تازيون خبرون

Daily Archives: October 22, 2015

نواز شريف-جان ڪيري ملاقات، وزير اعظم ڀارتي اڳرائي جا ثبوت آمريڪا حوالي ڪري ڇڏيا

واشنگٽن (مانيٽرنگ ڊيسڪ) پاڪستان ۽ آمريڪا دهشتگردي خلاف جنگ ۽ سماجي اقتصادي شعبن ۾ تعاون وڌيڪ وڌائڻ تي اتفاق ڪيو آهي ۽ آمريڪي پرڏيهي وزير جان ڪيري يقين ڏياريو آهي ته آمريڪا پاڪستان جي توانائي جي ضرورتن سميت ٻين شعبن ۾ تعاون جاري رکندو، آپريشن ضرب عضب جون ڪاميابيون واکاڻ جوڳيون آهن، آمريڪا گڏيل مقصد حاصل ڪرڻ لاءِ پاڪستان سان گڏ ڪم ڪندو رهندو، پاڪستان جو افغانستان ۾ امن ۽ مفاهمت جي حوالي سان ڪردار اهم آهي، وزيراعظم محمد نواز شريف اهو عزم ورجايو آهي ته پاڪستان جي زمين تان دهشتگردي ختم ڪئي ويندي، پاڪستان ڀارت سان لاڳاپا معلوم تي آڻڻ چاهي ٿو ۽ خطي ۾ امن جو خواهشمند آهي ۽ پاڪستان ڀارت جي ملڪ ۾ دهشتگردي جي واقعن ۾ ملوث هئڻ بابت ثبوت به آمريڪا حوالي ڪيا ويا آهن، ملاقات کانپوءِ جاري ڪيل بيان مطابق جان ڪيري اربع تي پرڏيهي عملدارن سان گڏ بليئر هائوس ۾ نواز شريف سان ملاقات ڪئي، ڪافي سالن کان جاري ڊگهي ۽ خوشگوار لاڳاپن جو ذڪر ڪندي ٻنهي اڳواڻن پارٽنرشپ جي حوالي سان تازن واقعن جو جائزو ورتو ۽ گڏيل دلچسپي جي معاملن تي اعليٰ سطحي رابطا جاري رکڻ تي زور ڀريو، وزيراعظم جان ڪيري کي پنهنجي حڪومت جي خاص ڪاميابين بابت ٻڌايو ته هو تازو ٻن سالن ۾ حاصل ٿيون آهن، انهن ۾ معيشت ۽ اندروني سلامتي جي معاملن کي خاص اهميت هئي، جان ڪيري وزيراعظم کي يقين ڏياريو ته پاڪستان جي توانائي جي ضرورتن سميت ٻين شعبن ۾ آمريڪا تعاون ڪندو رهندو، ٻنهي اڳواڻن خطي ۾ امن ۽ سلامتي جي صورتحال تي غور ڪيو ۽ ان ڳالهه تي اتفاق ڪيو ته دهشتگردي علائقائي ۽ عالمي سلامتي لاءِ چيلينج آهي ۽ ان چيلينج جو ڀرپور مقابلو ڪرڻ جو عزم ورجايو، وزيراعطم جان ڪيري کي ٻڌايو ته آپريشن ضرب عضب ۽ قومي ايڪشن پلان جا گهربل نتيجا مليا آهن ۽ اندورني سلامتي جي صورتحال بهتر ٿيڻ سان گڏ پاڪستان مان دهشتگردي جي لعنت ختم ٿي رهي آهي، ان موقعي تي اهو به ٻڌايو ويو ته تازو هفتن دوران پاڪستان دهشتگردي جي واقعن ۾ غير معمولي ڪمي ٿي آهي، آمريڪي پرڏيهه وزير آپريشن ضرب عضب مان مليل اهم ڪاميابين جي واکاڻ ڪئي جنهن ذريعي سرحدي علائقن ۾ دهشتگرد تنظيمن جو خاتمو آندو ويو آهي، علائقي ۾ امن کي هٿي ڏيڻ لاءِ وزيراعظم جي عزم کي ساراهيندي جان ڪيري ان عزم کي ورجايو ته آمريڪا گڏيل مقصد حاصل ڪرڻ لاءِ پاڪستان گڏ ڪم ڪندو، هن چيو ته افغانستان ۾ استحڪام لاءِ مفاهمتي عمل کي اڳيان وڌائڻ ۾ پاڪستان جو ڪردار اهم آهي، ان موقعي تي اتفاق ڪيو ويو ته علائقائي ملڪن وچ ۾ رابطا وڌايا وڃن ته بين الاقوامي کي پيش ايندڙ خطرن کي منهن ڏئي سگهجي. ملاقات دوران خميس تي وزيراعظم نواز شريف جي آمريڪي صدر براڪ اوبامان سان ٿيندڙ ملاقات جي اينجڊا کي آخري شڪل ڏني وئي، ملاقات ۾ اسحاق ڊار، چوڌري نثار خان، سرتاج عزيز طارق فاطمي، اعزاز احمد چوڌري ۽ آمريڪا ۾ پاڪستان جو سفير جليل عباس جيلاني شامل هئا.

