تازيون خبرون

Daily Archives: October 15, 2015

تونسه شريف ۾ آپگهاتي ڌماڪو، ضلعي ڪائونسل جي اميدوار سميت 8 ڄڻا مارجي ويا

تونسه (مانيٽرنگ ڊيسڪ) پنجاب جَي شهر  تونسه شريف ۾ نون ليگ ايم اين اي جي اليڪشن آفيس ۾ آپگهاتي ڌماڪي جي نتيجي ۾ ضلعي ڪائونسل جي اميدوار سميت 8 ڄڻا مارجي ويا ۽ 20 کان وڌيڪ زخمي ٿيا آهن، ن ليگ ايم اين اي امجد کوسو اسلام آباد ۾ هئڻ سبب محفوظ رهيو. ڊيرا غازي خان جي علائقي تونسا شريف ۾ ن ليگ ايم اين اي امجد فاروق کوسو جي اوطاق ۾ مڪاني چونڊن بابت قائم اليڪشن ڪميشن ۾ گڏجاڻي جاري هئي ته زوردار ڌماڪو ٿيو. ڌماڪي جي نتيجي ۾ ضلعي ڪائونسل جي اميدوار سميت 8 ڄڻا مارجي ويا، جڏهن ته 20 کان وڌيڪ زخمي ٿيا آهن. پوليس موجب، ڌماڪي وقت آفيس ۾ 100 کان وڌيڪ ماڻهو موجود هئا، جڏهن ته ن ليگ ايم اين اين امجد فاروق کوسو اسلام آباد ۾ هئڻ سبب محفوظ رهيو. پوليس موجب، مارجي ويلن مان پنجن ڄڻن جي سڃاڻپ، امجد، اختر، فيضان ۽ زاهد طور ڪئي وئي آهي. ڌماڪي ۾ مارجي ويلن جا لاش ۽ زخمين کي تونسا اسپتال منتقل ڪيو ويو،  جتي ڪجهه زخمين جي حالت ڳڻتي جوڳي هئڻ سبب وڌيڪ جاني نقصان جو خدشو آهي. ڊي پي او ڊيرا غازي خان تصديق ڪئي آهي ته ڌماڪو آپگهاتي هو. ٻئي پاسي نون ليگ ايم اين اي امجد فاروق کوسو ميڊيا سان ڳالهائيندي چيو ته کيس ڪنهن به قسم جي ڌمڪي نه ملي هئي، ڌماڪي ۾ سندس ويجهو ساٿي ضلعي ڪائونسل جو اميدوار مارجي ويو آهي. امجد فاروق کوسو چيو ته دهشتگردن جي بزدلاڻين ڪاررواين سان سندن حوصلا ڪمزور نه ٿيندا. ٻئي پاسي وزير اعظم نواز شريف، وفاقي گهرو وزير چوڌري نثار، پنجاب جي وڏي وزير شهباز شريف ۽ ٻين واقعي جي مذمت ڪئي آهي. پنجاب جي وڏي وزير شهباز واقعي جو نوٽيس وٺندي آءِ جي پنجاب ۽ ڊي پي او ڊيرا غازي خان کان رپورٽ طلب ڪري ورتي آهي.

 

