تازيون خبرون

Daily Archives: October 17, 2015

دپيڪا پڊڪون ڀارتي ميگزين جي ٽائيٽل جي زينت بڻجي وئي

ممبئي(اي پي پي) بالي ووڊ اداڪاره دپيڪا پڊڪون ڀارتي ميگزين ”جي ڪيو انڊيا” جي ٽائيٽل جي زينت بڻجي وئي. سڌ سماءَ وارن ذريعن دپيڪا ٽائيٽل ۾ ڪارو ويس پائي گليمرس انداز ۾ ويٺل نظر اچي رهي آهي ۽ ڪنهن شهزاديءِ کان گهٽ نه پئي لڳي. دپيڪا جو اهو ويس گورو گپتا ڊيزائن ڪيو آهي. ميگزين جو اهو شمارو جلد مارڪيٽ ۾ دستياب هوندو.

 

واڪا واڪا گرل شڪيرا پنهنجن پٽن سان انسٽا گرام تي تصوير جاري ڪري ڇڏي

لاس اينجلس(اي پي پي) هالي ووڊ گلوڪاره شڪيرا پنهنجن پٽن سان انسٽا گرام تي تصوير جاري ڪري ڇڏي. بالي ووڊ جي سڌ سماءَ وارن ذريعن مطابق گلوڪاره شڪيرا تازو سوشل ميڊيا تي تصوير جاري ڪئي جنهن ۾ هوءَ پنهنجن پٽن ميلن ۽ ساشا کي هنج ۾ کڻي ويٺي آهي ۽ نهايت خوشگوار موڊ۾ نظر اچي رهي آهي. شڪيرا انسٽا گرام تي پيغام ۾ چيو آهي ته سندس پٽ هن جي زندگي آهن ۽ انهن کان سواءِ هوءِ جيئڻ جو تصور به نه ٿي ڪري سگهي.ا

 

ابوظهبي ٽيسٽ ميچ جو چوٿون ڏينهن ختم،انگلينڊ 8 وڪيٽن جي نقصان تي 564 رنسون ٺاهي ورتيون

ابوظهبي(اسپورٽس نيوز) ابوظهبي ٽيسٽ ميچ ڊرا ٿيڻ طرف وڌڻ لڳي،انگلينڊ ٽيم  چوٿين ڏينهن جي  ختم ٿيڻ تائين 564 رنسون ٺاهي ورتيون، انگريز ڪپتان اليسٽر ڪُڪ 263 رنسون ٺاهي نيٺ آئوٽ ٿي ويو، ابوظهي ٽيسٽ ميچ جي چوٿين ڏينهن تي انگلينڊ 290 رنسون ۽ 3 وڪيٽن جي نقصان تان پنهنجي پهرين اننگ شروع ڪئي ۽ اليسٽر ڪُڪ پاڪستاني بالرن کي سڄو ڏينهن ڪُٽيندو رهيو، شام واري آخري وقفي کانپوءِ پاڪستان پاران ڊبل سينچري اسڪور ڪندڙ شعيب ملڪ مڙسي ڪندي  اليسٽر ڪُڪ کي آئوٽ ڪيو.ڪرڪيٽ ماهرين جو چوڻ آهي ته پاڪستان ڪرڪيٽ بورڊ پاران ٺهرايل پچ  پاڪستاني بالرن کي مشڪل ۾ وجهي ڇڏيو آهي ۽ بالر سولائي سان ڪٽڪو کائيندا رهن ٿا.انگلينڊ ٽيسٽ ميچ جي ڇوٿين ڏينهن جي پڄاڻي تائين 564 رنسون ٺاهي ورتيون آهن،جڏهن ته اڃان سندس 2 وڪيٽون هٿ ۾ آهن.پاڪستان پاران شعيب ملڪ ۽ وهاب رياض، 2، 2 وڪيٽون وٺڻ ۾ ڪامياب ٿيا جڏهن ته راحت علي، ذوالفقار بابر ۽ عمران خان هڪ هڪ وڪيٽ وٺي سگهيا،ٻئي پاسي ڪرڪيٽ ماهرين جو چوڻ آهي ته پاڪستان ڪرڪيٽ بورڊ پاران ٺاهيل پچ بيٽسمينن لاءِ سُٺي ثابط ٿي.

