تازيون خبرون

Daily Archives: October 20, 2015

ڪوئٽا جي سرياب روڊ تي بس اندر ڌماڪو، 13 ڄڻا فوت، ڪيترائي زخمي

ڪوئيٽا (بيورو) ڪوئيٽا جي سرياب روڊ واري علائقي ۾ لوڪل بس اندر زوردار ڌماڪي جي نتيجي ۾ 13 ڄڻا مارجي ويا ۽ 22 زخمي ٿي پيا. ڪوئيٽا جي بس ٽرمينل ڀرسان لوڪل بس اسٽينڊ تي پهتي ته مسافرن جي لهڻ کان اڳ ئي زوردار ڌماڪو ٿي ويو جنهن جي نتيجي ۾ 13 مسافر موقعي تي ئي مارجي ويا ۽ 22 سخت زخمي ٿي پيا. زخمين مان ٽن ڄڻن جي حالت ڳڻتي جوڳي ٻڌائي پئي وڃي. ڌماڪي جو آواز شهر جي پري پري وارن علائقن تائين ٻڌو ويو. ڌماڪي واري هنڌ تي مارجي ويلن جا عضوا ٽڙي پکڙجي ويا . واقعي کانپوءِ پوليس ۽ ايف سي اهلڪارن وڏي تعداد ۾ پهچي پوري علائقي کي ڪڙي هيٺ آڻي ورتو. بم ڊسپوزل اسڪواڊ واقعي واري هنڌ پهچي شاهديون گڏ ڪيون. بم ڊسپوزل اسڪواڊ عملي موجب ڌماڪي دوران 15 کان 20 ڪلو گرام ڌماڪيدار مادو استعمال ڪيو ويو، جنهن کي ريموٽ ڪنٽرول ڊوائيس وسيلي اڏايو ويو. ڌماڪي سبب متاثر بس تباھ ٿي وئي. حملي کانپوءِ سول اسپتال سميت سرڪاري اسپتالن ۾ ايمرجنسي لاڳو ڪئي وئي. ڌماڪي بعد سرياب روڊ سميت شهر جي مختلف علائقن ۾ دڪان بند ٿي ويا ۽ خوف سبب ماڻهو گهرن تائين محدود ٿي ويا. صدر ممنون حسين، پ پ چيئرمين بلاول ڀٽو زرداري ۽ آصف زرداري ڌماڪي جي مذمت ڪئي. بلاول ڀٽو زرداري ڪارڪنن کي زخمين کي رت جو عطيو ڏيڻ جي هدايت ڪئي آهي. اڳوڻي صدر آصف علي زرداري چيو ته دهشتگردن کي قانون جي پڪڙ ۾ آڻي عبرت جو نشانو بڻايو وڃي. هن چيو ته دهشتگرد معافي لائق ناهن. وڏي وزير سيد قائم علي شاهه ڌماڪي جي مذمت ڪئي. هن چيو ته دهشتگرد ملڪ ۽ قوم جا دشمن آهن. بلوچستان جي وڏي وزير ڊاڪٽر عبدالمالڪ بلوچ ،گهرو وزير سرفراز بگٽي، صوبائي وزير مير اظهار کوسي، پي پي بلوچستان جي صدر مير صادق عمراڻي، اڳوڻي ۽ صوبائي وزير علي مدد جتڪ پاران واقعي جي سخت مذمت ڪئي وئي. هنن دهشتگردن کي گرفتار ڪرڻ جو مطالبو ڪيو. وڏي وزير ڊاڪٽر عبدالمالڪ بلوچ چيو ته ان ڌماڪي جو آواز هن پاڻ ٻڌو . هن چيو ته بي گناھ انسانن کي مارڻ مذمت جوڳو عمل آهي. هن آءِ جي بلوچستان کان واقعي جي رپورٽ طلب ڪري ورتي آهي. صوبائي گهرو وزير سرفراز بگٽي جو چوڻ آهي ته دهشتگردن عام ماڻهن کي نشانو بڻايو آهي. پاڪستان مان آخري دهشتگرد جي خاتمي تائين اُها جنگ جاري رهندي.

