تازيون خبرون

Daily Archives: October 21, 2015

ايم ڪيو ايم اسيمبلين مان استعيفائن ڏيڻ جو فيصلو به پاڻ ڪيو ۽ واپس به پاڻ ئي ورتو : نثار کهڙو

ڪراچي (اي پي پي) سنڌ جي تعليم ۽ اطلاعات واري سينيئر وزير نثار احمد کهڙو چيو آهي ته ايم ڪيو ايم اسيمبلين مان استعيفائون ڏئي وڃڻ جو فيصلو به پاڻ ڪيو هو ۽ هنن اسيمبلين مان استعيفائون واپس وٺڻ جو اعلان ته ڪيو آهي پر اڃان تائين سنڌ اسيمبليءَ ۾ واپس اچڻ بابت باضابطه آگاهه نه ڪيو آهي ۽ ڏسڻو اهو آهي ته هو ڪڏهن ٿا استعيفي واپس وٺي اسيمبليءَ ۾ اچن. اهڙن خيالن جو اظهار هن اڱاري ڏينهن مئٽرڪ بورڊ ڪراچيءَ ۾ پوزيشن هولڊر شاگردن ۽ شاگردياڻين ۾ انعام ورهائڻ واري تقريب کي خطاب ۽ ميڊيا سان ڳالهائيندي ڪيو. نثار احمد کهڙو چيو آهي ته ڪاپي ڪلچر هڪ مائينڊ سيٽ آهي جنهن ڪلچر جو خاتمو چاهيون ٿا، ڪاپي ڪلچر واري مائينڊ سيٽ جي خاتمي لاءِ انتظاميا سان گڏجي والدين ۽ سول سوسائٽيءَ کي پڻ ڪردار ادا ڪرڻ گهرجي. هن چيو ته ڪاپي ڪلچر سبب شاگرد دنيا سان مقابلو نه ڪري سگهندا، ان ڪري شاگردن کي پاڻ به ڪاپيءَ کان پاسو ڪرڻ گهرجي ته جيئن هو دنيا سان مقابلو ڪري سگهن. هن چيو ته اسڪولن ۾ ٻارن جي انرولمينٽ وڌائڻ لاءِ شاگردن کي هڪ وقت جي ماني کارائڻ تي پڻ غور ڪري رهيا آهيون. هن چيو ته مڪمل طور تي پڙهيل لکيل معاشرو هجڻ لاءِ مفت تعليم ڏيڻ سان گڏوگڏ شاگردن کي مفت ڪتاب ۽ شاگردياڻين کي وظيفو پڻ ڏنو پيو وڃي. ان موقعي تي هن مئٽرڪ بورڊ جي پوزيشن هولڊر شاگردن ۽ شاگردياڻين ۾ انعام پڻ ورهايا.

 

ڀارت ۾ مهان ذات جي هندن دلت ڪٽنب جي 2 معصوم ٻارڙن کي جئيري ساڙي ڇڏيو

نئين دهلي: ڀارت ۾ هندو انتها پسندن نه رڳو مسلمانن جو ڌرتي تي جيئڻ جنجال ڪيو آهي پر ننڍي ذات جي ساڳئي مذهب وارن ماڻهن جو جيئڻ به عذاب بڻائي ڇڏيو آهي، اهڙو ئي هڪ واقعو هريانا ۾ پيش آيو ،جتي مهان ذات جي هندن دلت ڪٽنب جي گهر ۾ گهڙِي انهن جا ٻه معصوم ٻارڙا ساڙي ڇڏيا. ڀارتي ميڊيا رپورٽن  مطابق ڀارتي رياست هريانا جي ڳوٺ فريد آباد ۾ راجپوت هندن ننڍي ذات جي دلت ڪٽنب جي گهر ۾ گهڙي گهر کي باهه ڏئي ڇڏي، جنهن جي نتيجي ۾ اڍائي سالن ۽ 9 مهينن جا ٻارڙا سڙي خاڪ ٿي ويا، جڏهن ته انهن ٻارڙن جا ماءُ پيءُ جيتيندر ۽ ريکا به زخمي ٿيا، جن کي صفدر جنگ اسپتال ۾ موڪليو ويو، جتي کين طبعي مدد ڏني پئي وڃي.پوليس جو چوڻ آهي ته دلت ڪٽنب جي گهر ۾ باهه ڏيڻ جو ڪارڻ مليت تي تڪرار آهي.