 

ٽين ون ڊي ڪرڪيٽ ميچ ۾ ڪيريئر جون 6هزار رنسون مڪمل ڪري وٺندس: هاشم آمله

راجڪوٽ (اسپورٽس نيوز) ڏکڻ آفريقا جي نالي واري اوپننگ بيٽسمين هاشم آمله چيو آهي ته هو ڀارت خلاف سڀاڻي (آچر) تي ٽئين ون ڊي ڪرڪيٽ ميچ ۾ پنهنجي ون ڊي ڪرڪيٽ ڪيريئر جون 6 هزار رنسون مڪمل ڪرڻ جو اعزاز حاصل ڪري وٺندو، هاشم آمله کي ون ڊي ڪرڪيٽ ۾ ڪيريئر جون 6 هزار رنسون مڪمل ڪرڻ لاءِ 27 رنسون گهربل آهن، اهو اعزاز حاصل ڪندڙ هو چوٿون ڏکڻ آفريقن رانديگر بڻجي ويندو.

 

ڪڪرا ڪربلا جا…… جهانگارا کان جهرڪ تائين ايام عزا جو سفر : بيدار جعفري

سيوهڻ لڳ ڀڳي ٽوڙهي ۽ لڪي جي لڪن مان ڪڏهن لاڳيتو ۽ ڪڏهن گاهي به گاهي ” ياحسين ياحسين“ جون صدائون ٻڌڻ ۾ اچن ٿيون. اهو گريو، سينا ڪوبي ، روڄ راڙو ۽ ماتم ڪو هاڻوڪو ناهي. جتي سڄو سال قلندري ڌمال هلندي آهي اتي هن موسم ۾ سُر ۽ سوز به سوڳوار ٿي وڃن ٿا. لاهوت لامڪان ويبدي جيڪي پانڌيئڙا هتان گذرن ٿا سي جهانگارا ۽ باجارا جي ثقافتي قدرن ، نج سنڌي مرثئي ، جوڳين جي جهونجهار، آديسين جي آهن ، منڇر جي ماتمي تلاطم ، مقامي سادات جي ايثار ۽ قرباني کان به آگاهه آهن. ها، اهو سنڌ جو اڳوڻو وڏو وزير سيد عبدالله شاهه ئي هو، جنهن پنهنجي جنم لاءِ دعا گهريل ڌرتي تي باجارا ۾ وڏو علم پاڪ نصب ڪيو هو . اڄ به دنيا وارا هن جو ذڪر ان شاندار علم پاڪ جي تنصيب سان ڪن ٿا. آراضي جي آس پاس سيد ڪوڙل شاهه جي سڳوري خاندان جي خدمتن جي واکاڻ ڪهڙن لفظن ۾ڪجي، ٿورو پري ٽلٽي جي عظيم عزادار سيد گنبل شاهه جون رباعيون ، ڏوهيڙا، ذڪر حسين جي محفل به زبان زد عام آهي. اهي سمورا سادات اصل ۾ سيد ثابت علي شاهه ڪربلائي جي فڪري قبيلي سان تعلق رکن ٿا جيڪي جڏهن به زبان تي لفظ ” حسين “ آڻيندا هئا ته سندن اکين جو سمونڊ ڇيهه ڏئي ڇڄي پوندو هو. خدا ڄاڻي لفظ حسين سان اکين جي آب جي نسبت ڪهڙي آهي جو لاکيڻي لطيف کي به هي چوڻو پيو :

