تازيون خبرون

Daily Archives: October 13, 2015

گورنر جي وڏي وزير سان ملاقات، وي سي ڊائو يونيورسٽي جي مقرري ۽ پيدا ٿيل وِڇوٽيون ختم ڪرڻ بابت ڳالهيون

ڪراچي (اسٽاف رپورٽر) گورنر ڊاڪٽر عشرت العباد جي وڏي وزير قائم علي شاهه سان ملاقات ڪئي آهي، ملاقات ۾ وي سي ڊائو يونيورسٽي جي مقرري ۽ پيدا ٿيل وِڇوٽيون ختم ڪرڻ بابت خيالن جي ڏي وٺ ڪئي وئي. گورنر سنڌ ڊاڪٽر عشرت العباد سي ايم هائوس پهچي وڏزير سيد قائم علي شاهه سان ملاقات ڪئي.ملاقات ۾ وي سي ڊائو يونيورسٽي جي مقرري ۽ ٻين معاملن تي ڳالهيون ڪيون ويون آهن.ملاقات دوران وڏي زير ۽ گورنر ۾ پيدا ٿيل وڇوٽيون ختم ڪرڻ جي حوالي سان پڻ خيالن جي ڏي وٺ ڪئي وئي… واضع رهي ته وڏي وزير طرفان ڊائو يونيورسٽي جي وي سي جي مقرري لاءِ گورنر کي سفارش موڪلي هئي، جيڪا عشرت العباد رد ڪندي پنهنجي مرضي موجب نوشاد شيخ کي وي سي مقرر ڪيو هو. گورنر پاران وڏي وزير جي سفارش رد ٿيڻ کانپوءِ اختلاف پيدا ٿيا، ان ئي سلسلي ۾ اڄ ملاقات ڪئي وئي آهي.

 