عمران خان فساد ڪرڻ چاهي ٿو، اين اي 122 تان ڪوبه ووٽ منتقل ناهي ٿيو: چوڌري نثار

اسلام آباد (بيورو) وفاقي گھرو وزير چوڌري نثار علي چيو آهي ته تحريڪ انصاف جي قيادت فساد ڪرڻ چاهي ٿي، لاهور جي اين اي 122 تان ڪوبه ووٽ منتقل ناهي ٿيو، نادرا قومي ادارو آهي، نادرا تي اجايا الزام نه لڳايا وڃن… اسلام آباد ۾ پريس ڪانفرنس ڪندي وفاقي گهرو وزير چوڌري نثار علي چيو ته تحريڪ انصاف جي قيادت فساد چاهي ٿي، هر ڳالهه تي فساد ڪرڻ تي ملڪي مفاد ۾ ناهي، هو پي ٽي آءِ کي چئي ٿو سياست گار گند جو نالو ناهي، تڪرار ۽ ڦڏو فساد وارو ماحول ڪنهن لاءِ بهتر ناهي. وفاقي گهرو وزير چيو ته سياسي قيادت جو مقصد ڦڏو فساد ۽ گار گند ناهي هوندو، جڪيڏهن سياسي پارٽيون ائين ڪنديون پوءِ جهموريت ڪهڙي آهي، جهڙي نموني چونڊ مهم دوران زبان استعمال ڪئي وئي اها زبان سياستدان کي ٺهي نٿي.. چوڌري نثار چيو ته تحريڪ انصاف جي هر مطالبي تي عمل ڪيو ويو، پي ٽي آءِ جي مطالبي تي ننڍي چونڊ ۾ ڪيمرائون لڳايون ويون ۽ فوج کي مقرر ڪيو ويو، حڪومت عمران خان جي عدالتي ڪميشن جو مطالبو تسليم ڪيو، عمران خان جئين چيو ائين ئي سهولتون ڏنيون ويون پر عمران خان جي مطالبن جي به ڪا حد هجڻ گهرجي. وفاقي گهرو وزير چيو ته ڪاش تحريڪ انصاف کي سمجهه ۾ اچي وڃي ته هار تسليم ڪرڻ وڏ پڻو هوندو آهي، هو اميد ڪري ٿو هاڻي تحريڪ انصاف پهرين تور ڪندي پوءِ ڳالهائيندي.چوڌري نثار چيو ته ننڍي چونڊ کانپوءِ ووٽن جي منتقلي بابت نادرا تي راويتي تنقيد ڪئي وئي، ڪنهن ووٽر جو ووٽ ان جي درخواست ڏيڻ تائين ڪٿي به منتقل نٿو ٿي سگهجي، نادرا جو ڪنهن جي ووٽ منتقل ڪرڻ سان ڪو به واسطو ناهي…..وفاقي گهرو وزير چيو ته اين اي 122 تي 26 آگسٽ کانپوءِ ووٽن جي ڪابه تبديلي نه ڪئي وئي، نادرا پاڻمرادو ڪنهنووٽر جو ووٽ تبديل نٿي ڪري سگهي، ووٽ تبديل ڪرڻ جي درخواست نادرا نه پر اليڪشن ڪميشن قبول ڪندي آهي… هن وڌيڪ چيو ته نادرا نوازليگ جو ادارو ناهي، نادرا قومي ادارو آهي، خداجي واسطي نادرا ۽ سياست کان الڳ رکيو وڃي.

 

منصوبن ۾ شفافيت، قائدن ۽ ضابطن کي پهرين ترجيح ڏني وڃي: وزير اعظم

اسلام آباد (بيورو) وزير اعظم نواز شريف ترقياتي منصوبن تي اطمينان جو اظهار ڪندي چيو آهي ته منصوبن ۾ شفافيت، قائدن ۽ ضابطن کي پهرين ترجيح ڏني وڃي، چين سيڙپڪاري ڪري ثابت ڪيو آهي ته اهو پاڪستان جو عظيم دوست آهي. اسلام آباد ۾ وزير اعظم نواز شريف جي صدارت هيٺ وفاقي ڪابينا جي توانائي ڪميٽي جو اجلاس ٿيو، جنهن ۾ ناڻي واري وفاقي وزير اسحاق ڊار، ترقي ۽ رٿابندي واري وزير احسن اقبال ۽ پيٽروليم واري وزير شاهد خاقان عباسي سميت ٻين عملدارن شرڪت ڪئي. ترقي ۽ رٿابندي واري وزير احسن اقبال مختلف ترقياتي منصوبن ۾ ٿيل اڳڀرائين تي اجلاس کي تفصيلي بريفنگ ڏني. احسن اقبال چيو ته ترقياتي منصوبن کي مڪمل ڪرڻ سان گڏ ٽرانسميشن لائين وڇائڻ جو ڪم به جاري آهي. ان موقعي تي وزير اعظم هدايت ڪئي ته ترقياتي منصوبا وقت سر مڪمل ڪيا وڃن ۽ ان لاءِ وزارتن ۾ سهڪار مضبوط بڻايو وڃي. وزير اعظم چيو ته منصوبن جي معيار تي ڪوبه سمجهوتو نه ڪيو ويندو، منصوبا مڪمل ڪرڻ لاءِ شفافيت، قائدن ۽ ضابطن کي پهرين ترجيح ڏني وڃي.

