تازيون خبرون

Daily Archives: October 13, 2015

نين فلمن ۾ سٺن ۽ معياري اسڪرپٽ کي وڌيڪ بهتر بڻائڻ جي ضرورت آهي: زيبا بختيار

لاهور (شوبز نيوز) فلم اسٽار زيبا بختيار نين فلمن ۾ سٺين ڪهاڻين ۽ معياري اسڪرپٽ جي کوٽ تي اعتراض ڪندي ان شعبي کي وڌيڪ بهتر بڻائڻ تي زور ڏنو آهي. زيبا بختيار جنهن سيد نور جي فلم ”سرگم“ سان پنهنجي فلمي ڪيريئر جي شروعات ڪئي هئي، اهائي فلمساز ۽ ڊائريڪٽر پڻ بڻجي چڪي آهي. هن چيو آهي ته هن وقت فلمسازيءَ جو عمل همٿائيندڙ ضرور آهي پر فلم ۾ ڪهاڻي تمام اهم هوندي آهي ۽ ان تي زور ڏيڻ جي ضرورت آهي. زيبا بختيار چيو ته هوءَ 2 فلمون ”بابو“ ۽ ”مشن 021“ جي پروڊڪشن کانپوءِ هاڻي وڌيڪ فلمون ٺاهڻ جي پڻ تياري ڪري رهي آهي ۽ سندس نين فلمن جي ڪهاڻي ۽ موضوع تي هوءَ تمام گهڻي محنت ڪندي.

 

سمورو ڌيان ايندڙ فلم ”هومن جهان“ جي رليز تي آهي: ماهره خان

ڪراچي(شوبز نيوز) فلم ۽ ٽي وي اداڪاره ماهره خان چيو آهي ته هن وٽ ڪيتريون ئي بالي ووڊ ۽ پاڪستاني فلمن جا اسڪرپٽ موجود آهن پر اڃا هن ڪنهن نئين فلمي منصوبي لاءِ ڪم ڪرڻ جي حامي ناهي ڀري. هڪ تازي انٽرويو ۾ هن چيو ته هن وقت سندس سمورو ڌيان ايندڙ فلم ”هومن جهان“ جي رليز تي آهي، جنهن کانپوءِ ئي هوءَ ڪو فيصلو ڪندي. هن پاڻ سان گڏ ڪم ڪندڙ اداڪارن بابت ڳالهائيندي چيو ته فواد خان ذهين ۽ محنتي اداڪار آهي، جڏهن ته شاهه رُخ خان جي هو اڳ کان مداح هئي. هن سوچيو به نه هو ته هوءَ ڪڏهن شاهه رُخ سان ڪم ڪندي.

 

سريلنڪا ۽ ويسٽ انڊيز وچ ۾ پهرين ٽيسٽ اڄ کان شروع ٿيندي

گال(اسپورٽس نيوز) سريلنڪا ۽ ويسٽ انڊيز جي ڪرڪيٽ ٽيمن وچ ۾ 2 ٽيسٽ ميچن جي سيريز جي پهرين ميچ (اڄ) اربع کان گال انٽرنيشنل اسٽيڊيم ۾ شروع ٿيندي. ويسٽ انڊين ٽيم جين هولڊر جي قيادت ۾ سريلنڪا جي دؤري تي آهي، جتي هو ميزبان ٽيم خلاف 2 ٽيسٽ، 3 ون ڊي ۽ 2 ٽي 20 ميچز کيڏندي. ٻنهي ٽيمن وچ ۾ سريز جي پهرين ٽيسٽ 14 کان 18 آڪٽوبر تائين ۽ ٻي 22 کان 26 آڪٽوبر تائين کيڏي ويندي، ان کان پوءِ ويسٽ انڊين ٽيم سريلنڪا بورڊ پريزيڊنٽ اليون خلاف 29 آڪٽوبر تي ڪولمبو ۾ ٽوئر ميچ کيڏيندي. سريلنڪا ۽ ويسٽ انڊين وچ ۾ پهرين ون ڊي پهرين نومبر، ٻي 4 نومبر جڏهن ته ٽين ۽ آخري ون ڊي ميچ 7 نومبر تي کيڏي ويندي. ٻنهي ٽيمن وچ ۾ پهرين ٽي 20 ميچ 9 نومبر تي جڏهن ته ٻي 12 نومبر تي کيڏي ويندي.

اي بي ڊي وليئرز ون ڊي ۾ ڪپتان طور گهٽ اننگز ۾ 10 سينچريون ٺاهڻ جو عالمي رڪارڊ پنهنجي نالي ڪري ورتو

ڪانپور(اسپورٽس نيوز) مشهور بيٽسمين اي بي ڊي وليئرز ون ڊي انٽرنيشنل ۾ ڪپتان طور گهٽ ۾ گهٽ اننگز ۾ 10 سينچريون ٺاهڻ جو عالمي رڪارڊ پنهنجي نالي ڪري ورتو. هن اهو اعزاز ڀارت خلاف ڪانپور ۾ کيڏيل پهرين ون ڊي ميچ ۾ حاصل ڪيو. هن گذريل ڏينهن تيز تر بيٽنگ جو مظاهرو ڪيو ۽ 73 بالن تي 5 ڇڪن جي مدد سان104 رنسن جي ناقابل شڪست اننگز کيڏي جنهن بعد هو ڪپتان طور گهٽ ۾ گهٽ اننگز ۾ 10 ون ڊي سينچريون ٺاهيندڙ رانديگر بڻجي ويو. ڊي وليئرز اهو اعزاز 68 اننگز ۾ حاصل ڪيو، ان کان اڳ ان رڪارڊ جو مالڪ ڀارت جو سارو گنگولي هو جنهن 93 اننگز ۾ اهو ڪارنامو انجام ڏنو هو.