 

رڳو سنڌ ۾ ڪرپشن خلاف ڪارروايون تيز ڪرڻ وارو تاثر غلط آهي:نيب چيئرمين

اسلام آباد (بيورو) قومي احتساب بيورو ( نيب) جي چيئرمين قمر الزمان چوڌري چيو آهي ته رڳو سنڌ ۾ ڪرپشن خلاف ڪارروايون تيز ڪرڻ وارو تاثر غلط آهي، نيب چئني صوبن ۾ بنا ڪنهن خوف جي ڪرپشن خلاف ڪارروايون ڪري رهيو آهي، نندي پور پاور پراجيڪٽ ۾ ڪرپشن جِي جاچ مڪمل ٿيڻ تائين ڪنهن جو نالو کڻڻ درست ناهي. اسلام آباد ۾ نيب جي فرانزڪ ليب جي افتتاح کانپوءِ ميڊيا سان ڳالهائيندي نيب چيئرمين قمرالزمان چوڌري چيو ته احتساب بيورو پاران فرانزڪ ليب ڪم شروع ڪري ڇڏيو آهي، جيڪو سٺو عمل آهي. هن چيو ته ڪرپشن رڳو پاڪستان نه پر سڄي دنيا جو مسئلو آهي، ڪرپشن ڪيسز جي جاچ لاءِ آفيسرز تي ٻڌل 3 ٽيمون جوڙيون ويون آهن، جيڪي جاچ ڪري رهيون آهن. نيب چيئرمين چيو ته ملڪ مان ڪرپشن جي خاتمي جو عزم ورجايو آهي ۽ التوا هيٺ 11سئو 30 ڪيس اڪلايا ويا آهن. نندي پور پاور پراجيڪٽ ۾ ڪرپشن بابت سوال جي جواب ۾ نيب چيئرمين چيو ته  ان معاملي جي گهڻي حد تائين جاچ مڪمل ڪئي وئي آهي، نندي پور منصوبي جي ٻن مرحلن ۾ جاچ ٿي رهي آهي. نيب چيئرمين چيو ته نندي پور ۾ پهرين مرحلي جي جاچ پراجيڪٽ جي منظوري ۽ شروعات تائين آهي، جڏهن ته ٻئي مرحلي ۾ تعمير ۽ لاڳت ۽ واڌ جي جاچ ڪئي پئي وڃي. سنڌ ۾ نيب جون ڪاررووايون تيز ڪرڻ بابت سوال جي جواب ۾ نيب چيئرمين چيو ته اهو تاثر غلط آهي ته نيب رڳو سنڌ ۾ ڪرپشن خلاف ڪارروايون تيز ڪيون آهن، چئني صوبن ۾ بنا ڪنهن خوف جي ڪارروايون ڪيون پيون وڃن. قمر الزمان چوڌري چيو ته سنڌ جي ڀيٽ ۾ خيبرپختونخواهه ۾ وڌيڪ ڪارروايون ڪيون ويون آهن، نيب آگسٽ 2014 ۾ سنڌ اندر فعال ٿي، مارچ ۽ اپريل 2015 کان سنڌ ۾ ڪارروايون شروع ڪيون ويون آهن.

 

سنڌ ۾ مڪاني چونڊون: اميدوارن جي قطعي لسٽ جاري، 707 بنا مقابلي ڪامياب

ڪراچي (اسٽاف رپورٽر) سنڌ ۾ مڪاني چونڊن جي پهرين مرحلي جي اميدوارن جي قطعي لسٽ جاري ڪئي وئي، اليڪشن ڪميشن جو چوڻ آهي ته 8 ضلعن ۾ 10 هزار 87 اميدوار حصو وٺي رهيا آهن، جڏهن ته هن وقت تائين 707 اميدوار بنا مقابلي ڪامياب ٿي چـُڪا آهن. اليڪشن ڪميشن، سنڌ ۾ مڪاني چونڊن جي پهرين مرحلي جي اميدوارن جي قطعي لسٽ جاري ڪري ڇڏي آهي. اليڪشن ڪميشن موجب پهرين مرحلي جي 8 ضلعن ۾ 10 هزار 87 اميدوار حصو وٺي رهيا آهن. اليڪشن ڪميشن جو چوڻ آهي ته سکر ضلعي ۾ 15 سئو 58 اميدوار ميدان ۾ لٿل آهن. لسٽ موجب خيرپور مان 2 هزار 664، گهوٽڪي مان 971، جيڪب آباد مان 625،ڪشمور مان 609 ۽ قمبر شهدادڪوٽ ضلعي مان 13 سئو 57 اميدوار حصو وٺي رهيا آهن. لاڙڪاڻي مان 1363 ۽ شڪارپور مان 940 اميدوار مڪاني چونڊن ۾ حصو وٺي رهيا آهن. اليڪشن ڪميشن موجب چونڊن جي پهرين مرحلي ۾ هن وقت تائين 707 اميدوار بنا مقابلي ڪامياب ٿي چڪا آهن. سکر مان 39، خيرپور مان 53، گهوٽڪي مان 189 ۽ جيڪب آباد ضلعي مان 128 اميدوار بنا مقابلي ڪامياب ٿي چڪا آهن. اليڪشن ڪميشن موجب ڪشمور – ڪنڌڪوٽ مان 118، قمبر-شهدادڪوٽ مان 50، لاڙڪاڻي مان 38 ۽ شڪارپور مان 92 اميدوار بنا مقابلي سوڀ ماڻي چڪا آهن،

 