 

پيپلز پارٽي ننڍي چونڊ ۾ بدترين شڪست تي پنج رڪني ڪميٽي جوڙي ڇڏي نواز ليگ حڪومت ۾ ڪالاباغ ڊيم جو معاملو ٻيهر اُٿارڻ سازش لڳي ٿو: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته ڪالاباغ ڊيم خلاف ٻين صوبن ٺهراءَ منظور ڪيا آهن، نواز شريف حڪومت ۾ ڪالاباغ ڊيم جو معاملو اٿارڻ سازش ٿي سگهي ٿي، جيڪا ٻين خلاف گهٽ ۽ حڪومت خلاف گهڻي لڳي رهي آهي، ننڍين ۽ مڪاني چونڊن ۾ 5 رڪني ڪميٽي جوڙي ڇڏي آهي جيڪا 30 نومبر تي چيئرمين بلاول ڀٽو زرداري کي رپورٽ پيش ڪندي، يوم تاسيس جي موقعي تي بلاول ڀٽو زرداري نئين حڪمت عملي جو اعلان ڪندو، فاٽا جي حقن لاءِ بل قومي اسيمبلي ۽ سينٽ ۾ پيش ڪري ڇڏيو آهي، اربع تي مرڪزي سيڪريٽريٽ ۾ پيپلز پارٽي فاٽا جي اجلاس کانپوءِ سينيٽر فرحت الله بابر آخونزاده چٺاڻ ۽ ٻين اڳواڻن سان گڏ پريس ڪانفرنس خطاب ڪندي سيد خورشيد شاهه چيو ته فاٽا جي ماڻهن کي حق ڏنا ويندا، هاڻ اهو دور نه رهيو آهي جنهن ۾ پوليٽيڪل ايجنٽ وٽ سمورا اختيار آهن، اسان قومي اسيمبلي ۽ سينيٽ ۾ بل پيش ڪيو آهي ۽ بل جي حمايت تي ٻين جماعتن جا ٿورائتا آهيون، هن فاٽا جي ماڻهن سان واعدو ڪيو ته هو ان بل کي پارليامينٽ مان پاس ڪرائيندو ۽ فاٽا جو عوام ملڪ جي ٻئي عوام جهڙا حق حاصل ڪري سگهندو، انهن کي سپريم ڪورٽ ۽ هاءِ ڪورٽ ۾ اپيل جو حق هوندو، هن چيو ته پيپلز پارٽي هميشه فاٽا جي حقن جي ڳالهه ڪئي آهي ۽ پ پ جي دور ۾ فاٽا کي حق ڏنا به ويا آهن، هن چيو ته فاٽا جي ماڻهن جهڙي طرح دهشتگردي جو مقابلو ڪيو آهي اتان جي هر ماڻهو کي سلام پيش ڪريان ٿو، اهي ڏينهن پري نه آهي جڏهن فاٽا جي عوام کي حق ڏنا ويندا، انهن کي 1973 جي آئين ۽ قانون مطابق حق ملڻ گهرجن، قبائلي علائقا پاڪستان ۽ آئين جو حصو آهن ۽ انهن کي ان مطابق حق ڏنا ويندا، ان موقعي تي سينيٽر فرحت الله بابر چيو ته اڳوڻي صدر آصف علي زرداري ميان نواز شريف کي خط لکيو آهي جنهن ۾ ان سان فاٽا سڌارن بابت بل تي حمايت ڪرڻ لاءِ چيو آهي، هن چيو ته فاٽا جي عوام کان معلوم ڪيو وڃي ته اهي ڌار صوبو چاهين ٿا يا اهي ڪي پي ڪي ۾ شامل ٿيڻ چاهين ٿا، بعد ۾ صحافين جي سوالن جا جواب ڏيندي سيد خورشيد شاهه چيو ته حڪومت ڪالاباغ ڊيم مسئلي کي الجهائي رهي آهي، ٻين صوبن ڪالاباغ ڊيم خلاف ٺهراءَ منظور ڪيا آهن، نواز شريف حڪومت ۾ ڪالاباغ ڊيم جو معاملو اٿارڻ سازش ٿي سگهي ٿي، جيڪا ٻين خلاف گهٽ ۽ حڪومت خلاف گهڻي لڳي رهي آهي، هڪ سوال جي جواب ۾ هن چيو ته پيپلز پارٽي ننڍين ۽ مڪاني چونڊن ۾ 5 رڪني ڪميٽي جوڙي ڇڏي آهي جيڪا 30 نومبر تي چيئرمين بلاول ڀٽو زرداري کي رپورٽ پيش ڪندي، هن چيو ته يوم تاسيس جي موقعي تي بلاول ڀٽو زرداري نئين حڪمت عملي جو اعلان ڪندو.