آمريڪي دوري دوران قومي مفادن تي ڪنهن قسم جي سوديبازي نه ڪنداسين: نواز شريف

لنڊن (مانيٽرنگ ڊيسڪ) وزيراعظم محمد نواز شريف واضح ڪيو آهي ته آمريڪا جي دوري ۾ قومي مفادن تي ڪنهن قسم جي ڪا سوديبازي نٿي ڪري سگهجي، پاڪستان جي مفادن جي هميشه حفاظت ڪنداسين، اوڪاڙا ۾ پي ٽي آءِ جي اميدوار جي ضمانت ضبط ٿي وئي آهي، ڪجهه ته سبق سکي وٺن، سياستدانن کي عوام اڳيان ذميدار ڪردار ادا ڪرڻ گهرجي، هر مرحلي ۾ ڌانڌلي جو شور مچائڻ سياسي پختگي نه آهي، 2018 تائين پاڪستان مان لوڊشيڊنگ ختم ٿي ويندي، پاڪ چين راهداري تي ڪو دٻاءُ نه آهي، الله سائين جي فضل سان پاڪ چين راهداري جي رٿا وقت تي مڪمل ٿي ويندي، اوور سيز پاڪستانين کي ووٽ جو حق ملڻ گهرجي، ڀارت جي پاڪستان ۾ مداخلت جا ٺوس ثبوت گڏيل قومن کي ڏنا آهن، لنڊن ۾ ميڊيا سان ڳالهائيندي وزيراعظم چيو ته افغانستان جو امن خطي جي امن لاءِ ضروري آهي، پاڪ اسٽريٽجڪ لاڳاپن جيحوالي سان سوال تي هن چيو ته قومي مفادن تي ڪنهن قسم جي ڪا سوديبازي نٿي ڪري سگهجي، قومي مفادن جي هميشه حفاظت ڪنداسين، ان حوالي سان منهنجو تفصيلي بيان ڇپجي چڪو آهي، هن چيو ته تڪ اين اي 122 جي فيصلي کانپوءِ اسان اسٽي ناهي ورتو، اليڪشن وڙهڻ جي فيصلو ڪيو، ضمني چونڊن جا نتيجا سامهون اچي ويا آهن، اين اي 122 ۾ سردار اياز صادق سوڀ ماڻي آهي، ملڪ ۾ بهتر سياست لاءِ پيپلز پارٽي ۽ مسلم ليگ ن ميثاق جمهوريت تي صحيحون ڪيون ۽ چيو ته پاڪستان ۾ ميچيوئر سياست ٿيندي، ڌانڌلي جو الزام هڻندڙن جي سياست تي ڏک ٿئي ٿو، آمريڪي دٻاءَتي ايٽمي پروگرام کي محدود ڪرڻ جي افواهن جي سوال جي جواب ۾ وزيراعظم نواز شريف چيو ته 1998 ۾ جڏهن پاڪستان ايٽمي ڌماڪا ڪيا ان وقت به اسان جي حڪومت هئي، قومي مفادن تي ڪا سوديبازي نه ڪنداسين.

 

نوازشريف آمريڪا ۾ ڀٽي وانگر پاڪستان جو ڪيس وڙهي: خورشيد شاهه

سکر (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته پاڪستان بکيو ۽ سڃو نه آهي پنهنجا وسيلا استعمال ڪريون ته ڀارت جهڙا ڪيترائي ملڪ هلائي سگهجن ٿا مخالف اڳواڻ سکر ۾ ميڊيا سان ڳالهائيندي چيو ته نوازشريف آمريڪا ۾ ملڪي سلامتي ۽ خودمختياري تي ڳالهائي ڀارت جي خلاف ثبوت آمريڪا کي ڏيڻ جي ضرورت نه آهي خورشيد شاهه چيو ته اسان وٽ ڀارت کان وڌيڪ وسيلا آهن نوازشريف ملڪ جو وزيراعظم آهي ان کي ڪجهه ٿيو ته ڪرڻ وارا به نه رهندا هن چيو ته نوازشريف آمريڪا ۾ ڀٽي وانگر پاڪستان جو ڪيس وڙهي ڀٽو عوام جي ڳالهه ڪئي جنهن سبب هو اڄ به زنده آهي. خورشيد شاهه چيو ته لوڊشيدنگ ختم ڪرڻ لاءِ اسان 400 ارب ڏيون ها ته ڪرپشن جا الزام لڳن ها حڪمران رستا ضرور تيار ڪرائين پر هر رستو تخت لاهور طرف نه وڃي.