 

نيون، پراڻيون ڳالهيون: مير اعظم علي ٽالپر

ٻارنهن آڪٽوبر جي تاريخ هميشه جيان ساليانه آئي ۽ گذري به وئي، پر ڪنهن به ادبي حلقي کان سرڪاري ڪاموري 12 آڪٽوبر 1970ع کي ياد نه ڪيو، جنهن تاريخ تي هڪ اهم شخصيت جو پراسرار حالت ۾ موت ٿيو هو، جنهن جي زنده هئڻ سان هڪ طرف ڪامورا شاهي کي مجال آهي جو ڪو غلط ڪم ٿي وڃي، ته ٻئي طرف شام جو شهرن ۾ ادبي محفلن جي اها شخصيت جان هوندي هئي، پر 12 آڪٽوبر 1970ع جي اچانڪ ۽ پراسرار موت بعد سندس گهرواري شهناز تي جيڪو ڪيس عدالت ۾ هلڻ لڳو ۽ ان جي ڪارروائي جيڪا روزانو عبرت اخبار 1970ع ۾ شايع ڪئي، سا ان زماني جي سڀ کان وڌيڪ پڙهندڙن ۾ مقبول ٿي ۽ ان سان روز هڪ فوٽو (بلاڪ) هوندو هو ۽ ان دور ۾ اخبارن ۾ ٽارزن جي ڪهاڻي پڙهڻ وارن جو اهم مشغلو هو، پر عبرت ۾ شهناز جي ڪهاڻي قارئين پڙهڻ لاءِ انتهائي بيتاب هوندا هئا ته ڪورٽ ۾ گذريل ڏينهن ڇا وهيو ۽ واپريو؟ ڇو ته هن زماني وانگر پل پل خبر ڏيڻ واري ميڊيا نه هئي.

هيءَ ڳالهه آهي 16 آڪٽوبر 1930ع دوران اتر پرديش جي الهه آباد ۾ پيدا ٿيڻ سبب تيغ الهه آبادي عرف مصطفيٰ زيڊي جي، جيڪو ورهاڱي بعد لاهور آيو، جڏهن ته مئٽرڪ هن يوپي بورڊ مان 1945ع ۾ پاس ڪئي، پر گورنمينٽ ڪاليج لاهور مان سول سرونٽس جي تربيت وٺڻ جي باوجود به سوشل ذهنيت وارو هئڻ ڪري انقلابي شخص هو. هن جي دماغ ۾ هر هڪ انسان جي خوشحالي لاءِ، عوام جي برتري لاءِ سوچ هئي. هن سي ايس ايس ڪرڻ جي باوجود به سوچ تبديل نه ڪئي، ان ڪري هن ڪامورڪي نظام ۾ پاڻ کي ان فٽ محسوس ڪيو، ان ڪري هن ئي سرڪاري ڪامورن لاءِ لکيو ته حڪومت جن ماڻهن کي رکندي آهي، انهن لاءِ شرط جو ڊگهو سودو هوندو آهي، ان کي قبول ڪرڻ واري کي چرين جي گهر ۾ داخل ڪيو ويندو آهي، جتي سال کن ۾ مکڻ، بيضا ۽ مرغ کارايا ويندا آهن. ان بعد هو تيار ٿي محبت ۽ دڙڪن سان گڏ اختيار کڻي ٻاهر نڪرندو آهي. مصطفيٰ زيڊي پهرين سيالڪوٽ ۾ 1956ع کان 1959ع تائين اسسٽنٽ ڪمشنر ڊويزنل مئجسٽريٽ ليئه، 1960ع ۾ جهلم جو ڊي سي 1961ع کان سنڌ ۾ نوابشاهه ۽ 1963ع ۾ خيرپور جو ڊي سي رهيو. ان بعد 1965ع ۾ ئي لاهور جو به ڊي سي مقرر ٿيو، جتي هن اڄڪلهه جي چوڌري شجاعت جي چوڌري ظهور الاهي جي اٽي جي ماڊرن فلورملز بند ڪرائي ڇڏي، جيڪا گورنر جي رسائي ٿيڻ باوجود به ظهور الاهي نه کولائي سگهيو. هن کي 1968ع ۾ تمغه ’قائداعظم‘ پڻ مليو هو. ان بعد ان ئي سال سندس خدمتن جو قدر ڪندي کيس لنڊن موڪليو ويو هو، پر مصطفيٰ کي 12 ڊسمبر 1970ع تي نوڪري مان ان وقت جي صدر يحيٰ خان (۽ ان وقت جي سندس همنوا الطاف گوهر) هٽائي ڇڏيو. هن تي الزام هو ته هن پاڳل (چريو) نالي نظم لکيو هو، جيڪو صدر يحيٰ تي هو. ان ۾ اهو به هو ته هي هڪ جيل آهي ۽ ان جو داروغو هڪ پاڳل (يحيٰ خان) آهي. هن ادب جي لحاظ کان 1963ع ۾ هڪ شاندار جشن مهراڻ خيرپور ۾ ڪرايو هو. هي هڪ حسن پرست، عاشق مزاج هو. جيتوڻيڪ مصطفيٰ سان گڏ ٻيا 303 ڪامورا به برطرف ٿيا هئا ۽ 1971ع ۾ ذوالفقار ڀُٽي به 66 ڪامورا برطرف ڪيا هئا.

هن دانشور انسان جو ضمير سان جهيڙو هو، هن ڪيترائي عشق ۽ معاشقا ڪيا، جيڪي هندستان کان پاڪستان هليا، ايتري قدر جو هن هڪ جرمن سان به عشق ڪيو هو، پر سڀ کان آخر ۾ ڪشمير ”ڪي ڪلي“ شهناز سان پيار ڪيو، جيڪا خود شادي شده هئي، جيڪا 12 آڪٽوبر تي ڪي ڊي اسڪيم نمبر بي 21 جي فليٽ ۾ مصطفيٰ زيڊي جي لاش سان گڏ هئي، جتي فائنل گوريون نڪ بستري ۽ وهاڻي ۾ هو ۽ بيهوش شهناز گل هئي.

