي خدشن کي ختم ڪرڻ لاءِ ٺاهيل ڪاميٽي ۾ ايم ڪيو ايم جي سينيٽر فروغ نسيم کي شامل ڪرڻ سان ڪاميٽي غير جانبدار نه رهي، اهو ڪيئن ممڪن ٿي سگهي ٿو ته ٽن ججن ۽ هڪ وفاقي گهرو سيڪريٽري سان گڏ ايم ڪيو ايم جو نمائندو خدشا بيان ڪري سگهي. هن چيو ته آپريشن سنڌ ۾ ٿي رهيو آهي پر ڪاميٽي ۾ سنڌ حڪومت جي ڪنهن به نمائندي کي شامل نه ڪيو ويو آهي. هن الزام هنيو ته هڪ پاسي نيشنل ايڪشن پلان تي عمل ڪيو پيو وڃي ته ٻئي طرف اهڙيون ڪاميٽيون ٺاهي نيشنل ايڪشن پلان کي سواليه بڻايو پيو وڃي. اهڙن خيالن جو اظهار هن ڪالهه لاڙڪاڻو پريس ڪلب ۾ حليم واري نياز ۾ شرڪت ڪرڻ وقت ميڊيا جي نمائندن سان ڳالهائيندي ڪيو. هن چيو ته 2012ع ۽ 2013ع ۾ نه رڳو تعليم کاتي پر مڪاني ادارن جي کاتي ۾ به اضافي ڀرتيون ڪيون ويون جنهن جا ذميوار ڪامورا آهن. ان حوالي سان پيرمظهر الحق کي ذميوار قرار ڏيڻ غلط آهي، ڀرتين جي آرڊرن تي آفيسر صحيحون ڪندا آهن جڏهن ته کاتن جا وزير صرف پاليسيون جوڙيندا آهن. هن چيو ته تعليم کاتي ۾ اضافي ڀرتيون ڪرڻ جي ذميوار 12 آفيسرن خلاف ڪاروائي ڪندي انهن کي معطل ڪيو ويو ۽ جڏهن کين برطرف ڪرڻ واري ڪاروائي طرف وياسين ته هو عدالت مان اسٽي وٺي آيا. هن چيو ته تعليم کاتي جي بهتر ڪارڪردگي سبب تعليمي معيار ۾ اضافو اچي رهيو آهي. جڏهن ته سنڌ ۾ پهرين درجي کان ڏهين ڪلاس تائين تعليم پرائيندڙ شاگردن ۽ شاگردياڻين جو گذريل سال انگ 39 لک هو جنهن ۾ هن سال تائين 9 لکن جي اضافي سان اهو تعداد 48 لکن تي پهچي ويو آهي. هڪ سوال جي جواب ۾ چيو ته اهو چوڻ غلط آهي ته اڳوڻو ايم اين اي نبيل گبول پيپلز پارٽي ڇڏي نئين پارٽي ٺاهي رهيو آهي پر هو اهو قدم ايم ڪيو ايم ڇڏڻ کان پوءِ ڪري رهيو آهي. جڏهن ته ٻئي طرف ڊاڪٽر ذوالفقار مرزا ۽ ارباب غلام رحيم گڏجي نئين پارٽي ٺاهڻ جي تياري ڪري رهيا آهن جن کي مبارڪون ڏيان ٿو. هن چيو ته پاڪستان مڙني ترقي يافته ملڪن سان آزاد واپار ڪرڻ جي خواهش رکي ٿو جنهن لاءِ ڏسڻو اهو آهي ته وزيراعظم جي هاڻوڪي آمريڪا واري دوري جا ڪهڙا نتيجا نڪرن ٿا، آمريڪا جي صدر پاڪستان جي دهشتگردي خلاف ڪردار جي تعريف ڪئي آهي ۽ آمريڪا پاڪستان ۽ ڀارت جي لاڳاپن بابت به ڪردار ادا ڪندو رهيو آهي جنهن سان اسان واپار ۽ ايڪسپورٽ لاءِ ڳالهيون ڪري سگهون ٿا.