 

پاڪستان ۽ ڀارت ۾ ڇڪتاڻ جو اهم سبب ڪشمير تڪرار آهي: نواز شريف

واشنگٽن (مانيٽرنگ ڊيسڪ) وزيراعظم نواز شريف چيو آهي ته پاڪستان ۽ ڀارت ۾ ڇڪتاڻ جو اهم سبب ڪشمير تڪرار آهي،جيڪو حل ٿيڻ تائين ٻنهي ملڪن ۾ لاڳاپا بهتر نٿا ٿي سگهن، سندن حڪومت سمورا مسئلا حل ڪرڻ لاءِ پاڻ پتوڙي رهي آهي، 2018ع محفوظ پاڪستان قوم حوالي ڪيو ويندو. واشنگٽن ۾ پاڪستاني سفارتخاني ۾ ڪوٺايل تقريب دوران پاڪستاني ڪميونٽي کي خطاب ڪندي وزيراعظم نواز شريف چيو ته پاڪستان ۽ ڀارت وچ ۾ ڇڪتاڻ جو اهم سبب ڪشمير مسئلو آهي. هـُن واضح ڪيو ته ڪشمير مسئلي جي حل تائين پاڪستان ۽ ڀارت وچ ۾ لاڳاپا بهتر نٿا ٿي سگهن، نئين دهلي، اسلام آباد جي امن وارين ڪوششن جي مثبت موٽ ناهي ڏني. وزيراعظم چيو ته 2013ع ۾ نون ليگ جي اقتدار سنڀالڻ وقت ملڪ جون حالتون انتهائي خراب هيون، جن کي بهتر ڪرڻ لاءِ بنا دير آپريشن ضرب عضب شروع ڪيو ويو. ميان نواز شريف چيو ته فاٽا، بلوچستان ۽ ڪراچي ۾ دهشتگردن خلاف شروع ڪيل آپريشن ڪاميابي سان جاري آهي،جيڪو مڪمل امن ٿيڻ تائين ختم نه ڪيو ويندو. هن چيو ته سنڌ جي راڄڌني ڪراچي ۾ امن قائم ڪرائڻ وارو نون ليگ سرڪار جو مشن ڪامياب ٿي رهيو آهي، شهر جون حالتون هاڻي گهڻي حد تائين بهتر ٿي چڪيون آهن. وزيراعظم نواز شريف چيو ته ملڪ مان ڪرپشن جي خاتمي لاءِ به ڪارروايون جاري آهن، حڪومت توانائي بحران جي حل لاءِ به ڪوششون وٺي رهي آهي، جلد لوڊشيڊنگ جو مسئلو به حل ٿي ويندو. ميان نواز شريف آمريڪي دوري دوران اڄ پرڏيهي وزير جان ڪيري سان ملاقات ڪندو، جڏهن ته صدر براڪ اوباما سان سندس ملاقات سڀاڻي رٿيل آهي. وزيراعظم ميان نواز شريف آمريڪي نائب صدر جوبائيڊن ۽ ڪابينا جي ٻين ميمبرن سان پڻ ملاقاتون ڪندو. ان کان اڳ وزيراعظم ميان نواز شريف گذريل رات لنڊن کان واشنگٽن پهتو ته اينڊريوز ايئرپورٽ تي سندس ريڊ ڪارپيٽ تي شاندار استقبال ڪيو ويو. آمريڪا ۾ مقرر پاڪستاني سفير جليل عباس جيلاني، گڏيل قومن ۾ پاڪستان جي مستقل نمائنده مليحه لوڌي ۽ پاڪستان ۾ مقرر آمريڪي سفير سميت آمريڪي پرڏيهي کاتي جي اختيارين ۽ پروٽوڪول آفيسرن وزيراعظم جي آجيان ڪئي. ان موقعي تي وزيراعظم ميان نواز شريف کي آمريڪي فوج سلامي پڻ پيش ڪئي، جڏهن ته دوري دوران خاتون اول ڪلثوم نواز ۽ مريم نواز پڻ ميان نواز شريف سان گڏ آهن.