خودڪشي جو ڪيس داخل ڪيو ويو، پر مائٽن ان کي قتل چيو هو. ان ڪري شهناز کي ان پراسرار قتل ڪيس ۾ گرفتار ڪيو ويو هو، جڏهن ته پوليس رپورٽ ۾ شهناز ۽ مصطفيٰ جي وچ ۾ تعلقات هئڻ جو لکيو هو. مصطفيٰ پنهنجو شعري مجموعو روشني شهناز جي نالي ڪيو هو. سندس ٻيا ڪتاب زنجيرين، شهر آرزو، مورج ميري صدف صدف، گريبان قبا ساز ۽ ڪوهه ندا آهن.

اڄ به سندس ڪلامن ۾ هڪ عوامي ڪلام ”چلي هين تو ڪٽ هي جائيگا سفر آهسته آهسته“ ڪنن ۾ گونجندڙ آهي.

هن هيروشيما ۽ ناگاساڪي تي نظم ’گرپ اسٽرپٽ ڪي ڪهاني‘ جي پس منظر ۾ ”مين امن چاهتا هون“ لکيو هو. ان زماني ۾ سندس اکين واري عينڪ (چشمو) ۽ ڪپڙا اسٽائل به هڪ انداز هو، هو گجگوڙ سان شاعري ڪندو هو. هي جوش مليح آبادي جو شاگرد به هو. ان 1970ع جي زماني ۾ حيدرآباد جي تلڪ چاڙهي عينڪن جي واحد مشهور دڪان تي ٿلهي فريم وارو ’تيغ‘ ٽائيپ چشمو وٺندا هئا. راقم اڄ به اها عبرت ڏسندو آهي، جنهن ۾ شهناز گل روئي روئي عدالت ۾ اکيون سڄائي ڇڏيون هيون، پر مصطفيٰ زيڊي ڪنهن کي ياد آهي، ڪا خبر نه آهي.

پر تازيون خبرون آهن ته سنڌ ۾ مڪاني چونڊن لاءِ جتي هڪ طرف اليڪشن ڪمشنر ’چونڊن‘ لاءِ پريشان آهي ته ٻئي طرف تڪبندين جي مٿي جي سور کان سنڌ سرڪار مصيبت کي منهن ڏئي رهي آهي، ان کانسوا خود سياسي پارٽيون به اميدوارن کي ٽڪيٽ ڏيڻ ۽ بيهارڻ واري معاملي ۾ ڦاٿل آهن. پارٽي ٽڪيٽ جن کي به ملي آهي ته ان جي سامهون سندن ئي ماڻهو آزاد بيهڻ لاءِ وَرَ کنيو بيٺو آهي.

ان کانسواءِ جيالن جي پارٽي ۾ ته زنانا مهڻا اهي ملن ٿا ته آئون پنجاهه سالن کان پيپلز پارٽي ۾ آهيان، پر نئين ڪنهن ٻي پارٽي کي ڇڏي ايندڙ کي ڇو ٽڪيٽ ڏني وئي آهي؟ حالانڪه اميدوارن کي اها خبر هئڻ گهرجي ته پارٽي جي ٽڪيٽ ڏيڻ ۽ بيهارڻ جدا ڳالهه آهي ۽ ٽڪيٽ ڏيڻ لاءِ ڪيترا سال ڪير پراڻو ’پيپلو يا ليگلو‘ هئڻ ضروري نه آهي. اهو ته اصل ۾ آهي مال تي ڌمال وارو ڪم، مطلب وري نوان ماڻهو مال کائيندا، اسين رهجي وينداسين، پر هوڏانهن سنڌ سرڪار مڪاني چونڊن کي اها ڪنوار سمجهي رهي آهي، جيڪا شادي جي رات اها دعا گهري رهي هئي ته ’صبح جو ڄڃ ۽ گهوٽ کي آئون وسري وڃان ۽ مون کي هتان مائٽن مان وٺي نه وڃن.‘ ائين سنڌ حڪومت به تڪبندين ۽ ٻين حيلن بهانن چاهي ٿي ته ڪنهن نه ڪنهن طريقي سان مڪاني چونڊون نه ٿين ۽ اها ڪنوار اتي ئي ويٺي هجي.

جڏهن ته هندستان جي صوبي بهار ۾ چونڊن جي پهرين مرحلي ۾ ڏهن ضلعن جي 49 سيٽن تي 12 آڪٽوبر تي پولنگ ٿي، جتي ضلعي سمپتي پور ڀاڳل پور ۾ نڪسل جهيڙن سبب صبح سوير شروع ۽ ساڍا ٽي ختم ٿي وئي، جتي مودي هڪ جلسي ۾ من ڪي بات ڪندي چيو ته هندستان جو مسلمان جهالت، بيروزگاري سان جنگ ڪري، نه ڪو ڪنهن هندو سان ۽ هندو به لڙائي ترقي لاءِ ڪن نه ڪنهن مسلمان سان فساد ڪن. ان کانپوءِ بي جي پي جي ورڪ ڪندڙ ڪنول جي گل جي گاڏين مان آنن فانن ڏسندي ڏسندي اک ڇنڀ راتو واهه ٻئي ڏينهن صبح جو هڪ ٻئي جلسي لاءِ آذان جو آواز، نعت ۽ حمد جو آواز اچي رهيو هو ۽ نعرا به تبديل هئا ته هندو- مسلم ڀائي ڀائي ۽ انهن تيز ويندڙ گاڏين کي پٺيان مسلمان ووٽر ته ڏندين آڱريون وجهي ڏسي رهيا هئا ۽ سندن سوچون پٺيان اڏامندڙ مٽي ۾ گم ٿي رهيون هيون ته هي سڀ بهار ۾ ووٽ وٺڻ جو ڪرشمو آهي يا ايڪتا جو حقيقي نمونو.