 

ٽڊاپ اسڪينڊل جي 9 ڪيسن ۾ مخدوم امين فهيم جا ٻيهر گرفتاري وارنٽ جاري

ڪراچي (اسٽاف رپورٽر) وفاقي اينٽي ڪرپشن ڪورٽ ٽڊاپ اسڪينڊل جَي 9 ڪيسن ۾ مخدوم امين فهيم جا هڪ ڀيرو ٻيهر ضمانت نه ٿيڻ جوڳا وارنٽ جاري ڪري اڳوڻي وزيراعظم يوسف رضا گيلاني سميت سمورن جوابدارن جي ضمانت ۾ واڌ بابت فيصلو محفوظ ڪري ورتو،جيڪو 19 نومبر تي ٻـُڌايو ويندو. اڳوڻي وزيراعظم سيد يوسف رضا گيلاني،پي پي پارليامينٽريز جي صدر مخدوم امين فهيم ۽ ٻين خلاف ٽڊاپ اسڪينڊل جي 9 ڪيسن جي وفاقي اينٽي ڪرپشن ڪورٽ ۾ ٻڌڻي ٿي. ٻڌڻيءَ دوران يوسف رضا گيلاني ۽ پي ايم هائوس جو اڳوڻو ڊپٽي سيڪريٽري محمد زبير پيش ٿيو، جڏهن ته مخدوم امين فهيم پرڏيهه ۾ هجڻ ڪري اڄ به عدالت ۾ پيش نه ٿي سگهيو. پي ايم هائوس جي اڳوڻي ڊپٽي سيڪريٽري محمد زبير عدالت ۾ موقف اختيار ڪيو ته ايف آءِ اي دٻاءُ وجهي کانئس مرضي جو بيان ورتو. ان موقعي تي سرڪاري وڪيل موقف اختيار ڪيو ته ٽڊاپ اسڪينڊل جي جاچ پي پي دور ۾ شروع ٿي هئي،انڪري پيپلزپارٽي کي سياسي انتقام جو نشانو بڻائڻ وارو تاثر درست ناهي. يوسف رضا گيلاني جي وڪيل فاروق ايڇ نائيڪ عدالت ۾ دليل ڏيندي چيو ته اڳوڻي وزيراعظم خلاف داخل 21 ئي ڪيسن ۾ ساڳيا الزام لڳايا ويا آهن،اهو سياسي انتقام ناهي ته ٻيو ڇا آهي؟ فاروق ايڇ نائيڪ چيو ته عدالتن کي سياسي مقصدن لاءِ استعمال ڪرڻ بدران مضبوط ڪيو وڃي،ڇاڪاڻ ته ادارن جي مضبوطي سان جمهوريت مضبوط ٿيندي. فاروق ايڇ نائيڪ جا دليل مڪمل ٿيڻ بعد عدالت مخدوم امين فهيم جا هڪ ڀيرو ٻيهر ضمانت نه ٿيڻ جوڳا گرفتاري وارنٽ جاري ڪري يوسف رضا گيلاني سميت سمورن جوابدارن جي ضمانت ۾ واڌ بابت فيصلو محفوظ ڪري ورتو، جنهن بعد ٻڌڻي 19 نومبر تائين ملتوي ڪئي وئي. ٻڌڻي بعد ميڊيا سان ڳالهائيندي اڳوڻي وزير اعظم يوسف رضا گيلاني چيو ته هن پنهنجو موقف عدالت آڏو پيش ڪري ڇڏيو، ان سلسلي وڌيڪ نه ڳالهائيندو. يوسف رضا گيلاني چيو ته سندن خلاف چورن کي شاهد طور پيش ڪيو ويو،جيڪا ناانصافي آهي پر ائين ڪرڻ سان ڪو به وزيراعظم ڪارروائي کان بچي نه سگهندو. هـُن چيو ته ڪوبه وزيراعظم اڪيلي سر ڪجهه به نٿو ڪري سگهي،پراڻن الزامن تي نوان ڪيس داخل ڪرڻ جو سلسلو بند ڪيو وڃي.