 

حڪومتي ادارن جي ڪارڪردگي مايوس ڪندڙ آهي:چيف جسٽس

اسلام آباد (بيورو) چيف جسٽس انور ظهير جمالي ريمارڪس ڏنا آهن ته حڪومتي ادارن جي ڪارڪردگي مايوس ڪندڙ آهي، دنيا ايندڙ 50 سالن جي منصوبابندي ڪري رهي آهي ۽ اسان موجوده مسئلا حل نه پيا ڪري سگهون، شهر ۾ ڪير به اڃايل نٿو مري، سڀ پئسن عيوض پاڻي خريد ڪري رهيا آهن. سپريم ڪورٽ جي چيف جسٽس انور ظهير جمالي تي ٻڌل ٽه رڪني بئنچ ڪراچي ۾ غير قانوني هائيڊرينٽس ۽ پاڻي بحران خلاف درخواست تي ٻڌڻي ڪئي. ايم ڊي واٽر بورڊ چيو ته آءِ ڊي پيز لاءِ بدين ۽ نوابشاهه تائين ٽينڪرز اماڻيا ويندا آهن، آءِ ڊي پيز لاءِ اماڻيل پاڻي جي ٽينڪرز تي 32 ڪروڙ رپين جون رهتون آهن. چيف جسٽس انور ظهير جمالي ريمارڪس ڏنا ته دنيا ايندڙ 50 سالن جي منصوابندي ڪري رهي آهي ۽ اسان موجوده مسئلن کي حل نه پيا ڪري سگهون. چيف جسٽس چيو ته ايم ڊي واٽر بورڊ چئي ٿو ته ڊفينس ۾ پاڻيءَ جي کوٽ آهي، جيڪڏهن پاڻيءَ جي کوٽ آهي ته پوءِ وڏي تعداد ۾ ٽينڪرز پاڻي ڪٿان کڻي اچن ٿا؟ چيف جسٽس انور ظهير جمالي ريمارڪس ڏنا ته شهر اندر ڪير به اڃايل نه مري رهيو آهي، پاڻي خريد ڪري پي رهيا آهن، حڪومتي ادارن جي ڪارڪردگي مايوس ڪندڙ آهي. جسٽس مقبول باقر ريمارڪس ڏيندي چيو ته ڄاڻون ٿا ته ٽينڪرز جا 80 سيڪڙو بل جعلي آهن، پهريان متاثرن کي اماڻيل ٽينڪرز جي تصديق ڪئي وڃي ۽ پوءِ ادائگيون ڪيون وڃن. جسٽس امير هاني مسلم پڇاڻو ڪيو ته ڇا ٻڌائي سگهو ٿا ته واٽر بورڊ آءِ ڊي پيز تائين پهتا آهن يا نه؟ جنهن تي ايم ڊي واٽر بورڊ عدالت ۾ پيش ٿي ٻڌايو ته واٽر ٽينڪر آءِ ڊي پيز تائين پاڻي پهچڻ يا نه پهچڻ بابت ڄاڻ ناهي، واٽر ٽينڪرز سنڌ سرڪار جي حڪم تي اماڻيا وڃن ٿا. عدالت غير قانوني هائيڊرينٽس خلاف ڪارروائي نه ٿيڻ ۽ پاڻي بحران بابت چيف سيڪريٽري ۽ ٻين لاڳاپيل عملدارن کان 10 ڏينهن اندر رپورٽ طلب ڪري ورتي.