 

نواز حڪومت کي سهڪائيندڙ پي ٽي آءِ اخلاقي طور کٽي وئي: عقيل عباسي

11 آڪٽوبر 2015ع تي پنجاب جي گادي واري شهر لاهور، جنهن کي عام طرح سياسي ماڻهو تخت لاهور به چوندا آهن، ان جي قومي اسيمبليءَ جي تڪ 122 ۾ ملڪي تاريخ جي سڀ کان مهانگي ترين ضمني چونڊ جو چرچو انهيءَ ڪري ٿيو جو اتان چونڊيل نوازليگ جو نمائندو گذريل ٽن سالن کان قومي اسيمبليءَ جي اسپيڪرشپ جي اهم عهدي تي مسلسل رهيو، پر جڏهن اليڪشن ڪميشن پاران صاف شفاف ڳڻپ ٿين لڳي ته پوءِ اياز صادق پي ٽي آءِ جي سربراهه عمران خان موجب 53 هزار بوگس جعلي ووٽ کڻي اسيمبليءَ جو ميمبر بڻيو. انهيءَ لاءِ وري اليڪشن ڪرائڻ جو اعلان ڪيو ويو، اصولي طرح ڏٺو وڃي ته ڪهڙي به حڪومت هجي، انهن جو ماڻهن تي هروڀرو پريشر، نوڪريون ڏيڻ جا نوان آسرا دلاسا، ڪٿي ايلاز منٿون ته ڪٿي ڏاڍ مڙسي، ڪٿي سرڪاري مشينري جو استعمال ته وري ڪن کي انتقامي ڪارواين ذريعي هيسائڻ جو حربو استعمال ٿيندو رهندو آهي. قومي اسيمبليءَ جي اسپيڪر اياز صادق اين اي 122 تي ڪامياب قرار ڏنو ويو آهي، جڏهن ته سندس مقابلي ۾ بيٺل تحريڪ انصاف جي عبدالعليم خان سخت مقابلو ڪرڻ کانپوءِ هارائي ويو. جڏهن ته انهيءَ ڏهاڙي تي ئي لاهور جي صوبائي تڪ 147 تي پي ٽي آءِ جو اميدوار شعيب صديقي ڪامياب ٿيو آهي ۽ سامهون مقابلي ۾ بيٺل (ن) ليگ جي اميدوار چار هزار ووٽن تان شڪست کاڌي آهي. انهيءَ سان گڏوگڏ قومي اسيمبلي جي اوڪاڙه واري تڪ اين اي 144 تي آزاد اميدوار ڪاميابي ماڻي آهي. معنيٰ ته نواز ليگ جي ٻن اميدوارن بري شڪست کاڌي ۽ هڪ لاهور واري سيٽ اين اي 122 کٽي ورتي. اها سيٽ کٽڻ لاءِ وفاقي حڪومت تمام گهڻا وس ڪيا. هئڻ ته ائين گهرجي ها ته اياز صادق جي مقابلي ۾ پي ٽي آءِ جي بيٺل اميدوار عليم خان کي اڌ تي اڌ ووٽ ملن ها ته پوءِ چئجي ها ته واقعي پنجاب ۾ هاڻي به اوتري ئي نواز ليگ جي مقبوليت آهي، پر هتي سڄي وفاقي حڪومت ۽ وزيراعظم نوازشريف پاڻ هڪ ڏينهن اڳ گورنر هائوس ۾ هڪ طرف کان گورنر پنجاب ته ٻئي پاسي کان وزيراعليٰ پنجاب شهباز شريف انهيءَ پريشانيءَ ۾ هئا ته هاڻي پي ٽي آءِ مان پنهنجي دعويٰ ڪندڙ شهر لاهور مان جند ڪيئن ڇڏائجي. هونئن به اڪثر عوام جو اهو چوڻ هو ته جيڪڏهن انهيءَ لاهور واري سيٽ تان (ن) ليگ شڪست کائي ٿي ته پوءِ انهن جو آئيندو ڏاڍو ڀيانڪ ٿيندو، ان لاءِ انهيءَ سيٽ تي ضد بڻجي ڪري نواز ليگ پنهنجن سڀني وزيرن خواجه سعد رفيق کان ويندي عابد شير علي تائين ۽ وزير اعليٰ پنجاب شهباز شريف جي پٽ حمزه شهباز ۽ مريم نواز تائين سڀني انهيءَ تڪ کي انا جو مسئلو ڪري کٽڻ باوجود به ڄڻ ته هارايو آهي، ڇاڪاڻ ته اخلاقي طرح پي ٽي آءِ جو چيئرمين عمران خان ۽ عليم خان ڪاميابي حاصل ڪئي آهي، انهن پي ٽي آءِ جي هڪ اميدوار عليم خان سان پوري وفاقي حڪومت ۽ انهن جي ڇڏيل ڇاڙتن کي صوبائي توڙي وفاقي حڪومت ۾ سڀ حربا استعمال ڪرڻ باوجود به ايڏي وڏي تعداد ۾ ووٽ کڻڻ ڪا مذاق ڳالهه ناهي. انهيءَ کي سنڌيءَ ۾ چيو ويندو آهي ته اڻويهه ۽ ويهه جو فرق آهي. اياز صادق ٽي سال ۽ انهيءَ کان اڳ ۾ به ٽي ڀيرا اها سيٽ کٽيندو آيو آهي، انهيءَ تڪ تي پهرين کيس وڏي تعداد ۾ ووٽ ملندا هئا، پر هن ڀيري مقابلي ۾ رڳو ٻن ٽن هزارن جو فرق نظر آيو آهي، ضمني چونڊ جي غير حتمي نتيجن وقت رات جو دير تائين (ن) ليگ جي جلسي ۾ ووٽ وٺڻ ۽ انهن جي ڪاميابيءَ جي اعلان باوجود به حمزه شهباز، خواجه سعد رفيق، عابد شير علي سميت ٻين (ن) ليگ جي اڳواڻن وزيرن ۽ اياز صادق وارن جا خوشيءَ جو موقعي هجڻ تي چهرا ڏسڻ وٽان هئا، اهي کٽڻ جي باوجود به ڄڻ هارائي چڪا هئا.

