تازيون خبرون

Daily Archives: October 16, 2015

الزامن واري سياست ڪندڙن جي ڄنگهون ڇڪڻ واري خواهش ڪڏهن به پوري نه ٿيندي: وزيراعظم

ڪوٽلي (مانيٽرنگ ڊيسڪ) وزيراعظم ميان نواز شريف، هڪ ڀيرو ٻيهر 2017ع تائين بجلي جِي لوڊشيڊنگ جو خاتمو آڻڻ جو اعلان ڪندَي چيو آهي ته قوم سڀ ڪجهه ڏسي رهي آهي، الزامن واري سياست ڪندڙن جِي ڄنگهون ڇڪڻ واري خواهش ڪڏهن به پوري نه ٿيندي. آزاد ڪشمير جَي علائقي ڪوٽلي ۾ گل پور پن بجلي جو بنياد رکڻ واري تقريب کي خطاب ڪندَي وزيراعظم چيو ته 48 ڪلاڪن کانپوءِ نتيجا مڃڻ کان انڪار سمجهه کان ٻاهر آهي. نواز شريف چيو ته قوم ڏسي رهي آهي ته ڪير تعميري ۽ ڪير ناڪاري سياست ڪري رهيو آهي. وزيراعظم چيو ته ڪپتان حقيت کي تسليم ڪرڻ بدران الزامن جو سهارو وٺي رهيو آهي، جنهن مان کيس ڪجهه به نه ورندو. ميان نواز شريف چيو ته نون ليگ حڪومت جون ڄنگهون ڇڪڻ جي ڪوشش ڪئي پئي وڃي، پر اهڙي حرڪت ڪندڙ کي ڪجهه به پلئه نه پوندو. اوڪاڙا واري ننڍي چونڊ بابت ڳالهائيندي وزيراعظم اعتراف ڪيو ته اوڪاڙه ۾ غلط اميدوار کي ٽڪيٽ ڏني وئي، جنهن سبب نون ليگ کي شڪست جو منهن ڏسڻو پيو. پن بجلي منصوبي بابت نواز شريف چيو ته منصوبي جو 33 سيڪڙو ڪم مڪمل ٿي چڪو آهي، جڏهن ته 48 مهينن اندر منصوبو مڪمل ٿي ويندو. وزيراعظم چيو ته خانگي شعبي جي سهڪار سان هلندڙ بجلي واري منصوبي تي 31 ڪروڙ رپيا خرچ ايندا. ميان نواز شريف چيو ته نون ليگ سرڪار 12 ڪلاڪن واري لوڊشيڊنگ کي 8 کان 6 ڪلاڪ تي آندو آهي، جيڪا وڏي ڪامياب آهي. وزيراعظم چيو ته منصوبن کي ڪامياب بڻائي 2018ع تائين ملڪ مان لوڊشيڊنگ جو مڪمل طور خاتمو آندو ويندو.

 

ڪالاباغ اشو سياست چمڪائڻ لاءِ اٿاريو ويو، ڊيم ٺهڻ جو سوال ئي پيدا نه ٿو ٿئي: وڏو وزير

ڪراچي (اسٽاف رپورٽر) وڏي وزير قائم علي شاهه چيو ته ڪالاباغ ڊيم کي 3 صوبا رد ڪري چڪا آهن، ڪالاباغ ڊيم جو معاملو اٿارڻ سياست چمڪائڻ آهي، مڪاني چونڊون شفاف نموني ڪرايون وينديون، ڪنهن به قسم جي مداخلت برداشت نه ڪئي ويندي.. ڪراچي ۾ ميڊيا سان ڳالهائيندي وڏي وزير سيد قائم علي شاهه چيو آهي ته ڪالا باغ ڊيم جو اشو سياسي بنيادن تي اٿاريو ويو آهي، ڪالاباغ ڊيم ٺهڻ جو سوال ئي پيدا نٿو ٿئي، ٽنهي صوبن ڪالا باغ ڊيم ٺاهڻ جي مخالفت ڪري ڇڏي آهي، ڪالا باغ ڊيم ٺهڻ سان ملڪ کي نقصان ٿيندو. سيد قائم علي شاهه چيو ته ڪالاباغ ڊيم جو معاملو اٿارڻ سياست چمڪائڻ آهي، تڪراري معاملي تي سياست نه ڪرڻ گهرجي. وڏي وزير چيو ته سنڌ ۾ شفاف طريقي سان مڪاني چونڊون ڪرايون وينديون، 2013 واريون چونڊ شفاف طريقي سان ٿئي هئي، مڪاني چونڊ ۾ گهڻيون پارٽيون پ پ خلاف آهن.. هن چيو ته انتقامي ڪاررواين واريون ڳالهيون درست نه آهن، مخالف پارٽيون پ پ خلاف ڪوڙي وايلا ڪري رهيون آهن.وڏي وزير چيو ته نيب جي الزامن ۾ ڪا به صداقت نه آهي، نيب آفيسر کي حڪومت تي تنقيد ڪرڻ نٿو سونهي، 2 هزار ايڪڙ زمين غيرقانوني طور الاٽ ناهي ڪئي.