 

احتساب جي نالي تي سياست مخالفن خلاف ڪارروائي نه ڪئي وڃي: آصف زرداري

اسلام آباد (بيورو) پاڪستان پيپلز پارٽي جي ڪو چيئرمين آصف زرداري ڪي پي ڪي جي احتساب ڪميشن پاران عورت سينيٽر ستاره اياز کي حراسان ڪرڻ تي سخت ڳڻتي جو اظهار ڪندي چيو آهي ته هي تاثر فوري طور تي ختم ڪيو وڃي ته احتساب جي نالي تي مخالفن خلاف ڪارروايون ٿي رهيون آهن، پ پ ڪرپشن جي خلاف آهي ۽ چاهي ٿي ته سمورن ماڻهن جو احتساب ڪيو وڃي ۽ احتساب جي نالي تي سياست مخالفن خلاف ڪارروائي نه ڪئي وڃي، هن چيو ته پ پ جي گذريل حڪومت نه ته ملڪ ۾ ڪو سياسي قيدي هو ۽ نه ئي ڪنهن جي خلاف انتقامي ڪارروائي ڪئي وئي هئي، هن چيو ته احتساب شفاف ٿيڻ گهرجي، اڳوڻي صدر ياد ڏياريو ته ڪجهه هفتا اڳ ڪي پي ڪي ۾ پ پ جي اڳوڻي وزير لياقت شباب تي تشدد ڪيو ويو هو، سندس تعلق ڪي پي ڪي جي وڏي وزير پرويز خٽڪ جي تڪ چونڊ سان آهي جنهن سبب احتساب جي آڙ ۾ انتقام جو تاثر قائم ٿئي ٿو، هڪ ٻئي اڳوڻي صوبائي وزير ضياءُ الله آفريدي کي به ڪرپشن جي الزامن ۾ گرفتار ڪيو ويو ته هن صوبائي اسيمبلي ۾ اٿي بيهي چيو ته ڪي پي ڪي ڪابينا جا ڪجهه ماڻهو ڪرپشن ۽ اسملنگ ۾ ملوث آهن جن جا ثبوت به هن پيش ڪيا، پر حيرت جي ڳالهه آهي ته ڪنهن جي خلاف ڪا ڪارروائي ڪئي وئي ۽ نه ئي جاچ ڪئي وئي، ان سان اهو تاثر پيدا ٿئي ٿو ته احتساب کي سياسي مفادن لاءِ استعمال ڪيو پيو وڃي، هن چيو ته اهڙي وقت ستاره اياز خلاف ڪارروائي ٿي رهي آهي، ڪي پي ڪي جي احتساب ڪميشن جي ڪارڪردگي خراب آهي، هن چيو ته اخلاقيات  ۽ قانون مطالبو ڪري ٿو ته ڪي پي ڪي جو احتساب ڪميشن پنهنجي قدمن جي وضاحت ڪري نه ڪي ته هو حزب اختلاف خلاف انتقامي ڪارروائي شروع ڪري، هن چيو ته ڪي پي ڪي جو احتساب ڪميشن ۽ سياسي حڪمران ان ڳالهه جو احتساب ڏين ته اهي گذريل مهينن کان حزب اختلاف جي قانونسازن کي گرفتار ڪري رهيا آهن، جيتوڻڪ احتساب ڪميشن جي قيام جو نوٽيفڪيشن ان قانونساز جي گرفتارين کانپوءِ جاري ڪيو ويو آهي.

 

ٿر ڪول منصوبي سان ملڪ ۾ بجلي جو بحران ختم ٿيڻ سان گڏ ماڻهن جي زندگين ۾ به معاشي تبديلي اچڻ گھرجي: بلاول ڀٽو