اداڪاره سميتا پاٽيل سان تمام گهڻو لڳاءُ هيو، هوءَ هڪ الڳ قسم جي اداڪاره هئي: اميتاڀ بچن

ممبئي(شوبز نيوز) بالي ووڊ اداڪار اميتاڀ بچن چيو آهي ته اداڪاره سميتا پاٽيل سان تمام گهڻو لڳاءُ هو ڇو ته هوءَ هڪ الڳ قسم جي اداڪاري هئي. هن چيو ته ساڻس فلمايل ڪجهه منظرن تي شرمندگي محسوس ٿيندي هئي، ڇو ته هوءَ سمجهندي هئي ته هن جو معيار ان قسم جي فلمن ۾ ڪم ڪرڻ جو نه هو. ممبئي ۾ اداڪاره سميتا پاٽيل جي لکيل ڪتاب جي رونمائي جي موقعي تي اميتاڀ بچن چيو ته فلم ”نمڪ حرام“ ڪرڻ کانپوءِ افسوس جو اظهار ڪيو هو ڇو ته ان فلم ۾ برسات ۾ ڊانس ڪرڻي پئي هئي. هن چيو ته مون کي افسوس ٿيندو جڏهن ماڻهو ان ڊانس جي حوالي سان ياد ڪندا.

 

اداڪاره عرشي خان پاڪستان جي حمايت ۾ شيوسينا جي سامهون اچي وئي

ممبئي(شوبز نيوز) ڀارت جي مسلمان اداڪاره عرشي خان پاڪستان جي حمايت ۾ شيوسينا جي سامهون اچي وئي. عرشي خان سوشل نيٽ ورڪنگ سائٽ ٽوئٽر تي پنهنجي هڪ ٽوئيٽ ۾ لکيو آهي ته هوءَ پاڪستان جي حمايت ڪري ٿي. شيوسينا ۾ همٿ آهي ته سندس مُنهن تي ڪارنهن هڻي. عرشي خان غلام علي ڀارت ۾ شو نه ٿيڻ تي شيوسينا کي تقنيد جو نشانو بڻائيندي چيو ته فن، ادب ۽ موسيقي جي ڪابه سرحد نه هوندي ۽ ان لاءِ سياسي مفادن جي ڪري اداڪارن ۽ ثقافت جي مٽاسٽا ۾ رڪاوٽون نه بڻجڻ گهرجن. هن چيو ته پاڪستان ۽ ڀارت پاڻ ۾ ڀاءُ ڀيڻ جو رشتو رکن ٿا. ٻنهي ملڪن وچ ۾ دشمني صرف سياستدانن پنهنجي ذاتي مفادن لاءِ چونڊ کٽڻ لاءِ پيدا ڪئي آهي.

 

پاڪستان ۽ انگلينڊ وچ ۾ ٻي ڪرڪيٽ ٽيسٽ سڀاڻي شروع ٿيندي

دبئي(اسپورٽس نيوز) پاڪستان ۽ انگلينڊ جي ڪرڪيٽ ٽيمن وچ ۾ 3 ٽيسٽ ميچن تي مشتمل سيريز جي ٻي ڪرڪيٽ ٽيسٽ (سڀاڻي) خميس کان دبئي انٽرنيشنل ڪرڪيٽ اسٽيڊيم ۾ شروع ٿيندي. پاڪستاني ٽيم مصباح الحق جي اڳواڻيءَ ۾ ميدان ۾ لهندي، جڏهن ته انگلش ٽيم جي ڪپتاني جا فرض ايلسٽر ڪڪ سرانجام ڏيندو. ٻنهي ٽيمن وچ ۾ 1954ع کان هن وقت تائين کيڏيل 75 ٽيسٽ ميچن مان انگلينڊ 22 ۽ پاڪستان 16 ۾ ڪاميابي حاصل ڪئي آهي، جڏهن ته 7 ميچون بنا ڪنهن نتيجي جي ختم ٿيون. ٻنهي ٽيمن وچ ۾ سيريز جي ٻي ٽيسٽ 22 کان 26 آڪٽوبر تائين دبئي انٽرنيشنل ڪرڪيٽ اسٽيڊيم ۾ جڏهن ته ٽين ۽ آخري ٽيسٽ پهرين کان 5 نومبر تائين شارجا ڪرڪيٽ اسٽيڊيم ۾ کيڏي ويندي.