نوجوانن کي ٻين تي تنقيد ڪرڻ بدران ملڪ لاءِ پاڻ ڪجهھ ڪرڻ گھرجي: نثار کهڙو

لاڙڪاڻو  (بيورو) اطلاعات ۽ تعليم واري سينئر صوبائي وزير نثار احمد کهڙو چيو آهي ته نوجوان ملڪي آباديءَ جو 60 سيڪڙو آهن، اهي سڀاڻي جي اميد آهن جيڪي اهي ملڪي مسئلن کان لا تعلق رهندا ته اسين پوئتي هليا وينداسين. ٻين تي تنقيد ڪرڻ سولو ڪم آهي پر نوجوانن کي ٻين تي تنقيد ڪرڻ بدران ملڪ لاءِ پاڻ ڪجھ ڪرڻ گھرجي. اهڙن خيالن جو اظهار اڄ سر شاهنواز ڀٽو لائبريري لاڙڪاڻي ۾ يوٿ پارليامينٽ طرفان ڪوٺايل فيوچر ليڊرز ڪانفرنس جي تقريب کي خطاب ڪندي ڪيو. هن چيو ته 12 آڪٽوبر ملڪي تاريخ جو هڪ ڪارو ڏينهن آهي، ان ڏهاڙي تي هڪ جنرل ۽ سندس ساٿين چونڊيل جمهوري حڪومت جو تختو اونڌو ڪري جيل موڪلي ڇڏيو. نواز شريف اسانجي پارٽي جو نه هئو پوءِ به اسان آمر مشرف جي انهيءَ قدم جي مذمت ڪئي ڇو ته نواز شريف آئيني وزير اعظم هو ۽ خدشي هئڻ باوجود اسان مشرف خلاف احتجاج ڪيو. هن چيو ته 12 آڪٽوبر کانپوءِ ڪجھ وقت پوءِ دنيا 21 هين صديءَ جو جشن ملهائي رهي هئي. سڄي دنيا ۾ پاڪستان جي ساک خراب ڪئي وئي. هن چيو ته سنڌ واحد صوبو آهي جنهن مڪاني چونڊن جي قانون ۾ نوجوانن لاءِ خاص سيٽون رکيون آهن. هن چيو ته اهو ڪريڊٽ بلاول ڀٽو زرداري ڏانهن وڃي ٿو ۽ اها بلاول ڀٽو جي تجويز هئي جنهن کي قبول ڪندي اسان نوجوانن کي مڪاني چونڊن ۾ نمائندگيءَ جو موقعو ڏنو آهي. هاڻي 21 کان 25 سالن جي عمر وارا نوجوان به مقاني چونڊن ۾ حصو وٺي رهيا آهن. هن وڌيڪ چيو ته آمرن سدائين عوام کي دٻائي ملڪ تي حڪمراني ڪئي آهي، هو چوندا آهن ته عوام ڪمزور هجي، ان لاءِ ئي جمهوريت جو نالو وٺندڙ کي ڪوڙا، ڦٽڪا، ڦاهيون ۽ گوليون هيون وينديون آهن ته جيئن حاڪم طاقت وٺي ۽ عوام ڪمزور رهي. پر هاڻي عوام کي ووٽ جي طاقت ڏياري وئي آهي ۽ ڪجھ به ٿي وڃي پر اسان جمهوريت کي هٿان وڃائڻ جو سوچي به نه ٿا سگھون.  هن چيو ته پاڪستان پهريان دنيا جو سڀ کان وڏو اسلامي ملڪ آهي. هن چيو ته عوام واپڊا وارن، گندگي ۽ ٻين سماجي براين خلاف احتجاج ڪري ٿو ائين گوسڙو ماسترن جي گھرن آڏو به احتجاج ڪريو ته جيئن هو اچي سندن ٻارن کي تعليم ڏين. هن چيو ته منهنجي انهيءَ ڳالھ تي سوشل ميڊيا ۾ وڏي مهم هلائي وئي ۽ هفتي اندر گوسڙو ماسترن جا 3000 نالا ۽ تصويرون مون ڏانهن موڪليون ويون، جنهن خلاف ڪاروائي ڪئي پئي وڃي. عوام پاڻ ئي گوسڙو ماسترن کي اسڪول وڃڻ تي مجبور ڪري ته جيئن سندن ٻار تعليم حاصل ڪري سگھن. هن چيو ته ميٽرڪ تائين مفت تعليم ۽ ڪتاب ڏيڻ باوجود سنڌ ۾ چاليھ لک ٻار اسڪول وڃن ۽ اوترا ئي ٻار اسڪول نه ٿا وڃن ان تعني کي ختم ڪرڻو پوندو. ان لاءِ نوجوان پنهنجي علائقي جي ٻارن کي اسڪولن ۾ داخلا ڪرائي انرولمينٽ وڌائن. هن چيو ته نوجوانن پنهنجي اوڙي پاڙي جي غريبن ٻارن کي ڏينهن ۾ صرف اڌ ڪلاڪ تعليم ڏين ته هي جهالت ختم ٿي سگھي ٿي ۽ بنا خرچ تي لکين ٻارڙا پڙهي سگھن ٿا. ان موقعي تي صدر لاڙڪاڻو پريس ڪلب ايس اقبال بابو، سينئر نائب صدر طارق دراني، خادم ڏهوٽ ۽ ٻين ۾ ايوارڊ ورهايا ويا. صوبائي وزير يوٿ پارليامينٽ جي عهديدارن ۾ پڻ ايوارڊ ۽ سرٽيفڪيٽ ورهايا. جڏهن ته يوٿ پارليامينٽ جي اڳواڻ رضوان جعفر پڻ سينئر صوبائي وزير نثار احمد کهڙو کي ايوارڊ ڏنو.

 