ڪراچي(اسٽاف رپورٽر) پاڪستان پيپلپزارٽي جي چيئرمين بلاول ڀٽو زرداري چيو آهي ته ٿر ڪول پاور منصوبو سندس امڙ شهيد محترمه بينظير ڀٽو جو خواب هو ۽ اميد آهي ته سنڌ اينگرو ڪول مائننگ ڪمپني طرفان شروع ڪيل ٿر ڪول اينڊ پاور پروجيڪٽ 2018ع تائين عمل ۾ اچي ويندو، ضرورت ان ڳالهه جي آهي ته انهيءَ منصوبي سان ملڪ ۾ بجلي جو بحران ختم ٿيڻ سان گڏوگڏ ٿر جي ماڻهن جي زندگين ۾ به معاشي تبديلي اچڻ گھرجي، پاڪستان پيپلزپارٽي جي چيئرمين اهڙو اظهار اڄ بلاول هائوس ۾ سنڌ اينگرو ڪول مائننگ ڪمپني جي چيف ايگزيڪيوٽوآفيسر شمس الدين شيخ طرفان کيس بريفنگ ڏيڻ جي موقعي تي ڪيو، ان موقعي تي وڏو وزير سيد قائم علي شاهه، صوبائي وزيرن سيد مراد علي شاه، ڄام مهتاب ڏهر۽ ڄام خان شورو سميت سنيٽر تاج حيدر ۽ جميل سومرو به موجود هئا، سنڌ اينگرو ڪول مائننگ ڪمپني ۾ 51 سيڪڙو سنڌ حڪومت ۽ 49 سيڪڙو اينگرو ۽ ان جي ڀائيوارن جو شيئر آهي، سنڌ حڪومت ان جي اڳ ئي خود مختياري گارنٽي جاري ڪري ڇڏي آهي ۽ ان لاءِ اسٽيٽ بئنڪ ۽ نيشنل بئنڪ جي منظوري سان گڏ هاڻي وفاقي حڪومت جي تائيد جو انتظار آهي، 2 بلين آمريڪي ڊالرن جي سيڙپ وارو ٿرڪول اينڊ پاور پروجيڪٽ، خانگي سيڙپ وارو پنهنجي نوعيت جو سڀ کان وڏو منصوبو آهي، اهو منصوبو پاڪ چائنا ايڪنامڪ ڪوريڊورتحت سڀ کان اوليتي منصوبن ۾ شامل آهي جيڪو 2018ع ۾ مڪمل ٿيڻ جو امڪان آهي، بريفنگ دوران بلاول ڀٽو زرداري کي ٻڌايو ويو ته 38 مهينن اندر 485 ملين ڊالرز جي لاڳت سان 3.8 ملين ٽن ساليانوواري کليل کاڻ جو مائننگ پروجيڪٽ تيار ڪيو ويندو، جڏهن ته 1.1 بلين ڊالرز جي لاڳت سان 330-330 ميگاواٽ جا ٻه يونٽ به قائم ڪيا ويندا، شمس الدين شيخ وڌيڪ بريفنگ ڏيندي ٻڌايو ته ٿر ڪول منصوبي جي حوالي سان گھربل سمورا اڀياس، معاهدا، ريگيوليٽري گُھرجون، قرضن جا مامرا توڙي جامع انجنيئرنگ اڳ ئي مڪمل ٿي چڪي آهي، ٿر جي سائيٽ تي ٻئي بلاڪ جي کوٽائي تي ڪم ۾ به اڳڀرائي آهي، ان موقعي تي بلاول ڀٽو زرداري زور ڀريو ته انهي منصوبي ۾ ٿر جي مقامي ماڻهن جي مفادن کي اوليت ڏني وڃي ڇاڪاڻ ته آئون اهو منصوبو مڪمل ٿيڻ سان ئي ٿر جي مقامي ماڻهن جي زندگين ۾ تبديلي ڏسڻ چاهيان ٿو، هن چيو ته ٿر ڪول منصوبي ۾ مقامي ماڻهن کي نوڪريون ڏنيون وڃن ۽ بي دخل ٿيندڙ ماڻهن کي سمورين شهري سهوليتن سان بحال ڪيو وڃي، پ پ پ چيئرمين کي وڌيڪ ٻڌايو ويو ته سنڌ حڪومت اڳ ئي ري-سيٽلمينٽ پاليسي منظور ڪري چڪي آهي ۽ پهرين ڳوٺ کي 2017ع تائين مڪمل طور ري-سيٽل ڪيو ويندو۽ اهو نه صرف ٿر پر پوري پاڪستان جي رول ماڊل منصوبو هوندو ڇاڪاڻ ته ڪمپني طرفان اتي صحت ۽ تعليم سميت سموريون سهوليتون مڪمل ڪيون پيون وڃن، اينگرو ڪمپني جي عملدارن بريفنگ دوران ٿر ۾ بايو سيلائين زراعت متعارف ڪرائڻ جي حوالي سان به ٻڌايو ته ان سان ٿر ۾ سڄو سال مال لاءِ چارو موجود رهندو ۽ مختلف مرڪزن تي کير جمع ڪرڻ لاءِ سج جي روشني تي هلندڙ ڪول باڪس به استعمال ڪري سگھجن ٿا.