 

ڪرپشن الزام: ارباب عالمگير ۽ پير مظهر سميت 5 ڄڻن خلاف جاچ جي منظوري

اسلام آباد(بيورو) قومي احتساب بيورو (نيب) مبينا طور تي اربين رپين جي ڪرپشن جي الزامن تي مواصلات واري اڳوڻي وفاقي وزير ڊاڪٽر ارباب عالمگير ۽ قومي اسيمبلي جي اڳوڻي ميمبر عاصمه ارباب، سنڌ جي تعليم واري اڳوڻي وزير پير مظهر الحق، بلوچستان جي اڳوڻي ايڪسائز ۽ ٽيڪسيشن واري وزير محمد امين عمراڻي، اڳوڻي صوبائي وزير ۽ ڪوئيٽا ڊولپمنٽ اٿارٽي جي چيئرمين محمد اسماعيل گجر ۽ پي آي آر سي جي چيئرمين ڊاڪٽر افتخار احمد خلاف جاچ جڏهن ته پيپڪو جي اڳوڻي ايم ڊي طاهر بشارت چيمه سميت ٻين خلاف جاچ ۽ سنڌ جي اڳوڻي عشر ۽ زڪوات واري وزير دوست محمد، نوشهرو فريروز سان تعلق رکندڙ ايم پي اي ڊاڪٽر عبدالستار راڄپر، پنجاب يونيورسٽي جي اختيارين، خوراڪ ۽ تحقيق واري وزارت جي آفيسرن ۽ اڳوڻي ڊي جي سول ايويئيشن ايئر ڪموڊور (ر) محمد جنيد امين ۽ ٻين خلاف شڪايت جي جاچ پڙتال جو فيصلو ڪيو آهي.  نيب جي ايگزيڪيوٽو بورڊ جو اجلاس نيب هيڊ ڪوارٽر اسلام آباد ۾ ٿيو. نيب جي چيئرمين قمر زمان چوڌري اجلاس جي صدارت ڪئي. نيب جي ايگزيڪيوٽو بورڊ تعليم واري اڳوڻي وزير پير مظهر الحق ۽ ٻين خلاف جاچ جي منظوري ڏني. جوابدارن تي تعليم کاتي سنڌ ۾ 13 هزار استاسن کي غير قانوني طريقي سان ڀرتي ڪري قومي خزاني کي 4 کان 6 ارب رپين جو نقصان پهچائڻ جو الزام آهي. نيب  جي بورڊ ناجائز ذريعن مان ملڪيتون ٺاهڻ تي مواصلات واري اڳوڻي وفاقي وزير ڊاڪٽر ارباب عالمگير خان ۽ قومي اسيمبلي جي اڳوڻي ميمبر عاصمه ارباب، سنڌ جي تعليم واري اڳوڻي وزير پير مظهر الحق، بلوچستان جي اڳوڻي ايڪسائز ۽ ٽيڪسيشن واري وزير محمد امين عمراڻي، اڳوڻي صوبائي وزير ۽ ڪوئيٽا ڊولپمنٽ اٿارٽي جي چيئرمين محمد اسماعيل گجر خلاف جاچ جي منظوري ڏئي ڇڏي جڏهن ته اختيارين جي ناجائز استعمال ۽ فنڊ ڦٻائڻ ذريعي قومي خزاني کي نقصان پهچائڻ تي  پي آي آر سي جي چيئرمين ڊاڪٽر افتخار احمد خلاف جاچ جو فيصلو ڪيو. اجلاس ۾ سو ايويئيشن اٿارٽي جي اڳوڻي ڊي جي ايئر ڪموڊور (ر) محمد جنيد امين، اڳُني ڊپٽي ڊي جي سي اي اي ايئر وائيس مارشل (ر) ساجد حبيب، اڳوڻي ڊائريڪٽر ٽيڪنيڪل سي اي اي ايئر ڪموڊور (ر) جاويد خان ۽ ايئر ڪموڊور (ر) خالد علاءُ الدين خان ۽ ٻين خلاف ٻيهر جاچ جي منظوري ڏني وئي. اجلاس ۾ پيپڪو جي اڳوڻي ايم ڊي طاهر بشارت چيمه ۽ اڳوڻي چيف ايگزيڪيوٽو آفيسر گيپڪو ابراهيم مجوڪه خلاف جاچ  جي به منظوري ڏني وئي. جوابدارن  اختيار اورانگهيندي غير قانوني طريقي سان مجاز آفيسر ڀرتي ڪيا.