آئيني ۽ قانوني گهرجون پوريون ڪرڻ سان ئي قانون جي حڪمراني ممڪن آهي: چيف جسٽس

اسلام آباد (بيورو) سـُپريم ڪورٽ جي چيف جسٽس، جسٽس انور ظهير جمالي چيو آهي ته ادارن پاران حدون اورنگهڻ نه صرف جمهوريت لاءِ نقصانڪار آهي پر ان سان عوام جي ڀلائي تي به اثر پون ٿا. سپريم ڪورٽ اسلام آباد ۾ رٽائرڊ ٿيندڙ جسٽس سرمد جلال عثماني جي مان ۾ فل ڪورٽ ريفرنس ٿيو، جنهن ۾ چيف جسٽس انور ظهير جمالي سميت سپريم ڪورٽ جي ججز ۽ وڪيلن شرڪت ڪئي.  ريفرنس کي خطاب ڪندي چيف جسٽس انور ظهير جمالي چيو ته ائين ۾ مختلفادارن جي لاءِ اختيارن جي ورڇ جو فارمولو ڏنو آهي، جنهن تحت ادارن کي پنهنجي حدن اندر رهي ڪم ڪرڻ گهرجي. چيف جسٽس چيو ته ڪنهن به اداري پاران آئين ۾ مقرر ڪيل حدون اورانگهڻ جمهوريت لاءِ نقصانڪار آهي، جمهوريت لاءِ عدل ۽ انصاف توڙي قانون جي حڪمراني جي به ضرورت آهي. سپريم ڪورٽ جي چيف جسٽس وڌيڪ چيو ته قانون جي حڪمران تڏهن ئي ممڪن آهي، جڏهن سڀ ادارا آئيني ۽ قانون گهرجون پوريون ڪندا.

 

بلاول ڀٽو زرداري بيجنگ ۾ ” ايشين پوليٽيڪل پارٽيز اسپيشل ڪانفرنس ۾ شرڪت لاءِ دبئي روانو

ڪراچي(اسٽاف رپورٽر) پاڪستان پيپلزپارٽي جو چيئرمين بلاول ڀٽو زرداري، پيپلزپارٽي جي وفد سان گڏ بيجنگ ۾ 14 آڪٽوبر کان16  آڪٽوبر تائين ٿيندڙ” ايشين پوليٽيڪل پارٽيز اسپيشل ڪانفرنس آن سلڪ روڊ“ ۾ شرڪت لاءِ دبئي رستي چين لاءِ روانو ٿي ويو آهي،آمريڪا ۾ اڳوڻي سفير سينيٽر شيري رحمان، اڳوڻو ڊپٽي اسپيڪر قومي اسيمبلي فيصل ڪريم ڪنڊي ۽ بلاول ڀٽو جو پوليٽيڪل سيڪريٽري جميل سومرو وفد ۾ شامل آهن، ڪيمونسٽ پارٽي آف چائنا ايشيا جي قديمي واپاري، ثقافتي ۽ سياسي لاڳاپن جي اهڃاڻ ” سِلڪ روڊ“ کي ٻيهر اجاگر ڪرڻ لاءِ اها ڪانفرنس ڪوٺائي آهي ، هن ڪانفرنس جا مکيه موضوع سلڪ روڊ لاءِ نئون ويزن۽ گڏيل ترقي لاءِ اپاءُ وٺڻ آهن، هن ڪانفرنس ۾ شريڪ سياسي اڳواڻن جا ٽي پئنل پنهنجي پنهنجي موضوعن سياسي پارٽين جي لاءِ نئون اتفاق راءِ، عوام جي وچ ۾ ڳانڍاپو، تهذيبن ۽ معاشي ويجھڙائپ جي وچ ۾ نئون ڊائلاگ، ترقي جي لاءِ نئون تحرڪ ۽ ان سان گڏ اقتصادي تعاون واري تنظيم بابت بحث مباحثوبابت ويچار ونڊيندا، چيئرمين بلاول ڀٽو زرداري جي اڳواڻي ۾ وفد جي هفتي جي پڄاڻي تي واپسي جو امڪان آهي.

 