 

محرم مهيني ۾ جلسن جلوسن ۾لائوڊ اسپيڪر جي استعمال جي اجازت، استعمال احتياط سان ڪيو وڃي: وڏو وزير

ڪراچيس (اين اين آءِ) سنڌ جي وڏي وزير سيد قائم علي شاهه شعيه عالمن جي درخواست تي محرم الحرام دوران جلسن جلوسن ۾ لائوڊ اسپيڪر جي استعمال جي اجازت ڏني آهي ۽ ان حوالي سان نوٽيفڪيشن پڻ جاري ڪيو ويندو، هي منظوري هن اربع تي سي ايم هائوس ۾ شعيه عالمن سان اجلاس ۾ ڏني، اجلاس ۾ مڪاني کاتن وارو وزير سيد ناصر شاهه، وڏي وزير جو معاون خاص قيوم سومرو، آءِ جي سنڌ غلام حيدر جمالي، ڪمشنر ڪراچي شعيب احمد صديقي، وقار مهدي، راشد رباني ۽ ٻين شرڪت ڪئي، ان کانسواءِ مولانا نظير عباس، باقر زيدي، مولانا فرقان حسين عابدي، مولانا جعفر صبحاني ۽ ٻين پڻ شرڪت ڪئي، شعيه عالمن سي ايم هائوس ۾ اعليٰ سطحي اجلاس سڏائڻ تي وڏي وزير جو شڪريو ادا ڪيو ۽ چيو ته حڪومت جلسن دوران لائوڊ اسپيڪر جي استعمال تي پابندي مڙهي ڇڏي آهي جنهن جي ڪري محرم دوران وڏا اجتماع ۽ ماتلي جلوسن کي لائوڊ اسپيڪر کانسواءِ خطاب ڪرڻ لاءِ عالمن سڳورن کي ڏکيائي ٿيندي، انکانسواءِ جلسن دوران عزادارن کي ضروري هدايتون ڏيڻ لاءِ به لائوڊ اسپيڪر جو استعمال ضروري هوندو آهي پر پابندي سبب ڏکيائي ٿيندي، ان موقعي تي وڏي وزير چيو ته نيشنل ايڪشن پلان تحت لائوڊ اسپيڪر جي استعمال تي پابندي هنئين وئي آهي، پر جيڪڏهن اوهان کي لائوڊ اسپيڪر استعمال ڪرڻ جي اجازت ڏيان ٿو ته ان جي استعمال ۾ احتياط ڪرڻو پوندو ۽ ڪوڊ آف ڪنڊٽ تحت استعمال ڪيو ويندو، ٻئي صورت ۾ سڄي صوبي ۾ ڪٿي به چڙ ڏياريندي تقريرو ٿيون ته ذميوارن خلاف سخت ڪارروائي ٿيندي.

 

وزيراعظم نوازشريف ۽ عمران خان پاران آزاد اميدوار چوڌري رياض الحق جج کي پارٽي ۾ شامل ٿيڻ جون دعوتون