 

روس، افغانستان ۽ وچ ايشيائي رياستن جي سفيرن جو خطي ۾ امن استحڪام ۽ خوشحالي لاءِ پاڪستان جي ساراهه

اسلام آباد (اين اين آءِ) روس، افغانستان ۽ وچ ايشيائي رياستن جي سفيرن خطي ۾ امن ۽ استحڪام ۽ خوشحالي لاءِ پاڪستان جي ڪوششن جي واکاڻ ڪندي چيو ته پاڪ چين اقتصادي راهداري پوري خطي جي ملڪن لاءِ فائديمند ثابت ٿيندي جڏهن ته صدر ممنون حسين چيو ته پاڪ چين اقتصادي راهداري خطي جي سمورن ملڪن کي هڪٻئي جي وڌيڪ ويجهو ڪري ڇڏيندي ۽ معاشي ترقي جا نوان رستا کلي ويندا پاڪستان هر قسم جي دهشتگردي جي خلاف آهي ۽ ان جي خاتمي لاءِ آپريشن ضرب عضب جي ذريعي دهشتگردن جي مڪمل خاتمي لاءِ سرگرم عمل آهي هي آپريشن آخري دهشتگردن جي خاتمي تائين جاري رهندو سينٽرل ايشيا ۽ ڪامن ويلٿ آف انڊيپينڊنٽ اسٽيٽس جي سفيرن اربع تي صدر سان ملاقات ڪئي ۽ ان سان گڏيل دلچسپي جا معاملا ۽ خطي جي تازي صورتحال تي خيالن جي ڏي وٺ ڪئي پاڪستان جي صدر چيو ته پاڪستان حڪومت ۽ عوام پوري خطي سان تجارتي ثقافتي ۽ عوام وچ ۾ لاڳاپا وڌائڻ چاهي ٿي. ان سلسلي ۾ جامع حڪمت عملي تيار ڪئي ويئي آهي ۽ واسطيدار حڪومتن سان گڏجي عملي قدم کنيا پيا وڃن صدر چيو ته پاڪ چين اقتصادي راهداري جي نتيجي ۾ خطي جي سمورن ملڪن وچ ۾ اقتصادي رابطا وڌندا ۽ ترقي جا نوان رستا کلندا. صدر سان ملاقات ڪندڙن ۾ قذاقستان، آزار بائيجان يوڪرين تاجڪستان افغانستان روس بيلا روس ڪرغزستان ازبڪستان ۽ ترمڪانستان جا سفير شامل هئا.

 

رڳو پيپلزپارٽيءَ جي احتساب جا خطرناڪ نتيجا نڪرندا: آصف زرداري

دبئي (مانيٽرنگ ڊيسڪ) پيپلزپارٽي جي ڪو چيئرمين آصف علي زرداري جو چوڻ آهي ته پاڪستان ۾ هاڻي رڳو پيپلزپارٽيءَ جو ئي احتساب ٿيندو جنهن جا خطرناڪ نتيجا نڪرندا. آصف علي زرداري پ پ اڳواڻن خلاف نيب جي جانچ جي منظوري تي سخت ردعمل جو اظهار ڪندي چيو آهي ته نيب پنهنجون آفيسون بند ڪري پيپلزپارٽي سيڪريٽريٽ ئي منتقل ٿي وڃي ته بهتر آهي ڇو ته اُن اڄ پيپلزپارٽي جي اڳواڻن خلاف فيصلو ڏئي اسانجي ڳالهين تي مهر لڳائي ڇڏي آهي ۽ ون پارٽي احتساب جو هڪ ٻيو باب شروع ڪيو ويو آهي. آصف علي زرداري جو چوڻ هو ته هن ملڪ ۾ احتساب رڳو پيپلزپارٽيءَ جو ٿيندو ڇو ته باق4ي سڀ نيب جي اختيارن کان ٻاهر آهن ۽ اُن جا خطرناڪ نتيجا نڪرندا. هن چيو ته پيپلزپارٽي کانسواءِ ملڪ ۾ سڀ ڪجهه چڱو اهي، سڀ ماڻهو اسانجو ئي احتساب ڪن پر ياد رهي ته اُهو سڀ ڪجهه تاريخ به ياد رکندي.