 

پاڪستان ۽ ويسٽ انڊيز وومينز وچ ۾ ٽين ون ڊي اڄ کيڏي ويندي

سينٽ لوشيا(اسپورٽس نيوز) پاڪستان ۽ ويسٽ انڊيز وومينز ڪرڪيٽ ٽيمن وچ ۾ چئن ون ڊي انٽرنيشنل ميچن تي ٻَڌل سيريز جي ٽين ون ڊي (اڄ) اربع تي سينٽ لوشيا ۾ کيڏي ويندي. ٻنهي ٽيمن وچ ۾ سيريز 1-1 تان برابر آهي. پهرين ميچ ۾ گرين شرٽس ويسٽ انڊيز کي 6 وڪيٽن تان هاريو جڏهن ته ٻي ميچ ۾ ميزبان ٽيم سٺو ڪم بيڪ ڪيو ۽ 3 وڪيٽن تان ڪاميابي حاصل ڪري سيريز برابر ڪري ڇڏي. ٻنهي ٽيمن وچ ۾ سيريز جي چوٿين ۽ آخري ون ڊي ميچ 24 آڪٽوبر تي کيڏي ويندي. ا

 

ابو طالب جو بهادر گهراڻو ۽ عَلَم پاڪ: بيدار جعفري

وفا جي وکر جو نالو ذهن تي ترندي ئي حضرت عباس علمدار جو بهادرانه ڪردار ياد اچي ويندو آهي، دنيا جا ڪروڙين ماڻهو پنهنجن گهرن مٿان اڄ به وڏي عقيدت سان انگاس لڳائين ٿا، عرب جي سموري دنيا کيس قمر بني هاشم يعني بني هاشم جي چنڊ طور ياد ڪندي آهي. پر جڏهن اوهان امام حسين عه جي روضي کان ٿورو اڳتي فاتح ڪربلا حضرت عباس عه جي روضي طرف ايندا ته اتان جا لوڪل عرب هن حرم کي ” ابوالفضل“ جي نالي سان ياد ڪن ٿا. گهمندي گهمندي ڀلي اوهان يورپ جي ڪنهن سوڙهي گهٽي ۾ پهچو، جڏهن اوهان کي پري کان ڪو علم پاڪ نظر اچي ته اوهان پڪ سان سمجهي ويندا ته هي علم حضرت عباس عه جو ئي آهي، ۽ ها مون کي جولاءِ 7 7 9 1 ع وارا اهي ڏينهن ياد اچي ويا، جڏهن ڪاري قانون تحت ضياءُ الحق سڄي ملڪ جي سمورين سياسي ۽ مذهبي پارٽين جا جهنڊا لاهڻ جو حڪم ڏنو هو، ۽ رات جي پيٽ ۾ سمورا جهنڊا لهي ويا هئا، پر هڪ جهنڊو بلند کان بلند تر نظر آيو. پاڪستان اندر خدا جي سمورن ولين جي مزارن ،  امام بارگاهن تي، قلندر ۽ لطيف جي نگري ۾ سدائين اوچو رهڻ وارو فقط ۽ فقط غازي جو علم آهي ۽ دنيا ڏٺو ته جڏهن ڪراچي ۾ عاشور واري جلوس ۾ آپگهاتي بم ڌماڪو ٿيو ته ڪيترائي ماڻهو شهيد ٿيا پر فضا ۾ مولا عباس عه جو جهنڊو ڦڙڪندي نظر آيو، آخر فلسفو ڪهڙو آهي؟ جو ماڻهو هڙان وڙان خرچ ڪري لوهه، اسٽيل، چاندي ۽ قميتي جواهرات سان جڙيل علم پاڪ قائم ڪن ٿا، علم پاڪن تي مٿان هٿ لڳل هوندو آهي، جيڪو حضرت عباس عه جي بهادري جي علامت آهي. ڪيترن ئي عزاخانن ۾ سون سان جڙيل هٿ عزادارن جي عقيدت کي ظاهر ڪن ٿا، هنگامي حالتن ۾ به نوجوان دستا هي ترانو پڙهندي نظر ايندا آهن، ” اونچا رهي اپنا  عَلَم حيٰ عليٰ خير العمل “  ”حسينيون ڪي زندگي عقيده و جهاد هي“  شهيد ڪربلا ڪا غم حيات هي نجات هي“ …..!!! ۽  هاڻوڪو حال ٻڌو ڪربلا جو، حضرت عباس جي روضي اندر اها جاءِ به آهي، جتي زير زمين پاڻي پهچي روزانو سلام ڀريندو آهي، بي بي ام البنين جي جگر جاني جي ڄمار 4 3  ورهيه ۽ ڪجهه مهينا هئي، جڏهن 0 1  محرم 1 6   هجري تي کيس نهر فرات تان پاڻي کڻندي ٻنهي ٻانهن کان محروم ڪيو ويو ۽ وفا جي سخت امتحان ۾ ثابت قدمي سبب خداوند قدوس کيس ”باب الحوائج “ قرار ڏنو، يعني جنهن جي واسطي حاجت روا ماڻهن جون حاجتون پوريون ڪري ٿو.