 

اسان حڪومتي معاملا ڪنٽرول ڪرڻ لاءِ هتي ناهن ويٺا: چيف جسٽس

اسلام آباد (بيورو) سپريم ڪورٽ، اين جي اوز جي رجسٽريشن ۽ مانيٽرنگ بابت وفاق ۽ صوبن کي ٻن مهينن اندر نظام واضح ڪرڻ جو حڪم ڏئي ڇڏيو آهي، چيف جسٽس ريمارڪس ۾ چيو آهي ته هو حڪومتي معاملا ڪنٽرول ڪرڻ لاءِ هتي ناهن ويٺا. چيف جسٽس، جسٽس انور ظهير جمالي جي سربراهي ۾ سپريم ڪورٽ جي ٽي رڪني بينچ اين جي اوز جي رجسٽريشن، فنڊنگ ۽ مانيٽرنگ بابت ڪيس جي ٻڌڻي ڪئي. ٻڌڻيءَ دوران سپريم ڪورٽ جي حڪم تحت چئني صوبن ۽ وفاق پاران اين جي اوز جي انگ اکرن بابت رپورٽ عدالت ۾ پيش ڪئي وئي. رپورٽ ۾ چيو ويو ته خيبرپختونخواهه ۾ 10 هزار کان وڌيڪ اين جي اوز ڪم ڪري رهيون آهن. ايڊووڪيٽ جنرل سنڌ چيو ته سنڌ ۾ ڪم ڪندڙ اين جي اوز جو تعدا 6 هزار ڏيڍ سئو کان وڌيڪ آهي، جڏهن ته ايڊووڪيٽ جنرل پنجاب چيو ته 47 هزار چار سئو 3 اين جي اوز پنجاب ۾ ڪم ڪري رهيون آهن. ڊپٽي اٽارني جنرل عدالت کي ٻڌايو ته بلوچستان ۾ 2 هزار 7 سئو 56 اين جي اوز ۽ اسلام آباد ۾ 15 سئو غير سرڪاري تنظيمون ڪم ڪري رهيون آهن. چيف جسٽس انور ظهير جمالي ريمارڪس ڏنا ته اين جي اوز جو انگ ڏينهون ڏينهون وڌي رهيو آهي، ان جي مانيٽرنگ ۽ رجسٽريشن وارن معاملن کي ڏسڻ وفاق جو ڪم آهي. چيف جسٽس ريمارڪس ڏنا ته هـُو هتي حڪومتي معاملا ڪنٽرول ڪرڻ لاءِ ناهن ويٺا.  ٻڌڻيءَ دوران لا اينڊ جسٽس ڪميشن عدالت کي استدعا ڪئي ته اين جي اوز جي رجسٽريشن، فنڊنگ ۽ مانيٽرنگ بابت کين مهلت ڏني وڃي. عدالت، لا اينڊ جسٽس ڪميشن جي مهلت واري استدعا منظور ڪندي وفاق ۽ صوبن کي حڪم ڏنو ته اين جي اوز جي رجسٽريشن ۽ مانيٽرنگ بابت نظام واضح ڪري رپورٽ پيش ڪئي وڃي.