اکين ڪين ڪيو جو رت نه رنائون

پلاڻيندي پرين کي بيٺي ڏٺائون

انهن اکين آئون ڪهڙو ڪجل پايان

مونکي جهانگارا جي جوءِ واري هو به هو ساڳئي عزاداري جو چٽو پٽو عڪس سنڌ جي قديم راڄ ڌاني ” جهرڪ“ ۾ به نظر اچي ٿو . جيتوڻيڪ نوري آباد کان جهمپير ايندي ان ڏورانهين پهاڙي ۽ ڪوهستابي پڊن تي مرتضيٰ آباد جي گهٽين مان ساڳئي گونج ڪنين پوي ٿي پر جهرڪ ۾ جئين ۾ جهير پون ٿا . ” جهرڪ“ ڇا آهي؟ قوم جي ابي محمد علي جناح رحه جي جنم ڀومي ، سنڌو جي ڪناري آباد سنڌ جو قديم ڳوٺ ، آغا خانين ۽ اسماعيلين جي سرگرمين جو ماضي وارو مضبوط مرڪز ، سيٺ جعفر خواجه جي تهجد گذاري وارو مسڪن ، امام بارگاهه ۾ پوريل 72 شهيدن جو آخري آرام گاهه ، سنڌ جي پهرين ميونسپل ڪاميٽي ، وادي مهران جو سهڻو سينٽوريم ، ڌرتي جي ڪچي ۽ پڪي جي گذر گاهه ، تاريخي وهڪري ۾ ڌارين جي معرڪه آرائي جو مرڪز ، ڌرتي ڌڻين يا ڌراوڙن جي عزاداري جو سڀ کان انمول مرڪز ……….!!! کارادر جا هڙئي عزا خانا هتان جي رهاڪن جا بنايل آهن ۽ اڃا وڌيڪ سولو اهو ته جهرڪ جا ماڻهو   سڄي سنڌ ، سڄي ملڪ ۽ سڄي دنيا ۾ عزاداري جا سفير آهن. هي جتي به ويا آهن اتي ” ذڪر حسين “ جي هڪ نئي دنيا آباد ڪري رهيا آهن. ان ۾ ڪا نئين ڳالهه نه آهي ته ڊيلي ڊان ڪراچي جو مشهور ترين ڪرائم رپورٽر چاچا غلام علي جنهن ملڪي سطح تي شهرت ماڻي سو به هتان جي چيڪي مٽي جي پيداوار هو ۽ هن عزادار آخري ڏينهن نئين آباد ڪراچي جي هڪ سوڙهي گهٽي ۾ واقع امام بارگاهه غريب الغربا ۾ گهاريا. مون 80عه واري ڏهاڪي جي ڏينهن ۾ اکين سان اهو به ڏٺو جو کارادر ۽ کڏي مارڪيٽ جا پوڙها خواجه گجراتي ، سنڌي ، اردو گاڏڙ پولي ۾ محرم جو چنڊ ڏسڻ کان اڳ هجوم ۾ هڪ پئي کي ٻڌائيندا هئا ته فلاڻي تاريخ تي جهرڪ هلبو . هاڻي ته اهي ڪراچي جي حالتن سبب اولڊ ايريا کان ڪڻو ڪڻو ٿي ويا آهن پر ويجهي ماضي ۾ هو کارادر جي عزاداري جي به وڏي رونق رهيا . ننڍي کنڊ جي وڏي سياسي ليڊر جعفر فندو جو جڳ مشهور وارث غلام علي فندو جيتوڻيڪ ٺٽي ضلعي جي ويران وسندي ” رڙي“ کي وساري نه سگهيو آهي تڏهن به جڏهن هن اڳيان جهرڪن جو ذڪر ڪبو آهي ته سندس اکيون آب ديده ٿي وينديون آهن. عزا خانه زهرا عه ڪراچي جو عزادار شوڪت علي ويساڻي ، ريڊيو پاڪستان جو امداد علي خواجه ، پي آئي اي جو محسن علي ، مشهور سياستدان ڊاڪٽر الطاف حسين ۽ سوين ٻيا به جهرڪ سان نسبت رکن ٿا.سائين جي ايم سيد خوجن جي ٻن ڌڙن ننڍي جماعت ۽ وڏي جماعت خواجه شيعه اثناءِ عشريه ۽ خواجه اسماعيليه جي تاريخي رزمگاهه به جهرڪ کي قرار ڏنو آهي.