 

ڪراچي ۾ 9 ۽ 10 محرم الحرام دوران ٽن عالمن، 13 امام بارگاهن ۽ هڪ جلوس تي حملي جو خدشو

ڪراچي (اسٽاف رپورٽر) ڳجهن ادارن،9 ۽ 10 محرم الحرام دوران ڪراچي ۾ ٽن عالمن، 13 امام بارگاهن ۽ هڪ جلوس تي حملي جو خدشو ڏيکاريندَي رپورٽ اعليٰ اختيارين حوالي ڪري ڇڏي. ڳجهن ادارن پاران وفاقي توڙي سنڌ جي گهرو کاتن کي اماڻيل رپورٽ ۾ آگاهه ڪيو ويو آهي ته 9 ۽ 10 محرم الحرام دوران ڪراچي ۾ دهشتگرد حملا ٿي سگهن ٿا. رپورٽ موجب،دهشتگرد ڄاڻايل ڏينهن تي 3 ناليوارن عالمن، 13 امام بارگاهن ۽ هڪ جلوس کي نشانو بڻائي سگهن ٿا. ڳجهن ادارن جي رپورٽ ۾ اهو پڻ چيو ويو آهي ته ڪراچي ۾ دهشتگرد حملن جي ڄاڻ گرفتار ڪيل دهشتگردن وٽان ملي آهي. رپورٽ موجب، گرفتار دهشتگردن انڪشاف ڪيو آهي ته آصف ڇوٽو گروپ ڪراچي ۾ حملن لاءِ 3 گروپ جوڙيا آهن، جن مان هڪ جي ڪمانڊ هو پاڻ سنڀاليندو. ڳجهن ادارن جي رپورٽ ۾ وڌيڪ چيو ويو آهي ته عالمن تي حملن جو ٽاسڪ برمي گروپ ۽ 11 امام بارگاهن تي حملن جو ٽاسڪ ٽئين گروپ کي ڏنو ويو آهي. رپورٽ موجب، ڪورنگي جون 2 ۽ اورنگي جي هڪ امام بارگاهه توڙي هڪ ماتمي جلوس آصف ڇوٽو جو هدف آهي. ياد رهي ته دهشتگرد آصف ڇوٽو جو نالو ريڊ لسٽ ۾ 17هين نمبر تي موجود آهي.

 

ڪراچي ۾ 8 محرم الحرام جو ماتمي جلوس نشتر پارڪ مان برآمد، يا حسين جون صدائون، سيڪيورٽي انتهائي سخت

ڪراچي (اسٽاف رپورٽر) ڪراچيءَ ۾ اَٺين محرم الحرام جو مرڪزي ماتمي جلوس کارادر جي علائقي ۾ حسينيان ايرانيان امام بارگاهه پهچي ويو ، انتظاميا پاران سڪيورٽي جا غير معمولي انتظام ڪندي جلوس جي گــُذر گاهن ۾ ايندڙ مختلف رستن ۽ دڪانن کي ڪنٽينرز لڳائي سيل ڪيو ويو، جڏهن ته وڏي انگ ۾ اهلڪار پڻ مقرر ڪيا. ڪراچيءَ ۾ 8 محرم الحرام جو مرڪزي ماتمي جلوس نشترپارڪ کان ياحسين ياحسين جي صدائن سان برآمد ٿيو، جنهن ۾ وڏي انگ ۾ عزادار شريڪ ٿيا. مرڪزي ماتمي جلوس ايم اي جناح روڊ، بولٽن مارڪيٽ ۽ ٻين روايتي رستن کان ٿيندو لياري جي علائقي کارادر پهچي ويو. پوليس سڪيورٽي پلان موجب 8 محرم الحرام جي مرڪزي ماتمي جلوس جي گــُذر گاهن جا سمورا رستا بند ڪري مارڪيٽن ۽ دڪانن کي سيل ڪيو ويو. جلوس جي سڪيورٽي لاءِ پوليس ۽ رينجرز جا وڏي انگ ۾ اهلڪار مقرر ڪيا ويا. هوڏانهن ٽريفڪ پوليس ڪراچي جي شهرين کي ايم اي جناح روڊ بدران متبادل رستو اختيار ڪرڻ جي هدايت ڪئي. ٽريفڪ پوليس اختيارين موجب محرم الحرام جي مرڪزي جلوسن لاءِ ايم اي جناح روڊ ٽن ڏينهن لاءِ عام ٽريفڪ لاءِ بند ڪيا ويا. شهرين کي ايڪسپريس وي،سولجر بازار، ڪوريڊور ٿري ۽ شاهراهه فيصل استعمال ڪرڻ جي هدايت ڪئي وئي.