 

بينظير ڀٽو قتل ڪيس: سمورن سرڪاري شاهدن کي 26 آڪٽوبر تي پيش ٿيڻ لاءِ ٻيهر سمن جاري

راولپنڊي (بيورو) راولپنڊي جي دهشتگردي ٽوڙ عدالت، شهيد بينظير ڀٽو قتل ڪيس ۾ سمورن سرڪاري شاهدن کي 26 آڪٽوبر تي پيش ٿيڻ لاءِ ٻيهر سمن جاري ڪري ڇڏيا آهن. راولپنڊي جي دهشتگردي ٽوڙ عدالت ۾ شهيد بينظير ڀٽو قتل ڪيس جي ٻڌڻي ٿيڻي هئي پر جج راءِ ايوب جي موڪل تي هئڻ سبب ٻڌڻي بنا ڪارروائي جي ملتوي ڪئي وئي. عدالت پاران گرفتاري وارنٽ جاري ٿيڻ بعد ايس ايس پي طاهر ايوب عدالت ۾ پيش ٿيو پر جج موڪل تي هئڻ سبب سندس بيان رڪارڊ نه ٿي سگهيو. عدالت، ايس ايس پي طاهر ايوب سميت ٻين شاهدن کي 26 آڪٽوبر تي پيش ٿيڻ لاءِ ٻيهر سمن جاري ڪندي ٻڌڻي ملتوي ڪري ڇڏي. بينظير ڀٽو قتل ڪيس ۾ امريڪي صحافي مارڪ سيگل جي وڊيو لنڪ ذريعي رڪارڊ ڪيل بيان تي جرح نومبر جي پهرين هفتي ٿيندي.

 