قومي يا صوبائي اسيمبليءَ جي سيٽ تي رهندڙ ميمبر سمجهي ڇڏي ته ايندڙ وقت عوام جي احتساب جو آهي، جيڪي اميدوار جتان ڪامياب ٿي اچن ٿا، پر پنهنجن شهرن جي عام ماڻهن کي روڊ رستا، صفائي سٿرائي، پيئڻ جو صاف پاڻي، بجلي ۽ گئس سميت ٻيون بنيادي سهولتون ڏنيون وڃن. بجلي، گئس، روڊ رستا ۽ پاڻي ئي مليو ته ڄڻ عوام جي اها وڏي ڪاميابي ٿيندي. هن ڀيري حڪومت ۾ ويٺل وزيرن کي ڪجهه احساس ڏيارڻ لاءِ ٻين نون معتبر، معززين، نيڪ نيت ۽ سنڌ جي سڄڻن کي موٽ ملڻ گهرجي، پوءِ جتي بار بار ساڳين چهرن کي ڏسي ڏسي ملڪ ۾ سياسي وبا جو مرض ڦهلجي چڪو آهي، اتي هڪ دفعو انهن نون نعرن، نون چهرن ۽ نون تبديلي آڻيندڙن کي به آزمائي ته ڏسون، جيڪي سدائين عوام کي سدا بهار گيتن ۽ نون نعرن ۾ مشغول رکي ووٽ وٺڻ جي ڳالهه ڪن ٿا، انهن کي هڪ دفعو ضرور ووٽ ڏيڻ گهرجي، پوءِ عمران خان جي تبديلي واري حقيقي ڳالهه سامهون اچي ٿي ته عوام کي ٻيو نه ته گهٽ ۾ گهٽ ڪي پي ڪي واري خوشحال حڪومت ته نصيب ٿيندي. اهڙين مدي خارج حڪومتن ۽ ٿڪلن مان ته نجات ملندي، جيڪي ملڪ جي ڪرپٽ ترين ماڻهو جي گرفتاريءَ تي احتجاج ڪندي ۽ واويلا ڪندي نٿا ٿڪجن ۽ وري اهو چيو وڃي ٿو ته اهو حملو سنڌ تي ڪاهه آهي. سمجهه کان ٻاهر، حقيقتن کان بي خبر اسان جي سادي سودي عوام جي ڪهڙي ڳالهه ڪجي، هڪڙا هنڀوڇين ۾ پورا ته ٻيا وري دهل ۽ شرنائين جي ناچ گانن ۾ مست ٿيندي اهڙا ته گانا ٺاهيا وڃن ٿا جو ناچ ڪندڙ به دنگ رهجي وڃن ٿا. اسان جو عوام ڪڏهن پنهنجي ضمير مطابق فيصلا ڪندو؟ ڪڏهن پنهنجي سنڌ ڌرتيءَ جي اجتماعي سوچ مطابق ووٽ ڪندو؟ عوام ڪڏهن پنهنجي سنڌ جي ٿڃ ملهائيندو ۽ ڪنهن به غاصب، غدار، آمر ۽ لٽيري کي ووٽ ڪرڻ بجاءِ نيڪ نيت مخلص اميدوارن کي ترجيح ڏيندو؟

هن دنيا ۾ اڃا ڪيترائي اڻ ڳڻيا نالا سماجي همدردين سان ڀرپور هڏڏوکي قسم جا اميدوار به آهن، جيڪي ووٽ ملڻ يا نه ملڻ بجاءِ هر ڀيري پاڻ هن نظام ۾ نواڻ آڻڻ لاءِ اليڪشن ۾ حصو وٺندا رهن ٿا، حقيقت ۾ نيڪ نيت اميدوارن جو ووٽ حق آهي، جيڪي ووٽ توهان اسان کان وٺڻ بجاءِ فارم ڀري ويهي رهن ٿا، انهن جي سماجي ڪمن کان عوام مطمئن ۽ متاثر به آهي ته ووٽ انهن جو حق بڻجي ٿو يا نه؟ باقي ڪوڙن ڏٽن، ٺلهن آسرن ۾ رهڻ بجاءِ جن کي بار بار آزمايو ويو هجي وري انهن کي ڪير آزمائي سگهي ٿو؟ عوام شعور سمجهداري ۽ انقلابي سوچ جو مظهر تڏهن بڻجي سگهي ٿو، جڏهن ڪوڙ کي ڪوڙ چئي، نه ته گهٽ ۾ گهٽ انهن ڪوڙن کي دل ۾ ته برو سمجهي ۽ اهڙن ڪوڙن آسرن، ڏٽا ڏيندڙ سياست ڪندڙن کي ووٽ ڇو ڏنو وڃي؟ انهيءَ جي شروعات اول پاڻ کان ۽ پنهنجي احتساب سان ڪرڻ گهرجي! باقي (ن) ليگ جي لاهور واري سيٽ جو سڄي ملڪ جي عوام حشر ڏٺو ته انهن وفاقي ۽ صوبائي حڪمرانن جي وڏي ڪوششن کان پوءِ اها سيٽ ڪهڙي نموني سان کٽي آهي، ايندڙ وقت ڪرپٽ حڪمرانن لاءِ وڏو امتحان هوندو، انهيءَ لاءِ عوام جي داد رسي ڪئي وڃي ۽ پنهنجي پجارو ڪلچر بجاءِ عوامي مسئلن جي حل لاءِ اپاءَ ورتا وڃن.

 