سج لهڻ کان ٿورو اڳ جهرڪ جي ايڏين ٽيڏين گهٽين ۾ پير رکڻ مهل روح مان رڙ نڪري     وڃي ٿي مونکي خواجه عبدالعلي – ڪرم علي جو رثائي ڪلام فضا ۾ اڄ به گونجندي نظر اچي ٿو . جيئن بهار ۽ سانوڻ رت ۾ ماکي جا مکا گلن جي سرهاڻ ۽ رس جي ڳولا ۾ نڪري پوندا آهن تئين محرم جي چنڊ ڏسڻ کان اڳ عبدالعلي جو ڪلام سيد ثابت علي ۽ پروفيسر سبط جعفر ، انيس ۽ دبير جي رڇنائن جيان مرقد حسين عه جو طواف شروع ڪري ٿو. منهنجي من جي مانڌاڻ ۾ هي اشعار وڌيڪ بيچيني پيدا ڪن ٿا:

نصرت شبير ڪا گر ايڪ لحمه بي ملي

زندگي اتني بهت هي زندگي ڪي واسطي

پر جڏهن چاهجي ٿو ته اسان جي وستي ۾ سانئڻ زهرا عه تشريف فرما ٿئي ته پوءِ

غم حسين ڪا مجهه په ڪرم هي ورنه

ڪهان غريب ڪا گهر ڪهان حسين ڪي مان

مونکي هن سرزمين جي ڪنڊ پاسي ڀائو صادق علي / لطف علي وارن جي حويلي جي هڪ پاسي واقع عورتن جي قديم عزاداري واري مرڪز ۾ اها ڪيفيت محسوس ٿي ! جتي سالن کان سڏڪا روان رهن ٿا.

مرحوم آغا حسن علي شاهه اول ۽ هزهائينيس پرنس آغا خان چوٿون سان منصوب 1843 واري محلات کان وٺي خواجه شيعه اثناءِ عشريه جماعت جي عمارتن ، مسجد ، امام بارگاهه ۽ قديم پڙ تائين هڪ وڏي تاريخ جو تسلسل نظر آيو. اتي علامه عارف حسين الحسيني جي شهادت واري ڏينهن 5 آگسٽ 1988 تي جديد اڏاوت مڪمل ٿي هئي ۽ اتي جشن عيد غدير ۽ جشن عيد مباهلا وارين تقريبن ۾ سڄي سنڌ اٿلي پئي هئي.

1941 ۾ حسيني انتظاميا ڪاميٽي جون واڳون عبدالعلي جي هٿ ۾ آيون. هي به هڪ عزادار گهراڻو آهي. جنهن جي پونئيرن نسل در نسل حسينيت جي ترويج ڪئي آهيئ. اڄ جڏهن جهرڪن جي عزاداري ٿيندي آهي ته اتي عبدالعلي سان گڏ مرتضائي ، محسن ، سيد ثابت علي ، ٻڍل بيگ ۽ ٻين جا مرثيا پڙهيا ويندا آهن. هي جهرڪ آهي جنهن جي عزادارن جون شاخون سڄي لاڙ ۾ نظر اچن ٿيون . ميرپوربٺورو ، بدين، ٺٽو، نندو شهر، ڪڍڻ ، پهاڙ مري ، ٽنڊوباگو، حيدرآباد يا ڪراچي گهمي ڏسون ، کارادر ۾ صديون اڳ جوڙايل ڏاتر ڏني مسافر خاني جي آس پاس ڏانهن نهاريون يا تلهار ۾ هن برادري جي ڪاڇيڙي نبيري ٿئي اوهان کي سمورا مائٽ گڏ نظر ايندا ۽ صدين کان جهرڪن جي خواجن جي جهنڊي هيٺ سوين ٻيا قافلا ڪربلا پهچندا آهن.ٺٽي ضلعي کي ٻن حصن ۾ ورهائيندڙ ڊاڪٽر الطاف حسين جو نسبتي تعلق به جهرڪ سان آهي. پاڪستان جي اڳوڻي صدر آغا شاهي ٺٽي ۾ پنهنجي ڊپٽي ڪمشنري واري ايام ڪاري ۾ جڏهن غلطي سان سيٺ جعفر خواجه جي هڪ وارث کي گرفتار ڪرايو ته فاطمه جناح کيس چورائي موڪليو ته ميان خيال ڪر اهي ماڻهو محمد علي جناح جا مائٽ آهن.