 

مڪاني چونڊن ۾ ڪنهن به اداري کي سياسي پارٽي جي دٻاءُ ۾ اچڻ جي ضرورت ناهي: چيف اليڪشن ڪمشنر

اسلام آباد (بيورو) چيف اليڪشن ڪمشنر سردار رضا چيو آهي ته مڪاني چونڊن ۾ ڪنهن به اداري کي سياسي پارٽي جي دٻاءُ ۾ اچڻ جي ضرورت ناهي، مڪاني چونڊون بنا خوف ۽ حراس جي ڪرايون وينديون.ڪراچي ۾ چيف اليڪشن ڪمشنر سردار رضا جي صدارت هيٺ اليڪشن ڪميشن جو اجلاس ٿيو، اجلاس ۾ آءِ جي سنڌ، رينجرز جا عملدارن، سيڪريٽري اليڪشن ڪميشن، مڪاني کاتي جي سيڪريٽري ۽ ضلعي انتظاميا شرڪت ڪئي. اجلاس ۾ مڪاني چونڊن جي انتظامن بابت غور ويچار ڪيو ويو، قانون لاڳو ڪندڙ ادارن بلدياتي چونڊن بابت اليڪشن ڪمشنر کي بريفنگ ڏني.چيف اليڪشن ڪمشنر سردار رضا اجلاس کي خطاب ڪندي چيو آهي حڪومتون اينديون وينديون آهن، پر ادارا هميشه قائم رهندا آهن، ڪنهن به اداري کي ڪنهن سياسي پارٽي جي دٻاءُ ۾ اچڻ جي ضرورت ناهي.سردار رضا چيو ته بلدياتي چونڊن ۾ عوام ۽ سياسي پارٽيون اليڪشن ڪميشن سان سهڪار جاري رکن ڪن ته جئين چونڊون شفاف نموني ٿي سگهن.ان کان اڳ چيف اليڪشن ڪمشنر سردار رضا مزار قائد تي حاضري ڀري گلن جي چادر چاڙهي، سردار رضا چيو ته هو قائد اعظم محمد علي جناح واري پاڪستان کي ڏسڻ چاهي ٿو، جيڪڏهن قائداعظم وقت کان اڳ وڇڙي نه وڃي ها ته اڄ ملڪ جي اها صورتحال نه هجي ها. هن چيو ته عوام سياسي منظرن کي ڏسي چونڊ عمل کي صاف ۽ شفاف بڻائڻ لاءِ اليڪشن ڪميشن جو ساٿ ڏئي.

 

ملاله يوسفزئي جي هندستان ۾ آجيان ڪئي ويندي: شيو سينا

ممبئي (اين اين آءِ) انتهاپسند هندو پارٽي شيوسينا جو چوڻ آهي ته ٻارڙن جي حقن لاءِ سرگرم نوبل انعام حاصل ڪندڙ ملاله يوسفزئي کي هندستان ۾ ڀليڪار چيو ويندو، ڇو ته هو دهشتگردن خلاف بهادري سان ۽ ڄمي بيٺي آهي. ٽائيمز آف انڊيا جي رپورٽ مطابق شيوسينا جي اڳواڻ سنجي رات جو چوڻ آهي ته مان هندستان ۾ امن قائم ڪندڙن کي ٻڌائڻ چاهيان ٿو ته شيو سينا ۽ مان پاڪستان ۾ دهشتگردي خلاف آواز اٿارڻ تي ملاله يوسفزئي جي جدوجهد کي ساراهيون ٿا ۽ ملاله هندستان ايندي ته ان جي آجيان ڪئي ويندي، هن چيو ته خورشيد قصوري ۽ حافظ سعيد جهڙا ماڻهو هندستان خلاف تشدد ۽ دهشتگردي پکيڙين ٿا، جڏهن ته ملاله دهشتگردي خلاف وڙهي رهي آهي ۽ ان ڪري نوبل انعام ماڻي چڪي آهي، هن چيو ته جيڪڏهن ملاله جي هندستان ۾ اجيان ڪئي ويندي ته هتي موجود پاڪستان سان محبت ڪندڙ سمورن ماڻهن کي هي پيغام ملندو ته دهشتگردي کي هٿي ڏيڻ بدران ان کي سختي سان منهن ڏيڻ گهرجي، واضح رهي ته تازو ملاله خواهش ظاهر ڪئي هئي ته هو هندوستان جو دورو ڪرڻ گهري ته جئين اتان جي ڇوڪرين جا حوصلا وڌي سگهن.