گلگت جي عدالت الطاف حسين کي مجموعي طور 81 سال قيد جي سزا ٻڌائي ڇڏي

اسلام آباد (بيورو) آءِ جي سنڌ غلام حيدر جمالي، سينيٽ جي گهرو معاملن بابت اسٽينڊنگ ڪميٽيءَ کي آگاهي ڏني آهي ته صفورا سانحي ۾ ملوث جوابدار پهرين القاعده ۽ هاڻي داعش لاءِ ڪم ڪري رهيا هئا، جهلم جي هڪ شهري داعش جي نظرئي کي سنڌ ۾ هٿي وٺرائي، رينجرز مخالف اشتهارن جي جاچ ڪئي پئي وڃي. اسلام آباد ۾ سينيٽر رحمان ملڪ جي صدارت هيٺ سينيٽ جي گهرو معاملن بابت اسٽينڊنگ ڪميٽي جو اجلاس ٿيو، جنهن ۾ آءِ جي سنڌ غلام حيدر جمالي پاران صوبي ۾ امن امان بابت بريفنگ ڏني وئي.  آءِ جي سنڌ غلام حيدر جمالي چيو ته جنوري 2015 کان هن وقت تائين 6 سئو 44 ڏوهارين کي گرفتار ڪيو ويو آهي، القاعده ۽ تحريڪ طالبان جي هڪ سئو 67 شرپسندن کي به سوگهو ڪيو ويو آهي. هن چيو ته لياري کي ڏوهارين جي جنت چيو ويندو هو، ان علائقي کي ڏوهارين کان پاڪ ڪرائڻ پوليس لاءِ چيلينج هو پر پوليس ۽ رينجرز جي ڪاررواين بعد لياري ۾ هاڻي امن ٿي ويو آهي. آءِ جي سنڌ چيو ته لياري گينگ وار جي هڪ سئو 86 ڏوهارين کي گرفتار ڪيو ويو آهي، مختلف ڏوهارين خلاف چالان پڻ پيش ڪيا ويا آهن. غلام حيدر جمالي چيو ته ايس ايس پي چوڌري اسلم تي القاعده ۽ تحريڪ طالبان حملو ڪرايو، پوليس سان گڏ آرمي ۽ رينجرز کي به نشانو بڻايو پيو وڃي پر هاڻي ڪراچي سميت سڄي سنڌ جون حالتون پهريان کان گهڻيون بهتر آهن. آءِ جي سنڌ چيو ته صفورا سانحي، سبين محمود قتل ڪيس ۽ ڪراچي ايئرپورٽ حملي سميت سمورن هاءِ پروفائيل حملن ۾ ملوث جوابدارن کي پڪڙيو ويو آهي. هـُن ٻڌايو ته صفورا سانحي ۾ ملوث گروهه 37 ماڻهن تي مشتمل آهي، گروهه پهريان القاعده ۽ هاڻي داعش لاءِ ڪم ڪري رهيو آهي، سنڌ ۾ داعش جي نظرئي کي هٿي وٺرائيندڙ شخص جو تعلق جهلم سان آهي ۽ ان جو نالو طاهر منهاس آهي. ان موقعي تي ڪميٽي چيئرمين سوال ڪيو ته رينجرز مخالف اشتهار ڪنهن ڇپرايا، انهن خلاف ڪارروائي ٿي.؟ آءِ جي سنڌ غلام حيدر جمالي چيو ته ان معاملي جي جاچ ڪئي پئي وڃي، ملوثن خلاف قانون موجب ڪارروائي ڪئي ويندي. سينيٽ جي گهرو معاملن بابت اسٽينڊنگ ڪميٽي سنڌ پوليس جي ڪارڪردگي تي اطمينان جو اظهار ڪندي چيو ته داعش کي پرڏيهي فنڊنگ ٿيندي آهي. رحمان ملڪ چيو ته داعش خلاف به قومي ايڪشن پلان جوڙڻ جي ضرورت آهي.

 

آخري وقت ۾ پي ٽي آءِ ورڪرز کي پولنگ اسٽيشنز کان ٻاهر ڪڍڻ جي جاچ ڪري رهيا آهيون: عمران خان