ڪيا ڪيا نه جوان مرد هوئي خلق مين پيدا

ليڪن ڪوئي عباس کي جرئت ڪو نه پهنچا

هر شهر مين هي غازي کي شجاعت ڪا شهر هي

هر لب پي هي يه ذڪر ڪه يڪتا هي وه يڪتا

ان آنکهون ني نه ديکا اس سا جهان مين

جو اهل وفا هي اسي روئي گا جهان مين

خدا تعاليٰ جي گواهي قائم آهي ته شهيدن کي مئل نه سمجهو، اهي خدا تعالي جو پاڪ رزق کائين ٿا، اهي امر آهن، معصوم جو چوڻ آهي ته خدا تعاليٰ ٻئي ٻانهون قربان ڪرڻ ۽ان علم کي برقرار رکڻ جيڪو پاڪ رسول صه خيبر ۾ ناد علي عه سان گڏ حضرت ابو تراب عه کي عطا ڪيو هو، ايڏي وڏي قرباني جي عيوض ٻنهي هٿن بدران پر ڏنا جيڪي جنت ۾ اڏڻ جي ڪم اچن ٿا.

حضرت ابوطالب جي  هن بهادر پوٽي جي ڄمڻ کان اڳ پاڻ سڳورن صه بشارت ڏني هئي، حضرت علي عه سندن ولادت لاءِ آسائتا هئا، امام حسين عه به وک وک تي سندس مدد چاهيندو هو، قيدي امام سجاد عه گهڻو ڪري فرمائيندو هو ته “ خدا تعاليٰ منهنجي چاچي عباس تي رحم ڪري، هن قرباني پيش ڪرڻ ۾ پورو پورو ايثار ڪيو ۽ امتحان ۾ وڏي ڪاميابي ماڻي ورتي. “

حضرت امام جعفر صادق عه فرمايو ته منهنجا چاچا حضرت عباس بن علي عه، بصيرت جي ڪمال ۽ بهترين ايمان جا مالڪ آهن، مقتل جي تاريخ ۾ موجود آهي ته سانئڻ فاطمه زهرا عه امت جي شفاعت لاءِ خدا جي بارگاهه ۾ حشر ڏهاڙي حضرت عباس جي ڪٽيل ٻانهن کي پيش ڪندي.

حضرت ابوطالب سان ازلي عشق رکندڙ سموري عرب دنيا جا ماڻهو ان ڳالهه تي متفق آهن ته وڏن ماڻهن جو آسون به وڏيون هونديون آهن، حضرت ذڪريا عه جي آس حضرت يحيٰ عه بڻيو، آقاءِ  دو جهان جي تمنا حضرت علي عه بڻيو ۽ وري امير المومنين علي ابن ابي طالب جي اکين جي آس حضرت عباس عه جي صورت ۾ پڌري ٿي.

تاريخ جا ورق ورن ٿا ته اها ڳالهه ڳجهي نه ٿي رهي ته سانئڻ زهرا عه جي وڇوڙي کانپوءِ مولاءِ ڪائنات پنهنجي ڀاءُ عقيل کي چيو ته اوهان عرب مان ڪا اهڙي عورت ڳولهيو جيڪا بهادر نسل جي هجي، آ ءُان سان نڪاح ڪريان جو ان جي بطن مان اهڙو اڏول ٻار پيدا ٿئي جيڪو ڪربلا ۾ وڃي امام حسين عه جي مدد ڪري.

ان دور ۾ حضرت عقيل کي اُم البنين کان وڌيڪ بهادر، جري، وفادار ۽ وفا شعار عورت نظر نه آئي، اهڙي ريت 4  شعبان 6 2  هجري تي مولا عباس ام البنين جي هنج ۾ اک کولي، حضرت امام حسين عه سندس ڪن ۾ ٻانگ ڏني ۽ ائين ٻالڪپڻ ۾ حضرت عباس عه جي پهرين نظر امام حسين عه تي پئي.

عرب جا بهادر بني هاشم پاڙي وارا جتي ڪٿي حضرت عباس جي ننڍپڻ جو هي واقعو بيان ڪندا آهن ته حضرت علي عه هڪ ڀيري ٻالڪپڻي ۾ حضرت عباس کي چيو ته چئو هِڪُ  حضرت عباس وراڻيو ” هِڪُ “ وري حضرت علي چيس ته ” چئو ٻه “ ان تي حضرت عباس وراڻيو ته ” بابا لڄ ٿي ٿئي“ جنهن زبان سان هڪ خدا جو اقرار ڪيو اٿم ان سان ٻيو لفظ اچارجي  ئي نٿو سگهي، هاڻي مان ٻه ڪيئن ٻوليان ! . عباس جي اهڙي محبوب انداز تي حضرت علي ساڻس گهڻو پيار ڪيو.