 

ڀارت، پاڪستان ۾ دهشتگردي پکيڙڻ لاءِ غير رياستي عنصرن جي مدد ڪري رهيو آهي: پرڏيهي ترجمان

اسلام آباد (بيورو) پرڏيهي ترجمان قاضي خليل الله چيو آهي ته ڀارت، پاڪستان ۾ دهشتگردي پکيڙڻ لاءِ غير رياستي عنصرن جي مدد ڪري رهيو آهي، پاڪستان هندوستان سان غير مشروط ڳالهيون چاهي ٿو، ڪشميرين جي حمايت جاري رکي ويندي. اسلام آباد ۾ هفتيوار بريفنگ ڏيندي پرڏيهي ترجمان چيو ته ڀارتي نينگري گيتا جي واپسي بابت ڀارتي هاءِ ڪميشن جي جواب جو انتظار ڪيو پيو وڃي، اميد آهي ته هندوستان معاملي کي سنجيده وٺندو. هن چيو ته وزير اعظم نواز شريف 20کان 23 آڪٽوبر تي امريڪا جو دورو ڪندو، جنهن دوران سندس امريڪي صدر براڪ اوباما سان ملاقات به رٿيل آهي. سندس چوڻ هو ته وزير اعظم، امريڪي صدر براڪ اوباما سان ملاقات دوارن ڪشمير تڪراري مسئلو ۽ دهشتگردي خلاف جنگ ۾ ٿيل اڳڀرائين بابت آگاهه ڪندو. پرڏيهي ترجمان چيو ته ڀارت، پاڪستان ۾ دهشتگردي کي هٿي وٺرائڻ لاءِ دشمنن جي مدد ڪري رهيو آهي، پاڪستان، ڀارت سان ڪشمير تڪرار تي غير مشروط ڳالهيون چاهي ٿو. قاضي خليل الله چيو ته پاڪستان ۾ داعش جو وجود ناهي، پاڪستان ڀارتي مداخلت جا گڏيل قومن کي ثبوت ڏئي ڇڏيا آهن. قاضي خليل الله وڌيڪ چيو ته ڀارتي سرڪار مسلمانن تي تشدد واري معاملي جو  نوٽيس ورتو آهي، هندوستان کي مستقبل ۾ اهڙن واقعن جي روڪٿام لاءِ مثبت قدم کڻڻ گهرجي.

 

خطي جي ترقيءَ لاءِ دهشتگرديءَ جي ناسور کي گڏيل طور منهن ڏيڻو پوندو: بلاول ڀٽو زرداري

بيجنگ (مانيٽرنگ ڊيسڪ) پيپلز پارٽيءَ جي چيئرمين بلاول ڀٽو زرداري پاڪستان ۽ چين کي قدرتي واپاري اتحادي قرار ڏيندي چيو آهي ته اقتصادي راهداري منصوبي سان پاڪستان جي اقتصادي ترقيءَ ۾ انقلابي تبديلي ايندي، خطي جي ترقيءَ لاءِ دهشتگرديءَ جي ناسور کي به گڏيل طور منهن ڏيڻو پوندو. چين جي گاديءَ واري شهر بيجنگ ۾ شاهراهه ريشم بابت ايشيا جي سياسي پارٽين جي ڪانفرنس کي خطاب ڪندي بلاول ڀٽو زرداري واضح ڪيو ته چين ۽ پاڪستان هڪٻئي جا قدرتي واپاري اتحادي ملڪ آهن. پ پ چيئرمين چيو ته گوادر کان ڪاشغر تائين پاڪ – چين اقتصادي راهداري وارو منصوبو مڪمل ٿيڻ بعد پاڪستان جي، اقتصادي ترقيءَ جي شرح ۾ 15 سيڪڙو تائين واڌ ٿيندي. هن ٻڌايو ته پاڪستان ۽ چين جي گڏيل سهڪار سان سنڌ جي صوبي ٿر ۾ جاري ٿرڪول رٿا به علائقي جي ترقيءَ لاءِ لاڀائتي ثابت ٿيندي. بلاول ڀٽو زرداري،ان موقعي تي پاڪستان اندر امن امان جي صورتحال بابت خدشن جو به خاص طور ذڪر ڪيو ۽ چيو ته خطي جي ترقيءَ لاءِ دهشتگرديءَ جي ناسور کي منهن ڏيڻ لاءِ چين سميت ٻين ملڪن کي پاڪستان جو ساٿ ڏيڻو پوندو. هن واضح ڪيو ته ڪوبه ملڪ دهشتگرديءَ کي اڪيلي سر منهن نه ٿو ڏئي سگهي، انڪري گڏيل ڪوششون اڻٽر آهن. پ پ چيئرمين بلاول ڀٽو زرادري اميد ڏيکاري ته خطي ۾ امن لاءِ چين جو افغانستان سميت ٻين ملڪن ۾ مثبت ڪردار بهتر نتيجا آڻيندو، جنهن سان خطي جي ملڪن ۾ امن امان جي صورتحال بهتر ٿيندي. بلاول ڀٽو زرداري ان موقعي تي پاڪ – چين گڏيل سهڪار سان جاري منصوبن توڙي پ پ جي باني چيئرمين شهيد ذوالفقار علي ڀٽي ۽ محترمه بينظير ڀٽو جو خاص ذڪر پڻ ڪيو.