جهرڪن واري محلات ۽ قديم پڙ وچ ۾ قائد اعظم محمد علي جناح جي جنم ڀومي آهي.جيڪا هن وقت ويران حالت ۾ نظر اچي ٿي . پر محمد علي جناح جي وڏڙن واري قديم پڙ تي رسول پاڪ صه جي هيءَ حديث اڃا درج آهي : ” جنهن حسن ۽ حسين سان محبت ڪئي تنهن مونسان محبت ڪئي ، جنهن حسن ۽ حسين سان بغض رکيو تنهن مونسان بغض رکيو “

انڊس هاءِ وي لڳ آباد جهانگارا ۽ قومي شاهراهه جي هڪ ڇيڙي تي آباد جهرڪ جي ماڻهن جي سوچ ، مزاج ۽ معيار ساڳيو محسوس ٿئي ٿو اهي شهر فطرت جي ترجماني ڪن ٿا مونکي ٻنهيءِ هنڌن تي ڪربلائي جو هي ڪلام ساڳئي جوش ۽ جذبي سان ٻڌڻ ۾ آيو.

اي خدا جا لاڏلا سردار سرور يا حسين !

مصطفيٰ جا ساهه نيڻن ٺار دلبر ياحسين!

مرتضيٰ سنهنجو نپايئي جيءَ برابر ياحسين !

ظالمن ناحق رنجائيءَ واءِ ٻر ٻر ياحسين !

جهرڪ ۾ سنڌي مرثئي جو خزانو لڪل آهي ڳولي ڏسون . لاڙ پاسي سمورا ماڻهو ان ذڪر کي جاري رکيو اچن پيا. رڳو اڳتي وڌڻ جي دير آهي.

ارشاد نبي صه هي ڪه مددگار هين ميري

فرماتي هين حيدر ڪه يه غمخوار هين ميري

حضرت ڪا سخن هي ڪه عزادار هين ميري

مين ان ڪا هون يه طلبگار هين ميري

يه آج اگر رو ڪه همين ياد ڪرين گي

هم قبر ۾ ان لوگون ڪي امداد ڪرين گي

 

 

 

 

 

جمهوري قوتن تي تنقيد ڪندڙن جي تاريخ: نسرين چانڊيو/اڳوڻي ايم پي اي

مرڪزي حڪمران جماعت ۾ سڀ وزير بدعنوانين رستي وڏي ڪمائي يعني حرام جي آمدني حاصل ڪرڻ لاءِ وزيرائپون ۽ وڏا عهدا ماڻڻ لاءِ شامل ٿيل آهن، ميان شير علي فيصل آباد جو اڳوڻو ميئر چون ٿا ته پٽ کي فيصل آباد ۾ ميئرشپ وٺي ڏيڻ لاءِ نواز ليگ خلاف پريس ڪانفرنس ڪئي آهي، پ پ آمريت جون پاڙون پٽڻ لاءِ وڙهندي رهي، عوام کي روزگار ڏيڻ لاءِ ڪم ڪندي رهي، جمهوري قوتن خلاف تنقيدڙ ميان ۽ ضياءَ الحق جا پاليل آهن، انهن جي تاريخ پاپ ۽ گناهه سان ڀريل آهي، سنڌ جي حڪومت جي جنهن به کاتي ۾ ويندئو ته اتي توهان کي سنڌي ماڻهو ملازمت ۾ ملندا، جيڪڏهن توهان انهن کان پڇندئو ته توهان کي ڪهڙي دور ۾ نوڪري ملي ته گهڻو ڪري انهن جو جواب هڪ ئي هوندو ته اسان کي پيپلزپارٽيءَ جي حڪومت ۾ نوڪري ملي يا وري چوندا ته اسان کي ڀُٽن جي دور حڪومت ۾ ملي، اها هڪ حقيقت آهي ته سنڌ ۽ سنڌ جي ماڻهن کي روزگار وارو عوام جي چونڊيل حڪومت ئي ڪيو، دانشور ۽ ڏاها چوندا آهن پ پ جي دور ۾ سنڌ جي عوام کي حڪومتي ادارن ۾ نمائندگي ملندي آهي ۽ نواز ليگ دور ۾ سنڌ جي نمائندگي ختم ڪئي ويندي آهي.