حضرت عباس جي بهادري ۽ بيباڪي جي حوالي سان هي واقعو به ضرور اوهان جي سماعتن جي نذر ٿيو هوندو، ٿيو ائين جو ، صفين واري جنگ ۾ جڏهن حضرت عباس نقاب اوڙهي لٿا ته جنگ جي ميدان ۾ سندن هيبت ڏسي ڪو به مقابلي لاءِ اڳتي نه وڌيو، اهو ڏسي شام جي حاڪم پنهنجي بهادر ابن شعث کي مقابلي تي لاٿو، ابن شعث ٽارو ڪيو  ته سندس مقابلي لاءِ شام وارا سمجهندا آهن ته هو 0 1  هزار ماڻهن جي ڀيٽ ۾ اڪيلو ڪافي آهي، هڪ ڳڀرو نوجوان جي ڀيٽ ۾ سندس وڃڻ ٺيڪ ناهي، تنهن ڪري هن پنهنجن پٽن کي هڪٻئي کانپوءِ لاٿو، ائين ابن شعث جا 7  پٽ مقابلو ڪندي پهرين ڌڪ ۾ هڪٻئي کانپوءِ مارجي ويا، هاڻي ابن شعث پاڻ ڀڀڪيون ڀريندو ميدان تي نروار ٿيو، حضرت عباس عه عقاب وانگر هن کي به موت جي منهن ڏانهن ڌڪيو، پوءِ ته ڪنهن کي به اها جرئت نه پئي ٿي جو سندس مقابلي لاءِ ٻه وکون وڌائي، شامي لشڪر ۾ ڀاڄ پئجي وئي.

رڻ گجيو، راڙو ٿيو، اوچتو رڙيون نڪتيون ڪنهن چيو ته حيدر ڪرار غير فرار پاڻ جنگ ۾ آيا آهن، ايتري ۾ شيرِ خدا جي خيمي تان پردو هٽيو ۽ پاڻ جلالت سان ظاهر ٿيا، پاڻ گهوڙي تي چڙهي ميدان ۾ آيا، جڏهن جهيڙيندڙ نوجوان جي چهري تان پردو هٽايو ويو ته خبر پئي ته هو عباس عه دلاور آهي…!!!

مورخ بيان ڪن ٿا ته حضرت علي عه شهادت وقت حضرت عباس جو هٿ امام حسين عه جي حوالي ڪيو ، حضرت عباس عه پاڻ بهادر هجڻ سان گڏ عادل، سهڻا، نهايت ئي پرهيز گار ، متقي ۽ عظيم فقيهه به هئا.

امام جعفر صادق عليه السلام واضع ڪيو آهي ته امامت هڪ اهڙو منصب آهي، جيڪو مالڪ حقيقي عصمت ۽ طهارت جي دائري اندر آل اطهار ۾ مخصوص ڪيو آهي، جنهن ۾ ڪو به انسان ڦير ڦار نه ٿو ڪري سگهي، مهاراجه محمود آباد جون ٻه سٽون ڏاڍيون ڳريون آهن:

مثل سبطين انهين عالم ڪي رياست ملتي

بطنِ زهرا عه جو هوتي تو امامت ملتي

ڇهان امام کيس علم ۽ عرفان جو مرڪز ڄاڻين ٿا ۽ جڏهن به حضرت عباس تي سلام پڙهندا هئا ته کين ” عبد صالح “ ڪري ياد ڪندا هئا ۽ هيئن به چوندا هئا: اي عباس عه اوهان تي خدا تعاليٰ جو سلام، اي عباس !اوهان تي ملائڪه  مقربين جو سلام، توهان تي مرسلين جو سلام، سڄي ڪائنات جي انسانن، شهداءِ ۽ صالحين جو پاڪ ۽ پوتر سلام هجي.

سنڌي مرثيه گو شاعر کيس هنن لفظن ۾ خراج تحسين پيش ڪيو آهي.

اي فوج جا سالار سپهه دار حسيني

سالار سپهه صفدر ڪرار حسيني

هر ڪار تون مختار به سرڪار حسيني

درٻار ڌڻي صاحب درٻار حسيني

فرزند علي عه يارِ وفادار حسيني

يا حضرت عباس علمدار حسيني

عزيزو! خطيب اهلبيت عه حضرت عباس عه جي منزلت هن واقعي وسيلي به بيان ڪندا آهن ته جڏهن حضرت امام زين العابدين عه شهداءِ ڪربلا جي دفن ڪفن لاءِ ڪربلا آيا ته پاڻ سمورن شهيدن جي تدفين بني اسد قبيلي وسيلي ڪرائڻ قبول ڪيائون، پر سيد الشهداءِ امام حسين عه ۽ حضرت عباس عه جي لاش کي  دفن ڪرڻ لاءِ ٻئي ڪنهن کي اڳتي وڌڻ نه ڏنائون ۽ اهي ٻئي لاش پاڻ تنها دفن ڪيائون، پاڻ قبر ۾ لٿا، جڏهن ٻين ويجهن ماڻهن سندن مدد لاءِ چيو ته پاڻ فرمايائون: انهن ٻنهي جي دفن لاءِ مون وٽ مددگار موجود آهن.

ننڍي کنڊ ۾ مرثئي جي وڏي شاعر مرزا دبير حضرت عباس جي حضور ۾ هي سٽون لکي قلم کي ڪمال عطا ڪيو.