اسلام آبآد (بيورو) تحريڪ انصاف جي سربراهه عمران خان اين اي 144 تي ننڍي چونڊ ۾ ڪامياب ٿيل آزاد اميدوار چوڌري رياض الحق جج کي پارٽي ۾ شموليت جي دعوت ڏئي ڇڏي، وزيراعظم نواز شريف به رياض الحق سان رابطو ڪري ننڍي چونڊ ۾ ڪاميابي تي کيس واڌايون ڏنيون آهن، رياض الحق چيو آهي ته اڃا هن ڪنهن به پارٽي ۾ شامل ٿيڻ جو فيصلو ناهي ڪيو.پي ٽي آءِ جي سربراهه عمران خان اوڪاڙه جي اين اي کي 144 تي ننڍي چونڊ ۾ ڪامياب ٿيل آزاد اميدوار چوڌري رياض الحق جج سان فون تي رابطو ڪيو، جنهن دوران عمران خان ننڍي چونڊ ۾ ڪاميابي تي رياض الحق کي واڌايون ڏنيون. رابطي دوران تحريڪ انصاف جي سربراهه عمران خان چوڌري رياض الحق کي باضابطا طور پي ٽي آءِ ۾ شموليت جي دعوت ڏني……رابطي کانپوءِ ميڊيا سان ڳالهائيندي چوڌري رياض الحق چيو ته ننڍي چونڊ ۾ سندس پي ٽي آءِ ۽ جماعت اسلامي ٻنهي سپورٽ ڪئي پر هن اڃا ڪنهن به پارٽي ۾ وڃڻ جو فيصلو ناهي ڪيو.هوڏانهن وزيراعظم نواز شريف پڻ اين اي کي 144 تي ننڍي چونڊ ۾ ڪامياب ٿيل آزاد اميدوار رياض الحق جج سان فون تي رابطو ڪري کيس ننڍي چونڊ ۾ ڪاميابي تي واڌايون ڏنيون. وزيراعظم نواز شريف سان ڳالهائيندي رياض الحق چيو ته نوازليگ سندس رت ۾ شامل آهي.

 

پهرين محرم تي رڳو ڪراچي جا تعليمي ادارا بند رهندا، ٻئي ڪنهن به کاتي ۾ موڪل نه هوندي: نثار کهڙو

ڪراچي (اسٽاف رپورٽر) سنڌ جي تعليم ۽ سڌسماءَ واري سينيئر وزير نثار احمد کهڙو چيو آهي ته پهرين محرم الحرام جي موقعي تي رڳو ڪراچيءَ ۾ تعليمي ادارا بند رهندا ۽ تعليمي ادارن کانسواءِ ٻئي ڪنهن به کاتي ۾ موڪل نه هوندي. پنهنجي جاري ڪيل هڪ بيان ۾ نثار احمد کهڙو چيو ته پهرين محرم الحرام تي رڳو ڪراچيءَ جي تعليمي ادارن کانسواءِ ٻيا سڀئي کاتا ۽ ادارا معمول مطابق کليل رهندا، ان لاءِ ٻين سڀني کاتن جا ملازم پهرين محرم الحرام تي پنهنجي پنهنجي آفيسن ۾ حاضري يقيني بڻائين.

 

بينظير ڀٽو قتل ڪيس ۾ اڳوڻي ايس ايس پي طاهر ايوب اشتهاري قرار، جاچ آفيسر طارق ڪياني جا گرفتاري وارنٽ جاري

راولپنڊي(م.ڊ) راولپنڊي جـِـي دهشتگردي ٽوڙ عدالت، بينظير ڀٽو قتل ڪيس ۾ اڳوڻي ايس ايس پي طاهر ايوب کي اشتهاري قرار ڏيندَي جاچ آفيسر طارق ڪياني جا ضمانت نه ٿيڻ جوڳا گرفتاري وارنٽ جاري ڪري ڇڏيا. دهشتگردي جِي خاتمي واري عدالت جَي جج رائي ايوب مارٿ بينظير ڀٽو قتل جي ٻڌڻي ڪئي. ٻڌڻيءَ دوران اڳوڻو ايس ايس پي طاهر ايوب اڄ به حاضر نه ٿيو، جڏهن ته سندس غيرحاضري بابت ايف آءِ اي پاران رپورٽ عدالت ۾ پيش ڪئي وئي. ايف آءِ اي جِي رپورٽ ۾ چيو ويو آهي ته طاهر ايوب سان رابطو ٿيو آهي، هو پرڏيهه ۾ آهي. رپورٽ موجب، طاهر ايوب جو چوڻ آهي ته هو اڄ ڪنهن به وقت ڏيهه پهچي ويندو. ايف اي آءِ پاران رپورٽ جمع ڪرائڻ باوجود عدالت غيرحاضري تي طاهر ايوب کي اشتهاري قرار ڏيندي سندس گهر ۽ عدالت ٻاهران اشتهار لڳائڻ جو حڪم ڏنو. عدالت، بينظير ڀٽو قتل ڪيس جي گڏيل جاچ ٽيم جي ميمبر انسپيڪٽر طارق ڪياني جا ضمانت نه ٿيڻ جوڳا گرفتاري وارنٽ پڻ جاري ڪري ڇڏيا. ٻئي طرف جوابدارن جَي وڪيلن ڪيس جي فريادي انسپيڪٽر ڪاشف رياض کان آڏي پڇا پڻ مڪمل ڪري ورتي، جنهن بعد ڪيس جي ٻڌڻي 19 آڪٽوبر تائين ملتوي ڪئي وئي.