اسلام آباد (بيورو) تحريڪ انصاف جي چيئرمين عمران خان، ننڍي چونڊ ۾ حصو وٺندڙ اميدوارن کي مبارڪباد ڏيندي چيو آهي ته ن ليگ جي ڌانڌلي روڪڻ لاءِ واضح حڪمت عملي جوڙڻ جي ضرورت ڪئي، آخري وقت ۾ پي ٽي آءِ ورڪرز کي پولنگ اسٽيشنز کان ٻاهر ڪڍڻ جي جاچ ڪري رهيا آهيون. سماجي رابطن واري ويب سائيٽ ٽوئيٽر تي جاري ڪيل ٽوئيٽ۾ عمران خان چيو ته هو اين اي 122 تي ڪامياب مقابلو ڪندڙ عليم خان ۽ پي پي 147 تي ڪاميابي حاصل ڪندڙ شعيب صديقي کي واڌايون ڏئي ٿو. هن چيو ته عليم خان وفاق ۽ پنجاب حڪومت جو ڀرپور مقابلو ڪيو، هي اين اي 122 تي تحريڪ انصاف جي اخلاقي فتح آهي. عمران خان چيو ته ننڍي چونڊ تحريڪ انصاف کي مضبوط ڪرڻ ڪرڻ ۾ مددگار ثابت ٿيندي، پنهنجي غلطين مان سبق سکنداسين. پي ٽي آءِ چيئرمين وڌيڪ چيو ته اين اي 122 ۾ تحريڪ انصاف جي خارج ڪيل ووٽرز ۽ آخري وقت ۾ ووٽرز کي پولنگ اسٽيشنز مان ٻاهر ڪڍڻ جي جاچ ڪري رهيا آهيون، جاچ مڪمل ٿيڻ بعد اليڪشن ڪميشن سان رابطو ڪنداسين.

 

ڀارت ۾ خورشيد قصوري جي ڪتاب جي مهورتي تقريب کان اڳ هندو انتهاپسندن آرگنائيزر جو منهن ڪارو ڪري ڇڏيو

ممبئي (مانيٽرنگ ڊيسڪ) ڀارت ۾ پاڪستان جي اڳوڻي پرڏيهي وزير خورشيد محمود قصوري جي ڪتاب جي مهورتي تقريب کان اڳ هندو انتهاپسندن، آرگنائيزر تي حملو ڪري سندس منهن ڪارو ڪري ڇڏيو. ڀارتي ميڊيا موجب پاڪستان جي اڳوڻي پرڏيهي وزير خورشيدمحمود قصوري جي ڪتاب جي مهورت اڄ شام پنجين وڳي ممبئي جي هوٽل ۾ ٿيڻي هئي. مهورتي تقريب کان اڳ هندو انتهاپسند تنظيم شيو سينا جي بدمعاشن، آرگنائيزيشن آبزرور ريسرچ فائونڊيشن جي سربراهه سڌندا ڪـُلڪرنـِي جو منهن مس سان ڪارو ڪري ڇڏيو ۽ کيس ڌمڪي ڏني ته ڪتاب جي مهورتي تقريب رد ڪئي وڃي. شيوسينا جي غنڊن ،فائونڊيشن جي آرگنائيرز سڌندا ڪـُلڪرنـِي کي تقريب ڪرڻ جي صورت ۾ سينا اسٽائل ۾ احتجاج جي ڌمڪي ڏني. سڌندا ڪـُلڪرنـِي ڪتاب جي مهورتي تقريب ملتوي ڪرڻ کان انڪار ڪيو ته شيو سينا جي غنڊن سندس منهن تي ڪاري مس ملي ڇڏي. واقعي بعد سڌندا ڪـُلڪرنـِي ممبئي ۾ پاڪستان جي اڳوڻي پرڏيهي وزير خورشيد محمود قصوري سان ڪاري منهن واري حالت ۾ پريس ڪانفرنس ڪئي. فائونڊيشن جي آرگنائيرز سڌندا ڪـُلڪرنـِي جو چوڻ هو ته شيو سينا جي ڌمڪين باوجود ممبئي ۾ خورشيد قصوري جي ڪتاب جي مهورتي تقريب ضرور ٿيندي. ڪــُلڪرني چيو ته خورشيد قصوري جو ڪتاب پاڪستان ۽ ڀارت وچ ۾ امن لاءِ عظيم ڪارنامو آهي. ان موقعي خورشيد محمود قصوري، شيو سينا جي روئي تي افسوس جو اظهار ڪندي چيو ته هـُو هتي غير قانوني ڪم ڪرڻ ناهي آيو. هن چيو ته پاڪستان ۾ هندن کي جيڪا عزت ڏني ويندي آهي اهڙي عزت مسلمانن کي ڀارت ۾ نه ملي رهي آهي. خورشيد محمود قصوري جي ڪتاب جي مهورتي تقريب لاءِ مهارا شٽر جي وڏي وزير مڪمل سڪيورٽي فراهم ڪرڻ جي خاطري ڪرائي هئي. ٻئي طرف شيو سينا جي پارلياماني ميمبر سنجي روت حملي جي حمايت ڪندي چيو آهي ته ڪلڪرني جو ڪارو ڪيل منهن رڳو مس نه پر سندن فوجين جو رت آهي. ياد رهي ته ڀارتي هندو انتهاپسند تنظيم شيو سينا ان کان اڳ به پاڪستاني فنڪارن کي ڌمڪيون ڏئي چـُڪي آهي ۽ پاڪستاني ڳائڻي غلام علي جو ڪنسرٽ ممبئي جي نهرو سينٽر ۾ ٿيڻو هو جيڪو شيو سينا جي ڌمڪين بعد ملتوي ڪيو ويو.