 

اليڪشن ڪميشن جي ڪراچي ۾ ڪرايل نين تڪبندين تي اسٽي آرڊر جاري

ڪراچي (اسٽاف رپورٽر) سنڌ هاءِ ڪورٽ، اليڪشن ڪميشن پاران ڪراچي ۾ ڪرايل نين تڪبندين تي اسٽي آرڊر جاري ڪندي 19 آڪٽوبر تائين جواب طلب ڪري ورتو. چيف جسٽس فيصل عرب جي سربراهي ۾ 2 رڪني بينچ، مڪاني چونڊن لاءِ تڪبندين بابت درخواستن جي ٻڌڻي ڪئي. عدالت ۾ سنڌ حڪومت طرفان وڪيل فاروق ايڇ نائيڪ پيش ٿي پنهنجي دليلن ۾ چيو ته اليڪشن ڪميشن يو سي جي ووٽرن ۾ واڌ ڪئي آهي، جڏهن ته يو سي ۾ ووٽرن جو انگ 15 هزار تائين هوندو آهي اليڪشن ڪميشن ان کي وڌائي 26 هزار ڪري ڇڏيو آهي. عدالت، اليڪشن ڪميشن پاران 23 ۽ 29 سيپٽمبر تي ڪراچي ۾ ڪرايل نين تڪبندين تي عارضي طور اسٽي آرڊر جاري ڪندي 19 آڪٽوبر تائين اليڪشن ڪميشن کان جواب طلب ڪري ورتو. عدالت تڪبندين بابت ڪيس جي ٻڌڻي 19 آڪٽوبر تائين ملتوي ڪري ڇڏي. ياد رهي ته تڪبندين بابت ايم ڪيو ايم، نون ليگ سميت 13 کان وڌيڪ درخواستون سنڌ هاءِ ڪورٽ ۾ داخل ٿيل آهن.

 

اسڪاٽ لينڊ يارڊ ”را“ جا ايم ڪيو ايم کي فنڊنگ جا ثبوت پاڪستان کي ڏئي ڇڏيا

اسلام آباد (بيورو) ڀارتي خفيه ايجنسي ”را“ پاران ايم ڪيو ايم کي فنڊنگ جا ثبوت اسڪاٽ لينڊ يارڊ پاڪستان حوالي ڪري ڇڏيا آهن. ذريعن موجب اسڪاٽ لينڊ يارڊ ”را“ جي ايم ڪيو ايم کي فنڊنگ ۾ ملوث 10 کان وڌيڪ نالن جي فهرست پاڪستان حوالي ڪئي وئي آهي. اُهي ماڻهو را کان سڌو سنئون رقم وصول ڪري ايم ڪيو ايم کي فراهم ڪندا هئا، پاڪستان کي ڏنل نالن جي فهرست اسڪاٽ لينڊ يار الطاف حسين ۽ محمد انور کان جانچ کانپوءِ جوڙي آهي. وزيراعظم جي صلاحڪار اشتر اوصاف لنڊن ۾ اسڪاٽ لينڊ کان ڪيس جي حوالي سان ملاقات ڪئي هئي، حڪومت را فنڊنگ ۽ مني لانڊرنتگ جي معاملي تي جانچ شروع ڪري ڇڏي آهي.