سنڌ تي آمريتي قوتن جا نمائندا مڙهيا ويندا آهن، اڳي به نواز شريف جي دور ۾ سنڌ ۾ انهن ماڻهن جي حڪومت ٺاهي وئي جيڪا ضياءُ الحق جي مارشل لائي آمريت جا حامي هئا، نواز شريف سيد مظفر شاهه کي مدد ڏئي پ پ جي چونڊيل نمائندن کان حڪمرانيءَ جو حق کسي حڪومت ڏني هئي، غوث علي شاهه يا اختر علي قاضي سنڌ تي وزيراعليٰ ٿيا سي آمريت جا نمائندا هئا، انهن جو ساٿي ضيا جي دور ۾ به ميان صاحب هئو، ميان صاحب ۽ ان جي گهڻن مسلم ليگي اڳواڻن کي ضياءُ الحق جو پاليل هجڻ تي فخر هوندو هيو ۽ اهي ضياءُ الحق جي ورسيءَ شريڪ ٿي قسم کائيندا هئا ته ضياءُ الحق جي ڇڏيل مشن ۽ تحريڪ کي اهي پورو ڪندا، ضياءُ الحق جو مشن پاڪستان ۾ آئين تباهه ڪرڻ هو.

ضياءُ الحق کي ايشيا جو ماڊل ڊڪٽيٽر چوندا هئا، اسلامي نطام نافذ ڪرڻ جو ڪوڙ ۽ دوکو ڏئي ملن کي پاڻ سان ملائي جمهوريت، قومي اسيمبلي، صوبائي اسيمبلين کي تباهه ناس ۽ بند ڪرڻ ضياءُ الحق جو مقصد هو، ان جو ايمان افغانستان ۽ پاڪستان جي گهٽ پڙهيل علائقن جي ماڻهن کي اسلامي مجاهدين ۽ جهادي ٺاهي سموري پاڪستان افغانستان ۽ ٻين ملڪن ۾ خودڪش بمبارن سان لکين بيگناهه انسانن جو قتلام ڪرڻ آهي، دائمي دهشتگرديءَ ۽ مذهبي جنونيت پيدا ڪرڻ ضياءُ الحق جي من جي مراد هئي، ان جو مقصد هيو، اهو مقصد نواز شريف جهڙن جي حمايت سان ايشيا جو ماڊل ڊڪٽيٽر پورو ڪري ويو، قدم قدم تي انسان خور انتهاپسند جنوني ماڻهو پيدا ڪرڻ جا دين جي نالي ۾ ادارا ٺاهڻ ميان صاحب جي مرشد جو مقصد هيو ۽ هاڻ هو ڏکڻ پنجاب جيڪو دهشتگرديءَ جو ڳڙهه آهي ان خلاف ڪو به قدم کڻڻ لاءِ تيار ناهي.