رولڙي جو شڪار بڻيل ٿر ڪول منصوبو

ملڪ هن وقت بدترين انرجي ڪرائسز مان گذري رهيو آهي، ٻهراڙيون ته رهيون ماڳ شهرن ۾ پڻ انڌيرن جو راڄ آهي، ڪارخانا، فيڪٽريون ۽ ٻيو ننڍو وڏو ڪاروبار توانائي جي بحران سبب تمام گهڻو متاثر ٿيو آهي، جيڪڏهن ائين چئجي ته غلط نه ٿيندو ته جيترو دهشتگرديءَ سماج ۾ انتشار پيدا ڪيو آهي، ايترو ئي نقصان بجليءَ جي بحران پڻ ڏنو آهي. ماڻهو ذهني طور مونجهارن جي وَر چڙهيل آهن، فرسٽريشن جو عالم هي آهي جو ڪنهن هڪ علائقي جي ضمني چونڊ جنگ وارو لقاءُ پيش ڪري رهي هئي. ڪير ان کي ڀلي ته سياسي سجاڳي ڪوٺي پر سماجي علم جا ماهر اُن کي فرسٽريشن جو هڪ نمونو قرار ڏين ٿا. آچر ڏينهن لاهور جي اين اي 122 جي ضمني چونڊ دوران جنهن قسم جو ماحول جوڙيو ويو، جيئن ڪارڪن هڪ ٻئي جي آمهون سامهون ٿي بيٺا تنهن جو سبب اصل ۾ اُنهن جي اندر ۾ گڏ ٿيل اُها ڪاوڙ ۽ ڪروڌ آهي، جيڪا معاشي تنگي ۽ سماجي اڻبرابريءَ جي صورت ۾ پروان چڙهي آهي، پر جيئن ته اسين هر معاملي ۾ عطائي طريقو اختيار ڪندا رهيا آهيون ۽ مسئلن کي حل ڪرڻ بجاءِ حوال ڪٽيندا آهيون، تنهن ڪري مسئلا پهريان مونجهارن کي جنم ڏيندا آهن، پوءِ اُهي انتشار جي صورت اختيار ڪندا آهن، جنهن مان ڪيتريون ئي برايون جنم وٺنديون آهن. اڄ جيڪا ملڪ ۾ ڪرپشن، بدامني ۽ بيچيني پکڙيل آهي، تنهن جو سبب پڻ اِهو ئي آهي ته اسين حقيقي مسئلن کان يا ته بي خبر آهيون يا اُنهن کي حل ڪرڻ نٿا چاهيون. جيڪڏهن معاملا حل ڪرڻ چاهيندا هجون ها ته سنڌ جي ٿر ۾ لڌل ڪاري سُون جي ايڏي وڏي ذخيري کان ائين ڪن لاٽار هرگز نه ڪريون ها، بلڪه اُن کي استعمال جوڳو بڻائڻ لاءِ هر قسم جا اُپاءَ وٺي ملڪ کي معاشي مسئلن جي ڌٻڻ مان ڪڍڻ لاءِ ڏينهن رات هڪ ڪريون ها. پر جيئن ته اِهو ڪارو سون سنڌ مان لڌو ويو آهي، تنهنڪري وفاقي سرڪار نه ٿي چاهي ته اُها ڪنهن به حوالي سان سنڌ جي محتاجي کڻي، بلڪه چوڻ وارا ته اِهو به چون ٿا ته اقتداري ڌريون نه ٿيون چاهين ته سنڌ پاڻ ڀري ٿئي ۽ ملڪ جي باقي صوبن کي اُن ڏانهن واجهائڻو پوي، جنهن ڪري ٿر ڪول جهڙي انتهائي اهم معاملي کي پٺي ڏني پئي وڃي. ٿر ڪول ۽ انرجي بورڊ جي حوالي سان ٿيل اجلاس ۾ وفاق کان جيڪي شڪايتون اُٿيون آهن، اُهي ڌيان لهڻن ٿيون ۽ ان حوالي سان وزيراعظم کي خط لکڻ يا آگاهه ڪرڻ جو جيڪو فيصلو ڪيو ويو آهي، اُن تي بنا دير عمل ڪيو وڃي. ايترو ئي نه پر انهيءَ معاملي کي ميڊيا تي پڻ بحث ۾ آندو وڃي جو اِهو فقط سنڌ جو ئي نه پر پوري ملڪ جي معاشي خوشحاليءَ جو معاملو آهي، اُن کي ائين پٺيءَ ڀر اڇلائڻ ڪنهن به ريت چڱو عمل نه ڪوٺبو، اهڙي قسم جي روش سماجي خودڪشيءَ جي مترادف هوندي، تنهن ڪري وفاقي سرڪار کي پنهنجي روين ۾ تبديلي آڻيندي ملڪ جي اهم منصوبن کي ترجيح جي بنيادن تي اڳتي وڌائڻو پوندو ته جيئن عوام کي معاشي قتل کان بچائڻ سان گڏوگڏ انڌيرن مان پڻ ٻاهر ڪڍي سگهجي.

 

انڪوائري ڪميشن کانپوءِ لاهور جي عوام به عمران خان جا الزام رد ڪري ڇڏيا: پرويز رشيد

اسلام آباد (بيورو) سـُڌ سماءَ واري وفاقي وزير پرويز رشيد چيو آهي ته اين اي 122 جي نتيجن عمران خان جي ڪوڙ کي بي نقاب ڪيو آهي، ننڍي چونڊ جا نتيجا نه رڳو ڪپتان جي الزامن جو جواب آهن پر انهن مان ثابت ٿي ويو آهي ته 2013 واريون عام چونڊون به شفاف هيون.  اسلام آباد ۾ ميڊيا سان ڳالهائيندي پرويز رشيد چيو ته عمران خان اڍائي سالن کان شور مچائي رهيو هو ته پارليامينٽ ۽ قومي اسيمبلي جو اسپيڪر جعلي آهن ۽ تڪ تي 50 هزار ووٽ جعلي ڪاسٽ ٿيا. هن چيو ته اين اي 122 جي نتيجن بعد عوام ثابت ڪيو ته تڪ تي ڪي به 50 هزار ووٽ جعلي ڪاسٽ نه ٿيا هئا، عمران خان ڪوڙ ڳالهائي رهيو هو. پرويز رشيد چيو ته انڪوائري ڪميشن کانپوءِ لاهور جي عوام به عمران خان جا الزام رد ڪري ڇڏيا آهن، هاڻي ڪپتان کي ڪوڙ واري سياست ڇڏڻ گهرجي. وفاقي وزير چيو ته اين اي 122 جي ننڍي چونڊ جي نتيجن ۽ 2013 واري نتيجن ۾ ڪو به فرق ناهي،  لاهور جي عوام عمران خان جي ڪوڙ کي بي نقاب ڪري ڇڏيو. هڪ سوال جي جواب ۾ پرويز رشيد چيو ته اوڪاڙه ۾ مهم هلائڻ لاءِ ن ليگ جو ڪو به اميدوار نه ويو هو، عمران خان اتي جلسو به ڪيو پر ان باوجود ن ليگ جي اميدوار 45هزار ۽ ڪپتان جي اميدوار کي 7 هزار ووٽ مليا.