 

اليڪشن ڪميشن اين اي 122 تي ننڍي چونڊ کان اڳ ووٽ منتقل ڪرڻ بابت تحريڪ انصاف جا الزام رد ڪري ڇڏيا

اسلام آباد (بيورو) اليڪشن ڪميشن، اين اي 122 تي ننڍي چونڊ کان اڳ ووٽ منتقل ڪرڻ بابت تحريڪ انصاف جا الزام رد ڪري ڇڏيا آهن. اليڪشن ڪميشن جي ترجمان جاري ڪيل بيان ۾ چيو ته اليڪشن ٽربيونل پاران اياز صادق کي 26 آگسٽ تي ڊي سيٽ ڪيو ويو، جنهن بعد ننڍي چونڊ جو شيڊول جاري ٿيو. ترجمان موجب، 31 آگسٽ تي شيڊول جاري ڪرڻ سان گڏ ووٽرز فهرست به منجمند ڪيون ويون هيون. اليڪشن ڪميشن جو چوڻ آهي ته پنجاب ۾ عام چونڊن کانپوءِ رجسٽرڊ ووٽرز جو انگ 45 لک آهي، اين اي 122 تي ووٽ منتقل ڪرڻ بابت الزامن ۾ ڪابه صداقت نه آهي.

 

اين اي 122 جي ووٽن جي منتقلي تي جانچ کانپوءِ احتجاج جو فيصلو ڪنداسين: عمران خان

لاهور (بيورو) تحريڪ انصاف اين اي 122 جي ووٽن جي منتلقي جي جاچ لاءِ سيل قائم ڪري ڇڏيو، عمران خان چيو آهي ته هو ووٽن جي منتقلي بابت ثبوت کڻي اليڪشن ڪميشن وٽ ويندا، هو ملڪ ۾ انصاف جي جنگ وڙهي رهيا آهن، تحريڪ انصاف چونڊن ۾ شڪست کان نٿي ڊڄي.. لاهور ۾ ڪارڪنن کي خطاب ڪندي تحريڪ انصاف جي سربراهه عمران خان چيو ته ڪارڪنن جي خوشي مان کين لڳي رهيو آهي ته تحريڪ انصاف ننڍي چونڊ کٽي چڪي آهي.عمران خان چيو ته تحريڪ انصاف ووٽن جي منتقلي جا ثبوت کڻي اليڪشن ڪميشن وٽ ويندي، ووٽن جي منتقلي جي جاچ لاءِ سيل قائم ڪري ڇڏيو آهي. تحريڪ انصاف جي سربراهه چيو ته هو پاڪستان ۾ انصاف جو نظام آڻڻ لاءِ جنگ وڙهي رهيا آهن، تحريڪ انصاف جي ويڙهه جو مقصد ڪجهه تڪ کٽڻ نه پر ملڪ اندر عدل ۽ انصاف جي نظام کي ٺيڪ ڪرڻ آهي.عمران خان چيو ته اليڪشن ٽربيونل فيصلو ڏيڻ ۾ 4 مهينن بدران اڍائي سال لڳايا، جيستائين چونڊ جو نظام ٺيڪ نٿو ٿئي تيستائين ملڪ اندر انصاف جو نظام ٺيڪ نٿو ٿي سگهي. تحريڪ انصاف جي سربراهه چيو ته سندن جنگ رڳو چونڊ وڙهڻ لاءِ نه پر نظام کي ٺيڪ ڪرڻ لاءِ پهريون قدم آهي، ملڪ کي بچائڻ لاءِ اليڪشن ڪميشن کي آزاد ۽ خودمختيار بڻائڻو پوندو. عمران خان چيو ته آءِ ايم ايف کان ورتل قرض حڪومت عوام کان وٺي واپس ڪندي،