 

چوڌري نثار ۽ خواجا آصف جي وچ ۾ تڪرار وڌي وئي، مسلم ليگ ن جي قيادت پريشان

اسلام آباد (بيورو) وفاقي گهرو وزير چوڌري نثار ۽ خواجا آصف جي وچ ۾ هلندڙ تڪرار سبب ن ليگ جي قيادت سخت پريشان ٿي وئي آهي. ٻنهي جي وچ ۾ ٺاهه جي اميد به تازن سخت جملن جي ڏي وٺ سبب ختم ٿي وئي.وفاقي گهرو وزير چوڌري نثار علي خان ۽ بچاءَ واري وزير خواجا محمد آصف جي ڳانڍاپن ۾ ڏار ان وقت پوڻ شروع ٿيو، جڏهن شريف ڀائرن جي جلاوطني کانپوءِ وطن واپسي ٿي. رستا پوري طور تي تڏهن ڌار ٿيا جڏهن خواجا آصف پاران چوڌري نثار کي هٽائي مخالف ڌر جو اڳواڻ بڻجڻ جي ڪوشش ڪئي وئي ۽ پوءِ ڳالهه ٻولهه به بند ٿي وئي.2013ع جي چونڊن ۾ پارٽي ٽڪيٽ جي ورهاڱي تي ٻنهي جي اختلافن ويڇا وڌيڪ وڌائي ڇڏيا ۽ ٻئي اڳواڻ نجي محفلن ۾ هڪٻئي جا نالا کڻڻ بنا هڪٻئي تي تنقيد ڪرڻ لڳا. پارٽي جي سربراهه نوازشريف ٻنهي جي لاڳاپن کي خاص اهميت ڏني ۽ ٻنهي جي وچ ۾ ٺاهه جو ٽاسڪ پرويز رشيد ۽ سعد رفيق کي ڏنو پر ڳالهه پوءِ به نه ٺهي. هاڻي ليگي قيادت ٻنهي اڳواڻن جي وچ ۾ سيز فائر جي ڪوششن ۾ رڌل آهي.پارٽي ذريعن جو چوڻ آهي ته خواجا آصف اڳڀرائي ڪري غلطي ڪئي. چوڌري نثار جو جوابي حملو جائز هو، جڏهن ته چوڌري نثار سڌو سنئون جواب ڏيڻ بدران پريس ڪانفرنس ۾ اٿاريل سوالن جا جواب ڏيڻ بهتر سمجهيو.

 

اڊيالا جيل لڳ حساس ادارن جي ڪارروائي، 2 عورتن ۽ ٻارڙي سميت 5 دهشتگرد مارجي ويا، سب انسپيڪٽر شهيد

راولپنڊي (بيورو) راولپنڊي ۾ پوليس ۽ حساس ادارن جي گڏيل ڪارروائي دوران مارجي ويل دهشتگردن جي سڃاڻپ ٿي وئي، پوليس جو چوڻ آهي ته مارجي ويلن ۾ 2 عورتون، 2 مرد ۽ هڪ ٻارڙو شامل آهي، جن جو تعلق قبائلي علائقي سان هو. راولپنڊي جي علائقي چڪري ۾ ڳجهن ادارن ۽ پوليس جي گڏيل ڪارروائي ۾ 5 مبينا دهشتگرد مارجي ويا ۽ ٽـِن کي زخمي حالت ۾ گرفتار ڪيو ويو، جڏهن ته دهشتگردن جي فائرنگ ۾ ايليٽ فورس جو سب انسپيڪٽر به شهيد ٿي ويو. ڳجهن ادارن، پوليس جي وڏي نفري سان گڏ اڊيالا جيل ويجهو چڪري واري علائقي ۾ هڪ گهر تي ڇاپو هنيو ته اتي موجود دهشتگردن فائرنگ شروع ڪري ڏني. فائرنگ جي نتيجي ۾ ايليٽ فورس جو سب انسپيڪٽر ارشاد جان شهيد ٿي ويو ۽ 3 اهلڪار زخمي ٿي پيا. پوليس ۽ ڳجهن ادارن جوابي ڪارروائي ڪري ٻن عورتن ۽ هڪ ٻارڙي سميت 5 مبينا دهشتگردن کي ماري وڌو، جڏهن ته ٽن دهشتگردن کي زخمي حالت ۾ گرفتار ڪيو ويو آهي. پوليس جو چوڻ آهي ته مارجي ويل دهشتگردن ٻن عورتن حميرا قيصر، ملائڪا خاتون،  قيصر ۽ مصطفيٰ طور سڃاڻپ ٿي آهي، جن جو واسطو قبائلي علائقي سان هو. ذريعن جو چوڻ آهي ته مارجي ويل دهشتگرد محرم الحرام جي موقعي تي راولپنڊي ۾ تخريبڪاري جي رٿابندي ڪري رهيا هئا. دهشتگردن جي قبضي مان بارود سان ڀريل گاڏي به هٿ ڪئي وئي آهي، جڏهن ته گرفتار دهشتگردن کي اڻڄاتل هنڌ تي منتقل ڪيو ويو آهي.