ضياءُ الحق حڪومت تي قبضو ڪري لکين سنڌين کي نوڪرين مان ڪڍي ڇڏيو ڇو ته انهن کي ڀٽي جي دور ۾ ملازمتون ۽ روزگار مليا هئا، انهن بيروزگارن به ڀٽي جي حمايت ڪئي انهن جمهوريت کي پنهنجي زندگي جيترو پيارو سمجهيو ۽ جمهوريت لاءِ قرباني ڏني، انهن جانيون قربان ڪيون، 18 آڪٽوبر تي سنڌ جي شهيد راڻي محترمه بينظيرڀٽو عوام کي پرويز مشرف جي آمريت مان آزاد ڪرائڻ لاءِ وطن موٽي آئي ته 30 لک عوام انهيءَ جو استقبال ڪرڻ لاءِ ايئرپورٽ ۽ ان جي رستن تي پهتو، 18 آڪٽوبر تي محترمه بينظيرڀٽو جي قافلي تي انهن سفاڪ، ظالم، وحشي، جانور صفت انتهاپسندن حملو ڪيو، جيڪي ضياءُ الحق پاليا هئا، جنهن جي حڪومت ۾ ٽي وي ذريعي مشهوري ماڻيندڙ اڳوڻو افارميشن سيڪريٽري جو مائٽ راجا سائين سنڌ ۾ پاڻيءَ جو وزير هو، جمهوري قوتن سان دشمني ڪرڻ جي فرض ادا ڪرڻ لاءِ لاڳيتو پ پ جي خلاف اخبارن ۾ لکندڙ مُلياڻيءَ جي مرشد ۽ پير صاحب پاڻ کي ورديءَ وارن جو پوئلڳ ۽ انهن جو ساٿي چيو هو، هيءَ ڌر ڪڏهن به سنڌ کي ووٽ ۽ ووٽ ذريعي بڻايل حڪومت کي سک سان هلڻ نٿي ڏئي، هن جي پارٽيءَ جو ليڊر ۽ ان جا ڀائر جمهوريت دشمن ڄام صادق ۽ ميان صاحب جا ساٿي ۽ انهن سان گڏ وزير هيا، 18 آڪٽوبر تي هزارين ماڻهن کي رت سان وهنجاري سوين شهيد ڪري هزار کان مٿي ماڻهو معذرو ۽ اپاهج ڪيو ويو، هن محترمه جي پارٽيءَ ۽ سندن اصلي سهاري ميان نواز شريف کي پرويز مشرف لاهي جيل ۾ وڌو ته هڪڙو به مظاهرو يا اتحادي پير جي ماڻهن جو نه ٿيو ته ٺهيو بيان نه ڪو نه آيو، حالانڪه ميان پيرن کي ڏايون وزارتون ڏنيون، اهليت ڪيتري هين ۽ اها اڄ تائين خبر نه پئجي سگهي، باقي ميان صاحب کي ڏاڍو غلط طريقي سان جيل ۾ وجهي سعوديءَ جلاوطن ڪيو ويو پر هن مائيءَ جي مڙس جي ڀائي بندن پيون ميان سان ڏاڍي بي وفائي ڪئي، هنن هميشه ايم ڪيو ايم جي پاڻ ناجائز حمايت ڪئي ، هاڻي به انهن جا ساٿي آهن، هي سنڌ جي ڪابينا ۾ وزير هيا پر هنن پيرن سواءِ پنهنجي مرضيءَ جي علائقن جي ٻين ڪهڙن علائقن ۾ پنهنجن وزارت جي بجيٽ خرچ ڪئي، اهو احوال هنن کي سنڌ وارن کي اڃا ٻڌائڻو آهي، ڇو ته ڪنهن کي به خبر نه آهي، هيءَ ويچاري پنهنجي مڙس جي ڪري مجبور آهي ، سندس ذاتي سياسي نظريو ارباب غلام رحيم جي وزارت ۾ جڏهن پاڻ انفارميشن سيڪريٽري هئي جيڪي مضمون ڏوڪڙ ڏئي لکرايائين انهن مان سندس منشا جو مهتاب ۽ سندس ضمير جو مطلب پڌرو ٿيو هو، اهو تاريخ جو رڪارڊ آهي جيڪو ڪير به ڊاهي نه سگهندو.