ڪس شير ڪي آمد هي ڪه رن ڪانپ رها هي

رن ايڪ طرف چرخ ڪهن ڪانپ رها هي

رستم ڪا بدن، زير ڪفن ڪانپ رها هي

هر قصر سلاطين زمن ڪانپ رها هي

شمشير بڪف ديکهه ڪر حيدر ڪي پسر ڪو

جبرئيل لرزتي هين سميٽي هوئي پر ڪو

۽ هي منهنجو آخري سوال آهي سائنس جي پارکو ماڻهن کان ته انهن هزارين ماڻهن، معذورن، جڏڙن، نابينن کي آخر شفا ڪيئن  ٿي ملي جيڪي حرمِ عباس عه ۾ اچي، شام ۾ بي بي زينب جي اڱڻ تي اچي يا مشهد ۾ امام رضا عه جي صحن ۾ اچي استغاثي جو ماتم ڪن ٿا، زوردار لهجي ۾ گڏجي چون ٿا ته: يا عباس، يا عباس، يا عباس، يا عباس عه….  ۽ پوءِ هزارن جي هجوم ۾ اوچتو، پڙهو صلوات اهلبيت جي ذات تي، اونچي رڙ ٿئي ٿي ۽ ماڻهن کي قدرت طرفان مولا عباس جي وسيلي شفا مليو وڃي…. اهو نظارو نينهن جو آهي.

 

 

پاڪستان ۾ جمهوري گهوٽالي جو تاريخي پسمنظر: تاج مري

حصو ٻيو ۽ آخري…….

اهڙي طرح 12 آگسٽ 1947ع تي رياست قلات کي پاڪستان ساڻ الحاق تي مجبور ڪيو ويو، غوث بخش بزنجو، گل خان نصير کي گرفتار ڪيو ويو، خان قلات جي ڀاءُ شهزاده عبدالڪريم کي پڻ گرفتار ڪيو ويو ۽ ائين زوري بلوچستان کي پاڪستان جو حصو بڻايو ويو.نوابزاده نصر الله خان لاهور اندر هڪ پروگرام ۾ ڳالهائيندي چيو ته پاڪستان ٺهڻ کانپوءِ اسين ملڪ کي بروقت آئين نه ڏئي سگهياسين، جيتوڻيڪ انهيءَ لاءِ حالتون به سازگار هيون، هن چيو ته پاڪستان ٺهڻ کانپوءِ هڪ عبوري حڪومت ٺهي، ان ۾ مسلم ليگ جيڪي نمائندا ڏنا، انهن ۾ سردار عبدالرب نشتر، لياقت علي خان ۽ آءِ آءِ چندريگر، ٻئي طرف جوگيندر ناٿ منڊل کي به شامل ڪيو ويو، ان وقت نئين آئين ٺاهڻ ۾ ڪا رڪاوٽ ڪونهي پير تنهن هوندي به نه آئين ڏنو ويو ۽ نه چونڊون ڪرائي آئيني حڪومت ٺاهي وئي، جنهن ڪري افسر شاهي پر سورڻ شروع ڪيا ۽ رياست تي قبضو ڪري ورتو، جڏهن ته ڀارتي قيادت بروقت چونڊون ڪرايون، آئين ٺاهيو ۽ وفاق توڙي صوبن ۾ چونڊيل حڪومتون قائم ڪيون، مطلب ته خواجه نظام الدين جي حڪومت کي ڊاٿو ويو ۽ پوءِ محمد علي بوگره، چوڌري محمد علي ۽ حسين سهروري جي حڪومتن کي ڊاٿو ويو، غلام محمد کانپوءِ اسڪندر مرزا آيو، جنهن پڻ ساڳئي روايت برقرار رکي، 1953ع ۾ بنگال ۾ چونڊن ۾ مسلم ليگ کي بري طرح شڪست حاصل ٿي، ترقي پسند ۽ قومپرستن جي اتحاد اڪثريت حاصل ڪئي پر ان اتحاد جي حڪومت کي به ڊاٿو ويو ۽ بنگال ۾ گورنر راڄ  لاڳو ڪيو ويو، بنگالي، سنڌي، بلوچي، پشتو، پنجابي کي قومي ٻوليون بڻائڻ بدران اردو کي قومي ٻولي طور ٿوپيو ويو، جنهن خلاف بنگال ۾ سخت ردعمل ٿيو.