 

پنجاب جي وڏي وزير شهباز شريف پارٽي جو ٻيڙو ٻوڙي ڇڏيو آهي: عابد شير علي جي پيءُ چوڌري شير علي الزام

لاهور (بيورو) پنجاب جي وڏي وزير شهباز شريف پارٽي جو ٻيڙو ٻوڙي ڇڏيو آهي، پارٽي معاملن تي نظرثاني نه ڪئي وئي ته عابد شير علي کان استعيفيٰ ڏياريندي ويندي: نواز ليگ اڳواڻ ۽ مملڪتي وزير عابد شير علي جي پيءُ چوڌري شير علي الزام هنيو آهي ته راڻا ثناءُ الله 20 ڄڻن جي قتل ۾ ملوث آهي، جلد ثبوت پيش ڪندس. مسلم ليگ ن جي اڳواڻ چوڌري شير علي قيادت تي الزام مڙهيندي چيو آهي ته شهباز شريف پارٽي جو ٻيڙو ٻوڙي ڇڏيو آهي، پارٽي معاملن تي نظرثاني نه ڪئي وئي ته هو پنهنجي پٽ عابد شير علي کان استعيفيٰ ڏياريندو. فيصل آباد ۾ پريس ڪانفرنس ڪندي چوڌري شير علي چيو ته مڪاني چونڊن لاءِ غلط ماڻهن کي اختيار ڏئي پنجاب جي وڏي وزير شهباز شريف پارٽي جو ٻيڙو ٻوڙي ڇڏيو آهي، هاڻي اهو زمانو ناهي رهيو، جڏهن تنڀن کي ٽڪيٽ ملندي هئي ۽ اهي کٽي ويندا هئا. هن چيو ته لاهور ۾ اربين ۽ کربين رپين جو ڪم ڪرايو ويو پر وزيراعظم نواز شريف جي سالي جو پٽ اليڪشن هارائي ويو ۽ اين اي 122 تي اياز صادق رڳو 22 سئو ووٽ سان ڪامياب ٿيو، اهو پنجاب جي وڏي وزير لاءِ شرمناڪ آهي. چوڌري شير علي چيو ته اِهو سمجهه کان ٻاهر آهي ته شهباز شريف مسلم ليگين کي اڳتي وٺي وڃي رهيو آهي يا پوئتي، اها ئي صورتحال سڄي ملڪ خاص طور تي فيصل آباد ۾ آهي، جيڪڏهن اهڙي صورتحال رهي ته فيصل آباد ۾ صرف قانون ٽوڙيندڙ قانون وارو وزير راڻاءُ ثناءُ الله ئي مسلم ليگ نون ۾ رهجي ويندو. ن ليگ اڳواڻ چيو ته قانون ٽوڙيندڙ شخص کي قانون واري وزارت جو قلمدان ڏنو ويو، جنهن فيصل آباد ۾ 20 گهرن کي اجاڙي ڇڏيو آهي، راڻا ثناءُ الله کان ذليل نه  ڪرائي وڃي، جيڪڏهن استعيفيٰ گهرجي ته عابد شير علي استعيفيٰ ڏيڻ لاءِ تيار آهي. چوڌري شير علي چيو ته شهباز شريف کي جيڪڏهن شيخ اعجاز ۽ الياس انصاري جهڙي ايم پي ايز سان پارٽي هلائڻي آهي ته هو استعيفيٰ ڏيڻ لاءِ تيار آهن. ن ليگ اڳواڻ ۽ عابد شير علي جي پيءُ وڌيڪ چيو ته شهباز شريف کي 30 سال پ پ ۽ 10 سال قاف ليگ ۾ رهندڙ الياس انصاري کان علاوه ٻيو ڪو اڳواڻ نظر نٿو اچي، جنهن کي مڪاني چونڊن لاءِ ٽڪيٽ ڏني وڃي. چوڌري شير علي چيو ته شهباز شريف نااهل ماڻهن کي مڪاني چونڊن لاءِ ٽڪيٽ ڏئي پارٽي سان زيادتي ڪئي آهي، پارٽي معاملن تي نظرثاني نه ڪئي وئي ته هو پنهنجي پٽ عابد شير علي کان استعيفيٰ ڏياريندو.