 

محرم دوران دهشتگردي جو خطرو، 95 هنڌ حساس قرار، سيڪيورٽي سخت ڪرڻ جي هدايت

ڪراچي (اسٽاف رپورٽر ) سنڌ جي وڏي وزير سيد قائم علي شاهه چيو آهي ته محرم الحرام ۽ بلدياتي چونڊون ساڳئي وقت ئي ٿي رهيون آهن تنهن ڪري اسان جي انٽيليجنس ادارن ۽ قانون نافذ ڪندڙ کي وڌيڪ چوڪس رهڻو پوندو ڇاڪاڻ ته پابندي مڙهيل تنظيمون نون نالن سان ميدان ۾ اچي رهيون آهن ۽ اسان کي انهن کي هر قيمت تي روڪڻو پوندو. وڏي وزير سيد قائم علي شاهه محرم الحرام جي حوالي سان هڪ اعليٰ سطحي اجلاس جي صدارت ڪندي عاشورن ۽ بلدياتي چونڊ جي حوالي سان جائزو ورتو. اجلاس ۾ سنڌ جي گورنر ڊاڪٽر عشرت العباد خصوصي طور تي شرڪت ڪئي جڏهن ته اجلاس ۾ شرڪت ڪندڙن ۾صوبائي وزير سيد مراد علي شاهه، گهرو زوير سهيل انور سيال، سيد ناصر حسين شاهه، مرتضيٰ وهاب، چيف سيڪريٽري صديق ميمڻ، ڊائريڪٽر جنرل رينجرز بلال اڪبر، وڏي وزير جو پرنسپل سيڪريٽري علم الدين بلو، ايڊيشنل آءِ جي ايز ڊي خواجه، مشتاق مهر، ثناءُالله عباسي، حساس ادارن جا سربراهه ۽ ٻين شرڪت ڪئي. وڏي وزير چيو ته محرم الحرام جون مجلسون ۽ جلوس  پهرين محرم الحرام کان چهلم تائين جاري رهندا آهن تنهن ڪري انهن جي سيڪيورٽي لاءِ صاف ۽ شفاف منصوبو جوڙيو وڃي. ٻئي پاسي مڪاني چونڊن جو مرحلو به جاري آهي انهيءَ ڪري محرم الحرام جي جلوسن ۽ مڪاني ادار ن جي چونڊن لاءِ سڪيورٽي پلان تيار ڪيو وڃي. وزير اعليٰ سيد قائم علي شاهه پوليس ۽ سيڪيورٽي ادارن جي سفارش کي موٽر سائيڪل جي ٻيلهه سواري تي پابندي لڳائڻ جي منظوري ڏني پر ان پابندي تي عورتون، ٻارڙا ۽ بزرگ شهري آجا هوندا. وڏي وزير سيد قائم علي شاهه 10 محرم الحرام تي موبائل سروس ۽ وائفاءِ نيٽ ورڪ سروس معطل ڪرڻ لاءِ گهرو کاتي کي هدايت ڪئي ته وفاقي سرڪار سان رابطو ڪري موبائل فون سروس جي معطلي سفارش ڪري. سنڌ جي وڏي وزير رينجرز، پوليس ۽ حساس ادارن کي هدايت ڪئي ته وڌيڪ چوڪس رهن ڇاڪاڻ ته پابندي مڙهيل تنظيمون نون نالن سان نرواڙ ٿي رهيون آهن ۽ بلدياتي چونڊن ۾ انهن جا ڪارندا حصو وٺڻ لاءِ فارم به جمع ڪري رهيا آهن. ڊائريڪٽر جنرل رينجرز ميجر جنرل بلال اڪبر چيو ته هن گذريل هن 7 سالن جي محرم الحرام جي ڊيٽا تي تحقيق ڪندي اهو اندازو لڳايو آهي ته ڪراچي شهر ۾ 95 حساس هنڌ آهن جتي رينجرز سنڌ پوليس سان گڏجي هڪ سڪيورٽي جا انتظام ڪيا آهن. ان کان سواءِ رينجرز، پوليس ۽ ڪائونٽر ٽيرزم ڊپارٽمينٽ سان گڏجي پابندي مڙهيل تنظيم خلاف هڪ خاص آپريشن شروع ڪيو آهي جيڪو چهلم تائين جاري رهندو، هن آپريشن ذريعي دهشتگرد پنهنجي ناپاڪ ارادن ۾ ڪامياب ٿي نه سگهندا. هن وڌيڪ چيو ته ٻيلهه سواري تي پابندي ۾ سهولت ڏيڻ لاءِ صحافين کي پاسون جاري ڪيون وينديون. هن چيو ته عاشورن جي جلوسن جي نگراني هيليڪاپٽرن ذريعي به ڪئي ويندي ان کان علاوه اسان سپارڪو جي سروينر سسٽم کان به مدد حاصل ڪندا سين. سنڌ جي گورنر ڊاڪٽر عشرت العباد ڪراچي انتظاميا يعني ڪمشنر کي هدايت ڪئي ته ڪي اليڪٽرڪ سان رابطو ڪري عاشورن دوران اسٽريٽ لائٽس تي لوڊشيڊنگ ختم ڪرائي ان سان گڏو گڏ ڪي ايم سي اسٽريٽ لائٽس جي مرمت ڪري ڇاڪاڻ ته اهڙي نازڪ وقت ۾ گهٽين ۾ انڌيري جو فائدو ملڪ دشمن قوتون وٺي سگهن ٿيون. وڏي وزير جي خصوصي معاون ڊاڪٽر قيوم سومرو اجلاس کي ٻڌايو ته هن مختلف فرقن جي عالم سان گڏجاڻيون ڪري اهو يقيني بڻايو آهي محرم الحرام دوران ظابطه اخلاق تي مڪمل عمل ڪيو وڃي. وزير اعليٰ سنڌ سيد قائم علي شاهه تمام ڊويزن جي ڪمشنرن کي هدايت ڪندي چيو ته هو پنهنجي پنهنجي حدن جي ضلعن ۾ امن ڪاميٽيون قائم ڪن. وزيراعليٰ جي پرنسپل سيڪريٽري علم الدين بلو  چيو ته هو سڀني ڊپٽي ڪمشنرن سان رابطي ۾ آهي ۽ هر ضلعي ۾ امن ڪاميٽيون قائم ڪيون ويون آهن ۽ انهن باقائدگي سان ڪم ڪرڻ شروع ڪري ڏنو آهي، وڏي وزير پنهنجي پرنسپل سيڪريٽري کي هدايت ڪئي آهي ته محرم دوران ڊاڪٽرن ۽ پيرا ميڊيڪل عملي جون ڊيوٽيون باقائدگي سان لڳائن جنهن ۾ دوائن جو به جوڳو بندو بست ڪن جيئن ماتمن جو ضرورت پوڻ تي بهتر علاج ٿي سگهي ۽ هن اهڙي قسم جا انتظام بلدياتي ادارن کي به ڪرڻ جي هدايت ڪئي. حساس ادارن وزير اعليٰ کي پابندي مڙهيل تنظيمن جي چر پر جي حوالي سان ٻڌايو ته ڪراچي کان سواءِ شڪارپور، خيرپور ۽ شهدادڪوٽ ۾ سڪيورٽي انتطام وڌيڪ بهتر ڪيا وڃن. ايڊيشنل آءِ جي پوليس ٻڌايو ته سموري صوبي ۾ 64414 پوليس اهڪار پنهنجو سڪيورٽي ڊيوٽيون انجام ڏيندا . انهن اهلڪارن ۾ 41090 اهلڪار مخصوص هنڌن تي ڊيوٽي سر انجام ڏيندا جڏهن ته 5482 اهلڪارن کي پڪيٽن ۾ لڳايو ويندو  8825 پيٽرولنگ ڪندا ان کان سواءِ 9017 کي اسٽينڊ باءِ  رکيو ويو آهي. وڏي وزير رينجرز ۽ پوليس جي ڪم جي واکاڻ ڪندي چيو ته گذريل محرم الحرام ۾ هنن سخت محنت ڪري محرم الحرام دوران ڪنهن به اڻ وڻندڙ واقعو ٿيڻ نه ڏنو ۽ مون کي اميد آهي ته هن محرم دوارن به هنن جي ڪارڪردگي وڌيڪ بهتر هوندي. وڏي وزير رينجرز ۽ پوليس کي هدايت ڪئي بلدياتي چونڊن جي حوالي سان سڪيورٽي منصوبو جوڙين ڇاڪاڻ ته بلدياتي چونڊين جو پهريون مرحلو جيئن ئي پورو ٿيندو ته ٻيون ۽ ٽيون مرحلو شروع ٿي ويندو تنهن ڪري اسان کي انهن  چونڊن ۾ مڪمل سڪيورٽي فراهم ڪرڻي آهي.