مڪاني چونڊن جي تاريخ ۾ واڌ نه ٿيندي، چونڊ وقت تي ٿيندي: ناصر شاهه

ٺٽو (ڊ ر)  مڪاني ادارن واري صوبائي وزير سيد ناصرحسين شاه چيو آهي ته سنڌ ۾ مڪاني چونڊن جي تاريخ ۾ واڌ نه ٿيندي ۽ چونڊون مقرره وقت تي ئي ٿينديون ان حوالي سان سمورا انتظام مڪمل آهن. هن چيو ته صوبي ۾ سياسي اتحاد ٺهڻ ۽ اليڪشن وڙهڻ جو هر ڪنهن کي اجازت آهي ۽ ان عمل جي اسان ڀليڪار ڪريون ٿا ۽ پيپلز پارٽي پاران مڪاني چونڊن ۾ مخالفن سان ڀرپور مقابلو ڪري کين بدترين شڪست ڏني ويندي. هن وڌيڪ چيو ته سنڌ ۾ محرم الحرام دوران امن امان جي صورتحال قائم رکڻ جي حوالي سان سمورا انتظام مڪمل ڪيا ويا آهن ان ڏس ۾ وزير اعليٰ سنڌ سيد قائم علي شاه پاران آءِ جي سنڌ پوليس، ڊي جي رينجرز سميت ٻين قانون لاڳو ڪندڙ ادارن جي عملدارن سان ڪيتريون ئي گڏجاڻيون پڻ ڪري حفاظتي انتظامن جو جائزو ورتو آهي. هن چيو ته محرم الحرام جي حوالي سان سيڪيورٽي ادارن پاران خدشن کان پڻ آگاه ڪيو ويو آهي ان حوالي سان سنڌ حڪومت پاران مربوط حڪمت عملي تحت محرم الحرام دوران سيڪيورٽي سخت ڪئي ويندي. اهڙين ڳالهين جو اظهار اڄ هن جيمخانه ڪلب مڪلي ۾ لوڪل گورنمينٽ کاتي پاران يونيسيف ۽ ٽيلينور موبائل ڪمپني جي تعاون سان ٻارن جي موبائل فون ذريعي پيدائشي داخلا جي منصوبي واري افتتاحي تقريب بعد ميڊيا سان ڳالهائيندي ڪيو. مڪاني ادارن واري صوبائي وزير سيد ناصر حسين شاه ميڊيا جي نمائندن سان ڳالهائيندي چيو ته سنڌ ۾ مڪاني چونڊن ۾ دير نه ٿيندي پر پيپلز پارٽي کي ايم ڪيو ايم پاران تڪ بندين بابت داخل ڪرايل پٽيشن بعد سنڌ هاءِ ڪورٽ جي فيصلي تي ڪجھ تحفظات ضرور هئا جنهن تي پيپلز پارٽي پاران سپريم ڪوٽ ۾ وڃڻ جو فيصلو به ڪيو هو پر اسان جي پارٽي جي قانوني صلاحڪارن سان مشاورت بعد سنڌ هاءِ ڪورٽ ۾ ئي اسان جي پارٽي پاران پٽيشن داخل ڪئي وئي جنهن تي سنڌ هاءِ ڪورٽ پاران سُٺي موٽ ڏيندي ڪافي معاملن کي اليڪشن ڪميشن ذريعي حل ڪيو ويو آهي. هن چيو ته مڪاني چونڊن جي حوالي سان سنڌ هاءِ ڪورٽ ۾ اڄ صبح ٻڌڻي ٿي آهي جنهن ۾ چند هنڌن تي مڪاني چونڊن جي حوالي سان تڪ بندين جا معاملا رهن ٿا جيڪي اُميد ته جلد حل ٿي ويندا ۽ مڪاني چونڊون مقرر وقت تي ئي ٿينديون. هڪ سوال جي جواب ۾ مڪاني ادارن واري صوبائي وزير چيو ته ذوالفقار مرزا، نبيل گبول، صفدر عباسي، ناهيد خان ۽ ٻين جو هو دل سان احترام ڪري ٿو پر جيڪي ڳالهيون هو ڪري رهيا آهن ان کان عوام ۽ ميڊيا بخوبي واقف آهن. هن چيو ته هاڻ اهي اهڙي قسم جون ڳالهيون ڪري عوام کي بيوقوف نٿا بڻائي سگھن ۽ عوام پيپلز پارٽي سان گڏ آهي. هن وڌيڪ چيو ته ڪجھ ماڻهو پيپلز پارٽي کي ڇڏي ايم ڪيو ايم جوائن ڪن ٿا ۽ پوءِ وري ايم ڪيو ايم کي ڇڏي واپس نيون پارٽيون ٺاهڻ چاهين ٿا اها ڳاله سمجھ کان ٻاهر آهي. هڪ سوال جي جواب ۾ گوسڙو ۽ برطرف ڪيل ملازمن جي حوالي سان هن چيو ته هو صفائي سٿرائي، پاڻي سميت ٻين بلدياتي ضرورتن جي فراهمي ۾ ڪوتاهي ڪندڙن کي بلڪل برداشت نه ڪندو ۽ انهن خلاف سخت قدم کنيا ويندا. هن چيو ته گذريل وقتن ۾ جيڪي ماڻهو غير قانوني طور يا کاتي جي آفيسرن جي اندروني ملي ڀڳت سان مڪاني ادارن ۾ ڀرتي ڪيا ويا ۽ اهي ماڻهو ڪم به نٿا ڪن ته انهن خلاف ڪاروائي ڪئي ويندي. هن چيو ته پ پ پ جي پاليسي آهي ته ڪنهن کي به بيروزگار نه ڪجي ۽ هميشه اهو ئي نعرو لڳو آهي ته بي بي آئيگي روزگار لائيگي پر اهو ضرور ٿيندو ته جيڪڏهن ڪنهن معزز خاندان يا زميندار فيملي سان تعلق رکندڙ جي عزيز، مٽ مائٽ يا پُٽ سئيپر جي جاءِ تي ڀرتي ٿيل هوندو ۽ اهو صفائي سٿرائي جو ڪم به نه ڪندو ته ان سان انهيءَ علائقي جي صفائي سٿرائي متاثر ٿيندي اهڙن ملازمن کي ڪنهن به صورت ۾ برداشت نه ڪيو ويندو ۽ کين برطرف ڪيو ويندو. هن ٺٽي ۾ صفائي سٿرائي، پيئڻ جي پاڻي جي فراهمي سميت ٻين گھربل سهولتن جي فراهمي کي يقيني بڻائڻ لاءِ پڻ لاڳاپيل آفيسرن کي موقع تي ئي سخت هدايتون ڏنيون. ان کان اڳ هن جيمخانه ڪلب مڪلي ۾ لوڪل گورنمينٽ کاتي پاران يونيسيف ۽ ٽيلينور موبائل ڪمپني جي سهڪار سان ٻارن جي پيدائشي داخلا جي منصوبي جي افتتاحي تقريب کي خطاب ڪندي چيو ته پيدائشي داخلا هر ٻار جو بنيادي حق ۽ وقت جي ضرورت آهي ان عمل سان ٻارن جي حقن جي تحفظ سان گڏو گڏ حڪومت لاءِ پڻ ٻارن لاءِ قانون سازي ڪرڻ ۽ انهن جي فلاح و بهبود لاءِ پاليسي مرتب ڪرڻ ۾ مددگار ثابت ٿيندي. هن چيو ته جيستائين حڪومت وٽ ٻارڙن بابت صحيح انگ اکر موجود نه هوندا تيستائين انهن لاءِ تعليم، صحت ۽ ٻين شعبن ۾ فنڊز مختص ڪرڻ جو پڻ صحيح طريقي سان اندازو لڳائي نه سگھبو. هن چيو ته هو يونيسيف ۽ ٽيلينور ڪمپني جو ٿورائتو آهي ته انهن ٻارن جي موبائل ذريعي پيدائشي داخلا واري عمل کي يقيني بڻايو ۽ شروعاتي طور تي ٺٽي ضلعي جي گھارو ۽ ڌاٻيجي شهرن ۾ ٻارن جي پيدائشي داخلا ڪئي وئي. هن خطاب ڪندي وڌيڪ چيو ته پيدائشي سرٽيفڪيٽ جاري ڪرڻ جي مد ۾ يونين ڪائونسلن جي سيڪريٽرين پاران ماڻهن کان وڌيڪ رقم وصول ڪرڻ واري شڪايتن تي ڪيترن ئي يوسي سيڪريٽرين خلاف ڪاروائي عمل ۾ آندي وئي آهي. هن چيو ته ميديا ۽ عوام کي گھرجي ته اهڙي قسم جي شڪايتن ۽ نا انصافين بابت کيس آگاهي ڏين ته جيئن ملوث ماڻهن خلاف سخت ڪاروائي ڪري غريب ماڻهن کي انصاف مهيا ڪيو وڃي. ان موقعي تي يونيسيف جي ڪنٽري ريپريزنٽيٽو اينجيلا ڪيريني، ڊائريڪٽر جنرل لوڪل گورنمينٽ فهيم جوڻيجو، ڊپٽي ڪمشنر ٺٽو نديم الرحمان ميمڻ، ايس ايس پي ٺٽو فدا حسين مستوئي، ٽيلينور موبائل ڪمپني جي نمائندي فرينڪ ڊينگرڊ سميت ٻين مقررين پڻ ٻار جي پيدائشي داخلا جي اهميت بابت روشني وڌي. ان موقعي تي مڪاني ادارن واري صوبائي وزير سيد ناصر شاه موبائل فون ذريعي داخلا ٿيندڙ ٻارن جي والدين ۾ سرٽيفڪيٽ پڻ ورهايا.