 

اقتصادي راهداري منصوبي جي پ پ به حامي!

گذريل ڏينهن اخبار جي سرخين ۾ پ پ چيئرمين به پاڪ چين اقتصادي راهداري منصوبي جي فائدن جو اعتراف ڪيو آهي، چين جي گاديءَ واري شهر بيجنگ ۾ شاهراهه ريشم بابت ايشيا جي سياسي پارٽين جي ڪانفرنس کي خطاب ڪندي بلاول ڀٽو زرداري واضح ڪيو ته چين ۽ پاڪستان هڪٻئي جا قدرتي واپاري اتحادي ملڪ آهن پيپلز پارٽيءَ جي چيئرمين بلاول ڀٽو زرداري پاڪستان ۽ چين کي قدرتي واپاري اتحادي به قرار ڏنو، ۽ وراڻيو ته اقتصادي راهداري منصوبي سان پاڪستان جي اقتصادي ترقيءَ ۾ انقلابي تبديلي ايندي، دهشتگردي جي معاملي تي به پ پ چيئرمن واضح چيو ته خطي جي ترقيءَ لاءِ دهشتگرديءَ جي ناسور کي به گڏيل طور منهن ڏيڻو پوندو. بلاول ڀٽو زرداري،ان موقعي تي پاڪستان اندر امن امان جي صورتحال بابت خدشن جو به خاص طور ذڪر ڪيو ۽ چيو ته خطي جي ترقيءَ لاءِ دهشتگرديءَ جي ناسور کي منهن ڏيڻ لاءِ چين سميت ٻين ملڪن کي پاڪستان جو ساٿ ڏيڻو پوندو، انڪري گڏيل ڪوششون اڻٽر آهن، . پ پ چيئرمين بلاول ڀٽو زرادري اميد ڏيکاري ته خطي ۾ امن لاءِ چين جو افغانستان سميت ٻين ملڪن ۾ مثبت ڪردار بهتر نتيجا آڻيندو، جنهن سان خطي جي ملڪن ۾ امن امان جي صورتحال بهتر ٿيندي، پ پ چيئرمين جو اهو به چوڻ هو ته گوادر کان ڪاشغر تائين پاڪ – چين اقتصادي راهداري وارو منصوبو مڪمل ٿيڻ بعد پاڪستان جي، اقتصادي ترقيءَ جي شرح ۾ 15 سيڪڙو تائين واڌ ٿيندي. هن ٻڌايو ته پاڪستان ۽ چين جي گڏيل سهڪار سان سنڌ جي صوبي ٿر ۾ جاري ٿرڪول رٿا به علائقي جي ترقيءَ لاءِ لاڀائتي ثابت ٿيندي. . هن واضح ڪيو ته ڪوبه ملڪ دهشتگرديءَ کي اڪيلي سر منهن نه ٿو ڏئي سگهي، . بلاول ڀٽو زرداري ان موقعي تي پاڪ – چين گڏيل سهڪار سان جاري منصوبن توڙي پ پ جي باني چيئرمين شهيد ذوالفقار علي ڀٽي ۽ محترمه بينظير ڀٽو جو خاص ذڪر پڻ ڪيو.

هتي ان ڳالهه جو ذڪر به ضرور هئڻ گهرجي ته پاڪ چين اقتصادي راهداري منصوبي جي افاديت جي سڀ حلقا تعريف ڪري رهيا آهن پر جن ڌرين کي ان منصوبي جتي خدشا آهن رياست سڳوري کي اهو به ختم ڪرڻ گهرجن، جيستائين ڪنهن منصوبي تي گڏيل اتفاق نه هوندو ته لاڀ ڏيندڙ منصوبو ته بي لاڀائتو ٿيندو، ان ڪري سرڪار سڳوري کي ان طرف ڌيان ڏيڻ جي سخت ضرورت آهي.