 

مودي صاحب راند کي هلڻ ڏئي ۽ پيار کي وڌڻ ڏئي: عبدالستار ايڌي جو ڀارتي وزيراعظم کي پيغام

ڪراچي (اين اين آءِ) مشهور سماجي ڪارڪنن عبدالستار ايڌي ڀارتي وزيراعظم کي پيار جو پيغام ڏيندي چيو ته نريندر مودي پاڪستان ۽ ڀارت وچ ۾ راند کي هلڻ ڏئي ۽ پيار کي وڌڻ ڏئي، اسلام ۽ هندو مذهب ٻئي انسانيت جو درس ڏين ٿا، اربع تي صحافين سان ڳالهائيندي هن چيو ته ڀارت ۾ پاڪستان خلاف ڪارروايون افسوسناڪ آهن، ٻنهي ملڪن جي عوام جي خواهش آهي ته خطي مان دهشتگردي ختم ٿئي ۽ امن قائم ٿئي، هن ڀارتي وزيراعظم کي پيغام ڏنو ته ڀارت ۾ مسلمانن تي حملا بند ڪرائي ۽ ٻنهي ملڪن جي عوام کي ويجهو آڻڻ لاءِ راند کي هٿي ڏئي، هن چيو ته ڀارت پاڪستان جي رانديگر کي ڀليڪار چوي ۽ هتي اسان ڀارت جي رانديگرن کي دل سان ڀليڪار چونداسين، هن چيو ته مودي حڪومت عوام لاءِ ويزا پاليسي آسان ڪري ۽ اچڻ وڃڻ تي پابندي ختم ڪري.

 

ڪراچي پوليس 8، 9 ۽ 10 محرم لاءِ سيڪيورٽي پلان کي آخري شڪل ڏيئي ڇڏي

ڪراچي (اسٽاف رپورٽر) ڪراچي پوليس 8، 9، ۽ 10 محرم لاءِ سيڪيورٽي پلان کي آخري شڪل ڏيئي ڇڏي آهي ڪراچي ۾ 8، 9 ۽ عاشوره ڏهاڙي جي موقعي تي ماتمي جلوسن کي فول پروف سيڪيورٽي فراهم ڪرڻ لاءِ مرڪزي جلوسن جي لنگهن جي سمورن اندرين ۽ ٻاهرين رستن کي بند جڏهن ته مارڪيٽن ۽ دڪانن کي سيل ڪيو ويندو جلوس برآمد ٿيڻ کان اڳ رستي جي بم ڊسپوزل اسڪواڊ ۽ کوجي کتن جي مدد سان چيڪنگ ڪئي ويندي جلوسن جي لنگهن جي ڊگهي عمارتن تي شارپ شوٽر بيهاريا ويندا ڪنهن به شخص کي جلوس جي وچ ۾ داخل ٿيڻ جي اجازت نه هوندي پوليس سي سي ٽي وي ڪئميرائن جي مدد سان ماتمي جلوسن جي مانيٽرنگ جي تياري مڪمل ڪري ورتي اهي جلوس جي رستن تي سي سي ٽي وي ڪئمرائن کي فعال ڪيو ويو آهي پوليس موبائلن ۾ به سي سي ٽي وي ڪئمرا لڳايا ويا آهن جيڪي جلوس جي آڏو هلندا ان کان سواءِ ضرورت پوڻ تي ايم اي جناح روڊ تي عمارتن جي ٻاهران لڳل خانگي سي سي ٽي وي ڪئمرائن کي به استعمال ڪري سگهبو.