 

اليڪشن ڪميشن سنڌ ۽ پنجاب ۾ مڪاني چونڊن جي ٽئين مرحلي جي شيڊول ۾ تبديلي ڪري ڇڏي

اسلام آباد (بيورو) اليڪشن ڪميشن، سنڌ ۽ پنجاب ۾ مڪاني چونڊن جي ٽئين مرحلي جي شيڊول ۾ تبديلي ڪري ڇڏي آهي، آخري مرحلي لاءِ پولنگ هاڻي 3 ڊسمبر بدران 5 ڊسمبر تي ٿيندي. ذريعن موجب، اليڪشن ڪميشن  پاران، شيعا تنظيم جي اڳواڻن جي درخواست ۽ ڪربلا جي شهيدن جي چاليهي سبب سنڌ ۽ پنجاب ۾ مڪاني چونڊن جي آخري مرحلي جي شيڊول جي تاريخ تبديل ڪئي وئي آهي. اليڪشن ڪميشن جي ذريعن موجب، سنڌ ۽ پنجاب ۾ مڪاني چونڊن جي آخري مرحلي لاءِ هاڻي پولنگ 3 ڊسمبر بدران هاڻي 5 ڊسمبر تي ٿيندي ۽ تاريخ رڳو 2 ڏينهن اڳتي وڌائي وئي آهي. ذريعن موجب، اليڪشن ڪميشن ان سلسلي ۾ نوٽيفڪيشن به تيار ڪري ورتو آهي، جيڪو اڄ ئي جاري ٿيڻ جو امڪان آهي. سنڌ ۾ ٽئين ۽ آخري مرحلي لاءِ ڪراچي جي سمورن ضلعن ۾ مڪاني چونڊون ڪرايون وينديون. ان کان اڳ چيف اليڪشن ڪمشنر سان ملاقات دوران شيعا تنظيم جي اڳواڻن به مڪاني چونڊن جي آخري مرحلي جي تاريخ تبديل ڪرڻ جي درخواست ڪئي هئي.