 

اداڪاره ڪيٽ ونسليٽ 40 سالن جي ٿي وئي

لاس اينجلس (شوبز نيوز) هالي ووڊ اداڪاره ۽ آسڪر ايوارڊ يافته ڪيٽ ونسليٽ 40 ورهين جي ٿي وئي آهي. سڌ سماءَ وارن ذريعن موجب ڪيٽ ونسليٽ 5 آڪٽوبر 1975ع جي برطانيا جي علائقي بروڪ شائر ۾ پيدا ٿي ۽ کيسننڍي هوندي کان ئي ڊرامي ۽ پرفارمنگ آرٽس سان خاص لڳاءُ هو. هن پنهنجي فني زندگيءَ جي شروعات 1991ع ۾ ڪئي، پر کيس اصل شهرت 1997ع ۾ رليز ٿيل فلم ”ٽائيٽينڪ“ کان ملي. ڪيٽ ونسليٽ کي 6 ڀيرا اڪيڊمي ايوارڊ لاءِ نامزد ٿيندڙ گهٽ ڄمار واري اداڪاره هئڻ جو اعزاز پڻ حاصل آهي. هن فلمي دنيا جو سڀ کان وڏو آسڪر ايوارڊ 2009ع ۾ فلم ”ريڊر“ ۾ شاندار اداڪاري تي حاصل ڪيو.

 

پَٽڪو پائڻ سان پنهنجو قد 10 فوٽ ڊگهو لڳندو آهي: اداڪار اڪشي ڪمار

ممبئي (شوبز نيوز) ڀارتي اداڪار اڪشي ڪمار چيو آهي ته کيس پَٽڪو پائڻ سان پنهنجو قد 10 فوٽ تائين ڊگهو لڳندو آهي، هن کي پنهنجي تازي گفتگو ۾ چيو ته فلم سنگهه از بلنگ ۾ پَٽڪو پاتل ڏيکاريو ويو آهي، هن چيو ته پَٽڪو جو شان ۽ خصوصيت اها آهي ته انسان ان کي پائڻ سان وڏائي محسوس ڪندو آهي، اڪشي ڪمار چيو ته کيس اميد آهي ته سندس نئين فلم باڪس آفيس تي سٺو بزنس ڪندي، فلم سنگهه از بلنگ جي نمائش سينيما گهرن ۾ جاري آهي.

 

عالمي نمبر ون نو ويڪ جوڪووچي ڇهون ڀيرو چائنا اوپن ٽينس ٽورنامينٽ کٽي ورتو

بيجنگ (اسپورٽس نيوز) سربيا جي نالي واري ٽينس اسٽار عالمي شهرت يافته ۽ عالمي نمبر ون نوويڪ جوڪووچ ڇهون ڀيرو چائنا اوپن ٽينس ٽورنامينٽ کٽي ورتو. هن فائينل ۾ اسپين اسٽار رافيل نڊال کي شڪست ڏني. سندس ڪاميابي کان پوءِ نوويڪ جوڪووچ هلندڙ سال جو اٽون اي ٽي پي ٽائيٽل پنهنجي نالي ڪيو آهي. چين جي گادي واري شهر بيجنگ ۾ کيڏيل مينز سنگلز ايونٽ جي فائينل ۾ ٽاپ سيڊڊ نوويڪ جوڪووچ شاندار ڪارڪردگي جو مظاهرو ڪندي. رافيل کي شڪست ڏني هن رافيل نڊال کي اسٽريٽ اسپيس ۾ شڪت ڏني.