1956ع ۾ آئين ٺهيو ته اسڪندر مرزا پاڻ انهيءَ کي معطل ڪري مارشل لا لڳايو ۽ پوءِ 1958ع ۾ ايوب خان اسڪندر مرزا جي حڪومت ختم ڪري مارشل لا هڻي ملڪ جو سربراهي ٿيو، ان کان اڳ ون يونٽ قائم ڪري سنڌ، بلوچستان، پشتون خواهه ۽ پنجاب جي حيثيت ختم ڪري مغربي پاڪستان ٺاهيو ويو ۽ بنگال جو نالو تبديل ڪري مشرقي پاڪستان بڻايو ويو، بنگال جي اڪثريت کي ختم ڪيو ويو، جنهن خلاف بنگال ۾ سخت احتجاج ٿيو ۽ سنڌ، بلوچستان ۽ پختونخواهه ۾ پڻ احتجاج ٿيو، نتيجي طور ايوب خان جي حڪومت ختم ٿي ۽ عيسيٰ خان بالغ راءِ دهي جي بنياد تي چونڊون ڪرائڻ ۽ ون يونٽ ختم ڪرڻ جو اعلان ڪيو، چونڊن ۾ عوامي ليگ اڪثريت ساڻ کٽي آئي، انهيءَ کي اقتدار ڏيڻ بدران بنگال کي ڌڪي ڌار ڪيو ويو، لکين بنگالين کي قتل ڪيو ويو، جنرل ضياءَ الحق جي آمريتن ۾ ذوالفقار ڀٽي، نذير عباسي سميت اڻ ڳڻيل سياسي اڳواڻن کي شهيد ڪيو ويو، سنڌ ۾ ڳوٺن تي بمباريون ڪيون ويون ۽ هزارين ڪارڪن گرفتار ڪيا ويا، ايم آر ڊي تحريڪ جي نتيجي ۾ محمد خان جوڻيجو جي حڪومت قائم ٿي، انهيءَ کي به هٽايو ويو، ضياءَ الحق جي موت کانپوءِ 1986ع جي چونڊن ۾ پ پ ڪاميابي ماڻي ۽ بينظير ڀٽو حڪومت سنڀالي، 18 مهينن ۾ بينظير جي حڪومت ختم ڪئي وئي ۽ نواز شريف حڪومت قائم ٿي، اهڙي طرح نواز شريف حڪومت کي پڻ هٽايو ويو ۽ اهو پتلي تماشو 1999ع تائين هلندو رهيو ۽ پوءِ جنرل مشرف راتاهو هڻي آئين معطل ڪري نواز حڪومت کي ختم ڪيو، 1988ع کان 1999ع تائين اسيٽيبلشمينٽ جي راند ۾ سياستدانن جو ڪلهو استعمال ٿيو ۽ اسٽيبلشمينٽ چونڊيل حڪومتون ختم ڪندي رهي، آخر نواز شريف ۽ بينظيرڀٽو وچ ۾ چارٽر آف ڊيموڪريسي تي صحيحون ٿيون، چارٽر آف ڊيموڪريسي جي ڪري پ پ پ حڪومت لوڏن لمن باوجود 5 سال پورا ڪيا، نواز شريف حڪومت قائم ٿي ته پ پ سميت مڙني پارلياماني پارٽين حڪومت ڪيرائڻ ۾ اسٽيبليشمينٽ جو ساٿ نه ڏنو ته اهو ڪم تحريڪ انصاف ۽ عوامي تحريڪ کان ورتو ويو ۽ نواز ليگ کي ڪمزور ڪري انهيءَ کي مجبور ڪيو ويو ته ساڳئي پگهار تي ڪم ڪري ۽ پوءِ 21هين ترميم ذريعي سول حڪومتن جا اختيار اسٽيبلشمينٽ حوالي ڪيا ويا، هاڻي صورتحال اها آهي ته سينيٽ ۾ پ پ پ، مسلم ليگ ۽ ٻين پارٽين کي چوڻو ٿو پوي ته سياستدانن ۽ جمهوريت خلاف سازشون ٿي رهيون آهن. بهرحال اها ڳالهه به درست آهي ته پ پ پ توڙي نواز ليگ حڪومت عوامي امنگن تي پوري نه لهي سگهي آهي، اها به حقيقت آهي ته ماڻهو حڪومت جي ڪارڪردگي کان مطمئن ڪونهن پر في الحال سواءِ جمهوريت جي ٻيو ڪوبه رستو ڪونهي، انقلاب جي لاءِ صورتحال ته تيار آهي پر ملڪ ۾ انقلابي قوتون نه هجڻ جي برابر آهن، اهو ڪارڻ آهي اسٽيبلشمينٽ جون پارٽيون انقلاب جا نعرا هڻندي نظر اچن ٿيون، ٻئي طرف جنرل راحيل شريف کي ايڪٽيشن ڏيڻ جا اطلاع آهن، ڪراچي ۾ ڳالهائيندي نامياري قانوندان ۽ انساني حقن جي اڳواڻ عاصمه جهانگير چيو آهي ته جنرل ايڪٽيشن ڏيڻ قوم ساڻ ويساهه گهاتي آهي، وزيراعظم نواز شريف پنهنجي مٿي جو تاج ٻئي ڪنهن کي ڇو پارائي رهيو آهي، هن چيو ته مسئلن جي ڄاڻ هوندي به سياستدان اهليت ۽ شعور کان وانجهيل آهن، سچ پچ جنهن طريقي ساڻ جنرل راحيل شريف جي شڪست کي اڀاريو پيو وڃي، انهيءَ مان ڪنهن سازش جي بوءِ اچي رهي آهي، پوءِ اها سازش سياستدانن ۽ جمهوريت خلاف يا پاڻ پنهنجي اهليت ۽ شعور کان وانجهيل سياستدان پنهنجي پير تي پاڻ ڪهاڙو هڻي رهيا آهن.