 

رٽرننگ آفيسر لاهور جي تڪ اين اي 122 ۽ پ پ 147، اوڪاڙه جي تڪ 144 جي غير حتمي نتيجن جو اعلان ڪري ڇڏيو

لاهور/اوڪاڙه (اين اين آءِ) لاهور جي تڪ اين اي 122 ۽ پي پي 147 جڏهن ته اوڪاڙه جي تڪ اين اي 144 جي غير حتمي نتيجن جو اعلان ڪيو ويو اين اي 122 مان مسلم ليگ (ن) جي اميدوار سردار اياز صادق 74 هزار 525ووٽ کڻي ڪامياب ٿيو جڏهن ته پ پ 147 مان تحريڪ انصاف جي شعيب صديقي 31 هزار 564 ووٽ کنيا اين اي 122 ۾ ٽرن آئوٽ 43.10 سيڪڙو ۽ پ پ 147 ۾ ٽرن آئوٽ 44.72 سيڪڙو رهيو ٻنهي تڪن ۾ وڌن ووٽن مان جملي طور 2923 ووٽ رد قرار ڏنا ويا جڏهن ته اوڪاڙه جي تڪ اين اي 144 مان آزاد اميدوار چوڌري رياض الحق 85 هزار 714 ووٽ کڻي ڪامياب ٿيو جتي ٽرن آئوٽ 51 سيڪڙو رهيو لاهور جي تڪ اين اي 122 ۽ پ پ 147 جي رٽرننگ آفيسر شيخ زاهد اقبال ٻنهي تڪن جي غير حتمي نتيجن جو اعلان ڪيو غير حتمي نتيجن مطابق تڪ اين اي 122 مان مسلم ليگ (ن) جو اميدوار سردار اياز صادق 74525 ووٽ کڻي ڪامياب ٿيو ان جي مقابلي ۾ تحريڪ انصاف جي اميدوار عبدالعليم خان 72 هزار 82 ووٽ کنيا اهڙي طرح کيس 2443 ووٽ سان شڪست ملي جڏهن ته پيپلزپارٽي جي بئرسٽر عامر حسن صرف 819 ووٽ کنيا انهي تڪ مان پاڪستان تحريڪ انصاف جي اميدوار شگفته ملڪ 37 پاڪستان جسٽس پارٽي جو ملڪ منصب اعواڻ 11، آپ جناب سرڪاري پارٽي جو نواب ڊاڪٽر امبر شهزادي صرف 11 ووٽ کنيا جڏهن ته آزاد اميدوار خرم قريشي 268 حڪم شيخ معين الدين قريشي 47، جمشيد اقبال 42 راجا صفدر زمان هزاروي 10، سرفراز قريشي 29 صاحبزاده عبدالقيوم فاروقي 16، محمد نويد نواز، 35 محمد يونس ناصر 22 ميان لئين رحمان 38 ۽ ميان محمد يامين ٽيپو 5 ووٽ کنيا.