 

ڀارتي ڪرڪيٽ بورڊ جي آفيس تي شيوسينا جو حملو افسوسناڪ آهي: آءِ سي سي

دبئي (مانيٽرنگ ڊيسڪ) ) انٽرنيشنل ڪرڪيٽ ڪائونسل هندو انتهاپسند شيوسينا پاران ڀارتي ڪرڪيٽ بورڊ جي آفيس تي حملي کي افسوس جوڳو قرار ڏيندي چيو آهي ته حملو ڪرڪيٽ لاءِ نقصان ڏيندڙ آهي ڪرڪيٽ کيڏندڙ ملڪن کي گڏيل تعاون سان راند کي ترقي ڏيڻ گهرجي دبئي ۾ پريس ڪانفرنس ڪندي آءِ سي سي جي چيف ايگزيڪيوٽو ڊيوڊ رچرڊسن چيو ته سيوسينا پاران ممبئي ۾ بي سي سي آءِ جي آفيس تي حملو افسوسناڪ آهي حملي سان ڪرڪيٽ کي نقصان ٿيندو واضح رهي ته ڀارتي ڪرڪيٽ بورڊ جي درخواست تي پاڪستان ڪرڪيٽ بورڊ جو چيئرمين شهريارخان ۽ ايگزيڪيوٽو ڪميٽي جي ميمبر نجم سيٺي پاڪ ڀارت ڪرڪيٽ جي بحالي لاءِ ممبئي پهتا ته هندو انتهاپسند تنظيم شيوسينا جي ڇاڙتن بي سي سي آءِ جي آفيس تي حملو ڪيو شيوسينا جي غنڊن ڪجهه ڏينهن اڳ خورشيد قصوري جي ڪتاب جي ڀارت ۾ مهورتي تقريب کي به ناڪام ڪرڻ لاءِ تقريب جي منتظم مٿان تشدد ڪيو هو جڏهن ته پاڪستاني فنڪار استاد غلام علي جي ڪنسرٽ کي به ملتوي ڪرائي ڇڏيو هو.

 

شو سينا جي ڪارڪنن جو ممبئي ۾ انڊين ڪرڪيٽ بورڊ جي آفيس جو گهيراءُ ، پاڪ -ڀارت اختيارين وچ ۾ رٿيل ملاقات ملتوي

ممبئي (مانيٽرنگ ڊيسڪ) هندو انتهاپسند تنظيم شو سينا جي ڪارڪنن ممبئي ۾ انڊين ڪرڪيٽ بورڊ جي آفيس جو گهيراءُ ڪري ورتو،جنهن بعد سيريز لاءِ پاڪ، ڀارت اختيارين وچ ۾ رٿيل ملاقات ملتوي ڪئي وئي،جڏهن ته آءِ سي سي حملي جي مذمت ڪئي آهي. ڀارتي ميڊيا موجب هندو انتهاپسند تنظيم شوِ سينا جي ڪارڪنن،ممبئي ۾ بي سي سي آءِ جي آفيس تي حملو ڪري ڏنو. هندو انتهاپسندن، پاڪستان ڪرڪيٽ بورڊ جي اختيارين سان ملاقات رد ڪرڻ لاءِ ڀارتي ڪرڪيٽ بورڊ جي صدر ششانڪ منوهر کي ڌمڪيون ڏنيون ۽ مطالبو ڪيو ته پي سي بي چيئرمين شهريار خان کي پاڪستان واپس موڪليو وڃي. شهريار خان ۽ ششانڪ منوهر جي ملاقات ۾ پاڪ ڀارت سيريز تي ڳالهه ٻولهه ٿيڻي هئي، پر انتهاپسندن جي حملي سبب ٻنهي ملڪن جي ڪرڪيٽ اختيارين اڄوڪي ملاقات ملتوي ڪري ڇڏي. پي سي بي چيئرمين شهريار خان جو چوڻ آهي ته هـُو ڀارتي ڪرڪيٽ بورڊ جي دعوت تي آيو،ملاقات دوران ڊسمبر ۾ رٿيل پاڪ، ڀارت سيريز تي غور ويچاريو وڃي ها. ٻئي طرف آءِ سي سي ڀارتي ڪرڪيٽ بورڊ جي آفيس تي حملي جي مذمت ڪندي افسوس جو اظهار ڪيو آهي. آءِ سي سي جي چيف ايگزيڪيوٽو ڊيوڊ رچرڊسن جو چوڻ آهي ته ڪرڪيٽ کيڏندڙ ملڪن ۾ سهڪار کي هٿي وٺرائڻ گهرجي.